ಬಲವಾದ ದೇಶೀಯ ಬೇಡಿಕೆ, ರಚನಾತ್ಮಕ ಸುಧಾರಣೆಗಳು ಮತ್ತು ಸ್ಥಿರವಾದ ಸ್ಥೂಲ ಆರ್ಥಿಕ ಪರಿಸರದ ಬೆಂಬಲದೊಂದಿಗೆ ಭಾರತದ ಬೆಳವಣಿಗೆಯ ದೃಷ್ಟಿಕೋನವು ಆಶಾದಾಯಕವಾಗಿ ಮುಂದುವರಿಯಲಿದೆ. ಈ ವರ್ಷದಲ್ಲಿ ದೇಶವು ಮೂರು ಸಾವರೀನ್‌ ರೇಟಿಂಗ್‌ (sovereign rating) ಉನ್ನತೀಕರಣಗಳನ್ನು ಪಡೆದುಕೊಂಡಿದೆ. 2026-27ನೇ ಹಣಕಾಸು ವರ್ಷದ ಬಜೆಟ್‌ ನೊಂದಿಗೆ ಕೇಂದ್ರ ಹಣಕಾಸು ಮತ್ತು ಕಾರ್ಪೊರೇಟ್ ವ್ಯವಹಾರಗಳ ಸಚಿವರಾದ ಶ್ರೀಮತಿ ನಿರ್ಮಲಾ ಸೀತಾರಾಮನ್ ಅವರು ಸಂಸತ್ತಿನ ಮುಂದೆ ಮಂಡಿಸಿದ 'ಸ್ಥೂಲ ಆರ್ಥಿಕ ಚೌಕಟ್ಟಿನ ಹೇಳಿಕೆ' ಮತ್ತು 'ಮಧ್ಯಮ ಅವಧಿಯ ಹಣಕಾಸಿನ ನೀತಿ ಮತ್ತು ಹಣಕಾಸಿನ ನೀತಿ ತಂತ್ರದ ಹೇಳಿಕೆ'ಯ ಪ್ರಕಾರ, ಹಣದುಬ್ಬರದ ದೃಷ್ಟಿಕೋನವು ಸೌಮ್ಯವಾಗಿದೆ. ಸಾರ್ವಜನಿಕ ಹೂಡಿಕೆ, ನಿಯಂತ್ರಣ ಸಡಿಲಿಕೆ, ಕಾರ್ಮಿಕ ಮಾರುಕಟ್ಟೆ ಸುಧಾರಣೆಗಳು, ಮಾನವ ಬಂಡವಾಳ ಹೂಡಿಕೆಗಳು, ತೆರಿಗೆ ಸುಧಾರಣೆಗಳು, ಡಿಜಿಟಲ್ ರೂಪಾಂತರ ಮತ್ತು ಆರ್ಥಿಕತೆಯ ಔಪಚಾರಿಕೀಕರಣವು ಆರ್ಥಿಕತೆಯನ್ನು ಹೆಚ್ಚಿನ ಬೆಳವಣಿಗೆಯ ಪಥದತ್ತ ಕೊಂಡೊಯ್ಯುವ ನಿರೀಕ್ಷೆಯಿದೆ ಎಂದು ಈ ದಾಖಲೆಯು ತಿಳಿಸುತ್ತದೆ. ಕಾರ್ಪೊರೇಟ್ ಮತ್ತು ಹಣಕಾಸು ವಲಯಗಳಲ್ಲಿನ ಬಲವಾದ ಆಯವ್ಯಯ ಪಟ್ಟಿಗಳು, ಹೆಚ್ಚಿದ ಖಾಸಗಿ ವಲಯದ ಹೂಡಿಕೆಯಿಂದ ಉತ್ತೇಜಿತಗೊಂಡು ಬೆಳವಣಿಗೆಯ ಸಕಾರಾತ್ಮಕ ಚಕ್ರವನ್ನು ನಡೆಸುವ ನಿರೀಕ್ಷೆಯಿದೆ.

