হর হর মহাদেব!

কাশীগী ঐগী নুংশিরবা ইচিন-ইনাও, ইচে-ইচলশিং,

অদোম পুম্নমকপু খুরুমজরি!

মরুওইনা রাজাতালাব, মির্জামুরাদ, কছৱা, কপসেথী, রোহনিয়া, সেবাপুরী লমদমগী অন্নদেবতা লোগনবু খুরুমজরি!

অদোম পুম্নমক্তা দেব দিপাবলীগী অমসুং গুরপরবগী হায়নীংঙাই লৈতনা নংঙাইবা অমদি য়াইফ-পাউজেল পীজরি!!

উত্তর প্রদেশকী মুখ্যমন্ত্রী শ্রীমান য়োগী আদিত্যনাথজী, উপ মুখ্যমন্ত্রী শ্রী কেশব প্রসাদ মৌর্য়জী, সংসদতা ঐগী খোংলোই ওইমিন্নরিবা ভাই রমেশ চন্দজী অমসুং মশিং য়াম্না তিনবীরিবা কাশীগী ঐগী নুংশিরবা ইচিল-ইনাওশিং,

দেব দিপাবলী অমসুং গুরুনানক দেবজীগী মঙাল ফংখিবা থৌরম অসিদা ঙসি কাশীনা অনৌবা ইনফ্রাস্ত্রকচরগী অতোপ্পা খুদোল অমগা ফংলি। মসিগী কান্নবা কাশীগা লোইননা প্রয়াগরাজগী মীয়ামসু ফংগনি। অদোম ময়ামদা হন্না হন্না নুংঙাইবা ফোংদোকচরি।

ঐহাক নীংশিংলি, হৌখিবা কুমজা ২০১৩দা ঐগী অহানবা মীয়ামগী মীফম অদু লম্পাক অসিদা পাংথোকখি অমসুং মতম অদুদা মফম অসিদা চৎলিবা লম্বী অসি ৪ লেনগী ওইরম্মি। ঙসি বাবা বিশ্নাথকী থৌজান্দগী, হাইৱে অসি লেন ৬কী ওইরে। হান্না হন্দিয়াদগী রাজাতালাবতা চৎথোক চৎশিন তৌরম্বা মীয়াম্না খঙই মদুদি হাইৱে অসিদা কয়াদা খুদোংচাদবা ওইরম্বগে হায়বদো। মফম খুদিংদা জাম, য়াম্না তপ্পা ত্রাফিক, দিল্লী অমসুং অতোপ্পা শহরশিংদগী মীয়াম্না চৎথোক-চৎশিন তৌনখিবশিং অদুসু লম্বী অসিদা লাকপদা অৱাবা ওইনরম্মি। কি.মি. ৭০দগী হেন্না শাংবা খোংচৎ অদু হৌজিক নুংঙাইনা চৎলগনি, খোংজেল য়াংনা চৎলগনি। হাইৱে অসি পাকথোকহনবদগী কাশী অমসুং প্রয়াগকী মরক্তা চৎথোক-চৎশিন তৌনবা হৌজিক হেন্না লাইরগনি। কাম্বরা চৎপা মতমদা কাম্বরিয়ানা অমসুং মফম অসিগী মীয়াম্না অৱাবা মায়োক্নরম্বশিং অদু লোইশিল্লগনি। মসিদা নত্তনা, মসিগী কান্নবা কুম্ভগী মতমদসু ফংলগনি।

