U Myntri Sorkar Pdeng ba dei khmih ia ka Tnad Information and Broadcasting, u Ashwini Vaishnaw, u la plie paidbah ia ka WAVES Creators’ Corner ha ka sngi kaba ar jong ka India AI Impact Summit 2026. La pynkhreh kum ka jaka saindur thymmai kaba treikam pura, kaba lah kloi ban treikam, ïa ka Pavilion la saindur khnang ban pyni ïa ki jingpyndonkam ba wanrah jingpynkylla jong ka Artificial Intelligence hapoh ka AVGC-XR (animation, VFX, Gaming, Comics, bad ka Extended Reality).

Ha ka jingïalang plie, u Myntri u la ban jur ba ka WAVES Creators’ Corner ka long kum ka jingpyniar ïa ki sienjam ba kongsan jong ka Tnad, kynthup ïa ka WaveX, ka Waves Bazaar, bad ki Create in India Challenge. U Vaishnaw u la ïaid lynti bad peit bniah ha ka pavilion, da kaba ïakren bad ki nongseng kam seng jam kiba dang mih na ka kynhun WaveX startup bad ki nongïalam na ki kynhun na kylleng ka pyrthei kum ka Adobe, Netflix, Sony, bad Amazon.

51 tylli ki Startup ki la ioh ia ka jingpynpaw pyrthei

Ha ka jingkyntiew kaba khraw ïa ka jinglong jingman jong ka kam Media bad jingpynbyrngia, 51 tylli ki startup jong ka AVGC-XR bad Media Tech, ba la kyrshan da ka WaveX, ki pyni ïa ki lad pynbeit ba la pyntreikam da ka AI bad ki teknoloji ha ka Pavilion. U Ashwini Vaishnaw u la ïakren bad kine ki nongseng kam seng jam, kynthup ruh ïa ki nongjop ha ki jingiakop Bhasha Setu bad Kalaa Setu.

Ka jingiakren bad ka Shradha Sharma

U Myntri u la ïashim bynta ruh ha ka jingïakren bad ka Shradha Sharma jong ka YourStory ha ka Media Lounge. Ha kane ka jingïalang, u la ïasam ïa ka jingsngew jong u halor ka jingktah kaba jur jong ka AI ïa ka imlang sahlang, da kaba ban jur kumno ka teknoloji ka pyndap ïa ka jing duna ha ki sap na ki jaka nongkyndong jong ka India ban seng ïa ki startup kiba pawnam ha ka pyrthei.

Ki Mat ba kongsan jong ka teknoloji ha ka WAVES Creators’ Corner

Ka Pavilion ka la pyni ia ki jingshem ba thymmai jong ka AI, naduh ka jingpynmih mardor ia ki jingialehkai bad ki jaka pyni ia ka phlim ba kloi sha ka kamra thoh khubor ba la pyntreikam da ka AI da ka AWS bad ka BharatGen kaba iarap ia ki kam ba la shna hi da lade. Ki jingsaindur thymmai ki kynthup ïa ka jingbud ia ki sur briew kaba la saindur da ka Sarvam bad ka Indus Chat App na ka bynta ka jingïakren ha ki jait ktien ba bun, ki jingpyni ïa ki phlim AI ba 270 degree ba la pynbeit da ka NFDC, ka teknoloji pynthymmai ïa ka durkhmat bad ka sur jong ka Sony Research India, bad ka marker-less motion capturing jong ka Whistling Woods International kaba pyndonkam da ka DSLR lane iPhone.

Ka Jingkyntiew ia ka bor treikam bad ka jingpynkhreh ia ka lawei:

U Myntri u la ïaroh ïa ka IICT kaba la pynïasoh ïa ka AI ha ka jinghikai ba thymmai ban pynkhreh ïa ki samla pule na ka bynta ki jingdonkam jong ka kam kiba nang kiew.

Ka WAVES Creators’ Corner:

Ka rynsan kan dang bteng ban pynlong ïa ki jingïakren jong ki riew shemphang, ki masterclass jong ki nongshna phlim, bad ki jingïalang ba iadei bad ka teknoloji da ki nongïalam jong ka pyrthei ha baroh kawei ka Summit.

*****