ஜெய் ஜினேந்திரா, ஜெய் ஜினேந்திரா, ஜெய் ஜினேந்திரா! வணக்கத்திற்குரிய ஸ்ரீ பிரக்யாசாகர்ஜி முனிராஜ், வணக்கத்திற்குரிய உபாத்யாய் ஸ்ரீ ரவீந்திர முனி ஜி மஹராஜ் சாஹிப், வணக்கத்திற்குரிய சாத்வி ஸ்ரீ சுலக்ஷனாஷ்ரிஜி மகராஜ் சாஹிப், வணக்கத்திற்குரிய சாத்வி ஸ்ரீ அனிமஸ்ரீஜி மகராஜ் சாஹிப் அவர்களே, அரசில் உள்ள எனது சகாக்களான அர்ஜுன் ராம் மேக்வால் அவர்களே, திருமதி மீனாட்சி லேகி அவர்களே, மதிப்பிற்குரிய துறவிகளே, சகோதர சகோதரிகளே!

பாரத மண்டபத்தின் இந்த அற்புதமான கட்டிடம் இன்று மகாவீரரின் 2550வது நிர்வாண மஹோத்சவத்தின் தொடக்கத்தைக் காண்கிறது. பகவான் மகாவீரரின் வாழ்க்கையைப் பற்றி மாணவ நண்பர்கள் தயாரித்த சித்திரத்தை இப்போது பார்த்தோம்! இளம் தோழர்கள் 'வர்த்தமான் மே வர்த்தமான்' கலாச்சார நிகழ்ச்சியையும் வழங்கினர். பகவான் மகாவீரர் மீது நமது காலத்தால் அழியாத விழுமியங்களை நோக்கி இளம் தலைமுறையினர் கொண்டுள்ள இந்த ஈர்ப்பு மற்றும் அர்ப்பணிப்பு, நாடு சரியான திசையில் செல்கிறது என்ற நம்பிக்கையை ஏற்படுத்துகிறது. இந்த வரலாற்று சிறப்புமிக்க தருணத்தில், சிறப்பு அஞ்சல் தலைகள் மற்றும் நாணயங்களை வெளியிடும் வாய்ப்பையும் நான் பெற்றுள்ளேன். குறிப்பாக நமது சமண துறவிகள் மற்றும் சாத்விகளின் வழிகாட்டுதல் மற்றும் ஆசீர்வாதத்தால் இந்த நிகழ்வு சாத்தியமானது. எனவே, உங்கள் அனைவரையும் நான் வணங்குகிறேன். இந்த புனித மஹாவீரர் ஜெயந்தியை முன்னிட்டு நாட்டு மக்கள் அனைவருக்கும் எனது வாழ்த்துகளை தெரிவித்துக் கொள்கிறேன். தேர்தல்களின் பரபரப்புக்கு மத்தியில் இதுபோன்ற நல்ல நிகழ்ச்சிகளில் பங்கேற்பது மனதை பெரிதும் அமைதிப்படுத்துகிறது என்பதை நீங்கள் அனைவரும் அறிவீர்கள். மதிப்பிற்குரிய துறவிகளே, இந்த வேளையில் மாபெரும் ஆன்மீகத் தலைவர் ஆச்சார்ய ஸ்ரீ வித்யாசாகர்ஜி  மகராஜை இன்று நான் நினைவு கூர்வது இயல்பானது. கடந்த ஆண்டு சத்தீஸ்கரில் உள்ள சந்திரகிரி கோவிலில் அவரைச் சந்திக்கும் வாய்ப்பு எனக்குக் கிடைத்தது. அவரது ஸ்தூல உடல் நம்மிடையே இல்லாவிட்டாலும், அவரது ஆசீர்வாதங்கள் நிச்சயமாக நம்முடன் உள்ளன.

