খুরুমজরি!! ময়াম পুম্নমক নুংঙাইরমগনি হায়না ঐহাক্না খল্লি!! লৈবাক অমা লেপ্পা লৈতনা চহি ৯৫ শেবা তৌরকপা হায়বা অসি লুপ অমগী ওইনদি অচৌবা ৱাফম অমা ওই। আই.সি.সি, ইন্দিয়ন চেম্বর ওফ কম্মর্সনা নোংপোক থংবা ভারত অমসুং অৱাং নোংপোক্কী চাউখৎ থৌরাংদা, মরু ওইনা মফম অদুগী মেন্যুফেকচরিং য়ুনিৎশিংদা থৌদাং লৌরকখি। মসি য়াম্না ইতিহাসিক ওই। আই.সি.সি.গীদমক থৌদাং লৌখিবা দিগনিতরী খুদিংমক ঐহাক্না থগৎপা ফোংদোকচরি।

মরূপশিং, ১৯২৫দা ভারত শেমখিবদগী হৌনা নীংখা তম্বগীদমক লান শোকনখিবা অদু আই.সি.সি.না থেংনহৌখি। মসিনা ফীভম শোক্না চাং তাংখিবা অমসুং চানবা চিঞ্জাক্কী ওইবা অৱাবা থোকখিবা অদু থেংনহৌখি। অমসুং ভারতকী গ্রোথ ত্রেজেক্তরীগী শরুক অমসু ওইরি। নোংপোক

ঐখোয়গী লৈবাক অসিনা তোঙান তোঙানবা অৱাবশিং ময়োক্নরিঙৈ চৈরক অসিদা হৌজিক এ.জি.এম. পাংথোক্লি। মলেম পুম্বনা কোরোনাভাইরসকা লান্থেংনরি; ভারতসু লান্থেংনরি, অদুবু অতোপ্পা মখল কয়াগী অৱাবশিং অসিসু লেপ্পা লৈতনা ময়োক্নরি।

মফম অমদা ঈচাওগী অৱাবা; মফম অমদা লোকস্তশিংগী চৈথেংগী অৱাবা ময়োক্নবা; মফম অমদা লেন তাবনা থোকহনবা সমস্যা অমরোমদা মফম অমদা থাওগী ফিল্দশিংদা মৈ চাকপা নত্রগা অপীকপা য়ুহাশিং হাবা। অমসুং মসিগী থক্তা নোংলৈ নুংশিৎ অনিনা অমা লোইবগা অমনা নোংপোক থংবা অমসুং নোংচুপ থংবা লমদমশিংগী সমুদ্র তোর্বানশিংদা শীৎচিন্দুনা তশেংনা অৱাবা কয়া থোকহনখি।

অসিগুম্বা নোংলৈ নুংশিৎ খুদিংমক ঐখোয়না পুন্না লান্থেংনরি। অয়াম্বা মতমদা মতম্না ঐখোয়দা চাংয়েং তৌরি। করিগুম্বা মতমদা অৱাবা অমসুং খুদোংথীবা কয়া মতম অমত্তদা পুন্না থোরকই।

অদুবু ঐখোয়না হায়রিবা মতাংশিং অসিদা ঐখোয়গী পুক্নিং লেপ্পনা অফবা তুংলমচৎ অমগী থাজবা পীবা থেংনখ্রে। মতৌ করম্না ঐখোয়না অৱাবা অমা মায়োক্নরি অমসুং কয়াম কন্না ঐখোয়না খুদোংথীবশিং লান্থেংনরি হায়বসিনা লাক্কদবা খুদোংচাবশিং তাক্লি।

মরূপশিং, মন কে হার, মন কে জীতে জীত, হায়বা হায়নবা অমা লৈ, মসিনা তাকপদি ঐখোয়গী খাংবা কনবা অমসুং পুক্নিং চঙবনা ঐখোয়বু মাংলোমদা লমজিংবী। হান্ননা মাইথীরে খনবা অদুনা মহাক্কী মাংদা খুদোংচাবা খরখক্তং ফঙই। অদুবু মাই পাক্নবা হোৎনরিবা অমসুং মাংদা চঙশিল্লিবা, অমসুং অমগা অমগা মতেং পাংনরিবা অদুনা মহাক্কী মাংদা খুদোংচাবা হেন্না লাকই।

মরূপশিং ঐখোয়গী ইকাইখুম্নবা, পুন্না খ্বাইদগী চাওবা অৱাবশিং মায়োক্নবগী থৌনা, ঐখোয়গী পুক্নিং চঙবা অমসুং ঐখোয়গী খাংবা কনবনা লৈবাক অমা ওইবগী খ্বাইদগী কনবা পাঙ্গলনি।

