প্রধান মন্ত্রী, শ্রী নরেন্দ্র মোদীনা ঙসি গুজরাৎকী জামনগরদা ঈথৈ লৌখোং, মৈ, ৱাতর সপ্লাই অমসুং অর্বান ইন্ফ্রাস্ত্রকচরগা মরী লৈনবা লুপা করোর ১৪৫০রোমগী প্রোজেক্তশিং উরেপ উয়ুং তমখ্রে অমদি লৈবাক মীয়ামদা কত্থোকখ্রে‍। হায়রিবা প্রোজেক্তশিং অসিদা য়াওরিবশিংদি কালাবার, জামনগর তালুকাগী কালাবার গ্রুপ ওগমেন্তেসন ৱাতর সপ্লাই স্কীম, মোর্বী-মালিয়া-জোরিয়া গ্রুপ ওগমেন্তেসন ৱাতর সপ্লাই স্কীম, লালপুর বাইপাস জংসন ফ্লাইওভর থোং, হাপা মার্কেৎ য়ার্দ রেলৱে ক্রোসিং, অমসুং সিৱর কল্লেক্সন পাইপলাইন অমসুং পম্পিং স্তেসন নৌনা শেমজিনবনি‍। প্রধান মন্ত্রীনা সৌরাস্ত্র অবতরন ইরিগেসন (সৌনি) য়োজনা লিঙ্ক ৩ (উন্দ দামদঈ সোন্মতি দাম ফাওবা)গী পেকেজ ৭, সৌনি য়োজনা লিঙ্ক ১ (উন্দ-১ দামদগী সনি দাম ফাওবা)গী পেকেজ ৫ অমসুং হরিপার ৪০ মেগাৱাৎ সোলর পি.ভি. প্রোজেক্ত লৈবাক মীয়ামদা কত্থোকখি‍।

তিল্লিবা মীয়ামদা ৱা ঙাঙলদুনা, প্রধান মন্ত্রীনা মহাক্না থৌরম মফমদা লাকপা মতমদা মীয়াম্না তরাম্না ওকপিরম্বা অমদি থৌজাল পীবিরকপগীদমক্তা থাগৎখি‍। প্রধান মন্ত্রীনা ঈশিং, মৈ অমসুং লম্বী থোংগা মরী লৈনবা প্রোজেক্ত নিপান লৈবাক মীয়ামদা কত্থোকপা অমদি উরেপ উয়ুং তমগদৌরিবদুগীদমক্তা প্রধান মন্ত্রীনা মীয়ামগী মফমদা নুংঙাইবা ফোঙদোকখি‍। বাল্মিকী কম্ম্যুনিতীনা নাৎকী অমদি অতৈ থৌরমশিং পাঙথোকপা মতমদা চাউনা কান্নবা পীগদবা মীয়ামগী কম্ম্যুনিতী হোল অমগী উরেপ উয়ুংসু তম্লে হায়না মহাক্না মখা তাখি‍।

প্রধান মন্ত্রীনা চহি দিকেদ অনিগী মমাঙদা থোকখিবা য়ুহা হাবনা থোকহনখিবা অমাঙ অতাশিং নীংশিংখি‍। য়ুহা হাবা অদুনা থোকহনখিবা অৱাবগী মশক অমদি অমাঙ অতাশিংদুনা স্তেত পুম্বদা নীংহন্নবগী ইহুল অমা পোকহনখি‍। অদুম ওইনমক মশানা মশাবু থাজবা অমদি হোৎনবা কনবগী মহৈনা, গুজরাৎনা অমুক হন্না হৌগৎলক্তুনা নীংহন্নবা অমদি অমাঙ অতাবু তান্থোকখিদুনা লৈবাক্কী মকোক থোংনা কাখৎলকখি‍। প্রধান মন্ত্রীনা জামনগরগী মীয়ামদা কত্চকী য়ুহা হাবদা লৈখিদ্রবশিংবু নীংশিংদুনা স্মৃতি বন্দা চৎনবা অমদি মখোয়গী মফমদা ইকায়খুম্নবা উৎবিনবা ৱাফম থমখি‍। পাক চাউবা অমদি চীং লেম্বদা নীংশিং খুফম অসি ৯/১১ নৎত্রগা হিরোসিমা মেমোরিএলদগী তাদে হায়না মহাক্না হায়খি‍।

