ঙসি অসি য়াম্না পুৱারী ওইবা নুমিৎনি। ঙসি, হায়বদি ওগস্ত ৮ অসিনা লৈবাক অসিগী নিং-তম ইহৌদা অচৌবা শরুক য়াবগী থৌওং অমা পাঙথোকখি। নুমিৎ অসিদা ইং ১৯৪২দা গান্ধীজীগী লুচিং মখাদা “ভারত থাদোকউ” হায়বা চাউরবা মীয়ামগী ইহৌ হৌখি। অসিগুম্বা পুৱারী ওইবা নুমিত্তা রাজঘাৎকী মনাক্তা লৈবা রাস্ত্রিয় স্বচ্ছতা কেন্দ্র অমা শঙ্গাবসি য়াম্না চান্নবা অমনি। কেন্দ্র অসিনা ভারত মচা কোতি ১৩০না বাপুজীগী সত্যগ্রহ ওইরিবা করয়াঞ্জলিবু ইকায় খুম্নবা উৎপনি।

মরূপশিং,  

ঐখোয়গী নুংশিজরবা বাপুনা লু-নান্না লৈবদা স্বরাজকী মমি উবা ফঙই। মহাক্না লু-নান্না লৈবা অসিনা মহাক্কী স্বারাজকী ৱাখল্লোনবু অশেংবা ওইহনবা ঙমগনি হায়বগী থাজবা লৈখি। বাউপুজীগী ৱাখল্লোন্দা কত্থোকপা কেন্দ্র অমগী মিং অসি রাজঘাৎকা মরী লৈনহনবা অসিদা ঐহাক্না য়াম্না নুংঙাইবা ফাওই।

মরূপশিং,

রাস্ত্রিয় স্বচ্ছতা কেন্দ্র অসিনা গান্ধীজীগী লু-নানবা পামজবা অসিবু চাউথোকচহনবা ফাওহল্লগনি অমসুং ভারতকী মীয়াম কয়ানা মসিগীদমক্তা থৱাই-হকচাং য়াওনা পুক্নিং চংনরি। ঐহাক্না কেন্দ্র অসিগী মনুংদা ঙৈহাক্কী মতম খরা লৈরুবদা ভারত মচা মিলিয়ন কয়া অমনা মসিবু ওইথোকহন্নবা হোৎনবা অসি উরুবদা ঐহাক থৱাই য়াম্না নুংঙাইখি। চহি তরুক্কী মমাংদা লাল কিলাদগী হৌখিবা খোঙচৎ অসিগী ৱাখল কয়া অমা হৌজিকসু ঐহাক্না তগৎ তগৎ তেক্না নিংশিংলি।

লৈবাক শিনবা থুংবগী মীওইশিংনা ঙমখৈ কয়া, অথিংবা অমসুং অপনবা কয়া কান্থোক্তুনা স্বচ্ছ ভারত অভিয়ানবু অমত্তা ওইবা অপুনবা খোল্লাও অমা ওইহন্নবা অঙম্বা থবক পাঙথোক্নরি। অমসুং মসিগী মওং অসিগী খুদমদি কেন্দ্র অসিনা ওইরে। কেন্দ্র অসিদা ঐখোয়না স্বচ্ছগ্রহগীদমক্তা থাংজিল্লকখিবা খোঙথাং খুদিংমক মতমগী তেক্নোলোজীগী খুত্থাংদা উত্তুনা থম্লি। ঐহাক্না উবা ফংবদা মফমসিদা লাকপা অঙাংশিংনা লু-নানবগী রোবোৎ অসি য়াম্না পাম্নরি। লু-নানবগী কান্নবগী হীরমদা মীয়ামগী অমত্তা ওইবা ৱাখল্লোন অসি মফম অসিদা লাকপা মীওই খুদিংনা উবা ফংগনি অমসুং মসিনা অনৌবা ভারতকী মমি অমা শক্তাক্তুনা মীওই পুম্বদা ইথিল পীরগনি।

