খুরুমজরি!

কেন্দ্রগী মন্ত্রীমন্দলদা ঐগী অহল ওইরবা খোংলোই অমসুং লখনৌদগী এম.পি. শ্রীমান রাজনাথ সিংহজী, উত্তর প্রদেশকী মুখ্যমন্ত্রী শ্রীমান য়োগী আদিত্যনাথজী, উপ মুখ্যমন্ত্রী দাক্তর দিনেশ শর্মজী, হায়র এজুকেসনগী রাজ্য মন্ত্রী শ্রীমতী নীলিমা কতিয়ারজী, য়ু.পি. সরকারগী অতৈ মন্ত্রী পুম্নমক, লখনৌ য়ুনিভর্সিতীগী ভাইস চাঞ্ছেল্লর শ্রী আলোক কুমার রায়জী, য়ুনিভর্সিতী অসিগী ওজাশিং অমসুং মহৈরোইশিং, ইবুংঙো অমদি ইবেম্মশিং,

লখনৌ য়ুনিভর্সিতীগী ইমুং মনুংবু চহি চাম্মা মপুং ফারকপা অসিদা হায়নীংঙাই লৈতনা নুংঙাইবা ফোংদোকচরি! চহি চাম্মগী মতম অসি মশিং অদুখক্তা নত্তে। মসিগী লোইননা মশিং লাকঙমদ্রবা মায় পাকপশিংগী অহিংবা পুৱারী অমা য়াওরিবনি। ঐহাক নুংঙাইবা ফাওই মদুদি চহি চাম্মা অসিগী নীংশিংবদা নীংশিং পোস্তেল স্তাম্প অমা, নীংশিং শেলয়েক অমা অমসুং কভর অমবু ফোংদোকচনবগী তাঞ্জা ঐনা ফংজরে।

মরূপশা,

ঐঙোন্দা হায়বীখি মদুদি মপানগী গেৎ নম্বর – ১গী মনাক্তা হৌরিবা খোংনাং পাম্বী অসি, য়ুনিভর্সিতী অসিগী চহি ১০০ চুপ্না চৎথরকপা খোংচৎকী মরুওইবা খুদম্নি। উপাল অসিনা, য়ুনিভর্সিতীগী হিঙ্গোলদা লৈবাক অমসুং মালেমগীদমক্তা হৈথোই-শিংথোইবা কয়া মহাক্কী মমাংদা ওইরকপা, ফাওগৎলকপা উখ্রে। চহি ১০০গী খোংচৎ অসিদা মফম অসিদগী থোরকখিবা মীশক্না রাস্ত্রপতিগী ফম পায়খ্রে, রাজ্যপাল ওইখ্রে। সাইন্সকী লমদবু ওইরো নত্ত্রগা লোগী মরমদবু ওইরো, রাজনীতি ওইরো নত্ত্রগা এদমিনিস্ত্রেতর, মহৈ-মশিং ওইরো নত্ত্রগা সাহিত্য, চৎনবী-নাৎপু ওইরো নত্ত্রগা শান্ন-খোৎনবা, লম খুদিংমক্কী হৈথোই-শিংথোইবশিংবু লখৌ য়ুনিভর্সিতীনা ইৎখি, লৈতেংখি। য়ুনিভর্সিতী অসিগী আর্সত ক্বাদ্রেঙ্গল অসি মশানা পুৱারী ময়াম অমা কোনশিল্লি। আর্সত ক্বাদ্রেঙ্গল অসিদা নেতাজী সুভাশ চন্দ্র বোশকী খোঞ্জেল নিলহৌরি অমসুং থৌনা ফবগী ৱাহৈদা হায়খি – “ভারতকী মীয়ামদা মখোয়গী সমবিধান শেমহল্লু নত্ত্রগা মদুগী চৈনা খাংউ” হয়েং ঐখোয় ভারতকী মীয়াম্না ঐখোয়গী সংবিধানগী নুমিৎ পাংথোকপা মতমদা নেতাজী সুভাশ বাবুগী খোংল্লাও অদুনা অনৌবা থৌনা পুদুনা লাক্লগনি।

