दिल्ली-मुंबई, 23 नोव्हेंबर 2020

(कोविड-19 संबंधी पत्र सूचना कार्यालयाद्वारे जारी बातम्‍या आणि सत्‍यता पडताळणी बातम्‍या समाविष्‍ट)

पंतप्रधान नरेंद्र मोदी येत्या 25 नोव्हेंबर रोजी, लखनौ विद्यापीठाच्या शतक महोत्सवी स्थापना दिन सोहळ्याला उपस्थित राहणार आहेत. संध्याकाळी साडे पाच वाजता दूरदृश्य प्रणालीच्या माध्यमातून हा कार्यक्रम होईल. 1920 साली या विद्यापीठाची स्थापना झाली होती, आणि यंदा विद्यापीठ आपले शंभरावे वर्ष साजरे करत आहे.

आरोग्य मंत्रालयाची कोविड-19घडामोडींवरील माहिती :

भारतातील सध्याची सक्रीय रुग्णसंख्या  (4,43,486) एकूण रुग्ण संख्येच्या 4.85 टक्के असून ती 5 टक्याहून कमी राहण्यावर कायम आहे.

रुग्ण बरे होण्याचा दर 93 टक्क्यांच्यावर कायम आहे कारण आतापर्यंत एकूण रुग्णांपैकी 93.68% रुग्ण बरे झाले आहेत. गेल्या 24 तासांत देशात 41,024 नवीन रुग्ण बरे झाले असून आतापर्यंत एकूण 85,62,624 रुग्ण बरे झाले आहेत.

बरे होणारे रुग्ण आणि सक्रीय रुग्ण संख्ये मधील अंतर निरंतर वाढत आहे आणि सध्या हा आकडा 81,19,155 आहे.

गेल्या 24 तासांत 44,059 लोकांना कोविडची लागण झाली आहे.  भारतात 8 नोव्हेंबरपासून म्हणजेच मागील16 दिवसांपासून 50,000 पेक्षा कमी रुग्णांची नोंद झाली आहे. हिवाळ्याच्या सुरुवातीला अनेक पाश्चिमात्य देशांमध्ये नवीन रुग्णांच्या संख्येत मोठ्या प्रमाणात वाढ होताना दिसत आहे.

नवीन बरे झालेल्या रुग्णांपैकी 77.44% रुग्ण 10 राज्ये आणि केंद्र प्रदेशातील आहेत.

केरळमध्ये 6,227 रुग्ण बरे झाले आहेत. दिल्लीत  6,154 रुग्ण बरे झाले आहेत. महाराष्ट्रात गेल्या 24 तासात 4,060 नवीन रुग्ण बरे झाले आहेत.

केंद्रीय आरोग्य व कुटुंब कल्याण मंत्री डॉ. हर्ष वर्धन यांनी नवी दिल्ली येथे व्हिडिओ कॉन्फरन्सद्वारे बोस्टन सेंटर ऑफ एक्सलन्स फॉर हेल्थ अँड ह्युमन डेव्हलपमेंटला डिजिटलपणे संबोधित केले. सर्वांसाठी चांगले उपचार आणि उत्तम आरोग्य सेवा उपलब्ध करून देता यावी यासाठी संशोधन करण्याकरिता तज्ज्ञांना एकत्रित आणल्याबद्दल डॉ. हर्षवर्धन यांनी बोस्टन सेंटर ऑफ एक्सलन्स फॉर हेल्थ अँड ह्युमन डेव्हलपमेंटचे अभिनंदन करताना, सध्या सुरू असलेल्या महामारीची तुलना आपल्या नागरी संस्कृतीची सध्याची क्षणिक स्थिती आहे अशी केली.

