প্রধানমন্ত্রীগী লোইশঙ
azadi ka amrit mahotsav

চেন্নাইদা চাওখৎ থৌরাংগী প্রোজেক্তশিংগী উরেপ উয়ুং তমবগী থৌরমদা পীখিবা পি.এম.গী ৱারোল

Posted On: 26 MAY 2022 8:58PM by PIB Imphal

তামিল নাদুগী গভর্নর শ্রী আর.এন. রবি, তামিল নাদুগী মুখ্য মন্ত্রী শ্রী এম.কে. স্তেলিন, কেন্দ্রগী মন্ত্রী মন্দলগী খোঙলোয়শিং, তামিল নাদু লৈঙাক্কী মন্ত্রীশিং, পার্লিয়ামেন্তকী মেমবরশিং, তামিল নাদু এসেমব্লীগী মেম্বরশিং, তামিল নাদুগী ইচিল ইনাওশিং, বনক্কম! তামিল নাদুনা হল্লকপসি মতম পুম্নমক্তা নুংঙাইবা ফাওই‍। মফম অসি ময়ামদগী তোঙাল্লি‍। স্তেত অসিগী মীয়াম, নাৎ অমসুং লোল থাক ৱাংই‍। মসিমক মমীং লৈরবা ভার্তিয়রনা শৈথাবিরম্মি:

সেন্তমিল নাদু এন্নম পোথীনীলে ইনবা তেন বন্তু পায়ুতু কাদিনীলে‍।

মরূপশিং,

হীরম খুদিংদা তামিল নাদুদগী মীওই অমা নৎত্রগা অমা মতম পুম্নমক্তা মীথোই মীহেনবা ওইদুনা লাক্লি‍। হন্দক্তা ঐগী য়ুমদা ইন্দিয়ন দীফলিম্পিক কন্তিঞ্জেন্তপু ওকখি‍। হন্দক্কী অসিনা তুর্নামেন্ত অসিদা ভারতকী খ্বাসদগী ফজবা খুৎশান্না ওইখি হায়বা অদোম খঙবিরমগনি‍। অদুবু ঐখোয়না ফংলিবা মেদল ১৬গী মনুংদা তামিল নাদুগী নহাশিংনা মেদল ৬ ফংখি হায়বা অদোম খঙবিবরা‍! মসি তীম অসিগী খ্বাইদগী ফবা কন্ত্রিব্যুসনশিংগী মরক্তা অমনি‍। তামিল লোন অরিবা লোন্নি অমদি তামিলগী নাৎ মালেমগীনি‍। চেন্নাইদগী কনাদা ফাওবা, মদুরাইদগী মলেসিয়া ফাওবা, নমক্কলদগী নিউ য়োর্ক ফাওবা, সলেমদগী সাউথ অফ্রিকা ফাওবদা পোঙ্গল অমসুং পুথান্দু কুমহৈ পাক শন্না পাঙথোক্নরি‍। ফ্রান্সকী কেন্সতা ফিল্ম ফেস্তিবেল অমা হৌজিক পাঙথোক্লি‍। মফমদুদা, তামিল নাদু লমদমগী মপারী থিরু এল. মুরুগন্না তামিলগী নাৎকী ফিজোলদা রেদ কার্পেত্তা চৎখি‍। মদুনা মালেম পুমবদা লৈরিবা তামিলশিংবু চাউথোকপা ফাওহল্লি‍।

