শ্রী সুন্দরম শ্রীনিবাসন

প্রসিদেন্ত

পান আই.আই.তি. য়ু.এস.এ.,

শক্নাইরবা এলুমনী,

মরূপশিং,

ঙসি ঐ অদোমগী নরক্তা য়াওজবা অসিদা নুংঙাইবা পোকচরি। ঐহাক চেন্নৈ, মুম্বাই, গুৱাহাতী অমসুং হন্দক্তা দিল্লীদা আই.আই.তি.গী কনভোকেসন্দা ৱা ঙাংবগী খুদোংচাবা ফংজখি। ঐঙোন্দা আই.আই.তি.গী মহৈরোইশিংগা লোইননা ৱারী শানরবা মতুংদা মতম পুম্নমক্তা ইথিল পোকহল্লি। ঐনা ভারত অমসুং ঐখোয়গী মালেমগী তুংলমচৎকী মতাংদা ইনর্জী অমসুং থাজবা পুদুনা হল্লকই।

মরূপশিং,

অদোম মীওিবগী সেবা তৌরিবা ভারতকী মপারী অমসুং মমোমশিংনি। অদোমগী ইনোবেসনগী ৱাখল্লোন্না মালেম অসিনা অচৌবা মংলান কয়া মঙবদা মতেং পাংলি। মসিসু অদোমগী চাউরবা থৌনাশিং অদুগী মনুংদা অমনি। মসি অদোমগী তেক্নিকেল অমসুং মেনেজমেন্ত স্কিলশিংগী হেক মথংদা অনিশুবা মফমদা কল্লি। কনাগুম্বা অমনা মালেম অপুনবা অসিদা আই.আই.তি.গী এলুমনীগী ক্যুমুলেতিব কন্ত্রিব্যুসনগী ইকোনোমিক ভেল্যু অদু হোৎকদনি। ঐনা থাজৈ মদুদি মসি লৈবাক অমগী মতিক চাবা সাইজ ওইবা জি.দি.পি.গা মান্নৈ।

 মরূপশিং,

মতম অমদা, অসিগুম্বা মীফম অমদা শুপ্নগী আই.আই.তি. মঙা নত্ত্রগা তরুক্কী এলুমনী খক্তমক্না শরুক য়ারম্মি। হৌজিক্তি মশিং অসি হেনগৎলক্লি, অমসুং চাউরাক্না দর্জন অনি ফাওবা য়ৌরক্লে। মহৈরোইশিং অমসুং এলুমনীগী মশিংসু হেনগৎলক্লি। মসিগা লোইননা, ঐখোয়না আই.আই.তি.গী ব্রান্দ অসি হেন্না মপাঙ্গল কন্নবা হোৎনরি। ঐখোয়না ভারত্তা সাইন্স অমসুং তেক্নোলোজী এজুকেসন্দা ইনোৎ হাপ্নবা অচেৎপা ৱাফম ফোংদোক্লি। অদোম্না উবীরম্লগনি মদুদি মতম খরগী মনুংদা ভারত্তা হেকাথোনগী মচৎ অমা শেমগৎলি। ঐনা মসিগী মনুংদগী হেকাথোন খরদা শরুক য়াবগী খুদোংচাবা ফংখি। হেকাথোনশিং অদুদা ঐনা নহা ওইরিবা ৱাখল্লোনবু লৈবাক অসিগী অমসুং মালেম অসিগী সমস্যাশিংগী অদুক্কী মতিক পাম্বৈ পুথোকপা উখি।

লম অসোমদা ঐখোয়না খা এসিয়া অমসুং য়ুরোপকী লৈবাক কয়াগা লোইননা থবক তৌরি। ঐখোয়গী পান্দম অসি ঐখোয়গী নহারোলশিংবু মখোয়গী স্কিল উৎথোক্নবগীদমক অমসুং মালেমগী হেন্নবা মফবা মচৎশিং তম্নবগীদমক মালেমগী ওইবা ফম্বাক অমা শেমগৎপনি। ওক্তেবর ২, গান্ধীগী মপোক কুমওন্দা, হৌদোক্লদুনা মসি ভারতনা বৈভব সমিৎ হৌদোকখি।

চাউরাক্না থা অমা ফাওবা চৎথখিবা সমিৎ অসিনা সাইন্স অমসুং ইনোভেসনগী লমদা মগু ৱাংবা তেলেন্ত য়াওহন্নবা থবক পায়খৎখি। মসিদা শরুক য়াখিবশিংগী মশিং লিশিং ২৩গী ময়া ওইখি। পেনেল দিস্কসন ২৩০ পাংথোকখি। চাউরাক্না পুং ৭৩০ খন্ন-নৈনখি। সমিৎ অদু কান্নবা ওইখি অমসুং মদুনা সাইন্স অমসুং ইনোভেসনগী লমদা তুংলমচৎকী কোলাবোরেসনশিংগী তোন অদু সেৎ তৌখি।