इतर अपडेट्स:

• पंतप्रधान नरेंद्र मोदी यांनी आज व्हिडिओ कॉन्फरन्सद्वारे खासदारांसाठीच्या बहुमजली सदनिकांचे उद्‌घाटन केले. या सदनिका  दिल्लीतील डॉ बी डी मार्गावर आहेत. 76 सदनिका बांधण्यासाठी 80 वर्षाहून अधिक जुन्या आठ बंगल्यांचा पुनर्विकास करण्यात आला आहे.
• केंद्रीय शिक्षणमंत्री रमेश पोखरियाल ‘निशंक’ यांच्या हस्ते आज एआयसीटीई म्हणजेच अखिल भारतीय तंत्रशिक्षण परिषदे अंतर्गत येणाऱ्या उच्च शिक्षण संस्थातल्या प्राध्यापकांसाठी अटल फॅकल्टी डेव्हलपमेंट कार्यक्रमाचे उद्‌घाटन झाले. यामध्ये 46 ऑनलाइन प्रशिक्षण विकास कार्यक्रमाचे उद्‌घाटन निशंक यांच्या हस्ते आज आभासी माध्यमातून करण्यात आले. देशभरातल्या 22 राज्यांमध्ये या प्रशिक्षण कार्यक्रमाचे आयोजन करण्यात आले आहे.
• संपूर्ण देशभर कोविड-19 महामारीचा उद्रेक झालेला असला तरीही कायदेशीर सेवा प्राधिकरणाने सर्जनशीलता दाखवून काळाशी सुसंगत प्रक्रियेचा स्वीकार करून न्यायदानाचे कार्य सुरळीत पार पाडले आहे. यासाठी ई-लोक अदालत या आभासी मंचाचा वापर करण्यात आला. देशातल्या वेगवेगळ्या 15 राज्यांमध्ये जून ते ऑक्टोबर 2020 या कालावधीमध्ये 27 ई-लोक अदालत आयोजित करण्यात आले. यामध्ये 4.83 लाख प्रकरणे सुनावणीसाठी आली त्यापैकी 2.51 लाख खटल्यांवर निकाल देण्यात आला.
• भारतीय हवाई प्राधिकरणातर्फे आजपासून 27 नोव्हेंबरपर्यंत हवाई सुरक्षा जागृती सप्ताह पाळला जात आहे. या साप्ताहिक जनजागृती कार्यक्रमादरम्यान देशभरातील सर्व विमानतळे आणि प्राधिकरणाच्या अखत्यारीतील हवाई दिशादर्शक सेवा केंद्रांवर (ANS) विविध कार्यक्रम आयोजित केले जाणार आहेत.
• ट्राइब्स इंडिया आपल्या उत्पादनांना अधिकाधिक  आकर्षक बनवून आपल्या ग्राहकांपर्यंत पोहोचवत आहे आणि त्यासोबतच लाखो आदिवासी उपक्रमांना मोठी बाजारपेठ मिळवून देण्यात मदत करत आहे. हेच उद्दिष्ट समोर ठेऊन गेल्या महिन्याभरात, ट्राइब्स इंडियाने बरीच नवीन उत्पादने (मुख्यत: प्रतिकारशक्ती वाढविणारी तसेच वन आणि सेंद्रिय उत्पादने) बाजारपेठेत आणली आहेत.

महाराष्ट्र अपडेट्स :

कोविड -19 च्या दुसऱ्या लाटेची त्सुनामीशी तुलना करता महाराष्ट्राचे मुख्यमंत्री उद्धव ठाकरे यांनी जागतिक महामारीच्या विरोधातील लढाईत राज्यातील जनतेने निर्धास्त राहू नये, असे आवाहन केले आहे. लोकांनी कोणत्याही प्रकारचा हलगर्जीपणा दाखवू नये आणि मास्क घालणे, शारीरिक अंतर राखणे आणि वारंवार हात धुणे या आरोग्यविषयक उपायांचे पालन करणे सुरू ठेवले पाहिजे असे त्यांनी सांगितले. रुग्णांच्या संख्येत घट कायम असताना आता पुन्हा एकदा रुग्णसंख्या वाढत असल्याचे दिसून येत आहे.

RT/ST/PM

सोशल मिडियावर आम्हाला फॉलो करा: @PIBMumbai    /PIBMumbai    /pibmumbai  pibmumbai[at]gmail[dot]com