Da kaba rakhe ia u mawmer ba kongsan ha ka jingïaid lynti jong ka roi ka par ha ki jaka nongkyndong jong ka India, ka Sorkar India ha ka 11 tarik u Jymmang 2026 ka la pyntip ïa ka jingpyntreikam ïa ka Viksit Bharat – Guarantee for Rozgar and Ajeevika Mission (Gramin) [VB–G RAM G] Act, 2025, ban pyntreikam ha ka ri baroh kawei naduh ka 1 tarik Naitung 2026.

Da ka jingtreikam jong ka VB–G RAM G Act, ka Mahatma Gandhi National Rural Employment Guarantee Act (MGNREGA), 2005 kan duh noh naduh katei hi ka tarik. Kane ka pyni ia ka jingkylla kaba kongsan ha ka rukom kyntiew ia ki jaka nongkyndong jong ka India bad ka wanrah ia ka juk ba thymmai jong ka jingkylla kaba iasohlang, kaba la pynkhreh na ka bynta ka lawei bad ka jingkylla ha ki jaka nongkyndong katkum ka jingseisoh, kaba iahap bad ka jing thmu jong ka ri na ka bynta ka Viksit Bharat @2047.

Hapoh ka rukom treikam kaba thymmai, man la ka longïing ha ki jaka nongkyndong kaba ki dkhot kiba la san ki trei mon sngewbha ia ki kam bylla kin ioh ïa ka jingkular katkum ka aiñ kaba long 125 sngi ka jingtrei ba ioh jingsiew ha man la ka snem mang tyngka. Ka jingpynthikna ba la pyniar ka long ban pynkhlain ia ka jingshngain ha ka kamai kajih, ban kyntiew ia ka ioh ka kot ha ki jaka nongkyndong bad ban kyrshan ia ka roi ka par kaba iaineh ha ki shnong.

Nion hangne ban peit ia ka jingpynbna ha ka kot khubor na ka bynta ka jingsdang ia ka VB–G RAM G Act.

Yn ai kam ia ki nongtrei pyrshah ia ka jingdawa jong ki ban trei hapoh ka por ba la buh, lada ym lah ki nongtrei kin dang don hok ban ioh ia ka bai bylla khlem kam katkum ki kyndon jong ka ain.

Ka Ain ka ban jur ia ka jingsiew bai bylla ha ka por kaba biang bad kaba shai. Ia ki jingsiew dei ban phah beit beit sha ki bank lane post office account jong ki nongtrei lyngba ka Direct Benefit Transfer (DBT). Ia ki bai bylla dei ban siew man ka taiew lane hapoh khatsan sngi naduh ba khang ia ka muster roll, lada ym lah ki nongtrei kin ioh ia ka jingiew bai lutksan katkum ki kyndon jong ka ain.

Ka Sorkar India ka la pynthikna ïa ki jingpynbiang ia ki bynta ba bniah kiba iadei bad ka pisa na ka bynta ka jingpyntreikam hok ïa ka Viksit Bharat – G RAM G Act, 2025. Na ka bynta u snem mang tyngka 2026–27, ka sorkar pdeng ka la mang pisa haduh T.95,692.31 klur, ka jingmang kaba heh tam ha ka kyrdan Mang Tyngka na ka bynta ka prokram ai kam ai jam ha ki jaka nongkyndong.

Lada kynthup ïa ka jingnoh synñiang jong ki Jylla, ka jinglut baroh jong ka prokram la antad ba kan palat ïa ka T.1.51 lak klur. La khmih lynti ba kane ka jingmang pisa kan ai bor thymmai ia ka jingkyntiew ia ki jingdon jingem ha ki jaka nongkyndong, ka jingpynmih kham bun ki lad ioh kam bad ka jingkyntiew ia ka ioh ka kot ha ki jaka nongkyndong.