ಸ್ಥೂಲ ಆರ್ಥಿಕ ಚೌಕಟ್ಟಿನ ವಿವರಣೆ 

ಆರ್ಥಿಕ ಬೆಳವಣಿಗೆ 

ರಾಷ್ಟ್ರೀಯ ಅಂಕಿಅಂಶ ಕಚೇರಿಯು (NSO) ಪ್ರಕಟಿಸಿದ ಮೊದಲ ಮುಂಗಡ ಅಂದಾಜುಗಳ ಪ್ರಕಾರ, 2025-26ನೇ ಹಣಕಾಸು ವರ್ಷದಲ್ಲಿ ಭಾರತದ ನೈಜ ಜಿಡಿಪಿ (Real GDP) ಶೇಕಡಾ 7.4 ರಷ್ಟು ಬೆಳವಣಿಗೆಯಾಗುವ ನಿರೀಕ್ಷೆಯಿದೆ ಮತ್ತು ನಾಮಮಾತ್ರದ ಜಿಡಿಪಿ (Nominal GDP) ಬೆಳವಣಿಗೆಯು ಶೇಕಡಾ 8 ರಷ್ಟಿರಲಿದೆ ಎಂದು ಅಂದಾಜಿಸಲಾಗಿದೆ. ಸೇವಾ ವಲಯವು ಶೇಕಡಾ 9.1 ರಷ್ಟು ವಿಸ್ತರಣೆಯಾಗುವ ಮೂಲಕ ಆರ್ಥಿಕತೆಯ ಪ್ರಮುಖ ಬೆಳವಣಿಗೆಯ ಚಾಲಕಶಕ್ತಿಯಾಗಿ ಮುಂದುವರಿದಿದೆ. ಉತ್ಪಾದನಾ ಮತ್ತು ನಿರ್ಮಾಣ ವಲಯಗಳು ಶೇಕಡಾ 7 ರಷ್ಟು ಬೆಳವಣಿಗೆ ದಾಖಲಿಸಿದ್ದರೆ, ಕೃಷಿ ವಲಯವು ಶೇಕಡಾ 3.1 ರಷ್ಟು ಬೆಳೆಯುವ ಅಂದಾಜಿದೆ. 2026-27ನೇ ಹಣಕಾಸು ವರ್ಷದ ಬಜೆಟ್‌ನಲ್ಲಿ, 2025-26ರ ಮೊದಲ ಮುಂಗಡ ಅಂದಾಜುಗಳಿಗಿಂತ ನಾಮಮಾತ್ರದ ಜಿಡಿಪಿಯು ಶೇಕಡಾ 10.0 ರಷ್ಟು ಏರಿಕೆಯಾಗಲಿದೆ ಎಂದು ಅಂದಾಜಿಸಲಾಗಿದೆ.

ಬಳಕೆ ಮತ್ತು ಹೂಡಿಕೆ 

ದೇಶೀಯ ಬೇಡಿಕೆಯು ಆರ್ಥಿಕ ಬೆಳವಣಿಗೆಗೆ ಪ್ರಮುಖ ಆಧಾರವಾಗಿ ಮುಂದುವರಿಯುತ್ತಿದೆ. ಖಾಸಗಿ ಅಂತಿಮ ಬಳಕೆ ವೆಚ್ಚವು (PFCE) ಶೇಕಡಾ 7 ರಷ್ಟು ಬೆಳೆಯುವ ನಿರೀಕ್ಷೆಯಿದೆ, ಇದು ಜಿಡಿಪಿಯ ಶೇಕಡಾ 61.5 ರಷ್ಟಾಗಲಿದ್ದು, 2011-12ನೇ ಹಣಕಾಸು ವರ್ಷದ ನಂತರದ ಅತ್ಯುನ್ನತ ಮಟ್ಟವನ್ನು ತಲುಪಲಿದೆ. ಸರ್ಕಾರಿ ಅಂತಿಮ ಬಳಕೆ ವೆಚ್ಚವು ಸಹ 2024-25ರ ಹಣಕಾಸು ವರ್ಷದಲ್ಲಿನ ಶೇಕಡಾ 2.3 ರಷ್ಟಕ್ಕೆ ಹೋಲಿಸಿದರೆ 2025-26ರಲ್ಲಿ ಶೇಕಡಾ 5.2 ರಷ್ಟು ಪ್ರಬಲವಾಗಿ ಚೇತರಿಸಿಕೊಳ್ಳುವ ಅಂದಾಜಿದೆ. ಯುಪಿಐ ವಹಿವಾಟುಗಳು, ವಾಯು ಮತ್ತು ರೈಲು ಸಂಚಾರ, ಇ-ವೇ ಬಿಲ್‌ ಗಳು ಮುಂತಾದ ಉನ್ನತ-ಆವರ್ತನ ಸೂಚಕಗಳು ನಗರ ಮತ್ತು ಗ್ರಾಮೀಣ ಎರಡೂ ಪ್ರದೇಶಗಳ ಬಳಕೆಯಲ್ಲಿನ ನಿರಂತರ ವೇಗವನ್ನು ಪ್ರತಿಬಿಂಬಿಸುತ್ತವೆ. ಹೂಡಿಕೆ ಚಟುವಟಿಕೆಯು ಸದೃಢವಾಗಿ ಮುಂದುವರಿದಿದ್ದು, ಒಟ್ಟು ಸ್ಥಿರ ಬಂಡವಾಳ ರಚನೆಯು (GFCF) 2025-26ರಲ್ಲಿ ಶೇಕಡಾ 7.8 ರಷ್ಟು ಏರಿಕೆಯಾಗಿದೆ, ಇದು ಕಳೆದ ವರ್ಷಕ್ಕಿಂತ ಹೆಚ್ಚಿನದಾಗಿದೆ. ಇದಲ್ಲದೆ, ಕಳೆದ ಮೂರು ವರ್ಷಗಳಿಂದ ಜಿಡಿಪಿಯಲ್ಲಿ ಜಿ ಎಫ್‌ ಸಿ ಎಫ್ (GFCF) ಪಾಲು ಸುಮಾರು ಶೇಕಡಾ 30 ರಷ್ಟು ಸ್ಥಿರವಾಗಿದೆ.