অৱাবা অমহেক্তা ময়োক্ননবা পাম্বৈদি খাংবা কনবনি। অৱাবা নংবা মতমশিং অসিনা ভারতকী অখাঙ কন্নবা অসি মতম খুদিংমক্তা হেনগৎহল্লি অমসুং প্রজাশিংনা লৌবা ৱেরেপ অদু থৌনা অমসুং ইথিল হাপলি। মসিগা মান্নবা ৱাখল্লোনশিং অসি ঙসি ঐহাক্না অদোমগী মাইথোংদা অমসুং প্রজা কোতি কয়ানা হোৎবা উবা ফংলি। কোরোনাগী চৈথেং অসি মলেম পুম্বা শীনবা থুংনা নঙলি। মলেম পুম্বনা মসিগা লান্থেংনরি। ঐখোয়গী লৈবাক অসিনা কোরোনা লান্মীশিংগী মতেংগা লোয়ননা লান্থেংনরি।

অদুবু পুম্নক অসিগী চৈরক্তা প্রজা খুদিংমক্না মসিগী অৱাবশিং অসি খুদোংচাবদা ওন্থোক্নবা ৱারেপশিং লৌরি; ঐখোয়না মসি লৈবাক অসিগী অফবা তানফম অমা ওন্থোক্কদবনি।

মসিগী তানফম অসি করিনো? অত্মানির্ভর ভারত, মরোমদোম লেপ্পা ঙম্বা ভারত!! মসিগী মরোমদোম লেপ্পগী ৱাখল্লোন অসি ভারত মচা কয়ানা চহি কয়াদগী মঙলান অমগুম্বা মঙজরক্লি।

অদুবু ভারত মচা খুদিংমক্কী ৱাখলদা অচৌবা আশা অমা লৈরক্লি- ঐহাক্না আশা তৌই মদুদি ঐখোয়না মেদিকল ইক্যুপমেন্তদা ঐখোয়না মীপাল তাংদবা! ঐহাক্না আশা তৌই মদুদি ঙাকশেলগী পোৎচৈ শাবদা ঐখোয়না মীপাল তাংদবা! ঐহাক্না আশা তৌই মদুদি কোয়লা অমসুং মিনরেলশিংগী সেক্ররদা ঐখোয়না মীপাল তাংদবা!

ঐহাক্না আশা তৌই মদুদি চানবা থাও অমসুং হারশিংদা ঐখোয়না মীপাল তাংদবা! ঐহাক্না আশা তৌই মদুদি ইলেক্ত্রোনিক্কী পোৎচৈ শাবদা ঐখোয়না মীপাল তাংদবা! ঐহাক্না আশা তৌই মদুদি সোলর পেনেলশিং, বেত্তরিশিং অমসুং চিপশিং পুথোকপদা ঐখোয়না মীপাল তাংদবা। এভিএসন সেক্তরদা ঐখোয়না মীপাল তাংদবা হায়না ঐহাক্না আশা তৌই। মসিগী মশিং থীঙমদ্রবা আশাশিং অমসুং অপাম্বশিং অসিনা মতম পুম্বদা ভারত মচা খুদিংমক্তা ইথিল পীরি।

মরূপশিং, হৌখিবা চহি ৫-৬ অসিদা ভারতকী মরোমদোম লেপ্পা ঙম্বগী পান্দম অসি লৈবাক অসিগী পোলিসি অমসুং প্রেক্তিসতা য়াম্না মখা পোনবা অমা ওইরকপগী মরম অনি। হৌজিক কোরোনা লাইচৎনা মসি করম্না থুজিনহনগনি হায়বা ঐখোয়দা পারা অমা তম্বীরে। মসিগী পারা অসিদগী ‘আত্মনির্ভর ভারত’ কেম্পেন হৌরে।

মরূপশিং ঐখোয়না ইমুংদসু উরে মদুদি অঙাং অমা, নুপামচা, নত্রগা নুপীমচা অমা চহি ১৮-২০ শুরকপদা ঐখোয়না মনিংতম্না অমসুং মরমোদোম হিংনবা হায়রি। অসিগুম্না মীপাল তাংদবা ভারতকী অহানবা পারা অসি ইমুংদগী হৌরে। ভারতনা মরোমদোম লেপ্পসু ঙম্নবা হোৎনগদবনি।

