কেন্দ্রগী মন্ত্রীমন্দলদা ঐগী খোঙলোই ওইবীরিবা শ্রী হরদীপ সিংহ পুরীজী, দিল্লীগী মুখ্যমন্ত্রী শ্রী অরবিন্দ কেজরীৱালজী, দি.এম.আর.সি.গী মেনেজিং দাইরেক্তর শ্রী মঙ্গু সিংহজী, লৈবাক অসিদা পায়খৎলিবা মেত্রো প্রোজেক্তশিংগী সেনিয়র ওফিসরশিং, অমসুং ঐগী নুংশিরবা ইচিল-ইনাওশিং।

ঐনা ঙসি চাউরাক্না চহি অহুমগী মমাংদা মজেন্তা লাইন শঙ্গাবা ফংজখি। ঙসি অমুক্কা হন্না, রুৎ অসিদা লৈবাক অসিগী অহানবা মপুং ফানা ওতোমেতেদ মেত্রো, মসিবু ঐখোয়না ‘দ্রাভরলেস মেত্রো’ হায়রগসু খঙনৈ, মসি হৌদোকচবা ফংজরে। ভারত অসি কয়াদা খোঙজেল য়াংনা স্মার্ত সিস্তেমগী মায়কৈদা মাংদা চংশিল্লক্লিবনো হায়বসি উৎলি। ঙসি নেস্নেল কমন মোবিলিতী কার্দ, মসিসু দিল্লী মেত্রোগা শম্নরি। হৌখিবা চহিদা অহমদাবাদতা মসি হৌখি। ঙসি মসি চাউথোকহন্দুনা দিল্লী মেত্রোগী এয়রপোর্ত এক্সপ্রেস লাইন্দা পায়খৎলি। ঙসিগী থৌরম অসি অরবান দিবেলপমেন্তনা অরবান রীদী অমসুং ফ্যুচর তৌনবা হোৎনবনি।

মরূপশা,

তুংলমচৎকী মথৌ তাবশিংগীদমক্তা লৈবাক অসিনা ঙসি শেম-শাবা, ঙসি থবক তৌবা, মসি গভর্নেন্সকী মরুওইবা থৌদাংনি। অদুবু চহি তরাগী খুজিং খরগী মমাংদা অরবানাইজেসনগী শাফু অমসুং অরবানাইজেসনগী তুংলমচৎ, অনিমক তশেংনা ময়েক শেংলম্বা মতম অদুদদি তোপ-তোপ্পা মশক অমা লৈবাক অসিনা উরম্মি। তুংলমচৎকী মথৌ তাবশিং অদুদা অদুক পুক্নীং চমলমদে, পুক্নীং হাম্ফোই-হাম্ফোইননা থবক তৌনরম্মি, চিংনবগী ফিভম অদুমক লৈরম্মি। মতম অদুদা অরবানাইজেসনগী থবক পায়খৎলম্মি, অদুবু মদুগী আফতর ইফেক্তশিংগা মায়োক্ননবা ঐখোয়গী শহরশিংবু অদুক খোঙজেল য়াংনা শেম-শাবা তৌখিদে। মদুনা মরম ওইদুনা লৈবাক্কী শরুক কয়াদা শহরগী ইনফ্রাস্ত্রকচরগী দিমান্দ অমসুং মদুবু থুংহনবদা য়াম্না চাউনা খেন্নবা লাকখি।

মরূপশা,

ৱাখল্লোন অসিদগী তোঙান্না, অনৌবা ৱাখল্লোন্না হায়রি অরবানাইজেসনবু শিংনবা ওইনা লৌদনা তাঞ্জা অমা ওইনা শিজিন্নগদবনি। ঐখোয়না লৈবাক অসিদা হেন্না ফবা ইনফ্রাস্ত্রকচর শেম্বা ঙম্নবা তাঞ্জা অমা। ঐখোয়না ইজ ওফ লিভিং হেনগৎহনবা ঙমগদবা তাঞ্জা অমা। ৱাখল্লোনগী খেন্নবা অসি অরবানাইজেসনগী মিৎয়েং খুদিংমক্তা উরি। লৈবাক অসিদা মেত্রো রেল শেমগৎপা অসিসু মসিগী খুদম অমনি। দিল্লী মক্তদা মেত্রোগী মতাংদা চহি কয়াদগী ঙাংনরক্লি। অদুবু অহানবা মেত্রো অতলজীনা হোৎনবদগী চেনখি। থৌরম অসিদা শরুক য়ারিবা মেত্রো সর্বিসগী এক্সপর্তশিং অসিসু মেত্রো শেমগৎপগী ফিভম করি ওইরম্বগে হায়বদু ময়েক শেংনা খঙই।

