উত্তর প্রদেশকী রাজ্যপাল শ্রীমতী আনন্দীবেন পতেলজী, মুখ্যমন্ত্রী য়োগী আদিত্যনাথজী, কেন্দ্রগী রেল মন্ত্রী পিয়ুশ গোয়লজী, সংসদতা ঐগী খোঙলোই ওইমিন্নরিবশিং, য়ু.পি. সরকারগী মন্ত্রীগন, থৌরম অসিদা শরুক য়াবীরিবা সেনিয়র ওইরবা অখঙ-অহৈ পুম্নমক, ইচিল-ইনাওশিং। ঙসিগী নুমিৎ অসি ভারতকী রেলগী চাউথোকচনীংঙাই ওইরবা হৌখ্রবা মতম অদুবু ২১শুবা চহি চাগী অনৌবা শক্তাক ওইহনগদৌরি, ভারত অমসুং ভারতকী রেলগী পাঙ্গল হাপকদৌরিবনি। ঙসি নীং খা তম্লবা মতুংগী খ্বাইদগী চাউবা অমসুং অনৌবা রেল ইনফ্রাস্ত্রকচর প্রোজেক্তকী ইচেল অসিদা কুমথরকপা ঐখোয়না উরি।
মরূপশা,
ঙসি খুর্জা-ভাউদা ফ্রেত কোরির্দোর রুত্তা অহানবা ওইনা মালগারী চেনখিবা অসিদা, অনৌবা ভারতকী, আত্মনির্ভর ভারতকী খোঞ্জেল অমসুং খোন্থাং ময়েক শেংনা তারি। প্রয়াগরাজদা ওপরেসন কন্ত্র্রোল সেন্তর অসিসু অনৌবা ভারতকী অনৌবা তৌবা-ঙম্বা অদুগী খুদম্নি। মসি মালেমগী খ্বাইদগী ফবা অমসুং অনৌবা কন্ত্রোল সেন্তরশিংগী মনুংদা অমনি। অমসুং মসি তাবদা পুম্নমক্না চাউথোকচবা পোক্কনি মদুদি মসিদা মেনেজমেন্ত অমসুং দেতাগা মরী লৈনবা তেক্নোলোজী অদু, ভারত মক্তদা শেম শাজবনি, ভারত মচাশিংনা মদুবু শেম-শাজবনি।
ইচিল-ইনাওশা,
ইনফ্রাস্ত্রকচর অসি লৈবাক অমা হেক্তগী পাঙ্গলগী খ্বাইদগী চাউবা হৌরকফম্নি। ইনফ্রাস্ত্রকচরদসু কনেক্তিবিতী অসি লৈবাক্কী শিংলি-নাওরিনি। শিংলি-নাওরিনা অদুক্কী মতিক ফরিমখৈ মশা মউ ফবা মপাঙ্গল লৈবা লৈবাক অমা ওইবা ঙম্মি। ঙসি ভারতনা মালেমগী খ্বাইদগী চাউবা শেন্মিৎলোনগী পাঙ্গল ওইনবগী লম্বীদা খোঙজেল য়াংনা চংশিল্লিবা অসিদা, হেন্না ফবা কনেক্তিবিতী অসি লৈবাক অসিদা মরুওইবা ওইরি। ৱাখল্লোন অসিগা লোইননা হৌকিবা চহি ৬ লোম অসিদা ভারত্তা অনৌবা কনেক্তিবিতীগী মায়ওন পুম্নমক্তা মিৎয়েং থম্বগা লোইননা থবক পায়খৎলি। হায়ৱেবু ওইরো, রেলৱেবু ওইরো, এয়রৱেবু ওইরো, ৱাতরৱেবু ওইরো নত্ত্রগা আইৱে - শেন্মিৎলোনগী খোঙজেলগীদমক্তা মরুওইরবা কাঙ্খোং মঙা অসিদা মপাঙ্গল হাপ্লি, খোঙজেল হাপ্লি। ইস্তর্ন দেদিকেতেদ ফ্রেত কোরিদোরগী অচৌবা সেক্সন অমগী মায়খুম হাংদোক্লিবা অসিসু মায়কৈ অসোমদা য়াম্না চাউবা খোঙথাং অমনি।
মরূপশা,
