কোবিদ-১৯ লাইচৎকী ইরাং মনুং অসিদা পোস্তেল দিপার্তমেন্তনা লৈবাক শিনবা থুংনা, পাক-শন্না লৈরিবা মখোয়গী পোস্ত ওফিসশিংগী নেৎৱর্ককী খুথাংদা লৈবাক অসিগী মীয়ামদা মতেং পাংবগী থবক হৌগৎলক্লি। কম্যুনিকেসন্স, লো অমসুং জস্তিস অমসুং ইলেক্ত্রোনিক্স অমসুং আই.তি.গী মন্ত্রী ওইরিবা শ্রী রবী শঙ্কর প্রসাদনা রাজ্য খুদিংমক্কা ভিদিও কনফরেন্সিং তৌদুনা চীফ পোস্ত মাস্তর জেনরেল অমসুং চীফ জেনরেল মেনেজরশিংদা মখোয়গী পোস্তেল নেৎৱর্কপু শেম শাদুনা অমসুং লৈবাক শীনবা থুংনা লৈজদ্রবশিংগী মতেং পাংনবা মিৎকুপ নাহুম শিংনা লৈনবা য়াথং পীখ্রে। ইন্দিয়া পোস্তনা মখা তানা অশেংবা কোরোনা থেংনবা লান্মী অমগুম্না মনুং হঞ্জিনবা অথাপ্পা লমশিংদা মীওই মিলিয়ন কয়াগী আশা অমসুং চংদবা য়াদ্রবা পোৎলম কয়া পুদুনা চৎলি।

চেঙ-চাক অমসুং অকংবা রাসন য়েন্থোকপা

হায়রিবা ভিদিও কনফরেন্স অসিদা, শ্রী রবী শঙ্কর প্রসাদনা অথুবদা চানবা পোৎলম মথৌ তারিবা শোত্থরবা অমসুং খম থেংনা লাইরবা মীওইশিংগী মতেং পাংবদা মিৎয়েং থম্নবা য়াথং পীখি। দি.ও.পি.গী থৌমীশিংনা স্লমশিংদা লৈবা খম-থেংনা লাইরবা, অতোপ্পা লমদগী লাকপা শিন্মী অমসুং নোংমগী খুৎশুমল তান্দুনা চাবা মীওইশিংদা চিঞ্জাক, অকংবা রাসনগী পোৎলমশিং অমসুং মাস্ক য়েন্থোক্নবা মখোয়গী তুংশিঞ্জরকপশিং খায়জিন্নখি। হৌখিবা নুমিৎ খরনি অসিদা, চানবা চিঞ্জাক/অকংবা রাসন পেকেৎ লাখ ১ রোম য়েন্থোকখ্রে। য়ু.পি. খক্তদা, নোইদা, গাজিয়াবাদ, লখনৌ, প্রয়াগরাজ অমসুং ফাইজবাদতা লৈবা অতোপ্পা লমগী শিন্মীশিং, লৈজদ্রবা মীওইশিং অমসুং কন্সত্রক্সন লেবররশিংদা চিঞ্জাক/অকংবা রাসন পেকেৎ ৫০,০০০ হেন্না য়েন্থোকখি। মসিগা মান্ননা, বিহারদসু ভোলুন্তরী ওইনা চীঞ্জাক্কী পেকেৎ ১৬,০০০ অমসুং সাপোন, মাস্ক, সেনিতাইজর অমসুং গ্লোবশিংগী পেকেৎ ১১৫০০ রোম য়েন্থোকখি। তেলঙ্গনাদসু, লোকদাউনগী মনুংদা, পোস্তেল মেলগী ভেনশিংদা চাক্লেন ১৮০০০ লোম য়েন্থোকখি, মরকসিদা পোস্তেল ইম্প্লোয়ীশিংনা চান্নবা অমসুং অকংবা রাসনশিংবু হায়দ্রাবাদকী ইমুং ১৭৫০ লোমদা য়েন্থোকখি। অসিগুম্না, নাগপুরদসু, পোস্তেল স্তাফশিংনা অতোপ্পা লমগী শিন্মী ১৫০০ লোমদা চান্নবা চিঞ্জাক অমসুং অকংবা রাসন পেকেৎশিং য়েন্থোকখি। পঞ্জাব পোস্তেল সার্কলনা চন্দীগরগী তোঙান-তোঙানবা মফমদা চৎপা য়াদনা লৈরিবা কন্সত্রক্সনগী থবক তৌবা শিন্মীশিং, হোকরশিং, রিক্সা থৌবা মীশিং, পি.জি.আই.গী অনাবা য়েংলিবা এতেন্দেন্তশিং অমসুং অতোপ্পা লমগী শিন্মীশিংগীদমক “ফুদ ওন ৱীল” হৌদোকখি। 