মরূপশিং,

ঐখোয়না মফমসিদা তামিল নাদুগী চাওখৎ লম্বী পরিংগী অথোইবা পন্দুপ অমবু হরাও তয়াম্না ওক্নবগীদমক তিল্লি‍। লুপা করোর লিশিং কুন্থ্রামাথোই হেনবগী প্রোজেক্তশিং শঙ্গারি অমদি উরেপ উয়ুং তম্লি‍। ঐখোয়না প্রোজেক্তশিং অসিগী মচা খায়বা ৱাফমশিং হৌজিক উখ্রে অদুবু ঐনা ৱাফম খরগা পনবা পাম্মি‍। লম্বী থোং শেমগৎপদা মীৎয়েঙ চঙলিবসি তশেং-তশেংনা উবা ফংলি‍। ঐখোয়না মসিদা মীৎয়েঙ চঙলিবসিগী মরমদি মসিগা শেন্মিৎলোন চাওখৎপগা হকথেংননা মরী লৈন‍ৈ‍। বেঙ্গলুরু চেন্নাই এক্সপ্রেসৱেনা মরুওইবা চাওখৎপগী সেন্তর অনিবু শমজিন্নগদৌরি‍। চেন্নাই হিথাংফমদগী মদুরাোয়ল ফাওবা শমজিন্নগদৌরিবা লেন ৪গী ৱাংখৎহল্লবা লম্বী অসিনা চেন্নাই হিথাংফমবু হেন্না মতিং লৈহন্দুনা ময়োল্লমদা গারী চিনবগী চাং হন্থহনগনি‍। নেরালুরুদগী ধর্মপুরি সেক্সন অমসুং মীনসুরুত্তিদগী চিদমবরম সেক্সন পাকথোকহনবনা মীয়ামদা চাউনা কান্নবা পীগনি‍। রেলৱে স্তেসন ৫ নৌনা শেমগৎলিবসি ঐ তশেংনা নুংঙাই‍। মোদর্নাইজেসন অমসুং দেভেলপমেন্তকী থবকশিং অসি তুংগী মথৌ তারক্কদবশিং য়েংলগা পায়খৎপনি‍। অদুগা অমরোমদা মসিনা লমদমসিগী কলা অমসুং নাৎপুসু য়োকখৎকনি‍। মদুরাইদগী থেনি ফাওবগী কেজ কন্ভর্জন অসিনা লৌমী ইচিল ইনাউশিংদা অহেনবা কৈথেলশিংদা য়ৌবা ঙমহন্দুনা মতেং ওইগনি‍।

মরূপশিং,

পি.এম.-অৱাস য়োজনাগী মখাদা পুৱারী ওইরগদবা চেন্নাই লাইত হাউস প্রোজেক্তকী শরক অমা ওইনা য়ুম ফংলিবা ময়ামগী মফমদা নুংঙাইবা ফোঙদোকচরি‍। মসি ঐখোয়গী ইফমদা য়াম্না অপেনবা পোকপা প্রোজেক্ত অমা ওইখি‍। ঐখোয়না য়ুমশিংবু মমল চঙদবা, মতম কুইনা চৎপা অমদি মহৌশাগী ফীভমগা চুনবা ওইহন্নবগীদমক খ্বাইদগী ফবা থৌওং শীজিন্ননবা মালেমগী ওইবা শিংনবা অমা হৌদোকখি‍। রেকোর্দ ওইবা মতমগী মনুংদা অসিগুম্বা অহানবা লাইত হাউস প্রোজেক্ত মঙফাউনরে অমদি মসি চেন্নাইদা লৈবসিদা ঐঙোন্দা নুংঙাইবা ফাওই‍। থিরুবল্লুরদগী বেঙ্গলুরু ফাওবা অমদি ইন্নোরদগী চেঙ্গলপত্তু ফাওবগী নেচরেল গ্যাস পাইপলাইন শঙ্গাবগা লোয়ননা তামিল নাদু, অন্ধ্র প্রদেশ অমসুং কর্নাতকাগী মীয়ামদা এল.এন.জি. লায়না ফংহল্লগনি‍। লৈবাকসিগী শেন্মিৎলোন চাওখৎহন্নবা অমদি চেন্নাই হিথাংফমবু শেন্মিৎলোন চাওখৎপগী মকোন অমা ওইহন্নবগী মঙলানগা লোয়ননা ঙসি চেন্নাইদা মল্তি মোদেল লোজিস্তিক পার্ক্কী উরেপ উয়ুং তম্লি‍। ঐখোয়গী লৈঙাক অসিনা লৈবাক্কী তোঙান তোঙানবা মফমশিংদা অসিগুম্বা মল্তি মোদেল লোজিস্তিক পার্কশিং লিংখৎনবা ফিরেপ লৈ‍। হায়রিবা মল্তি মোদেল লোজিস্তিক পার্কশিং অসিনা লৈবাকসিগী ফ্রৈৎ ইকোসিস্তেমদা চাউনা অওনবা অমা পুরক্কনি‍। তোঙান তোঙানবা সেক্তরশিংদা শেমগৎলিবা অসিগুম্বা প্রোজেক্তশিং অসিনা থবক হেন্না পীদুনা আত্মনিরভর ফংনবগী পান্দমবু মপাঙ্গল কনখৎহনগনি‍।

মরূপশিং,

অদোম খুদিংমক্না অদোমগী অঙাঙশিংবু অদোমগী পুন্সিদগী হেন্না ফবা পুন্সি মহিং অমদা হিংহন্নিংলমগনি হায়বা ঐ খঙই‍। অদোম পুম্নমক্না অদোমগী অঙাঙশিংগী য়াইফরবা তুংগী পুন্সি অমা পাম্লমগনি‍। মদু ফংনবগী মথৌ তাবা খ্বাইদগী মরুওইবা ফীভমশিংগী মনুংদা খ্বাইদগী ফবা ইনফ্রাস্ত্রকচরসু অমনি‍। ইনফ্রাস্ত্রকচরদা খ্বাইদগী হেন্না মীৎয়েঙ চঙবা লৈবাকশিংনা চাওখৎলক্লিবা লৈবাক্তগী চাওখৎলবা লৈবাক্তা ওল্লকপা লায়না ঙম্মি হায়না পুৱারীনা তাক্লি‍। ভারত লৈঙাক্না খ্বাইদগী ফবা অমদি তুং কোইগদবা ইনফ্রাস্ত্রকচর শেমগৎপদা মপুং ফানা মীৎয়েঙ থম্লি‍। ঐনা ইনফ্রাস্ত্রকচরগী মরমদা হায়বা মতমদা, সোসিএল অমদি ফিজিকেল ইনফ্রাস্ত্রকচর অনিমক য়াওরি‍। সোসিএল ইনফ্রাস্ত্রকচর ফীভম ফগৎহন্দুনা ঐখোয়না লায়রবশিংগী য়াইফনবা পান্দম থম্লি‍। সোসিএল ইনফ্রাস্ত্রকচরদা থম্লিবা ঐখোয়গী মীৎয়েঙ অসিনা ‘সর্ব জন হিতায়, সর্ব জন সুখায়’গী ৱাখল্লোন্দা লৈরিবা ঐখোয়গী খোঙফম উৎলি‍। ঐখোয়গী লৈঙাক্না মরুওইবা স্কিমশিংদা সেচুরেসনগী থাক্কী কভরেজ ফংননবা থবক তৌরি‍। সেক্তা অমা হেক্তা লৌবিয়ু – তোইলেৎ, হাউজিং, ফাইনান্সিএল ইনক্লুজন… ঐখোয়না মপুং ফানা কভরেজ পীননবা হোৎনরি‍। ঐখোয়না য়ুমথোঙ খুদিংদা থক্নবা ঈশিং পীননবা – নল সে জল – হোৎনরি‍। মসি পায়খৎপদা কনাগুম্বা অমত্তবু লিত্থহৌনবা নৎত্রগা খেন্নবা থম্নবা মফম থমদে‍। অদুগা ফিজিকেল ইনফ্রাস্ত্রকচরদা মীৎয়েঙ থমবগা লোয়ননা ভারতকী নহাশিংনা মসিদগী চাউনা কান্নবা ফংগনি‍। মসিনা নহাশিংগী মঙলান মঙফাওনহনবদা মতেং ওইগনি অমদি মসিবু নহাশিংনা লনথুম অমসুং ভেল্যু শেমগৎপদা শীজিন্নবা য়াগনি‍।

মরূপশিং,

ঐখোয়গী লৈঙাক্না মপুং ওইনা মীয়াম্না খঙনরিবা ইনফ্রাস্ত্রকচরগী ৱাংমদসু চঙশিল্লি‍। চহি খরগী মমাঙ ফাওবদা, ইনফ্রাস্ত্রকচর হায়রগা লম্বী-থোং, মৈ অমসুং ঈশিংবু খঙনরম্মি‍। অদুবু ঙসিদি ঐখোয়না ভারতকী গ্যাস পাইপলাইন নেৎৱর্ক পাকথোক চাউথোকহন্নবা থবক পায়খৎলি‍। আই.-ৱেগী থবকশিং পায়খৎলি‍। খুঙ্গঙ খুদিংদা খোঙজেল য়াঙবা ইন্তরনেৎ ফংহনবা হায়বসিনা ঐখোয়গী মঙলান্নি‍। মসিনা পুরক্কদবা অহোংবশিংদু খন্দুনা য়েংবিয়ু‍। থা খরগী মমাঙদা ঐখোয়না পি.এম.-গতি শক্তি প্রোগ্রাম হৌদোকখি‍। প্রোগ্রাম অসিনা স্তেক-হোল্দর অমসুং মন্ত্রালয় পুম্নমক পুনশিন্দুনা লাক্কদৌরিবা চহিশিংদা ভারতকী ইনফ্রাস্ত্রকচর খ্বাইদগী অফবা ওইহন্নবা পান্দম থম্লি‍। রেদ ফোর্দতগী ঐনা নেস্নেল ইনফ্রাস্ত্রকচর পাইপলাইনগী মতাঙদা ৱা ঙাঙখি‍। মসি লুপা করোর লাখ অমা হেনবগী প্রোজেক্তনি‍। হায়রিবা মঙলান অসিবু মঙফাওনহন্নবা থবক পায়খৎপা হৌরে‍। চহি অসিগী বজেত্তা, লুপা করোর লাখ তরেৎ মখায়গী শেনফম পুৱারী ওইনা হেনগত্তুনা কেপিতেল এক্সপেন্দিচরগীদমক্তা হাপখি‍। ইনফ্রাস্ত্রকচর শেমগৎপা মতমদা হায়রিবা প্রোজেক্তশিং অসি মতম চানা অমদি মনুং মপান ফাওনা উবা ঙমবা মওংদা পায়খৎনবা ঐখোয়না হোৎনরি‍।

মরূপশিং,

তামিল লোল অমসুং নাৎপু হেন্না মীয়াম্না শকখঙনবা ওইহন্নবা ভারত লৈঙাক্না খোঙফম চেৎনা লেপ্লি‍। চহি অসিগী জনুৱারী থাদা, চেন্নাইদা সেন্ত্রেল ইন্সতিত্যুৎ ওফ ক্লাসিকেল তামিলগী অনৌবা কেম্পস শঙ্গাখি‍। অনৌবা কেম্পস অসি কেন্দ্র লৈঙাক্না মপুং ফানা শেল থাদদুনা শেমগৎপন‍। মসিদা পাক চাউরবা লাইব্রেরী অমা, ই লাইব্রেরী অমা, সেমিনার হোলশিং অমসুং মল্তিমেদিয়া হোল অমা য়াওরি‍। বনারস হিন্দু য়ুনিভর্সিতীদা তামিল স্তদিজকী ‘সুব্রমনিয়া ভারতি চেয়র’ অমা থম্নবা হন্দক্তা লাউথোকখ্রে‍। বি.ঐচ.য়ু. অসি ঐলগী কন্সতিত্যুএন্সীদা লৈবা মরম্না মসিগী নুংঙাইবদুদি অখন্নবা অমনি‍। নেস্নেল এজুকেসন পোলিসীনা ভারতকী লোলশিং য়োকখৎপদা অখন্নবা মীৎয়েঙ থম্লি‍। নেস্নেল এজুকেসন পোলিসীনা মরম ওইরগা, তেক্নিকেল অমসুং মেদিকেল কোর্সশিং লম-লমগী লোলদা তমবা য়ারগনি‍। মসিনা তামিল নাদুগী মহাশিংদা কান্নবা পীগনি‍।

মরূপশিং,

স্রি লঙ্কা খুদোংথিবা তাঙ্কক অমদা লৈরি‍। মফমদুদা ওইরক্লিবা ফীভমদুদা অদোম শোয়দনা নুংনাংবা পোক্লমগনি হায়না ঐনা থাজৈ‍। মরূপ অমসুং য়ুম্লোন্নবা অমা ওইনা ভারতনা স্রি লঙ্কাদা পাংবা য়াবা মতেং পাংলি‍। পাংলিবা মতেংশিং অসিদা শেলথুমগী মতেং, থাউ, চীঞ্জাক, হিদাক লাংথক অমসুং অতৈ তঙাই ফদনা চঙদ্রবা য়াদ্রবা পোৎলমশিং য়াওরি‍। ভারতকী লূপ অমসুং লনাই মীওই কয়ানা স্রি লঙ্কাগী ইচিল ইনাওশিংগীদমক মতেং কয়াা থারি‍। স্রি লঙ্কাদা শেন্মিৎলোনগী মতেং পীননবা মালেমগী ফম্বাক কয়াদা ভারতনা কন্না লাউরি‍। ভারতনা স্রি লঙ্কাগী মীওইশিংগীদমক লেপখিগনি, দিমোক্রেসী, মরা চেৎপা অমদি শেন্মিৎলোন হান্নগী ফীভমদা হঞ্জিনহল্লক্নবগীদমক ভারতনা মতাম পুম্নমক্তা শৌজৎকনি‍।

মরূপশিং,

চহি খরগী মমাঙদা ঐনা জফ্নাদা চৎখিবা ঐ কৈদৌঙৈদসু কাউদ‍ে‍। ঐ জফ্নাদা চৎপা ভারতকী অহানবা পি.এম. ওইখি‍। ভারত লৈঙাক্না স্রি লঙ্কাদা লৈবা তামিল মীয়ামদা মতেং পাংননবা মশিং য়াম্লবা প্রোজেক্তশিং পায়খৎলি‍। হায়রিবা প্রোজেক্তশিং অসিদা হকশেলগী, ত্রান্সপোর্তেসনগী, য়ুমকৈগী অমদি নাৎকী ওইবা মতেংশিং য়াওরি‍।

মরূপশিং,

হৌজিক অসি ঐখোয়না নীংতমবগী অমৃৎ মহোৎসব পাঙথোক্লিবা মতম্নি‍। চহি ৭৫গী মমাঙদা ঐখোয়না মনিং তমবা লৈবাক অমগী খোঙচৎ হৌরকখি‍। ঐখোয়গী নীংতম লান্মীশিংনা লৈবাকসিগীদমক মঙলান কয়া মঙখি‍। হায়রিবা মঙলানশিং অদুবু মঙফাওনহনবা হায়বসিনা ঐখোয়গী থৌদাংনি অমদি ঐখোয়না হোৎনমিন্নদুনা হায়রিবা পান্দমশিং অদু ফংবা ঙমগনি হায়না ঐনা থাজৈ‍। ঐখোয় পুন্দুনা ভারতপু হেন্না কনবা, হেন্না নুংঙাই য়াইফবা ওইহনগদবনি‍। অমুক্কা হন্না পায়খৎপা হৌরিবা চাওখৎ থৌরাংগী থবকশিং অসিগীদমক্তা নুংঙাইবা ফোঙদোকচরি‍।

বনক্কম!

অদোমবু থাগৎচরি!

***



(Release ID: 1828736) Visitor Counter : 32