কেন্দ্রগী লৌউ-শিংউগী মন্ত্রী শ্রী নরেন্দ্র সিংহ তোমরজী, রেল মন্ত্রী শ্রী পিয়ুশ গোয়লজী, অতৈ এম.পি.শিং, এম.এল.এ.শিং, অমসুং ঐগী নুংশিরবা ইচিল-ইনাওশিং, ঐনা ইহান হানবদা লৈবাক অসিগী লৌমী করোর কয়াদা নুংঙাইবা ফোংদোকচরি।

ওগস্ত থাদা লৈবাক অসিগী অহানবা লৌমী অমসুং লৌফমগীদমক্তা মপুং ফানা কৎথোক্লবা রেল হৌদোকখি। অৱাং-মখা, নোংপোক-নোংচুপ, লৈবাক অসিগী মফম পুম্নমক্কী লৌফম্বু, লৌমীশিংবু কিসান রেলগা কনেক্ত তৌনরি। কোরোনাগী শিংনবা মরক্তসু থা ৪গী মনুংদা কিসান রেলগী নেৎৱর্ক অসি ঙসি ১০০শুবা মশিং য়ৌখ্রে। ঙসি ১০০শুবা কিসান রেল মতম ঙৈহাক্কী মমাংদা মহারাস্ত্রগী সাঙ্গোলাদগী নোংচুপ বেঙ্গলগী শালীমারগীমদক্তা খোঙশানখ্রে। হায়বদি অমরোমদা নোংচুপ বেঙ্গলগী লৌমীশিং, শা-শন লোইবশিং, ঙা য়োকপশিংনা মুম্বৈ, পুনে, নাগপুরগুম্বা মহারাস্ত্রগী অচৌবা কৈথেল ফাওবা য়ৌশিনবা ঙম্লগনি। হৌজিক ফাওবদা লৈবাক অসিবু শম্নহল্লিবা রেল অদুনা হৌজিক লৈবাক অপুনবগী লৌউ-শিংউগী কৈথেলবুসু শম্নহল্লি, অমত্তা ওইহল্লি।

মরূপশা,

কিসান রেল সেবা অসি, লৈবাক্কী লৌমীশিংগী চাগা হেনগৎহন্নবগী মায়কৈদসু য়াম্না চাউবা খোঙথাং অমনি। মসিদগী লৌউবগা মরী লৈনবা শেন্মিৎলোন্দা চাউনা অহোংবা পুরক্কনি। মসিদগী লৈবাক্কী কোল্দ সপ্লাই চেনগী মপাঙ্গলসু হেনগৎলগনি। খ্বাইদগী চাউবা ৱাফমদি কিসান রেলদগী চাদা ৮০দগী হেন্না, অপীকপা অমসুং ঙমখৈ নাইবা লৌমীশিংদা য়াম্না চাউনা থৌনা হাপ্লগনি। মসি ঐনা মসিগীদমক হায়রিবনি মদুদি লৌমীশিংগীদমক্তা খ্বাইদগী য়ামদবা চাং অমত্তা লেপ্তে। করিগুম্বা লৌমীনা ৫০-১০০ কিলোগী পার্সেল থাবা পাম্লবসু থাবা য়াগনি। হায়বদি অপীকপা লৌমীনা খ্বাইদগী পীকপা পোৎথোকসু অহোংবা মমলদা শোইদ-ঙামদনা অচৌবা কৈথেল ফাওবা য়ৌহনবা ঙম্লগনি। ঐনা কদাইদনো পাখি মদুদি হৌজিক ফাওবগী রেলৱেগী খ্বাইদগী পীকপা কন্সাইন্মেন্ত অসি, কফোই কিলো ৩গী পেকেদ কিসান রেলদা থাখিবা অদুনা ওইখি। মসিদা নত্তনা য়েন লোইবা অমনা য়েরুম দর্জন ১৭সু কিসান রেলদা থাখি।

মরূপশা,

স্তোরেজ অমসুং কোল্দ স্তোরেজ ৱাৎপদগী লৈবাক অসিগী লৌমীনা মাংজবা অসি মতম পুম্বদা অচৌবা শিংনবা ওইদুনা লাক্লি। ঐখোয়গী সরকারনা স্তোরেজগী অনৌবা থৌরাংদা, সপ্লাই চেনগী মোদর্নাইজেসন্দা করোর কয়াগী ইনভেস্তমেন্ত তৌবগা লোইননা, কিসান রেলগুম্বা অনৌবা খোঙথাংসু পায়খৎলি। নীং খা তমদ্রিঙৈগী মমাংদসু ভারত্তা য়াম্না চাউবা রেলৱে নেতৱর্ক লৈরক্লি। কোল্দ স্তোরেজগা মরী লৈনবা তেক্নোলোজীসু হান্নদগী লৈরক্লি। হৌজিক কিসান রেলগী থোংদা পাঙ্গল অসি শিজিন্নবা হৌরে।

