ভারতনা কোবিদ-১৯ লান্থেংদা তোঙান-তোঙানবা মশক থোকপা মায় পাকপা কয়া ফংবা ঙমখ্রে। অনৌবা কনফার্ম্দ কেস মশিং অসি হৌখিবা পুং ২৪ অসিদা থা অহুমগী মনুংদা ইহান হানবা ওইনা ৩৬,৫০০ (৩৬,৪৭০)গী মখাদা লৈরে। জুলাই ১৮, ২০২০দা অনৌবা কেস মশিং ৩৪,৮৮৪ ওইখি।

নুমিৎ খুদিংগী ওইনা কোবিদ অনাবা মশিং ৱাংনা ফগৎলকপনা মরম ওইদুনা অমসুং শিবগী মশিং লেপ্পা লৈতনা হন্থরকপনা, ভারতকী এক্তিব কেস মশিং হন্থরকপগী খোংজেল অসি লেপতনা মখা চত্থরি।

অতোপ্পা মায় পাকপা অমদনা, এক্তিব কেস মশিং অসি লাখ ৬.২৫তা হন্থরে। লৈবাক অসিগী অপুনবা পোজিতিব কেস অসি ৬,২৫,৮৫৭ ওইরে অমসুং অপুনবা কেসকী চাদা ৭.৮৮তমক ওইরি।

হায়রিবা পুক্নিং থৌগৎনিংঙাই ওইরবা ফলশিং অসি রাজ্য/য়ু.তি.শিংনা কেন্দ্রগী ওইবা অপুনবা অমসুং লৈবাক শিনবা থুংনা তেস্ত তৌবা, মতীক চানা য়েংশিনবা অমসুং ত্রেকিং তৌবা, অথুবদা হোস্পিতালদা পুখৎপা অমসুং কেন্দ্র সরকারনা পীবা স্তেন্দার্দ ত্রিৎমেন্ত প্রোতোকোলশিংদা ঙাক্না চৎপগা লোইননা অপুনবা ওইনা হোৎনবনা ফংবা ঙমখিবনি।

মায় পাকপা অসি দোক্তর, পেরামেদিক, ফ্রন্তলাইন ৱার্কর অমসুং লৈবাক শিনবা থুংনা লৈরিবা অতোপ্পা কোবিদ-১৯ ৱারিয়রশিংনা কত্থোকপগা লোইননা হোৎনবনা ফংলিবনি।

এক্তিব কেস মশিংদা হন্থরক্লিবসি নাবা ফগৎলকপগী মশিং খম থেংনা ৱাংখৎলকপননি। অপুনবা নাবা ফখ্রবা কেস মশিং অসি লাখ ৭২ লানখ্রে (৭২,০১,২১৩)। মসিনা এক্তিব কেস অমসুং নাবা ফখ্রবা কেস মশিংগী মরক্তা লৈরম্বা খেন্নবদু হেনগৎহল্লে অমসুং ঙসিদি ৬৫,৭৫,২১৩ খক্তমক ওইরে।

হৌখিবা পুং ২৪ অসিদা অনাবা মীওই ৬৩,৮৪২না নাবা ফদুনা দিসচার্জ তৌখি। লৈবাক্কী ওইবা নাবা ফখ্রবগী চাং অসি মখা তানা চাদা ৯০.৬২দা হেনগৎলে।

অনৌবা নাবা ফখিবগী চাং চাদা ৭৮না রাজ্য/য়ু.তি. ১০দগী লাকখিবনি।

মহারাস্ত্রনা নোংমগী মনুংদা ৯,০০০ নাবা ফদুনা মকোক থংলি অমসুং কর্নাতাকানা ৮,০০০ নাবা ফদুনা অনিশুবদা লৈরি।

কনফার্ম্দ কেসকী চাদা ৭৬না রাজ্য/য়ু.তি. ১০দগী লাকখি।

কেরলা অমসুং নোংচুপ বেঙ্গাল মখোয় অমমম্না অনৌবা কেস মশিং ৪,০০০ লাক্তুনা খ্বাইদগী য়াম্বা ওইরি। মহারাস্ত্রা, কর্নাতাকানা অনৌবা কেস ৩,০০০ লাক্তুনা মতুংদা ইল্লি।

শিবগী মশিং ৪৮৮ হৌখিবা পুং ২৪ অসিদা লাকখি। মসিগী মনুংদগী চাদা ৮০ রোম্না রাজ্য/য়ু.তি.দগী ওইরি। থংন-থংননা অনিশুবা নুমিৎ ওইনা মীওই ৫০০দগী তানা শিরি।

মহারাস্ত্রনা নোংমগী মনুংদা খ্বাইদগী য়াম্না শিরি (৮৪ শিবা)।

ভারতকী শিংবগী চাং অসি চাদা ১.৫০ ওইরি।

***************