মরূপশিং,

হৌজিক্কী মতমসিদা গান্ধীজীনা পীরম্লিবা ইথিল অসিদগী অহেনবা অমত্তা কনা অমত্তনা পীবা ঙম্লোই। মালেম পুম্বনা মহাক্কী ৱাখল্লোন অমসুং পুন্সি মহিং অসিগী মতৌ তম্নরক্লি। মমাং চহিদা, গান্ধীজীগী ১৫০শুবা মপোক কুমওন অসি মালেম শিনবা থুংনা য়াম্না চাউনা পাঙথোকখি অমসুং অসিগুম্বা থৌওং অসি মমাংদা অমুক্তা থোকখিদ্রি। গান্ধীজীগী খ্বাইদগী পামজবা ঈশৈ, জনা তো তেনে কহি, অসি লৈবাক ময়াম অমগী শৈশকপা কয়ানা শকখি। মখোয় ময়াম্না অসিগুম্বা ভারতকী লোলগী ঈশৈ শকখিবা অসি রেকোর্দ থমখ্রিবনি। য়ুনাইতেদ নেসন্সকী হেদক্বার্তরদগী হৌরগা মালেমগী মফম খুদিংদা লৈবা মীয়াম্না মহাক্কী ফজরবা ৱাখল্লোনশিংবু নীংশিংনখি। মহাক্না মালেম পুম্ববু অমত্তা ওইনা পুন্সিনখি।

মরূপশিং,  

গান্ধীজীবু নিংশিংনবা অসি ঙমখৈ অমসুং হীরম কয়াগী ৱাংমা লাল্লবনি। মসিগী মপুং ওইবা মরমদি মহাক্না খুদোংচাদবা খুদিংগী ৱারোইশিনবু অচম্বা অমসুং অরায়বা থৌওংদা পুথোকপা ঙম্বা অসিনি। মতিক লৈবা পথাপ অমদগী লু-নানবগী থৌওংনা নিং তম্বা ফংহনগনি হায়বসি কনানবু খল্লুবগে?

গান্ধীজীনা হীরম অসিগী মতাংদা খন্থদুনা নিং-তম ইহৌগা মরী লৈনহন্দুনা চাউরবা মীয়ামগী ইহৌ অমা ওইহল্লম্লিবনি।

মরূপশিং,

গান্ধীজীনা মতম পুম্বদা অসুম্না হায়রম্মিঃ “স্বরাজনা মীওই অমদা থৌনা অমসুং লু-নানবগী ইথিল পীগনি”।

গান্ধীজীনা লু-নানবা অমসুং স্বরাজকা লৈনরিবা মরী অসিদা য়াম্না থাজবা থম্মি মরমদি মহাক্না থাজবগী মতুং ইন্না অমোৎপনা মীওই অমবু লায়রহল্লি। অমোৎপনা লায়রবা মীওই অমগী মপাঙ্গল হন্থহল্লি। মসিদা নত্তনা মসিনা হকচাংগী পাঙ্গলগী মথক্তা ৱাখলগী পাঙ্গলবুসু য়াম্না হন্থহল্লি। ভারতকী মীয়াম্না মোৎনা লৈরিবমখৈ মশাগী থাজবা হন্থদুনা লৈগনি হায়না মহাক্না থাজরম্মি। মীয়াম্না মশাদা থাজবা থমজদ্রবদি মতৌ করম্না নিং-তম্বগী ইহৌদা শরুক য়াগদৌরিবনো?

মরম অদুনা খা-অফ্রিকাদগী চম্পারন অমসুং সবরমতি আশ্রম ফাওবদা মহাক্না লু-নানবা অসিনা মহাক্কী ইহৌগী খুৎলায় ওইনা শিজিন্নখি।

মরূপশিং,  

গান্ধীজীনা পীরিবা ইথিল অসিগী মরম্না লৈবাক অসিগী মফম খুদিংদা লৈরিবা স্বচ্ছগ্রহ লাখ কয়ানা স্বচ্ছ ভারত অভিয়ান অসি মখোয়গী পুন্সিগী পান্দম ওইনা থম্নরি হায়না ঐহাক্না থাজৈ। মসিনা মরম ওইদুনা থা ৬০দা ভারত মচা চাউরাক্না কোতি ৬০না অমাংশঙগী কান্নবগী মতাংদা থবক হৌনখিরিবনি।