মরূপশা,

অপীকপা লৌমীশিংদা হন্থবা চাদিংদা অচৌবা অমসুং অনৌবা কৈথেল ফংহন্নবা, ঐখোয়গী পুকচেল অসিসু শেংলি অমসুং ঐখোয়গী পোলিসীসু ময়েক শেংই। ঐখোয়না বজেৎ মক্তদা মসিগা মরী লৈনবা মরুওইবা ৱাফমশিং লাওথোকখি। অহানবদা কিসান রেল অমসুং অনিশুবদা কৃশি উরান। হায়বদি ঐখোয়না ঐখোয়গী লৌমীশিংনা য়ৌশিনবা অসি লৈবাক অসিগা অরাপ্পা মনুং হঞ্জিনবা মফম অমসুং মালেমগী কৈথেল ফাওবা হেনগৎহনগনি হায়না হায়খিবা অদু অসুম ফংহাই হায়খিবা নত্তে। ঐনা মসি মপুং ফানা থাজবগা লোইননা হায়জবা ঙম্মি মদুদি ঐখোয় অচুম্বা লম্বীদা চৎলি।

মরূপশা,

হৌরকপদা কিসান রেল অসি চয়োলগী ওইরম্মি। নুমিৎ খরনিদা অসিগুম্বা রেলগী দিমান্দ অদুক্কী মতিক হেনগৎলকপদগী হৌজিক চয়োল অমদা নুমিৎ হুম্নি মসি চেলহনবা তারি। খনবীয়ু, অসুক তেনখ্রবা মতম অসিদা চাম্মশুবা কিসান রেল! মসি অচম্বা ৱাফম নত্তে। মসি লৈবাক অসিগী লৌমীনা করি পাম্বগে হায়বদুগী ময়েক শেংলবা পাউজেলনি।

মরূপশা,

থবক অসিনা লৌমীশিংগী সেবাগীদমক্তা লৌরিবা ঐখোয়গী ফিরেপ অদু ফোংদোক্লি। অদুবু মসি ঐখোয়গী লৌমী অসি অনৌবা ওইথোকপা য়াবশিংগীদমক কয়াদা থুনা শেম-শাবগে হায়বদুগীসু খুদম ওইরি। লৌমীনা, অতোপ্পা রাজ্যশিংদসু মখোয়গী পোৎথোকশিং য়োনবা ঙম্ননবা, হোৎনবদা কিসান রেল অমসুং কৃশি উরানগী চাউরবা থৌদাং য়াওই। ঐহাক য়াম্না অপেনবা ফাওই মদুদি লৈবাক অসিগী অৱাং নোংপোক্কী লৌমীশিংনা কৃশি উরান্দগী কান্নবা ফংবা হৌখ্রে। অসুম্না চেৎনা শেম-শারবা মতুংদা পুৱারী ওইরবা লৌউ-শিংউগী রিফোর্মশিংগী মায়কৈদা ঐখোয় ওনশিল্লকখিবনি।  

মরূপশা,

কিসান রেলদগী লৌমীশিংনা করম্না অনৌবা কৈথেল ফংলিবা, করম্না মখোয়গী ইনকম হেনগৎলিবা অমসুং চাদিংসু হন্থরিবা, ঐ মসিগী খুদম পীজগে। কয়ারক হন্না ঐখোয়না পাউদা উরে মদুদি মরম খরদগী খামেন অশিনবগী মমল মফম খরদা তাথখিবদা, লৌমীশিংগী করি ফিভম ওই। ফিভম অদু য়াম্না অৱাবগী মশক্নি। লৌমীনা মখোয়গী হোৎনজমন অদু মখোয়গী মিৎমাংদা মাং-তাকপা অদু য়েংদুনা লৈ, পাম্বৈ লৈতে। অদুবু হৌজিক অনৌবা লৌউ-শিংউগী রিফোর্মশিংগী মতুংদগীদি, কিসান রেলগী কান্নবা অসিদগীদি, মখোয়না অতোপ্পা ওপ্সন অমগা ফংলে। হৌজিক ঐখোয়গী লৌমীশিংনা মখোয়গী পোৎথোক অদু লৈবাক অসিগী খামেন অশিনবগী মমল ৱাংবা, মখোয়না মদুগী মমল হেন্না ফংগদবা মফম অদুদা য়ৌহনবা য়ারে। মখোয়না উহৈ অমসুং মনা-মশিংগী ত্রান্সপোর্ত্তা সবসিদীগী কান্নবা লৌবসু য়ারে।