நண்பர்களே,

மகாவீரரின் இந்த 2550-வது நிர்வாண மஹோத்சவம் ஆயிரக்கணக்கான ஆண்டுகளின் அரிய சந்தர்ப்பமாகும். இத்தகைய சந்தர்ப்பங்கள், இயற்கையாகவே, பல சிறப்பான தற்செயல் நிகழ்வுகளை ஒன்றிணைக்கின்றன. பாரதம் 'அமிர்த காலத்தின்' ஆரம்ப கட்டத்தில் இருக்கும் நேரம் இது. சுதந்திரத்தின் நூற்றாண்டை பொற்காலமாக மாற்ற நாடு பாடுபட்டு வருகிறது. இந்த ஆண்டு நமது அரசியல் சாசனம் 75 ஆண்டுகளை நெருங்குகிறது. அதே நேரத்தில் நாட்டில் ஒரு பிரம்மாண்டமான ஜனநாயக விழா நடந்து வருகிறது. இங்கிருந்து, எதிர்காலத்தின் புதிய பயணம் தொடங்கும் என்று தேசம் நம்புகிறது. இந்த தற்செயல் நிகழ்வுகளுக்கு மத்தியில், இன்று நாம் அனைவரும் இங்கே கூடியிருக்கிறோம். ஒன்றாக இருப்பது என்றால் என்ன என்பதை நீங்கள் புரிந்து கொண்டிருப்பீர்கள்? உங்கள் அனைவருடனும் எனக்குள்ள தொடர்பு மிகவும் பழமையானது. ஒவ்வொருவருக்கும் அவரவர் உலகம் இருக்கிறது.

சகோதர சகோதரிகளே,

தேசத்திற்கான 'அமிர்த  காலம்' என்ற கருத்து ஒரு மகத்தான தீர்மானம் மட்டுமல்ல; பாரதத்தின் ஆன்மீக உத்வேகமே நமக்கு அமரத்துவத்தையும் நித்தியத்தையும் வாழக் கற்பிக்கிறது. 2500 ஆண்டுகளுக்குப் பிறகும், பகவான் மகாவீரரின் நிர்வாண தினத்தை நாம் இன்று கொண்டாடுகிறோம். பல்லாயிரம் ஆண்டுகளுக்குப் பிறகும், பகவான் மஹாவீரருடன் தொடர்புடைய இத்தகைய பண்டிகைகளை நாடு தொடர்ந்து கொண்டாடும் என்பதை நாம் அறிவோம். நூற்றாண்டுகளாக, ஆயிரமாயிரம் ஆண்டுகளாக சிந்திக்கும் திறன்... இந்த தொலைநோக்கு சிந்தனை... அதனால்தான் பாரதம் உலகின் பழமையான வாழும் நாகரிகம் மட்டுமல்ல, மனிதகுலத்தின் பாதுகாப்பான புகலிடமாகவும் உள்ளது. தனக்காக மட்டுமல்ல, 'அனைவருக்காகவும்' சிந்திக்கும் பாரதம் இது. இது 'சொந்தம்' என்று உணராமல், 'உலகளாவியதாக' உணரும் பாரதம். 'அகங்காரம்' என்று நினைக்காமல் 'நாம்' என்று நினைக்கும் பாரதம் இது. 'எல்லைகளை' நம்பாமல், 'எல்லையின்மையை' நம்பும் பாரதம் இது. கொள்கை பற்றி பேசும் பாரதம் இது.

நண்பர்களே,

இன்று, மோதல்களுக்கு மத்தியில், உலகம் அமைதிக்காக பாரதத்தை எதிர்பார்க்கிறது. புதிய பாரதத்தின் இந்த புதிய பாத்திரத்திற்கான பெருமை நமது வளர்ந்து வரும் திறன்கள் மற்றும் வெளியுறவுக் கொள்கையையே சாரும். ஆனால் நமது கலாச்சார பிம்பம் இதற்கு குறிப்பிடத்தக்க பங்களிப்பைக் கொண்டுள்ளது என்பதை நான் உங்களுக்குச் சொல்ல விரும்புகிறேன். உண்மை, அகிம்சை போன்ற உறுதிமொழிகளை உலக அரங்குகளில் முழு நம்பிக்கையுடன் உயர்த்திப் பிடிப்பதால் இன்று பாரதத்திற்கு இந்தப் பொறுப்பு கிடைத்துள்ளது. உலகளாவிய நெருக்கடிகள் மற்றும் மோதல்களுக்கான தீர்வு இந்தியாவின் பண்டைய கலாச்சாரம் மற்றும் பாரம்பரியத்தில் உள்ளது என்பதை நாங்கள் உலகிற்கு கூறுகிறோம். எனவே, பிளவுபட்ட உலகிற்கு 'விஸ்வ பந்து' (உலகின் நண்பன்) என்று பாரதம் தனது இடத்தை செதுக்கி வருகிறது. 'காலநிலை மாற்றம்' போன்ற நெருக்கடிகளுக்கான தீர்வுகளுக்காக, இன்று பாரத் 'மிஷன் லைஃப்' போன்ற உலகளாவிய இயக்கங்களுக்கு அடித்தளம் அமைத்துள்ளது. இன்று, பாரதம் ஒரு பூமி, ஒரு குடும்பம், ஒரே எதிர்காலம் என்ற தொலைநோக்கு பார்வையை உலகிற்கு வழங்கியுள்ளது. தூய்மையான எரிசக்தி மற்றும் நீடித்த வளர்ச்சிக்காக, ஒரே உலகம், ஒரே சூரியன், ஒரே தொகுப்புக்கான செயல்திட்டத்தை நாங்கள் வழங்கியுள்ளோம். இன்று, சர்வதேச சூரியசக்தி கூட்டணி போன்ற எதிர்கால உலகளாவிய முன்முயற்சிகளை நாம் முன்னெடுத்து வருகிறோம். எங்களது முயற்சிகள் உலகிற்கு நம்பிக்கையை ஏற்படுத்தியது மட்டுமின்றி, பாரதத்தின் பண்டைய கலாச்சாரம் குறித்த உலகின் கண்ணோட்டத்தையும் மாற்றியமைத்துள்ளன.

