U Myntri Kam Pohiing bad Cooperation jong ka sorkar pdeng, Amit Shah, u la iashim bynta ha ka prokram 'Unity Utsav - One Voice, One Nation' ba la pynlong da ka Assam Rifles ha New Delhi mynta ka sngi kum u kongsan. Bun ki kynrem ki lyndan ba kynthup ia u Director General of Assam Rifles ki la iadonlang ha kane ka jingialang.

Ha ka jingai jingkren jong u, u Myntri Kam Pohiing jong ka sorkar pdeng, Amit Shah u la ong ba ka kyntien jingiatylli kalong kaba kongsan bha ia ka thain shatei lammihngi. La bun bun snem hadien ba la ioh ia ka jinglaitluid, ka jaka ba bun jong ka thain shatei lammihngi la pynjngai ha ka jingsngew bad ka jinglong na Delhi. U la ong ba u Myntri Rangbah duh Narendra Modi u la pynduh ia kane ka jingjngai hapdeng ka thain shatei lammihngi bad ka Delhi lyngba ka lad jingpyniasoh. Mynta ka thain shatei lammihngi kadei jong ka India baroh kawei bad ka India baroh kawei kadei jong ka thain shatei lammihngi. U Shah u la ong ba ka sorkar Modi ka la kyntiew da ki spah ki lad mang tyngka na ka bynta ka thain shatei lammihngi bad ka la ai palat 3-4 shah ka jingmang tyngka ia ka thain shatei lammihngi. U la ong ba shuwa u 2027, yn pyniasoh ia baroh 8 tylli ki jylla ka thain shatei lammihngi bad ka Delhi lyngba ka lynti rel bad liengsuin.

U Myntri Kam Pohiing u la ong ba u Myntri Rangbah duh Modi u la kyntiew ia ka thain shatei lammihngi ha kylleng ka ri kum ka Ashtalakshmi bad baroh 8 tylli ki jylla jong ka thain ki don ka bor ban kyntiew ia ka ri ha man ka bynta. U la ong ba ki don bun ki lad na ka bynta ki samla jong ka thain shatei lammihngi ha ka liang ka ioh ka kot, ka deiriti, ka jingshngain, kam ialehkai bad jingwad bniah bad ka roi ka par. U la bynrap ba ka sorkar Modi ka la plie shibun ki lad ia ka thain shatei lammihngi ha man ka kam, naduh ka kam jngoh kai haduh ka teknoloji, kam ialehkai haduh kam haw haw, kam rep haduh ka jingseng kam lajong bad ki kam bank bad kam khaii pateng.

U Amit Shah u la ong palat 220 tylli ki kynhun tynrai bad palat 160 ki jaitbynriew riewlum kiba shong ba sah ha ka thain shatei lammihngi, la kren palat 200 tylli ki jait ktien, ki don palat 50 tylli ki tamasa ba kyrpang ba ju rakhe bad palat 30 tylli ki jingshad tynrai bad palat 100 tylli ki jait bam ba don ha ka thain. U la ong ba kane baroh kadei ka jingriewspah ka hiar pateng na ka bynta ka ri India baroh kawei, kaba sngewsarong ia la ka jong ka hiar pateng. U Shah u la ong ba ka India khlem ka thain shatei lammihngi bad ka thain shatei lammihngi khlem ka India kam long kaba pura.

U Myntri Kam Pohiing bad Cooperation jong ka sorkar pdeng u la ong ba ka phang pdeng jong ka tamasa North-East Unity kadei ka ‘one voice, one nation’. U la ong ba ka ri jong ngi kadei ka jingiakhleh lang shibun ki ktien, ki deiriti, ka bam bad ka riam ka beit bad kane ka jingiatylli hapdeng ka jingiar kadei kaba kyrpang bad ka bor kaba khraw ia ka ri jong ngi. Lyngba ka Unity Utsav kaba 5 sngi, la pyni ia ka jingiatylli jong ka thain shatei lammihngi ha Delhi. U Shah u la ong ba ka Assam Rifles kadei ka kynhun shipai kaba la rim tam jong ka ri bad la ithuh ia kane ka kynhun shipai kum ka ‘Paralok jong ka thain shatei lammihngi’ . U la ong ba ka Assam Rifles ka don ka bynta ba kongsan ban pyllait ia ka thain shatei lammihngi na ki jingeh ba bun. U la ong ba lyngba kane ka prokram, mynta ka Assam Rifles ka la jop ha ka jingpyni ia ka jingiatylli bad ka bor jong ka deiriti jong ka thain shatei lammihngi sha ka ri baroh kawei bad ka pyrthei.