ಬಾಹ್ಯ ವಲಯ 

2024-25ರ ಹಣಕಾಸು ವರ್ಷದಲ್ಲಿ ಭಾರತದ ಒಟ್ಟು ರಫ್ತು (ಸರಕು ಮತ್ತು ಸೇವೆಗಳು) 825.3 ಬಿಲಿಯನ್ ಯುಎಸ್ ಡಾಲರ್ ತಲುಪಿದೆ ಮತ್ತು 2025-26ರಲ್ಲಿಯೂ ಈ ವೇಗವು ಮುಂದುವರಿದಿದೆ. ಅಮೆರಿಕ ವಿಧಿಸಿದ ಸುಂಕಗಳ ಹೊರತಾಗಿಯೂ, ಸರಕು ರಫ್ತು ಶೇಕಡಾ 2.4 ರಷ್ಟು (ಏಪ್ರಿಲ್-ಡಿಸೆಂಬರ್ 2025) ಬೆಳೆದಿದ್ದರೆ, ಸೇವಾ ರಫ್ತು ಶೇಕಡಾ 6.5 ರಷ್ಟು ಹೆಚ್ಚಾಗಿದೆ. ಏಪ್ರಿಲ್-ಡಿಸೆಂಬರ್ 2025ರ ಅವಧಿಯಲ್ಲಿ ಸರಕುಗಳ ಆಮದು ಶೇಕಡಾ 5.9 ರಷ್ಟು ಹೆಚ್ಚಾಗಿದೆ. 2024-25ರ ಹಣಕಾಸು ವರ್ಷದಲ್ಲಿ ಒಟ್ಟು ವಿದೇಶಿ ನೇರ ಹೂಡಿಕೆ (FDI) ಹರಿವು 81.0 ಬಿಲಿಯನ್ ಯುಎಸ್ ಡಾಲರ್ ದಾಖಲಾಗಿದ್ದು, 2025-26ರಲ್ಲಿ ಈ ವೇಗವು ಮತ್ತಷ್ಟು ಬಲಗೊಂಡಿದೆ; ಇದು ಯಾವುದೇ ಹಣಕಾಸು ವರ್ಷದ ಮೊದಲ ಏಳು ತಿಂಗಳಲ್ಲಿ ದಾಖಲಾದ ಅತ್ಯಧಿಕ ಹರಿವು ಆಗಿದೆ. ಚಾಲ್ತಿ ಖಾತೆ ಕೊರತೆಯು (CAD) 2024-25ರ ಮೊದಲಾರ್ಧದಲ್ಲಿ ಜಿಡಿಪಿಯ ಶೇಕಡಾ 1.3 ರಷ್ಟಿತ್ತು, ಇದು 2025-26ರ ಮೊದಲಾರ್ಧದಲ್ಲಿ ಶೇಕಡಾ 0.8 ಕ್ಕೆ ಇಳಿಕೆಯಾಗಿದೆ.

