U President Vladimir Putin u la iaroh ia ka "India-first" policy bad ka sienjam "Make in India" jong u Myntri Rangbah Duh, Narendra Modi ha ka bynta kaba 15 jong ka VTB Russia Calling Investment Forum. U President Putin u la iaroh ia ki sienjam jong ka India ban wanrah ia ka jinglong jingman kaba kyntiew ia ka roi ka par bad u la ong ba kine ki polisi ki la iarap ia ka roi ka par jong ka India.

Ka sienjam “Make in India” kaba thmu ban kyntiew ia ka jingshna tiar bad khring ia ka jingbei tyngka nabar ka ri, ka la don ka bynta kaba heh ha ka jingpynkhlain ia ka India ha ka ioh ka kot jong ka pyrthei, u la ong. Ki jingkren jong u President Putin ki la ban jur halor ka jingkiew shaphrang jong ka India hapoh ka jingialam jong u Myntri Rangbah Duh Modi. U la iaroh ia ka Sorkar India bad ki sienjam ban wanrah ia ka jinglong jingman kaba ryntih na ka bynta ki small and medium-sized enterprise (SME), bad u la kdew sha ki sienjam na ka bynta ka ioh ka kot ba la wanrah da u Myntri Rangbah Duh Narendra Modi, da kaba peit bniah ia ka prokram "Make in India".

U President Putin u la pyniasyriem ia ka import substitution program jong ka Russia bad ka sienjam "Make in India" jong ka India bad u la ong ba ka Russia ka kloi ban sdang ia ka jingshna tiar ha India. Ki jingbei tyngka ha India ki dei kiba wanrah ia ka jingiohnong, u la ong. U la ban jur ruh ba ki nongialam ka India ki la peit bniah ia ka bha ka miat jong ka ri.

"U Myntri Rangbah Duh Modi u don ka prokram kaba iasyriem kaba tip kum ka Make in India. Ngi ruh ngi dang pyrshang ban sdang ia ki kam shna tiar ha India. Ka Sorkar India, hapoh ka jingialam jong u Myntri Rangbah Duh, ka la wanrah ia ki jinglong jingman kiba ryntih, kaba wan na ki poisi kiba phaikhmat shuwa sha ka India. Ngi ngeit ba ka jingbei tyngka ha India ka dei kaba wanrah ia ka jingiohnong,” la ong u President ka Russia. U la ong ba ka kompani na Russia, ka Rosneft dang shen ka la bei tyngka haduh $20 bn ha ka ri.

U President Putin u la kdew ruh sha ka jingkongsan jong ka import substitution program jong ka Russia ha kaba iadei bad ka jingkylla ka BRICS, da kaba phaikhmat sha ka jingkiew ki SME bad ka jingdonkam ia ka jingpynbeit ia ki jingiathut kaba sted ban plie lad ia ka jingiaid ryntih ki kam khaii pateng jong ki SME ha ki ri BRICS+.

U la kdew sha ka jingwan bujli ki tiar na Russia ia ki tiar na ki ri ka thain sepngi kiba la mih noh na ki iew, namar ka jingjop ki nongshna tiar jong ka Russia ha ki kam kum ki mar kiba pyndonkam ki briew, ki mar IT, ki mar high-tech bad ki kam rep.

"Ia ngi kane ka long kaba kongsan bha kum shi bynta ka import substitution program jong ngi. Ka jingmih ki mar ba thymmai na Russia ka la iarap ban wan bujli ha ka jaka jong ki kompani na ka thain sepngi kiba la mih hi na ki iew jong ngi. Ki nongshna tiar jong ngi ki la ioh ia ka jingjop, ym tang ha ki mar ba pyndonkam ki briew hynrei ruh ha ka IT bad ki karkhana IT,” u la ong.

U President Putin u la kyntu ruh ba kan don ka jingiatreilang kaba kham bha hapdeng ki ri BRICS ban kyrshan ia ka roi ka par jong ki SME bad u la pynshlur ia ki ri ba long dkhot ba kin wad ia ki kam ba lah ban iatreilang ha ka summit ka ban long ha Brazil ha une u snem ban wan. Ha kaba iadei bad ka rynsan bei tyngka ba ka Russia ka dang sdang bad ka BRICS, u President Putin u la ong ba kane ka don ka lad ban ai jingmyntoi ia baroh ki ri ba long dkhot bad la kyrmen ba kane kan long ka lad kaba kongsan ban kyrshan ia ka ioh ka kot bad ka jingplie ia ki lad sha ki kam pisa ia ki ri kiba don ha ka thain shathie bad ka thain mihngi.

"Ng kyntu ia ki paralok hapoh ka BRICS ba kin peit ia ka jinglong jingman jong ki ha ki kam kiba ngi lah ban iatrei lang bad ngin rah ia kane hakhmat ki nongkitkam na Brazil ki ban ialam ia ka BRICS ha une u snem ban wan,” u la ong.

Ban ioh ia ka jingtip ba kham bniah http://en.kremlin.ru/events/president/news/75751

***