ইচিল-ইনাওশা,

লাইনীংগা মরী লৈনবা মফম্বু ওইরো নত্ত্রগা করিগুম্বা অখন্ন্বা থবক অমবু ওইরো, মীয়াম্না মফম অমা হেক্তদা চৎথোক-চৎশিন তৌবদা হান্না কয়াম খুদোং চাগদগে হায়বদু য়েংনৈ। অসিগুম্বা মখলগী খুদোংচাবশিং ইরমদমগী-মীরমগী, মখল খুদিংগী তুরিস্তশিং অমসুং লাইনীংবশিংবুসু পুক্নীং থৌগৎলি। হৌখিবা চহিশিংদা কাশীবু ফজহনবগা লোইননা মফম অসিগী কনেক্তিবিতীদা থবক তৌরিবা অসিগী কান্নবা, অদোম ময়াম্না উবীরি। অনৌবা হাইৱেবু ওইরো, থোং-ফ্লাইওবরবু ওইরো, ত্রেফিক জাম হন্তহন্নবগীদমক্তা লম্বী পাকথোকহনববু ওইরো, হৌজিক বনারস অমসুং মসিগী অকোইবদা তৌরিবা থবক অসিগুম্না নীং খা তম্লবা মতুংদা অমুক্তা তৌখিদ্রি। বনারসকী মনাই অমা ওইনা, ঐনা বানারসকী মীয়ামগী অৱাবা হন্থহনবা, মখোয়গী পুন্সি হেন্না লাইথোকহনবা অসি হোৎনরি। হৌখিবা চহি ৬তা বনারস্তা লুপা করোর লিশিং কয়াগী প্রোজেক্তশিং খোংজেল য়াংনা মপুং ফাহনখ্রে অমসুং প্রোজেক্ত কয়ামরুমগী থবক পায়খৎলি। এয়রপোর্তকা শহরগা শম্নহনবা লম্বী ঙসি বনারস্তা চাউখৎ-থৌরাংগী থবক্কী শক্তাক ওইখ্রে। রেলৱে স্তেসনগী কনেক্তিবিতীসু হেন্না ফগৎলে। মফম অসিদগী খজিক্তং লাপ্পা মফমদা হিহ্গ রোদ ফেজ-২গীসু থবক খোংজেল য়াংনা পায়খৎলি। মসি মপুং ফারকপদা সুল্তানপুর অমসুং গাজীপুরদগী চৎথোক-চৎশিন তৌগদবা অরুম্বা গারীশিং শহরদা এন্ত্রী তৌরমদনা, চুমদ্রিং সিক্স লেন হাইৱেদগী চৎখিবা য়ারগনি।

ইচিল-ইনাওশিং,

অফবা লম্বী, অফভা রেল লম্বী, অফবা অমসুং অহোংবা এরোপ্লেনগী খুদোংচাবশিং, মখোয় অসি খুন্নাইগী কাংলুপ খুদিংমক্তা খুদোংচাবা ফংহল্লি। মরুওইনা লাইরবশিংদা, অপীকপা ওন্ত্রপ্রিনরশিংদা, ময়াওই ওইবা কাংলুপকী মীওইশিংদা মসিগী খ্বাইদগী কান্নবা ফংই। শেমগৎ-সাগৎপগী থবক পায়খৎলকপা মতমদা মীওই কয়ামরুমদা থবক ফংহল্লি। প্রোজেক্ত অসি লোইদুনা শেম-শারকপা মতমদা মতমসু কল্লি, চাদিংসু হন্থহল্লি অমসুং অৱাবসু হন্থহল্লি। কোরোনাগী মতম অসিদসু শিন্মী মরূপশিংগীদমক্তা থবক পীবগী য়াম্না চাউবা পাম্বৈ ইনফ্রাস্ত্রকচরগী পাম্বৈ অসিনা ওইরি।

ইচিল-ইনাওশিং,

ঐহাক নুংঙাইবা ফাওই মদুদি উত্তর প্রদেশতা য়োগীজী অমসুং মহাক্কী তীম্না সরকার শেম্লবা মতুংদা মফম অসিদসু ইনফ্রাস্ত্রকচর শেমগৎপদা অমক্তা ওইখিদ্রিবা খোংজেল পুরকখি। অহানবদা উত্তর প্রদেশকী ইনফ্রাস্ত্রকচরকী ফিভম করি ওইরম্মি, মসি অদোম তশেংনা খঙবীরিবনি। ঙসি উত্তর প্রদেশকী শক্তাক এক্সপ্রেস প্রদেশ ওইনা মপাঙ্গল কল্লি। য়ু.পি.দা কনেক্তিবিতীগী করোর লিশিং কয়াগী প্রোজেক্ত ৫ অমুক্তদা থবক পায়খৎলি। ঙসি পর্বাঞ্চলবু ওইরো, বুন্দেলখন্দবু ওইরো, নোংচুপ থংবা উত্তর প্রদেশপু ওইরো, কাচিন খুদিংমক এক্সপ্রেসৱেগা শম্নগদৌরি। লৈবাক অসিগী অচৌবা অমসুং অনৌবা দিফেন্স কোরিদোর ২গী মনুংদগী অমা উত্তর প্রদেশতা শারি।

