U Myntri Sorkar Pdeng ba dei khmih ia ka Tnat Kam Pohiing bad Cooperation, Amit Shah u la ong ba ki 3 tylli ki criminal laws ba thymmai kiba la pyntreikam ha kylleng ka ri naduh mynta ka sngi kalong kaba phaikhmat sha ka jingpynioh ia ka hok ban ia ka jingpynshitom, bad kaba phaikhmat sha ki lanot. U la ong ba ha ki ain ba thymmai ka jingphaikhmat kyrpang ka dei ban pynioh ia ka hok ha ka jaka ka jingpynshitom, ka jingpynsted ban ai ka jingbishar bad ka jingkloi ban pynioh ia ka hok ha ka jaka ban pynslem bad pynthikna ka jingiada ia ki hok jong ki lanot. Ha ka jingai jingkren sha ki nongpathai khubor ha New Delhi, u Amit Shah u la ong ba ki la don ki jingsngewthuh bakla ba la pynsaphriang shaphang kine ki ain ba thymmai, da ka jingthmu ban pynkulmar jingmut ia ki paidbah shaphang kine ki ain. U la ong ba man ka bynta jong ki ain ba thymmai kidei kiba la iamir jingmut sani bad kito kiba don bynta ha kane ka kam la saw snem bad ym don kano kano ka ain ha ka India kaba la laitluid ba la iamir jingmut haduh katne.

U Myntri Kam Pohiing u la ong ba hadien 77 snem jong ka jingioh ia ka jinglaitluid, ka kam ai jingbishar ia ki kam beain ka la iahap bha bad ka jinglong jingman jong ka ri bad ia kine ki lai tylli ki ain ba thymmai la pyntreikam ha man ki thanat jong ka ri naduh mynta ka sngi. U Amit Shah u la ong ba ia kine ki ain la bujli ia ka jingpynshitom da ka hok, ka jingpynsted ban ai ka jingbishar bad ka jingkloi ban ioh ia ka hok ha ka jaka jong ka jingpynjlan. Ki ain ba mynshuwa ki iada tang ia ki hok jong ki pulit, hynrei kine ki ain ba thymmai mynta ki don ki kyndon ban iada ia ki hok jong ki lanot bad ki nongujor ruh kumjuh.

U Amit Shah u la ong ba kine ki lai tylli ki ain ba thymmai ki pyni ia ka mynsiem jong ka India ha baroh ki kam ai jingbishar ha ki kam beain ha ka ri. U la ong ba ki don shibun ki bynta ha kine ki ain ki ban iarap ia ki briew jong ka ri. U la ong ba ha kine ki ain, ki bynta kiba don jingthut kiba la bteng naduh ka por jong ki nong Bilat ki la wanrah jingeh ia ki briew bad la weng noh ia kine bad la wanrah ia ki bynta kiba thymmai kiba iahap bad kane ka por mynta.

U Myntri ka tnat Kam Pohiing u la ong ba ha kine ki ain ki section bad ki dkhot ba kongsan ki dei kiba la wanrah ha kaba iadei bad ka Riti Synshar jong ka India. U la ong ba la phaikhmat shuwa sha ki kam beain pyrshah ki longkmie bad ki khynnah. U la ong ba da kaba wanrah ia ka dkhot kaba thymmai ha ki kam beain pyrshah ia ki longkmie bad ki khynnah kaba don 35 tylli ki section bad 13 tylli ki jingpynbiang, la wanrah shuh shuh ka jingsngewlem ha kine ki ain. U la ong ba ym shym la pynbiang ha ki ain ba mynshuwa na ka bynta ka jingpyniap ki paidbah hynrei ha kine ki ain ba thymmai, ha ka sien kaba nyngkong la batai shai ia ka jingpyniap ki paidbah bad la buh ia ka jingpynshitom kaba khlain ia kane. U Shah u la ong ba ha ki ain ba thymmai, ia ka ain sedition ba la wanrah da ki nong Bilat la weng noh. U la ong ba la wanrah ia ka section ba thymmai ia ki kam pyrshah ia ka ri ha ka ain ba thymmai ha kaba la buh ia ka jingpynshitom kaba khlain ia kito kiba ktah ia ka jingiatylli bad ka jingtylli jong ka India.