ফুদ অমসুং সপ্লাই বিভাগকা খুৎশম্নদুনা, চন্দীগর পোস্তেল ওফিসিয়েলশিংনা দিপার্তমেন্ত মেল মোতোর ভেন্দা চানবা পোৎলমশিং পুখি, অমসুং তোঙান-তোঙানবা মফমশিংদা নোংমদা অনীরক য়েন্থোকখি। চিঞ্জাকশিং অসি “ফুদ ওন ৱীল”গী মতেংনা সোসিয়েল দিস্তেন্সিং ঙাক্না চত্তুনা লৈজদ্রবা মীওই ২,০০০দগীনা ৩,৫০০ রোমদা নোংমদা অনিরক য়েন্থোকখি। রেদ পোস্তেল মেল মোতোর অসি হৌজিক্তি য়ুম লৈজদ্রবশিং অমদি চানীংঙাই লৈত্রবশিংগী আশা পুদুনা চৎলিবা মঙাল ওইরে অমসুং মখোয়না মসি লাকপা খৌরাংনা ঙাইনৈ। মুম্বাইদা, অতোপ্পা লমগী শিন্মীশিংগী চানবা পীবদা নত্তনা ধরাবীগী খ্বাইদগী ফিভম শোক্লবা মফমশিংদা মাস্ক অমসুং সেনিতাইজরসু য়েনবীরি।

হীদাক লাংথক ফংহনবা

লোকদাউন মনুংদা, চুম্নগী হীদাকশিং ফংজবা তারবসু, কেন্সরগী, কিদনী লায়েংবগী অমসুং অতোপ্পা অরুবা লায়নাশিংগী হীদাকশিং হান্না অচৌবা শহরদা লৈবা মরী-মতা অমসুং অঙাংশিংনা লৈনরম্বা তোপ-তোপ্পা হীদাকশিংদি ফংদে। কম্যুনিকেসনগী মন্ত্রীদা ত্বীত্তর অমসুং অতোপ্পা পাম্বৈ তৌদুনা তৌবা য়াবা কয়া পীরমই। মসিগী মখা তাবদা, মন্ত্রীনা দিপার্তমেন্ত ওফ পোস্তেলদা অসিগুম্বা পুন্সি কন্নীংঙাই ওইবা হীদাকশিং অসি অরাপ্পা মফমদা য়ৌহন্নবা অরোইবা পাম্বৈ ওইনা পোস্ত ওফিস অমসুং পোস্তমেনগী খুথাংদা স্পীদ পোস্ত শিজিন্ননবা চেরোল থাখ্রে। খুদম খরা পল্লবদা, উত্তরাখন্দগী মনুং হঞ্জিনবা মফম গৌছারদা লৈবা ইন্দিয়ন আর্মীগী ভেতরান ওইরম্বা শী সুসিল জোসীগী অপোকপা এম.পি. জোসীদা পুন্সি কন্নীংঙাই ওইবা হীদাক য়ৌহনখি। অসিগা মান্ননা, মাইলেবনা হায়জরকপগী মতুং ইন্না, এম.এম.এস. পুনেনা কোবিদ তেস্তিং কিৎ কন্সাইন্মেন্তশিং ইং ২০২০গী এপ্রিলগী তাং ১৩গী নুমিদাং পুং ১১দা লৌখৎলমই, অমসুং গুজরাতকী অঙ্কলেস্বরদা ইং ২০২০গী এপ্রিলগী তাং ১৪গী অয়ুক্তা য়ৌরমই। মসিগা মান্ননা, দেফিব্রিলেতর ৪০রোম চেনাইদগী লখনৌগী উত্তর প্রদেশ মেদিকেল সপ্লাইস কোওপরেসন লিমিতেদতা পুং ৩৬কী মনুংদা থুংলমই। মমিং খরা পল্লবদা, রোদ ত্রান্সপোর্ত নেৎৱর্কনা কোলকতাদগী রাঞ্চী অমসুং সিলিগুরী ফাওবা মেদিসিন অমসুং ইক্যুইপমেন্ত কয়া পুবগী মথক্তা পুদুচেরীদগী ওরিশা অমসুং গুজরাত্তা ভেন্তিলেতরশিং য়ৌহল্লমই। 

