പ്രധാനമന്ത്രിയുടെ ഓഫീസ്‌
കിഴക്കന്‍ സമര്‍പ്പിത ചരക്ക് ഇടനാഴിയുടെ ന്യൂ ഭൂപൂര്‍-ന്യൂ ഖുര്‍ജ വിഭാഗത്തിന്റെ ഉദ്ഘാടന വേളയില്‍ പ്രധാനമന്ത്രിയുടെ പ്രസംഗം
Posted On:
29 DEC 2020 2:03PM by PIB Thiruvananthpuram
ഉത്തര്‍പ്രദേശ് ഗവര്‍ണര്‍ ശ്രീമതി ആനന്ദിബെന്‍ പട്ടേല്‍ ജി, മുഖ്യമന്ത്രി യോഗി ആദിത്യനാഥ് ജി, കേന്ദ്ര റെയില്‍വേ മന്ത്രി പീയൂഷ് ഗോയല്‍ ജി, പാര്‍ലമെന്റിലെ എന്റെ സഹപ്രവര്‍ത്തകര്‍, യുപി സംസ്ഥാന മന്ത്രിമാര്‍, ഈ പരിപാടിയുമായി ബന്ധപ്പെട്ട മുതിര്‍ന്ന വിശിഷ്ടാതിഥികള്‍, സഹോദരങ്ങളേ. ഈ ദിവസം ഇന്ത്യന്‍ റെയില്‍വേയുടെ മഹത്തായ ഭൂതകാലത്തിന് 21-ാം നൂറ്റാണ്ടിന്റേതായ ഒരു പുതിയ വ്യക്തിത്വം നല്‍കാനും ഇന്ത്യയുടെയും ഇന്ത്യന്‍ റെയില്‍വേയുടെയും ശക്തി വര്‍ദ്ധിപ്പിക്കാനും പോവുകയാണ്. സ്വാതന്ത്ര്യാനന്തര ഇന്ത്യയിലെ ഏറ്റവും വലുതും ആധുനികവുമായ റെയില്‍ അടിസ്ഥാനസൗകര്യ പദ്ധതി നടപ്പാക്കുന്നതാണ് ഇന്ന് നാം കാണുന്നത്.
സുഹൃത്തുക്കള്‍,
ഇന്ന്, ആദ്യത്തെ ഗുഡ്‌സ് ട്രെയിന്‍ ഖുര്‍ജ-ഭാവിലെ ചരക്ക് ഇടനാഴിയിലൂടെ ഓടിയെത്തിയപ്പോള്‍, പുതിയ ഇന്ത്യയുടെയും ആത്മനിഭര്‍ ഭാരതിന്റെയും ഗര്‍ജ്ജനം വ്യക്തമായി കേള്‍ക്കാന്‍ കഴിഞ്ഞു. പ്രയാഗ്‌രാജിലെ ഓപ്പറേഷന്‍ കണ്‍ട്രോള്‍ സെന്ററും പുതിയ ഇന്ത്യയുടെ പുതിയ സാധ്യതകളെ അടയാളപ്പെടുത്തുന്നു. ലോകത്തിലെ ഏറ്റവും മികച്ചതും ആധുനികവുമായ നിയന്ത്രണ കേന്ദ്രങ്ങളില്‍ ഒന്നാണിത്.