মরূপশিং,

ভারতনা মসিগী থবক তৌবগী মওংদা কান্নরবা অহোংবা অমা পুরক্লি। ঐখোয়না কৈদৌঙৈদসু ওইবা ঙম্লোই হায়না খল্লবা পোৎশকশিং অদু ঙসিদি খোংজেল য়াংনা মায় পাকপা ঙম্লে। ঐনা লম অমগী অপীকপা খুদম অমা পীজরি মদু অদোম্না নীংথিংজনা খঙই। মমাংঙৈদা, আই.আই.তি.না এরো-স্পেস ইঞ্জিনীয়রশিং পুথোক্লম্বদা, মখোয়বু থবক পীনবগীদমক দোমেস্তিক্কী থাক্তা ইন্দস্ত্রিএল ইকো-সিস্তেম অমত্তা লৈরমদে। ঙসি স্পেসকী লমদা ঐখোয়গী পুৱারী ওইরবা রিফোর্মশিংগা লোইননা, মীওইবগী মাংদা লৈরিবা অরোইবা ফ্রন্তিয়র অসি ভারতকী তেলেন্তকীদমক্তা হাংদোক্লে।

মরম অসিদগী ভারত্তা নুংতিগী অনৌবা স্পেস তেক স্তার্তঅপশিং লাক্লি। ঐনা থাজৈ মদুদি অদোমগী মরক্তগী মীওই খরনা থৌনা ফনা হান্না কনা অমত্তনা য়ৌখিদবা মফম অদুদা শোইদনা য়ৌগনি। ভারত্তা লম কয়াদা খ্বাইদগী নৌবা অমসুং অনৌবা মওংদা থবক পায়খৎলি। ঐখোয়গী সরকারনা ‘রিফোর্ম, পর্ফোর্ম, ত্রান্সফোর্ম’গী প্রিন্সিপলগীদমক খোংফম চেৎনা লেপ্লি।

ঐখোয়গী রিফোর্মশিংদা লম অমত্তা চিৎথবা লৈতে। লৌউ-শিংউ, এতোমিক ইনর্জী, ঙাক-শেল, মহৈ-মশিং, হকশেল, ইনফ্রাস্ত্রকচর, ফাইনান্স, বেঙ্কিং, তেক্সেসন। লিস্ত অসি মখা চৎথরি। ঐখোয়না লেবর সেক্তরদা পাক-চাউনা অহোংবা পুরক্লি, লেবরগা মরী লৈনবা লো ৪৪বু শুপ্নগী কোদ ৪দা পুনশিল্লে। ঐখোয়গী কোর্পোরেৎ তেক্সকী রেৎ অসি মালেমদা খ্বাইদগী হন্থরে।

চয়োল খরগী মমাংদা, ভারতকী মন্ত্রীমন্দলনা মরুওইবা লম তরাদা পাক-চাউরবা প্রদক্সন লিঙ্ক ইন্সেন্তিব স্কিমদা অয়াবা পীখ্রে। ৱারেপ অসি এক্সপোর্তকা লোইননা মেন্যুফেকচরিংগী লমদা ইনোৎ হাপ্নবা লৌখিবনি। মসিদা বেত্রী, ইলেক্ত্রোনিক্স, ফার্মা, ওতোমোবাইল, তেলিকোম, সোলর ইনর্জী অমসুং অতৈ লম কয়া য়াওরি। লম পুম্নমক অসি তেক্নোলোজীগা শম্নরি। তাঞ্জাশিং অসি য়াওহন্নবগীদমক ঙাইদুনা লৈরি।

কোবিদ-১০গী চিরবা তাঞ্জা অসিদা, ভারতনা রিকোর্দ ইনভেস্তমেন্ত ফংখ্রে। ইনভেস্তমেন্ত অসিগী শরুক অয়াম্বা তেক্নিকেলগী লমদা ওইরি। মসি ময়েক শেংলে মদুদি, মালেম্না ভারতপু থাজনীংঙাই ওইবা অমসুং হৈ-শিংলবা খোংলোই অমা ওইনা য়েংনরক্লি।

মরূপশিং,

পেন আই.আই.তি. খোংজংগী অপুনবা পাঙ্গল অসি আত্মনির্ভর ভারত নত্ত্রগা সেল্ফ রিলায়েন্ত ইন্দিয়া ওইহন্নবা ঐখোয়গী মঙলান অসিদা খোংজেল হাপ্পা য়াই। নীং খা তম্লবা ভারতকী পুৱারীগী মরুওইবা তাঙ্কক খরদা, মালেম শিনবা থুংবদা শন্দোক্লিবা ভারত মচাশিংনা শাহৌরক্লিবা ভারত অমগীদমক মখোয়গী থজবা ফোংদোক্লি। মখোয় অনৌবা ভারতকী এম্বেসেদর ওইরি। অমসুং মখোয়গী খোঞ্জেল অসি ঙসি মালেম্না তশেংনা ভারতকী মিৎয়েং অসিবু মশক খঙবদা য়াম্নমক মরুওইরি।

