কেন্দ্ৰীয় গৃহ আৰু সমবায়  মন্ত্ৰী শ্ৰী অমিত শ্বাহে আজি নতুন দিল্লীত অসম ৰাইফলছৰ উদ্যোগত আয়োজিত ‘ইউনিটী উৎসৱ-ৱান ভইচ, ৱান নেশ্যন’ত মুখ্য অতিথি হিচাপে অংশগ্ৰহণ কৰে। এই উপলক্ষে অসম ৰাইফলছৰ সঞ্চালক প্ৰধানকে ধৰি বহু বিশিষ্ট ব্যক্তি উপস্থিত থাকে।

নিজৰ ভাষণত কেন্দ্ৰীয় গৃহমন্ত্ৰী শ্ৰী অমিত শ্বাহে কয় যে উত্তৰ-পূৰ্বাঞ্চলৰ বাবে ঐক্য শব্দটো অতি গুৰুত্বপূৰ্ণ। স্বাধীনতাৰ পিছৰ বহু বছৰ ধৰি উত্তৰ-পূবৰ ইমান বৃহৎ অঞ্চলৰ দিল্লীৰ পৰা শাৰীৰিক আৰু আৱেগিক দূৰত্ব বহুত ডাঙৰ আছিল। তেওঁ কয় যে প্ৰধানমন্ত্ৰী শ্ৰী নৰেন্দ্ৰ মোদী জীয়ে কানেক্টিভিটীৰ মাধ্যমত উত্তৰ-পূব আৰু দিল্লীৰ মাজত থকা শাৰীৰিক আৰু হৃদয়ৰ দূৰত্ব নাইকিয়া কৰিছে। আজি উত্তৰ পূৰ্বাঞ্চল সমগ্ৰ ভাৰতৰ আৰু সমগ্ৰ ভাৰত উত্তৰ পূৰ্বাঞ্চলৰ। শ্ৰী শ্বাহে কয় যে মোদী চৰকাৰে উত্তৰ-পূবৰ বাবে শ শ বাজেটীয় ব্যৱস্থা বৃদ্ধি কৰিছে আৰু উত্তৰ-পূবক ৩-৪গুণ বেছি বাজেট দিছে। তেওঁ কয় যে ২০২৭ চনৰ ভিতৰত উত্তৰ-পূৰ্বাঞ্চলৰ আঠোখন ৰাজ্য ৰে’ল আৰু বিমান সংযোগৰ জৰিয়তে দিল্লীৰ সৈতে সংযুক্ত হ’ব।

গৃহমন্ত্ৰীগৰাকীয়ে কয় যে প্ৰধানমন্ত্ৰী মোদীয়ে উত্তৰ-পূবক অষ্টলক্ষ্মী হিচাপে সমগ্ৰ ভাৰততে বিখ্যাত কৰি তুলিছে। তেওঁ কয় যে উত্তৰ-পূৰ্বাঞ্চলৰ আটাইকেইখন ৰাজ্যই দেশক সকলো দিশতে সমৃদ্ধিশালী কৰিবলৈ সক্ষম। অৰ্থনৈতিক, সাংস্কৃতিক, নিৰাপত্তা, ক্ৰীড়া আৰু গৱেষণা আৰু উন্নয়নৰ ক্ষেত্ৰত উত্তৰ-পূৰ্বাঞ্চলৰ যুৱক-যুৱতীসকলৰ বাবে অপৰিসীম সুযোগ আছে। মোদী চৰকাৰে  পৰ্যটনৰ পৰা প্ৰযুক্তিলৈ, ক্ৰীড়াৰ পৰা মহাকাশলৈ, কৃষিৰ পৰা উদ্যমিতালৈ আৰু বেংকিঙৰ পৰা ব্যৱসায়লৈ প্ৰতিটো খণ্ডতে উত্তৰ-পূৰ্বাঞ্চলৰ বাবে বহু সম্ভাৱনা মুকলি কৰিবলৈ কাম কৰি আহিছে।

