প্রধান মন্ত্রী শ্রী নরেন্দ্র মোদীনা ঙসি ইন্দিয়া আইদিয়া সম্মিত্তা মরু ওইবা ৱারোল কয়া পীখ্রে। সম্মিৎ অসি য়ু.এস.-ইন্দিয়া ব্যুজিনেস কাউন্সিল (য়ু.এস.আই.বি.সি.)না পাংথোকপনি। সম্মিৎ অসিগী হন্দক্কী চহীগী হীরমদি “অফবা তুংলমচৎ অমা শেম্বনি”।

প্রধান মন্ত্রীনা চহীশিদা ৪৫শুবা মপোক কুমওন ওইবগীদমক য়ু.এস.আই.বি.সি.বু থাগৎখি। মহাক্না য়ু.এস.আই.বি.সি.গী মকোক থোংবশিংবু ভারত-য়ু.এস.কী শেন্মিৎলোনগী হীরমদা খুৎশম্নববু খুমাং চাউশিলহন্নবা হোৎনবগী থাগৎখি।

লৈবাক্কী শেন্মিৎলোনগী মতিক্কী খুত্থাংদা নিংহন্নদবা মালেমগী শেন্মিৎলোন ওইহনবা

চাউখৎপগী হীরমদা লায়রবা অমসুং শোত্থবশিংবু ময়ায় ওইবা মফমদা থম্বগী তঙাই ফদবগী মতাংদা প্রধান মন্ত্রীনা ৱা ঙাংখি। “নুংঙাইনা হিংবা” অসিগা “কারবার নুংঙাইনা তৌবা” অসিগা চপ মান্নৈ হায়না হায়খি। মপানগী খুদোংচাদবশিংগী মায়োক্তা লান্থেংনবা ঙম্নবা নিংহন্নবা লৈতবা মালেমগী শেন্মিৎলোন ওইহনবা অসি লৈবাক লৈবাক্কী শেন্মিৎলোনগী মতিক্না ওইহনবা ঙম্বগী মরু ওইবা ৱাফম অসি ঐখোয়দা লায়চৎ অসিনা নৌহৌননা নিংশিংহল্লে হায়খি। নুংঙাই য়াইফবা অমসুং নিংহন্নবা লৈতবা মালেম অমা ওইহন্নবা ভারতনা ‘আত্মানির্ভর ভারত’কী খোল্লাওগী খুত্থাংদা তেংবাংলি হায়বগী মতাংদা মহাক্না মীয়ামগী পুক্কনিং চিংশিনখি।

ভারতনা তরাম্না ওকপা, খুদোংচাবা পীবা অমসুং হীরম খনবা য়াবগী মতিক চারবা ফিভম কয়া পীরি

প্রধান মন্ত্রীনা মালেম্না ভারত্তা থাজবা থম্লি অমসুং মসিগী মরমদি ভারতনা তরাম্না ওকপা, খুদোংচাবা ফংহনবা অমসুং হীরম কয়াগী মনুংদগী অপাম্বা খনবা য়াবগী নিংথিরবা অপুনবগী মওং অমা পীবগীনি হায়খি। হৌখিবা চহী তরুক্তা ঐখোয়গী শেন্মিৎলোন অসি তরাম্না ওকপগী মওং চেনবা অমসুং অফবগীদমক শেমদোকপদা পান্দম থম্বা অমা ওইহন্নবগীদমক্তা হোৎনদুনা লাক্লি অমসুং শেমদোকপা অসিনা চাংদম্নবা হেনগৎহনবা, ময়েক শেংবা হেলহনবা, দিজিতাইজেসন তৌবা হেলহনবা, অনৌবা থৌওং পাক শন্না পাংথোকপা অমসুং তং তাবা পোলিসী অমা ওইহনবদা তেংবাংলি।

