ନିର୍ବାଚନ ଆଦର୍ଶ ଆଚରଣ ବିଧି (ଏମସିସି) ଲାଗୁ ହେବାର ଏକ ମାସ ପୂରଣ ହୋଇଛି । ଏହି କ୍ରମରେ ଭାରତୀୟ ନିର୍ବାଚନ କମିଶନ (ଇସିଆଇ) ଏମସିସି ଲାଗୁ ହେବାର ପ୍ରଥମ ଏକ ମାସ ମଧ୍ୟରେ  ଗ୍ରହଣ ଯାଇଥିବା ପଦକ୍ଷେପ ଓ କାର୍ଯ୍ୟାନୁଷ୍ଠାନର କିଛି ବିବରଣୀ ସାର୍ବଜନୀନ କରିବାକୁ ନିଷ୍ପତ୍ତି ନେଇଛନ୍ତି। ଯଦିଓ ନିର୍ବାଚନ ଆୟୋଗ ଏପରି ବିବରଣୀ ଦେବାକୁ ବାଧ୍ୟ ନୁହନ୍ତି ତଥାପି ନିର୍ବାଚନ ଆୟୋଜନରେ ସ୍ୱଚ୍ଛତା ବଜାୟ ରଖିବା ଲାଗି ଦେଇଥିବା ପ୍ରତିଶ୍ରୁତି ପୂରଣ କରିବାର ବ୍ୟାପକ ଉଦ୍ଦେଶ୍ୟ ନେଇ ଏସବୁ ତଥ୍ୟ ପ୍ରଦାନ କରିବା ଲାଗି ଏପରି ନିଷ୍ପତ୍ତି ନିଆଯାଇଛି । ଏହାଦ୍ୱାରା ଆୟୋଗଙ୍କ କାର୍ଯ୍ୟଧାରାକୁ ନେଇ ଯଦିଓ କ୍ଷୁଦ୍ର ଓ ସୀମିତ, କିନ୍ତୁ ନିର୍ଦ୍ଦିଷ୍ଟ କେତେକ ମହଲରେ ପ୍ରକାଶ ପାଉଥିବା ସନ୍ଦେହ ଓ ଅସନ୍ତୋଷକୁ ଦୂର କରାଯାଇପାରିବ। 

ସ୍ଥିତି ସମ୍ପର୍କରେ ନିମ୍ନରେ ବିବରଣୀ ଦିଆଯାଇଛି, ଏହା ମଧ୍ୟ ଆଦର୍ଶ ଆଚରଣ ବିଧିର ଅବଶିଷ୍ଟ ଅବଧି ପାଇଁ ଲାଗୁ ହୋଇଥାଏ।

1. ଆଦର୍ଶ ଆଚରଣ ବିଧି ଲାଗୁ ହେବାର ଏକ ମାସ ପୂରିଥିବା ବେଳେ ଭାରତୀୟ ନିର୍ବାଚନ ଆୟୋଗ ରାଜନୈତିକ ଦଳଗୁଡ଼ିକର ଏହି ଏମସିସି ପାଳନକୁ ନେଇ ବ୍ୟାପକ ଭାବେ ସନ୍ତୁଷ୍ଟ ଅଛନ୍ତି ଏବଂ ବିଭିନ୍ନ ଦଳ ଓ ପ୍ରାର୍ଥୀଙ୍କ ପ୍ରଚାର ମୁଖ୍ୟତଃ ବିଶୃଙ୍ଖଳାମୁକ୍ତ ରହିଛି।
2. ଏଥିସହିତ କେତେକ ବିଶୃଙ୍ଖଳିତ ଘଟଣା ଉପରେ କଡ଼ା ନଜର ରଖିବା ସହ କିଛି ନିର୍ଦ୍ଦିଷ୍ଟ ପ୍ରାର୍ଥୀ, ନେତା ଓ କାର୍ଯ୍ୟକଳାପ ଉପରେ ପୂର୍ବାପେକ୍ଷା ଅଧିକ ନଜର ରଖିବାକୁ ଆୟୋଗ ନିଷ୍ପତ୍ତି ନେଇଛନ୍ତି।