মরূপশা

লখনৌ য়ুনিভর্সিতীগা মিং ময়াম অমগা লোইনরি, মশিং থিংঙমদ্রবা মীওইশিংগী মিং, পাম্লবসু পুম্নমক্কী মিং পনবা ওইথোক্তবনি। ঐনা ঙসিগী শেংলবা থৌরম অসিদা পুম্নমক অদুগী মফমদা খুরুমজরি। চহি চাম্মগী খোংচৎ অসিদা মীওই কয়ানা মখল কয়াগী থৌদাং য়াখি। মখোয় পুম্নমক খুরুমজবদা মতিক চারবা ঙাক্তনি। লখনৌ য়ুনিভর্সিতীগী ৱাখল মফম অসিগী ‘রোমান্তিসিজম’ অসিমক তোপ তোপ্পি। মফম অসিগী মহৈরোইশিংগী থমোইদা তেগোর লাইব্রেরীদগী হৌরগা তোঙান তোঙানবা কেন্তিনশিংগী চা-বোরা অমসুং বন-মখন্না হৌজিকসু মফম কন্দুনা লৈরি। মতম্না হোংলকপগা লোইননা ময়াম অমা হোংলে, অদুবু লখনৌ য়ুনিভর্সিতীগী পুক্নীং-ৱাখল লখনবী অদুম্মক ওইরি, হৌজিকসু মদুমক্নি।

মরূপশা,

মসি চান্নরুবা হায়বদুনি মদুদি ঙসি দেব প্রবোধিনী একাদশীনি। লৌনৈ, চাতুর্মাসতা লাকপদা সমস্যাশিংনা মরম ওইদুনা পুন্সি অসি লেপ্পগুম তৌনৈ। লাই ফাওবা তুম্বা চৎনখি। অমরোমদা ঙসি দেবজাগরনগী নুমিৎনি। ঐখোয়গী মফম অসিদা হায়নৈ – “য়া নিশা সর্ভুতানাং তস্যাং জাগর্তি সংয়মী” থৱাই পানবা পুম্নমক্কা লোইননা লাই ফাওবা তুমদুনা লৈখ্রবা মতমদসু সংয়মীনা মীওইবগী য়াইফ-থৌরাংগীদমক লাইনীং পরৈ চেৎতুনা লৈ। ঙসি ঐখোয়না উরি মদুদি লৈবাক অসিগী মীয়াম্না অদুক্কী মতিক খাংবা কনবগা লোইননা, কোরোনাগী লুরবা মতম অসিবু মায়োক্নরি, লৈবাক অসিবু মাংদা পুখৎলি।

মরূপশা,

লৈবাক অসিদা ইথিল পীনবীরিবা, পুক্নীং থৌগৎলিবা মীওইবশিংবু শেমগৎপা অসি অসিগুম্বা ইন্সতিত্যুৎশিং অসিদতা তৌই। লখনৌ য়ুনিভর্সিতীনা চহি তরাগী খুজিং কয়াদগী মসিগী থবক অসি নীংথিজনা পাংথোক্লি। কোরোনাগী মতম অসিদসু মফম অসিগী মহৈরোইশিংনা, তীচর্সনা মখল কয়াগী পাম্বৈ খুন্নাই অসিদা পীরি।