സഹോദരങ്ങളേ,
ഏതൊരു രാജ്യത്തിന്റെയും കഴിവിന്റെ ഏറ്റവും വലിയ ഉറവിടം അടിസ്ഥാന സൗകര്യങ്ങളാണ്. അടിസ്ഥാനസൗകര്യത്തിലെ പരസ്പര ബന്ധം ഒരു രാജ്യത്തിന്റെ സിരകളും ധമനികളും പോലെയാണ്. ഈ സിരകള്‍ മികച്ചതാണെങ്കില്‍, ഒരു രാജ്യം ആരോഗ്യകരവും ശക്തവുമാണ്. ഇന്ന്, ലോകത്തെ വലിയ സാമ്പത്തിക ശക്തിയായി മാറുന്നതിനായി ഇന്ത്യ അതിവേഗം നീങ്ങുമ്പോള്‍, മികച്ച കണക്റ്റിവിറ്റിയാണ് രാജ്യത്തിന്റെ മുന്‍ഗണന. ഈ ചിന്തയോടെ, ആധുനിക കണക്റ്റിവിറ്റിയുടെ എല്ലാ വശങ്ങളും കഴിഞ്ഞ ആറ് വര്‍ഷമായി ഇന്ത്യയില്‍ കേന്ദ്രീകരിച്ചിരിക്കുന്നു. കിഴക്കന്‍ സമര്‍പ്പിത ചരക്ക് ഇടനാഴി ഒരു വലിയ വിഭാഗത്തിന്റെ ഉദ്ഘാടനവും ഈ ദിശയിലെ ഒരു പ്രധാന ഘട്ടമാണ്.
സുഹൃത്തുക്കളേ,
ഈ സമര്‍പ്പിത ചരക്ക് ഇടനാഴികള്‍, പൊതുവായ ഭാഷയില്‍ വിവരിച്ചാല്‍, ചരക്ക് ട്രെയിനുകള്‍ക്കുള്ള പ്രത്യേക ട്രാക്കുകളും ക്രമീകരണങ്ങളുമാണ്. രാജ്യത്തിന് അവ ആവശ്യമായിരുന്നത് എന്തുകൊണ്ട്? നമ്മുടെ കൃഷിസ്ഥലങ്ങള്‍, വ്യവസായം അല്ലെങ്കില്‍ വിപണികള്‍, എല്ലാം ചരക്കിനെ ആശ്രയിച്ചിരിക്കുന്നു. എവിടെയോ ഒരു വിള വളരുന്നു; ഇത് രാജ്യത്തിന്റെ വിവിധ ഭാഗങ്ങളിലേക്ക് കൊണ്ടുപോകണം. അതുപോലെ, വ്യവസായങ്ങള്‍ക്കുള്ള അസംസ്‌കൃത വസ്തുക്കള്‍ എവിടെ നിന്നോ കടലിലൂടെ വരുന്നു. വ്യവസായ വസ്തുക്കള്‍ മാര്‍ക്കറ്റിലേക്ക് കൊണ്ടുപോകണം അല്ലെങ്കില്‍ കയറ്റുമതിക്കായി തുറമുഖങ്ങളിലേക്ക് കൊണ്ടുപോകണം. ഈ ആവശ്യത്തിനുള്ള ഏറ്റവും വലിയ മാധ്യമം റെയില്‍വേയാണ്. ജനസംഖ്യ കൂടുന്നതിനനുസരിച്ച് സമ്പദ്വ്യവസ്ഥ വളര്‍ന്നു, ഈ ചരക്ക് ശൃംഖലയിലെ സമ്മര്‍ദ്ദവും വര്‍ദ്ധിച്ചു. യാത്രാ, ഗുഡ്‌സ് ട്രെയിനുകള്‍ നമ്മുടെ രാജ്യത്ത് ഒരേ ട്രാക്കില്‍ ഓടുന്നു എന്നതാണ് പ്രശ്നം. ചരക്ക് ട്രെയിനിന്റെ വേഗത മന്ദഗതിയിലാണ്. ചരക്ക് ട്രെയിനുകള്‍ക്ക് വഴിയൊരുക്കുന്നതിനായി യാത്രാ ട്രെയിനുകള്‍ സ്റ്റേഷനുകളില്‍ നിര്‍ത്തുന്നു. തല്‍ഫലമായി, യാത്രാ ട്രെയിനും കൃത്യസമയത്ത് എത്താന്‍ കഴിയാത്തതിനാല്‍ ഗുഡ്‌സ് ട്രെയിനും വൈകുന്നു. ചരക്ക് ട്രെയിനിന്റെ വേഗത മന്ദഗതിയിലാകുകയും ഇടയ്ക്കിടെ തടസ്സങ്ങളുണ്ടാകുകയും ചെയ്യുമ്പോള്‍, ഗതാഗതച്ചെലവ് കൂടുതലായിരിക്കും. ഇത് നമ്മുടെ കൃഷി, ധാതു ഉല്‍പന്നങ്ങള്‍, വ്യാവസായിക ഉല്‍പ്പന്നങ്ങള്‍ എന്നിവയുടെ വിലയെ നേരിട്ട് ബാധിക്കുന്നു. വിലകൂടിയതിനാല്‍ രാജ്യത്തിന്റെയും വിദേശത്തിന്റെയും വിപണികളില്‍ മത്സരിക്കാന്‍ അവര്‍ക്ക് കഴിയില്ല.
