মধ্য প্রদেশগী রাজ্যপাল শ্রীমতি অনন্দি পতেল জী,

মধ্য প্রদেশকী মীয়াম্না পাম্নরবা মুখ্য মন্ত্রী শ্রী শিবরাজ সিংহ জী,

কেন্দ্রগী মন্ত্রীমন্দলগী ঐগী মরূপ আর. কে. সিংহ জী,

থাৱর চন্দ গেহলোত জী, নরেন্দ্র সিংহ তোমার জী, ধর্মেন্দ্র প্রধান জী, প্রহ্লাদ সিংহ পতেল জী, মধ্য প্রদেশ মন্ত্রী মন্দলগী মেম্বরশিং, এম.পি. শিং অমসুং এম.এল.এ.শিং পুম্নমক

রেৱা য়াওনা মধ্য প্রদেশকী ঐগী নুংশিজরবা ইচিল ইনাওশিং‍। ঙসিদি রেৱানা তশেংনমক্কী পুৱারী শেম্লে‍। রেৱা অসি ইমা নর্মদা অমসুং অঙৌবা কৈনা মশক তাক্তুনা লাক্লি‍। হৌজিক্তি মসিদা এসিয়াগী খ্বাইদগী চাওবা সোলার পৱার প্রোজেক্তকী মমীংসু হাপচিল্লে‍। করিগুম্বা অদোম্না মসিগী নোংথক্তগী কাপ্পা ভিদিও উরবদি সোলার পেনেল লিশিং লিশিংনা লৌবুক্তা মহৈ মরোংগুম হায়না হুম্না শাৎপগুম্না উগনি‍। নৎত্রগা হিগোক মচু য়াম্না চঙবা ঈশিং লৈবা অরুবা সমুদ্রগী মথক্তা পায়দুনা চৎপগুম উগনি‍। মসিগীদমক্তা ঐহাক্না রেৱাগী মীয়ামদা, মধ্য প্রদেশকী মীয়ামদা হরাও তয়ামবা ফোঙদোক্লি, য়াইফ-পাউজেল পীজরি‍।

রেৱাগী সোলার প্লান্ত অসিনা মায়কৈ অসোমদা চৎলিবা দিকেদ অসিদা খ্বাইদগী চাউবা পৱারগী সেন্তর অমা ওইহনবদা মতেং ওইরগনি‍। সোলার প্লান্ত অসিনা মধ্য প্রদেশকী মীয়াম অমদি মফমসিগী ইন্দস্ত্রীশিংদা মৈ পীবখক্তা নত্তনা দিল্লীদা মেত্রো রেলশিংদসু মসিগী কান্নবা ফংগনি‍। মসিগী মথক্তা রেৱাগুম্না সাজাপুর, নীমচ অমদি ছতরপুরদসু অচৌবা সোলার পৱার প্লান্তকী থবক পায়খৎলি‍। ওমকারেস্বর দামদসু ঈশিংদা তাউবা সোলার পৱার প্লান্ত অমা থম্নবগী থৌরাং লৈ‍। হায়রিবা প্রোজেক্তশিং অসি লোইরক্লবা মতমদা মধ্য প্রদেশ মপুং ফানা অহোঙবা অমদি তরু তরুবা মৈগী মকোন অমা ওইরগনি‍। মসিনা মধ্য প্রদেশকী লায়রবা, মিদ্দল ক্লাসগী ইমুংশিং, লৌমীশিং অমদি ত্রাইবেলশিংদা খ্বাইদগী হেন্না কান্নবা পীগনি‍।

মরূপশিং, ঐখোয়গী নাৎতা, ঐখোয়গী চৎনবীদা, ঐখোয়গী নুংতিগী পুন্সিদা নুমিৎপু ইরাৎচবগী মরুওইবা মফম অমা কন্দুনা লৈ‍। পুনাতু মা তত্স বিতুর বরেন্যম হায়বদি ইরাৎচবদা মতিক চারবা নুমিৎনা ঐখোয়বু শেংদোকপিরম্লসনু হায়বনি‍। অশেংবগী ৱাখল্লোন অসি ঙসি রেৱাদা, মফম খুদিংমক্তা উবা ফংলি‍। নুমিৎকী ইনর্জী অসি ঙসি লৈবাক পুম্বনা উবা ফংলে‍। সোলার পৱারগী লমদা ঙসি ঐখোয়না মালেমগী মকোক থোংবা লৈবাক ৫গী মনুং চনবা ঙম্লিবসি পুম্নমক মহাক্কী থৌজালননি‍।