মরূপশিং ‘আত্ম নির্ভর ভারত’ কেম্পেন অসি ইচম চম্না ভারতনা মীরৈবাক্তা মীপাল তাংবা হন্থগদবনি হায়বনি। লৈবাক অসিনা মীরৈবাক্তগী নমদুনা পুশিলহল্লক্লিবা খুদিংমকশিং অসি ভারত মনুংদা পুথোক্নবা ঐখোয়না হোৎগদবনি। হায়রিবা পোত্থোকশিং অদু ভারতনা করম্না মীরৈবাক্তা থাদোকপা ঙমদগে হায়বা মাইকৈদা ঐখোয়না কন্না হোৎনগদবনি।

মসিগী মথক্তা ভারতকী অপীকপা ইন্তরপ্রিন্যুরশিং, ঐখোয়গী আর্তিসিয়ানশিং, অমসুং সেল্ফ-হেল্প গ্রুপশিংগা মরি লৈনবা লাইরবা মিলিয়ন কয়ানা শাবা অমসুং চহি দেকেদ কয়া মফমশিংদা য়োন্দুনা লাক্লবা পোৎশিং নত্রগা পোত্থোকশিং অসি মপান্দা চাং নায়না থাদোক্নবসু হোৎনগদবনি। চপ মান্নবা পোৎশিং অসি অতোপ্পা লৈবাক্তগী পুশিল্লপগী চৎনবী অসি ঐখোয়না কন্ত্রোল তৌগদবনি।

মসিগী প্রেক্তিস অসিনা ঐখোয়না মসিগী অপীকপা ইন্তরপ্রিন্যুরশিং অসিদগী পোৎচৈশিং লৈবা খক্তা নত্তনা, মখোয়দা পৈশা পীবা খক্তা নত্তনা নাকল অমা মখোয়গী হোৎনজমলদা মনা পীবনি অমসুং মসিনা মখোয়দা ইকাই কুম্নবা উৎকনি। ঐখোয়না মসিগী থৌওং অসিনা মখোয়গী থমোয়দা কয়াম য়াম্না মমি তাগনি অমসুং কয়া য়াম্না মখোয়না হরাওবা ফাওগনি হায়বা খঙদে!

মরম অদুনা হৌজি ‘ভোকেল ফোর লোকল’গী মতম ওইরে। হৌজিক খুঙ্গং খুদিংমক, দিস্ত্রিক্ত খুদিংমক, স্তেৎ খুদিংমক অমসুং লৈবাক শিনবা থুংনা মরোমদোম লেপ্পা ঙমহনবা মতম ওইরে।

মরূপশিং স্বামি বিবেকানন্দা মমাদা চিথী অমদা ইরমখি -হৌজিক্কী ওইনা থবক তৌগদবা খ্বাইদগী লায়বা পাম্বৈদি ভারত মচাশিংবু মখোয়না পুথোকচবা পোৎ শিজিন্নহনবা অমসুং অতোপ্পা লৈবাক্তা ভারতকী পোত্থোকশিংগী কৈথেল লৈহনবনি। স্বামি বিবেকানন্দা জিনা তাক্লম্বা মসিগী লম্বেল অসিনা কোবিদ মতুংগী ৱার্ল্দদা ভারতকী ইন্সপিরেসন অমা ওইরগনি। হৌজিক লৈবাক অসিনা ৱাশক্লি অমসুং লৈবাক অসিনা খোংথাংশিংসু লৌখৎলি।

আত্ম নির্ভর ভারত কেম্পেনগী মখাদা লাওথোকখিবা মরুওইবা শেমদোকপশিং অসু থুনা ইমপ্লিমেন্ত তৌরগনি।

এম.এস.এম.ই.শিংগী দিফিনিসনগী স্কোপশিং চাওথোকপা, এম.এস.এম.ই.শিং মতেং পাংনবা কোতি লিশিং কবাগী অখন্নবা ফন্দশিং শিল-লাংবশিং অসি ঙসিদি অশেংবা অমা ওইরক্লে। নত্রগা আই.বি.সি.গা মরি লৈননা ৱারেপ লৌবা, অপীবা অশোইবশিং হন্থনবা নত্রগা ইনবেস্তমেন্তশিং থুনা ত্রেক তৌনবা প্রোজেক্ত দিবেলপমেন্ত সেলশিং শেম্বনচিংবা মসিগুম্বা থবকশিং হান্ননা পাঙথোকখ্রে।

হৌজিক মরুওইনা কোয়লা অমসুং মাইনিং সেক্তর কয়ামরুম হেন্না চাংদম্নবা হেনগৎহন্দুনা লাওথোকখ্রবা শেমদোকপশিং অসিগী খুদোংচাবা মপুংফানা লৌনবা ইন্দস্ত্রীনা মাংদা চোংথোরক্কদবনি। নহা ওইরিবা মরূপশিংসু মাংদা চোংথোরক্কদবনি।