സഹോദരങ്ങളേ,
ഈ അവസ്ഥയില്‍ മാറ്റം വരുത്താനാണ് ചരക്ക് ഇടനാഴി ആസൂത്രണം ചെയ്തത്. തുടക്കത്തില്‍, രണ്ട് സമര്‍പ്പിത ചരക്ക് ഇടനാഴികള്‍ തയ്യാറാക്കാനാണു പദ്ധതി. കിഴക്കന്‍ സമര്‍പ്പിത ചരക്ക് ഇടനാഴി പഞ്ചാബിലെ വ്യാവസായിക നഗരമായ ലുധിയാനയെ പശ്ചിമ ബംഗാളിലെ ഡങ്കുനിയുമായി ബന്ധിപ്പിക്കുന്നു. നൂറുകണക്കിന് കിലോമീറ്റര്‍ ദൈര്‍ഘ്യമുള്ള ഈ റൂട്ടില്‍ കല്‍ക്കരി ഖനികളും താപവൈദ്യുത നിലയങ്ങളും വ്യാവസായിക നഗരങ്ങളും ഉണ്ട്. ഇതിനായി ഫീഡര്‍ റൂട്ടുകളും നിര്‍മ്മിക്കുന്നു. മറുവശത്ത്, പടിഞ്ഞാറന്‍ സമര്‍പ്പിത ചരക്ക് ഇടനാഴി മഹാരാഷ്ട്രയിലെ ജെഎന്‍പിറ്റിയെ ഉത്തര്‍പ്രദേശിലെ ദാദ്രിയുമായി ബന്ധിപ്പിക്കുന്നു. 1500 കിലോമീറ്റര്‍ അകലെയുള്ള ഈ ഇടനാഴിയില്‍ ഗുജറാത്തിലെ മുന്ദ്ര, കണ്ട്‌ല, പിപാവവ്, ദാഹെജ്, ഹസിറ എന്നീ പ്രധാന തുറമുഖങ്ങളിലേക്ക് ഫീഡര്‍ റൂട്ടുകളുണ്ടാകും. ദില്ലി-മുംബൈ വ്യവസായ ഇടനാഴി, അമൃത്‌സര്‍-കൊല്‍ക്കത്ത വ്യവസായ ഇടനാഴി എന്നിവയും ഈ രണ്ട് ചരക്ക് ഇടനാഴികള്‍ക്ക് ചുറ്റുമായി വികസിപ്പിക്കുന്നു. അതുപോലെ, വടക്ക് തെക്ക്, കിഴക്ക് പടിഞ്ഞാറ് എന്നിവയുമായി ബന്ധിപ്പിക്കുന്ന പ്രത്യേക റെയില്‍വേ ഇടനാഴിയില്‍ ആവശ്യമായ നടപടിക്രമങ്ങള്‍ പൂര്‍ത്തിയായിക്കൊണ്ടിരിക്കുകയാണ്.