প্রধান মন্ত্রীনা জামসাহেব মহারাজা দিগবিজয় সিংহবু নীংশিংখি অমদি অনিশুবা মালেমগী লাঞ্জাম মনুংদা মহাক্না পোলেন্দগী মীয়ামদা উৎখিবা থৌজালগী থৌওংগীদমক শ্রদ্ধাঞ্জলি কৎখি‍। মসিনা পোলেন্দগী মীয়ামদা কুইনা শাংনা চৎকদবা মরী অমা শেমগত্তুনা হৌজিক ওইরিবা চরাংনবা মরকসিদা ভারত মচাশিং য়ুক্রেন্দগী হোন্দোরকপদা চাউনা মতেং ওইখি‍। “পোলেন্দ লৈঙাক্না মতেং পাংলকখিবা অসিদা, মহারাজা দিগবিজয় সিংহগী থৌজালগী থৌওংদুনা অচৌবা শক্লোন অমা লৌখি,” হায়না মহাক্না হায়খি‍। জামসাহেবকী ময়োল্লম অসিবু অনৌবা পন্দোল য়ৌনবা পুখৎনবা ঐখোয়না হোৎনগদবনি‍ হায়না মহাক্না ফোঙদোকখি‍। জামনগরনা ক্রিকেৎকী লমদসু য়াম্না চাউনা থৌদাং লৌরি হায়বা ৱাফম প্রধান মন্ত্রীনা থমখি‍। সৌরাস্ত্রগী রাঞ্জি ক্রিকেৎ তীম্না ২০২০দা ত্রোফী লৌরক্তুনা পুম্নমকপু চাউথোকচহনখি‍।

চাওখৎপগী ফিরেপ মঙানা গুজরাৎকী অচঙবা য়ুম্ফম শেম্লি হায়না প্রধান মন্ত্রীনা পাউদমখি‍। অহানবা ফিরেপ্তি মীয়ামগী পাঙ্গল, অনিসুবনা লৌশিংগী পাঙ্গল, অহুমসুবনা ঈশিংগী পাঙ্গল, মরিসুবনা ইনর্জীগী পাঙ্গল অদুগা অরোয়বসিনা ঙাকশেলগী পাঙ্গল অসিনি‍। “হায়রিবা অচঙবা য়ুম্ফম মঙাসিদা লেপ্তুনা গুজরাৎনা অনৌবা পন্দোল লোম্লি,” হায়না শ্রী মোদীনা মখা তাখি‍।

হৌজিক্কী মীরোল অসি লাইবক ফরবনি মরমদি মখোয়না লমদম অসোমদা স্তেত অসিদা চহি ২০-২৫গী মমাঙদা থেংনখিবা খুদোংচাদবশিং অদু উহৌদ্রবনি হায়না প্রধান মন্ত্রীনা ফোঙদোকখি‍। মুখ্য মন্ত্রীনা ঈশিং তেঙ্ক অমা শঙ্গানবা লাক্লম্বা মতমদুদগী হান্নগী বজেত্তগী হেনবা শেন্ফমগী প্রোজেক্তশিং শঙ্গানবা লাকপগী ঙসিগী মতমসিগা মফমসিদা য়াম্না হোংলে‍। ঙসিদি ইমা নর্মদানা সৌনি স্কীমগী মখাদা কাচিন কোয়া শিনবা থুংনা য়ৌরে‍। মতৌ অসুম্না জল জীবন মিসন্না য়ুমথোঙ খুদিংদা তোতিগী ঈশিং ফংহল্লি হায়না মহাক্না হায়খি‍। কেন্দ্র লৈঙাক্কী স্কীমশিংবু কত্থোকপা অমদি অয়াঙবা খোঙজেলগা লোয়ননা পায়খৎপগীদমক্তা মহাক্না মুখ্য মন্ত্রীবু থাগৎখি‍।