মরূপশিং লৌউ-শিংউগী অমসুং খুঙ্গংগী শেন্মিৎলোন্দা হন্দক্তা লৌখিবা পোলিসি ৱারেপশিং অসিনা চহি কয়া অথিংবা থম্লম্বদগী লৌউ-শিংউগী শেন্মিৎলোন অসি মনিং তমখ্রে। হৌজিক ভারতকী লৌমীশিংনা মখোয়গী পোত্থোকশিং লৈবাক অসিগী মফম অমা হেক্তদা য়োনবা য়াবগী মনিংতম্বা লৈরে।

ইসেন্সিএল কোমোদিতিজ এক্ত এ.পি.এম.সি. এক্ততা শেমখিবা এমেন্দমেন্তশিংনা লৌমীশিং অমসুং ইন্দস্ত্রীগী লম্বেল হাংদোকখ্রে। মসিনা লৌমী অমসুং খুঙ্গংগী শেন্মীৎলোন শোইদনা ফগৎহল্লগনি। মসিগী ৱারেপশিং অসিনা লৌমীনা প্রদ্যুসর অমা অমসুং মহাক্কী প্রদ্যুসনা প্রদক্ত অমা ওইনা মশক খংলে।

মরূপশিং, মসিনা লৌমীশিংগী বেঙ্ক একাউন্তশিংদা হকথেংননা শেল ত্রান্সফর তৌবগী ৱারেপ নত্রগা এম.এস.পি. নত্রগা মখোয়গী পেন্সন স্কিমগী ৱারেপ ওইরসু ঐখোয়গী খোংথাংদি লৌমীশিং এম্পাৱর তৌবনি। হৌজিক লৌমীশিং অচৌবা কৈথেলগী লান্মী অমা ওইনবা মতেং পাংলি।

মরূপশিং, হৌজিক্কী ভারত্তা প্রমোৎ তৌখ্রবা ক্লস্তরদা বেজ তৌবা লোকল পোত্থোক্কী খোঙথাং অসিনা পুম্নমক্কী খুদোংচাবা অমা ওইরগনি। দিস্ত্রিক্তশিং, ব্লোকশিংদা পুথোকপা খুদিংমক্কী মরি লৈনবা ক্লস্তরশিং মনাক নক্না শেমগৎলগনি। খুদম ওইনা হায়রবদা লীমোন্দা য়ুম্ফম ওইবা ইন্দ্রস্ত্রীশিংনা মনাক নকপদা লৈবা নোংচুপ বঙ্গালগী লীমোন পুথোকপা লৌমীশিংদা মপাঙ্গল হাপ্লগনি।

উমংগী পোত্থোকশিং মরাং কায়না খোমজিল্লিবা ত্রাইবল ইচিল ইনাওশিংদা য়াম্না নক্না মোর্দর্ন প্রোসেসিং য়ুনিৎশিং ফঙহল্লগনি। মসিগী মথক্তা ৱা অমসুং ওর্গানিক পোত্থোকশিংগী ক্লস্ত্রশিংসু শেমলগনি। সিক্কিমগুম্না অৱাং নোংপোক্কী মফম খুদিংমক ওর্গনিক ফার্মিংগী অচৌবা হব অমা ওইবা য়ারগনি। ওর্গানিক কেপিতল অমা শেমগৎপা য়ারগনি।

করিগুম্বা আই.সি.সি.গা মরি লৈনবা ত্রেদর পুম্নমক্না খঙদোকপা ঙম্লবদি অৱাং নোংপোক্তা ওর্গানিক ফার্মিং অসি অচৌবা ইহৌ অমা ওইরকপা য়াগনি। অদোম্না মালেমদা মশক তাকপা য়ারগনি অমসুং মালেমগী কৈথেলশিং খুদুম চনবা ঙম্লগনি।

মরূপশিং, নখোয় পুম্নমক্না অৱাংনোংপোক অমসুং নোংপোক ভারত্তা চহি দেকেদ কয়া থবক তৌদুনা লাক্লি। সরকারনা লৌখৎলিবা খোংথাং খুদিংমক অসিনা নোংপোক অমসুং অৱাং নোংপোক্কী মীয়ামদা চাউনা কান্নবা পীরগনি।

কোলকতা মশামক অচৌবা লুচিংবা অমা অমুক হন্না ওইরকপা য়াগনি হায়না ঐহাক্না খল্লি। মমাংগী মাইপাকখিবশিংদগী ইথিল লৌদুনা তুংলমচৎতা কোলকতানা মফম পুম্বগী চাউখৎ থৌরাংদা লুচিংবা য়াগনি।

নোংচুপকী শিন্মী, লনথুম অমসুং রিসোর্সশিংগী মতেংনা মসিগী মফম অসি খোংজেল অসিগী মরমদা অদোমদগী কনানা হেন্না খঙগনি!