দেদিকেতেদ ফ্রেত কোরিদোর অসি, মসিবু অচম্বা লোন্দাদা হায়রগদি মালগারীশিংগীদমক্তা শেম্বা অখন্নবা ত্রেক্নি, অখন্নবা থৌরাংনি। মসিগী মথৌ তাবা অসি লৈবাক অসিদা করিগী মথৌ তারিবনো? ঐখোয়গী লৌবুক ওইরো, ইন্দস্ত্রী ওইরো নত্ত্রগা কৈথেল, মসি ত্রান্সপোর্তেসনগী মখা পোল্লি। মফম অমদা থাবা মহৈ-মরোং অদু লৈবাক্কী তোঙান তোঙানবা মফমশিংদা পুবা তাই। এক্সপোর্তকীদমক্তা হিথাংফম ফাওবা পুবা তারম্মি। মতৌ অসুম্না ইন্দস্ত্রীশিংগীদমক্তা কদাইদগীনো রো মেতরিয়েলশিং সমুদ্রগী লম্বীদা পুরকই। ইন্দস্ত্রীদা শাবা পোৎশক কৈথেল ফাওবা য়ৌহন্নবা নত্ত্রগা এক্সপোর্তকীদমক্তা মদুবু অমুক হন্না হিথাংফমদা পুবা তাই। থবক অসিদা খ্বাইদগী চাউবা পাম্বৈদি রেলৱেনা ওই। মী মশিং অসুম অসুম হেনগৎলকপগা লোইননা, শেন্মিৎলোন হেনগৎলকই,  অদুনা ত্রান্সপোর্তেসনগী নেতৱর্ক অসিদা শাফুসু পীবা হেনগৎলি। অৱাবদি, ঐখোয়গী মফম অসিদা পেসেঞ্জরশিংগী ত্রেন অমসুং মালগারী অনিমক ত্রেক অমখক্তদা চৎলি। মালগারীগী খোংজেল তপ্পি। অসিগুম্বা মতাংদা মালগারীশিংগী লম্বী পীননবা পেসেঞ্জর ত্রেনশিংবু স্তেসনশিংদা খামদুনা থম্মি। মসিদগী পেসেঞ্জর ত্রেনসু মতম চানা য়ৌবা ঙমদে অমসুং মালগারীসু থেংহল্লি। মালগারীগী খোংজেল তপ্লগদি, মফম মফমদা পল্লগদি ত্রান্সপোর্তেসনগী মমল হেনবা অসি মশানা তাবনি। মসিগী হকথেংনবা ফল ঐখোয়গী লৌউ-শিংউ, মিনরেলগী পোৎথোক অমসুং ইন্দস্ত্রীগী পোৎথোকশিংগী মমলদা তাই। তাংবনা মরম ওইদুনা মখোয় লৈবাক অসিগী অমসুং মীরমগী কৈথেলশিংদা তৌনরিবা অথোই অহেন তান্নবা অসিদা খাংদুনা লৈবা ঙমদে, মায়থিবা ওই।
ইচিল-ইনাওশা
ফিভম অসি হোংদোক্নবগীদমক্তা ফ্রেত কোরিদোরগী স্কিম শেমখি। হৌরকপদা দেদিকেতেদ ফ্রেত কোরিদোর ২ শেম-শানবগী থৌরাং লৈ। নোংপোক দেদিকেতেদ ফ্রেত কোরিদোরনা পঞ্জাবকী ইন্দস্ত্রীগী শহর লুধিয়ানাবু নোংচুপ বেঙ্গলগী দানকুনীগা শম্নহল্লি। কিলোমীতর কয়া লাপ্পা রুৎ অসিদা কোয়লাগী মাইন লৈরি, থর্মেল পাৱর প্লান্ত লৈরি, ইন্দস্ত্রীগী শহরনি। মখোয়গীদমক্তা ফীদর মার্গসু শেমগৎলি। নোংচুপকী দেদিকেতেদ ফ্রেত কোরিদোর মহারাস্ত্রগী জে.এন.পি.তি.বু উত্তর প্রদেশকী দাদরীগা শম্নৈ। চাউরাক্না কিলোমীতর ১৫০০গী কোরিদোর অসিদা গুজরাতগী মুন্দ্রা, কান্দলা, পিপাৱাব, দহেজ অমসুং হজীরাগী অচৌবা হিথাংফমশিংগীদমক্তা ফীদর মার্গ ওইগনি। ফ্রেত কোরিদোর অনি অসিগী নাক-য়েৎতা দিল্লী-মুম্বৈ ইন্দস্ত্রিএল কোরিদোর অমসুং অমৃতসর-কোলকতা ইন্দস্ত্রিএল কোরিদোরসু শেমগত্‌লি। মতৌ অসুম্না অৱাংবা খাগা অমসুং নোংপোকপু নোংচুপকা শম্নহল্লিবা অসিগুম্বা অখন্নবা রেল কোরিদোরগা মরী লৈনবা থৌওংশিং মপুং ফাহনবগী থবক পায়খৎলি।
