১৫ সংখ্যক ভিটিবি ৰাছিয়া কলিং ইনভেষ্টমেণ্ট মঞ্চত ৰাষ্ট্ৰপতি ভ্লাদিমিৰ পুটিনে প্ৰধানমন্ত্ৰী শ্ৰী নৰেন্দ্ৰ মোদীৰ "ভাৰত-প্ৰথম" নীতি আৰু "মেক ইন ইণ্ডিয়া" উদ্যমৰ প্ৰশংসা কৰে। ৰাষ্ট্ৰপতি পুটিনে বিকাশৰ বাবে এক সুস্থিৰ পৰিবেশ গঢ়ি তোলাৰ বাবে ভাৰতৰ প্ৰচেষ্টাৰ কথা স্বীকাৰ কৰে আৰু এই নীতিসমূহে ভাৰতৰ উন্নয়নত কেনেদৰে অৰিহণা যোগাইছে, সেই সন্দৰ্ভত গুৰুত্ব আৰোপ কৰে।

উৎপাদন বৃদ্ধি আৰু বিদেশী বিনিয়োগ আকৰ্ষিত কৰাৰ লক্ষ্যৰে "মেক ইন ইণ্ডিয়া" উদ্যমে বিশ্ব অৰ্থনীতিত ভাৰতৰ স্থিতি শক্তিশালী কৰাত গুৰুত্বপূৰ্ণ ভূমিকা পালন কৰিছে বুলি তেওঁ মন্তব্য কৰে। ৰাষ্ট্ৰপতি পুটিনৰ মন্তব্যই প্ৰধানমন্ত্ৰী মোদীৰ নেতৃত্বত ভাৰতৰ অৰ্থনৈতিক প্ৰগতিক প্ৰতিফলিত কৰিছে। তেওঁ ভাৰত চৰকাৰে ক্ষুদ্ৰ আৰু মজলীয়া আকাৰৰ উদ্যোগসমূহৰ (এছএমই) বাবে "স্থিৰ পৰিস্থিতি" সৃষ্টি কৰা প্ৰচেষ্টাৰ প্ৰশংসা কৰে, বিশেষকৈ "মেক ইন ইণ্ডিয়া" কাৰ্যসূচীৰ লগতে প্ৰধানমন্ত্ৰী শ্ৰী নৰেন্দ্ৰ মোদীয়ে আগবঢ়োৱা অৰ্থনৈতিক পদক্ষেপসমূহৰ ওপৰত বিশেষ গুৰুত্ব আৰোপ কৰে।।

ৰাষ্ট্ৰপতি পুটিনে ভাৰতত উৎপাদন আন্তঃগাঁথনি স্থাপনৰ বাবে ৰাছিয়াৰ ইচ্ছা প্ৰকাশ কৰি দেশখনৰ আমদানি প্ৰতিস্থাপন কাৰ্যসূচী আৰু ভাৰতৰ "মেক ইন ইণ্ডিয়া" উদ্যমৰ মাজত থকা সামঞ্জস্য সন্দৰ্ভত আলোকপাত কৰে। ভাৰতত বিনিয়োগ লাভজনক বুলিও পুটিনে দোহাৰে। তেওঁ লগতে কয় যে ভাৰতৰ নেতৃত্বই ইয়াৰ ৰাষ্ট্ৰীয় স্বাৰ্থক অগ্ৰাধিকাৰ দিয়াত গুৰুত্ব দিছে।

"প্ৰধানমন্ত্ৰী মোদীৰ মেক ইন ইণ্ডিয়া শীৰ্ষক একেধৰণৰ কাৰ্যসূচী আছে। আমি ভাৰতত আমাৰ উৎপাদন আন্তঃগাঁথনি স্থাপন কৰিবলৈ সাজু। প্ৰধানমন্ত্ৰীৰ নেতৃত্বত ভাৰত চৰকাৰে দেশখনক প্ৰথম স্থান দিয়াৰ নীতিৰ দ্বাৰা চালিত হৈ সুস্থিৰ পৰিবেশৰ সৃষ্টি কৰি আহিছে। আমি বিশ্বাস কৰো যে ভাৰতত বিনিয়োগ কৰাটো লাভজনক," ৰাছিয়াৰ ৰাষ্ট্ৰপতিগৰাকীয়ে কয়। ৰাছিয়ান কোম্পানী ৰোচনেফ্টে শেহতীয়াকৈ দেশখনত ২০ বিলিয়ন ডলাৰ বিনিয়োগ কৰা বুলি তেওঁ লগতে কয়।