মরূপশিং, চহি ৫গী মতুংদা হায়বদি চহি ২০২৫দা, অদোমগী ওর্গনাইজেসন অসি চহি ১০০ মপুং ফারগনি। অমরোমদনা, চহি ২০২২দা ভারতনা নীংখা তমখিবগী চহি ৭৫ মপুং ফারগনি। অদোমগী ওর্গনাইজেসন অসিগী অমসুং নখোয়গী মীহুৎ খুদিংগী ওইনা অচৌবা ৱারেপ অমা লৌবগী মসি খ্বাইদগী মতাং চারবা তানফম অমনি। আই.সি.সি.না ‘অত্মা নির্ভর ভারত কেম্পেন’গীদমক অঙম্বা থাক্তা অনৌবা পান্দম ৫০-১০০ থম্নবসু ঐহাক্না হায়জরি।

ইন্দস্ত্রী খুদিংমক অমসুং মসিগা মরি লৈনবাললোন ইতিক্কী য়ুনিৎ অমসুং মীওই খুদিংমক্না পান্দমশিং অসি থমগদবনি। অদোমনা পান্দম অসিগী মাইকৈদা চৎপা হেল্লিবা মখৈ, মসিগী কেম্পেন অসিনা নোংপোক থংবা ভারত অমসুং অৱাং নোংপোক থংবা ভারত অসিদা হেন্না খোঙজেল য়াংহল্লগনি।

মরূপশিং, বঙ্গালনা ইতিহাসিক ওইনা পোৎ শাবদা খ্বাইদগী মকোক থোংলম্বা অদুবু নৌহৌননা হীংগৎহনবা তাই। ঐখোয়না তাদুনা লাক্লিবা “বঙ্গালনা ঙসি খনবা অদু ভারতনা হয়েং খনগনি” হায়বা অসিদগী ইথিং পোকহন্দুনা মাংলোমদা চংশিনসি। ভারতকী শেন্মীৎলোন অসি কম্মান্দ অমসুং কন্ত্রোলদগী প্লগ অমসুং প্লেদা ওন্থোকপা মতম ওইরে। হৌজিক মমাংঙৈগী পাম্বৈগী মতম নৎত্রে অদুবু থৌনা লৈনা ৱারেপশিং লৌবা অমসুং চাওনা শেল থাদবা মতম ওইরে।

মলেমগী থাক্তা চাংদম্নবা য়াবা দোমেস্তিক সপ্লাই চেন অমা ভারত অসিদা শেমগৎপা মতম ওইরে।

মসিগীদমক, ইন্দস্ত্রীনা লৈরিবা সপ্লাই চেনগী স্তেকহোল্দর পুম্নমক মতেং পাংদুনা অৱাবা অসিদগী নান্থোক্নবা অমসুং ভেল্যু হেনগৎনবা মখোয়বু খুৎ পাইদুনা লমজিংবিগদবনি।

মরূপশিং,

অত্মা নির্ভর ভারত কেম্পেনগা লোয়ননা চংশিল্লকপা অমসুং কোরোনা ময়োক্নরিঙৈ মতম অসিদা, ঙসি এ.জি.এম. অসিদা মীয়াম, গ্রহ অমসুং কান্নবগী ৱাফম পুখৎলকপা অসি য়াম্না মরু ওইনা লৌই। মীওই খরানা খল্লি অহুম অসি মান্নদে অমসুং তোঙাল্লি অদুবু মসি মদু নত্তে। মীয়াম, গ্রহ অমসুং কান্নবা অসি অমগা অমগা মরি লৈনৈ। অহুম অসি অমুক্তদা চৎমিন্নৈ অমসুং পুন্না লৈমিন্নবা য়াই।

এল.ই.দি. ব্লবশিং গুম্বা খুদম খরা ঐহাক্না পীগে। চহি ৫-৬কী মমাংদা, এল.ই.দি. ব্লব অমা লুপা ৩৫০দগী হেন্না পীরম্মি। ঙসিদি চপ মান্নবা ব্লব অসি লুপা ৫০দা ফংলে। অমুক্তা খন্থৌ! এল.ই.দি. ব্লবশিংগী মমল হন্থরকপা অসিনা লৈবাক শিনবা থুংনা লৈরিবা য়ুম কোতি কয়া অসি য়ৌহনবদা মতেং পাংলি অমসুং মসি হৌজিক্তি স্ত্রীৎ লেম্পশিংদা ইনস্তোল তৌরে। মসিগী ক্বালিতী অসি য়াম্না চাওবনা মসিনা পুথোকপগী মমল হন্থহল্লি অমসুং শেন্দোং হেনগৎহল্লি। মসিনা কনা কান্নহল্লি?