মসিনা মরম ওইদুনা লৈবাক অসিগী ইচে-ইচলশিংনা ইকায় খুম্নবা ফংদুনা মখোয়গী পুন্সি অসি তেক্ত কায়দবা অমসুং নুংঙাইবা ওইরিবনি। মসিনা লৈবাক অসিগী নুপীমচাশিংবুসু লাইরিক লাইশু পাবদা মশাদা থাজবা লৈহল্লিবনি। মসিগী মরম্না লায়রবা অঙাং কয়া লায়না-তিলনাদগী ঙাকথোকপা ঙম্লিবনি। মসিগী মরম্না দলিৎ কোতি কয়া, শোত্থরবা মীওইশিং অমসুং ত্রাইবেল কয়ানা চাং মান্ননা লৈবগী থাজবা ফংজরিবনি।

মরূপশিং,  

স্বচ্ছ ভারত অভিয়ান্না লৈবাক অসিগী মীওই খুদিংদা মশাদা থাজবা হেলহনলে। তৌবতবু মসিগী খ্বাইদগী মায় পাকপগী মতৌ অসি লায়রবশিংদা উবা ফংই। স্বচ্ছ ভারত অভিয়ান্না খুন্নাইগী ৱাখল্লোন অমসুং লমচত্তা মতম পুম্বগী ওইবা অহোংবা অমা পুরক্লে। খুৎ তোয়না হাম্বা, মীয়ামগী মফমদা তিন শিত্তবা, মফম চাবা মফমদা ফত্ত-হৌদি হুন্দোকপগী থৌওং অসি লৈবাক পুম্বগী মীয়াম্না ইন্দুনা চৎনরে। মফম খুদিংদা অমোৎ অকায় উরবসু ঐখোয়না করিমত্তা খন্দনা অদুম লৈরম্বা অদু হৌজিক্তি ওইদ্রে। অমোৎ-অকায় তৌবা মীওইশিংদা হৌজিক্তি চৈনরে। হায়রিবা থৌওংশিং অসি কনানা ইহেন হেন্না পাঙথোকই?

ঐখোয়গী অঙাংশিং, ঐখোয়গী ইনখৎলক্লিবা নহাশিং অমসুং ঐখৌগী নহারোলশিংনা।

মরূপশিং,  

কোরোনাগা লেন্থেংনবগী থৌওংশিং অসিদা লৈবাক্কী অঙাংশিংদা লৈরক্লিবা মশাগী লু-নানবা অমসুং হাইজিন ফজনা থম্বগী লৌশিং কয়া লৈরক্লিবা অসিগী কান্নবা কয়া অমসু ঐখোয়না উবা ফংলে। কোরোনাগী লায়চৎ অসি ইং ২০১৪গী মমাংদা লাক্লম্লবদি করি ওইরমগনি হায়না নখোয়না খনলবরা? অমাংশঙ লৈতবা মফমশিংদা ঐখোয়না মতৌ করম্না লায়না থুনা শন্দোক্লকপা থিংবা ঙমগনি? মীয়াম্না মপান্দা অমাংবা তৌবগী থৌওং অসি অদুমক চত্থরগদি লোকদাউন অসি মায় পাকপা ঙমগদরা?

মরূপশিং,  

লু-নানবগী কেম্পেন অসি লেপ্তনা চত্থগদবা লম্বী অমনি। মপান্দা অমাংবা তৌবা তোক্লবা তুংদা ঐখোয়গী থৌদাং য়াম্না হেনগৎলে। ও.দি.এফ.কী মতুংদা লৈবাক অসিগী অনৌবা পান্দমদি ও.দি.এফ. প্লসনি। ঐখোয়না হৌজিক্তি শহরদবু ওইরো, খুঙ্গংদবু ওইরো ফত্ত-হৌদি শেন্নবগী মওং অসি ফগৎহনবগী তঙাই ফদবা লৈরে। ফত্ত-হৌদিশিং অসিদগী কঞ্চন শেম্বগী থবক হেন্না কনশিল্লগদবনি। মসিগী থৌওং অসি পাঙথোকপা হৌবগী ওইনা ভারত থাদোকউ ইহৌ হৌখিবা নুমিত্তগী হেন্না ফবা নুমিৎ করি লৈরিবগে?

মরূপশিং,  

ভারতপু শোন্থহল্লিবা ফত্তবশিং ঐখোয়বু থাদোক্তুনা চৎখ্রো, মসিদগী হেন্না ফবা করি লৈ। মসিগী ৱাখল্লোন অসিগা লোয়ননা হৌখিবা চহি ৬তগী ভারত থাদোকউ কেম্পেন অসি চত্থদুনা লাক্লি।

লায়রবা – ভারত থাদোকউ !