3. ମହିଳାଙ୍କ ବିରୋଧରେ ଅପମାନଜନକ ଓ ଆପତ୍ତିଜନକ ମନ୍ତବ୍ୟ ଦେଇଥିବା ଦଳର ନେତାମାନଙ୍କୁ ନୋଟିସ୍ ଜାରି କରି ଆୟୋଗ ମହିଳାଙ୍କ ସମ୍ମାନ ଓ ଗାରିମା ପ୍ରସଙ୍ଗରେ ଦୃଢ଼ ଆଭିମୁଖ୍ୟ ଗ୍ରହଣ କରିଛନ୍ତି। ଦଳୀୟ ନେତା ଓ ପ୍ରଚାରକମାନେ ଯେପରି ଏଭଳି ଅପମାନଜନକ ଓ ସମ୍ମାନହାନି କରିବା ଭଳି ମନ୍ତବ୍ୟ ନ ଦିଅନ୍ତି ସେଥିପାଇଁ ଆୟୋଗ ଦଳୀୟ ମୁଖ୍ୟ/ସଭାପତିଙ୍କୁ ଉତ୍ତରଦାୟୀ କରିବା ଦିଗରେ ଏକ ପାଦ ଆଗେଇଛନ୍ତି । ଏଥିପୂର୍ବରୁ ମୁଖ୍ୟ ନିର୍ବାଚନ ଆୟୁକ୍ତ (ସିଇସି) ଶ୍ରୀ ରାଜୀବ କୁମାର ଦେଇଥିବା ପ୍ରତିଶ୍ରୁତି ଅନୁଯାୟୀ ଏମସିସି ପ୍ରବର୍ତ୍ତନ ଉତ୍ତରଦାୟିତ୍ୱ, ସ୍ୱଚ୍ଛତା ଏବଂ ଦୃଢ଼ତା ଅନୁରୂପ ରହିଛି।
4. ଅପରାଧିକ ତଦନ୍ତକୁ ଆଧାର କରି ସକ୍ରିୟ ବିଚାର ଏବଂ ଅଦାଲତଙ୍କ ଆଦେଶ ଅଧୀନରେ ଥିବା ରାଜନୈତିକ ବ୍ୟକ୍ତି ସମ୍ପୃକ୍ତ ଥିବା ସକ୍ରିୟ ପରିସ୍ଥିତିରେ ସାମ୍ବିଧାନିକ ଜ୍ଞାନ ଆଧାରରେ ପରିଚାଳିତ ହୋଇ ଆୟୋଗ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ଗୋଟିଏ ପଟେ ଆୟୋଗ ସବୁ ରାଜନୈତିକ ଦଳ ଓ ପ୍ରାର୍ଥୀଙ୍କ ପାଇଁ ସମାନ ସୁଯୋଗ ସୁନିଶ୍ଚିତ କରିବା ସହ ସେମାନଙ୍କ ପ୍ରଚାର ଅଭିଯାନର ସ୍ୱାଧୀନତାକୁ ସୁରକ୍ଷା ଦେଇଛନ୍ତି ଅନ୍ୟପଟେ ଆୟୋଗ ଏପରି କୌଣସି ପଦକ୍ଷେପ ନେଇନାହାନ୍ତି ଯାହା ଆଇନଗତ ନ୍ୟାୟିକ ପ୍ରକ୍ରିୟାକୁ ପ୍ରଭାବିତ କରୁଥିବ କିମ୍ବା ଅତିକ୍ରମ କରୁଥିବ ।
5. ଆଦର୍ଶ ସଂହିତା ଲାଗୁ କରିବାରେ ଆୟୋଗ ନିଜ ଦାୟିତ୍ୱ, ଆଇନଗତ ପରିସର, ସଂସ୍ଥାଗତ ଜ୍ଞାନ, ସମାନତା ଏବଂ କାରବାରରେ ସ୍ୱଚ୍ଛତା ଏବଂ ସମ୍ପୃକ୍ତ ବ୍ୟକ୍ତିଙ୍କ ସ୍ଥିତି ଏବଂ ପ୍ରଭାବ ନିର୍ବିଶେଷରେ ଏବଂ ରାଜନୈତିକ ସଂପୃକ୍ତି ନିର୍ବିଶେଷରେ ପରିଚାଳିତ ହୋଇଛନ୍ତି ।
