প্রধানমন্ত্রীগী লোইশঙ
প্রধান মন্ত্রীনা লক্ষনৌদা পাংথোকপা য়ু.পি.গী ইনভেস্তরশিংগী গ্রাউন্দ ব্রেকিং সেরেমোনী @৩.০দা শরুক য়াখ্রে
লুপা করোর ৮০,০০০ হেনবগী প্রোজেক্ত ১৪০৬কী উরেপ উয়ুং তমখি
“মালেম্না ঙসি পাম্লিবা থাজবা য়াবা খোঙলোই অমা ওইবগী তঙাই ফদবা হীরমশিং য়ৌবা ঙম্বগী মতিক গনতন্ত্রা চৎপা ঐখোয়গী ভারত খক্তদা লৈ”
“মালেম্না ঙসিদি ভারতকী তৌবা ঙম্বগী মতিক য়েংবতা নত্তনা থবক পাংথোকপগী মতৌবুসু থাগৎলি”
“ঐখোয়না থৌশিল-থৌরাংনা তংদু লৈতাবা, তেংবাংনদুনা থবক তৌমিন্নবা অমসুং কারবার তৌবদা লাইথোকহনগী হীরমদা মমাংগী চহি ৮দগী মিৎয়েং চঙখি”
“উত্তর প্রদেশনা য়াঙনা চাউখৎনবগীদমক্তা, ইনফ্রাস্ত্রকচর, ইনভেস্তমেন্ত অমসুং মেন্যুফেকচরিংদা ঐখোয়গী দবল ইঞ্জিন সরকারনা পুন্না থবক তৌমিন্নরি”
“ঐহাক্না রাজ্যসিগী এম.পি. অমা ওইনা লৈবাক অসিনা পাম্লিবা রাজ্যসিগী লৈঙাকপা অমসুং সরকারগী থবক পাংথোকপা ঙম্বগী মতিক ঐহাক্না খঙলে”
“ঐখোয়না থৌশিল-থৌরাং, ৱারেপ লৌবা অমসুং করিগুম্বা অমা পাংথোক্কে হায়বগী অনীংবগা লোয়ননা চাউখৎপগী মাইকৈদা লৈরি”
Posted On:
03 JUN 2022 1:39PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি লক্ষনৌদা পাংথোকপা য়ু.পি.গী ইনভেস্তর সম্মিৎকী গ্রাউন্দ ব্রেকিং সেরেমোনী @৩.০দা শরুক য়াখ্রে। প্রধান মন্ত্রীনা গ্রাউন্দ ব্রেকিং সেরেমোনী অসিদা লুপা করোর ৮০,০০০ হেনবগী প্রোজেক্ত ১৪০৬কী উরেপ উয়ুং তমখি। প্রোজেক্তশিং অসিদা লৌউ-শিংউ অমসুং মরী লৈনবা, আই.তি. অমসুং ইলেক্ত্রোনিক্স, এম.এস.এম.ই., মেন্যুফেকচরিং, রিন্যুএবল ইনর্জী, ফার্মা, তুরিজম, দিফেন্স অমসুং এরোস্পেস, হেন্দলুম অমসুং তেক্সতাইলনচিংবা সেক্তর মনুং চল্লি। থৌরম অসিদা লৈবাক্কী ইন্দস্ত্রীগী মরু ওইবা লুচিংবা কয়ানা শরুক য়াখি। থৌরম অসিদা শরুক য়াবশিংগী মনুংদা উত্তর প্রদেশকী মুখ্য মন্ত্রী, য়োগী অদিত্যনাথ, কেন্দ্র মন্ত্রী, শ্রী রাজনাথ সিংহসু য়াওখি।
প্রধান মন্ত্রীনা থৌরম অসিদা ৱা ঙাঙবদা উত্তর প্রদেশকী নহাশিংগী থবক তৌবা ঙম্বগী মতিক, পুক্নিং চঙবা, হোৎনবা কনবা অমসুং লৌশিংদা থাজবা থম্বগীদমক্তা ইনভেস্তরশিংবু থাগৎখি। মহাক্না ইন্দস্ত্রীএলিস্তশিংনা কাশীদসু চৎলুনবা হায়খি। “ঐহাক্না কাশীগী মীহুত অমা ওইনা, অদোম খুদিংনা ঐহাক্কী কাশীদা অমুক্তা চৎপীয়ু হায়জরি। কাশীনা মশাগী অরিবা মতমগী নীংথিজবগা লোয়ননা মশামক্কী ওইবা হৌজিক্কী মতমগী শক্তম অমদা ওনবা ঙম্বগী ৱাফম অসিমক্না উত্তর প্রদেশকী তৌবা ঙম্বগী মতিক্কী অহিংবা খুদম্নি”, হায়না মহাক্না মখা তাখি।