ইচিল-ইনাওশা,
দেদিকেতেদ ফ্রেত কোরিদোর অসিগী কান্নবা কিসান রেলনসু ফংগদৌরি। ঙরাংমক লৈবাক অসিদা চাম্মশুবা কিসান রেল হৌদোকখ্রে। কিসান রেলদগী লৌউ-শিংউগা মরী লৈনবা পোৎথোকশিংবু লৈবাক অপুনবগী অচৌবা কৈথেলশিংদা শোইদ-ঙামদনা অমসুং অহোংবা মমলদা য়ৌহনবা ঙম্লে। হৌজিক অনৌবা ফ্রেত কোরিদোরদা কিসান রেল অসি অমুক্কা হেন্না মসিগী পন্থুংফমদা য়ৌরগনি। উত্তর প্রদেশতসু কিসান রেলগা স্তেসন ময়াম অমগা শম্নখ্রে অমসুং মসিদা লেপ্তনা হেনগৎলক্লি। উত্তর প্রদেশকী রেলৱে স্তেসন মনাক্তা স্তোরেজ অমসুং কোল্দ স্তোরেজগী কেপাসিতীসু হেনগৎহল্লি। য়ু.পি.গী মাল গোদাম ৪৫দা অনৌবা খুদোংচাবশিং হাপখ্রে। মসিদা নত্তনা রাজ্য অসিদা অনৌবা গুদ্স শেদ ৮সু শাখ্রে। উত্তর প্রদেশ অসিমক্তদা বারানসী অমসুং গাজীপুরদা অচৌবা পেরিশেবল কার্গো সেন্তর অনিনা হান্নদগী লৌমীশিংদা থবক ফংহল্লি। মখোয়দা য়াম্না নেম্বা চাংদা লৌমীনা উহৈ-ৱাহৈ, মনা-মশিং অসিনচিংবা থুনা পৎথ-পুমথগনবা মখোয়গী পোৎথোকশিং স্তোর তৌবা য়ারে।
মরূপশা,
অসিগুম্বা মখলগী ইনফ্রাস্ত্রকচরদগী লৈবাক অসিনা অদুক্কী মতিক কান্নবা ফংলিবা অসিদা মসিসু হংনরক্লি মদুদি মসি করিগী অদুক কুইথরম্লিবনো? প্রোজেক্ত অসি ২০১৪গী মমাংদা পাল্লম্বা সরকার অদুগী থবক তৌবগী মচৎকী লেংদ্রবা প্রমান্নি। কুমজা ২০০৬তা প্রোজেক্ত অসি অয়াবা পীখি। মদুগী মতুংদা মসি শুপ্নগী চেদা অমসুং ফাইলশিংদা অদুম্মক লৈখি। কেন্দ্রনা রাজ্যশিংগা লোইননা অদুক্কী মতিক লুম্না ৱারী শানবা মথৌ তাবা অদু পাংথোকখিদে। মদুনা মরম ওইদুনা থবক পন্দুনা লৈখি, কঙাওনখি। ফিভম অদু ২০১৪ ফাওবদা ত্রেক কিলোমীতর অমা ফাওবা শেম্বা ঙমদবা ওইখি। মদুগীদমক্তা অয়াবা পীখিবা পৈশাসু অদুসু, মওং চুম্না শিজিন্নখিদে।
মরূপশা,