মরূপশিং,

চহি অনিগী মতুংদা, ২০২২দা ভারত নীং খাতম্বগী চহি ৭৫ মপুং ফারগনি। ঐনা পেন আই.আই.তি. খোংজংদা “গিবিং বেক তু ইন্দিয়া” (ভারত্তা হন্না পীরকপা)দা অৱাংবা বেঞ্চমার্ক অমা শেম্নবা হায়জরি। ঐ খঙই মদুদি অদোম ময়ামগী মনুংদগী কয়া মরুম্না অদোমগী জুনিয়রশিংদা – একাদমিয়া নত্ত্রগা ইন্দস্ত্রীদা অচুম্বা লম্বী খন্নবা পাউতাক পীরি। ঙসি, মখোয়শিং অদুগী মরক্তগী কয়ানা মশাগী ভেঞ্চরশিং হৌদোকপা পাম্লি। মখোয় লৌশিং লৈরবা অমসুং মশাবু থাজজবা নহা ঙাক্তনি, মখোয়গী কন্না হোৎনবা অমসুং ইনোভেসন্না মশক অমা শেম্নবা হোৎনরি।

হৌজিক, ঐনা অদোমদা মখোয়গী হোৎনরিবশিংদা পাউতাক পীনবা পাউজেল পীজরি। ঐনা অদোমদা ঐখোয়গী নীং খা তম্বা চহি ৭৫ শুবা থৌরম অসি ঐখোয়না করম্না পাংথোকপা য়াবগে হায়বদুগী মতাংদা অদোমগী ৱাখল্লোন অমসুং সজেসনশিং অদু শিয়র তৌবীনবগীদমক্তসু হায়জরি। অদোম্না অদোমগী ৱাখল্লোনশিং অদু মাই গোবতা শিয়র তৌবীরকপা য়াগনি নত্ত্রগা অদোম্না মদু নরেন্দ্র মোদী এপ্তা হকথেংননা শিয়র তৌবীরকপসু য়াগনি।

মরূপশিং,

ঙসিগী ঐখোয়গী থবক্না ঐখোয়গী হয়েংগী মালেম অসিগী মশক শেমগদৌরিবনি। কোবিদ-১৯গী মতুংগী থৌরাংদা চাউরাক্না লম পুম্নমক্তা রি-লর্নিং, রি-থিঙ্কিং, রি-ইনোবেতিং অমসুং পি-ইনভেন্তিং তৌগনি। ঐখোয়না মসিসু উরি মদুদি করম্না ইন্দস্ত্রী অমসুং মহৈ-মশিংগী মরক্তা শরুক য়ামিন্নবগী মরমদগী লাইচৎ মনুং অসিদা ইনোভেসন ময়াম অমা থোরক্লি। ঙসি মালেম অসিবু অনৌবা ফিভমদা থম্নবগীদমক্তা চুনবা পাম্বৈশিং মথৌ তারি অমসুং মসিদা ৱারী শাননবগীদমক অদোম ময়ামদগী হেন্না ফবা কনা ওইগনি? ঙসি মশিং য়াম্লবা আই.আই.তি.গী এলুমনী মালেমগী মকোক ওইবা থাক্তা য়াওরি। অদোমগী অচেৎপা নেতৱর্ক ইন্দস্ত্রী, মহৈ-মশিং, কলা অমসুং সরকার ফাওবদা শন্দোক্লি। অদোম প্রাক্তিকেল ওইনা মীওইবগী থবক-থৌরম অমসুং থোইদোক-হেন্দোকপগী লম পুম্নমক্তা য়াওরি। ঐ ইশামক নুংতিগী নত্ত্রবসু চয়োল খুদিংগী অদোম ময়ামগী কাংলুপকী মীওই অম-অনিগা ৱারী শানজৈ। ঐনা অদোম ময়ামদা ন্যু ৱর্ল্দ তেক ওর্দরদা পাম্বৈ পুথোক্নবা মরৈ য়েৎননবা, ৱারী-ৱাতাই তৌনবা অমসুং তেংবাং পীননবা হায়জরি। থৌদাং অসি চাউই, অদুবু খঙই অদোমগী লেঙবান অদু মতিক চারে হায়বা।

মসিগা লোইননা, ঐনা অদোমদা চহি অসিগী কনফরেন্স অসিগীদমক্তা য়াইফ-পাউজেল পীজরি, মসিগী থিম অসি চুম্মি – “ফিচর ইজ নাউ/তুংচৎ অসি হৌজিক্নি”। তশেংনমক চুম্লবনি।

য়াইফবা ওইয়ু।

অমসুং থাগৎচরি।

***