ইচিল-ইনাওশিং,

লম্বী খক্তা নত্ত্না, এয়র কনেক্তিবিতীবুসু শেমদোকপগী তবক পায়খৎলি। চহি ৩-৪গী মমাং ফাওভদা য়ু.পি.দা শুপ্নগী অচৌবা এয়রপোর্ত ২ খক্তমক নীংতিজনা মথৌ পাংথোক্লম্মি। ঙসি চাউরাক্না এয়রপোর্ত দর্জন্দগী হেন্না য়ু.পি.দা সর্বিস তৌনবা শেম শাবগী থবক পায়খৎলি। মফম অসিদা বারানসী এয়রপোর্ত চাউথোকহবগী থবক চৎথরি। প্রয়াগরাজদা এয়রপোর্ত তর্মিনেল খোংজেল অদুক্কী য়াংনা শাবনা মরম ওইদুনা, মসিনা অনৌবা রিকোর্দ অমসু থমখ্রে। মসিদা নত্তনা কুশীনগরগী এয়রপোর্তসু ইন্ত্রনেস্নেল এয়রপোর্ত ওইনা শেমগৎলি। নোয়দাগী জেবরদা ইন্তর্নেস্নেল গ্রীনফিল্দ এয়রপোর্তসু খোংজেল য়াংনা থবক পায়খৎলি।

মরূপশা,

মফমম অমদা অনৌবা কনেক্তিবিতী পাকথোক চাউথোকহনবা মতমদা, মদুগী কান্নবা ঐখোয়গী লৌমীশিংনা ফংই। হৌখিবা চহি কয়াদা খুঙ্গংশিংদা অনৌবা লম্বীশিংগা লোইননা স্তোরেজ, কোল্দ স্তোরেজ থম্নবা থৌরাং তৌদুনা লাক্লি। মসিগীদমক্তা লুপা লাখ ১গী ফন্দসু শেমখ্রে। চহি অসিদা লৈবাক্কী পুৱারীদা অহানবা ওইনা অচৎপা কোল্দ স্তোরেজ হায়বদি কিসান রেল হৌদোকখ্রে। হোৎনবশিং অসিদগী লৌমীশিংনা অনৌবা কৈথেল ফংলি, অচৌবা শহরশিং ফাওবা মখোয়না য়ৌশিনবা হেনগৎলক্লি অমসুং মসিগী হকথেংনবা শাফু মখোয়গী ইনকমদসু পীররি।