U Shah u la ong ba 212 tylli ki kynhun bad 1500 ngut ki samla pule ki la iashim bynta ha ki jingiakop ba iadei bad ki kam ialehkai ha kane ka prokram bad palat 150 ngut ki samla pule ki la iashim bynta ruh ha ki prokram deiriti. U la ong ba mynta bun ki khusnam la ioh rah da ka Manipur, kaba pyni ka jingkongsan jong ka kam ialehkai ha Manipur. U Shah u la ong da kaba buh jingmut ia ka jingpawnam ka kam ialehkai ha ka thain shatei lammihngi, u Myntri Rangbah duh Narendra Modi u la rai ban plie ia ka sports university ba nyngkong jong ka ri ha Manipur. U la ong ba ka kam ialehkai ia baroh, ka kam ialehkai na ka bynta ka jingpawnam ka la long ka rukom treikam na ka bynta ka jingkiew ka kam ialehkai ha India. U Myntri Kam Pohiing u la pynpaw ka jingngeit skhem ba ha u 2036, ka India kan pynlong ia ka lympung ialehkai Olympic, bad ka ri kan don ha ka top 10, bad ki jylla ka thain shatei lammihngi kin don ka bynta ba kongsan ha kane ka jingjop.

U Myntri Kam Pohiing jong ka sorkar pdeng u la ong ba hapoh ka jingialam jong u Myntri Rangbah duh, Narendra Modi, ha ki 10 snem ba la leit, khamtam ha ki 5 snem ba la leit, ka la don ka jingkylla kaba kongsan ha ka jinglong ka shongsuk shongsain ha ka thain shatei lammihngi. U la ong ba ki jingjia iaumsnam bad ki jingkhlad jong ki shipai ka la duna da 70 per cent bad ka jingkhlad ki riewpaidbah da 85 per cent ha ka thain shatei lammihngi. U Shah u la ong ba kane ka jing duna ha ki jingjia iaumsnam ka pyni ba mynta ka don ka shongsuk shongsain ha ka thain shatei lammihngi bad ka juk ba thymmai jong ka roi ka par bad ka jingkiew ka deiriti ka la sdang.

U Amit Shah u la ong ba naduh u 2014, palat 10,500 ngut ki riewkieng atiar  ki la wan aiti ia ki tiar ialeh jong ki ha ka thain shatei lammihngi bad ladep ban iasoi 12 tylli ki soskular iasuk ha ka thain hapdeng u snem 2019 bad 2024. U la ong ba ki la don bun ki jingiakajia hangne da ki phew snem, hynrei ka sorkar Modi ka la shim ar sienjam shakhmat bad pyni ia ki samla ba ki don shibun ki lad na ka bynta jong ki. U Myntri Kam Pohiing u la kyrpad ia ki samla kiba don bynta ha ki kam iaumsnam ban pyniasoh noh bad ka imlang sahlang da kaba wan aiti ia ki tiar ialeh.

U Myntri Kam Pohiing bad Cooperation u la ong ba mynta, kam don kano kano ka bynta jong ka India ka bym khein ia ka thain shatei lammihngi kum ka lajong, bad ka bym don kata ka jingieid ia ki briew jong kane ka thain. U la ong ba ki briew jong man ka jylla ha ka ri ki don ka jaka ba kyrpang ia ki briew jong ka thain shatei lammihngi ha ki mynsiem jong ki, bad man ka jylla ha ka thain shatei lammihngi ruh kadei ban mih shakhmat bad nohsynniang sha ka roi ka par jong ka ri baroh kawei. U Shah u la ong ba ka thain shatei lammihngi mynta ka kwah ia ka shongsuk shongsain bad ka roi ka par bad kwah ban treikam kum ka bynta ba kongsan jong ka India.

****