মরূপশা,

ঐঙোন্দা তমখি মদুদি লখনৌ য়ুনিভর্সিতীনা কোনবা মফম চাউথোকহন্নবা ৱারেপ লৌখ্রে। য়ুনিভর্সিতীনা অনৌবা রিসর্স সেন্তরশিংসু লিংখৎলে। অদুবু ঐনা মসিদা ৱাফম খরগা হাপচিনবা পাম্মি। ঐনা থাজৈ মদুদি অদোম ময়াম্না মসিবু অদোমগী খন্ন-নৈনবদা শোইদনা য়াওহনগনি। ঐনা হায়জনীংবদি অদোমগী অকাদমিক স্কোপ অসি শন্দোক্লিবা দিস্ত্রিক্ত অদু ফাওবগী কাংলুপশিং, মফম অদুগী লোকেল পোৎথোকশিংগা মরী লৈনবা কোর্সশিং, অদুগীদমক্তা মতিক চাবা স্কিল দিবেলপমেন্ত, মদুগী অমমম্তা ওইনা এনলাইসিস, ঐখোয়গী য়ুনিভর্সিতী অসিদা করিগী তৌরোইদৌরিবনো। অদুগুম্বা প্রদক্সনশিং অদুদা ভেল্যু এদিশনগীদমক্তা অনৌবা পাম্বৈশিং, অনৌবা তেক্নোলোজীদা রিসর্সসু ঐখোয়গী য়ুনিভর্সিতীনা তৌবা য়াই। মখোয়গী ব্রান্দিং, মার্কেতিং অমসুং মেনেজমেন্তকা মরী লৈনবা স্ত্রেতেজীসু অদোমগী কোর্সেজগী শরুক ওইহনবা য়াই।

মরূপশা,                                      

য়ুনিভর্সিতী অসি শুপ্নগী অৱাংবা থাক্কী মহৈ-মশিংগী মফম খক্তা নত্তে। মসি অৱাংবা পান্দম, অৱাংবা ফিরেপকী পাঙ্গল ফংননবগীসু য়ামনা চাউবা পাৱর হাউস ওইরি, য়াম্না চাউবা ইনর্জীগী মফম অমা ওইরি, ইথিল পোক্নফম অমা ওইরি। মসি ঐখোয়গী কেরেক্তর শেমগৎনবা, ঐখোয়গী নুংদা য়াওরিবা থৌনাবু য়কাইহন্নবা ইথিল পীনফম অমসুং ওইরি। য়ুনিভর্সিতীগী ওজা, চহি চহিগী, মখোয়গী মহৈরোইশিংগী ইন্তিলেকচুএল, একাদমিক অমসুং ফিজিকেল দিবেলপমেন্তপু ফোংদোকহন্নবা, মহৈরোইশিংগী মতেং পাংলি। মহৈরোইশিংনা মখোয়গী তৌবা ঙম্বশিং অদু মশক খঙজনবা হোৎনবদসু অদোম ওজাশিংগী য়াম্না চাউবা থৌদাং য়াওরি।