സഹോദരങ്ങളേ,
ചരക്ക് ട്രെയിനുകള്‍ക്കുള്ള പ്രത്യേക സൗകര്യങ്ങള്‍ ഇന്ത്യയിലെ പാസഞ്ചര്‍ ട്രെയിനുകളുടെ പതിവ് കാലതാമസത്തിന്റെ പ്രശ്നം കുറയ്ക്കും. രണ്ടാമതായി, ഇത് ചരക്ക് ട്രെയിനുകളുടെ വേഗത മൂന്ന് മടങ്ങ് വര്‍ദ്ധിപ്പിക്കുകയും അവയ്ക്ക് ഇരട്ടി സാധനങ്ങള്‍ എത്തിക്കാന്‍ കഴിയുകയും ചെയ്യും. കാരണം ഈ പാളങ്ങളില്‍ ഇരുനില ഗുഡ്‌സ് ട്രെയിനുകള്‍ ഓടിക്കാന്‍ കഴിയും. ചരക്ക് ട്രെയിനുകള്‍ കൃത്യസമയത്ത് എത്തുമ്പോള്‍ നമ്മുടെ ഗതാഗത ശൃംഖല ചെലവുകുറഞ്ഞതായിരിക്കും. ഗതാഗതച്ചെലവ് കുറച്ചതിനാല്‍ നമ്മുടെ ചരക്കുകള്‍ വിലകുറഞ്ഞതായിരിക്കും, ഇത് നമ്മുടെ കയറ്റുമതിയെ സഹായിക്കും. മാത്രമല്ല, രാജ്യത്ത് വ്യവസായത്തിന് മെച്ചപ്പെട്ട അന്തരീക്ഷം ഉണ്ടാകും. വ്യവസായം എളുപ്പത്തില്‍ മെച്ചപ്പെടുത്തുകയും നിക്ഷേപത്തിന് ഇന്ത്യ കൂടുതല്‍ ആകര്‍ഷകമാവുകയും ചെയ്യും.
സുഹൃത്തുക്കളേ,
ഈ ചരക്ക് ഇടനാഴികള്‍ ആത്മനിഭര്‍ ഭാരതത്തിന്റെ വലിയ മാധ്യമമായി മാറും. വ്യവസായം, വ്യാപാരം, കൃഷിക്കാര്‍, ഉപഭോക്താക്കള്‍ ആരുമാകട്ടെ, എല്ലാവര്‍ക്കും ആനുകൂല്യം ലഭിക്കും. ഈ ചരക്ക് ഇടനാഴി പ്രത്യേകിച്ചും വ്യാവസായിക പിന്നോക്കമായ കിഴക്കന്‍ ഇന്ത്യയ്ക്ക് ഒരു പുതിയ പ്രചോദനം നല്‍കാന്‍ പോവുകയാണ്. ഇതിന്റെ 60 ശതമാനവും യുപിയിലാണ്, അതിനാല്‍ യുപിയിലെ ഓരോ ചെറുകിട വ്യവസായങ്ങള്‍ക്കും ഇതിന്റെ ഗുണം ലഭിക്കും. കഴിഞ്ഞ കുറച്ച് വര്‍ഷങ്ങളായി യുപിയിലേക്കു രാജ്യത്തും വിദേശത്തുമുള്ള വ്യവസായങ്ങളുടെ ആകര്‍ഷണം ഇനിയും കൂടുതല്‍ വര്‍ദ്ധിക്കും.