মরূপশা,

বারানসী য়াওনা পুর্বাঞ্চলদা হেন্না ফবা ইনপ্রাস্ত্রকচর শেম-শারি, মসিগী য়াম্না কান্নবা লমদম অপুনবা অসিদা ফংলি। বারানসীদা পেরিশেবল কার্গো শেমখিবনা মরম ওইদুনা হৌজিক মফম অসিগী লৌমীশিংনা উহৈ অমসুং মনা-মশিংবু স্তোর তৌদুনা থম্বা অমসুং মদুবু ইরাই লাইনা য়োনবগী য়াম্না চাউবা খুদোংচাবা অমা ফংলে। মসিগী স্তোরেজ কেপাসিতীগী মরম্না অহানবা ওইনা মফম অসিগী লৌমীশিংগী পোৎথোকশিং মশিং য়াম্না মীরমদা থাবা ঙম্লে। ঙসি বনারসকী লংগরা অমসুং বনারসকী দশহরী হৈনৌ লন্দন অমসুং মিদল ইস্ততা মখোয়গী হৈনম শন্দোক্লি। হৌজিক বনারসকী হৈনৌগী দিমান্দ মীরমদসু লেপ্তনা হেনগৎলক্লি। হোজিক মফম অসিদা পেকেজিংগী খুদোংচাবা শেম্লে, মসিনা মরম ওইদুনা পেকিংগীদমক্তা অতোপ্পা অচৌবা শহরশিংদা চৎপগী মথৌ তাররোই। হৈনৌদা নত্তনা চহি অসিদা মফম অসিগী অতেকপা মনা-মশিংসু দুবাই অমসুং লন্দন য়ৌখ্রে। এক্সপোর্ত অসি নোংথক্কী লমবীদা পাংথোকখি। হায়বদি হেন্না ফবা এয়র সর্বিসকী কান্নবা মফম অসিগী অপীক অপীকপা লৌমীশিংনা ফংলি। গঙ্গাজীদা লৈবাক অসিগী অহানবা ইনলেন্দ ৱাতরৱে লৈরে, মসি লৌমীশিংগী পোৎথোক ত্রান্সপোর্ত অদুক্কী মতিক হেন্না করম্না তৌনবা হায়বসিদসু থবক পায়খৎলি।

মরূপশা,

সরকাগী হোৎনবা অমসুং অনৌবা ইনফ্রাস্ত্রকচরদগী লৌমীশিংনা কান্নবা কয়াম্না ফংবগে হায়বদুগী খুদম চন্দৌলীগী অমুবা চেং-ব্লেক রাইসনা ওইরি। চেং অসিনা চন্দৌলীগী লৌমীশিংগী য়ুমথোংদা ৱাৎত-পাদবা পুদুনা লাক্লি। চন্দৌলীগী লৌমীশিংগী ইনকম হেনগৎহন্নবা চহি ২গী মমাংদা চেংগী ভেরাইতী অমা মসিদা শিজিন্নখি। হৌখিবা চহিদা খরীফকী পন্থাদা চাউরাক্না লৌমী ৪০০রোমদা চেং অসি থানবা পীখি। লৌমীশিং অদুগী কমিতী অমা শেমখি, মসিগীদমক্তা কৈথেল থিখি। মফম অসিদা অচম্বা চেং কিলোদা লুপা ৩৫-৪০গী চাংদা য়োল্লি, মফমদুদা হেন্না ফবা চেং কিলোদা লুপা ৩০০দা য়োল্লি। ব্লেক রাইসসু মীরমগী কৈথেল ফংখিবা অসি য়াম্না চাউবা ৱাফম্নি। অহানবা ওইনা ওস্ত্রেলিয়াদা চেং অসি থাদোকখ্রে, মদুসু চাউরাক্না কিলোদা লুপা ৮০০গী চাংদা য়োল্লি। হায়বদি ফৌগী এম.এস.পি. লুপা ১৮০০নি অদুগা চেং অমুবনা ক্বিন্তন অমদা লুপা লিশিং ৮ মখাইদা য়োল্লি। ঐঙোন্দা তমকি মদুদি মায় পাকপা অসিবু য়েংলদুনা হন্দক্কী পন্থা অসিদা লৌমী ইমুং লিশিং ১০০০না চেং অমুবা থারি।

ইচিল-ইনাওশিং,

লৌমীশিংদা  অনৌবা খুোদোংচাবশিং পীবা, অপীকপা লৌমীশিংবু পনশিন্দুনা মখোয়বু অচৌবা পাঙ্ল ওইহনবা, লৌমীশিংগী ইনকম হেনগৎহন্নবা লেপ্তনা হোৎনরি। হৌখিবা চহিশিংদা ফসল বিমা ওইরো ইথৈ-লৌখোং, মরু ওইরো নত্ত্রগা কৈথেল, থাক খুদিংমক্তা থবক পায়খৎলি। প্রধন মন্ত্রী ফসল বিমা য়োজনাদগী চাউরাক্না লৌমী ইমুং করোর ৪রোমদা মতেং পীরি। প্রধন মন্ত্রী ফসল বিমা য়োজনাদগী চাউরাক্না লম হেক্তর লাখ ৪৭লোম মাইক্রে ইরিগেসনগী মনুংদা য়াওখ্রে। চাউরাক্না লুপা করোর লিশিং ৭৭রোমগী ইরিগেসন প্রোজেক্তশিংদা খোংজেল য়াংনা থবক পায়খৎলি।

