U Myntri Rangbah Duh, u Narendra Modi ha ka jingai jingkren jong u na Red Fort ha ka lyngkhuh sngi ioh jinglaitluid kaba 77 mynta ka sngi u la ong, “Lada ngi hap ban pynurlong ia ki jingangnud, lada ngi hap ban pynurlong ia ki jingkut jingmut, ka long kaba donkam ban ialeh pyrshah ia ki lai tylli ki jingsniew kiba long ka bam sap, ka jingiashah ia la ki jong ki briew bad ka jingpynkmen ia ki briew lajong.”

U Myntri Rangbah Duh u la ong ba ka jingsniew kaba nyngkong ka dei ka bam sap kaba long ka nongrim jong baroh ki jingeh ha ka ri. “Ka jinglait na ka jingbam sap, ka jingiakhun pyrshah ia ka jingbam sap ha baroh ki jaka, ha baroh ki kam ka dei kaba donkam bha. Ki briew jong ka ri kiba long kiba haiing jong nga baroh, kane ka dei ka jingkut jingmut jong u Modi, kane ka dei ka jingkut jingmut jong nga ba ngan bteng ban ialeh pyrshah ia ki kam bam sap”, la ong u Myntri Rangbah Duh.

Kaba ar ka dei ka jinghiar pateng ka bor synshar kaba la pynpulom ia ka ri jong ngi, la ong u Myntri Rangbah Duh. “Kane ka jinghiar pateng ka bor synshar ka la khniot ia ka ri bad ka la knieh ia ki hok jong ki briew jong ka ri,” u la bynrap.

Ka jingsniew kaba lai, la ong u Modi, ka dei ka jingpynkmen ia ki briew lajong. “Kane ka la pynsniew ia ka rukom pyrkhat ha ka ri, ka rukom im suk lang bad kiwei ha ka ri. Kine ki briew ki la pynpulom lut ia baroh. Kumta, ngi dei ban ialeh pyrshah ia kine ki lai tylli ki jingsniew da kaba pyndonkam lut ka bor. Ka jingbam sap, ka jingiashah shiliang bad ka jingpynhun ia ki briew lajong ki dei ki jingeh kiba la pur bha bad kine ki la iuh roit ia ki jingangnud jong ki briew jong ka ri jong ngi.”

Kine ki jingsniew ki la tuh lut ia ki sap jong ki briew. “Kine ki dei ki jingsniew kiba la buh jingkylli ha ki jingthrang bad ki jingangnud jong ki briew jong ngi. La ki dei kiba duk ba suk, ki Dalit lane kiba dang sahdien, la ki dei ki jait bynriew Pasmanda, la ki dei ki riewlum, la ki dei ki kmie ne ki para kynthei jong ngi, ngi dei ban pynduh ia kine ki lai tylli ki jingsniew na ka bynta ka hok jong ki.

Ha ka jingkren pyrshah ia ka jingbam sap, u Myntri Rangbah Duh u la ong, “Ngi dei ban pynthikna ia ka jinglong jingman kaba kyntait ia ka jingbam sap. Kane ka dei ka jaboh kaba sniew tam ha ka imlang sahlang.” U Myntri Rangbah Duh u la kren shaphang ka jingpyndonkam ia ka teknoloji ban ialeh pyrshah ia ka jingbam sap. U la batai kumno la weng ia ki kyrteng jong ki briew ki bym dei ban ioh jingmyntoi na ki skhim bapher bapher bad ruh ka jingknieh ia ki jingdon jingem jong ki briew kiba thok ha ki kam pisa.

Ha kaba iadei bad ka jinghiar pateng ka bor synshar, u Myntri Rangbah Duh u la ong ba kane ka long jong ki longiing, da ki longiing bad na ka bynta ki longiing bad kane ka pyniap ia ka sap jong ki briew. “Ka long kaba donkam bha ban pynduh ia kane ka jingsniew,” u la ong.

Kumjuh, ka jingpynhun ia ki briew lajong ka la ktah ia hok ha ka imlang sahlang. “Kane ka rukom pyrkhat bad ka rukom trei kam sain pyrthei, ka rukom pyntrei ia ki skhim sorkar ban pynhun ia ki briew lajong ka la pyniap ia ka hok ha ka imlang sahlang. Ka dei namar kane ba ngi shem ba ka jingbam sap bad ka jingpynhun ia ki briew lajong ki dei ki nongshun kiba heh tam ia ka roi ka par. Lada ka ri ka kwah ia ka roi ka par bad lada ngi kwah ban pynurlong ia ka jingthrang ban don ka India kaba la kiew shaphrang shuwa u snem 2047, ka long kaba donkam ia ngi ba ngin kyntait ia ka jingbam sap ha ka ri, ngi dei ban iaid shakhmat ha kane ka rukom,” la ong u Modi.