ৰাষ্ট্ৰপতি পুটিনে ব্ৰিকছৰ বিৱৰ্তনৰ পৰিপ্ৰেক্ষিতত ৰাছিয়াৰ আমদানি প্ৰতিস্থাপন কাৰ্যসূচীৰ তাৎপৰ্য, ক্ষুদ্ৰ আৰু মজলীয়া উদ্যোগৰ বিকাশ আৰু ব্ৰিকছ+ দেশসমূহত এই উদ্যোগসমূহৰ ব্যৱসায়িক লেনদেনৰ সুবিধাৰ বাবে দ্ৰুত বিবাদ নিষ্পত্তি প্ৰণালীৰ প্ৰয়োজনীয়তাত গুৰুত্ব আৰোপ কৰে।

তেওঁ গ্ৰাহক সামগ্ৰী, তথ্য প্ৰযুক্তি, উচ্চ-প্ৰযুক্তি আৰু কৃষিৰ দৰে ক্ষেত্ৰত স্থানীয় ৰাছিয়াৰ নিৰ্মাতাসকলৰ সফলতাৰ কথা উল্লেখ কৰি বজাৰৰ পৰা প্ৰস্থান কৰা পশ্চিমীয়া ব্ৰেণ্ডসমূহৰ স্থান লোৱা নতুন ৰাছিয়ান ব্ৰেণ্ডৰ উত্থানৰ কথা উল্লেখ কৰে।

"আমাৰ বাবে আমদানি প্ৰতিস্থাপন কাৰ্যসূচীৰ অংশ হিচাপে ই বিশেষভাৱে গুৰুত্বপূৰ্ণ। নতুন ৰাছিয়ান ব্ৰেণ্ডৰ উত্থানে পশ্চিমীয়া কোম্পানীসমূহৰ স্থান লোৱাত সহায় কৰিছে, যিবোৰে স্বেচ্ছাই আমাৰ বজাৰ ত্যাগ কৰিছে। আমাৰ স্থানীয় নিৰ্মাতাসকলে কেৱল উপভোক্তা সামগ্ৰীৰ ক্ষেত্ৰতে নহয়, তথ্য-প্ৰযুক্তি আৰু উচ্চ প্ৰযুক্তিৰ উদ্যোগতো গুৰুত্বপূৰ্ণ সফলতা অৰ্জন কৰিছে," তেওঁ কয়।

ৰাষ্ট্ৰপতি পুটিনে ক্ষুদ্ৰ আৰু মজলীয়া উদ্যোগৰ বিকাশত সহায় কৰিবলৈ ব্ৰিকছ ৰাষ্ট্ৰসমূহৰ মাজত অধিক সহযোগিতাৰ বাবে আহ্বান জনায় আৰু সদস্য দেশসমূহক অহা বছৰ ব্ৰাজিলত অনুষ্ঠিত হ'বলগীয়া সন্মিলনত সহযোগিতাৰ বাবে গুৰুত্বপূৰ্ণ ক্ষেত্ৰসমূহ চিনাক্ত কৰিবলৈ আহ্বান জনায়। ব্ৰিকছৰ সৈতে ৰাছিয়াই বিকশাই তোলা বিনিয়োগ মঞ্চৰ কথা উল্লেখ কৰি ৰাষ্ট্ৰপতি পুটিনে কয় যে ইয়াৰ সকলো অংশীদাৰ দেশক লাভান্বিত কৰাৰ সম্ভাৱনা আছে আৰু আমাৰ অৰ্থনীতিক সমৰ্থন কৰা আৰু গ্লোবেল ছাউথ আৰু পূবৰ দেশসমূহক বিত্তীয় সম্পদ প্ৰদান কৰাৰ বাবে এক গুৰুত্বপূৰ্ণ সঁজুলি হ'ব বুলি আশা কৰা হৈছে।

তেওঁ লগতে কয়, "মই মোৰ ব্ৰিকছ সহযোগীসকলক সহযোগিতাৰ গুৰুত্বপূৰ্ণ ক্ষেত্ৰত সাম্প্ৰতিক পৰিস্থিতিৰ মূল্যাংকন কৰিবলৈ অনুৰোধ জনাইছো আৰু আমি নিশ্চিতভাৱে আমাৰ ব্ৰাজিলৰ সমকক্ষসকলৰ দৃষ্টি আকৰ্ষণ কৰিম, যিসকলে অহা বছৰ ব্ৰিকছৰ নেতৃত্ব দিব।"

অধিক তথ্যৰ বাবে চাওক: http://en.kremlin.ru/events/president/news/75751

***

AD/GDH/CNAN/AM/NB/AT