ঙসিগী নুমিত্তা থমখিবা অনৌবা ৱাহৌদোকশিংনা উত্তর প্রদেশকী অনৌবা খুদোংচাবা কয়া শেমগনি অমসুং উত্তর প্রদেশকী চাউখৎপগী ৱারীদা থাজবা হেনগৎলকপগী মতৌবুসু উৎকনি হায়না প্রধান মন্ত্রীনা হায়খি। “মালেম্না ঙসি পাম্লিবা থাজবা য়াবা খোঙলোই অমা ওইবগী তঙাই ফদবা হীরমশিং য়ৌবা ঙম্বগী মতিক গনতন্ত্রা চৎপা ঐখোয়গী ভারত খক্তদা লৈ। মালেম্না ঙসিদি ভারতকী তৌবা ঙম্বগী মতিক য়েংবতা নত্তনা থবক পাংথোকপগী মতৌবুসু থাগৎলি”, হায়না মহাক্না হায়খি। ভারতনা জি.২০ শেন্মিৎলোন মরক্তগী খ্বাইদগী খোঙজেল য়াঙনা শাহৌ লৌবা ওইরি অমসুং গ্লোবেল রিতেল ইন্দেক্সতা অনিশুবা ফমদা হৌজিক লৈরি হায়না প্রধান মন্ত্রীনা পাউদমখি। ভারতনা ইনর্জী শিজিন্নবদা মালেমগী খ্বাইদগী অহুমশুবা চাউবা লৈবাক ওইরি। মালেমগী লৈবাক ১০০ হেনবদগী বিলিয়ন $৮৪গী রেকোর্দ ওইরবা এফ.দি.আই. মমাংগী চহিদা লাকখি। ভারতনা মমাংগী শেনবা চহিদা বিলিয়ন $৪১৭, হায়বদি, লুপা করোর লাখ ৩০ হেনবগী শেনফমগী পোত্থোক মীরমদা থাদোক্তুনা অনৌবা রেকোর্দ থমখি হায়না মহাক্না মখা তাখি।
প্রধান মন্ত্রীনা কেন্দ্রদা এন.দি.এ. সরকারনা চহি ৮ মপুং ফারকপগী ৱাফম পল্লদুনা “ঐখোয়না চহিশিং অসিদা রিফোর্ম-পরফোর্ম-ত্রান্সফোর্মগী মন্ত্রগা লোয়ননা তুংলমচৎকীদমক্তা খোঙদাখি। ঐখোয়না থৌশিল-থৌরাংনা তংদু লৈতাবা, তেংবাংনদুনা থবক তৌমিন্নবা অমসুং কারবার তৌবদা লাইথোকহনগী হীরমদা মমাংগী চহি ৮দগী মিৎয়েং চঙখি” হায়না ফোংদোকখি। মহাক্না লৈবাকপু অমত্তা ওইনা পুন্দুনা থম্বদা তেংবাংলিবা রিফোর্মশিংগী মতাংদা হায়দুনা পনখ্রিবা ৱাফম অসিবু শন্দোক্না তাকখি। “ঐখোয়না ঐখোয়গী রিফোর্মশিংগা লোয়ননা ভারতপু লৈবাক অমা ওইনা মপাঙ্গল লৈহন্নবা হোৎনখি। ৱান নেসন- ৱান তেক্স জি.এস.তি., ৱান নেসন – ৱান গ্রিদ, ৱান নেসন – ৱান মোবিলিতী কার্দ, ৱান নেসন – ৱান রাসন কার্দ। অসিগুম্বা হোৎনরিবা কয়াদা ঐখোয়গী মপুং ওইবা অমসুং অশেংবা থৌশিল থৌরাংগী মমি তারি”, হায়না মহাক্না মখা তাখি।