ಮಧ್ಯಮ ಅವಧಿಯ ವಿತ್ತೀಯ ನೀತಿ ಮತ್ತು ಕಾರ್ಯತಂತ್ರದ ಹೇಳಿಕೆ 

ವಿತ್ತೀಯ ಸೂಚಕಗಳು 

ಕೇಂದ್ರ ಬಜೆಟ್ 2026-27, 2025-26 ಮತ್ತು 2024-25ರ (ಸಾಮಾನ್ಯ) ಬಜೆಟ್‌ಗಳಲ್ಲಿ ಸೂಚಿಸಲಾದ ಸಾಲದ ಇಳಿಕೆಯ ಹಾದಿಯನ್ನು (debt glide path) ತನ್ನ ವಿತ್ತೀಯ ಆಧಾರವಾಗಿರಿಸಿಕೊಂಡಿದೆ. ಇದನ್ನು 2021-22ನೇ ಹಣಕಾಸು ವರ್ಷದಲ್ಲಿ ಘೋಷಿಸಲಾದ ನಿರಂತರ ವಿತ್ತೀಯ ಕ್ರೋಡೀಕರಣದ ಹಿನ್ನೆಲೆಯಲ್ಲಿ ಮಂಡಿಸಲಾಗುತ್ತಿದೆ; ಇದು ವಿತ್ತೀಯ ಜಾಗರೂಕತೆಯೊಂದಿಗೆ ರಾಜಿ ಮಾಡಿಕೊಳ್ಳದೆ ಅಭಿವೃದ್ಧಿಯ ಆದ್ಯತೆಗಳಿಗೆ ಅಗತ್ಯವಿರುವ ಸಂಪನ್ಮೂಲಗಳನ್ನು ಸಮತೋಲನಗೊಳಿಸಲು ಉತ್ತಮ ಅಡಿಪಾಯವನ್ನು ಒದಗಿಸಿದೆ. 2021-22ರ ಬಜೆಟ್‌ನಲ್ಲಿ ಘೋಷಿಸಿದಂತೆ, ಸರ್ಕಾರವು 2025-26ನೇ ಹಣಕಾಸು ವರ್ಷದಲ್ಲಿ ವಿತ್ತೀಯ ಕೊರತೆಯನ್ನು ಜಿಡಿಪಿಯ ಶೇಕಡಾ 4.5 ಕ್ಕಿಂತ ಕೆಳಗಿಳಿಸುವ ತನ್ನ ಉದ್ದೇಶವನ್ನು ಸಾಕಾರಗೊಳಿಸಿದೆ. ಮುಂದಿನ ದಿನಗಳಲ್ಲಿ, ಕೇಂದ್ರ ಸರ್ಕಾರದ ಸಾಲವನ್ನು ಇಳಿಮುಖ ಹಾದಿಯಲ್ಲಿ ತರುವಂತಹ ವಿತ್ತೀಯ ನಿಲುವನ್ನು ಅಳವಡಿಸಿಕೊಳ್ಳುವುದು ಸರ್ಕಾರದ ಪ್ರಯತ್ನವಾಗಲಿದೆ. 2025-26ನೇ ಹಣಕಾಸು ವರ್ಷದ ಪರಿಷ್ಕೃತ ಅಂದಾಜುಗಳು (RE) ಮತ್ತು 2026-27ನೇ ಹಣಕಾಸು ವರ್ಷದ ಬಜೆಟ್ ಅಂದಾಜುಗಳಲ್ಲಿ (BE) ಜಿಡಿಪಿಯ ಶೇಕಡಾವಾರು ಪ್ರಮಾಣದ ಆಧಾರದಲ್ಲಿ ಕೇಂದ್ರ ಸರ್ಕಾರದ ಪ್ರಮುಖ ವಿತ್ತೀಯ ಸೂಚಕಗಳನ್ನು ಕೆಳಗಿನ ಟೇಬಲ್‌ ನಲ್ಲಿ ಸಂಕ್ಷೇಪಿಸಲಾಗಿದೆ.

