ସୂଚନା ଓ ପ୍ରସାରଣ ମନ୍ତ୍ରଣାଳୟ
ଦେଶର ଶ୍ରେଷ୍ଠ ପର୍ଯ୍ୟଟନସ୍ଥଳୀରେ ପହଞ୍ଚିବ ଜାତୀୟ ଚଳଚ୍ଚିତ୍ର ପୁରସ୍କାର
ଜାତୀୟ ଚଳଚ୍ଚିତ୍ର ପୁରସ୍କାର: ଶ୍ରେଷ୍ଠ ପର୍ଯ୍ୟଟନସ୍ଥଳର ପ୍ରସ୍ତାବ ଦେବାକୁ ରାଜ୍ୟଗୁଡ଼ିକୁ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ଆହ୍ୱାନ
ଜାତୀୟ ଚଳଚ୍ଚିତ୍ର ପୁରସ୍କାର ସମ୍ମିଳନୀ କକ୍ଷରୁ ବାହାରି ଲୋକଙ୍କ ପାଖରେ ପହଞ୍ଚିବ: ଅଶ୍ୱିନୀ ବୈଷ୍ଣବ
ପୋଷ୍ଟ କରାଯିବା ଦିନାଙ୍କ:
22 SEP 2026 1:09PM by PIB Bhubaneswar
କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ଶ୍ରୀ ଅଶ୍ୱିନୀ ବୈଷ୍ଣବ ଆଜି କହିଛନ୍ତି ଯେ, ଜାତୀୟ ଚଳଚ୍ଚିତ୍ର ପୁରସ୍କାରକୁ ଦେଶର ଶ୍ରେଷ୍ଠ ପର୍ଯ୍ୟଟନ ସ୍ଥଳୀଗୁଡ଼ିକରେ ଆୟୋଜନ କରାଯିବ। ଜାତୀୟ ସ୍ତରର କାର୍ଯ୍ୟକ୍ରମଗୁଡ଼ିକୁ ପାରମ୍ପାରିକ ସ୍ଥାନରୁ ବାହାରକୁ ନେଇ ଦେଶର ବିଭିନ୍ନ ସ୍ଥାନ ସହିତ ଯୋଡ଼ିବା ପାଇଁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟି ସମ୍ପନ୍ନ ଚିନ୍ତାଧାରା ଦ୍ୱାରା ଅନୁପ୍ରାଣିତ ହୋଇ ଏହି ପଦକ୍ଷେପ ନିଆଯାଉଛି।
ଗଣମାଧ୍ୟମ ସହ ଆଲୋଚନା ବେଳେ ଶ୍ରୀ ଅଶ୍ୱିନୀ ବୈଷ୍ଣବ କହିଲେ, "ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ଅନୁପ୍ରାଣିତ ହୋଇ ଆମେ ଜାତୀୟ ଚଳଚ୍ଚିତ୍ର ପୁରସ୍କାର କାର୍ଯ୍ୟକ୍ରମକୁ ଦେଶର ସର୍ବୋତ୍ତମ ପର୍ଯ୍ୟଟନ ସ୍ଥଳୀଗୁଡ଼ିକୁ ନେଇଯାଉଛୁ।"
ସେ କହିଲେ ଯେ ଏକତା ନଗର ସମଗ୍ର ବିଶ୍ୱରେ ସ୍ୱତନ୍ତ୍ର ପରିଚୟ ଲାଭ କରିଛି ଏବଂ ଏହା ଏକ ଅତ୍ୟନ୍ତ ଆକର୍ଷଣୀୟ ପର୍ଯ୍ୟଟନ ସ୍ଥଳୀ, ଯେଉଁଠାରେ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ବିଶ୍ୱର ସର୍ବୋଚ୍ଚ ପ୍ରତିମୂର୍ତ୍ତି ରହିଛି। ସେ ଆହୁରି ମଧ୍ୟ କହିଲେ ଯେ ଯେତେବେଳେ ଭାରତର ମାନ୍ୟବର ରାଷ୍ଟ୍ରପତି ଏବଂ ଦେଶର ଚଳଚ୍ଚିତ୍ର ଜଗତର ପ୍ରମୁଖ ବ୍ୟକ୍ତିବିଶେଷ ଏଭଳି ଏକ ପ୍ରସିଦ୍ଧ ପର୍ଯ୍ୟଟନ ସ୍ଥଳୀ ପରିଦର୍ଶନ କରନ୍ତି, ସେତେବେଳେ ଏହା ଅଧିକ ଲୋକଙ୍କୁ ସେହି ସ୍ଥାନ ବିଷୟରେ ଜାଣିବା ଓ ଅନୁଭବ କରିବାର ସୁଯୋଗ ପ୍ରଦାନ କରିଥାଏ।
