Ka Sorkar India ka la pynbna ia ka Press & Registration of Periodicals Act (PRP Act), 2023 bad ki kyndon jong ka ha ka Gazette jong ka bad kane ka ain ka la sdang treikam naduh ka 1 tarik u Lber, 2024.

Naduh mynta, ka jingkyntiew kyrteng ia ki kot ba mih man ka por ka dei ka ban hap hapoh ki kyndon jong ka Press and Registration of Periodicals Act (PRP Act), 2023 bad ki kyndon Press and Registration of Periodicals Rules. Katkum ka jingpynbna, ka ophis jong u Press Registrar General of India – PRGI (Registrar of Newspapers for India – RNI mynshuwa) kan pyntreikam ia ki kam jong kane ka ain kaba thymmai.

Ha kaba iadei bad ka jingngeit ha ka Digital India, kane ka ain ba thymmai ka pynbiang ia ka rukom treikam online ban plie lad ia ka jingkyntiew kyrteng ia ki kotkhubor bad kiwei kiwei ki kot ba mih man ka por jong ka ri. Kane ka rukom treikam ba thymmai ka wan bujli ia ka rukom treikam kaba hap trei hi da ki briew, kaba bun jnit bun jnat ha kaba ki kam ki long kiba bun bad hap ban ioh ki jingbit kiba bun bad kane ka la wanrah jingeh shisha ia ki publisher.

Ha shuwa kane, u Anurag Singh Thakur, Myntri ka Tnat Information and Broadcasting, u la plie paidbah ia ka rynsan Press Sewa (presssewa.prgi.gov.in), ka rynsan online jong u Press Registrar General, ban pdiang ia ki application kumba la bthah da ka ain ba thymmai. Baroh ki application, ba kynthup ia ka jingai jingtip da u nongshon jong ka kot ba mih man ka por, ka application ban kyntiew ia ka jingpynbud ia ki kot ba nabar ri ba mih man ka por, application ban peit biang ia ka certificate of registration, application ban pynkylla ka jinglong trai jong ki kot ba mih man ka por, ka jingai ia ka annual statement da u nongshon ia ka kot ba mih man ka por, bad ka kam na ka bynta ka desk audit ban pynshisha ia ka jingpyniaid ia ka kot ba mih man ka por kan iaid lyngba ki lad online lyngba ka rynsan Press Sewa.

Ka rynsan Press Sewa ka pynthikna ia ka jingtreikam khlem da pyndonkam da ki kot bad ka ai ki jingshakri bad ka lad e-sign, ka lad ai jingsiew digital, ki digital certificate ba don QR code ba lah ban download mardor, ki lad online ban ai jingtip da ki jaka shon kot, ki percentage jong ka jingdon ka kyrteng, ki lad online ban ioh ia ki jingtip kiba iadei bad ka jingkyntiew kyrteng ia baroh ki nongpynmih ia ki kot, ka jingai ia ki annual statement, bad kiwei kiwei. Ka thmu ruh ban pynbiang ia ka lad pynbeit ia ki jingeh kaba don nongrim ha ka chatbot. Ka rynsan Press Sewa ka wan lang bad ka website ba thymmai (prgi.gov.in) ha kaba la pynbiang ia ki jingtip bad ruh kaba suk ban pyndonkam.

Ka PRP Act ba thymmai ka weng noh ia ki kot bad ki journal na ka jingkyntiew kyrteng kaba hap ban leh hapoh ka PRB Act ba rim; kane ka Ain kaba thymmai ka ong ba ki kot ba mih man ka por ki dei ‘kino kino ki kot ba kynthup ia ki kotkhubor ia kiba la shon bad pynmih man ka por kiba don ia ki khubor paidbah ne ki jingkren ne kiba don ia ki khubor paidbah hynrei ki bym don ia ka kot ne ka journal shaphang ki kam science, teknikal ne ka pule puthi’. Kumta, ‘Ka kot ne ka journal shaphang ki kam science, teknikal ne ka pule puthi’ kam donkam ia ka jingkyntiew kyrteng bad ka PRGI.

Katkum kane ka Ain ba thymmai, baroh ki application ban kyntiew kyrteng ia ki kot ba mih man ka por kin iaid lyngba ka lad online tang lyngba ka rynsan Press Sewa. Kumta, ki nongpynmih kot kiba kwah ban pynmih ia kano kano ka kot ki donkam ban kyntiew ia ka kyrteng shuwa ban pynmih ia ka. Namar ka kam kyntiew kyrteng kan long lyngba ki lad online bad kaba iaid katkum ka software, ki lad ban don jingbakla ha ka application kan duna bha bad kane kan pynsted ia ka kam ban peit ia ka application. Ia ka jingiaid shakhmat jong ka application yn pyntip ia ki nongthep application lyngba ka SMS bad email ka ban pynthikna ia ka jingshai bad pynduh noh ia ka jingslem namar ki jingsngewthuh bakla.