খ্বাইদগী নৌবা রিপোর্ত অমা পল্লদুনা প্রধান মন্ত্রীনা ভারত্তা শহরগী মফমদা লৈবা মীওইশিংনা ইন্তর্নেৎ শিজিন্নবদগী খুঙ্গংগী মীওইনা ইন্তর্নেৎ শিজিন্নবনা হেল্লি হায়খি। ভারতপু খুদোংচাবশিংগী লমদমনি হায়রদুনা লৈবাক অসিদা ইন্তর্নেত তত্তনা শিজিন্নবা মীওই বিলিয়ন তংখায় অমা লৈরে অমসুং মীওই বিলিয়ন তংখায় অমা হেনবশিংনা ইন্তর্নেৎনা শম্নহল্লে হায়খি। ৫জি., বিগ দেতা এনালাইতিক্স, ক্বান্তম কম্প্যুতিং, ব্লোক-চেন অমসুং ইন্তর্নেৎ ওফ থিংশকুম্বা ফ্রন্তিয়র তেক্নোলোজীগী খুদোংচাবা ফংবগী মতাংদশু মহাক্না পনখি।

তোঙানবা সেক্তরশিংদা শেল থাদবগী খুদোংচাবা ময়াম

প্রধান মন্ত্রীনা ভারত্তা তোঙান তোঙানবা সেক্তরশিংদা শেল থাদবগী খুদোংচাবা কয়া অমা পাক শন্না লৈরে হায়খি। লৌউ-শিংউগী সেক্তরদা হন্দক্তা পাংথোকখিবা পুৱারী ওইরবা শেমদোকপশিংগী মতাংদা ৱা ঙাংলদুনা এগ্রিকলচর ইনপুৎ অমসুং মেছিনরী, এগ্রিকলচর সপ্লাই চেন, ফুদ প্রোসেসিং সেক্তর, ফিশরী অমসুং ওর্গানিক্কী পোত্থোকশিং য়াওনা মফম কয়া উমদা শেল থাদবগী খুদোংচাবা কয়া অমা লৈরে হায়খি। ভারতকী হেলথকেয়র সেক্তর অসি চহী খুদিংগী ২২%গী চাংদগী হেন্না চাউখৎলক্লিবা অমসুং মেদিকেল-তেক্নোলোজী, তেলি-মেদিসিন অমসুং দাইগ্নোস্তিক্সকী মতাংদা পল্লদুনা হৌজিক্কী মতম অসি ভারতকী হেলথকেয়র সেক্তরদা শেল থাদবদা পাকথোক চাউথোকপগী মতম্নি হায়না মহাক্না হায়খি।

প্রধান মন্ত্রীনা শেল থাদবদা খুদোং চাবা লৈগদবা সেক্তর কয়া অমগী মরমদশু পনখিবশিংগী মনুংদা য়াওবশিং অদুদি ইনর্জী সেক্তর, য়ুম, শোরোক, হাইৱে  অমসুং হিথাংফম শাবা; লাক্লিবা দিকেদ খরা অসিদা লমদমসিগী মকোক থোংবা লন্নাইগী এয়রলাইনশিংনা অনৌবা এয়রক্রাফত ১০০০মুক লৈবগী থৌরাং য়াৎলিবা অসিনা ভারত্তা মেন্যুফেকচরিং ফেসিলিতী লিংখৎনিংবশিং অমসুং শেমদোক-শেমজিন তৌবগী ফেসিলিতী হাংদোক্নিংবশিংনা শেল থাদবদা খুদোংচাবা কয়া ফংগদবশিংনি। মহাক্না মখা তানা পনখিবদা  দিফেন্স সেক্তরদা শেল থাদবগী ওইনা ভারতনা থম্বা এফ.দি.আই. কেপ অসি ৭৪% ফাওবা হেনগৎখ্রে; দিফেন্সকী খুৎলায়শিং অমসুং প্লেৎফোর্মশিং শাবদা পুক্নিং থৌগৎনবা দিফেন্স কোরিদোর অনিশু হাংদোকখ্রে অমসুং লন্নাই অমসুং ফোরেন ইনবেস্তরশিংগী অখন্নবা ইন্সেন্তিবশু পীরগনি হায়না হায়খি। স্পেস সেক্তরগী হীরমশিংদা মশক থোকপা শেমদোকপগী থবক কয়া পাংথোকখিবগী মতাংদশু মহাক্না পনখি।