২০১৪দা সরকার শেম্লবা মতুংদা প্রোজেক্ত অসিগীদমক্তা অমুক হন্না ফাইলশিং অদু অমুক হন্না শেমগৎখি। ওফিসরশিংদা মকোক্তগী হৌনা মাংদা চংশিন্নবা হায়খি, অদুনা বজেত চাউরাক্না শরু ১১ হায়বদি লুপা করোর লিশিং ৪৫ হেনগৎহনখি। প্রগতিগী মীফমশিংদা ঐ ইশামক্না মদুবু য়েংশিনখি, মদুগা মরী লৈনবা স্তেকহোল্দরশিংগা ৱারী শানখি, য়েংশিনখি। কেন্দ্র সরকারনা রাজ্য সরকারশিংগসু লোইনবা হেনগৎখি, মখোয়না পুক্নীং থৌগৎপীখি ইথিল পীনবীখি। ঐখোয়না অনৌবা তেক্নোলোজীসু পুরক্লে। মসিগী পলনি মদুদি চাউরাক্না কিলোমীতর ১১০০গী থবক মথংগী থা খরদা মপুং ফারগনি। খনবীয়ু, চহি ৮দগী কিলোমীতর অমা ফাওবা লৈখিদবা, অমসুং চহি ৬-৭তা কিলোমীতর ১১০০।  
ইচিল-ইনাওশা,
ইনফ্রাস্ত্রকচরদা রাজনীতিগী চৈনা অসি শুপ্নগী ফ্রেত কোরিদোর খক্তনা খাংবা নত্ত্রি। রেলৱে অপুনবগা মরী লৈনবা সিস্তেম অসিমক মসিগী য়াম্না চাউনা চৈথেং ফংলি। অহানবদা ত্রেনগী মশিং হেনগৎহনবদা ফোকস তৌরম্মি, মরমদি মীখলদা মসিগী কান্নবা ফংনবনি। অদুবু ত্রেন্না চৎকদৌরিবা ত্রেক অদুদদি ইনভেস্ত তৌখিদে। রেল নেতৱর্ক মোদর্নাইজেসন তৌবগী মতাংদা লুম্না লৌখিদে। ঐখোয়গী ত্রেনশিংগী স্পীদ য়াম্না তপ্লম্মি অমসুং নেতৱর্ক অপুনবা থৱাই মাংনীংঙাই ওইবা মী লৈতবা গেৎশিংতনা থল্লম্মি।
মরূপশা,
ঐখোয়না ২০১৪গী মতুংদা থবক্কী মওং অসি হোংদেকখি, ৱাখল্লোন অদুবু হোংদোকখি। তোঙান্না তৌবা রেল বজেৎকী থৌরাং অদু লোইশিন্দুনা, ঐখোয়না লাওথোক্লগা কাওথোকখিবা রাজনীতি অদু লোইশিনখি। ঐখোয়না রেল ত্রেক্তা ইনভেস্ত তৌখি। রেলৱে নেতৱর্কপু মী লৈতবা গেৎশিংদগী লৌথোকখি। রেলৱে ত্রেক অসিবু খোংজেল য়াংনা চেনবা ত্রেনশিংগীদমক শেম-শাখি। রেল নেতৱর্ক পাকথোকহনবা অমসুং ইলেক্ত্রিফিকেসন অসিমক্তা ফোকস তৌখি। ঙসি বন্দে ভারত এক্সপ্রেসকুম্বা, সেমী হাই-স্পীদ ত্রেনশিংসু চলাইরি অমসুং ভারতকী রেল অদুক্কী মতিক শোইদ-ঙামদবসু ওইরে।   
মরূপশা,
হৌখিবা চহিশিংদা রেলৱেদা থাক খুদিংমক্তা রিফোর্মশিং তৌখ্রে। রেলৱেদা লুবা নানববু ওইরো, হেন্না ফবা চান-থক্নববু ওইরো নত্ত্রগা অতোপ্পা খুদোংচাবশিং, খেন্নবা অদু ঙসি ময়েক শেংনা উরি। মতৌ অসুম্না, রেলগা মরী লৈনবা মেন্যুফেকচরিংদা ভারতনা আত্মনির্ভরগীদমক য়াম্না চাউনা চোংখৎলে। ভারতনা অনৌবা ত্রেনশিং শাবা হৌজিক মশাগীদমক্তসু তৌরি অমসুং এক্সপোর্তসু তৌরি। য়ু.পি.গী মতাংদা য়েংবদা বারানসীদা লৈবা লোকোমেতিব ৱার্ক্স অসি, ভারত্তা ইলেক্ত্রিক ইঞ্জিন শাবা অচৌবা সেন্তর ওরক্লি। রায়বরেলীগী মোদর্ন কোচ ফেক্তরী অসিসু হৌখিবা চহি ৬ লোম অসিদা দেন্তিং-পেন্তিংগী থৌদাংদগী ঐখোয়না পুথোরক্লে। মফম অসিদা হৌজিক ফাওবদা লিশিং ৫দগী হেন্না অনৌবা রেল কোচ শাখ্রে। মফম অসিদা শাবা রেল কোচ হৌজিক মীরমদসু এক্সপোর্ত তৌরে।