লায়রবশিংগী য়াইফনবা হায়বা ৱাখল্লোনসিনা মহাক্কী লৈঙাক্কী খ্বাইদগী মরুওইবা ৱাফম্নি হায়না প্রধান মন্ত্রীনা অমুক হন্না ফোঙদোকখি‍। লাইচৎ মনুংদা ইহান হান্না পায়খৎখিবা খোঙথাঙনি ইমুং অমত্তা চরা হেলহন্দবা হায়বসিনি‍। লাইচৎ মনুংগী অৱা-অনাশিং চরা হেন্দনা থেংনহন্নবগীদমক মীওই করোর ৮০ হেনবদা চেঙ লেম্না ফংহনখি হায়না মহাক্না হায়খি‍। লায়রবা ইমুং অমত্তা খুদোং চাখিদ্রবা তান্ফমসিদা চরা হেলন্দনবগীদমক প্রধান মন্ত্রী গরীব কল্য়ান য়োজনা দিসেম্বর ফাওবা শাংদোক্লে হায়বা ৱাফম প্রধান মন্ত্রীনা থমখি‍। ৱন নেসন ৱন রেসন কার্দ স্কীমগী কান্নবশিং পল্লদুনা, ভারতকী মফম অমা হেক্তদগী জামনগরদা লাকপা মীওইশিংনা স্কীঈম অসিগী কান্নবশিং লৌবা য়াগনি হায়না মহাক্না হায়খি‍।

জামনগরগী থাউ শুংদোকফম অমদি থাউগী শেন্মিৎলোনগী মতাঙদা পল্লদুনা, ক্রুদ ওইল মফমসিদা শুংদোকপনি হায়বা ৱাফমসি খঙবদা পুম্নমক চাউথোকচবা পোক্কনি হায়না প্রধান মন্ত্রীনা ফোঙদোকখি‍। কেন্দ্র অমদি স্তেতকী দবল-ইঞ্জিন লৈঙাক অসিনা স্তেত অসিগী ইন্দস্ত্রী অমসুং ইনফ্রাস্ত্রকচর দিভেলপমেন্তকীদমক লেপ্পা লৈতনা হোৎনরি হায়না শ্রী মোদীনা হায়খি‍। ময়োল্লম অদুনা লম্বী চিনবগী ইসুনা শৌ শারম্বা মতম নীংশিংলদুনা, মীয়ামগী পুন্সিদা নুংঙাইহন্নবগীদমক থৌরাং য়াৎলবা লম্বী, ফ্লাইওভর অমসুং অন্দরপাস শেমগত্তুনা কন্নেক্তিভিতী হেনগৎহন্নবা থবকশিং পায়খৎলি হায়না শ্রী মোদিনা হায়খি‍। অমৃৎসর-ভতিন্দা-জামনগর কোরিদোর অসি লুপা করোর ২৬০০০ চঙনা শেমগৎলি‍। জামনগর মেনুফেকচরিং অমসুং কোস্ত-লেদ দিভেলপমেন্তকী মফম অমা ওইরক্লি‍। জামনগরদা লৈরিবা দব্লিউ.ঐচ.ও. ইন্তরনেস্নেল সেন্তর ফোর ত্রেদিস্নেল মেদিসিনগী হেদক্বার্তর অসি নেস্নেল য়ুনিভর্সিতীগী মফম ফংলবা জামনগর অয়ুর্বেদিক য়ুনিভর্সিতীগী লুহুপ অমনি হায়না মহাক্না হায়খি‍। জামনগর অসি খুজী, সিন্দুর, বন্ধনিনচিংবা অফবা পোৎলমশিংগা মরী লৈনবা মফম অমা ওইরক্তুনা ‘সৌভাগ্য নগর’ অমা ওল্লক্লি‍।