ফাইনান্স অমসুং ইন্স্যুরেন্সতা শেল থাদরক্নবা হায়রদুনা প্রধান মন্ত্রীনা ইন্স্যুরেন্সতা থম্লম্বা এফ.দি.আই. কেপ অসি ৪৯%দগী ১০০%দা হেনগৎখ্রে অমসুং ইন্স্যুরেন্স ইন্তর্মেদিএরীদা শেল থাদবগী ওইনদি এফ.দি.আই.গী অয়াবা পীরে হায়খি। হকশেল, লৌউ-শিংউ, কারবার অমসুং লাইফ ইন্স্যুরেন্সতা ইন্স্যুরেন্স কবর হেনগৎনবা মশিং থিঙমদ্রবা খুদোংচাবা কয়া অমশু লৈরি হায়না মহাক্না মখা তানা পনখি।

ভারত্তা শেল থাদবা হেনগৎপা

ৱর্ল্দ বেঙ্ককী রেঙ্কিংদা ভারতকী “কারবার তৌবগী নুংঙাইবা”গী থাক ৱাংখৎলকপগী মতাংদা প্রধান মন্ত্রীনা ৱাফম কয়া থমখি। চহী খুদিংগী ওইনা ভারতনা এফ.দি.আই.দা মশক থোকপা ৱাংখৎপগী চাং য়োউবা ঙম্লি হায়না প্রধান মন্ত্রীনা ফোংদোক্লদুনা মমাংগী চহীদগী ২০% হেনগৎপা ওইনা ভারতকী ইং ২০১৯-২০গী এফ.দি.আই. ইনফ্লো অসি বিলিয়ন দোল্লর ৭৪নি হায়না মখা তাখি। লায়চৎ অসিগী মনুংদশু চহী অসিগী এপ্রিল অমসুং জুলাইগী মনুংদা মপান লমদ্গী বিলিয়ন দোল্লর ২০দগী হেন্না শেল থাদরকপগী পুক্নিং চিংশিনবা ঙম্লে হায়খি।

ভারত্তা শেল থাদবগী খ্বাইদগী ফবা মতম

প্রধান মন্ত্রীনা ভারত্তা মালেমগী শেন্মিৎলোন অসিবু নৌনা অমুক ফহল্লকপা ঙম্বগী মতিক লৈ হায়খি। ভারতনা চাউখৎলকপা হায়বসি থাজবা য়াবা লৈবাক অমগা ললোন ইতিক্কী হীরমদা মরী লৈনবগী খুদোংচাবা ফংবা হেনগৎলকপা; তরাম্না ওকপা হেনগৎপগা লোয়ননা মালেমগী থাক্তা পুনমিন্ননবা; পাক চাউথোকপগী খুদোংচাবা পীবা মার্কেত্তা চাংদম্নবা হেনগৎহনবা অমসুং হৈ-শিংলবা মীওই কয়া ফংদুনা শেল থাদবগী মহৈ হেনগৎলকপা হায়বনি হায়না মহাক্না হায়খি। ভারত অমসুং য়ু.এস.এ. অসি মহৌশাগী ওইবা খোংলোয়নি হায়রদুনা ভারত-য়ু.এস. খুৎশম্নবা অসিনা মালেম্বু লায়চৎ অসিগী মতুংদা য়াম্না থুনা ফগৎহল্লক্নবা মরু ওইবা থৌদাং লৌরকপা য়াই হায়না প্রধান মন্ত্রীনা হায়খি। অমেরিকাগী শেল থাদরক্কদবা মীওইশিংদা খুৎ তিংথোক্লদুনা প্রধান মন্ত্রীনা ভারত্তা শেল থাদবগী ওইনা হৌজিক্কী মতমসিদগী হেন্না ফবা মতম লৈখিদ্রি হায়না হায়খি।

****