6. ୨୦୨୪ ମାର୍ଚ୍ଚ ୧୬ ତାରିଖରେ ଲୋକସଭା ସାଧାରଣ ନିର୍ବାଚନ ଘୋଷଣା ପରେ ଆଦର୍ଶ ଆଚରଣ ବିଧି ଲାଗୁ ହୋଇଥିଲା। ସେବେଠାରୁ ନିର୍ବାଚନ ଆୟୋଗ ଯେପରି ସମାନ ସୁଯୋଗରେ ବାଧା ସୃଷ୍ଟି ନ ହୁଏ ଏବଂ ପ୍ରଚାରରେ ଆକ୍ଷେପ ପ୍ରତିଆକ୍ଷେପ ଗ୍ରହଣୀୟ ସ୍ତର ଠାରୁ ତଳକୁ ଖସି ନଯାଏ ସେଥିପାଇଁ ତ୍ୱରିତ ଓ ପ୍ରଶଂସନୀୟ ପଦକ୍ଷେପ ନେଇଛନ୍ତି।
7. ଏକ ମାସ ମଧ୍ୟରେ ୭ଟି ରାଜନୈତିକ ଦଳର ୧୬ ପ୍ରତିନିଧି ଦଳ ଆୟୋଗଙ୍କୁ ଭେଟି ଆଦର୍ଶ ଆଚରଣ ବିଧି ଉଲ୍ଲଂଘନ ଓ ଆନୁସଙ୍ଗିକ ପ୍ରସଙ୍ଗରେ ଅଭିଯୋଗ କରିଛନ୍ତି। ରାଜ୍ୟ ସ୍ତରରେ ଅନେକ ରାଜନୈତିକ ପ୍ରତିନିଧି ଦଳ ମୁଖ୍ୟ ନିର୍ବାଚନ ଅଧିକାରୀଙ୍କୁ ସାକ୍ଷାତ କରି ଅଭିଯୋଗ ଦାଖଲ କରିଛନ୍ତି।
8. ସବୁ ରାଜନୈତିକ ଦଳକୁ ସମାନ ବ୍ୟବହାର କରାଯାଇଛି, ଅଳ୍ପ ସମୟ ମଧ୍ୟରେ ମଧ୍ୟ ସମସ୍ତଙ୍କୁ ସମୟ ଦିଆଯାଇଛି ଏବଂ ସେମାନଙ୍କ ଅଭିଯୋଗକୁ ଧୈର୍ଯ୍ୟର ସହ ଶୁଣାଯାଉଛି।
9. ସିଇସି ଶ୍ରୀ ରାଜୀବ କୁମାରଙ୍କ ଅଧ୍ୟକ୍ଷତା ତଥା ନିର୍ବାଚନ ଆୟୁକ୍ତ ଶ୍ରୀ ଜ୍ଞାନେଶ କୁମାର ଏବଂ ଶ୍ରୀ ସୁଖବୀର ସିଂ ସାନ୍ଧୁଙ୍କ ସହଯୋଗରେ ଆୟୋଗ ପ୍ରତିଦିନ ମଧ୍ୟାହ୍ନ ୧୨ଟାରେ ଏମସିସି ଉଲ୍ଲଂଘନ ଅଭିଯୋଗରେ ଦେଶବ୍ୟାପୀ ବିଚାରାଧୀନ ମାମଲା ଉପରେ ନଜର ରଖୁଛନ୍ତି ।

ନିର୍ବାଚନ ଘୋଷଣା ପୂର୍ବରୁ ସମସ୍ତ ଜିଲ୍ଲାପାଳ/ଜିଲ୍ଲା ନିର୍ବାଚନ ଅଧିକାରୀ ଓ ଏସପିଙ୍କୁ ନିର୍ବାଚନ ଆଚରଣ ବିଧିକୁ ବିନା ବୁଝାମଣାରେ ଲାଗୁ କରିବା ପାଇଁ ଆୟୋଗ ପକ୍ଷରୁ ସ୍ୱତନ୍ତ୍ର ଓ ସିଧାସଳଖ ସଚେତନ କରାଯାଇଥିଲା । ସିଇସି ଶ୍ରୀ ରାଜୀବ କୁମାର ବ୍ୟକ୍ତିଗତ ଭାବେ ଦିଲ୍ଲୀସ୍ଥିତ ଇସିଆଇ ପ୍ରଶିକ୍ଷଣ ଅନୁଷ୍ଠାନ, ଆଇଆଇଆଇଡିଇଏମରେ ୧୦ଟି ପର୍ଯ୍ୟାୟରେ ୮୦୦ରୁ ଅଧିକ ଜିଲ୍ଲାପାଳ / ଜିଲ୍ଲା ନିର୍ବାଚନ ଅଧିକାରୀଙ୍କୁ ପ୍ରଶିକ୍ଷଣ ଦେଇଥିଲେ। ଏହି କ୍ଷେତ୍ରରେ ଥିବା ଅଧିକାରୀମାନେ ଏହି କାର୍ଯ୍ୟରେ ନିଜକୁ ଅନେକାଂଶରେ ଭଲ ଭାବରେ ଦୋଷମୁକ୍ତ କରିଛନ୍ତି।