উত্তর প্রদেশতা ইং ২০১৭কী মতুংদগী হোৎনদুনা লাক্লিবা কয়াগী মতাংদা ৱা ঙাঙলদুনা, প্রধান মন্ত্রীনা হায়খি, “উত্তর প্রদেশনা য়াঙনা চাউখৎনবগীদমক্তা, ইনফ্রাস্ত্রকচর, ইনভেস্তমেন্ত অমসুং মেন্যুফেকচরিংদা ঐখোয়গী দবল ইঞ্জিন সরকারনা পুন্না থবক তৌমিন্নরি। হন্দক্কী চহিগী বজেত্তা, মমাংদা হান্না তৌখিদবগুম্না, লুপা করোর লাখ ৭.৫০বু কেপিতেল এক্সপেন্দিচরগীদমক্তা কাইথোকপা অসিনা মাইকৈ অসিদা পায়খৎপা খোঙথাং অমনি”। লো অমসুং ওর্দরগী ফিভম হেন্না ফগৎলক্লিবা অসিনা কারবারগী খুন্নাইগী থাজবা হেনগৎহল্লে, ইন্দস্ত্রীগী অকোয়বগী ফিভম অমা শেম্লে, অমসুং রাজ্যসিগী লৈঙাকপগী পথাপ্পু হেন্না ফগৎহল্লে হায়না মহাক্না হায়খি। মহাক্না রাজ্যসিগী এম.পি. অমা ওইনা লৈবাক অসিনা পাম্লিবা রাজ্যসিগী লৈঙাকপা অমসুং সরকারগী থবক পাংথোকপা ঙম্বগী মতিক খঙলে হায়খি। রাজ্যগী মেছিনরীগী অহোংবা লাক্লবা ৱাখল্লোন অমসুং থবক তৌবগী চৎনবীবু মহাক্না থাগৎখি। উত্তর প্রদেশনা লৈবাক্কী অপুনবা মীশিংগী শরুক মঙা নত্ত্রগা তরুক থোকপগী অমগী ময়ুম ওইরিবনি, মরম অদুনা লৈবাক চাউখৎপদা রাজ্যসিগী থৌদাং য়াম্না চাওই হায়না মহাক্না হায়খি। প্রধান মন্ত্রীনা উত্তর প্রদেশকী নুংগী পাঙ্গলগী মতাংদা হায়রদুনা রাজ্য অসিনা চাউখৎ-থৌরাংগী লম্বীদা খোঙদারকপা মতমদা কনা অমত্তনা থিংবা ঙম্লোই হায়খি। হন্দক্কী খ্বাইদগী নৌবা বজেত্তা, গঙ্গা তুরেলগী তোর্বান নাকল অনিমক্তা কেমিকেল শিজিন্নদবা, নেচরেল ফার্মিংগী কিলোমিতর ৫ শাংবা কোরিদোর অমা লাউথোকখিবা লৈরে হায়না মহাক্না পাউদমখি। মসিনা নেচরেল ফার্মিংগা মরী লৈননা অচৌবা খুদোংচাবা অমা লৈহনগনি। কোর্পোরেত মালেমগী ওইনা হৌজিক্কী মতম অসি লৌউ-শিংউগী সেক্তরদা শেল থাদবগী খ্বাইদগী খুদোংচাবা মতম্নি হায়না মহাক্না হায়খি। পি.এল.আই. স্কিম অমসুং কেপিতেল এক্সপেন্দিচরগীদমক্তা লুপা করোর লাখ ৭.৫ খাইদোকপা অসিনা রাজ্যদা কান্নবা য়াম্না পীগনি হায়না মহাক্না হায়খি। মতমগা চুনবা পাৱর গ্রিদ, গ্যাস পাইপ্লাইন, মলতি মোদেল কন্নেক্তিবিতী, এক্সপ্রেসৱেগী রেকোর্দ ওইরবা মশিং, শেন্মিৎলোনগী মফমশিংগী মরক্তা কন্নেক্তিবিতী হেনগৎহনবা, রেলৱেগী মতমগা চুনবা ইনফ্রাস্ত্রকচর, ইস্তর্ন অমসুং ৱেস্তর্ন দেদিকেতেদ ফ্রৈত কোরিদোরগুম্বা খোঙথাং কয়া অমা উত্তর প্রদেশতা পুল্লি অমসুং মসিনা উত্তর প্রদেশকী চাউখৎ থৌরাংদা অনৌবা শাফু পীগনি হায়বগী ৱাফম লৈহল্লি।