நண்பர்களே,

சமண மதத்தின் சாராம்சம் வெற்றிப் பாதை, அதாவது தன்னை வெல்லும் பாதை. மற்ற நாடுகளை வெல்வதற்காக நாம் ஒருபோதும் ஆக்கிரமிப்பை நாடவில்லை. நம்மை நாமே சீர்திருத்திக் கொண்டும், நமது குறைபாடுகளை வென்றும் நாம் வெற்றியை அடைந்திருக்கிறோம். எனவே, ஒவ்வொரு யுகத்திலும் சில முனிவர்களும், சில ஞானிகளும் தோன்றி கடினமான காலங்களில் நமக்கு வழிகாட்டுகிறார்கள். பெரிய நாகரிகங்கள் அழிக்கப்பட்டன, ஆனால் பாரதம் அதன் வழியைக் கண்டது.

சகோதர சகோதரிகளே,

10 ஆண்டுகளுக்கு முன்பு நமது நாட்டில் எத்தகைய சூழல் நிலவியது என்பதை நீங்கள் நினைவில் கொள்ள வேண்டும். எல்லா இடங்களிலும் விரக்தியும் நம்பிக்கையின்மையும் இருந்தன! இந்த நாட்டுக்கு எதுவும் நடக்காது என்று நம்பப்பட்டது! இந்த விரக்தி இந்தியப் பண்பாட்டையும் அதே அளவு தொந்தரவு செய்தது. ஆகையால், 2014-ம் ஆண்டுக்குப் பிறகு, பௌதீக அபிவிருத்தியுடன், நமது பாரம்பரியம் குறித்தும் நாம் பெருமிதம் கொள்ள தீர்மானம் எடுத்தோம். பகவான் மகாவீரரின் 2550-வது நிர்வாண மஹோத்சவத்தை இன்று நாம் கொண்டாடுகிறோம். இந்த 10 ஆண்டுகளில், இதுபோன்ற பல குறிப்பிடத்தக்க நிகழ்வுகளை நாம் கொண்டாடியுள்ளோம். நமது ஜெயின் ஆச்சாரியர்கள் என்னை அழைக்கும் போதெல்லாம், நானும் அந்த நிகழ்ச்சிகளில் பங்கேற்க முயற்சி செய்திருக்கிறேன். புதிய நாடாளுமன்ற கட்டிடத்திற்குள் நுழையும் முன், 'மிச்சாமி துக்கடம்' என்று கூறி இந்த விழுமியங்களை நினைவு கூர்கிறேன். அதேபோல், நமது பாரம்பரியத்தை பாதுகாக்கத் தொடங்கியுள்ளோம். யோகா மற்றும் ஆயுர்வேதம் பற்றி பேசினோம். இன்று, நாட்டின் புதிய தலைமுறையினர் நமது அடையாளம் நமது பெருமை என்று நம்புகிறார்கள். தேசத்தில் பெருமித உணர்வு விழித்தெழுந்தால், அதைத் தடுக்க முடியாது. பாரதத்தின் முன்னேற்றமே இதற்குச் சான்றாகும்.