ଆଦର୍ଶ ଆଚରଣ ବିଧିର ଗତ ଏକ ମାସ ର ଅବଧି ମଧ୍ୟରେ ସମାନ ସୁଯୋଗ ବଜାୟ ରଖିବା ପାଇଁ ନିର୍ବାଚନ ଆୟୋଗଙ୍କ କେତେକ ନିଷ୍ପତ୍ତି ନିମ୍ନରେ ଦିଆଗଲା:

1. ବିଭିନ୍ନ ରାଜନୈତିକ ଦଳ ଏବଂ ପ୍ରାର୍ଥୀମାନେ ନିର୍ବାଚନ ଆୟୋଗଙ୍କ ସ୍ତରରେ ଏବଂ ବିଭିନ୍ନ ରାଜ୍ୟରେ ପାଖାପାଖି ୨୦୦ଟି ଅଭିଯୋଗ ଦାଖଲ କରିଛନ୍ତି । ସେଥିମଧ୍ୟରୁ ୧୬୯ଟି ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
2. ଅଭିଯୋଗଗୁଡ଼ିକର ବିଭାଜନ ହେଲା: ବିଜେପିରୁ ସମୁଦାୟ ୫୧ଟି ଅଭିଯୋଗ ଆସିଥିବା ବେଳେ ସେଥିମଧ୍ୟରୁ ୩୮ଟି ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। କଂଗ୍ରେସର ୫୯ ଅଭିଯୋଗ ଥିଲା ବେଳେ ୫୧ଟି ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା; ଅନ୍ୟ ପକ୍ଷଙ୍କ ଠାରୁ ୯୦ଟି ଅଭିଯୋଗ ଆସିଥିବା ବେଳେ ସେଥିମଧ୍ୟରୁ ୮୦ଟି ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
3. ଗୁଜରାଟ, ଉତ୍ତରପ୍ରଦେଶ, ବିହାର, ଝାଡ଼ଖଣ୍ଡ, ହିମାଚଳ ପ୍ରଦେଶ ଏବଂ ଉତ୍ତରାଖଣ୍ଡ ଭଳି ୬ଟି ରାଜ୍ୟରେ ମୁଖ୍ୟମନ୍ତ୍ରୀଙ୍କ ପ୍ରମୁଖ ସଚିବ ଭାବେ ଥିବା ଅଧିକାରୀମାନେ ରାଜ୍ୟର ଗୃହ ଓ ସାଧାରଣ ପ୍ରଶାସନ ବିଭାଗର ଦାୟିତ୍ୱ ସହିତ ଦୁଇଟି ପଦବୀରେ ଥିବାରୁ ସେମାନଙ୍କୁ ପଦବୀରୁ ହଟାଇ ଦିଆଯାଇଛି। ନିର୍ବାଚନ ନିୟନ୍ତ୍ରଣରେ ଥିବା ବରିଷ୍ଠ ଅଧିକାରୀ, ଜିଲ୍ଲାପାଳ/ଜିଲ୍ଲା ନିର୍ବାଚନ ଅଧିକାରୀ/ରିଟର୍ଣ୍ଣିଂ ଅଧିକାରୀ ଓ ଏସପିଙ୍କୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଦୂରେଇ ରଖିବା ପାଇଁ ଏହା କରାଯାଇଥିଲା।
4. ଗତ ନିର୍ବାଚନରେ ମଧ୍ୟ ପଶ୍ଚିମବଙ୍ଗ ଡିଜିପିଙ୍କୁ ନିର୍ବାଚନ ଡ୍ୟୁଟିରୁ ବାରଣ କରାଯାଇଥିବାରୁ ତାଙ୍କୁ ସ୍ୱତଃ ପଦକ୍ଷେପ ଗ୍ରହଣ କରାଯାଇ ପଦବୀରୁ ହଟାଇ ଦିଆଯାଇଥିଲା।