অদুবু মরূপশা, মতম শাংনা ঐখোয়গী অসিদা সমস্যা অসি লৈরক্লি মদুদি ঐখোয়না ঐখোয়গী তৌবা ঙম্বশিং অদু মপুং ফানা শিজিন্নবা ঙমজখিদে। সমস্যা অসিমক হান্না ঐখোয়গী গোবর্নেন্সতা, সরকারগী থবক-থৌওংদসু লৈরম্মি। তৌবা ঙম্বশিং অদু চুম্না শিজিন্নদ্রবদি করি ওইরকই হায়বসিগী খুদম অমা অদোমদা পীজগে অমসুং মদু য়ু.পি. অসিদনা হেন্না সুইতেবল ওইগনি। অদোমগী লখনৌ অসিদগী রায়বরেলী অসি য়াম্না লাপ্ত্রে, রায়বরেলীগী রেল কোচ ফেক্তরী। চহি কয়াগী মমাংদা ইনভেস্ত তৌখি, মেচিনশিং থমখি, অচৌ অচৌবা এনাউন্সমেন্স কয়া তৌখি, রোল কোচ শারগনি। অদুবু চহি কয়া ফাওবা মফম অদুদা শুপ্নগী দেন্তিং-পেন্তিংগী থবক তৌদুনা লৈখি। কপুরথলাদগী দিব্বা শেম্লগা পুরকই অমসুং মফম অদুদা খরা শিৎতোক-নান্থোক তৌবা, মচু শংদোক-শংজিন তৌবা, পোৎলম খরা হাপ্তোক-হাপচিন তৌবা, মসিখক তৌদুনা লৈখি। রেলগী কোচ শাবা ঙম্বা ফেক্তরী অদুদা, মাগী তৌবা ঙম্বা অদুগী মতুং ইন্না থবক খক তৌখিদে। কুমজা ২০১৪গী মতুংদগী ঐখোয়না ৱাখল্লোন হোংদোকখ্রে, থৌওং হোংদোক্লে। মদুগী ফল ওইনা থা খরগী মনুংদা মফম অসিদা অহানবা কোচ শাখি অমসুং ঙসি চহি খুদিংগী কোচ কয়া শাদুনা মফম অসিদগী পুথোক্লি। তৌবা ঙম্বশিং অদু করম্না শিজিন্নগনি, মদু অদোমগী নাকলদা লৈরি অমসুং মালেম্না ঙসি ৱাফম অসিদা মিৎয়েং থম্লক্লি অমসুং য়ু.পি.না ৱাফম অসিগীদমক্তা চাউথোকপা পোক্কনি মদুদি হৌজিক মতম খরগী মতুংদা মালেমগী খ্বাইদগী চাউবা, মরূপশা, অদোম্না শোইদনা চাউথোকচবা পোক্কনি, মালেমগী খ্বাইদগী চাউবা রেল কোচ ফেক্তরী, মসিগী মমিং পন্নরগদি মদু রায়বরেলীগী রেল কোচ ফেক্তরীগী ওইরগনি।

মরূপশা,

তৌবা ঙম্বশিং শিজিন্নবগা লোইননা পাঙ্গল অমসুং ফিরেপ লৈবসু অদুক্কী মতিক মথৌ তাই। পুক্নীংগী অপাম্বা লৈত্রবদি অদোম্না পুন্সিদা অচুম্বা ৱারেপ লৌবা ঙম্লোই। পুক্নীংগী অপাম্বদগী করম্না অহোংবা পুরকপগে হায়বদুগী খুদম, লৈবাক্কী মাংদা খুদম কয়ামরুম লৈরি, ঐ ঙসি অদোমগী মাংদা সেক্তর অমা খক্কী মরমদা পনগে। মতম অমদা লৈবাক অসিদা য়ুরিয়াগী পোৎথোক্কী ফেক্তরী য়াম্না লৈরম্মি। অদুবু ময়াম অসি লৈজদুনসু ভারতনা য়ুরিয়া য়াম্না মপান্দগী পুশিল্লকখি, ইম্পোর্ত তৌখি। মসিগী অচৌবা মরম অমদি লৈবাক অসিগী হারগী ফেক্তরী লৈরিবশিং অসি মখোয়গী ফুল কেপাসিতীদা থবক তৌবা ঙমখিদে। সরকারদা লাক্লবা মতুংদা ঐনা ওফিসরশিংদা মসিগী মতাংদা ৱারী শাখিবদা ঐ অঙকপা পোকখি।