মপান্দা অমাংবা তৌদবা য়াদে খনবা - ভারত থাদোকউ !

ঈশিং থিবা কোয়চৎ চৎপা - ভারত থাদোকউ !

সিঙ্গল য়ুজ প্লাস্তিক - ভারত থাদোকউ !

তাথী তাওই তৌবগী চৎনবী - ভারত থাদোকউ !

শেঞ্জা-থুমজা তৌবা - ভারত থাদোকউ !

মীপায়বা অমসুং খৎন-চৈনবা - ভারত থাদোকউ !

মরূপশিং,  

হায়রিবা ভারত থাদোকউ ইহৌশিং অসিনা সুরজকী ইথিলবু স্বরাজকা মরী লৈনহন্দুনা থম্লি। তাঙ্কক অসিদা ঐখোয় পুম্নক্না অমোৎপদগী নিং-খা তম্লিসি হায়না লেপ্লসি।

লাক্লো,

ঙসিদগী হৌদুনা নিং-খা তম্বা নুমিৎ, ওগস্ত ১৫, ২০২০ ফাওবদা স্বরাজপু ইকাই খুম্নবা উৎপা ওইনা “অমোৎপশিং ভারত থাদোক্ল” হায়বা চয়োল অমগী  কেম্পেন অমা লৈবাক অসিদা হৌরসি। ঐহাক্না জিলা খুদিংগী মরী লৈনবা ওফিসারশিংনা চয়োলসিদগী হৌনা অমাংশঙ শাবা অমসুং শেমজিনবগী থবক পাঙথোক্নবা হায়রি। অতোপ্পা রাজ্যদগী শিন্মীশিং লাক্তুনা লৈরিবা মফমশিংদা হায়রিবা থবকশিং অসি হান্না পাঙথোক্কদবনি। মসিগা মান্নবা ওইনা অমোৎপগী কম্পোস্ত শাবা ওইরে, শন্থিদগী ওইরো, সিঙ্গল য়ুজ প্লাস্তিক শিজিন্নদববু ওইরো, মসিদা ঐখোয় পুম্নমক্না পুন্দুনা চংশিনমিন্নগদবনি।

মরূপশিং,  

ঐখোয়না গঙ্গা তুরেল শেংদোকপা অসিদা পুক্নিং থৌগৎনিংঙাই ওইবা মহৈ কয়া ফংলিবা অসিগুম্না অতোপ্পা তুরেলশিং শেংদোকপগী থবকসু পায়খৎকদবনি। য়মুনা তুরেল মসিগা য়াম্না নক্ননা লৈরিবনি। য়মুনাদা তারিবা অমোৎপা নালাশিং শেংদোকপগী থবক পায়খৎপা হৌগদবনি। মসিগীদমক্তা য়মুনা তুরেলগী অকোয়বদা লৈরিবা খুঙ্গংশিং, শহরশিংনা মতেং পাংলকপা অসি য়াম্না মরু ওইবনি।

অদুগা ঐখোয়না কাওরোইদবা অমনা, থবকশিং অসি পাঙথোক্লিঙৈদা গজ অনিগী অরাপ্পা থম্বা অমসুং মাস্ক উপ্পা অসিসু য়াম্না মরু ওই হায়বসিনি। কোরোনা ভাইরস অসি ঐখোয়গী চিন অমসুং নাতোন্দগী শন্দোকই অমসুং মফমশিং অসিদা মরাং কায়না লৈরিবনি। অসিগুম্বা ফিভম অসিদা মাস্ক উপ্পা, সোসিএল দিস্তেন্সিং তৌবা অমসুং মীয়াম তিনবা মফমশিংদা তিন শিত্তবগী কাঙলোনশিং অসি নীংথিনা ইনগদবনি।

ঐখোয় ইশাবু তেক্ত কায়দনা থম্বা অসিনা কেম্পেন অসিবু মায় পাকহনবদা য়াম্না তেংবাংগনি। অসিগুম্বা থাজবা অসি লৈবগীদমক্তা ঐহাক্না রাস্ত্রিয় স্বচ্ছতা কেন্দ্র অসিবু থাগৎলি।

মীয়াম্বু অমুক্কা হন্না থাগৎচরি !!!

******