സഹോദരങ്ങളേ,
ഈ സമര്‍പ്പിത ചരക്ക് ഇടനാഴി കിസാന്‍ റെയിലിനും ഗുണം ചെയ്യും. രാജ്യത്തെ നൂറാമത്തെ കിസാന്‍ റെയില്‍ ഇന്നലെ ഫളാഗ് ഓഫ് ചെയ്തു. കിസാന്‍ റെയില്‍ വഴി രാജ്യത്തുടനീളമുള്ള വലിയ വിപണികളില്‍ കാര്‍ഷികോല്‍പ്പന്നങ്ങള്‍ സുരക്ഷിതവും കുറഞ്ഞ വിലയ്ക്ക് എത്തിക്കാന്‍ സാധിച്ചു. പുതിയ ചരക്ക് ഇടനാഴിയില്‍ കിസാന്‍ റെയില്‍ ലക്ഷ്യസ്ഥാനത്ത് എത്തും. ഉത്തര്‍പ്രദേശിലും നിരവധി സ്റ്റേഷനുകള്‍ കിസാന്‍ റെയിലുമായി ബന്ധിപ്പിക്കുകയും സ്റ്റേഷനുകളുടെ എണ്ണം വര്‍ദ്ധിപ്പിക്കുകയും ചെയ്യുന്നു. ഉത്തര്‍പ്രദേശിലെ റെയില്‍വേ സ്റ്റേഷനുകള്‍ക്ക് സമീപം സംഭരണവും കോള്‍ഡ് സ്റ്റോറേജ് ശേഷിയും വര്‍ദ്ധിപ്പിക്കുന്നു. യുപിയിലെ നാല്‍പത്തിയഞ്ച് വെയര്‍ഹൗസുകളില്‍ ആധുനിക സൗകര്യങ്ങളുണ്ട്. കൂടാതെ സംസ്ഥാനത്ത് എട്ട് പുതിയ ഗുഡ്‌സ് ഷെഡുകളും സ്ഥാപിച്ചിട്ടുണ്ട്. നശിച്ചുപോകാവുന്ന ഉല്‍പ്പന്നങ്ങള്‍ സൂക്ഷിക്കുന്ന ഉത്തര്‍പ്രദേശില്‍ വാരണാസിയിലെയും ഖാസിപൂരിലെയും രണ്ട് വലിയ ചരക്ക് കേന്ദ്രങ്ങള്‍ ഇതിനകം കര്‍ഷകര്‍ക്ക് സേവനം നല്‍കുന്നുണ്ട്. കൃഷിക്കാര്‍ക്ക് പഴങ്ങളും പച്ചക്കറികളും പോലുള്ള നശിച്ചു പോകാവുന്ന ഉല്‍പന്നങ്ങള്‍ വളരെ കുറഞ്ഞ നിരക്കില്‍ അവിടെ സൂക്ഷിക്കാം.
സുഹൃത്തുക്കളേ,
2014 ന് മുമ്പ് ഉണ്ടായിരുന്ന ഗവണ്‍മെന്റിന്റെ തൊഴില്‍ സംസ്‌കാരത്തിന്റെ സാക്ഷ്യമാണ് ഈ പദ്ധതി. 2006 ല്‍ പദ്ധതിക്ക് അംഗീകാരം ലഭിച്ചു. അതിനുശേഷം, അത് പേപ്പറുകളിലും ഫയലുകളിലും മാത്രമേ രൂപം പ്രാപിച്ചുള്ളു. സംസ്ഥാനങ്ങളുമായി കേന്ദ്രം സംവദിക്കേണ്ട ഗൗരവവും അടിയന്തിരസ്ഥിതിയും അവിടെ ഉണ്ടായിരുന്നില്ല. തല്‍ഫലമായി, ജോലി കുടുങ്ങിക്കിടന്നു. 2014 വരെ ഒരു കിലോമീറ്റര്‍ പാളം പോലും സ്ഥാപിക്കാന്‍ കഴിയാത്ത അവസ്ഥയായിരുന്നു അത്.