মরূপশা,

কুমজা ২০১৪দা ঐখোয়গী সরকার শেমখিবা মতমদা, মতম অদুদা শুপ্নগী শহর ৫ খক্তদা মেত্রো রেল লৈরম্মি। ঙসি শহর ১৮দা মেত্রো রেল সর্বিস লৈরে। কুমজা ২০১৫ ফাওবদা ঐখোয়না মসি অহেনবা শহরশিংদা শাংদোক্কদৌরি। কুমজা ২০১৪দা লৈবাক অসিদা শুপ্নগী মেত্রো লাইন্স ওপরেস্নেল কিলোমীতর ২৪৮ খক্তমক লৈরম্মি। ঙসি মসি চাউরাক্না শরুক অহুম হায়বদি কিলোমীতর চাতরেৎতগী হেল্লে। কুমজা ২০২৫ ফাওবদা ঐখোয়না মসি কিলোমীতর ১৭০০ ফাওবা শাংদোকহন্নবা হোৎনরি। কুমজা ২০১৪দা মেত্রো তোংদুনা চৎপা মশিং নুংতিগী লাখ ১৭ ওইরম্মি। হৌজিক মশিং অদু শরুক মঙা হেনগৎলে। হৌজিক মীওই লাখ ৮৫ নুংতিগী মেত্রো তোংদুনা চৎলে। নীংশিংবীয়ু মসি শুপ্নগী মশিং নত্তে মসি ভারত মচা করোর কয়াগী পুন্সিদা ওইরক্লিবা ইজ ওফ লিভিংগী খুদম্নি। মসি শুপ্নগী চেক-নুঙ, নুংঙকুপ অমসুং য়োৎ খক্তনা শাবা ইনফ্রাস্ত্রকচর নত্তে, মসি লৈবাক্কী মীয়াম, লৈবাক অসিগী মিদল ক্লাসগী অনীংবা অপাম্বা মপুং ফাবগী খুদম্নি।

মরূপশা,

অদুবু অহোংবা অসি করম্না লাkখিবনো? ব্যুরোক্রেসী অদুমক্নি, মীয়ামসু অদুমক্নি, অদুগা কমদৌনা অসুক খোংজেল য়াংনা থবক অসি পায়খৎলিবা? মসিগী মরমদি ঐখোয়না অরবানাইজেসনবু শিংনবা ওইনা লৌদনা তাঞ্জা অমা ওইনা উখি। ঐখোয়গী লৈবাক্তা হান্না মেত্রোগী পোলিসী অমত্তা লৈরমদে। কনাগুম্বা লুচিংবা অমনা কদাইদনো ৱাশক শক্লম্লগা লাকপা, সরকার অমনা কনাগুম্ববু পেলহন্নবা মেত্রো লাওথোক্লম্বা অসিখক্তনি। ঐখোয়গী সরকারনা হেলোতিজম অসিদগী মপান্দা থোরক্তুনা মেত্রোগী মতাংদা পোলিসীসু শেমখি অমসুং মদুবু মায়কৈ মরী লোংবা লাল্লোংগা লোইননা হৌসু হৌদোকখি। ঐখোয়না মফম অদুনা তাল্লিবা মওং অদুদা থবক তৌবদা শাফু পীখি, ঐখোয়না মফম অদুগী থাক অদু হেনগৎহনবদা শাফু পীখি, ঐখোয়না মেক ইন্দিয়া চাউথোকহনবদা শাফু পীখি, ঐখোয়না অনৌবা তেক্নোলোজী শিজিন্নবদা শাফু পীখি।

মরূপশা,

অদোম অনম্বনা খঙবীরি মদুদি লৈবাক অসিগী তোঙান তোঙানবা শহরশিংগী তোঙানবা মথৌ তাবা, অপাম্বা অমসুং শিংনবশিং তোঙাল তোঙাল্লি। করিগুম্বা ঐখোয়না ফিস্ক মোদেল অমখক্তং শেমলগা মেত্রো রেল চেলহল্লম্লবদি খোংজেল য়াংনা শন্দোকপা ঙম্লম্লোই। ঐখোয়না পুক্নীং চংখি মদুদি মেত্রো শাংদোকপা অসি, ত্রান্সপোর্তকী অনৌবা মওং-মতৌ শিজিন্নদুনা শহরগী মথৌ তাবশিং অমসুং মফম অদুগী প্রোফেস্নেল লাইফস্তাইলগী মতুং ইন্না তৌফম থোকই। মরম অসিদগী তোঙান তোঙানবা শহরশিংদা তোঙানব তোঙানবা মখলগী মেত্রো রেলদা থবক পায়খৎলি। ঐনা অদোমদা খুদম খরা পীজগে - RRTS  হায়বদি রিজনেল রিপোর্ত ত্রাঞ্জিৎ সিস্তেম – দিল্লী মেরুত RRTSকী নীংথিজরবা মোদেলনা দিল্লী অমসুং মেরুতকী অরাপ্পা হন্থহন্দুনা পুং অমদগীসু হেন্না হন্থহল্লগনি। 