শ্ৰী অমিত শ্বাহে কয় যে আমাৰ উত্তৰ পূৰ্বাঞ্চলত ২২০টাতকৈও অধিক জনগোষ্ঠী আৰু ১৬০টাতকৈও অধিক জনজাতি বসবাস কৰে। ইয়াত ২০০ৰো অধিক উপভাষা আৰু ভাষা কোৱা হয়, ৫০টাতকৈও অধিক অনন্য উৎসৱ উদযাপন কৰা হয় আৰু ৩০টাতকৈও অধিক পৰম্পৰাগত নৃত্য আৰু ১০০টাতকৈও অধিক ব্যঞ্জন এই অঞ্চলত আজিও বিদ্যমান। তেওঁ কয় যে এই সকলোবোৰ সমগ্ৰ ভাৰতৰ বাবে এক বিশাল চহকী ঐতিহ্যৰ ভঁৰাল আৰু এই ঐতিহ্যক লৈ সমগ্ৰ দেশ গৌৰৱান্বিত। শ্ৰী শ্বাহে কয় যে উত্তৰ-পূব অবিহনে ভাৰত আৰু ভাৰত অবিহনে উত্তৰ-পূব অসম্পূৰ্ণ।

কেন্দ্ৰীয় গৃহ আৰু সমবায়  মন্ত্ৰীগৰাকীয়ে কয় যে এই উত্তৰ পূৰ্বাঞ্চল ঐক্য মহোৎসৱৰ বিষয়বস্তু হৈছে এক কণ্ঠ, এক ৰাষ্ট্ৰ। তেওঁ কয় যে আমাৰ দেশখন বহু ভাষা, সংস্কৃতি, খাদ্য আৰু সাজ-পোছাকৰ এক আচৰিত মিশ্ৰণ আৰু এই বৈচিত্ৰ্যৰ মাজত ঐক্যই আমাৰ দেশৰ বিশেষত্ব আৰু আটাইতকৈ ডাঙৰ শক্তি। ইউনিটী উৎসৱৰ এই পাঁচদিনীয়া ভব্য সমাৰোহে উত্তৰ-পূৰ্বাঞ্চলৰ ঐক্য আৰু সাংস্কৃতিক সমৃদ্ধিক দিল্লীত প্ৰদৰ্শন কৰাৰ কাম কৰিছে। শ্ৰী শ্বাহে কয় যে অসম ৰাইফলছ ভাৰতৰ আটাইতকৈ পুৰণি অৰ্ধসামৰিক বাহিনী আৰু অসম ৰাইফলছৰ চিনাক্ত উত্তৰ পূৰ্বাঞ্চলৰ প্ৰকৃত বন্ধু হিচাপে কৰা হয়। তেওঁ কয় যে অসম ৰাইফলছে উত্তৰ-পূবক বহু সংকটৰ পৰা উদ্ধাৰ কৰাত গুৰুত্বপূৰ্ণ ভূমিকা পালন কৰিছে। তেওঁ কয় যে আজি এই অনুষ্ঠানৰ জৰিয়তে অসম ৰাইফলছে উত্তৰ-পূৰ্বাঞ্চলৰ ঐক্য আৰু সাংস্কৃতিক শক্তিক সমগ্ৰ দেশ আৰু বিশ্বৰ আগত প্ৰদৰ্শন কৰাত সফল হৈছে।

শ্ৰী অমিত শ্বাহে কয় যে এই অনুষ্ঠানত ক্ৰীড়া প্ৰতিযোগিতাত ২১২টা দল আৰু ১৫০০ ছাত্ৰ-ছাত্ৰীয়ে আৰু সাংস্কৃতিক কাৰ্যসূচীত ১৫০ৰো অধিক ছাত্ৰ-ছাত্ৰীয়ে অংশগ্ৰহণ কৰে। তেওঁ কয় যে আজি লাভ কৰা অধিকাংশ পুৰস্কাৰ মণিপুৰৰ ভাগত আহিছে, যিয়ে মণিপুৰৰ ক্ৰীড়াৰ গুৰুত্ব প্ৰকাশ কৰিছে। উত্তৰ-পূৰ্বাঞ্চলত ক্ৰীড়াৰ জনপ্ৰিয়তাক মনত ৰাখিয়েই প্ৰধানমন্ত্ৰী মোদী জীয়ে দেশৰ প্ৰথমখন ক্ৰীড়া বিশ্ববিদ্যালয় মণিপুৰত নিৰ্মাণৰ সিদ্ধান্ত লয়। শ্ৰী শ্বাহে কয় যে স্প’ৰ্টছ ফৰ অল, স্প’ৰ্টছ ফৰ এক্সেলেন্স ভাৰতত ক্ৰীড়াৰ বিকাশৰ সূত্ৰ হৈ পৰিছে। গৃহমন্ত্ৰীগৰাকীয়ে আস্থা প্ৰকাশ কৰে যে ২০৩৬ চনত ভাৰতে অলিম্পিক গেমছ আয়োজন কৰিব, য’ত ভাৰত শীৰ্ষ ১০ৰ ভিতৰত থাকিব আৰু ইয়াত উত্তৰ-পূবৰ ৰাজ্যসমূহে গুৰুত্বপূৰ্ণ ভূমিকা পালন কৰিব।