ಸ್ವೀಕೃತಿಗಳು 

2026-27ರ ಬಜೆಟ್ ಅಂದಾಜಿನಲ್ಲಿ (BE), ಒಟ್ಟು ತೆರಿಗೆ ಆದಾಯವು (GTR) ₹44.04 ಲಕ್ಷ ಕೋಟಿ ಎಂದು ಅಂದಾಜಿಸಲಾಗಿದೆ. ಇದು 2025-26ರ ಪರಿಷ್ಕೃತ ಅಂದಾಜುಗಳಿಗಿಂತ (RE) ಶೇಕಡಾ 8.0 ರಷ್ಟು ಬೆಳವಣಿಗೆಯನ್ನು ಪ್ರತಿಬಿಂಬಿಸುತ್ತದೆ. ₹26.97 ಲಕ್ಷ ಕೋಟಿಗಳಷ್ಟು ಇರುವ ನೇರ ತೆರಿಗೆಗಳು, ಒಟ್ಟು ತೆರಿಗೆ ಆದಾಯಕ್ಕೆ ಪ್ರಮುಖ ಕೊಡುಗೆ ನೀಡುತ್ತಿವೆ (GTR ನ ಶೇ. 61.2 ರಷ್ಟು). ಪರೋಕ್ಷ ತೆರಿಗೆಗಳನ್ನು ₹17.07 ಲಕ್ಷ ಕೋಟಿ ಎಂದು ಅಂದಾಜಿಸಲಾಗಿದೆ. 2026-27ರ ಬಜೆಟ್ ಅಂದಾಜಿನಲ್ಲಿ, ಒಟ್ಟು ತೆರಿಗೆ ಆದಾಯ ಮತ್ತು ಜಿಡಿಪಿ ನಡುವಿನ ಅನುಪಾತವು (GTR to GDP ratio) ಶೇಕಡಾ 11.2 ರಷ್ಟಿದೆ ಎಂದು ಅಂದಾಜಿಸಲಾಗಿದೆ. 2026-27ರ ಬಜೆಟ್ ವರ್ಷವು 16ನೇ ಹಣಕಾಸು ಆಯೋಗದ (SFC) ಶಿಫಾರಸು ಅವಧಿಯ ಮೊದಲ ವರ್ಷವಾಗಿದೆ. ಹಂಚಿಕೆ ಮಾಡಬಹುದಾದ ಒಟ್ಟು ತೆರಿಗೆ ಸಂಪನ್ಮೂಲದಲ್ಲಿ ರಾಜ್ಯಗಳ ಪಾಲನ್ನು ಶೇ. 41 ರಷ್ಟೇ ಕಾಯ್ದುಕೊಳ್ಳಲು 16ನೇ ಹಣಕಾಸು ಆಯೋಗವು ಶಿಫಾರಸು ಮಾಡಿದೆ. ಕೇಂದ್ರಕ್ಕೆ ಲಭ್ಯವಾಗುವ ನಿವ್ವಳ ತೆರಿಗೆ ಆದಾಯವು ₹28.67 ಲಕ್ಷ ಕೋಟಿಗಳಾಗಲಿದೆ ಎಂದು ಅಂದಾಜಿಸಲಾಗಿದೆ. 2026-27ರ ಬಜೆಟ್ ಅಂದಾಜಿನಲ್ಲಿ, ಕೇಂದ್ರ ಸರ್ಕಾರದ ತೆರಿಗೆಯೇತರ ಆದಾಯವು (NTR) ₹6.66 ಲಕ್ಷ ಕೋಟಿಗಳಾಗಲಿದೆ ಎಂದು ಅಂದಾಜಿಸಲಾಗಿದೆ. ಕೇಂದ್ರ ಸರ್ಕಾರದ ಒಟ್ಟು ಕಂದಾಯ ಸ್ವೀಕೃತಿಗಳು (ಕೇಂದ್ರದ ನಿವ್ವಳ ತೆರಿಗೆ ಆದಾಯ ಮತ್ತು ತೆರಿಗೆಯೇತರ ಆದಾಯವನ್ನು ಒಳಗೊಂಡಂತೆ) ₹35.33 ಲಕ್ಷ ಕೋಟಿ ಎಂದು ಅಂದಾಜಿಸಲಾಗಿದೆ. ಈ ಕಂದಾಯ ಸ್ವೀಕೃತಿಯ ಅಂದಾಜುಗಳು 2025-26ರ ಪರಿಷ್ಕೃತ ಅಂದಾಜಿಗಿಂತ ಶೇಕಡಾ 5.7 ರಷ್ಟು ಬೆಳವಣಿಗೆಯನ್ನು ಹೊಂದಿವೆ ಎಂದು ಭಾವಿಸಲಾಗಿದೆ.