സുഹൃത്തുക്കളേ,
2014 ല്‍ സര്‍ക്കാര്‍ രൂപീകരിച്ചതിനുശേഷം പദ്ധതിയുടെ ഫയലുകള്‍ വീണ്ടും ശേഖരിച്ചു. പുതിയതായി ആരംഭിക്കാന്‍ ഉദ്യോഗസ്ഥരോട് ആവശ്യപ്പെടുകയും ബജറ്റ് ഏകദേശം 11 മടങ്ങ് വര്‍ദ്ധിക്കുകയും ചെയ്തു, അതായത് 45,000 കോടി രൂപ. അവലോകന മീറ്റിംഗുകളില്‍, ഞാന്‍ തന്നെ ഇത് നിരീക്ഷിക്കുകയും ബന്ധപ്പെട്ടവരുമായി സംവദിക്കുകയും അവലോകനം ചെയ്യുകയും ചെയ്തു. കേന്ദ്ര ഗവണ്‍മെന്റ് സംസ്ഥാന ഗവണ്‍മെന്റുകളുമായുള്ള ബന്ധം പുതുക്കുകയും അവരെ പ്രചോദിപ്പിക്കുകയും ചെയ്തു. ഞങ്ങള്‍ പുതിയ സാങ്കേതികവിദ്യയും കൊണ്ടുവന്നു. അടുത്ത കുറച്ച് മാസങ്ങളില്‍ ഏകദേശം 1100 കിലോമീറ്റര്‍ പണി പൂര്‍ത്തിയാകും എന്നതാണ് അതിന്റെ ഫലം. സങ്കല്‍പ്പിക്കുക, എട്ട് വര്‍ഷത്തിനുള്ളില്‍ ഒരു കിലോമീറ്ററും 6-7 വര്‍ഷത്തിനുള്ളില്‍ 1100 കിലോമീറ്ററും!
സഹോദരങ്ങളേ,
നേരത്തെ, തിരഞ്ഞെടുപ്പില്‍ പ്രയോജനം ലഭിക്കുന്നതിനായി ട്രെയിനുകളുടെ എണ്ണം കൂട്ടുന്നതിലായിരുന്നു ശ്രദ്ധ. എന്നാല്‍ ട്രെയിനുകള്‍ ഓടേണ്ട ട്രാക്കുകളില്‍ നിക്ഷേപം നടത്തിയിട്ടില്ല. റെയില്‍വേ ശൃംഖല നവീകരിക്കുന്നതും ഗൗരവമായെടുത്തില്ല. നമ്മുടെ ട്രെയിനുകളുടെ വേഗത വളരെ കുറവായിരുന്നു, കൂടാതെ വ്യാപകമായി അപകടകരമായ ആളില്ലാ ഗേറ്റുകളും ഉണ്ടായിരുന്നു.
സുഹൃത്തുക്കളേ,
2014 ന് ശേഷമുള്ള ഈ പ്രവര്‍ത്തനരീതി ഞങ്ങള്‍ മാറ്റി. പ്രത്യേക റെയില്‍ ബജറ്റിന്റെ സംവിധാനം ഒഴിവാക്കിക്കൊണ്ട്, പ്രഖ്യാപനങ്ങള്‍ നടത്തിയ ശേഷം മറക്കുന്നതിന്റെ രാഷ്ട്രീയം ഞങ്ങള്‍ മാറ്റി. ഞങ്ങള്‍ റെയില്‍ ട്രാക്കുകളില്‍ നിക്ഷേപം നടത്തി, ആയിരക്കണക്കിന് ആളില്ലാ ഗേറ്റുകളില്‍ നിന്ന് റെയില്‍വേ ശൃംഖലയെ മോചിപ്പിച്ചു. വേഗത്തില്‍ സഞ്ചരിക്കുന്ന ട്രെയിനുകള്‍ക്കായി റെയില്‍വേ ട്രാക്കുകള്‍ രൂപകല്‍പ്പന ചെയ്യുകയും റെയില്‍ ശൃംഖലയുടെ വീതികൂട്ടുന്നതിലും വൈദ്യുതീകരണത്തിലും ശ്രദ്ധ കേന്ദ്രീകരിക്കുകയും ചെയ്തു. ഇന്ന്, വന്ദേ ഭാരത് എക്‌സ്പ്രസ് പോലുള്ള അര്‍ധ അതിവേഗ ട്രെയിനുകളും ഓടുന്നു, ഇന്ത്യന്‍ റെയില്‍വേ എന്നത്തേക്കാളും സുരക്ഷിതമാണ് ഇന്ന്.