ମନ୍ତ୍ରୀ କହିଲେ ଯେ ଜାତୀୟ ଚଳଚ୍ଚିତ୍ର ପୁରସ୍କାରକୁ କେବଳ ଏକ ସମ୍ମିଳନୀ କକ୍ଷ ମଧ୍ୟରେ ସୀମିତ ନ ରଖି ଲୋକଙ୍କ ନିକଟତର କରିବା ଏବଂ ପର୍ଯ୍ୟଟନ ମାଧ୍ୟମରେ ଏହାର ପ୍ରଚାର ଓ ପ୍ରସାର କରିବା ଏହି ପ୍ରୟାସର ଲକ୍ଷ୍ୟ।
ଶ୍ରୀ ଅଶ୍ୱିନୀ ବୈଷ୍ଣବ ସମସ୍ତ ରାଜ୍ୟକୁ ଆହ୍ୱାନ ଦେଇଛନ୍ତି ଯେ ସେମାନେ ଜାତୀୟ ଚଳଚ୍ଚିତ୍ର ପୁରସ୍କାର ଆୟୋଜନ ପାଇଁ ନିଜର ସର୍ବୋତ୍ତମ ପର୍ଯ୍ୟଟନ ସ୍ଥଳୀ ଚିହ୍ନଟ କରି ପ୍ରସ୍ତାବ ଦାଖଲ କରନ୍ତୁ। ସେ କହିଲେ ଯେ ଏହି ପ୍ରସ୍ତାବଗୁଡ଼ିକରେ ଉତ୍ତମ ସୁବିଧା ସୁଯୋଗ ସହିତ ସେହି ସ୍ଥାନର ସର୍ବାଙ୍ଗୀନ ବିକାଶ ପାଇଁ ଏକ ଯୋଜନା ମଧ୍ୟ ଅନ୍ତର୍ଭୁକ୍ତ ରହିବା ଆବଶ୍ୟକ। ଯେଉଁ ରାଜ୍ୟର ପ୍ରସ୍ତାବ ଚୟନ କରାଯିବ, ସେହି ରାଜ୍ୟ ଉକ୍ତ ପ୍ରସ୍ତାବିତ ପର୍ଯ୍ୟଟନ ସ୍ଥଳୀରେ ପରବର୍ତ୍ତୀ ଜାତୀୟ ଚଳଚ୍ଚିତ୍ର ପୁରସ୍କାର କାର୍ଯ୍ୟକ୍ରମ ଆୟୋଜନ କରିବ।
ମନ୍ତ୍ରୀ ମନେ ପକାଇଦେଲେ ଯେ ଯେତେବେଳେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଜି୨୦ ର ଆୟୋଜନ କରିଥିଲେ, ସେତେବେଳେ ଏହାର କାର୍ଯ୍ୟକ୍ରମଗୁଡ଼ିକୁ ଦେଶର ବିଭିନ୍ନ ଅଞ୍ଚଳ ଓ ରାଜ୍ୟରେ ଆୟୋଜନ କରାଯାଇଥିଲା। ସେ କହିଲେ ଯେ ଚଳଚ୍ଚିତ୍ର ଏବଂ ପର୍ଯ୍ୟଟନକୁ କିପରି ଏକତ୍ରିତ କରାଯାଇପାରିବ, ସେ ନେଇ ଏକ ବ୍ୟାପକ ଚିନ୍ତାଧାରା ଅଧୀନରେ ଜାତୀୟ ଚଳଚ୍ଚିତ୍ର ପୁରସ୍କାର କାର୍ଯ୍ୟକ୍ରମକୁ ମଧ୍ୟ ଦେଶର ବିଭିନ୍ନ ସ୍ଥାନକୁ ନିଆଯାଉଛି।
ଶ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ ଚଳଚ୍ଚିତ୍ର ଓ ପର୍ଯ୍ୟଟନକୁ ଏକତ୍ରିତ କରିବା ଦ୍ୱାରା ପର୍ଯ୍ୟଟନ ସ୍ଥଳୀଗୁଡ଼ିକ ଉପକୃତ ହେବ ଏବଂ ଏହା ଜାତୀୟ ଚଳଚ୍ଚିତ୍ର ପୁରସ୍କାରକୁ କେବଳ ଏକ ସମ୍ମିଳନୀ କକ୍ଷ ମଧ୍ୟରେ ସୀମିତ ନ ରଖି ଦେଶର ବିଭିନ୍ନ ପ୍ରକୃତ ପର୍ଯ୍ୟଟନ ସ୍ଥଳୀ ପର୍ଯ୍ୟନ୍ତ ପହଞ୍ଚାଇବାରେ ସକ୍ଷମ କରିବ।
***
(ରିଲିଜ ଆଡି: 2313631)
ପରିଦର୍ଶକ କାଉଣ୍ଟର : 7
ଏହି ରିଲିଜ ପଢନ୍ତୁ :
English
,
Urdu
,
Nepali
,
Marathi
,
हिन्दी
,
Bengali-TR
,
Bengali
,
Assamese
,
Manipuri
,
Punjabi
,
Gujarati
,
Tamil
,
Telugu
,
Kannada
,
Malayalam