মরূপশা,

অনৌবা লৌউ-শিংউগী রিফোর্মশিংনা লৌমীশিংদা অনৌবা ওপ্সন অমসুং অনৌবা কাংলোনগী ওইবা ঙাক-শেল পীরি। মমাংদদি মন্দীগী মপান্দা তৌখিবা পীথোক-পিশিন কাংলোন্না য়াদবা ওইরম্মি। লৌমীশিংনা হৌজিক অনৌবা ওপ্সনসু ফংলে অমসুং মীনম-শোরিদগী কাংলোনগী ওইবা ঙাক-শেলসু ফংলে। লৌমীশিংদা প্রোজেক্তশিংগা লোইননা অনৌবা ওপ্সন পীবনা ঐখোয়গী লৌউ-শিংউগী লমদা মসক হোংদোকপা ঙমগনি। সরকারগী মায়কৈদগী প্রোজেক্তশিং, লৌমীশিংগী ওপ্সন অমসুং অনিমক পুন্না চৎমিন্নরবতদা লৈবাক অসিগী মশক্তা অহোংবা পুরকপা ওইরকই।

মরূপশা,

সরকারশিংনা পোলিসীশিং শেম্মি, কাংলোনশিং শেম্মি। পোলিসী অমসুং কাংলোনশিংদা ঙাক্লৌসু ফংলবদি ৱাহং খরা হংলকপা অসি মসানা তাবনি। মসি দেমোক্রেসীগী শরুক্নি অমসুং ভারত্তা মসি চৎনবী ওইদুনা লাক্লি। অদুবু হৌখিবা মতম খরদগী তোঙানবা ত্রেন্দ অমা লৈবাক অসিদা উবা ফংলি। অহানবদদি সরকারগী ৱারেপ অমা হেক্তা কনাগুম্বনা পাম্দবা লৈরবদি মদুগী মায়োক্তা লেপ্নরম্মি। অদিবু হৌখিবা নুমিৎ খরনিদগী ঐখোয়না উরি মদুদি হৌজিক য়ানীংদবগী য়ুম্ফম অদু ৱারেপ্তা নত্তবদা চিংনবদা ওইরি। লান্না শন্দোক্লি মদুদি ৱারেপ্পুদি ফরে অদুবু মসিদগী মখা তারকপদা অসুম্না তৌবা য়াই। হৌজিক ওইদ্রিবা, কৈদৌঙৈদসু ওইররোইদবা অদুগী মতাংদা খুন্নাইদা উৎ চাইরি। লৌউ-শিংউগী রিফোর্মশিংগী মতাংদসু মসুম্না তৌরি। মখোয় অসি চহি তরাগী খুজিং কয়া লৌমীশিংদা মীনমদুনা লাক্লবা ঙাক্তনি। হৌজিক এম.এস.পি.দি লাওথোকখ্রে অদুবু এম.এস.পি.দা লৈবদি অদুক্কী মতিক য়ামখিদে। চহি কয়া এম.এস.পি.গী মিংদা নমথাক তৌখি। লৌমীশিংগী মিংদা অচৌ-অচৌবা শেন্দোল কোকপীনবগী পেকেজ লাওথোকখি। অদুবু অপীকপা অমসুং ঙমখৈ নাইবা লৌমীশিংদদি মসি খক য়ৌখিদে। হায়বদি লোন কোকপীবগী মিংদা নমথাক তৌবীখি। লৌমীশিংগী মিংদা অচৌ-অচৌবা স্কিমশিং লাওথোকখি। অদুবু মখোয় মশানা খঙজখি মদুদি লুপা ১গী মনুংদগী শুপ্নগী পৈসা ১৫খক্তমক লৌমীশিংদা য়ৌখি। হায়বদি স্কিমগী মিংদা নমথাক।  