ইচিল-ইনাওশা,

কিসান রেলগী থোইদোকপা মগুন অমা লৈ। মসি অচৎপা কোল্দ স্তোরেজসুনি। হায়বদি মসিদা উহৈ ওইরো, মনা-মশিং ওইরো, শঙ্গোম ওইরো, ঙা ওইরো, হায়বদি য়াম্না থুনা পৎথ-পুমথগদবা পোৎশকশিং অদু নীংথিজনা ঙাক শেনবগা লোইননা মফম অমদগী মফম অমদা পুরি। অহানবদদি পোৎলমশিং অসি লৌমীনা শরক্কী থোংদা ত্রকশিংদা থানরম্মি। শরক্কী লম্বী অসি ত্রান্সপোর্তেসন্দা খুদোংচাদবা ময়াম অমা লৈ। অমরোমদা মসিদা মতম য়াম্না চংই। শরক্কী লম্বীগী ভরাসু য়াম্না লৌই। হায়বদি খুঙ্গংগী অথাববু ওইরো নত্ত্রগা শহরগী অচাববু ওইরো, অনিমক্তা মসি তাংবা ওইহল্লি। হৌজিক, ঙসিমক নোংচুপ বেঙ্গলগীদমক্তা খোঙশাল্লিবা ত্রেন অসিদা, মহারাস্ত্রগী কফোই, অঙ্গুর, কোমলা, কস্তার্দ এপল, মসি মফম কয়াদা সিতাফল হায়রগসু কৌনৈ, অসিগুম্বা পোৎথোকশিং থারি।

ত্রেন অসি চাউরাক্না পুং ৪০গী মনুংদা য়ৌগনি। লম্বী অদুমক্তদগী কিলোমীতর লিশিং ২গী অরাপ্পা চৎপদা নুমিৎ কয়ানি চংই। মনুং অদুদা ত্রেন অসিনা মরক্তা রাজ্য কয়াদা অচৌ অচৌবা স্তেসনশিংদসু লেপকনি। মফম অদুদগী লৌমীশিংনা করিগুম্বা পোৎথোকশিং থাগে হায়রবসু, নত্ত্রগা মফম অদুদা ওর্দর থাংথগদবা ওইরবসু কিসান রেলনা পাংথোক্কনি। হায়বদি মরক্তসু কৈথেল কয়ামরুমদা কিসান রেলনা, লৌমীশিংগী পোৎ পুসু পুই অমসুং থাসু থাই। ভারাগী মতাংদদি, রুৎ অসিদা রেলদা পোৎ হাপ্পগী ভারা অসি ত্রক্কা য়েংনরুবদা চাউরাক্না লুপা ১৭০০ তাই। কিসান রেলদা চাদা ৫০সু কোমথোক্লি। মসিগীসু লৌমীশিংনা কান্নবা ফংলি।

ইচিল-ইনাওশা,

ঙসি নোংচুপ বেঙ্গলগী লৌমীশিং কান্নবা অসিদা য়াওরে। নোংচুপ বেঙ্গলদা আলু, থৈবোং, কোবী, খামেন, অসিনচিংবা য়েঞ্চাং নাপী য়াম্না পুথোকই। মতৌ অসুম্না কফোই, লীচী, হৈনৌ, লফোই অসিনচিংবা উহৈ কয়াসু লৌমীশিংনা থারি। অচম্বা ঈশিংগীবু ওইরো নত্ত্রগা থুমহি চেনবা ঈশিংগীবু ওইরো নোংচুপ বেঙ্গলদা ঙাগী অৱাৎপা লৈতে। মখোয়গী অৱাবদি মদুবু লৈবাক শিনবা থুংনা য়ৌহনবা অসিনি। হৌজিক কিসান রেলগুম্বা খুদোংচাবা অসিদগী নোংচুপ বেঙ্গলগী অপীকপা লৌমী লাখ কয়ানা য়াম্না চাউবা ওপ্সন ফংলে। অমসুং ওপ্সন অসি লৌমীগা লোইননা মফম অদুগী অপীক অপীকপা ললোন ইতিক তৌবশিংনসু ফংলি। মখোয়না লৌমীদগী অহেনবা মমলদা পোৎ য়াম্না লৈদুনা কিসান রেলগী থোংদা অতোপ্পা রাজ্যশিংদা য়োনবা য়ারে।