মেত্রোলাইৎ - পেসেঞ্জর মশিং য়াম্না লৈতবা শহরশিংদা মেত্রোলাইৎ ভর্জন্দা থবক পায়খৎলি। মসি মহৌশাগী মেত্রোগী অচংবগী চাদা ৪০ খক্তনা পায়খৎলি। মেত্রো নিয়ো – পেসেঞ্জর কা হেন্না লৈতবা মফমশিং অদুদসু মেত্রো নিয়োগী থবক পায়খৎলি। মসি মহৌশাগী ওইবা মেত্রোগী অচংবগী চাদা ২৫ খক্তনা শেম-শারি। মতৌ অসুম্না ৱাতর-মেত্রো – মসিসু আউৎ ওফ দ বোক্স ৱাখল্লোনগী খুদম্নি। অচৌবা ৱাতর বোদীশিং লৈবা শহরশিং অদুগীদমক্তা হৌজিক ৱাতর মেত্রোদা থবক পায়খৎলি। মসিদগী শহরশিংনা হেন্না ফবা কনেক্তিবিতীগা লোইননা, মদুদা লৈরিবা ইথৎশিংগী মীয়াম্না লাস্ত মাইল কনেক্তিবিতীগী কান্নবা ফংবা ঙম্লগনি। কোচ্চীদা থবক অসি খোংজেল য়াংনা পায়খৎলি।

মরূপশা,

ঐখোয়না মসিদসু পুক্নীং চংগদবনি মদুদি মেত্রো অসি ঙসি শুপ্নগী খুদোংচাবা য়াওরবা পব্লিক ত্রান্সপোর্তকী পাম্বৈ খক্ত নত্তে। মসি নুমিৎ মোৎশিনবা হন্থহনবগীসু পাম্বৈ অমনি। মেত্রো নেৱর্কনা মরম ওইদুনা শরক্তগী নুংশিৎ মোৎপগী অমদি জাম থোকহনবগী মরম ওইহল্লম্বা গারী লিশিং কয়া হন্থরে।

মরূপশা,

মেত্রো সর্বিসশিং হেনগৎহন্নবা, মেক ইন ইন্দিয়া অসিসু মরুওই। মেক ইন ইন্দিয়ানা চংবা হন্থহল্লি, মীরমগী করেন্সী কনবা ঙমহল্লি, অমসুং লৈবাক অসি মক্তদা মীয়াম্না হেন্না থবক ফংই। রোলিং স্তোক স্তেন্দরাইজ তৌবনা কোচ খুদিংমক্কী অচংবা হৌজিক লুপা করোর ১২দগী হন্থদুনা লুপা করোর ৮ ওইরে।

মরূপশা,

ঙসি অচৌবা কম্পনী মরিনা লৈবাক অসি মক্তদা মেত্রো কোচ শারি। কম্পনী কয়ানা মেত্রো কম্পোনেন্তশিং শাবদা পুক্নীং চংলি। মসিদগী মেক ইন ইন্দিয়াগা লোইননা, আত্মনির্ভর ভারতকী খোংজংদা মতেং ওইরি।

মরূপশা,

খ্বাইদগী নৌবা তেক্নিক শিজিন্নবা অসি মতম্না পুরকপনি। হৌজিক ঐনা দ্রাইভর য়াওদনা চেনবা মেত্রো রেল হৌদোকপগী তাঞ্জা ফংজরে। ঙসি মসিগী মায় পাকপা অসিগা লোইননা ঐখোয়গী লৈবাক অসি মালেমগী অসিগুম্বা মখলগী খুদোংচাবা লৈবা লৈবাক খরগী মনুং চল্লে। ঐখোয়না ব্রেক ফাবদা ইনর্জীগী চাদা ৫০ গ্রিদতা অমুক হনখিবা অসিগুম্বা ব্রেক সিস্তেমসু শিজিন্নরি। ঙসি মেত্রো রেলদা মেগাৱাৎ ১৩০গী সোলর পাৱর শিজিন্নরি, মসি মেগাৱাৎ ৬০০ ফাওবা হেনগৎহনগনি। আর্তিফিসিএল ইন্তিলিজেন্সতনা য়োম্লবা প্লেৎফোর্মশিং অমসুং স্ক্রীনিংগী থোঙ, অনৌবা তেক্নিকশিং অসিদসু খোঙজেল য়াংনা থবক পায়খৎলি।