Ki sienjam ba donkam ha ka jingkyntiew kyrteng ia ki kot ba mih man ka por ha ka rynsan Press Sewa ba thymmai ki long kumne harum:

• Ka Sign up bad ka jingshna ia ka Profile da u trai jong ka kot ba mih man ka por: Ban sdang ia ka kam kyntiew kyrteng, u trai jong ka kot ba thmu ban pynmih man ka por u hap ban sign up bad shna ia ka profile ha ka rynsan Press Sewa da kaba ai ki jingpyntip bad ki kot ba donkam, ha ryngkat 5 tylli ki kyrteng ba thmu ban ai. Kine ki kyrteng kim dei ban long kumjuh ne iasyriem bad ka kyrteng ba la don lypa da kiwei kiwei ki trai jong ki kot ba mih man ka por ha kajuh ka ktien hangno hangno ha India lane ha kawei ka ktien ha ka juh ka jylla, bad kine ki kyrteng kin iahap bad ki mat treikam kumba la bthah da u Press Registrar General na ka bynta kane ka kam.
• Ka jingai ha kajuh ka por sha u Press Registrar General bad ka bor ba dei peit ha ka distrik: Ki application ba wan lyngba ka rynsan Press Sewa ki dei kiba lah ban iohi ha ka juh ka por da u Press Registrar General bad kano kano ka bor ba dei peit ha ka distrik. Kumta, ym donkam ban thep application biang ha kiwei kiwei ki ophis/rynsan.
• Ka jingkhot ia ki nongpynmih da ki trai: Hadien ba la shna ia ka profile, u trai un khot ia ki nongpynmih kiba iadei bad ka kot jong ki ba pynmih man ka por, lyngba ka rynsan.
• Ka Sign up bad ka jingai jingtip online da u nongshon (trai/ nongpyniaid ia ka jaka shon kot): U nongshon (trai/ nongpyniaid ia ka jaka shon kot) u hap ban shna ia ka online account ha ka rynsan Press Sewa da kaba ai ki jingtip ba donkam ha ka rynsan.
• Ka Sign up bad jingshna profile da u nongpynmih: U nongpynmih uba la shah khot kumba batai halor u hap ban shna ia ka profile ha ka rynsan da kaba ai ia ki jingtip ba donkam.

• Ka jingjied ia u nongshon da u nongpynmih: Kum shi bynta ka kam kyntiew kyrteng, u nongpynmih u hap ban jied ia ka jaka shon kot na ka database jong ka Press Sewa haba ka account jong ka jaka shon kot ka la don ha ka database. Hynrei u hap ban kyrpad ia u nongshon ban shna ia ka online profile ha ka rynsan bad jied ia u hadien kane kum u nongshon ia ka kot ba mut ban pynmih man ka por.

• Ka application kyntiew kyrteng ia ka kot ba mut pynmih man ka por ba hap ai da u nongpynmih: Hadien ba la shna ia ki profile, u nongpynmih u lah ban ai ka application ban kyntiew kyrteng da kaba ai baroh ki kot ki jingtip, ka e-sign ia ka application bad da kaba ai ia ka jingsiew ba la buh lyngba ka Bharatkosh.

• Ka lad jingpynbeit hadien ba la phah ia ka Application: Hadien ba la dep phah ia ka application, ki nongpynmih ki don 5 sngi (120-kynta ka por) ban pynkylla ia ki bynta barit baria ia ka application. Ym lah ban pynkylla ia ka application hadien kine ki 5 sngi.

• Ka jingpdiang ryngkat bad u Application Reference Number ba kyrpang: Hadien ba la dep upload ia ka application, ka rynsan Pres Sewa kan pynmih ia ka jingpdiang ha ryngkat u Application Reference Number (ARN) alphanumeric ba 10 dak, bad u nongpynmih bad u Press Registrar General un pyndonkam ia u Applicant Reference Number ha baroh ki kam ba iadei bad ka kot hadien kane.

• Ki jingduna ha ka Application bad ka jingpeit ha ka por kaba biang: Hadien ba la peit nyngkong, ka ophis jong u Press Registrar General of India (PRGI) kan phah ia ka jingpyntip shaphang ki jingduna lada donkam. Ki nongpynmih ki hap ban ai ia ka jubab jong ki hapoh 30 sngi. Lada ym ai ia kane ka jubab hapoh 30 sngi, yn kyntait ia ka application.

• Ka jingai jingsiew online ia ka bai kyntiew kyrteng lyngba ka Bharatkosh: Baroh ki nongpynmih ki hap ban ai ia ka bai kyntiew kyrteng kaba T.1000 (Shi Hajar Tyngka) lyngba ka lad ai jingsiew digital Bharatkosh kaba don hapoh ka rynsan Press Sewa.

• Ki jingpynkylla ia ki jingtip ha ka jingkyntiew kyrteng: Ka rynsan Press Sewa ka don ka lad online ban pynkylla ia ki jingtip ha ka jingkyntiew kyrteng. Baroh ki application ban pynkylla ha ka jingkyntiew kyrteng lane ka jingpynkylla ia ki bynta shaphang ka kot ba pynmih man ka por ki dei kiba hap ban leh lyngba ka rynsan. Ia kine ki lad yn don ha ka profile jong ki trai / nongpynmih.

Ka Press & Registration of Periodicals Act, 2023 ka dei ka sienjam ban wanrah ia ka jingkylla kaba heh ha ka kam kyntiew kyrteng, bad kan wanrah ia ka jinglong jingman kaba kham bha na ka bynta ki nongpynmih kot kaba pynthikna ia ka jingsuk ban treikam. Ka jingpyntreikam ia kane ka Ain kaba thymmai ka pyni ruh ia ki sienjam jong ka Sorkar ban weng noh ia ki bynta barim bad bym iahap na ki Ain kiba la don lypa.

Ban ioh ia ki jingtip ba kham bniah, la kyntu ia ki nongpynmih kot bad kiwei kiwei kiba don bynta ha kane ka kam ba kin peit bniah ia ki bynta jong ka Press & Periodicals Act and PRP Rules.

Pule shuh: https://pib.gov.in/PressReleasePage.aspx?PRID=1989267

https://pib.gov.in/PressReleasePage.aspx?PRID=2008020

Press & Registration of Periodicals Act, 2023:

https://mib.gov.in/sites/default/files/Press%20and%20Registration%20of%20Periodicals%20Act%202023.pdf

***