মরূপশিং, নুমিৎকী ইনর্জী অসি ঙসিখক্তগী নত্তনা ২১শুবা চহীচাগী মথৌ তারিবা ইনর্জীগী অচৌবা পাম্বৈ অমা ওইরক্কদৌরিবনি‍। মরমদি নুমিৎকী ইনর্জী হায়বসি স্যুর ওই, প্যুর ওই অমদি সিক্যুর ওই‍। স্যুর ওইবগী মরমদি ইনর্জীগী, মৈগী অতোপ্পা হৌরকফমশিংদি লোইখিবা য়াই অদুবু নুমিৎতি মতম পুম্নমক্তা মালেম পুমবদা ঙান্দুনতা লৈহৌগনি‍। প্যুর ওইরিবগী মরম্না মসি ইরোমদোম লেপচবগী অচৌবা খুদম্নি, অচৌবা পুক্নীং থৌগৎনিংঙাইনি অমদি মসিনা ঐখোয়গী মথৌ তাবা ইনর্জী পীবা ঙমগনি‍। ভারতনা অসুম অসুম চাউখৎপগী থাক কাখৎলকপগা লোয়ননা ঐখোয়গী নীংজবা, থাজবা অসুম অসুম ৱাংখৎলকই অদুগা মসিগা ইরোয়ননা ঐখোয়গী ইনর্জী অমদি পৱারগী মথৌ তাবসু অসুম অসুম হেনগৎলক্লি‍। ফীভম অসিদা ইরোমদোম লেপচবা ভারত পুরক্নবগীদমক মৈগী লমদা ইরোমদোম লেপচবা ঙমবা হায়বসি য়াম্না মথৌ তারি‍। মসিদা সোলার ইনর্জীনা অচৌবা শক্লোন অমা লৌরক্কদৌরি অমদি ঐখোয়না হোৎনরিবসি ভারতকী অসিগুম্বা মপাঙ্গল অসিবু হেন্না কনখৎহনবনি‍।

মরূপশিং, ঐখোয়না ইরোমদোম লেপচবা, চাওখৎপা হায়রিবসিদা শেন্মিৎলোন অসি মসিগী মরুওইবা শরুক অমা ওইরি‍। মালেম পুম্বদা খুজিল থৌরাং য়াৎপদা শেন্মিৎলোনগী ওইরবসু অকোয়বগী ফীভমদা ওইরবসু শীংনবা কয়া থেংনরি‍। হীরম অসিদা ফিরেপ লৌবসি নাকল অমদা নৎত্রগা অমদা য়েংলগা লৌনরি‍। অদুবু নাকল অনিমকসি য়েক্নবা নত্তে মরূপনি হায়বসি ভারতনা উৎলে‍। স্বচ্চ ভারত অভিয়ান ওইরবসু, ইমুং খুদিংমক্তা এল.পি.জি. অমসুং পি.এন.জি.গী তরু তরুবা শীং পীবগী কেম্পেন ওইরবসু, লৈবাক পুম্বদা সি.এন.জি.দা য়ুম্ফম ওইবা গারীগী সিস্তেমগী অচৌবা নেতৱর্ক অমা শেমগৎপদা ওইরবসু, লৈবাকসিদা ইলেক্ত্রিকনা চলাইবা গারীশিং শীজিন্ননবা থৌরাং ওইরবসু লৈবাকসিদা মীওইবগী হিংবগী মহাও হেনগৎহন্নবা অমদি অকোয়বগী ফীভমদা অকায়বা পীদবা থবক পায়খৎলি‍। ভারতকী ওইনদি শেন্মিৎলোন অমদি অকোয়বগী ফীভম অনিসি নাকল অনি নত্তে অমনা অমগী মতেং পাংনবনি হায়না লৌই‍।