মরূপশা,

নৌথোকহন্নবগীদমক্তা মখল অমত্তগী থাক অমসুং খুদোংচাবা ফংহনবা য়াম্না মরুওই। লৈবাক্কী থাক্তা কমন মোবিলিতী কার্দ অসি মায়কৈ অসোমদা অচৌবা খোংথাং অমনি। অদোম্না মফম অমদগীবু চৎলবসু, অদোম্না পব্লিক ত্রান্সপোত অমা হেক্তদা চৎলবসু, কার্দ অসিনা অদোম্বু ইন্তিগ্রেতেদ এক্সেস পীগনি। হায়বদি, কার্দ অমখক্তনা মফম খুদিংমক্তা চৎনবা। মসি মফম খুদিংমক্তা চৎনগনি।

মরূপশা,

মেত্রো তোংদুনা চৎপশিংনা খঙই, মতৌ করম্না শুপ্নগী তোকন অমখক লৌনবগীদমক কয়া কুইনা লাইন্দা লেপ্পা তাই হায়বা। ওফিস নত্ত্রগা কোলেজ য়ৌবদা থেংলম্মি, অমসুং মদুগী মথক্তা তেকেৎকী অৱাবা। মেত্রোদগী কুমথরবসু বসকী তিকেৎ! ঙসি পুম্নমক্কী মফমদা মতমগী অৱাৎপা ওইনরিবা অসিদা লম্বীদা মতম মাংহনবা য়াদ্রে। মফম অমদগী মফম অমদা চৎনবগীদমক অসিগুম্বা অৱাবশিং অসিনা হৌজিক লৈবাক অসিগী মীয়ামদা অপনবা পীদনবা, ঐখোয়না মায়কৈ অসোমদা থবক পায়খৎলি।

মরূপশা,

লৈবাক অসিগী তৌবা ঙম্বা অমসুং হৌরকফমশিং অসি লৈবাক্কী চাউখৎ-থৌরাংদা চুম্না শিজিন্নহনবা অসি ঐখোয় পুম্নমক্কী থৌদাংনি। ঙসি থৌরাং কয়া অমত্তা ওইনা পুন্সিন্দুনা লৈবাক্কী পাঙ্গল হেনগৎহল্লি, এক ভারত-শ্রেস্থ ভারত অসি মপাঙ্গল কলহল্লি। ৱান নেসন, ৱান মোবিলিতী কার্দকুম্না হৌখিবা চহি খরদা ঐখোয়গী সরকারনা লৈবাক্কী থৌরাংশিংবু অমত্তা ওইনা পুন্সিন্নবা থবক ময়াম অমা তৌরে। ৱান নেসন, ৱান Fastagতগী লৈবাক অপুনবা অসিগী হাইৱেদা ত্রাবেল সীমলেস ওইরে। ৱান নেসন, ৱান তেক্স হায়বদি GSTদগী লৈবাক অপুনবদা তেক্সকী লাং থাকপা লোইশিনখ্রে। ৱান নেসন, ৱান পাৱর গ্রিদতগী লৈবাক্কী শরুক পুম্নমক্তা মরাং কাইবা অমসুং চাং নাইবা ইলেক্ত্রিক ফংবা ঙমলে।

ইলেক্তিক মাংবা হন্থহল্লে। ৱান নেসন, ৱান গ্যাস গ্রিদতগী, গ্যাসতা য়ুম্ফম ওইবা পুন্সি অমসুং শেন্মিৎলোন অদু মঙগুম্না থোক্লম্বা, অদুগুম্বা মফমশিং অদুদা সীমলেস গ্যাস কনেক্তিবিতী ফংবা হৌরে। ৱান নেসন, ৱান হেল্থ এস্যুরেন্স স্কীম হায়বদি আয়ুশ্মান ভারত্তগী লৈবাক অসিগী মীওই করোর কয়ানা লৈবাক্কী মফম অমা হেক্তদা মসিগী কান্নবা লৌরি। ৱান নেসন, ৱান রাসন কার্দতগী মফম অমদগী মফম অমদা চৎপা মীওইশিংনা অনৌবা রাসনকার্দ শাবগী অৱাবা কোক্লে। মতৌ অসুম্না লৌউ-শিংউগী রিফোর্শিং অমসুং e-NAMগুম্বা থৌরাংশিংদগী ৱান নেসন, ৱান এগ্রীকলচর মার্কেতকী মায়কৈদা লৈবাক অসি মাংদা চখৎলি।