5. ଗୁଜରାଟ, ପଞ୍ଜାବ, ଓଡ଼ିଶା ଓ ପଶ୍ଚିମବଙ୍ଗ ଭଳି ୪ଟି ରାଜ୍ୟରେ ଜିଲ୍ଲାପାଳ (ଡିଏମ୍) ଓ ଏସପି ଭାବେ ନେତୃତ୍ୱ ପଦବୀରେ ଅବସ୍ଥାପିତ ଅଣ-କ୍ୟାଡର ଅଧିକାରୀଙ୍କ ବଦଳି ହୋଇଛି।
6. ପଞ୍ଜାବ, ହରିୟାଣା ଓ ଆସାମରେ ନିର୍ବାଚିତ ରାଜନୈତିକ ପ୍ରତିନିଧିଙ୍କ ସହ ସମ୍ପର୍କ ବା ପାରିବାରିକ ସମ୍ପର୍କ ଯୋଗୁଁ ଅଧିକାରୀଙ୍କ ବଦଳି ହୋଇଛି।
7. କଂଗ୍ରେସ ଏବଂ ଆମ ଆଦମୀ ପାର୍ଟୀର ଅଭିଯୋଗ କ୍ରମେ ନିର୍ବାଚନ ଘୋଷଣା ପରେ ହ୍ଵାଟ୍ସଆପ୍ ରେ ଭାରତ ସରକାରଙ୍କ ବିକଶିତ ଭାରତ ମେସେଜର ପ୍ରସାରଣ ବନ୍ଦ କରିବାକୁ ଇଲେକ୍ଟ୍ରୋନିକ୍ସ, ସୂଚନା ପ୍ରଯୁକ୍ତି ମନ୍ତ୍ରଣାଳୟକୁ ନିର୍ଦ୍ଦେଶ ଦିଆଯାଇଛି।
8. କଂଗ୍ରେସ ଏବଂ ଆମ୍‌ ଆଦମୀ ପାର୍ଟିର ଅଭିଯୋଗ କ୍ରମେ ସମସ୍ତ ରାଜ୍ୟ/କେନ୍ଦ୍ରଶାସିତ ଅଞ୍ଚଳକୁ ସରକାର/ସାର୍ବଜନୀନ ପରିସରରୁ ବିରୂପୀକରଣ ହଟାଇବା ପାଇଁ ଇସିଆଇ ନିର୍ଦ୍ଦେଶାବଳୀକୁ ତୁରନ୍ତ ପାଳନ କରିବାକୁ ନିର୍ଦ୍ଦେଶ ଦିଆଯାଇଛି।
9. ଡିଏମକେର ଅଭିଯୋଗ କ୍ରମେ ରାମେଶ୍ୱର କାଫେ ବିସ୍ଫୋରଣ ଉପରେ ଭିତ୍ତିହୀନ ଅଭିଯୋଗ ଆଣିଥିବା ବିଜେପି ମନ୍ତ୍ରୀ ଶୋଭା କରନ୍ଦଲାଜେଙ୍କ ବିରୋଧରେ ଏଫଆଇଆର ରୁଜୁ କରାଯାଇଥିଲା ।
10. ଡିଏମଆରସି ଟ୍ରେନ୍ ଏବଂ ପେଟ୍ରୋଲ ପମ୍ପ, ରାଜପଥ ଇତ୍ୟାଦିରୁ ହୋର୍ଡିଂ, ଫଟୋ ଏବଂ ବାର୍ତ୍ତା ସମେତ ସରକାରୀ/ସାର୍ବଜନୀନ ପରିସରରୁ ବିରୂପୀକରଣ ହଟାଇବା ପାଇଁ ନିର୍ବାଚନ କମିଶନଙ୍କ ନିର୍ଦ୍ଦେଶ ପାଳନ କରିବାକୁ  କ୍ୟାବିନେଟ୍ ସଚିବଙ୍କୁ ନିର୍ଦ୍ଦେଶ ଦିଆଯାଇଛି।
11. କଂଗ୍ରେସର ଅଭିଯୋଗ ପରେ କେନ୍ଦ୍ରମନ୍ତ୍ରୀ ଚନ୍ଦ୍ରଶେଖରନ ତାଙ୍କ ସତ୍ୟପାଠରେ ଦର୍ଶାଇଥିବା ସମ୍ପତ୍ତି ଘୋଷଣାରେ ରହିଥିବା ଅସମାନତା ଯାଞ୍ଚ ପାଇଁ କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ ସିବିଡିଟିକୁ ନିର୍ଦ୍ଦେଶ ଦେଇଛନ୍ତି।