লৈবাক অসিদা প্রোজেক্তশিংনা মতম চানা লোইশিনবগী চৎনবী অমা হৌখিবা চহি খরদগী লৈবা হৌরক্লি হায়না প্রধান মন্ত্রীনা হায়খি। দিজিতেল রিভোল্যুসনবু থৌওং অসিগা মরী লৈনবা খুদম ওইনা পল্লদুনা, প্রধান মন্ত্রীনা মমাংগী চহি খরদা ওইরক্লিবা লৈবাক্কী চাউখৎপগী ৱারীবু অমুক হন্না নীংশিংখি। ইং ২০১৪দা লৈবাক অসিদা ব্রোদবেন্দ সবস্ক্রাইবর মিলিয়ন ৬৫ খক লৈরম্মি হায়না মহাক্না পাউদমখি। ঙসিদি, মশিং অসিনা করোর ৭৮ হেল্লে। দেতাগী জি.বি. অমনা ইং ২০১৪দা লুপা ২০০ পীরম্মি। ঙসিদি, মমল অসিনা লুপা ১১-১২দা হন্থরে। ভারত অসি দেতা য়াম্না হোংবা লৈবাক অমা ওইরে। ইং ২০১৪দা, ওপ্তিকেল ফাইবর শম্বা লৈবাক্কী গ্রাম পঞ্চায়ত মশিংনা ১০০ য়ৌরমদে। ঙসিদি, ওপ্তিকেল ফাইবর শম্বা লৈবাক্কী গ্রাম পঞ্চায়ত মশিং অসি লাখ অনি মখাই হেল্লে। ইং ২০১৪গী মমাংদা, ঐখোয়গী লৈবাক অসিদা শুপ্নগী স্তার্ত-অপ চাম্মা খরতমক লৈরম্মি। ঙসিদি, লৈবাক অসিদা লৈবা রেজিস্তর তৌরবা স্তার্ত-অপ মশিংনা চাউরাক্না লিশিং ৭০ য়ৌরে। ভারতনা, হন্দক্তসু, য়ুনিকোর্ন ১০০ পুথোকখ্রে। “ঐখোয়না থৌশিল-থৌরাং, ৱারেপ লৌবা অমসুং করিগুম্বা অমা পাংথোক্কে হায়বগী অনীংবগা লোয়ননা চাউখৎপগী মাইকৈদা লৈরি। ঐখোয়না অদোমগী থবক খুদিংদা অদোমগীদমক্তা লৈগনি অমসুং লম্বী অসিগী থাক খুদিংদা ঐখোয়না তেংবাংগনি”, হায়না প্রধান মন্ত্রীনা ইনভেস্তর অমসুং ইন্দস্ত্রীএলিস্তশিংদা থাজবা পীখি।
য়ু.পি. ইনভেস্তর সম্মিত ২০১৮ অসি ফেব্রুৱারী ২১-২২, ২০১৮দা পাংথোকখি অমসুং মসিগী অহানবা গ্রাউন্দ ব্রেকিং সেরেমোনীনা জুলাই ২৯দা পাংথোকখি। মসিগী মথং তারকপা অনিশুবা গ্রাউন্দ ব্রেকিং সেরেমোনীনা জুলাই ২৮, ২০১৯দা পাংথোকখি। অহানবা গ্রাউন্দ ব্রেকিং সেরেমোনীগী মনুংদা লুপা করোর ৬১,৫০০ হেনবা শেনফমগী প্রোজেক্ত ৮১গী উরেপ উয়ুং তমখি। অমসুং অনিশুবা গ্রাউন্দ ব্রেকিং সেরেমোনীদা লুপা করোর ৬৭,০০০ হেনবা শেনফমগী প্রোজেক্ত ২৯০গী উরেপ উয়ুং তমখি।
******
(Release ID: 1830799)
Read this release in:
Malayalam
,
English
,
Urdu
,
Hindi
,
Marathi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada