ওম অসমদ গুরুভ্যো নম!

ওম শ্রীমতে রামানুজায় নম!

থৌরম অসিদা ঐখোয়গী ইরক্তা তেঙ্গনাগী রাজ্যপাল দা. তামিলসাই সৌন্দরারজনজী, পুজ্য শ্রী জীয়র স্বামীজী, কেন্দ্রগী মন্ত্রী-মন্দলদা লৈরিবা ঐহাক্কী মরুপশিং, জি. কিশন রেদ্দীজী, ইকাই খুম্নরবা শ্রী দা. রামেশ্বর রাওজী, ভাগবদকী মতিক-মঙালনা থল্লবা ইকাই খুম্নরবা পুজ্য সন্তশিং, ইচিল-ইনাওশিংনা শরুক য়ারি।

ঙসি অসি সরস্বতী ইমাবু খুরুমজবগী শেংলবা কুহ্মৈ বসন্ত পঞ্চমীগী য়াইফরবা নুমিৎ তারি। ইমা শারদাগী অখন্নবা থাজালগা লোয়ননা শ্রী রামানুজাচার্য়জীগী মীতম অসি নুমিৎ অসিদা খিনবা ঙমজরি। ঐহাক্না ময়াম পুম্নমক্তা বসন্ত পঞ্চমীনা লাকপদা য়াইফ-পাউজেল পীজরি। জগদগুরু রামানুজাচার্য়জীগী লৌশিং অসিনা মালেমবু লমজিংনবা ঐহাক্না ইমা সরস্বতীদা থৌনিজরি।

মরুপশিং,

ঐখোয়গী মফম অসিদা অসুম্না হায়নৈ – ‘ধ্যান মুলম গুরু মুর্তি’! হায়বদি ঐখোয়গী গুরুগী মুর্তি অসিনা ঐখোয়গী ধ্যানগী মীৎয়েংফমনি। মরমদি গুরুগী খুত্থাংদা ঐখোয়দা লৌশিং পীনবী। ঐখোয়না খঙবা ঙমদবা অদুগী মরমদা খঙবা ঙম্লি। খঙদবা অদু খঙহন্নবা ইথিল, ওইথোকপা ঙমদববু ওইথোকহ্নবা ফিরেপ মসিনা ভারতকী চৎনবী ওইদুনা লাক্লি।  ঐখোয়না মতম পুম্বদা মীওইবা খুন্নাইবা চহিচা কয়া লমজিংগদবা ভেল্যু অমসুং ৱাখল্লোনশিং অদুবু পাঙ্গল হাপখি। ঙসি অমুক হন্না ভারতনা জগদগুরু শ্রী রামানুজাচার্য়গী অচৌবা মীতম অসিগী খুত্থাংদা মাগী হ্যুমেন ইনর্জী অমদি ইথিলদা মশক থোক্না পাঙ্গল হাপ্পি। শ্রী রামানুজাচার্য়গী মীতম অসি মহাক্কী লৌশিং, অপাম-মীহৌবা থাদোকপা অমসুং ৱাখল্লোনশিং অদুগী খুদম অমনি। মীতম অসিদা তুংদা লাক্কদবা মীরোনশিংদা শোইদনা ইথিল পীগনি অদুবু মসিনা ভারতকী অরিবা মশক অদুসু মপাঙ্গল হাপ্লগনি হায়না ঐহাক্না থাজৈ। ঐহাক্না য়াইফরবা থৌরম অসিদা ময়াম পুম্নমক, ইরৈবাকচা খুদিংমক অমসুং মালেম শিনবা থুংনা লৈরিবা রামানু্জাচার্য়জীগী তুংইনবশিংদা নুংঙাইবা ফোঙদোকচরি।

মরুপশিং,

হৌজিক ঐহাক্না দিব্য দেশম মন্দির ১০৮ চৎলুরগা লাক্লি। আলৱার সন্তসিংনা দিব্য দেশম মন্দির ১০৮ অসি ভারত পুম্বা চৎলুরগা দর্শন তৌখিবা অদুগুম্না ঙসি শ্রী রামানুজাচার্য়গী থৌজালদগী ঐহাক্না চপ মান্নবা লাইবক অদু ফংবা ঙমজরি। মীওইবা খুন্নাইগী য়াইফনবা ১১শুবা চহিচাদা মহাক্না হৌখিবা য়জ্ঞ অসি তোঙান-তোঙানবা লাইনিং-লাইশোনগী থৌরমশিং পাঙথোক্তুনা নুমিৎ ১২ মফম অসিদা চপ মান্নবা ৱাখল্লোনশিংগা লোয়ননা অমুক হন্না পাঙথোক্লি। পুজ্য শ্রী জীয়র স্বামীগী থৌজালদগী ঙসি ‘বিশ্বক সেন ইস্তি য়জ্ঞ’ লোইশিনবগী অসিদা ঐহাক্না শরুক য়াবা ফংজরি। মসিগীদমক ঐহাক্না জীয়া স্বামিজীদা অখন্ননা তৌবিমল খঙবা উৎচরি। মহাক্না ঐহাক্কী ইফমদা ‘বিশ্বক সেন ইস্তি য়জ্ঞ ‘ অসি ফিরেপ অমদি পান্দমশিং থুংহন্নবা য়জ্ঞনি হায়না তাক্রি। ঐহাক্ন য়জ্ঞ অসিগী সঙ্কল্প অসি লৈবাক অসিগী অমৃত সঙ্কল্পকীদমক ইকোক নোন্দুনা থৌনিজরি। য়জ্ঞ অসিগী মহৈদা ঐহাক্কী ইরৈবাকচা করোর ১৩০গী মঙলানশিং থুংহন্নবা থৌনিজরি।   

মরুপশিং,

মালেমগী অয়াম্বা সভ্যতাশিংদা, অয়াম্বা ফিলোসোফীশিংদা ৱাখল্লোন অমা য়ানীংবা নত্ত্রগা য়ানীংদবা লৈ। অদুবু মফম অসিগী ঋসিশিংনা গাজ্ঞপু য়ানীংবা য়ানীংদবা অসিদগী হেল্লি হায়না লৌরিবা অদুগুম্বা লৈবাক অমনি ভারত অসি। মহাক্না মশাদগী হেনখি। য়েৎনববু ঈশ্বরগী ওইবা মীৎয়েংদগী য়েংখি। ঐখোয়দা অসিদা অদ্বৈৎ লৈ অমসুং দ্বৈৎসু লৈ। অমসুং দ্বৈৎ আমদি অদ্বৈৎ অসি পুনশিল্লিবা, শ্রী রামানুজাচার্য়জীগী বিশিশ্ত-দ্বৈৎ অসিনসু ঐখোয়দা ইথিল পীরি। রামানুজাচার্য়গী লৌশিংগী তোপ-তোপ্পা মগুন অমা লৈজৈ। অরাইবা মীৎয়েংদগী লাপ্না লৈবা ৱাখল্লোনশিং অদুবু রামানুজাচার্য়জীনা য়াম্না লায়না ৱাহৈ অমদা ওন্থোকই। মহাক্কী লৌশিং, মহাক্কী ৱাহন্থোক অসিগা লোয়ননা মীচম প্রজাবু শম্নহল্লি। য়েংবীয়ু, নাকল অমদা রামানুজাচার্য়গী ৱাহৈশিং অসি লৌশিংনা থল্লি, অমসুং নাকল অমরোমদা মহাক অসি ভক্তিমার্গকী ফাউন্দরসু ওইরি। নাকল অমরোমদা মহাক অসি ‘সনয়াস’ চৎনবীগী ঋসি অমনি, অমরোমদনা মহাক্না গীতা ভাশ্যদা য়াওরিবা কর্মগী মরু ওইবা অদু অফবা মওংদা খঙহনখি। মহাক মশাগী পুন্সি অসি কর্মগীদমক কত্থোকখি। রামানুজাচার্য়না সংস্কৃত তেক্সশিং কম্পোজ তৌখি অমসুং তামিল লোলগী ভক্তিমার্গতসু চপ মান্নবা মীৎয়েং চং।ও। ঙসিমকসু রামানুজাগী চৎনবীগী মন্দিরশিংদা থিতুপ্পাবাই থিদনা লাইশোন-তিনশোনগী থৌরম অমত্তা পাঙথোক্তে।   

মরুপশিং,

ঙসিগী মালেম অসিদা খুন্নাইদা অওনবা পুরকপা, প্রোগ্রেসিভিজমগী মতাংদা লাকপদা, অওনবা হায়বা অসি হৌরকফমদগী য়াম্না লাপ্না লৈরগা পুরকই হায়না থাজনৈ। অদুবু ঐখোয়না রামানুজাচার্য়জী উবা মতমদা ঐখোয়না চাউখৎপগী খোঙজেল অমসুং এন্তিক্যুতীগী মরক্তা য়েৎনবা অমত্তা লৈতে হায়বা খঙবা ঙম্মি। অহোংবা পুরক্নবা অদোমগী হৌরকফম অদুদগী লাপ্না চৎপগী মথৌ তাদে। মসিগী মহুৎ ঐখোয়গী অশেংবা হৌরকফম অদুগা শম্নবা, ঐখোয়গী অশেংবা শক্তি অদু খঙবা মথৌ তাই! চহি লিশিং অমগী মমাংদা, স্তেরিওতাইপকী চৈথেং, সুপরস্তিসনগী চৈথেং, কয়াম লৈরমগনি হায়বা খনবা ঙমদে! অদুবু রামানুজাচার্য়জীনা খুন্নাইবু ফগৎহন্নবা ভারতকী অশেংবা ৱাখল্লোন অদু খুন্নাউদা খঙহনখি। মহাক্না দলিতশিং অমসুং শোত্থরববু লৌশিনখি, মতম অদুদা লৈরিবা জাৎ অদুগী মরমদা অতোপ্পা ৱাখল্লোন ফাওরিবা অদুগুম্বা জাৎ অদুদা অখন্নবা মফম পীবীখি। মহাক্না য়াদবগীরিদা নারায়ম মন্দির শাখি, মফম অসিদা ঈশ্বর খুরুমজনবা দলিতশিংদা হক পীখি। রামানুজাচার্য়না ধর্মনা অসুম্না হায় হায়না তাকপীখি – “ন জাতি কারন লোকে গুনা কল্যান হেতব”, মসিগী ৱাহন্থোক্তি, মালেমদা য়াইফবা পুরকপা অসি জাৎনা নত্তে কর্মননি হায়বনি। রামানুজাচার্য়গূ গুরু শ্রী মহাপুর্নানা অতোপ্পা জাৎকী মতুপ অমগী অরোইবা মথৌ মঙম পাঙথোকখি। মতম অদুদা রামানুজাচার্য়না মীয়ামদা মপু ইবুঙো শ্রী রাম নীংশিংহনখি। মপু ইবুঙো রামনা মশামক্কী মখুৎনা জতায়ুগী অরোইবা মথৌ মঙম পাঙথোকপা য়ারবদি ধর্ম হায়বা অসিদা খেন্নবা ৱাখল্লোন করম্না লৈরিবনো হায়খি। মসিমক অচৌবা পাউজেল অমনি।   

মরুপশিং,

য়াইফনবগীদমক ঐখোয়গী খুন্নাই অসিগী মনুংদগী মীওইশিং থোরকপা অসি ঐখোয়গী নাৎকী তোপ-তোপ্পা মগুন্নি। চহি কয়াদগী উবা ফংলে মদুদি খুন্নাই অসিদা করিগুম্বা ফত্তবা অমা শন্দোরকপা হৌরকপদা ঐখোয়গী ইরক্তা অথৌবা মীওই কয়া পোক্লকখি। অমসুং মসি চহি লিশিং কয়াগী এক্সপরিয়েন্সনি মদুদি অসিগুম্বা রিফোর্মরশিং অসি মতম অদুদা খুন্নাইনা য়ারম্বা য়াই নত্ত্রগা য়ারমদবা য়াই, শীংনবা লৈরম্বা য়াই নত্ত্রগা লৈরমদবা য়াই, খুদোংথিবা মায়োক্নরম্বা য়াই নত্ত্রগা মায়োক্নরমদবা য়াই, ওপ্পোজিসন থেংনরম্বা য়াই নত্ত্রগা থেংনরমদবা য়াই, অদুবু ৱাখল্লোন অদুদা য়াওরিবা মচাক অদু য়াম্না শক্তি লৈ, মহাক্কী কনভিক্সন অসু য়াম্না কনখিবনা মহাক্না খুন্নাইগী ফত্তবশিংগী মায়োক্তা লান্থেংনবদা মহাক্কী শক্তি অসি শীজিন্নখি। অদুবু খুন্নাইনা মসি খঙলকপা মতমদা, মসিবু য়ানীংলমদবা অদুসু মসিসু থুনমক য়ারকখি। চপ মান্ননা ইকাই খুম্নবা ফংখি। ফত্তবশিং, সুপরস্তিসনশিংগীদমক ঐখোয়গী খুন্নাই অসিদা মপুং ওইআ য়েংবদা খুন্নাইদা খেন্নবা লৈতে হায়বগী প্রমাননি। ফত্তববু মায়োক্নখিবশিং, খুন্নাই অসিবু ফগৎহনখিবশিংনা ইকাই খুম্নবা ফংলি অমসুং মসিদা ইকাই খুম্নবা অদু লৈরে।

ইচিল-ইনাওশিং,

অদোমনা রামানুজাচার্য়গী পুন্সিগী হীরম কয়ামরুম খঙলি। মহাক্না স্পিরিচুএলিতী অমসুং প্রেক্তিকেল লাইফকী পাউজেল মতুং ইনখিবনা খুন্নাইদা অচুম্বা মাইকৈ তাকখি! জাৎ-বিজাৎকী লৈরিবা খেন্নবা অসি থেংনরিবা মীওইশিং অদুবু রামানুজাচার্য়জীনা ‘থিরুকুলথার হায়না মখোয়বু খঙনখি। হায়বদি, লক্ষ্মীজীগী ইমুংদা পোকখিবা, ‘শ্রীকুল’ নত্ত্রগা দিভাইন ওইবা মীওই। মহাক্না ইরুজবা লোইরবা মতুংদা মহাক্কী তুং ইল্লিবা ধনুরদাসকী লেংজুমদা মহাক্কী মখুৎ থমখি। অসুম তৌদুনা রামানুজাচার্য়না শোকন-শমনবা য়াদবা হায়বা অসি মুত্থৎখি। মসিনা মরম ওইরফা মান্নবা ৱাখল্লোন শন্দোক্লিবা মতম অসিগী অথৌবা বাবাসাহেব অম্বেদকরনা রামানুজাচার্য়জীবু য়াম্না থাগৎলমখি অমসুং খুন্নাইদা রামানুজাচার্য়জীনা তাকপী-তম্বীরম্বা অদুদগী তমশিন্নবা হায়খি। মরম অসিনা শ্রী রামানুজাচার্য়না ঐখোয়দা অচৌবা স্তেচ ওফ ইক্বেলিতী মওংদা মান্নবা ৱাখল্লোনগী পাউজেল অদু পীরি। পাউজেল অসিগা লোয়ননা ঙসি লৈবাক অসিনা ‘সবকা সাথ. সবকা বিকাস, সবকা বিশ্বাস, অমসুং সবকা প্রয়াস’কী লাইৱাগা লোয়ননা অনৌবা তুংলমচৎকী য়ুম্ফম থোল্লি। খেন্নবা থমদনা মীপুম খুদিংমক চাউখৎহনগদবনি। মীপুম খুদিংমক্তা খেন্নবা লৈতনা সোসিএল জস্তিস ফংহনগদবনি। ঙসিগী ভারত অসিনা চহিচা কয়া নমথদুনা লৈরুরবশিংদা লৈবাক অসিগী চাউখৎ-থৌরাংদা মপুং ফানা ইকাই খুম্নবা পীদুনা পার্তনর ওইনবা পুন্না খোঙথাং অমা পাইখৎলি। ঙসি ঐখোয়গী দলিত-শোত্থরবা ইচিল-ইনাওশিংনা সরকারগী স্কিমশিংদগী অচৌবা কান্নবশিং ফংলি, পক্কাগী য়ুমশিং শাবা নত্ত্রগা লেম্না উজ্জ্বালা কন্নেক্সনশিং ফংবা, গ্যাস কন্নেক্সনশিং ফংবা ওইরবসু, লুপা লাখ ৫ ফাওবগী লেম্না অনা লায়েং পীবা নত্ত্রগা লেম্না ইলেক্ত্রিসিতী কন্নেক্সনশিং পীবা ওইরবসি, জন ধন একাউন্তশিং হাংবা নত্ত্রগা স্বচ্ছ ভারত অভিয়ানী মখাদা তোইলেৎ করোর কয়া শাবা ওইরবসু অসিগুম্বা স্কিমশিং অসিনা দলিত, শোত্থরবা, লায়রবা, নমহৎপীরবা অমসুং খুদোংচাবা ফংদ্রবশিং য়াওনা মীওই খুদিংমক্তা কান্নবা পীরি অমসুং মীওই খুদিংমকপু মপাঙ্গল কনখৎহনখি।

মরুপশিং,

রামানুজাচার্য়না অসুম্না হায়রম্মি –“উইরগলুক্কুল বেদম ইল্লে” হায়বদি জীবা পানবা পুম্নমক চপ মান্নৈ হায়বনি। মহাক্না ‘ব্রহ্ম’ অমসুং ‘জীবা পানবা’গী মরক্তা অমত্তা ওইনা লৈনবগী মতাংদা ৱা ঙাংদে অদুবু বেদন্তাাগী সুত্রা অসি ঙাক্না হিংখি। মহাক্কী ওইনদি মহাক মশা অমদি অতোপ্পগী মরক্তা খেন্নবা অমত্তা লৈখিদে। মহাক্না মশাদগী হেন্না জীবা পানবগী য়াইফনবা খনখি। মহাক্না হনবা লৈতনা হোৎনখিবা অদুগী মতুংদা মহাক্কী গুরুনা মঙোন্দা গাজ্ঞ পীবা মতমদা মহাক্না ৱাফম অদু লোৎশিনবীনবা হায়জখি মরমদি ‘গুরুমন্ত্র’ অসিনা মহাক্কী য়াইফনবা মন্ত্র ওইখি। মহাক্না স্পিরিচুএলিতী, তপস্যা তমখি অমসুং মহাক্কী পুন্সি কত্থোকখি মরম অসিনা মহাক্না ‘গুরুমন্ত্র’ অসি ফংখি। অদুবু রামুনজাচার্য়জীগী ফিলোসোফী অসি তোখাই। রামানুজাচার্য়জীনা হায়খি – পতিস্যে এক এৱাহ, নরকে গুরু পাতকাত। সর্বে গচ্ছন্তু ভৱতা, কৃপয়া পরম পদম হায়বরি ঐহাক খক্তা নোরক্তা তারবদি করিসু অকাইবা লৈতে অদুবু মীপুম খুদিংমক্তা কান্নবা ফংহৌগদবনি। মসিগী মতুংদা মহাক্না মন্দিরগী মতোলদা কাখৎখি অমসুং মহাক্কী য়াইফনবা মঙোন্দা  মহাক্কী গুরুনা পীখিবা মন্ত্র অদু মীপুম খুদিংমক তানবা থিখি। তশেংনা বেদ বেদান্ত তমখিবা রামানুজাচার্য়জীনা অসিগুম্বা মান্নবা ৱাখল্লোনগী অমৃত অসি পুথোকপা ঙম্মি।

মরুপশিং,

রামানুজচার্য়জী অসি ভারতকী য়ুনিতী অমসুং ইন্তিগ্রিতী অচৌবা ইথিল অমনি। মহাক অসি খা থংবদা পোকখি অদুবু খাদগী অৱাং অমসুং নোংপোক্তগী নোংচুপ ফাওবা ভারত পুম্বদা মহাক্না ইথিল পীখি। অন্নামাচার্য়না তেলুগু লোলদা মহাকপু থাগৎখি; কনকদাসজীনা কন্নদা লোলদা রামানুজাচার্য়জীগী মতিক-মগুনবু শৈথাখি। অদোম্না করিগুম্বা গুজরার অমসুং রাজস্থানদা চৎলবদি রামানুজাচার্য়জীগী ৱাখল্লোনশিং অসি মফম অদুগী ঋসিশিংনা তাকপী-তম্বীরিবশিং অদুদা য়াওবা থেংনগনি। অমসুং অৱাংগী রামান্দিয়গী চৎনবীদা গোস্বামি তুলসিদাসজীদগী কবিরদাস ফাওবা, রামানুজাচার্য় অসি অথোইবা ঋসি পুম্নমক্কী খ্বাইদগী অথোইবা গুরুনি। ঐখোয়না রামানুজাচার্য়গী পুন্সিদা করম্না ঋসি অমনা ভারত পুম্ববু মহাক্কী স্পিরিচুএল ইনর্জীগা লোয়ননা অমত্তা ওইবগী লংলানা পুনশিনখিবগে হায়বা উবা ফংই। মসিগী স্পিরিচুএলিজম অসিনা মীনাই-নাইথাং ওইদুনা চহি চা কয়া খাংখিবা মতমদা ভারতকী কন্সিয়সনেস অসি হিংহন্দুনা থমখি।

মরুপশিং,

শ্রী রামানুজাচার্য়জীগী থৌরম অসি লৈবাক অসিনা মাগী নীংতম্বা ফংখিবগী চহি ৭৫ শুবা পালন তৌরিঙৈ মতমদা চপ চানা তারিবা অসিদা নুংঙাইবসু পোকই। নীংতম্বগী অমৃত মহোৎসব অসিদা ঐখোয়না নীংতম ইহৌগী পুৱারীবু নীংশিংলি। ঙসি লৈবাক অসিনা মাগী নীংতম লান্মীশিংদা ইকাই খুম্নবা উৎচরি। ঐখোয়গী পুৱারীদগী ঐখোয়গী তুংলমচৎকীদমক ঐখোয়না ইথিল অমদি থৌনা লৌরি।  মরম অসিনা অমৃত মহোৎসবনা নীংতম ইহৌগা লোয়ননা ভারতকী চহি লিশিং কয়া শুরবা হেরিতেজ অসিসু কোনশিল্লি। ঐখোয়না খঙই মদুদি ভারতকী নীংতম ইহৌ অসি শুপ্নগী মাগী শক্তি অমদি হকশিংগী খক্তা ওইখিদে। লাঞ্জং অসিদা নাকল অমদা ‘সুপনম শাসনগী ৱাখল্লোন’ অমা য়াওখি অমসুং নাকল অমদা ‘হিংসি অমসুং হিংহনসি’ হায়বগী ৱাখল্লোন অসি লৈখি। মসিদা নাকল অমরোমদনা মসি জাৎ-বিজাৎকী সুপেরিওরিতী অমসুং মেতরিএলিজমগী খৌরাংবা অমসুং অমরোমদনা হ্যুমেনিতী অমসুং স্পিরিচ্যুএলিতদা থাজবা থম্বা অসিনা ওইখি। অমসুং লাঞ্জং অসিদা ভারত অমসুং মাগী চৎনবীনা থোইখি। ভারতকী নীংতম ইহৌ অসি রামানুজাচার্য়গুম্বা ঋসিশিংগী ইক্বেলিতী, হ্যুমেনিতী অমসুং স্পিরিচুএলিজমগী ইনর্জী অসিসু শীজিন্নখি।

ঐখোয়গী নীংতম ইহৌ অসি গান্ধীজী য়াওরমদ্রবদি কমদৌরমগনি? অমসুং ঐখোয়না অহিংসা অমসুং অশেংবা হায়বা ৱাখল্লোন অসি পোক্তবা গান্ধীজী ওইরম্লবদি কমদৌগনি? ঙসিমকসু ঐখোয়না গান্ধীজীগী মতাংদা খল্লকপা মীকুপতা, ঐখোয়গী থমোয়দা ‘ভৈশ্নব জন তো কেনে কহিয়ে’ গী শুর অসি নীংশিংবা হৌরকই। মসিগী কম্পোজর অসি রামানুজাচার্য়জীগী ভক্তি চৎনবীগী অথোইবা ঋসি অমা ওইরিবা নরসি মেহতাজীনি। মরম অসিনা ঐখোয়গী স্পিরিচুএল কন্সিয়সনেসনা ঐখোয়গী নীংতম ইহৌদা পীখিবা ইনর্জী অদুগা চপ মান্নবা ইনর্জী অদু নীংতম্বগী চহি ৭৫ শুরকপগী ঐখোয়গী অচৌবা ফিরেপশিংদসু পীগদবনি। অমসুং ঙসি ঐহাক্না হায়দরাবাদকী ভাগ্যনগরদা লৈরিঙৈ অসিদা ঐহাক্না সরদার পতেলজীগী মতাংদা অখন্নবা ৱাফম খরা শোইদনা থমজরমগে। অমরোমদা কিশন রেদ্দীজীনা মহাক্কী ৱারোলদা সরদার পতেলজীবু পনখি। ভাগ্যনগর অমসুং হায়দরাবাদতা লৈরিবা করম্বা মীওইনা সরদার পতেলনা হায়দরাবাদকীদমক য়েংখিবা দিভাইন বিজন, উৎখিবা থৌনা অমসুং দিপ্লোমেসী অদু খঙলমলোইদগে? ঙসি নাকল অমরোমদা সরদার সাহিবকী ‘স্তেচু ওফ য়ুনিতী’না লৈবাক অসিদা অমত্তা ওইবগী ৱাশক অদু নীংশিংহল্লবদি রামানজুআচার্য়গী ‘স্তেচু ওফ ইক্বেলিতী’না চপ মান্নবা হায়বা পাউজেল অসি পীরি। মসি জাতি অমা ওইনা ভারতকী থোইদোক-হেন্দোকপা মগুন অদুনি। ঐখোয়গী অমত্তা ওইবগী মশক অসি শক্তি নত্ত্রগা ওথোরিতীদা য়ুম্ফম ওইদে, ঐখোয়গী অমত্তা ওইবগী ৱাখল্লোন অসি মান্নবা ৱাখল্লোন অমসুং ইকাই খুম্নবগী মরীনা শেমখিবনি।

অমসুং মরুপশিং,

অমসুং ঙসি ঐহাক্না তেলঙ্গনাদা লাকপা অসিদা ঐহাক্না তেলুগু কলচরনা ভারতকী দাইভর্সিতীবু করম্না এম্পাৱর তৌখিবগে হায়বা শোইদনা পনজরগে। তেলুগু লচরগী হৌরকফম অসি চহিচা কয়াদগী হৌখি। নীংথৌ অমদি মহারানীশিংগী কয়ানা মসিগী ফ্লেগ বিয়রশিং ওইখি। সাতবাহন ওইরবসু, কাকাতিয়া নত্ত্রগা বিজয় নগর নীংথৌরেল ওইরবসু মখোয় পুম্নমক্না তেলুগু কলচরগী ফিরাল ৱাংনা থাংগৎলমখি।  মশক নাইবা কবি কয়ানা তেলুগুগী কলচরবু মগুন হাপখি। মমাং চহিমক্তদা তেলঙ্গনাদা লৈবা ১৩শুবা চহিচাগী কাকতিয়া রুদ্রেশ্বর-রামাপ্পা মন্দির অসিবু য়ুনেস্কো ৱর্ল্দ এরিতেজ সাইৎ ওইনা লাউথোকখিবা অমসুং পোচমপল্লিবু ৱর্ল্দ তুরিজম ওর্গনাইজেসন্না ভারতকী খ্বাইদগী ফবা তুরিজম ভিলেজ ওইনা শকখঙখি। পোচমপল্লিগী নুপীশিংগী স্কিল অসি পোচমপল্লি সারী হায়না মালেমনা মশক খঙনরি। কলচর অসিনা ঐখোয়দা ইংনা-চিক্না লৈবা, ইচিল-ইনাওগী মরী অমসুং নু্পীশিংগী শক্তিবু ইকাই খুম্নবা হায়বা অসি মতম চুপ্পদা তম্বীদুনা লাকখি।  

ঙসি তেলুগু ফিল্ম ইন্দস্ত্রীনা চাউনা শরুক তমদুনা তেলুগু কলচরগী ফজরবা চৎনবী অসি চাউথোকপা পোকপগা লোয়ননা মাংদা চংশিল্লি। তেলুগু সিনেমা অসি তেলুগু লোল ঙাংবা মফম খক্তগী ওইদ্রে। মালেম শিনবা থুংবদা মশক তাক্লিবা। মসিগী ক্রিএতিবিতী অসি সিলভর স্ক্রীন অমসুং ও.তি.তি. প্লেৎফোর্মশিংদা খুদুম চল্লি। মসি ভারতকী ৱাংমদসু থাগৎনরকখি। তেলুগু ঙাংবা মীওইশিংনা মখোয়গী আর্ত অমসুং কলচরদা কত্থোক্লিবা অসি পুম্নমক্কী ওইনদি ইথিলগী হৌরকফম অমা ওইরি। মরুপশিং,

শ্রী রামানুজাচার্য়জীগী মীতম অসিনা ইরৈবাকচা খুদিংমক্তা য়াইফরবা তানফম, নীংতম্বগী চহি ৭৫ শুরকপা অসিদা মখা তানা ইথিল পীখিগনি। নীংতম্বা ফংখিবগী অফবা তানফম অসিদা  ফত্তবশিংবু মপুং ফানা মুত্থৎনবা ঐখোয়না শ্রী রামানুজাচার্য়জীনা খুন্নাই অসিদা ফাওহল্লবা অদু মখা চত্থবা ঙম্লগনি। ৱাখল্লোন অসিগা লোয়ননা ঐহাকপু শেংলবা থৌরম অসিগী শরুক অমা ওইজবা ফংনবা ঐঙোন্দা খুদোংচাবা পীবিখিবগীদমক ঐহাক্না ইকাই খুম্নরবা স্বামীজীবুসু থাগৎচরি। ঐহাক্না অদোমদা তৌবীমল খঙবা উৎচরি। রামানুজাচার্য়জীগী ৱাখল্লোন্না ইথিল পীরিবা মালেম শিনবা থুংবদা লৈরিবা মীওই খুদিংমকপু ঐহাক্না অফ মঙ্গোল পীজরি অমসুং মতাংদা অসিদা ঐহাক্কী ৱারোল অসি লোইশিনজরি।

ময়াম পুম্নমকপু হন্না-হন্না থাগৎচরি!

***