থাগৎখিবা:
18 NOV 2026 9:38AM by PIB Imphal
লৌউ-শিংউ অমসুং লৌমীশিংগী য়াইফ-য়ুম্বাল অমদি খুঙ্গং চাওখৎ-থৌরাংগী কেন্দ্র মন্ত্রী শ্রী শিবরাজ সিং চৌহান্না নবেম্বর ২০, ২০২৬ তা ভোপালগী আই.সি.এ.আর.-নেসনেল ইন্সতিত্যুত ওফ হাই সেক্যুরিতী এনিমেল দিজিজেস (ICAR-NIHSAD)তা ভারতকী অহানবা লৈবাকসিদা পুথোকচবা ইনএক্তিভেতেদ H5N1 (ক্লেদ 2.3.2.1a) হাইলী পেথোজেনিক এভিয়ন ইনফ্লুএঞ্জা (HPAI) য়েনগী ভেক্সিন লৈবাক্কী মফমদা কত্থোক্লগনি। ভোপালগী ICAR-NIHSADনা লৈবাকসিদা শেমগৎচবা ভেক্সিন অসি ক্লেদ 2.3.2.1aগী H5N1 HPAI ভাইরসকী মায়োক্তা ভারত্তা অহানবা ওইনা পুথোকপনি।
বেকগ্রাউন্দ
মীয়াম্না বর্দ ফ্লু হায়না খঙনবা হাইলী পেথোজেনিক এভিয়ন ইনফ্লুএঞ্জা (HPAI) অসি য়েন-ঙানুশিংদা নাবা অরুবা লায়না অমনি। লায়না অসি শন্দোরকপনা অনাবা উচেকশিংগী মরক্তা চাদা ১০০ রোম শিবগী ওইথোকপা লৈ, মসিনা মরম ওইদুনা উচেকশিং পাক্তক্ননা হাত্তোকপা অমসুং ললোন-ইতিক্তা অথিংবা থম্বনা য়েন-ঙানু লোইরিবা লৌমীশিংদা শেল-থুমগী ওইনা অচৌবা মাঙজবা ওইহল্লি। মসিগী চৈথেং অসি য়েন-ঙানু লোইরিবা লৌমাশিংখক্তনা ফংবা নত্তে; মসিনা মালেমগী ললোন-ইতিক, পোল্ত্রীগী পোত্থোকশিংগী মমল অমসুং লৌমীশিংগী হিংনবগী লম্বীদসু শাফু পীবা য়াই। ২০০৬ তা ভারত্তা লায়না অসি অহানবা ওইনা থেংনখিবদগী হৌরগা লৈবাক অসিদা H5N1 অমসুং H5N8 সবতাইপ অনিমক পুন্না ৫০০ হেন্না শন্দোরকপগী রিপোর্ত লৈখ্রে।
বর্দ ফ্লু পাক্তক্ননা শন্দোরকপনা ভারতকী GDP ৱাংখৎলকপগী চাং চাদা ১.৫ ফাওবা হন্থহনবা য়াই, অদুগা লায়না অসি লাকশিন্দনা শন্দোরক্লবদি লৈবাক অসিগী পোল্ত্রী মশীংগী চাদা ২০ হেনবদা খুদোংথিবা ওইহনবা য়াই। ২০০৬ কী বর্দ ফ্লু শন্দোরকপা অদুনা চাউরাক্না হকথেংনবা অমসুং নাকোয়ননা লুপা করোর ২,২০০–৩,০০০ রোম মাঙহনখি। মনিপুরদা লায়না অসি শন্দোরকপদসু স্তেত অসিগী GDPগী চাদা ০.৫ কী চাংদা অমাঙবা ওইহনখি। লায়না অসি মীয়ামগী হকশেলগী ওইনসু শিংনবা অমনি। ৱর্ল্দ হেল্থ ওর্গনাইজেসন (WHO)গী মতুং ইন্না, ২০০৩ দগী হৌরগা ভারত য়াওনা লৈবাক ২৫ দা মীওই ৪৭৯ শিখিবা য়াওনা মীওই ১,০০৩ দা H5N1 এভিয়ন ইনফ্লুএঞ্জা নাবগী রিপোর্ত তৌখি।
ভাইরস অসিগী মতাঙদা নৈনবশিংনা ক্লেদ 2.3.2.1a হায়না খঙনবা H5N1 স্ত্রেন অসিনা য়েনশিংদা বর্দ ফ্লু শন্দোরকপগী অয়াম্বা শরুক্কী মরম ওই হায়বসি উৎলি। ইকুই কুইদ্রিবদা, মীওই অহুমদা নাবা থেংনবগা লোয়ননা মেম্মেলশিং য়াওনা তোঙান-তোঙানবা শা-ঙাশিংগী কাঙলুপশিংদসু স্ত্রেন অসিনা শন্দোকহনবা লায়না থেংনরে। মসিনা য়েন ঙানু লোইরিবা লৌমীশিংগী শেল-থুমগী মাঙজবা হন্থহন্নবা অমসুং য়েনদগী অতোপ্পা শা-ঙা অমসুং মীওইবদা শন্দোকপা থিংনবগীদমক ভাইরস অসি শন্দোরকপা লাকশিনবা অসি মরু ওইহল্লি।
হৌজিক্কী ওইনদি, ক্লেদ 2.3.2.1aগী H5N1 ভাইরসকী মায়োক্তা অখন্নবা কমর্সিয়েল ভেক্সিন অমত্তা ফংদ্রি। মরম অদুনা, লৈবাকসিদা পুথোকচবা ভেক্সিন অমা শেমগৎপা অসি ভারতকীদমক মরু ওই। ICAR-NIHSADনা শেমগৎপা ভেক্সিন অসিনা লৈবাক অসিদা শন্দোরক্লিবা ক্লেদ 2.3.2.1a H5N1 ভাইরস স্ত্রেনশিংদগী ঙাকথোক্তুনা মথৌ তাবা অসি ফংহন্নবা পান্দম থম্লি।
***