(कोविड-19 संबंधी पत्र सूचना कार्यालयाद्वारे जारी बातम्‍या आणि सत्‍यता पडताळणी बातम्‍या समाविष्‍ट)

#Unite2FightCorona

#IndiaFightsCorona

दिल्ली-मुंबई, 6 नोव्हेंबर 2020

पंतप्रधान नरेंद्र मोदी गुजरातमधल्या हजिरा येथील रो-पॅक्स टर्मिनलचे दि. 8 नोव्हेंबर, 2020 रोजी सकाळी 11.00 वाजता उद्घाटन करणार आहेत.  व्हिडिओ कॉन्फरन्सिंगच्या माध्यमातून हा कार्यक्रम होणार आहे. यावेळी ते हजिरा ते घोघा रो-पॅक्स फेरी सेवेला हिरवा झेंडा दाखविणार आहेत. पंतप्रधानाच्या दूरदृष्टीनुसार देशाच्या आर्थिक विकासासाठी जलमार्गांचा वापर करण्यासाठी या योजनेचे केलेले काम म्हणजे एक महत्वाचे आणि मोठे पाऊल आहे. याप्रसंगी पंतप्रधान जलमार्ग सेवेच्या स्थानिक वापरकर्त्यांबरोबर संवाद साधणार आहेत. या कार्यक्रमाला केंद्रीय जहाजबांधणी राज्यमंत्री आणि गुजरातचे मुख्यमंत्री उपस्थित राहणार आहेत.

आयआयटी-म्हणजेच भारतीय तंत्रज्ञान संस्था, दिल्लीच्या 51 व्या दीक्षांत समारंभाचे प्रमुख पाहुणे म्हणून पंतप्रधान नरेंद्र मोदी उपस्थित राहतील. येत्या 7 नोव्हेंबरला सकाळी 11 वाजता होणाऱ्या या समारंभात ते विद्यार्थी आणि उपस्थितांशी संवाद साधतील. केंद्रीय शिक्षण मंत्री आणि शिक्षण राज्यमंत्री देखील या कार्यक्रमाला उपस्थित राहतील.

पंतप्रधान  नरेंद्र मोदी यांच्या अध्यक्षतेखाली व्हर्च्युअल जागतिक गुंतवणूकदार गोलमेज परिषद पार पडली. गोलमेजला संबोधित करताना पंतप्रधान म्हणाले की, या वर्षभरात भारताने धैर्याने  महामारीचा सामना केला तेव्हा जगाने भारताचे राष्ट्रीय चरित्र आणि भारताचे खरे सामर्थ्य  पाहिले.  ते म्हणाले की, महामारीने  जबाबदारीची भावना, करुणेची भावना, राष्ट्रीय एकता आणि नवसंशोधन या गुणांचे दर्शन घडवले ज्यासाठी भारतीय ओळखले जातात.

आरोग्य मंत्रालयाची कोविड-19 घडामोडींवरील माहिती :

देशात गेल्या 24 तासांत कोरोनारुग्णांची संख्या  50,000 पेक्षा कमी आढळली आहे, तर याच काळात 54,000 पेक्षा अधिक रुग्ण कोरोनामुक्त झाले आहेत.गेल्या पाच आठवड्यांपासून भारतात, कोरोना संसर्गित रूग्णांपेक्षा बरे झालेल्या रुग्णांचे प्रमाण सातत्याने जास्त राहिले आहे.

गेल्या 24 तासात 54,157 कोविड रुग्ण उपचारानंतर बरे होऊन त्यांना घरी सोडण्यात आले. तर याच काळात देशात 47,638 नवे रुग्ण आढळले आहेत.

गेल्या पाच आठवड्यांपासून देशात दररोज आढळणाऱ्या रुग्णसंख्येत सातत्याने घट होत आहे. ऑक्टोबरच्या पहिल्या आठवड्यात दररोज रुग्णांची सरासरी संख्या 73,000 पेक्षा अधिक असायची,मात्र आता ही संख्या सुमारे 46,000  रुग्णांपर्यंत कमी झाली आहे.

सक्रीय रुग्णांच्या संख्येतही सातत्याने घट होतांना दिसते आहे. सध्या एकूण सक्रीय रुग्णांची संख्या 5,20,773 इतकी आहे, देशातील एकूण कोरोना रुग्णांच्या तुलनेत सक्रीय रुग्णांचे प्रमाण केवळ 6.19% इतके आहे.

सक्रीय रूग्णांच्या संख्येत होत असलेल्या घसरणीमागे महत्वाचे कारण म्हणजे नव्या रुग्णांच्या तुलनेत बरे होणाऱ्या रुग्णांचे प्रमाण सातत्याने अधिक आहे. बरे झालेल्या एकूण रुग्णांची संख्या आज 77,65,966 इतकी आहे. बरे झालेले रुग्ण आणि सक्रीय रुग्ण यांच्यात सुमारे 72.5 लाखांचा (72,45,193) फरक आहे. यामुळे देशात रुग्ण बरे होण्याचा दर 92.32% इतका झाला आहे.