মরূপশা,

হৌজিক পুৱারীনা নমথাক তৌরিবা অসিদা, ৱাফম ২ অসি মশানা তাবনি। অহানবদা লৌমীশিংনা করিগুম্বা সরকারগী ৱাফমদা কয়ারক চিংনবা লৈরবদি মদুগী মরুমদা চহি তরাগী খুজিং কয়াগী পুৱারী য়াওরবনি।  অনিশুবদা মখোয়না ৱাশক থুগাইখিবা, মীনমখিবা, মখোয়গীদমক্তা মীনম্বা শন্দোকপা অসি তঙাইফদবা ওইখ্রে মরমদি হান্ননা ওইরম্বা অদু হৌজিকসু ওইগদৌরিবনি। সরকার অসিগী ত্রেক রিকোর্দ য়েংলগদি অচুম্বা অদু মথন্তা চোংথোকচরক্কনি। ঐখোয়না হায়খি মদুদি ঐখোয় য়ুরিয়া লোন্না য়োন্থোকপা থিংগনি অমসুং লৌমীশিংদা য়ুরিয়া মতিক চানা পীগনি। হৌখিবা চহি ৬তা য়ুরিয়াগী অৱাৎপা লৈহন্দ্রে। লোকদাউন ফাওবদসু, থবক-থৌরম ময়াম লেপ্নখিবা মতম অদুদসু অৱাবা অমত্তা লৈহনখিদে। ঐখোয়না ৱাশকখি মদুদি স্বামিনাথন আয়োগকী রিকোমেন্দেসনগী মতুং ইন্না অচংবা মমলগী এম.এস.পি. শরুক অমা মখাই পীগনি। ৱাশক অসি চেদতা মপুং ফাহনবা নত্তনা লৌমীশিংগী বেঙ্ককী একাউন্ত ফাওবা য়ৌহনখ্রে।

মরূপশা,

শুপ্নগী হৱাইগী মতাংদা হায়রবসু ২০১৪গী মমাংগী চহি 5দা চাউরাক্না করোর ৬ মখাইগী হৱাই লৌমীশিংদগী লৈখি। অদুবু মসিগী মতুংদা চহি ৫দা ঐখোয়না চাউরাক্না লুপা করোর লিশিং ৪৯গী হৱাই লৈখ্রে হায়বদি চাউরাক্না শরুক ৭৫ হেনগৎখি। ২০১৪গী মমাংগী চহি ৫দা গেহু লৈবদা লুপা করোর লাখ অমা মখাইগী ময়াদা লৌমীশিংনা ফংখি। মদুমক ঐখোয়গী চহি মঙাদা লুপা করোর লাখ ৩গী গেহু হায়বদি চাউরাক্না শরুক ২ লৌমীশিংনা ফংখি। হৌজিক অদোম্ন হায়বীয়ু মদুদি মন্দীশিং অমসুং এম.এস.পি. লৌথোক্কে হায়রবদি, মদুগী থৌনা হাপ্নবা, মদুদা করিগী ইনভেস্ত অদুক তৌরুদগে? ঐখোয়গী সরকারদি মন্দীশিংবু নৌথোকহন্নবগীদমক লুপা করোর কয়া চাদিং তৌরি।

ইচিল-ইনাওশিং,

অদোম্না নীংশিংবীগদবনি, মখোয়শিং অসিনি পি.এম. কিসান সম্মান নিধিগী মতাংদা ৱাহং হংখিবশিংদু। মখোয়না তোকঙা শোন্দোক্লি মদুদি মীখলদা মখোয়না পৈশা য়েল্লি অমসুং মীখলগী মতুংদা পৈশা অদু শেন্দোই য়াওনা হন্না শিংবা তাই। রাজ্য অমদদি মফম অদুগী সরকার, মখোয়গী পোলিতিকেলগী কান্নবা লৌনবগীদমক ঙসিসু লৌমীশিংবু স্কিম অসিগী কান্নবা লৌহন্দ্রি। লৈবাক্কী লৌমী ইমুং করোর 10দগী হেনবগী বেঙ্ক একাউন্ততা হকথেংননা মতেং পাংলি। হৌজিক ফাওবদা চাউরাক্না লুপা করোর 1 লৌমীশিংদা য়ৌহনখ্রে।  