লল্লোন ইতিক তৌবদা লায়থোকহন্নবগা মহাক্না পীখিবা থাজবা প্রধান মন্ত্রীনা অমুক নৌহৌননা নীংশিংখি‍। মহাক্না কম্প্লাইএন্সকী পোৎলুমশিং হন্থহন্নবা ৱাফম ফোঙদোকখি‍। কম্প্লাইএন্স অমসুং রুল্স লিশিং ৩৩গী ময়াদা লৌথোকখ্রে‍। মতৌ অসুম্না, কম্পেনীশিং দিক্রিমিনিলাইজেসন তৌবগী লোনা বিজিনেস কম্ম্যুনিতীবুসু তেংবাংলি‍। মহাক্না তোঙান তোঙানবা শেন্মিৎলোনগী ইন্দেক্সশিংদা ভারতনা মফম হাইগৎলক্লিবা, অখন্ননা ভারতকী শেন্মিৎলোন্না ২০১৪দা ১০শুবা মফমদা লৈরম্বদগী ৫শুবদা হাইগৎলক্লিবা অসিগী মরমদা মহাক্না ৱাফম কয়া ফোঙদোকখি‍। ইজ ওফ দুইং বিজিনেসকী লমদসু, ভারতনা ২০১৪দা ১৪২শুবদা লৈরম্বদগী ২০২০দা ৬৩শুবা মফমদা হাইগৎলকখি‍। মহাক্ন স্তেত লৈঙাকপু খুমাঙ চাওশিলহনবা ঙম্বা ইন্দস্ত্রিএল পোলিসী অমা পুথোরকপগীদমক্তসু থাগৎখি‍। প্রধান মন্ত্রীনা স্তেত লৈঙাকপু লম খোপচিল্লকপশিং তকথোকখিবা অমদি সমুদ্র খোঙবালগী পরিং লুনা নান্না থম্বগীদমক থাগৎখি‍। জামনগরগী সমুদ্র খোঙবাল অসি লমকোয় লমথুংফম ওইনবগী খুদোংচাবা লৈ‍। মফমসিদা বাইওদাইভর্সিতীগী লল-থুম কয়া লৈ হায়না মহাক্না হায়খি‍।

প্রধান মন্ত্রীনা গুজরাত্তা লো এন্দ ওর্দর ফীভম ফগৎলকপবু শিংথাখি অমদি দবল-ইঞ্জিন নরেন্দ্র-ভুপেন্দ্র লৈঙাক্না চাওখৎ থৌরাংশিং কত্থোকপা অমদি অয়াঙবা খোঙজেলগা লোয়ননা পায়খৎলি হায়না হায়খি‍।

গুজরাৎকী মুখ্য মন্ত্রী, শ্রী ভুপেন্দ্র পতেল অমসুং মেম্বর্স ওফ পার্লিয়ামেন্ত শ্রী সি.আর. পাতিল অমসুং শ্রীমতী পুনমবেন মেদাম অমদি অতৈ কয়াসু থৌরমদুদা শরুক য়াখি‍।

বেকগ্রাউন্দ

প্রধান মন্ত্রীনা জামনগরদা লুপা করোর ১৪৫০রোমগী ওইগদবা প্রোজেক্তশিং লৈবাক মীয়ামদা কত্থোকখ্রে অমদি উরেপ উয়ুং তমখ্রে‍। প্রোজেক্তশিং অসি ঈথৈ লৌখোং, মৈ, ৱাতর সপ্লাই অমসুং অর্বান ইনফ্রাস্ত্রকচরগা মরী লৈনবা ঙাক্তনি‍।

প্রধান মন্ত্রীনা সৌরাস্ত্র অবতরন ইরিগেসন (সৌনি) য়োজনা লিঙ্ক ৩ (উন্দ দামদঈ সোন্মতি দাম ফাওবা)গী পেকেজ ৭, সৌনি য়োজনা লিঙ্ক ১ (উন্দ-১ দামদগী সনি দাম ফাওবা)গী পেকেজ ৫ অমসুং হরিপার ৪০ মেগাৱাৎ সোলর পি.ভি. প্রোজেক্ত লৈবাক মীয়ামদা কত্থোকখি‍।

প্রধান মন্ত্রীনা উরেপ উয়ুং তমখিবা প্রোজেক্তশিংদি কালাবার, জামনগর তালুকাগী কালাবার গ্রুপ ওগমেন্তেসন ৱাতর সপ্লাই স্কীম, মোর্বী-মালিয়া-জোরিয়া গ্রুপ ওগমেন্তেসন ৱাতর সপ্লাই স্কীম, লালপুর বাইপাস জংসন ফ্লাইওভর থোং, হাপা মার্কেৎ য়ার্দ রেলৱে ক্রোসিং, অমসুং সিৱর কল্লেক্সন পাইপলাইন অমসুং পম্পিং স্তেসন নৌনা শেমজিনবা য়াওরি‍।

Development works being launched in Jamnagar will significantly improve 'Ease of Living' for the people. https://t.co/3GrNAbDMIe

— Narendra Modi (@narendramodi) October 10, 2022

*****