ইচিল-ইনাওশা,
ঐখোয়গী হৌখ্রবা মতমগী খঙলু উরুবশিং অদুনা হায়রি মদুদি লৈবাক অসিগী ইনফ্রাস্ত্রকচরগী চাউখৎ-থৌরাং অসি রাজনীতিদগী লাপ্না লৈহনগদবনি। লৈবাক অসিগী ইনফ্রাস্ত্রকচর অসি, দল অমখক্কী ৱাখল্লোনগী নত্তে, লৈবাক্কী চাউখৎ-থৌরাংগী লম্বীগীনি। মসি চহি ৫গী পোলিতিক্সকী নত্তে লাক্কদৌরিবা মীরোল কয়াদা কান্নবা পীগদৌরিবা মিশন্নি। রাজনীতিগী দলশিংগী অথোই-অহেন তান্নবা তারবদি, ইনফ্রাস্ত্রকচরগী ক্বালিতীদা অথোই-অহেন তান্নহনগদবনি, স্পীদ অমসুং স্কেল অদুগী মতাংদা অথোই-অহেন তান্নহনগদবনি।
মরূপশা,
মতম পুম্নমক্তা য়েংশিনবীদুনতা লাক্লবা রেলৱে অসিনা করম্বা সেবাগী ৱাখল্লোন্দা অরুবা ফিভমদসু লৈবাক অসিগী কান্নবা ওইরি হায়বসি, কোরোনাগী মতম অসিদা উৎখ্রে অৱাবা তারবা শিন্মীশিংবু মখোয়গী খুঙ্গং ফাওবা থিনববু ওইরো, হিদাক-লংথক অমসুং রাশন লৈবাক্কী কাচিন-কোয়া ফাওবা পুববু ওইরো, নত্ত্রগা চৎথোক-চৎশিন তৌবা কোরোনাগী হোস্পিতালগুম্বগী খুদোংচাবা পীববু ওইরো, রেলৱেগী নেতৱর্ক অপুনবগী, শিন্মী পুম্নমক্কী সেবাগী ৱাখল্লোন অসি লৈবাক অসিনা মতম পুম্বদা নীংশিংদুনা লৈরগনি। মসিদা নত্তনা, ৱারবা মতম অসিদা রেলৱেনা মপান্দগী খুঙ্গংদা হল্লকপা শিন্মী মরূপশিংগীদমক্তা নুমিৎ লাখ অমদগী হেনবগী থবকসু শেমখি। ঐনা থাজৈ মদুদি সেবা, নুংশি চান্নবা অমসুং লৈবাক্কী চাউখৎনবগীদমক পুন্না হোৎনমিন্নবগী মিশন অসি লেপ্তনা চৎথদুনা লৈগনি।
অমুক্কা হন্না, য়ু.পি. য়াওনা লৈবাক্কী রাজ্য পুম্নমকপু ফ্রেত কোরিদোরগী অনৌবা খুদোংচাবগীদমক হন্না হন্না য়াইফ-পাউজেল পীজরি অমসুং রেলৱেগী মরূপ পুম্নমকপুসু য়াইফ-পাউজেল পীজবগা লোইননা মখোয়দসু হায়জরি মদুদি ফ্রেত কোরিদোর অসিগী মথংগী থবকসু ঐখোয়না খোঙজেল য়াংনা পায়খৎকদবনি। ২০১৪গী মতুংদা ঐখোয়না পুরক্লিবা খোংজং অসি, লাক্কদৌরিবা মতম অসিদা মসিদগী হেন্না খোংজেল য়াংহনগনি। মরম অসিনা ঐগী রেলৱেগী খোঙলোই পুম্নমক্না শোউদনা লৈবাক্কী অনীংবা-অপাম্বা অসি থুংহনগনি। থাজবা অসিগা লোইননা পুম্নকপু হন্না হন্না নুংঙাইবা ফোংদোকচরি।
হন্না হন্না থাগৎচরি

*****