মরূপশা,

ঐখোয়না মথং মথং পোলিসী ওইবা ৱারেপ কয়া লৌখি, মদুগী ফল ওইনা ঙসি লৈবাক অসিদা য়ুরিয়াগী ফেক্তরীশিং মপুং ফানা থবক তৌরে। মসিদা নত্তনা অতোপ্পা সমস্যা অমসু লৈরম্মি – য়ুরিগী ব্লেক মার্কেতিং লৌমীশিংগী মিংদা তৌরম্মি অমসুং য়ৌখিবনা অতোপ্পা মফম অমদা য়ৌখি হুরানখি। মসিগী য়াম্না অমাংবা ঐখোয়গী লৈবাক্কী লৌমীশিংনা ফংবা তাখি। য়ুরিয়াগী ব্লেক মার্কেতিংগী লায়েং ঐখোয়না পাংথোকখি, করম্না তৌখি, য়ুরিদা চাম্মদা চাম্মা, ১০০% নীম কোতিং তৌখি। নীম কোতিংগী কন্সেপ্ত অসিসু কনাগুমবা মোদীনা লাক্লবা মতুংদা লাকখিবনি হায়বগী ৱা নত্তে, পুম্নমক অসি অন্নোন ওইখি, পুম্নক্না খঙখি অমসুং হান্নসু চাং খরদা নীম কোতিং তৌরম্মি। অদুবু চাং খরখক তৌবনা হুরানবা থিংবা ঙম্লমদে। অদুবু চাম্মদা চাম্মা নীম কোতিং তৌবগী মথৌ তাবা পুক্নীংগী মথৌ তাবা অদু লৈরমদে। ঙসি চাদা চাম্মা নীম কোতিং তৌরি অমসুং লৌমীশিংনা মরাং কায়না য়ুরিয়া ফংলি।

মরূপশা,

নই তেক্নোলোজী পুরক্তুনা, অরিবা অমসুং লেপ্লুরবা হারগী ফেক্তরীবু হৌজিক অমুক হন্নসু হৌহল্লে। গোরখপুর ওইরো, সিন্দরী ওইরো, বরৌনী ওইরো, হারগী ফেক্তরী পুম্নমক চহি খরগী মনুংদা অমুক হন্না হৌরগনি। মসিগীদমক্তা য়াম্না চাউবা গ্যাস পাইপলাইন নোংচুপ ভারত্তা তিংগদৌরি। হায়বদি ৱাখল্লোন্দা পোজিতিবিতী অমসুং এপ্রোচতা পোজিবিলিতীবু ঐখোয়না মতম পুম্নমক্তা হিংহন্দুনা থমগদবনি। অদোম য়েংবীয়ু, পুন্সিদা অদোম লুদগীনা লুরবা শিংনবশিংগী মায়োক্নবা মতৌ অসুম্না ঙমগনি।

মরূপশা,

চৎনবা হৌখ্রবা অনৌবা নেস্নেল এজুকেসন পোলিসী অসিগী পান্দমসু লৈবাক অসিগী নহা পুম্নমক্না মশাবু খঙবা ঙমজনবা, মখোয়গী পু্ক্নীংবু ওনবা ঙমজনবনি। ফিরেপ অসিগা লোইননা নর্সরীদগী হৌরগা পি.ঐচ.দি. ফাওবা মশক থোক্না অহোংবা পুরক্লিবনি। হোৎনরিবদি, সেল্ফ-কনফিদেন্স, ঐখোয়গী স্তুদেন্তশিংদা য়াম্না চাউবা মথৌ তাবা ওইহনবা অসিনি। সেল্ফ-কনফিদেন্স অসি মশাগীদমক্তা ৱারেপ লৌবগী নীং খা তম্বা খরা ফংলবা, ফ্লেক্সিবিলিতী খরা ফংলবা মতমদুদা লাকই। লৈবাক অসিনা নীং খা তম্বা চহি ৭৫ মপুং ফারকপা মতম অদু ফাওবদা অনৌবা এজুকেসন পোলিসী অসি পাক চাউবা মওংদা লেত্তর এন্দ স্পিরিৎতা ঐখোয়গী এজুকেসন সিস্তেমগী শরুক ওইহগনি। লাক্লো, “ৱয় রাস্ত্রে জাগৃয়াম পুরোহিৎঃ” লাওথোক্লিবা অসি থবক্তা ওন্থোক্নবগীদমক্তা মায় ওনশিল্লসি। লাকও, ঐখোয় ইমা ভারতীগী মিংচৎকীদমক্তা, ঐখোয়গী ৱাশক খুদিংমক ঐখোয়গী থবক্না মপুং ফাহল্লসি।