কেন্দ্ৰীয় গৃহমন্ত্ৰীগৰাকীয়ে কয় যে প্ৰধানমন্ত্ৰী শ্ৰীযুত নৰেন্দ্ৰ মোদী জীৰ নেতৃত্বত যোৱা ১০ বছৰত আৰু বিশেষকৈ যোৱা ৫ বছৰত উত্তৰ-পূৰ্বাঞ্চলত আইন-শৃংখলাৰ পৰিস্থিতিৰ বৃহৎ পৰিৱৰ্তন হৈছে। তেওঁ কয় যে উত্তৰ-পূবত হিংসাত্মক ঘটনা আৰু নিৰাপত্তাৰক্ষীৰ মৃত্যুৰ হাৰ ৭০ শতাংশ হ্ৰাস পোৱাৰ লগতে সাধাৰণ নাগৰিকৰ মৃত্যুৰ হাৰ ৮৫ শতাংশ হ্ৰাস পাইছে। শ্ৰী শ্বাহে কয় যে হিংসাৰ সংখ্যাত এই হ্ৰাসে দেখুৱাইছে যে উত্তৰ-পূৰ্বাঞ্চলত এতিয়া লাহে লাহে শান্তি ঘূৰি আহিছে আৰু উন্নয়ন আৰু সাংস্কৃতিক বৃদ্ধিৰ নতুন যুগ আৰম্ভ হৈছে।

শ্ৰী অমিত শ্বাহে কয় যে ২০১৪ চনৰ পৰা এতিয়ালৈকে উত্তৰ-পূৰ্বাঞ্চলত ১০,৫০০ৰো অধিক উগ্ৰপন্থীয়ে অস্ত্ৰ-শস্ত্ৰ সমৰ্পণ কৰি মূলসুঁতিলৈ আহিছে আৰু ২০১৯ৰ পৰা ২০২৪ চনৰ ভিতৰত অঞ্চলটোত ১২খন শান্তি চুক্তি স্বাক্ষৰিত হৈছে। তেওঁ কয় যে ইয়াত দশক দশক ধৰি বহু বিবাদ চলি আছিল যদিও মোদী চৰকাৰে দুখোজ আগুৱাই গৈ যুৱক-যুৱতীসকলক আশ্বাস দিয়ে যে তেওঁলোকৰ বাবে বহু সুযোগ উপলব্ধ। গৃহমন্ত্ৰীগৰাকীয়ে হিংসাৰ লগত জড়িত যুৱক-যুৱতীসকলক অস্ত্ৰ ত্যাগ কৰি মূলসুঁতিলৈ আহিবলৈ আহ্বান জনায়।

কেন্দ্ৰীয় গৃহ আৰু সমবায়  মন্ত্ৰীগৰাকীয়ে কয় যে আজি ভাৰতৰ এনে কোনো অংশ নাই যিয়ে উত্তৰ-পূৰ্বাঞ্চলক নিজৰ বুলি গণ্য নকৰে আৰু যাৰ মনত উত্তৰ-পূৰ্বাঞ্চলৰ জনসাধাৰণৰ প্ৰতি মৰম নাই। তেওঁ কয় যে দেশৰ প্ৰতিখন ৰাজ্যৰ মানুহৰ মনত উত্তৰ-পূৰ্বাঞ্চলৰ জনসাধাৰণৰ বাবে বিশেষ স্থান আছে আৰু উত্তৰ-পূৰ্বাঞ্চলৰ প্ৰতিখন ৰাজ্যইও আগবাঢ়ি আহি সমগ্ৰ দেশৰ উন্নয়নত অৰিহণা যোগাব লাগে। শ্ৰী শ্বাহে কয় যে উত্তৰ-পূবে এতিয়া শান্তি আৰু উন্নয়ন বিচাৰে আৰু ভাৰতৰ অবিচ্ছেদ্য অংগ হিচাপে কাম কৰিব বিচাৰে।

**********

RK/VV/PR/PS