नव्याने बरे झालेल्या कोविड रुग्णांपैकी 80% रुग्ण 10 राज्ये आणि केंद्रशासित प्रदेशातील आहे.

एकट्या महाराष्ट्रात सर्वाधिक म्हणजे 11,000 रुग्ण बरे झाले आहेत.

तर नव्याने आढळलेल्या रुग्णांपैकी 79% टक्के रुग्ण देखील 10 राज्ये आणि केंद्रशासित प्रदेशातील आहेत.

महाराष्ट्रात सर्वाधिक म्हणजे 10,000 पेक्षा जास्त रुग्ण आढळले असून त्याखालोखाल केरळ मध्ये 9,000 पेक्षा जास्त रुग्ण आढळले आहेत.

गेल्या 24 तासात देशभरात कोरोनामुळे 670  मृत्यू झाले. यापैकी 86% रुग्ण 10 राज्ये आणि केंद्रशासित प्रदेशातील आहेत.  तर त्यातही 38 टक्के मृत्यू (256) महाराष्ट्रात आणि त्यापाठोपाठ दिल्लीत सर्वाधिक (66) मृत्यू झाले आहेत.

इतर अपडेट्स:

• हवेतील प्रदूषण कमी करण्यासाठी केंद्र सरकार सातत्याने सर्व पातळ्यांवरून उपाययोजना करत आहे, अशी माहिती केंद्रीय पर्यावरण, वन आणि हवामान बदल मंत्री प्रकाश जावडेकर यांनी दिली आहे. जावडेकर यांच्या हस्ते आज दूरदृश्य प्रणालीद्वारे, जैविक कचऱ्यापासून कम्प्रेस्ड बायोगॅसची निर्मिती करणाऱ्या देशातल्या पहिल्या प्रात्यक्षिक प्रकल्पाचे उद्घाटन झाले, त्यावेळी ते बोलत होते.   
• केंद्रीय सुक्ष्म, लघु आणि मध्यम उद्योग मंत्रालयाने सामान्य नागरिकांना आणि संभाव्य उद्योजकांना पंतप्रधानांच्या रोजगार निर्मिती कार्यक्रमाच्या नावाखाली फसवणूक करण्यापासून सजग केले आहे. आज प्रसिद्ध केलेल्या निवेदनात एमएसएमई मंत्रालयाने अशी माहिती दिली आहे की पीएमईजीपी योजनेंतर्गत कर्ज देणारी खासगी व्यक्ती किंवा एजन्सीमार्फत संभाव्य उद्योजक/ लाभार्थींकडे संपर्क साधला जात आहे आणि कर्ज मंजुरीची पत्रे हस्तांतरित केली जात आहेत आणि उद्योजकांकडून पैसे आकारून त्यांची फसवणूक केली आहे. 
• केंद्रीय सामाजिक न्याय आणि सक्षमीकरण मंत्री  थावरचंद गहलोत यांनी ऑनलाईन व्हिडिओ स्ट्रीमिंगच्या माध्यमातून उत्तर मुंबईतील दिव्यांगजनांना मदत साधने आणि  उपकरणाच्या मोफत वितरणासाठी एडीआयपी शिबिराचे उद्‌घाटन केले.  उत्तर मुंबई लोकसभा मतदार संघाचे खासदार गोपाल शेट्टी कार्यक्रमाच्या अध्यक्षस्थानी होते.  कोविड -19 महामारीपासून बचाव करण्यासाठी सर्व प्रतिबंधात्मक उपायांचे पालन करत हे शिबिर उत्तर मुंबईतील कांदिवली इथल्या पोईसर जिमखाना येथे आयोजित करण्यात आले होते.
• गृह मंत्रालयाच्या अनलॉक 5.0 मार्गदर्शक तत्त्वांच्या आधारे आणि संस्कृती आणि सर्जनशील उद्योगातील विविध हितधारकांकडून आलेल्या सूचना विचारात घेतल्यानंतर, सांस्कृतिक मंत्रालयाने  “संग्रहालये, आर्ट गॅलरी आणि प्रदर्शन” पुन्हा सुरु करण्यासाठी विस्तृत प्रमाणित कार्यप्रणाली (SOP) जारी केली . प्रतिबंधित क्षेत्रात  कोणतीही संग्रहालये आणि / किंवा आर्ट गॅलरी  पुन्हा उघडली जाणार नाहीत हे स्पष्ट केले आहे. तसेच  राज्य / केंद्रशासित प्रदेश सरकार त्यांच्या क्षेत्र मूल्यांकनानुसार अतिरिक्त उपाय प्रस्तावित करण्याबाबत विचार करू शकतात.