ವೆಚ್ಚ 

2026-27ರ ಬಜೆಟ್ ಅಂದಾಜಿನಲ್ಲಿ (BE) ಕೇಂದ್ರ ಸರ್ಕಾರದ ಒಟ್ಟು ವೆಚ್ಚವು ₹53.47 ಲಕ್ಷ ಕೋಟಿ (ಜಿಡಿಪಿಯ ಶೇ. 13.6) ಎಂದು ಅಂದಾಜಿಸಲಾಗಿದೆ. ಇದು 2025-26ರ ಪರಿಷ್ಕೃತ ಅಂದಾಜಿನ (RE) ₹49.65 ಲಕ್ಷ ಕೋಟಿಗಿಂತ ಶೇಕಡಾ 7.7 ರಷ್ಟು ಬೆಳವಣಿಗೆಯನ್ನು ತೋರಿಸುತ್ತದೆ. 2026-27ನೇ ಹಣಕಾಸು ವರ್ಷದ ಬಜೆಟ್‌ನಲ್ಲಿ ಬಂಡವಾಳ ವೆಚ್ಚಕ್ಕಾಗಿ ₹12.22 ಲಕ್ಷ ಕೋಟಿ (ಜಿಡಿಪಿಯ ಶೇ. 3.1) ಮೀಸಲಿಡಲಾಗಿದೆ. ಇದರಲ್ಲಿ ರಾಜ್ಯಗಳಿಗೆ ಬಂಡವಾಳ ವೆಚ್ಚಕ್ಕಾಗಿ ಸಾಲದ ರೂಪದಲ್ಲಿ ನೀಡುವ ವಿಶೇಷ ನೆರವು (SASCI) ಯೋಜನೆಗಾಗಿ ₹2.0 ಲಕ್ಷ ಕೋಟಿ ಹಂಚಿಕೆಯನ್ನು ಸೇರಿಸಲಾಗಿದೆ. ಕೇಂದ್ರ ಸರ್ಕಾರದ 'ಪರಿಣಾಮಕಾರಿ ಬಂಡವಾಳ ವೆಚ್ಚವು' ಭಾರತ ಸರ್ಕಾರದ ಬಂಡವಾಳ ವೆಚ್ಚ ಮತ್ತು ಬಂಡವಾಳ ಆಸ್ತಿಗಳ ಸೃಜನೆಗಾಗಿ ನೀಡುವ ಸಹಾಯಧನವನ್ನು ಒಳಗೊಂಡಿರುತ್ತದೆ. ಇವೆರಡೂ ಒಟ್ಟಾಗಿ ಆರ್ಥಿಕತೆಯ ಉತ್ಪಾದನಾ ಸಾಮರ್ಥ್ಯವನ್ನು ಹೆಚ್ಚಿಸುವ ಮತ್ತು ಮೇಲ್ದರ್ಜೆಗೇರಿಸುವ ಹೂಡಿಕೆಗಳಾಗಿವೆ. 2026-27ರ ಬಜೆಟ್ ಅಂದಾಜಿನಲ್ಲಿ, ಬಂಡವಾಳ ಆಸ್ತಿಗಳ ಸೃಜನೆಗಾಗಿ ನೀಡುವ ಸಹಾಯಧನದ ಹಂಚಿಕೆಯನ್ನು ₹4.93 ಲಕ್ಷ ಕೋಟಿ (ಅಥವಾ ಜಿಡಿಪಿಯ ಶೇ. 1.3) ಎಂದು ಅಂದಾಜಿಸಲಾಗಿದೆ.

ಹೀಗಾಗಿ, 2026-27ನೇ ಹಣಕಾಸು ವರ್ಷದಲ್ಲಿ ಪರಿಣಾಮಕಾರಿ ಬಂಡವಾಳ ವೆಚ್ಚವು ₹17.15 ಲಕ್ಷ ಕೋಟಿ (ಅಥವಾ ಜಿಡಿಪಿಯ ಶೇ. 4.4) ಎಂದು ಅಂದಾಜಿಸಲಾಗಿದೆ.