സുഹൃത്തുക്കളേ,
കഴിഞ്ഞ കുറച്ച് വര്‍ഷങ്ങളായി റെയില്‍വേ എല്ലാ തലങ്ങളിലും പരിഷ്‌കാരങ്ങള്‍ ഏറ്റെടുത്തിട്ടുണ്ട്. അത് ശുചിത്വമായാലും മികച്ച ഭക്ഷണമായാലും മറ്റ് സൗകര്യങ്ങളായാലും വ്യത്യാസം പ്രകടമാണ്. അതുപോലെ, റെയില്‍വേയുടെ ഉല്‍പാദനവുമായി ബന്ധപ്പെട്ട പ്രവര്‍ത്തനങ്ങളില്‍ ഇന്ത്യ സ്വയംപര്യാപ്തതയുടെ വലിയ കുതിച്ചുചാട്ടം നടത്തി. ഇന്ത്യ ഇപ്പോള്‍ സ്വയം ആധുനിക ട്രെയിനുകള്‍ നിര്‍മ്മിക്കുകയും കയറ്റുമതി ചെയ്യുകയും ചെയ്യുന്നു. യുപിയില്‍ മാത്രം, വാരണാസിയിലെ ലോക്കോമോട്ടീവ് പ്രവൃത്തികള്‍ ഇന്ത്യയിലെ ഒരു വലിയ ഇലക്ട്രിക് ലോക്കോമോട്ടീവ് കേന്ദ്രമായി മാറ്റുകയാണ്. കഴിഞ്ഞ ആറ് വര്‍ഷത്തിനിടയില്‍, റെയ്ബറേലിയിലെ മോഡേണ്‍ കോച്ച് ഫാക്ടറിയും ഞങ്ങള്‍ പുതുക്കിപ്പണിതു. ഇതുവരെ 5000ല്‍ അധികം പുതിയ റെയില്‍വേ കോച്ചുകള്‍ ഇവിടെ നിര്‍മ്മിച്ചിട്ടുണ്ട്. ഇവിടെ നിര്‍മിക്കുന്ന റെയില്‍വേ കോച്ചുകള്‍ ഇപ്പോള്‍ വിദേശ രാജ്യങ്ങളിലേക്കും കയറ്റുമതി ചെയ്യുന്നു.
സഹോദരങ്ങളേ,
രാജ്യത്തിന്റെ അടിസ്ഥാന സൗകര്യവികസനം രാഷ്ട്രീയത്തില്‍ നിന്ന് അകറ്റി നിര്‍ത്തണമെന്ന് നമ്മുടെ മുന്‍കാല അനുഭവങ്ങള്‍ കാണിക്കുന്നു. രാജ്യത്തിന്റെ അടിസ്ഥാന സൗകര്യങ്ങള്‍ രാജ്യത്തിന്റെ വികസന പാതയാണ്, അല്ലാതെ ഒരു പാര്‍ട്ടിയുടെയും പ്രത്യയശാസ്ത്രമല്ല. ഇത് 5 വര്‍ഷത്തെ രാഷ്ട്രീയമല്ല, മറിച്ച് വരുംതലമുറകള്‍ക്ക് പ്രയോജനം ചെയ്യാനുള്ള ഒരു ദൗത്യമാണ്. രാഷ്ട്രീയ പാര്‍ട്ടികള്‍ക്ക് മത്സരിക്കേണ്ടിവന്നാല്‍, അടിസ്ഥാന സൗകര്യങ്ങള്‍, വേഗത, മികവിന്റെ അളവ് എന്നിവയുടെ ഗുണനിലവാരത്തിലായിരിക്കണം മത്സരം. പ്രകടനങ്ങളിലും ചലനങ്ങളിലും നമ്മള്‍ പലപ്പോഴും കാണുന്ന മറ്റൊരു മാനസികാവസ്ഥയെക്കുറിച്ച് ഇവിടെ പരാമര്‍ശിക്കേണ്ടത് പ്രധാനമാണെന്ന് ഞാന്‍ കരുതുന്നു. രാജ്യത്തിന്റെ അടിസ്ഥാന സൗകര്യങ്ങള്‍ക്കും സ്വത്തിനും നാശമുണ്ടാക്കാനാണ് ഈ മനോനില. ഈ അടിസ്ഥാന സൗകര്യങ്ങളും സ്വത്തുക്കളും ഏതെങ്കിലും നേതാവിനോ പാര്‍ട്ടിക്കോ ഏതെങ്കിലും സര്‍ക്കാരിനോ അവകാശപ്പെട്ടതല്ലെന്ന് നാം ഓര്‍ക്കണം. ഇതാണ് രാജ്യത്തിന്റെ സ്വത്ത്.