মীয়ামদা কান্নহল্লি। ইলেক্ত্রিক্কী বিল হন্থরকপগা লোয়ননা প্রজাদা কান্নহল্লি। ঙসি এল.ই.দি.শিংগী মপান্দগী ইলেক্ত্রিক্কী বিল হন্থরকপা অসিনা মরম ওইদুনা মীয়াম্না চহি খুদিংগী কোতি লিশিং ১৯ রোম তুংশিনবা ঙম্লি। তুংশিনবা ঙম্বা অসিনা লৈবাক অসিগি লাইরবা অমসুং ময়াই ওইবদা কান্নহল্লি।

মসিদগী গ্রহ অসি কান্নবা ফংলি। সরকারগী এজেন্সিশিংনা অতাবা মমলদা এল.ই.দি. ব্লবশিং য়োনবা খক্তনা চহি খুদিংগী কার্বোন দাইওক্সাইৎকী মিলিয়ন তোন ৪০ রোম থাদোকপা হন্থহল্লি।

মদুদি অনিমক কান্নখি; অনিমক্কী ওইনা মাই পাকপা ঙাক্তনি। অদোমনা করিগুম্বা সরকারগী অতৈ অতোপ্পা স্কিমশিং অমসুং ৱারেপশিং য়েংলুবদা মীয়ামগী, গ্রহগী অমসুং কান্নবগী ৱাখল্লোন অদি হৌখিবা চহি ৫-৬ অসিদা তশেংনা থবক ওইনা ওন্থোক্লি হায়বা উবা ফংগনি।

অদোমনা হৌজিক খঙবিরম্লগনি সরকার অসিনা ঈশিংগী ওইবা লম্বেলদা মীৎয়েং কয়াম চংলি হায়বা অদু। হালদিয়াদগী বনারস ফাওবগী ঈশিংগী লম্বেল শেম্বা হৌখ্রে। হৌজিক ঈশিংগী লম্বেল অসি অৱাং নোংচুপ অসিদসু লৈহনবা শীল্লি।

ঈশিংগী লম্বেলদগী মীয়াম্না কান্নবা ফংলি, মরমদি মসিনা পুথোক-পুশিন তৌবগী মমল হন্থহল্লি।

ঈশিংগী লেম্বেলশিং অসিদগী গ্রহা অসিনা কনাবা ফংলি মরমদি মসিনা ফ্যুল চংবা হন্থহল্লি। অমসুং ঐখোয়না কাওরোইদবদি মসিনা পেত্রোল অমসুং দিজল পুশিল্লকপা হন্থহল্লগনি অমসুং লেম্বীদা ত্রাফিক হন্থহল্লগনি।

পোৎশিংগী মমল হোংথরগনি অমসুং অতেনবা লম্বেলগী খুত্থাংদা থুনা পন্থুংফম য়ৌবা ঙমহল্লগনি। লৈরিবা মীওই অমসুং য়োল্লিবা মীওই অনিমক্না মসিদা কান্নবা ফংলগনি।

মরূপশিং, অতোপ্পা কেম্পেন অমসু লৈবাক অসিদা চৎথরি - অমুক্তং শীজিন্নবা প্লাস্তিক অসি লৈবাক অসিদগী মাংহনখিবা। হীরম অহুম অসি হায়বদি মীয়াম, মহৌশা অমসুং কান্নবা অসি পুম্নমক পনখি।

নোংচুপ বঙ্গালগীদমক মরু ওইনা মসিনা কান্নবা য়াম্না ফংহনগনি। মসিনা নখোয়গী লীমোনগী ওইবা ললোন ইতিক হেনগৎনবা খুদোংচাবা পীরগনি। অদোম মসিগী খুদোংচাবা লৌবিরব্রা? অদোম লীমোন শীজিন্নদুনা য়োম্নবা পোৎচাক শাবা হৌরব্রা? অমরোমদদি অদোম খ্বাইদগী খুদোংচাবা ফংবা য়াবা মফমদা লৈরি।

অদোমনা খুদোংচাবা অসিদগী কান্নবা অদু মখা তানা লৌগদবনি। অদোমনা করিগুম্বা খুদোংচাবা অসি মাংহনবা তারবদি অদোমবু কনানা মতেং পাংগনি? অমুক্তা খন্থৌ! নোংচুপ বঙ্গালনা শাবা লীমোনকী খাউ অদু মীপুম খুদিংনা শীজিন্নবা মতমদা বঙ্গাল মীয়ামনা ফংগদনবা শেন্দোং অদু কয়াম চাউগনি!