பாரதத்தைப் பொறுத்தவரை நவீனம் என்பது உடல், ஆன்மிகம் என்பது ஆன்மா. ஆன்மீகத்தை நவீனத்துவத்திலிருந்து அகற்றினால், அது அராஜகத்தை பிறப்பிக்கும். நடத்தையில் தியாகம் இல்லையென்றால், மிகப் பெரிய சித்தாந்தங்கள் கூட சிதைக்கப்படுகின்றன. பல நூற்றாண்டுகளுக்கு முன்பே பகவான் மகாவீரர் நமக்கு அளித்த கண்ணோட்டம் இதுதான். சமூகத்தில் இந்த விழுமியங்களை மீட்டெடுப்பது காலத்தின் கோரிக்கையாகும்.

சகோதர சகோதரிகளே,

நமது நாடும் பல தசாப்தங்களாக ஊழலின் வேதனையைத் தாங்கியுள்ளது. வறுமையின் கொடிய துயரத்தை நாம் கண்டிருக்கிறோம். இன்று, 250 மில்லியன் மக்களை வறுமையின் புதைகுழியில் இருந்து உயர்த்தும் நிலையை நாடு எட்டியுள்ளது. உங்களுக்கு நினைவிருக்கும், என்று நான் செங்கோட்டையில் இருந்து கூறினேன், பூஜ்ய மகராஜும் மீண்டும் வலியுறுத்தினார் – இதுதான் சரியான தருணம் ஆகச்சிறந்த தருணம்.

பகவான் மகாவீரரின் ஆசீர்வாதம் 1.4 பில்லியன் குடிமக்கள் மற்றும் ஒட்டுமொத்த மனித குலத்தின் நலனை உறுதி செய்யும்... வணக்கத்திற்குரிய அனைத்து புனிதர்களுக்கும் நான் மரியாதையுடன் தலைவணங்குகிறேன். ஒருவகையில் அவர்கள் பேச்சில் முத்துக்கள் தென்பட்டன. அது பெண்களுக்கு அதிகாரமளித்தல் பற்றியதாக இருக்கட்டும், வளர்ச்சிக்கான பயணம் அல்லது மகத்தான பாரம்பரியம் பற்றியதாக இருக்கட்டும், அனைத்து வணக்கத்திற்குரிய துறவிகளும் தற்போதைய அமைப்புகளில் என்ன நடக்கிறது, என்ன நடக்க வேண்டும் என்பதை மிகக் குறுகிய நேரத்தில், மிகவும் அற்புதமான முறையில் வழங்கியுள்ளனர். இதற்காக அவர்களுக்கு எனது மனமார்ந்த நன்றியைத் தெரிவித்துக் கொள்கிறேன், அவர்களின் ஒவ்வொரு வார்த்தையையும் ஒரு ஆசீர்வாதமாக நான் கருதுகிறேன். அவர்கள் எனது விலைமதிப்பற்ற பொக்கிஷம், அவர்களின் ஒவ்வொரு வார்த்தையும் நாட்டிற்கு கருத்தூக்கம் அளிப்பதாக இருக்கிறது. இது என் நம்பிக்கை. ஒருவேளை தேர்தல் சூழல் இல்லையென்றால் நான் வேறு மனநிலையில் இருந்திருப்பேன். ஆனால் அவற்றை ஒதுக்கி வைத்துவிட்டு இங்கு வர நான் எல்லா முயற்சிகளையும் செய்துள்ளேன். நான் அவற்றை கொண்டு வராமல் இருந்திருக்கலாம், ஆனால் நீங்கள் நிச்சயமாக அவற்றை கொண்டு வந்துள்ளீர்கள். ஆனால் இவை அனைத்திற்கும், எவ்வளவு சூடாக இருந்தாலும், வீட்டை விட்டு வெளியேறுவதற்கு முன்பு வெப்பம் குறையும் வரை காத்திருக்க வேண்டாம். அதிகாலையில் வெளியே வாருங்கள், எங்கள் அனைத்து துறவிகள், மஹந்த்கள் மற்றும் தெய்வீக மனிதர்களுடன் நேரடி தொடர்பு உள்ளது. உங்கள் மத்தியில் இருப்பதில் நான் மிகுந்த மகிழ்ச்சி அடைகிறேன், இந்த உணர்வுடன், நான் மீண்டும் ஒருமுறை பகவான் மகாவீரரின் பாதங்களில் வணங்குகிறேன். பரிசுத்தவான்களாகிய உங்கள் அனைவரையும் நான் வணங்குகிறேன். மிகவும் நன்றி!

பொறுப்புத் துறப்பு: இது பிரதமரின் உரையின் தோராயமான மொழிபெயர்ப்பு. அசல் உரை இந்தியில் நிகழ்த்தப்பட்டது.

***

AD/PKV/DL