মরূপশিং, লৈঙাক্কী লৈরিবা থৌরাংশিং অসি অকোয়বগী ফীভম ঙাক শেনবদা অমদি হিংবদা নুংঙাইহনবদা অহেনবা মীৎয়েং চঙলি হায়বসি অদোম্না উবা ফংগনি‍। ঐখোয়গীদমক্তদি মহৌশাগী ফীভম ঙাক্তুনা থমবা হায়বসি প্রোজেক্ত খরখক্তগী নত্তে, মসি পুন্সি মহিং অমনি‍। ঐখোয়না অচৌবা রিনিইউএবল প্রোজেক্তশিং হৌদোকপা মতমদা ঐখোয়গী পুন্সিগী মশক খুদিংমক্তা তরু তরুবা ইনর্জীনা শোয়দনা য়ৌশিন্নবা ঐখোয়না হোৎনৈ‍। মসিগী কান্নবা লৈবাকসিগী কাচিন কোয়া শিনবা থুংনা মীপুম খুদিংমক্তা য়ৌহন্নবা থৌরাং ঐখোয়না লৌখৎলি‍। ঐ অদোমদা খুদম অমা পীজগে‍।

মরূপশিং, হৌখিবা চহী ৬সিদা চাউরাক্না এল.ই.দি. বল্ব করোর ৩৬ লৈবাক শিনবা থুংনা য়েন্থোকখ্রে‍। লৈবাক শিনবা থুংনা এল.ই.দি. স্ত্রীত লাইত করোর ১ হেন্না খিনখ্রে‍। তাবদদি মসি করিসু লৈতনা খল্লমবা য়াই‍। মসিগী মরমদি ঐখোয়না করিগুম্বা পোৎশক নৎত্রগা কান্নবা অমা ইচম চম্না ফংবা মতমদা মসিগী কান্নবা লৈবা লৈতবা ঐখোয়না থোইদোক্না নৈনরুদে‍। অসুম্না নৈনবসি ঐখোয়গী ইনাক্তা লৈতবা পোৎশকখক্তদা তৌগল্লি‍।

মরূপশিং, মসিগী শঙ্গোম মচু মানবা এল.ই.দি. বল্ব অসি লৈত্রিঙৈদদি, মসিগী কান্নবা ঐখোয়দা ফাওরম্মী, অদুবু লৈবা ঙম্বগী ফীভমদি লৈরমদে‍। য়োনবদা শিত্তবনা শাবিনবসু লৈরমদে‍। অদুদি চহী ৬সিদা করি অহোংবা লাক্লে‍? এল.ই.দি. বল্বকী মমল চাউরাক্না শরুক তরা হন্থরে, কম্পেনী কয়াগী বল্বশিং কৈথেলদা থোরক্লে‍। হান্না ৱাত ১০০-২০০গী বল্বনা তৌরমবা থবক্তু হৌজিক্তি ৱাত ৯-১০গী বল্বনা তৌরে‍। য়ুমথোঙ খুদিংদা লৈরকশিংদা এল.ই.দি. থানবদগী চহী অমদা চাউরাক্না মৈ য়ুনিত বিলিয়ন ৬০০লোম শীজিন্নবা হন্থরে অমদি মীয়ামদসু মঙাল নীংথিনা ফংলে‍। মসিদসু নত্তনা চহী খুদিংগী লৈবাক মীয়ামদা লুপা করোর লিশিং ২৪রোম ওইজবা ফংহল্লে‍। হায়বদি এল.ই.দি. বল্ব শীজিন্নবনা মৈগী বিল হন্থহল্লে‍। মসিগী কান্নরবা মায়কৈ অমসু লৈরি‍। এল.ই.দি. বল্ব শীজিন্নবনা চাউরাক্না কার্বোন দাই-ওক্সাইদ তন করোর ৪ মহৌশাগী ফীভমদা থাদোকপা হন্থহল্লে, হায়বদি পোল্লুসন হন্থহল্লে‍।