মরূপশিং, মীয়ামগী খনবা, মীয়াম্না হোৎনবা অমসুং গ্রহগী খনবা চাউখৎ থৌরাংগী খোঙথাংশিং অসি লৈবাক অসিগী লৈঙাকপগী শরুক অমা ওইরে। ঐখোয়গী তেক্নোলোজিনা খুৎ চংলকপা অসি মীয়ামগী, গ্রহগী অমসুং কান্নবগী ৱাখল্লোনগসু চান্নরি।

ঐখোয়গী বেঙ্কিং অসি য়ু.পি.আই.গী খুত্থাংদা থেংনদনা, শোকনদনা, শেল শীজিন্নদনা ২৪ x ৭ থবক তৌ্বা ঙম্লে। ভিম এপকী খুত্থাংদা ত্রাঞ্জেকসনশিং হৌজিক তৌরিবা অসিনা অনৌবা রেকোর্দশিং থম্বা ঙমখ্রে। রুপে কার্দ অসি হৌজিক্তি লাইরবা, লৌমীশিং, মিদল ক্লাস অমসুং লৈবাক অসিগী সেক্সন খুদিংমক্না পামনবা ওইরক্লি। ঐখোয়না মশা মরোমদোম লেপচবা ভারত অমা ওইনবা ৱারি শাবা মতমদা, চাওথোক্না রুপে কার্দ শীজিন্নবদা য়াদব্রা?

মরূপশিং, হৌজিক্তি লৈবাক অসিদা মতম শাংনদগী বেঙ্কিং সর্ভিসকী লম অসিদা য়াওদনা লৈরম্বা অদুগুম্লবা কাংলুপকী মীওইশিং অদুসু য়ৌবা ঙম্লে। মসিনা দি.বি.তি, জে.এ.এম. (জন্ধন আধার মোবাইল)গী খুত্থাংদা অহোবা লৈতনা বেনিফিসরি কোতি কয়াদা মথৌ তাবা মতেং ফংহনবদা ওইথোকহল্লি।

মসিগা মান্ননা গোভর্মেন্ত ই-মর্কেৎপ্লেস হায়বদি জি.ই.এম. অসিনা সরকারগা লোয়ননা চৎমিন্দুনা মীয়াম্না শেন্দোং ফংনবা খুদোংচাবা অমা পীরি। এম.এস.এম.ই.শিং, অপীকপা সেল্ফ হেল্প গ্রুপশিং অসিনা মখোয়গী গুদশিং অমসুং সর্ভিসশিং অসি জে.ই.এম.গী প্লেৎফোর্মদা ভারত সরকারদা হকথেংননা করম্না পীবগে হায়বা অদোমনা খঙবিরম্লগনি। অদু নত্রবদি লাখ খরাগী তর্নওভর লাকচবা ওন্তপ্রনোর অমনা মহাক্না পুথোকপা পোৎ অমা হেক্তবু কেন্দ্র সরকারদা হকথেংননা য়োনবগী ৱাখল খল্লোই।

মরম অসিনা, আই.সি.সি.না অদোমগী মীহুৎশিং অমসুং মরি লৈনবা মেন্যুফেকচররশিং জে.ই.এম. মশীং য়াম্না য়াওনবা পুক্নিং থৌখৎপিয়ু হায়না ঐহাক্না হায়জরি। করিগুম্বা অদোমগা মরি লৈনবা মেন্যুফেকচরর খুদিংমক্না জে.ই.এম. য়াওবা তারবদি পীকনা ললোন ইতিক তৌবা মীওইনা মখোয়গী প্রদক্তশিং অদু সরকারদা হকথেংননা য়োনবা য়ারগনি।

মরূপশিং, ঐখোয়না গ্রহগী মরমদা ৱারি শাবা মতমদা, অদোমনসু উবা ফংলি মদুদি ঙসি আই.এস.এ. ইন্তর্নেস্নল সোলর এল্লাইয়েন্স অসি মলেম পুম্বগী ওইবা অচৌবা ইহৌ অমা ওইরক্লি। সোলর ইনর্জিগী লমদা ভারতনা মশাগীদমক কান্নগদবশিং উরিবা অদু মলেম পুম্বগা লোয়ননা খঙমিন্নবা হোৎনরি। ইন্দিয়ন চেম্বর ওফ কম্মর্সকী মীহুৎশিংনা মখোয়গী মতেং অমসুং ইনবেজমেন্ত অদু পীবিদুনা লৈবাক অসিগী রিন্যুএবল ইনর্জি, সোলর পাৱর পুথোক্নবা মাইকৈদা পান্দমশিং থমবিনবা ঐহাক্না হায়জরি।