Khnang ban pynthikna ia ka jingkylla kaba iaid beit iaid ryntih bad kaba phaikhmat sha ki nongtrei, ka ioh kam ioh jam hapoh ka MGNREGA kan bteng khlem jingthut haduh ka tarik ban sdang ia ka ain kaba thymmai. Ia ki kam kiba dang iaid hapoh ka MGNREGA haduh ka 30 tarik Jylliew yn buh bad rah ha ka rukom treikam kaba thymmai khlem jingeh da kaba pynthikna ia ka jingiahap bad ki kyndon jong ka Viksit Bharat G RAM G. Ka jingdon ka kam ha ka por bad ka jingsiew kloi ia ki bainong sha ki nongtrei ha ki jaka nongkyndong kalong ka jingthmu ba kongsan jong ka Sorkar.

Ka Sorkar ka la pynbiang ia ka mang tyngka na ka bynta ki nongtrei bylla sha ki Jylla bad ki Union Territory katkum ki rukom dawa bad ki jingdonkam ha ki jaka khnang ba ym don kawei ruh ka longiing ha ki jaka nongkyndong kaba dei hok ban ioh kan iakynduh jingeh ha ka por shwa ban sdang ia ka VB–G RAM G Act.

Ki Job Card MGNREGA ba la pynshisha da ka e-KYC ba la don lypa kin dang treikam hapoh ka VB–G RAM G tad haduh ban da pynmih ïa ki Gramin Rozgar Guarantee Card. Ki nongtrei ki bym don ia ki Job Card ki lah ban pynrung kyrteng ha ka Gram Panchayat. Ki nongtrei kin nym shah khang lad ban ioh kam tang namar ka e-KYC kaba dang sahteng, bad ki jingpynbeit ban pynsuk ban pyndep ia ka e-KYC kin bteng ha ki shnong da ki Sorkar Jylla.

Ia ki kyndon bapher bapher kiba la shna hapoh ka VB–G RAM G Act, 2025 la pynkhreh da ka Tnad Rural Development ha ka jingïamir jingmut bad ki jylla bad ki Union Territory.

• Ki kyndon halor ki kyndon ba kongsan na ka bynta ka jingai bynta ba thikna
• Ki kyndon jong ki jingpynbeit ba kylla
• Ki kyndon jong ka National Level Steering Committee
• Ki kyndon jong ka Central Gramin Rozgar Guarantee Council
• Ki kyndon kiba iadei bad ka jingpynlut ha ka kam synshar
• Ki kyndon ban pynbeit ia ki jingeh
• Ki kyndon halor ka rukom siew ia ki bainong bad ka Unemployment Allowance
• Ki kyndon halor ka rukom ban bah ia ka jingpynlut kaba donkam shuh shuh
• Ki kyndon ha kaba iadei bad ka rukom ban kit ia ki jinglut jingsep jong ka Skhim na ka bynta ki Union Territory khlem ka iing dorbar thawain.

Ban pynthikna ia ka jingkylla kaba iaid beit iaid ryntih na ka Mahatma Gandhi NREGA sha ka VB–G RAM G, la pynrung ia ki kyndon kiba iadei ha ka Transitional Provisions Rules, ia kaba la khmih lynti ba yn sa pynmih shen. Kiwei pat ki kyndon bapher bapher, kumba la kdew haneng, la shna ruh bad yn sa pynmih shen ban ioh jingmut na ki paidbah.

La khmih lynti ba ka Viksit Bharat – G RAM G Act, 2025 kan ai bor thymmai ïa ka jingpynmih ia ki lad ioh kam ïoh jam, ka roi ka par ha ki jaka nongkyndong bad ka jinglah kyrshan dalade ha ki shnong ki thaw. Da kaba buh ia ki Gram Panchayat kum u rishot ba kongsan jong ka jingkylla ha ki jaka nongkyndong, ka Ain ka la pynkhreh ban long u mawmer ba kongsan ha kaba tei ia ki jaka nongkyndong jong ka Bharat kiba la pynkupbor, kiba seisoh bad kiba la kiew shaphrang.

Nion hangen ban peit ia ka FAQ

Nion hangne ban ioh ia ka jingbatai kaba bniah

*****