মরূপশা,

১৯৪৭তগী হৌরগা ২০১৪৭ ফাওবা নীং খা তম্বগী চহি ১০০ য়ৌরকপদা, ঐনা লখনৌ য়ুনিভর্সিতীদা হায়জরি মদুদি, মসিগী পোলিসী মেকরশিংদা হায়জরি মদুদি নুমিৎ মঙা নুমিৎ তরেৎ তোঙান তোঙান্না কাংলুপ শেমদুনা খন্নবীয়ু অমসুং ২০৪৭, লৈবাক অসিনা নীং খা তম্বগী চহি ১০০ পাংথোকপা মতমদা লখনৌ য়ুনিভর্সিতী কদায়দা লৈগনি, মতমদুদা লখনৌ য়ুনিভর্সিতীনা লাক্কদৌরিবা চহি ২৫দা লৈবাক অসিবু করি পীগনি, লৈবাক অসিগী করম্বা মথৌ তাবশিংবু মপুং ফাহন্নবগীদমক্তা লখনৌ য়ুনিভর্সিতীনা লুচিংগনি। অচেৎপা ফিরেপকা লোইননা, অনৌবা থৌনাগা লোইননা অদোম্না চহি চাম্মশুবগী থৌরম পাংথোকপা মতমদা, হৌখিবা নুমিৎশিংগা ৱারীশিং লাক্কদৌরিবা মতমশিংগীদমক্তা ইথিল পোক্নফম ওইহনগদবনি, লাক্কদৌরিবা মতমগীদমক্তা লম্বী ওইগদবনি অমসুং খোংজেল য়াংনা মাংদা চখৎনবগীদমক থৌনা ফংহনগদবনি।

থৌরম অসি ১০০শুবগী নীংশিং থৌরম অসিখক্তদা লৌইশিল্লোইদবনি, থৌরম অসি লাক্কদৌরিবা নীং খা তম্বগী ১০০শুবা থৌরম পাংথোরকপদা, মতমদুগী চহি ২৫গী রোদ মেপ অদুবু মপুং ফাহনবা ঙম্বা ওইবীয়ু অমসুং লখনৌ য়ুনিভর্সিতীগী মতৌদা মসি ওইহনগদবনি মদুদি ঐখোয়না ২০৪৭ ফাওবদা লৈবাক অসিগী নীং তম্বগী চহি ১০০ শুরকপদা, ঐখোয়গী য়ুনিভর্সিতী অসিনা লৈবাক অসিদা মসি পীগনি অমসুং য়ুনিভর্সিতী অমদগী চহি ২৫গী মতম লৈবাক অসিগীদমক্তা অনৌবা মতোলদা পুখৎনবগীদমক্তা কৎথোকই, ফল খরা ফংবা ঙমগদরা, ঙসি হৌখিবা চহি ১০০গী পুৱারীনা শাখি ওইরি, চহি ১০০গী লখনৌ য়ুনিভর্সিতীগী পুম্নমক্কী ওইরক্লিবা মতম, মায় পাকপশিং অদু মসিগী শাখিনি অমসুং মরম অসিনা ঙসি অদোমদা হায়জরি মদুদি অদোম্না পুক্নীংদা ২০৪৭কী ৱাশক অদুবু পুদুনা নীং খা তম্বগী চহি ১০০ ফাওবা মীওই অমগী পুন্সিদা ঐনা মসি পীগনি, য়ুনিভর্সিতী ওইনা ঐখোয়না মসি পীগনি, লৈবাকপু মাংদা পুখৎপদা মসি ঐখোয়গী থৌদাং ওইগনি হায়বসিগা লোইননা মাংদা চখৎলসি। ঐনা ঙসি অমুক্কা হন্না, মসিগী চহি চাম্মশুবগী থৌরম অসিদা য়াইফ-পাউজেল কয়া পীজরি অমসুং অদোমগী নরক্তা লাকচবগী ঐ খুদোংচাবা ফংজরি, ঐনা অদোম পুম্নমকপু হন্না হন্না তৌবীমল খঙবা উৎচরি।

থাগৎচরি!!

*****