ইচিল-ইনাওশা,

খুঙ্গংদা অদুক্কী মতিক য়াম্না থবক পীননবা, লৌমীশিংবু হেন্না ফবা পুন্সি পীনবগীদমক্তা অনৌবা খুদোংচাবা, অনৌবা পাম্বৈ মথৌ তাই। পান্দম অসিগা লোইননা অমগী মথংদা অমা লৌউ-শিংউগী রিফোর্মশিং পায়খৎলি। লৌউ-শিংউবগা মরী লৈনবা এক্সপর্তশিং অমসুং মালেম অপুনবগী অখঙ-অহৈশিং অমসুং অনৌবা তেক্নোলোজী ভারতকী লৌউ-শিংউদা হাপচিনবগী থবক পায়খৎলি। স্তোরেজগা মরী লৈনবা ইনফ্রাস্ত্রকচরবু ওইরো নত্ত্রগা লৌউ-শিংউগী পোৎথোকশিংদা ভেল্যু এদিশনগা মরী লৈনবা প্রোসেসিং ইন্দস্ত্রীবু ওইরো, মসি ঐখোয়গী সরকারগী মরু ওইবনি। রেলৱে স্তেসনগী মনাক্তা লৈবাক অপুনবা অসিদা পেরিশেবল কার্গো সেন্তরশিং শেমগৎলি, মদুদা লৌমীনা মখোয়গী পোৎথোকশিং স্তোর তৌবা য়াই। হোৎনরিবদি য়েন্ছাং-নাপী য়ুম য়ুমদা য়ৌহনবা য়াবা মখৈ য়ৌহনবনি। মদুগী অহেনবা পোৎথোকশিং অদুবু, জুস, আচার, সোস, চতনী, চিপ্স, পুম্নমক অসি শাবা ওন্ত্রপ্রিনরশিংগী মনাক্তা য়ৌহনবনি।

পি.এম. কৃশি সম্পদা য়োজনাগী মখাদা মেগা ফুদ পার্ক, কোল্দ চেন ইনফ্রাস্ত্রকচর, এগ্রো প্রোসেসিং ক্লস্তর, প্রোসেসিং য়ুনিৎ, অসিগুম্বা চাউরাক্না প্রোজেক্ত লিশিং ৬কী অয়াবা পীখ্রে। মদুগী মনুংদা প্রোজেক্ত কয়ামরুম অমা মপুং ফাখ্রে অমসুং লৌমীগী ইমুং লাখ কয়ানা মসিগী কান্নবা ফংলি। আত্মনির্ভর অভিয়ান পেকেজগী মখাদসু মাইক্রো ফুদ প্রোসেসিং ইন্দস্ত্রীগীদমক্তা লুপা করোর লিশিং ১০গী অয়াবা পীখ্রে।  

মরূপশা,

ঙসি করিগুম্বা সরকারনা ইরৈবাকচাশিংগী অপীক অপীকপা তঙাইফদবশিং মপুং ফাহনবা ঙম্লিবা অসিগী মরম, শরুক য়ামিন্নবা অসিননি। লৌউ-শিংউগা মরী লৈননা পাংথোক্লিবা শেমদোকপা পুম্নমক অসিগী খ্বাইদগী চাউবা পাঙ্গল অসিমক খুঙ্গংগী মীয়াম্না, লৌমীশিংনা, নহাশিংনা শরুক য়ারকপা অসিনি। এফ.পি.ও. হায়বদি ফার্মর প্রদ্যুসর ওর্গনাইজেসন ওইরো, অতোপ্পা কোওপরেতিব ওর্গনাইজেসনবু ওইরো, নুপীশিংগী সেল্ফ হেল্প গ্রুপ ওইরো, লৌউ-শিংউগী ললোন-ইতিক্তা অমসুং লৌউ-শিংউগী ইনফ্রাস্ত্রকচর শেমগৎপদা মখোয় অসি মরুওইবা ওইনা লৌরি। অনৌবা লৌউ-শিংউগী রিফোর্মশিংদগী লৌউ-শিংউগা মরী লৈনবা হেনগৎকদৌরিবা ললোল-ইতিকশিং অদুগী খ্বাইদগী চাউবা বেনিফিসরীসু লৌমীশিংগী, খুঙ্গংগী নহাশিংগী, নুপীশিংগী লুপ অসিনি।

লৌউ-শিংউগী ললোন-ইতিক্তা প্রাইবেৎ ইনভেস্তমেন্ত তৌগনি, মসিদগী সরকারগী হোৎনরিবশিং অসিদা থৌনা হাপ্লগনি। ঐখোয়না মপুং ফানা পুকচেল শেংনা, পাঙ্গল পুথোক্তুনা ভারতকী লৌউ-শিংউ অসিবু অমসুং লৌমীবু মপাঙ্গল কলহন্নবগী মায়কৈদা চৎখিগনি। অমুক্কা হন্না লৈবাক অসিগী লৌমীশিংদা ১০০শুবা কিসান রেল অমসুং অনৌবা ওইথোকপা য়াবশিংগীদমক্তা ঐনা লৈবাক অসিগী লৌমী কয়াদা হন্না হন্না য়াইফ-পাউজেল পীজরি।

হন্না হন্না থাগৎচরি !

*****