സുഹൃത്തുക്കളേ,
കൊറോണ കാലഘട്ടത്തില്‍ കണ്ട ദുഷ്‌കരമായ സാഹചര്യങ്ങളില്‍ റെയില്‍വേയും രാജ്യത്തെ സേവിക്കുക എന്ന ലക്ഷ്യത്തോടെ പ്രവര്‍ത്തിക്കുന്നു. പ്രയാസങ്ങളുള്ള കുടിയേറ്റക്കാര്‍ക്ക് അവരുടെ ഗ്രാമങ്ങളിലേക്ക് സുരക്ഷിതമായി മടങ്ങിവരവ്, മരുന്നുകളുടെ ലഭ്യത, രാജ്യത്തിന്റെ എല്ലാ മുക്കിലും മൂലയിലും റേഷന്‍ സാധനങ്ങള്‍ എത്തിക്കല്‍, അല്ലെങ്കില്‍ കൊറോണ ആശുപത്രികളിലെ സൗകര്യങ്ങള്‍ എന്നിവ ഉറപ്പാക്കുമ്പോള്‍ റെയില്‍വേയുടെ മുഴുവന്‍ ശൃംഖലയും എല്ലാ ജീവനക്കാരുടെയും സേവനവും രാജ്യം എപ്പോഴും ഓര്‍ക്കും. മാത്രമല്ല, ദുഷ്‌കര സമയത്ത് ഗ്രാമങ്ങളിലേക്ക് മടങ്ങിയെത്തിയ തൊഴിലാളി സുഹൃത്തുക്കള്‍ക്ക് റെയില്‍വേ ഒരു ലക്ഷത്തിലധികം ദിവസത്തെ തൊഴില്‍ സൃഷ്ടിച്ചു.
ചരക്ക് ഇടനാഴികളുടെ പുതിയ സൗകര്യത്തിന്, യുപി ഉള്‍പ്പെടെ രാജ്യത്തെ എല്ലാ സംസ്ഥാനങ്ങള്‍ക്കും റെയില്‍വേയുടെ എല്ലാ സഹപ്രവര്‍ത്തകര്‍ക്കും ഞാന്‍ വീണ്ടും ആശംസകള്‍ നേരുന്നു. കൂടാതെ ഈ ചരക്ക് ഇടനാഴിയുടെ കൂടുതല്‍ പ്രവര്‍ത്തനങ്ങള്‍ വേഗതയിലാക്കാനും അവരോട് അഭ്യര്‍ത്ഥിക്കുന്നു. ഈ വിശ്വാസത്തോടെ, നിങ്ങള്‍ക്കെല്ലാവര്‍ക്കും അഭിനന്ദനങ്ങള്‍!
വളരെ നന്ദി!
നിരാകരണം: പ്രധാനമന്ത്രിയുടെ പ്രസംഗത്തിന്റെ ഏകദേശ വിവര്‍ത്തനമാണിത്. ഒറിജിനല്‍ പ്രസംഗം ഹിന്ദിയിലാണു നടത്തിയത്.
***
(Release ID: 1684654)
Visitor Counter : 150
Read this release in:
Assamese
,
English
,
Urdu
,
Marathi
,
Hindi
,
Bengali
,
Manipuri
,
Punjabi
,
Gujarati
,
Odia
,
Tamil
,
Telugu
,
Kannada