12. ସର୍ବଭାରତୀୟ ତୃଣମୂଳ କଂଗ୍ରେସର ଅଭିଯୋଗକ୍ରମେ ମମତା ବାନାର୍ଜୀଙ୍କ ପ୍ରତି ଆପତ୍ତିଜନକ ଏବଂ ଅପମାନଜନକ ମନ୍ତବ୍ୟ ଦେଇଥିବା ବିଜେପି ନେତା ଦିଲୀପ ଘୋଷଙ୍କୁ ନୋଟିସ୍ ଦିଆଯାଇଛି ।
13. କଙ୍ଗନା ରାଣାୱତ ଓ ହେମା ମାଳିନୀଙ୍କ ବିରୋଧରେ ଅପମାନଜନକ ମନ୍ତବ୍ୟ ଦେଇଥିବାରୁ ବିଜେପିର ଅଭିଯୋଗ କ୍ରମେ କଂଗ୍ରେସର ସୁପ୍ରିୟା ଶ୍ରୀନେତ ଓ ସୁରଜେୱାଲାଙ୍କୁ ନୋଟିସ କରାଯାଇଛି।
14. ଶ୍ରୀ ନରେନ୍ଦ୍ର ମୋଦୀଙ୍କ ପ୍ରତି ଦେଇଥିବା ମନ୍ତବ୍ୟ ପାଇଁ ଡିଏମକେ ନେତ୍ରୀ ଅନୀତା ଆର ରାଧାକ୍ରିଷ୍ଣନ୍ ବିରୋଧରେ ଏଫ୍ ଆଇଆର୍ ରୁଜୁ ହୋଇଛି ।
15. ପ୍ରକାଶକଙ୍କ ନାମ ନ ଦେଇ ଦିଲ୍ଲୀ ମ୍ୟୁନିସିପାଲିଟି କମିଶନ ଅଞ୍ଚଳରେ ହୋର୍ଡିଂ ତଥା ପ୍ରଚାର ବୋର୍ଡରେ ବେନାମୀ ବିଜ୍ଞାପନ ବିରୋଧରେ ଆମ ଆଦମୀ ପାର୍ଟୀ ପକ୍ଷରୁ ଅଭିଯୋଗ କରାଯିବା ପରେ ଆଇନରେ ଥିବା ବ୍ୟବଧାନକୁ ଦୂର କରିବା ପାଇଁ ଏହି ନିର୍ଦ୍ଦେଶନାମା ଜାରି କରାଯାଇଛି। ପ୍ରଚଳିତ ଆଇନରେ ହୋର୍ଡିଂକୁ ଅନ୍ତର୍ଭୁକ୍ତ କରି 'ପାମ୍ଫଲେଟ୍ ଓ ପୋଷ୍ଟର'ର ପରିଭାଷାକୁ ବ୍ୟାପକ ରୂପ ଦେବା ସହିତ ହୋର୍ଡିଂ ସମେତ ନିର୍ବାଚନ ସମ୍ବନ୍ଧୀୟ ମୁଦ୍ରିତ ସାମଗ୍ରୀରେ ମୁଦ୍ରାକର ଏବଂ ପ୍ରକାଶକଙ୍କ ନାମ ସ୍ପଷ୍ଟ ଭାବେ ଦର୍ଶାଇବା ଲାଗି ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ମୁଖ୍ୟ ଶାସନ ସଚିବଙ୍କୁ ନିର୍ଦ୍ଦେଶ ଦିଆଯାଇଛି । ଏଥିସହିତ ପ୍ରଚାର ଯୋଗାଯୋଗରେ ଉତ୍ତରଦାୟିତ୍ୱ ଏବଂ ସ୍ୱଚ୍ଛତା ସୁନିଶ୍ଚିତ କରିବା ପାଇଁ ନିର୍ଦ୍ଦେଶନାମା ଜାରି କରାଯାଇଛି।