ರಾಜ್ಯಗಳಿಗೆ ತೆರಿಗೆ ಹಂಚಿಕೆ ಮತ್ತು ಹಣಕಾಸು ಆಯೋಗದ ಅನುದಾನಗಳು 

ಹಣಕಾಸು ಆಯೋಗದ (FC) ಶಿಫಾರಸುಗಳ ಆಧಾರದ ಮೇಲೆ, ಕೇಂದ್ರ ಸರ್ಕಾರವು ಹಣಕಾಸು ಆಯೋಗದ ಅವಧಿಯಲ್ಲಿ ರಾಜ್ಯಗಳಿಗೆ ತೆರಿಗೆಗಳನ್ನು ಹಂಚಿಕೆ ಮಾಡುತ್ತದೆ. ಮೊದಲೇ ತಿಳಿಸಿದಂತೆ, ಹಂಚಿಕೆ ಮಾಡಬಹುದಾದ ಒಟ್ಟು ತೆರಿಗೆ ಸಂಪನ್ಮೂಲದಲ್ಲಿ ರಾಜ್ಯಗಳ ಪಾಲನ್ನು ಶೇ. 41 ರಲ್ಲೇ ಕಾಯ್ದುಕೊಳ್ಳಲು 16ನೇ ಹಣಕಾಸು ಆಯೋಗವು (SFC) ಶಿಫಾರಸು ಮಾಡಿದೆ ಮತ್ತು ಈ ಶಿಫಾರಸನ್ನು ಸರ್ಕಾರವು ಅಂಗೀಕರಿಸಿದೆ. 2026-27ರ ಬಜೆಟ್ ಅಂದಾಜಿನಲ್ಲಿ (BE), ರಾಜ್ಯಗಳಿಗೆ ತೆರಿಗೆ ಹಂಚಿಕೆಯನ್ನು ₹15.26 ಲಕ್ಷ ಕೋಟಿ ಎಂದು ಅಂದಾಜಿಸಲಾಗಿದೆ. ಇದು 2025-26ರ ಪರಿಷ್ಕೃತ ಅಂದಾಜಿನ (RE) ₹13.93 ಲಕ್ಷ ಕೋಟಿಗೆ ಹೋಲಿಸಿದರೆ ಹೆಚ್ಚಳವನ್ನು ತೋರಿಸುತ್ತದೆ; ಇದರಲ್ಲಿ ಕಳೆದ ವರ್ಷಗಳ ಹಂಚಿಕೆಯಿಂದ ಕೇಂದ್ರ ಸರ್ಕಾರಕ್ಕೆ ರಾಜ್ಯಗಳಿಂದ ಬರಬೇಕಾದ ₹9,084.02 ಕೋಟಿ ಹೆಚ್ಚುವರಿ ಮೊತ್ತವೂ ಸೇರಿದೆ. 2026-27ರ ಬಜೆಟ್ ಅಂದಾಜಿನಲ್ಲಿ ರಾಜ್ಯಗಳಿಗೆ ಹಂಚಿಕೆಯಾಗುವ ತೆರಿಗೆಯು ಜಿಡಿಪಿಯ ಶೇ. 3.9 ರಷ್ಟಿದೆ ಮತ್ತು ಇದು 2025-26ರ ಪರಿಷ್ಕೃತ ಅಂದಾಜಿಗಿಂತ (ಹಳೆಯ ಬಾಕಿಗಳನ್ನು ಒಳಗೊಂಡಂತೆ) ₹1.33 ಲಕ್ಷ ಕೋಟಿ ಹೆಚ್ಚಾಗಿದೆ. 2026-27ರ ಬಜೆಟ್ ಅಂದಾಜಿನಲ್ಲಿ ಹಣಕಾಸು ಆಯೋಗದ ಅನುದಾನಗಳನ್ನು ₹1.4 ಲಕ್ಷ ಕೋಟಿ ಎಂದು ಅಂದಾಜಿಸಲಾಗಿದೆ. ಹೀಗಾಗಿ, ಹಣಕಾಸು ಆಯೋಗದ ಮೂಲಕ ರಾಜ್ಯಗಳಿಗೆ ಹಂಚಿಕೆಯಾಗುವ ಒಟ್ಟು ಸಂಪನ್ಮೂಲಗಳು (ತೆರಿಗೆ ಹಂಚಿಕೆ ಮತ್ತು ಹಣಕಾಸು ಆಯೋಗದ ಅನುದಾನಗಳು) 2026-27ರ ಬಜೆಟ್ ಅಂದಾಜಿನಲ್ಲಿ ₹16.56 ಲಕ್ಷ ಕೋಟಿ ಎಂದು ಅಂದಾಜಿಸಲಾಗಿದೆ.