• विद्यापीठ अनुदान आयोगाने विद्यापीठे आणि महाविद्यालये पुन्हा सुरू करण्यासाठी मार्गदर्शक तत्त्वे तयार करुन जारी केली आहेत. ही मार्गदर्शक तत्त्वे आरोग्य आणि कुटुंब कल्याण मंत्रालयाने तपासली असून गृह मंत्रालय आणि शिक्षण मंत्रालयाने मंजूर केली आहेत. स्थानिक परिस्थिती आणि शासकीय अधिकाऱ्यांच्या निर्देशानुसार संस्था ही मार्गदर्शक तत्त्वे स्वीकारू शकतात.
• गोवा टपाल विभागाकडून 09 नोव्हेंबर रोजी “कोविड विरोधात लढण्यासाठी, मानसिक आरोग्याचा सांभाळ” या विशेष कव्हर आणि शिक्क्याचे प्रकाशन करण्यात येणार आहे. या विशेष कव्हर आणि शिक्क्याचे पुरस्कर्ते गोवा फिलाटेलिक आणि न्यूमिझमॅटिक सोसायटी आहे. तसेच गोवा टपाल विभागाकडून 09 नोव्हेंबर रोजी “कोविड-19 विरोधात लढण्यासाठी संपर्क मागोव्यात सहयोग करा” या शिक्क्याचे प्रकाशन करण्यात येणार आहे. 
• एलएनजी म्हणजे-द्रवरूप नैसर्गिक वायू इंधनाचे लाभ ग्राहक आणि सर्वसामान्य लोकांपर्यंत पोहोचवण्यासाठी, एक जनजागृती मोहीम राबवायला हवी, अशी सूचना केंद्रीय पेट्रोलियम आणि नैसर्गिक वायू मंत्री धर्मेंद्र प्रधान यांनी केली. या क्षेत्राशी संबंधित विविध हितसंबंधी गटांसमोर आयोजित ‘एलएनजी-वाहतुकीचे इंधन’ या विषयावरील वेबिनारमध्ये ते आज बोलत होते.
• वाजवी भाडे मर्यादा, ज्याअंतर्गत विमान कंपन्यांना भाडे आकारावे लागत होते त्यास हवाई वाहतूक मंत्रालयाने 24 फेब्रुवारी 2021 पर्यंत मुदतवाढ दिली आहे. वाजवी भाडे मर्यादा 21 मे 2020 पासून लागू आहे. दैनंदिन प्रवासी वाहतूक 1 नोव्हेंबर 2020 रोजी 2.05 लाखापर्यंत पोहचली आहे. 
• कोविड-19 महामारीमुळे प्रवासावरील निर्बंधामुळे नवी दिल्लीहून व्हिडिओ कॉन्फरन्सद्वारे भारत आणि इंडोनेशिया दरम्यान कोळशावरील 5 व्या संयुक्त कृती गटाचे  (जेडब्ल्यूजी) भारताने  यशस्वी आयोजन केले. कोळसा मंत्रालयाचे अतिरिक्त सचिव विनोद कुमार तिवारी यांनी आत्मनिर्भर भारत अंतर्गत कोळशामध्ये स्वयंपूर्णतेसाठी भारताने हाती घेतलेले उपक्रम आणि दोन्ही देशांतील कोळसा क्षेत्रातील व्यवसायांसाठी आवश्यक बाबी अधोरेखित केल्या.

महाराष्ट्र अपडेट्स:  

महाराष्ट्रात दैनंदिन कोविड रुग्णांच्या संख्येत घट होताना दिसून येत आहे. महाराष्ट्रात गुरुवारी 5,246 पॉझिटिव्ह रुग्णांची नोंद झाली. दिल्लीतील दैनंदिन रुग्णांच्या तुलनेत ही संख्या खूपच कमी आहे. मुंबईत 841 नवीन कोविड रुग्णांची नोंद झाली असून सक्रिय रुग्णांची संख्या 16,116 इतकी आहे, जी राज्याच्या सक्रिय रुग्णांच्या प्रमाणात 1/6 इतकी आहे. कोरोनाच्या महामारीच्या पार्श्वभूमीवर आगामी उत्सवाच्या काळाचे एक मोठे आव्हान उभे राहिले असून, महाराष्ट्र सरकारने दिवाळीसाठी आज मार्गदर्शक तत्वे जारी केली आहेत. लोकांना फटाके न फोडण्याचे आवाहन केले आहे.

FACT CHECK

* * *

M.Chopade.S.Tupe/D.Rane

सोशल मिडियावर आम्हाला फॉलो करा: @PIBMumbai    /PIBMumbai    /pibmumbai  pibmumbai[at]gmail[dot]com