মরূপশিং, মীপুম খুদিংমক্তা মৈ ফংহল্লে, মরাং কায়না ফংহল্লে‍। ঐখোয়গী মহৌশাগী ফীভম, ঐখোয়গী নুংশিৎ, ঐখোয়গী ঈশিংসু শেংহন্দুনা থমবা হায়বা ৱাখল্লোনসিদা ঐখোয়না লেপ্পা নাইদনা হোৎনরি‍। সোলার ইনর্জীগী মতাংদসু হায়রিবা ৱাখল্লোনসি ঐখোয়গী থৌশিল অমদি খুজিন-থৌরাংদসু উবা ফংলি‍। অদোমসু খনবিয়ু, ইং ২০১৪দা সোলার পৱারগী মমল য়ুনিত অমদি লুপা ৭-৮ ওইরম্মী‍। ঙসিদি মসিগী মমল লুপা ২ সিকিদগী লুপা অনি মখায় ফাওবদা হন্থরে‍। মসিদগী ইন্দস্ত্রীশিংনা চাউনা কান্নবা ফংদুনা থবক্কী খুদোংচাবা হেনগৎহন্দুনা লৈবাক মীয়ামদা থবক ফংহল্লে‍। লৈবাকসিদতা নত্তনা মালেম পুম্বনা ভারত্তা কমদৌনা সোলার পৱার মমল অসুক হোঙনা ফংলিবনো হায়না নৈনরি‍। ভারত্তা পায়খৎলিবা সোলার পৱারগী থবকশিংসিনা নৈনবা অসি হেন্না হেনগৎলকখিগনি‍। অসিগুম্বা অচৌবা খোঙথাঙশিংনা মরম ওইরগা ভারত অসি তরু তরুবা ইনর্জীগী খ্বাইদগী পুক্নীং চিংশিংন্নিংঙাই ওইবা কৈথেল অমনি হায়না লৌনরি‍। ঙসি মালেমদা রিনিউএবল ইনর্জীগী মায়কৈদা খোঙ থাঙজিনবগী ৱাফম খন্নরিবসিদা ভারতপু তমজনিংঙাই ওইবা মফম অমা ওইনা উনরি‍।

মরূপশিং, ভারত্তা মালেমগী, মীওইবা খুন্নাইগী, অসিগুম্বা থাজবা উবসিদা ঐখোয় মালেম পুম্ববু পুনশিন্নবা হোৎনবদা পুক্নীং লূপ্লি‍। ৱাখল্লোন অসিগী মহৈনি আইসা, হায়বদি ইন্তরনেসনেল সোলার এলাইএন্স (আইসা)‍। মালেম অমা, নুমিৎ অমা, গ্রিদ অমগী মরুমদা মসিগী ৱাখল্লোন অসিনা লেপ্লি‍। মসি সোলার ইনর্জী হেন্না পুথোক্নবা অমদি হেন্না শীজিন্ননবা মালেম পুম্ববু অমত্তা ওইনা পুনশিন্নবা থৌরাং অমনি‍। পান্দমদি মালেম অসিগী মাঙদা তাদুনা লৈরিবা লাংফম অসিবু হন্থহনবা অমদি খ্বাইদগী পীকপা, খ্বাইদগী লায়রবা লৈবাকশিংদসু মখোয়গী মথৌ তাবা মৈ মরাং কায়না ফংহনবনি‍।

মরূপশিং, মায়কৈ অমদা য়েংবদা সোলার ইনর্জীনা শীজিন্নরিবা মীয়ামবু মৈগী বতনদা মপুং ফানা কন্ত্রোল তৌহন্দুনা হেন্না প্রদক্তিব ওইহল্লে‍। মৈ পুথোক্লিবা অতোপ্পা পাম্বৈশিংদা মীচম মীয়ামনা শরুক য়াশিনবগী চাং অসি লৈতে হায়বা য়াই‍। অদুবু সোলার ইনর্জীগী মতাংদদি য়ুমথক্তা ওইরবসু, লোয়শঙ নৎত্রগা ফেক্তরীগী য়ুমথক্তা ওইরবসু, অহাঙবা মফম অমবু ফংলবদি মীচম মীয়ামসু মখোয়গী মথৌ তাবগী মতুং ইন্না মৈ পুথোকপা য়ারে‍। মসিগীদমক্তা লৈঙাক্না চাউনা মনা পীরি, মতেংসু পাংলি‍। মৈ পুথোকপদা ইরোমদোম লেপচবা ঙম্নবগী থৌরাং অসিদা ঐখোয়গী মহৈ মরোং পুথোক্লিবশিংসু য়াওশিল্লক্লি‍।

মরূপশিং, ঐখোয়গী লৌমীশিং ঙসিদি য়াম্না মতিং লৈরে, কয়ামুক মখোয়গী মচাক মথুম লৈরবগে হায়বদা ঙসিদি মখোয়না অমত্তা নত্তনা মখল অনিগী প্লান্তশিং থমদুনা লৈবাকসিদা মতেং পাংলি‍। প্লান্ত অমদি ঐখোয় পুম্নমক্তা চেং-হৱাই পীরিবা, ঐখোয়গী চীঞ্জাক পীরিবা মহৌশাদগী চৎনরকপা লৌউ-শিংউনি‍। অদুবু হৌজিক্তি য়ুমথোঙশিংদা মৈ য়ৌহনগদবা অতোপ্পা মখলগী প্লান্ত অমসু ঐখোয়গী লৌমীশিংনা পায়খৎলি‍। অহানবা প্লান্ত অসিনা লৈহাও লৈবা লৌফমশিংদা ঐখোয়গী লৌমীশিংনা থাইনদগী চত্থরকপা লৌউ-শিংউগী থবক্নি‍। অদুগা অনিসুবা অসিনা সোলার পৱার প্লান্তনি, মসি লৈহাও লৈতবা, ফৌথোক লৈতবা লৌফমশিংদা পায়খৎকদবনি‍। হায়বদি লৌমীশিংগী লৌ উবা য়াদবা মফমশিংসু কান্নবা মওংদা শীজিন্নরগনি, মদুদগীসু লৌমীশিংগী শেন্থোক হেনগৎহল্লগনি‍।

কুসুম স্কিমগী মখাদা ঙসি লৌমীশিংদা অহেনবা লৌফমশিংদা অসিগুম্বা সোলার প্লান্তশিং পায়খৎপদা মতেং পাংলি‍। লৌফমদা সোলারগী মৈ পুথোকপনা ঐখোয়গী লৌমীশিংগী মথৌ তাবা মৈ মপুং ফানা শীজিন্নবা ফংহল্লগনি অমদি অহেনবা মৈসু য়োনবা য়ারগনি‍। মধ্য প্রদেশকী লৌমীশিংসু মখোয়গী অহেনবা শেন্থোক তানবগী থৌরাং অসিবু হরাওনা লৌশিন্দুনা ভারতপু মৈ এক্সপোর্ত তৌবা ঙম্নবা পায়খৎলিবা থৌরাং অসিবু শোয়দনা মায় পাকহল্লক্কনি হায়না ঐহাক্না মপুং ফানা থাজৈ‍। ঐনা থাজবা অসুক য়াম্না থম্লিবসিগী মরমদি মধ্য প্রদেশকী লৌমীশিংনা হোৎনববু মহৈ ওন্থোক্তুনা উৎলি‍। অদোম্না তৌরিবা থবকশিং ঙসিদি খন্ন-নৈনবগী হীরম অমা ওইরে‍। অদোম্না অতৈবু তুংদা থম্লম্লগা গেহু পুথোকপদা রেকোর্দ থম্লিবা মওং অসি পেন্নিংঙাই ওই‍। কোরোনাগী অসিগুম্লবা লুরবা তানফম অসিদা লৌমীশিংনা রেকোর্দ থুগাইবা মওংদা পুথোক্লিবা, মধ্য প্রদেশ লৈঙাক্না রেকোর্দ থুগায়বা মওংদা লৈশিল্লিবা অসিদা অদোমবু থাগৎপদা মতিক চায়‍। মরম অসিনা, মৈ পুথোকপগী মতাংদসু মধ্য প্রদেশগী তৌবা ঙমবদা ঐনা মপুং ফানা থাজৈ‍। নোংমদি কুসুম স্কিমগী মখাদা মধ্য প্রদেশকী লৌমীশিংনা রোকোর্দ ওইবা মওংদা মৈ পুথোক্লে হায়বা পাউ তারক্কনি হায়না থাজবা থম্লি‍।

ইচিন ইনাও পুম্নমক, ঐখোয়গী ইনাক্তা লৈবাকসিদা পুথোকচবা হেন্না ফবা সোলার পেনেল, হেন্না ফবা বেত্তরী, খ্বাইদগী অথোইবা স্তোরেজ কেপাসিতী লৈত্রিফাওবা ঐখোয় সোলার পৱারগী মপাঙ্গলবু মপুং ফানা শীজিন্নবা ঙমখিরোই‍। হৌজিক হীরম অসিদা খোঙজেল য়াঙনা চঙশিল্লি‍। আত্মনিরভর ভারত অভিয়ানগী মখাদা হৌজিক লৈবাকসিগী পান্দমদি সোলার পেনেল য়াওনা খুৎশু খুৎলায় পুম্বা মপান্দগী পুশিল্লকপদা তাংবা লেপ্পা অসিনি‍। হৌজিক লৈরিবা লৈবাকসিগী সোলার পি.ভি. মোদ্যুল পুথোকপগী মঙম অসি য়াম্না থুনা হেনগৎহন্নবা পান্দম থম্লি‍। মরম অসিনা ইরমদমদা পুথোকচরিবশিংবু পুক্নীং থৌগৎনবা থৌরাং কয়া লৌখৎলি‍। হৌজিক্তি কুসুম স্কিমগী মখাদা পায়খৎপা পম্পশিং অমসুং রুফ-তোপ পেনেলশিংদা ভারত্তা পুথোকচবা সোলার ফোতো ভোল্তেক সেল অমদি মোদ্যুলশিং শোয়দনা শীজিন্ননবা থৌরাং পায়খৎখ্রে‍। মসিগী মথক্তা লৈঙাক্কী লোয়শঙশিং অমসুং অতোপ্পা লৈঙাক্কী মখাদা লৈবা ইনস্তিত্যুসনশিংনা লৈগদবা সোলার সেল নৎত্রগা মোদ্যুলশিং মেক ইন ইন্দিয়া ওইগদবনি হায়বা ফিরেপ লৌখ্রে‍। মসিদসু নত্তনা পৱার প্লান্ত শেমগৎকদবা কম্পেনীশিংনা সোলার পি.ভি. পুথোক্নবগীদমকসু পুক্নীং থৌগৎলি‍। ঙসি সেক্তর অসিদা থবক তৌরিবা ওন্ত্রপ্রিন্যুরশিংদা, নহা ওইরিবা মরূপশিংদা, স্তার্ত-অপশিংদা, এম.এস.এম.ই.শিংদসু তাঞ্জা অসিগী কান্নবা লৌহৌনবা ঐনা হায়রি‍।