লৈবাক অসিগী সোলর পেনেলগী পাৱর স্তোরেজ কেপাসিতী হেনগৎনবা আর &দি অমসুং অফবা বেত্তরীশিং শারিবা অসিদা ইনবেজ তৌবা। অদোমনা মসিগী থবক অসি তৌরিবা এম.এস.এম.ই.শিং অসিগুম্বা ইন্সতিত্যুসনশিংবু খুৎ পাইদুনা লমজিঙ্গদবনি। অহৌংবা নায়বা মলেম অসিদা, সোলরগী রিচার্জ তৌবা য়াবা বেত্তরীশিং অসিনা ললোন ইতিক্কী ওইনা অচৌবা মফম অমা কল্লগনি। ভারতনা মসিদা মাংজিল থাবা ঙমগদ্রা? ভারতনা মসিদা অচৌবা হব অমা ওইবা ঙমগনি।

ভারতনা নীংখা তম্বগী চহি ৭৫শুগদবা ২০২২গী চহি অমসুং আই.সি.সি.না মখোয়গী চহি চামা মপুং ফাবগী ২০২৫গী চহি অসিগা মখোয়গা মরি লৈনহন্দুনা আই.সি.সি. অমসুং মখোয়গী মীহুৎশিংনা মসিগী হীরমশিং অসিদা পান্দম থম্বা ঙমগনি।

মরূপশিং, মসি খুদোংচাবা খঙদোক্নবা তানফমনি, অদোমনা খুদোংচাবা লৌহৌন্নবা হোৎনৌ অমসুং অনৌবা মায়োললোমদা চংশিল্লু। করিগুম্বা মসি খ্বাইদগী অচৌবা থুদোংথীবা ওইবা তারবদি মসিদগী খ্বাইদগী অচৌবা পারা অমা তমহৌবগা লোয়ননা মসিগী খুদোংচাবা অসি মপুং ফানা লৌহৌগদবনি।

সরকার অসিনা মসিগী পান্দম অসিগীদমক কৎথোক্লি অমসুং অদোমগা পুন্না লেপ্লি হায়বগী থাজবা ঐহাক্না পীরি। অনৌবা ৱারেপশিংগা লো্য়ননা মাংলোমদা চংশিন্নবা চিংনগনু। অনৌবা থাজবা অমগা লোয়ননা মাংলোমদা চংশিনসি!! ভারতনা মশা মরোমদোম লেপা ঙম্বা অসিদা ভারতনা মশাদা থজবা ঙম্বা ওইরক্লি।

গুরুদেব তেগোরনা মহাক্কী শৈরেং ‘নুতোন জুগের ভোর’দা হায় – “চোলাই চোলাই বাজবে জোয়ের মেরী, পাত্রর বেগেই পোথ কেতে জাত্র কোশিশ না আর দেরী” হায়বদি “মাংজিল থানা চংশিন্নবগী খোঙথাং খুদিংমক ইন্দুনা চৎকদবনি। মাংলোমদা চেন্দুনা চৎলিবা খোঙ অদুনা অনৌবা লম্বেল অমা শেমগনি। হৌজিক থেংথবা তৌরগনু।”
 

মসিগী মন্ত্রা অসি কয়াম চাওই হায়বা অমুক্তা খল্লু – খোঙ লেংলবদি অনৌবা লম্বেল শেমগনি। অসিগুম্বা অচৌবা ইথিল অমা ঐখোয়গী ইমাংদা লৈরবদি করিগী লেপতুনা লৈথোকলুগনি।

নখোয়না লীংখৎলিবা অসিনা চহি ১০০ শুবগী পালন তৌবা মতমদা লৈবাক অসিনা চহি ৭৫ শুবগী পালন তৌগনি অমদি মশা মরোমদোম লেপচবা ঙম্বা লম্বেলদা ভারতনা মাংজিল থানা চৎকনি হায়বা ঐহাক্না থাজৈ।

ঐহাক্না ময়ামদা য়াইফ পাউজেল অমুক হন্না পীজরি!

হকচাং ফনা অনা অয়েক য়াওদা লৈবিয়ু!

থগৎচরি!

*****