2026-27ರ ವಿತ್ತೀಯ ನೀತಿ ಕಾರ್ಯತಂತ್ರ 

2026-27ನೇ ಹಣಕಾಸು ವರ್ಷದ ವಿತ್ತೀಯ ನೀತಿ ಕಾರ್ಯತಂತ್ರವು 2025-26ರ ಬಜೆಟ್‌ನಲ್ಲಿ ಸೂಚಿಸಲಾದ ಸಾಲದ ಇಳಿಕೆಯ ಹಾದಿಯಿಂದ ಮಾರ್ಗದರ್ಶಿಸಲ್ಪಡುವುದನ್ನು ಮುಂದುವರಿಸಲಿದೆ. 2030-31ನೇ ಹಣಕಾಸು ವರ್ಷದ ವೇಳೆಗೆ ಸಾಲ ಮತ್ತು ಜಿಡಿಪಿ ಅನುಪಾತವನ್ನು ಶೇಕಡಾ 50±1 ಕ್ಕೆ ತಲುಪಿಸುವುದು ಇದರ ಮಧ್ಯಮ ಅವಧಿಯ ಗುರಿಯಾಗಿದೆ; ಇದರಲ್ಲಿ ವಿತ್ತೀಯ ಕೊರತೆಯು ಕಾರ್ಯಕಾರಿ ಗುರಿಯಾಗಿ ಕಾರ್ಯನಿರ್ವಹಿಸುತ್ತದೆ. ಮೇಲಿನ ಗುರಿಗಳಿಗೆ ಅನುಗುಣವಾಗಿ, 2026-27ರ ಬಜೆಟ್ ಅಂದಾಜಿನಲ್ಲಿ ಕೇಂದ್ರ ಸರ್ಕಾರದ ಸಾಲ ಮತ್ತು ಜಿಡಿಪಿ ಅನುಪಾತವು ಶೇಕಡಾ 55.6 ರಷ್ಟಿರಲಿದೆ ಮತ್ತು ವಿತ್ತೀಯ ಕೊರತೆಯ ಗುರಿಯು ಜಿಡಿಪಿಯ ಶೇಕಡಾ 4.3 ರಷ್ಟಿರಲಿದೆ ಎಂದು ಅಂದಾಜಿಸಲಾಗಿದೆ. ವಿತ್ತೀಯ ಕಾರ್ಯತಂತ್ರದ ಇತರ ಅಂಶಗಳು ಬಂಡವಾಳ ವೆಚ್ಚದ ಮೇಲೆ ನಿರಂತರ ಗಮನಹರಿಸುವ ಮೂಲಕ ಆರ್ಥಿಕ ಬೆಳವಣಿಗೆಗೆ ಬೆಂಬಲ ನೀಡುವುದು, ಜಾಗತಿಕ ಆರ್ಥಿಕ ವಿದ್ಯಮಾನಗಳಿಗೆ ಸ್ಪಂದಿಸಲು ಸಾಕಷ್ಟು ವಿತ್ತೀಯ ಅವಕಾಶವನ್ನು ಕಾಯ್ದುಕೊಳ್ಳುವುದು ಮತ್ತು 'ವಿಕಸಿತ ಭಾರತ'ದತ್ತ ಸಾಗುವ ಪ್ರಯಾಣದಲ್ಲಿ ದೇಶದ ನಿರಂತರ ಸಮೃದ್ಧಿಯನ್ನು ಖಚಿತಪಡಿಸಿಕೊಳ್ಳುವುದನ್ನು ಒಳಗೊಂಡಿವೆ. ಇವುಗಳ ಜೊತೆಗೆ ತೆರಿಗೆ ನೀತಿ, ವೆಚ್ಚದ ನೀತಿ, ಸರ್ಕಾರದ ಸಾಲಗಳು, ಸಾಲ ನೀಡಿಕೆ ಮತ್ತು ಹೂಡಿಕೆಗಳಲ್ಲಿನ ಸುಧಾರಣೆಗಳೂ ಈ ಕಾರ್ಯತಂತ್ರದ ಭಾಗವಾಗಿವೆ.

*****