মরূপশা,

ঐখোয়না ৱাশকখি মদুদি লৌমীশিংগীদমক্তা পেন্সন স্কিম হৌদোক্কনি। ঙসি পি.এম. কিসান মানধন য়োজনা চৎনরে অমসুং য়াম্না তেনবা মতমগী মনুংদা লৌমী ইমুং লাখ ২১না মসিদা য়াওখ্রে।

ইচিল-ইনাওশিং,

ৱাশকশিং মপুং ফাহনবগী ত্রেক রিকোর্দকী মতেংনা লৌমীশিংগী কান্ননবা অনৌবা লৌউ-শিংউগী রিফোর্মশিং পাইখৎলি। লৌমীশিংদা অচুম্বা ৱায়েল ফংহন্নবা, মসিনা কয়াম্না কান্নরিবা অসি ঐখোয়না নুংতিগী উবা ফংগনি, ঐখোয়না থেংনগনি অমসুং ঐনা থাজৈ মদুদি মীদিয়াদসু মসিগী কান্নবা ৱারী-ৱাতাই তৌগনি অমসুং ঐখোয়না উবসু ফংগনি। ঐনা ফাওই মদুদি চহি তরাগী খুজিং কয়াগী লৌনম অসিনা লৌমীশিংদা চিংনবা পোকহল্লি। হৌজিক লৌনম-শোরিনা নত্তবদা গঙ্গাগী ঈশিংগুম্না শেংলবা পান্দমগা লোইননা থবক তৌরি।

ইচিল-ইনাওশিং,

চিংনবগী য়ুম্ফমদা অরানবা শন্দোক্লিবশিংগী অচুম্বা লেপ্তনা লৈবাক্কী মাংদা চোংথোরক্লি। হিরম অমদা মখোয়গী মীনম্বশিং লৌমীশিংনা খঙলকপদা অতোপ্পা হিরমদা মীনম্বা শন্দোকপা হৌরকই। ২৪/৭ মখোয়গী থবক্তি মসিনি। হৌজিকসু চিংনরিবা, ৱাহং হংনীংলিবা লৌমী ইমুং-মনুংগী পাউখুমসু সরকারনা লেপ্তনা পীরি। ঐনা থাজৈ, ঙসি লৌউ-শিংউগী রিফোর্মদা চিংনবা লৈরিবা লৌমীশিংসু তুংলমচৎতা লৌউ-শিংউগী রিফোর্মশিং অসিগী কান্নবা লৌদুনা, মখোয়গী ইনকম হেনগৎহনগনি।

অরোইবদা ঐনা অমুক্কা হন্না, অদোম ময়ামদা অনৌবা হাইৱে অসিগীদমক্তা হন্না হন্না নুংঙাইবা ফোংদোকচরি। কাশীগী মশক-মতৌ অসুম্না লেংদনা লৈনবা, ঐখোয়না মখা তানা হোৎনখিগনি। হৌজিক ঐগী বনারস্তা থৌরম ময়াম অমসু লৈরি, মদুদসু হিরম কয়াদা পাক শন্না ৱারী শাজগনি। কোরোনানা মরম ওইদুনা হন্দক্তি ঐহাক লাকপদা অপনবা খরা ওইরে ঙসি অদোম্বু উজবা ফংজরে, ঐঙোন্দা অনৌবা থৌনা অমা ফংজরে। অদোমগী থৌজাল ফংজরে, থবক তৌনবগী অনৌবা থৌনা ফংজরে। অদোম্না মশিং য়াম্না লেংবীরক্তুনা থৌজান পীনবীরি, মসি ঐগী পাঙ্গলনি, ঐগীদমক্তদি মসি থৌজালনি। ঐহাক অদোমগী লমন তোনশিঞ্জরে। ঐগা লোইননা খুত্তুম অনিমক তাশিনবীদুনা হায়বীয়ু ভারত ইমানা য়াইফরে।

হন্না হন্না থাগৎচরি!

*****