U Amit Shah u la ong ba kine ki lai tylli ki ain ba thymmai kin tei ia ka kam ai jingbishar kaba biang tam hadien ba la pyntreikam pura ia ki. U la ong ba la pdiang ia ka teknoloji ha kine ki ain ba thymmai bad la peit lypa ba yn lah ban pyndonkam ia ki teknoloji ba wan ha kine ki 50 snem ban wan. U la ong ba 99.9 % ki thanat ha kylleng ka ri ki dei kiba la pyndonkam ia ki kor computer bad ka kam ban sdang ia ki e-record ka la sdang naduh u snem 2019. U la ong ba ka Zero-FIR, e-FIR bad charge sheet kin long digital ha ki ain ba thymmai. U Shah u la ong ba ki ain ba thymmai kin buh da ka por ban pyndep lut ia ki kam, bad haba pyntreikam pura ia kane ka ain kan pynkut ia ka jinghap ap shirta ban ioh ia ka hok. U la ong ruh ba lah ban pan ia ka jingbishar haduh ka kyrdan jong ka Supreme Court ha ki 3 snem naduh ba la buh ia ka FIR.

U Myntri ka tnat Kam Pohiing u la ong ba kine ki ain ba thymmai ki dei ban leh ia ka jingwad forensic ha ki kam beain ba lah ban pynshitom da hynniew snem ne palat, kane kan pynstet ia ka jingai ia ka hok bad kyntiew ia ka jingpynshitom sha ka 90%. U Shah u la ong ba ka jinghap leh forensic ha kine ki ain ba thymmai ka dei kaba ka Sorkar ka la pynkhreh lypa da kaba tei ia ka National Forensic Science Laboratory ha u snem 2020. U la ong ba yn donkam ia ki briew ba la pyntriem ha kane ka kam ha ka ri bad ba yn don40,000 ngut ki briew kiba la tbit ha kane ka kam hapoh lai snem. U la ong ba ka Kynhun Myntri Sorkar Pdeng dang shen ka la rai ban sdang ia ki jaka treikam jong ka Forensic Science University bad seng 6 tylli ki Central Forensic Laboratory sa ha 9 tylli ki jylla.

U Amit Shah u la ong ba ka Bharatiya Sakshya Adhiniyam 2023 ka la pyndonkam ruh ia ka teknoloji ha kaba iadei bad ki sakhi. U la ong ba la buh shibun ki bynta ban kyntiew ia ka jingbha jong ki sakhi digital. Mynta la khein ia ki server log, ki sakhi jong ki jaka bad ki voice message kum ki sakhi. U Shah u la ong ba kine ki lai tylli ki ain kin don ha baroh ki ktien kiba don ha ka Eighth Schedule jong ka Riti Synshar bad ba ki jingbishar jong ki iingshari ruh kin long ha kine ki ktien.

U Myntri ka tnat Kam PohIing bad Cooperation u la ong ba ka Tnat Kam Pohiing jong ka Sorkar Pdeng, ki tnat kam pohiing jong ki Sorkar bad ka Tnat Justice ki la shim shibun ki sienjam ban pyntreikam ia kine ki ain. U la ong ba ha ki ain ba thymmai la wanrah ia ki bynta katkum ka jingiadei bad ki por ba mynta bad ba ia kito ki bynta kiba don jingkulmar ki dei kiba la weng noh namar kine ki wanrah jingjynjar ia ki briew. U Shah u la ong ba katkum ka thong ban ai jinghikai 12,000 ngut ki nonghikai ban ai jinghikai ia kumba 22.5 lak ngut ki pulit, palat 23,000 ngut ki nonghikai ki la ioh jinghikai. U Shah u la ong shuh shuh ba la iamir jingmut halor kine ki lai tylli ki ain ha ka Lok Sabha haduh 9 kynta bad 29 minit ha kaba 34 ngut ki dkhot ki la iashim bynta bad ai ki jingmut jong ki katba ha ka Rajya Sabha la iamir jingmut haduh 6 kynta bad 17 minit ha kaba 40 ngut ki dkhot ki la iashim bynta. U la ong ba ka don ka jingpynsaphriang khubor thok ba la wanrah ia kine ki ain hadien ba la weng ia katto katne ki dkhot ka parliament. U la ong ba kine ki dkhot ba shah weng ki la don ka lad ban wan sha ka iingdorbar thaw ain bad iashim bynta ha ki jingiamir jingmut ban ai ia ki jingmut jingpyrkhat jong ki hynrei ym shym la don ba wan leh ia kane

.

****