16. କଂଗ୍ରେସ ଅଭିଯୋଗ ପରେ ଦିଲ୍ଲୀର ମ୍ୟୁନିସିପାଲିଟି କର୍ତ୍ତୃପକ୍ଷଙ୍କୁ ବିଭିନ୍ନ କଲେଜରୁ ଷ୍ଟାର ପ୍ରଚାରକଙ୍କ କଟ୍ ଆଉଟ୍ ହଟାଇବାକୁ ନିର୍ଦ୍ଦେଶ ଦିଆଯାଇଛି।
17. କୌଣସି ପ୍ରକାର ନିୟମର ଉଲ୍ଲଂଘନ ନେଇ ନାଗରିକଙ୍କ ଦ୍ୱାରା ଅଭିଯୋଗ କରିବା ଲାଗି ଆୟୋଗଙ୍କ ସି ଭିଜିଲ୍ ପୋର୍ଟାଲରେ ସମୁଦାୟ ୨,୬୮,୦୮୦ଟି ଅଭିଯୋଗ ଦାଖଲ କରାଯାଇଛି। ସେଥିମଧ୍ୟରୁ ୨,୬୭,୭୬୨ଟି ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ଏବଂ ୯୨% ମାମଲା ହାରାହାରି ୧୦୦ ମିନିଟ୍ ରୁ କମ୍ ସମୟ ମଧ୍ୟରେ ସମାଧାନ ହୋଇଛି। ସି ଭିଜିଲ୍ ର କାର୍ଯ୍ୟକାରିତା କାରଣରୁ ବେଆଇନ ହୋର୍ଡିଂ, ସମ୍ପତ୍ତି ବିରୂପୀକରଣ, ନିର୍ଦ୍ଧାରିତ ସମୟଠାରୁ ଅଧିକ ପ୍ରଚାର, ଅନୁମୋଦିତ ସମୟଠାରୁ ଅତିରିକ୍ତ ସମୟରେ ଗାଡ଼ି ମୁତୟନ ରେ ଯଥେଷ୍ଟ ହ୍ରାସ ଘଟିଛି।

ପୃଷ୍ଠଭୂମି:

ସୂଚନାଯୋଗ୍ୟ ଯେ, ଆଦର୍ଶ ଆଚରଣ ବିଧି ହେଉଛି ଏକ ନିୟାମକ ଢାଞ୍ଚା, ଯଦିଓ କଠୋର ଅର୍ଥରେ ଏହା ଆଇନଗତ ସମର୍ଥନ ବିନା ଲାଗୁ ହେଉଛି ତଥାପି ଏକ ସମାନ ସୁଯୋଗ ସୁନିଶ୍ଚିତ କରିବା ଏବଂ ନୈତିକ ପ୍ରଚାର ଅଭିଯାନ ନୀତିକୁ ବଜାୟ ରଖିବା ପାଇଁ ଏହାକୁ ଡିଜାଇନ୍ କରାଯାଇଛି। ନିର୍ବାଚନ ପ୍ରଚାରର ସ୍ୱାଧୀନତା ଏବଂ ସମାନ ସୁଯୋଗ ଯୋଗାଇ ଦେବାରେ ସନ୍ତୁଳନ ବଜାୟ ରଖିବାର ଜଟିଳ ଗତିଶୀଳତାକୁ ଆୟୋଗ ଅତିକ୍ରମ କରିଛନ୍ତି। କୌଣସି ପ୍ରକାର ଉଲ୍ଲଂଘନକୁ ତୁରନ୍ତ ଏବଂ ନିର୍ଣ୍ଣାୟକ ଭାବରେ ସମାଧାନ କରି ଭାରତର ନିର୍ବାଚନ ଆୟୋଗ ସ୍ୱଚ୍ଛତା, ନିରପେକ୍ଷତା, ଉତ୍ତରଦାୟିତ୍ୱ ଏବଂ ସମାନ ସୁଯୋଗର ଗଣତାନ୍ତ୍ରିକ ଆଦର୍ଶକୁ ସୁଦୃଢ଼ କରିଛନ୍ତି । ନିର୍ବାଚନ ପ୍ରକ୍ରିୟାର ପବିତ୍ରତା ବଜାୟ ରଖିବା ଆୟୋଗଙ୍କ ସର୍ବୋଚ୍ଚ ପ୍ରାଥମିକତା ଅଟେ ।

*********

P.S/Swadhin/PIB Bhubaneswar