ইচিন ইনাওশিং, ইরোমদোম লেপচবা হায়বসি ঐখোয়গী পুক্নীংদা থাজবা লৈরবখক্তদা তশেংনা ফংবা ঙমগনি‍। ইশাদা থাজবা হায়বসি লৈবাক পুম্বনা, সিস্তেম পুম্বনা লৈবাক মীয়ামগা চৎমিন্নরবা মতমদা লাক্কদবনি‍‍। কোরোনা লাংফমনা পুরক্লিবা ফীভম অসিগী মরক্তা ভারতনা থবক অসি তৌরি, লৈঙাক্না ইশাদা থাজবা থমবা হায়বা ৱাখল্লোন অসি পুরক্নবা হোৎনরি‍। লৈঙাকশিংনা পাক্না য়ৌবা ঙমদবা খুন্নাইগী অদুগুম্লবা থাক অদুদা ঙসিদি লৈঙাক অসিগী লৈঙাক্লোন অমদি পান্দম অনিমক য়ৌবা ঙম্লি‍। প্রধান মন্ত্রী গরিব কল্য়ান য়োজনাগী মতাংদা য়েংবিয়ু, লোকদাউনগী হেক মতুংদা লৈঙাক অসিনা অহানবা খোঙথোং ওইনা লৈবাক্কী খ্বাইদগী লায়রবা মীওই করোর ৮০দা লেম্না চেং-হৱাই য়ৌহন্নবা, মখোয়গী ফুরিৎখাউদা শেন খর-খরা য়াওজনবা থৌরাং লৌখৎখি‍। অদুগা লোকদাউন হাংদোরকপদা লাক্কদৌরিবা মতম অসি নোংজুথা, কুম্হৈ হরাওগী মতমনি হায়বসি লৈঙাক অসিনা ফাওখি‍। ফীভম অসিদা লায়রবশিং অসিদা হায়রিবা মতেং অসি মখা তানা ফংহনবা মথৌ তাই‍। মরম অসিনা থৌরাং অসিবু মখা চত্থহনখ্রে‍। হৌজিক্তি লায়রবা ইমুংশিংনা নবেম্বর ফাওবা চেং-হৱাই লেম্না ফংলগনি‍। মসিদসু নত্তনা প্রাইভেত সেক্তরগী শিন্মী লাখ কয়াগী ই.পি.এফ. একাউন্ততসু লৈঙাক্না মপুং ফানা শেনখায় পীরি‍। মতৌ অসুম্না পি.এম.-স্বনিধি স্কিমগী মখাদা সিস্তেমনা খ্বাইদগী য়ৌশিনবা ঙমদবশিংগীসু ফীভম ফগৎহল্লি‍। ঙসিদি থৌরাং অসিনা লম্বী মতাইদা পোৎফম ফম্লিবশিং, থেলা ইল্লিবা মীওই লাখ কয়াদা লুপা লিশিং ১০ ফাওবগী অহোংবা শেন্থং বেঙ্কশিংদগী ফংবা হৌরে‍। ঐখোয়দা খ্বাইদগী কান্নবা মরূপশিংনা মখোয়গী পীক্লবা লল্লোন ইতিক্কী শিনফমবু কঞ্জবা, মখা চত্থহনবা ঙমহন্নবগী ৱাফমসি কনানা করমবা মতমদা খনখ্রবগে? হায়বদি মায়কৈ অমদা অপীকপা, ময়ায় ওইরপ চাউবা কোতেজ ইন্দস্ত্রীশিং অমসুং অচৌবা ইন্দস্ত্রীশিংগী মরমদা ৱাখল থাদরি, নাকল অমরোমদনা পীকচরবসু ঐখোয়দা কান্নরবা লল্লোন-ইতিক তৌবশিংগী অৱাবসু উরি‍।

মরূপশিং, লৈঙাক্কী ওইরবসু নৎত্রগা খুন্নাইগী ওইরবসু, অসিগুম্লবা অচৌবা শীংনবা অসিবু মায়োক্ননবা ঐখোয়গী খ্বাইদগী চাওবা থৌনা হাপ্লিবসি মিনুংশি অমসুং মীৎশিং নাশিংবা অসিনি‍। ঙসি অদোম্না মধ্য প্রদেশপু, লৈবাক পুম্ববু খুমাঙ চাউশিলহন্নবা য়ুমদগী থোরকপা মতমদা অদোমগী থৌদাং অমসু মতম পুম্নমক্তা নিংশিংদুনা লৈবিয়ু‍। মিতর অনিগী অরাপ্পা, মায়দা মায়খুম অমদি খুৎ-শা সাপোন্না সেকেন্দ ২০ হামদোকপা, হায়রিবা চৎন-পথাপশিং অসি মতম পুম্নমক্তা ঙাকপিয়ু‍। অমুক্কসু হন্না অদোমবু, মধ্য প্রদেশকী অসিগুম্লবা পৱার প্লান্ত অসিগীদমক হরাও তয়ামবা ফোঙদোকচরি‍। অদোম মীৎ শিংনা লৈবিয়ু, চেকশিন্না লৈবিয়ু, হকচাঙ ফনা লৈবিয়ু‍। অদোমগী লমন তোনশিঞ্জরে‍!

*****