মরূপশা,

লৈবাক্কী শহর অচৌ-পীশক পুম্নমক, ২১শুবা ভারতকী শেন্মিৎলোনগী অচৌবা সেন্তর ওইগদৌরি। ঐখোয়গী দিল্লীদি লৈবাক্কী কোনুংসুনি। ঙসি ২১শুবা চহি চাগী ভারতনা মালেমদা শক্তাক শেমলক্লিবা মতম অসিদা, ঐখোয়গী কোনুং অসিদা অৱাংবা থাক্কী মশেক-মঙাল অদু লৈহনগদবনি। অদুক্কী মতিক লিরবা শহর ওইবনা মরম ওইদুনা মসিদা শিংনবশিং শোইদনা লৈফম থোকই অদুবু শিংনবশিং অদুগা লোইননা ঐখোয়না মোদর্নাইজেসনগী অনৌবা শক্তাক অদুসু পীগদবনি। মরম অসিনা ঙসি দিল্লীবু অনৌবা মশক পীনবগীদমক্তা খোংথাং কয়া থাংজিল্লি। দিল্লীদা ইলেক্ত্রিক মোবিলিতী হেনগৎহন্নবগীদমক্তা সরকারনা মদু লৈবদা তেক্সসু কোমথোক্লি।

দিল্লীগী কোলোনী কয়া রিগুলাইজেসন তৌবা নত্ত্রগা স্লমদা লৈবা ইমুংশিংগী হেন্না ফবা য়ুম ফংহন্নবা হোৎনরি। দিল্লীগী অরিবা সরকারগী শঙশিং ঙসিগী মথৌ তাবা মতুং ইন্না ইনভাইরনমেন্তেল ফ্রেন্দলী ওইহনবগী থবক পায়খৎলি। অরিবা ইনফ্রাস্ত্রকচর অদুবু অনৌবা তেক্নোলোজীদা য়ুম্ফম ওইবা ইনফ্রাস্ত্রকচরদা ওন্থোক্লি।

মরূপশা,

দিল্লীদা অরিবা তুরিস্ত দেস্তিনেসনদা নত্তনা ২১শুবা চহি চাগী অনৌবা পুক্নীং চিংশিন্নীংঙাই ওইবসু লৈনবা, মসিগীদমক্তা থবক পায়খৎলি। দিল্লী, ইন্তর্নেস্নেল কনফরেন্স, ইন্তর্নেস্নেল এগজিবিসন, ইন্তর্নেস্নেল বিজিনেস তুরিজমগী মরুওইবা সেন্তর ওইগদৌরি। মসিগীদমক্তা দ্বারকাদা লৈবাক অসিগী খ্বাইদগী চাউবা সেন্তর শেমগৎলি। মতৌ অসুম্না অমরোমদা মফম অসিদা অনৌবা সংসদ ভবন শাবগী থবকসু হৌরে, মফম অদুদা য়াম্না চাউবা ভারত বন্দনা পার্কসু শেম-শাগৎলি। অসিগুম্বা থবক খুদিংমক্তগী দিল্লীগী মীয়ামগীদমক্তা থবক লিশিং হেন্নসু শেম্লি অমসুং শহরগী শক্তমসু হোংদোক্লি।

দিল্লী করোর ১৩০দগী হেন্না মী মশিংগী, মালেমগী অচৌবা শেন্মিৎলোন অমসুং লাল্লোংগী পাঙ্গলগী কোনুংনি, মসিগী অৱাংবা থাক অসিগী শক্তম মসিদা উহনগদবনি। ঐনা থাজৈ মদুদি ঐখোয় পুম্নমক্না অমত্তা ওইনা থবক তৌদুনা, দিল্লীগী মীয়ামগী পুন্সি হেন্না ফগৎহনগনি, দিল্লীবু হেন্না নৌথোকহনগনি।

অমুক্কা হন্না অনৌবা খুদোংচাবশিংগীদমক্তা ঐনা লৈবাক অসিদসু অমসুং দিল্লীগী মীয়ামদসু হন্না হন্না নুংঙাইবা ফোংদোকচরি।

থাগৎচরি !

***