শেলথুমগী থবকশিং য়ুমথোংদা ফংহনবা

পোস্তেল নেৎৱর্কনা বেঙ্ক একাউন্ত হাংবা অমসুং মরুওইনা আধার ইনেবল পেমেন্ত সিস্তেম (এ.ই.পি.এস.) শিজিন্নদুনা লায়রবশিংগী য়ুমগী থোঙ্গালদা শেল লৌথোকপগী থবকসু তৌরি। মসিনা তোঙান-তোঙানবা পেন্সন স্কিমশিং, এম.এন.আর.ই.জি.এ. অমসুং হন্দক্তা নৌনা পি.এম. গরীব কল্যান পেকেজকী মখাদা লাওথোকখিবা রিলিফ মেজরগী মখাদা থাখিবা দাইরেক্ত বেনিফিৎ ত্রান্সফরগী শেনফমশিং লৌথোকপদা কান্নহনলে। মসিগী খুদোংচাবা অসি লাইরবা প্রজানা অদুক্কী মতীক থাগৎনখ্রে মদুদি, এপ্রিলগী তাং ১৩দা ইন্দিয়ন পোস্তেল পেমেন্ত বেঙ্কনা হৌজিক ফাওবদা খ্বাইদগী ৱাংবা ত্রাঞ্জেক্সন তৌবগী রেকোর্দ চনখ্রে হায়বদি, লুপা ক্রোর ২২.৮২ ওইবা লাখ ১.০৯গী ভেল্যু য়ৌখ্রে।

খুদম ওইনা খরা পল্লবদা, শিলোংগী জৱাহর লাল নেহরু স্তেদিয়মদা অনকপা খুলশিংদগী অমসুং চীংদগী লাকপা লোকেল এদমিনিস্ত্রেতরনা থম্লম্বা অতোপ্পা লমগী শিন্মীশিংগী একাউন্ত হাংদোকপগী কেম্প অমসু পাঙথোকখি। হায়রিবসি মাস্ক, সোসিয়েল দিস্তেন্সিং অমসুং হেন্দ সেনিতাইজনচিংবা মথৌ তাবা চেকশিন থৌরাংশিং ইন্দুনা পাঙথোকখি। আই.পি.পি.বি.এস. একাউন্তকী মতেংনা হায়রিবা অতোপ্পা লমগী শিন্মীশিং অসিনা কেন্দ্র অমসুং রাজ্য সরকারনা পীবা রিলিফশিং লৌবা ফংলগনি। মসিগা মান্ননা, লৈবাক শিনবা থুংনা, মরুওইনা জম্মু কশ্মীর, লেহ, গুজরাত, তেলঙ্গনা, কর্নাকতকা, ঝারখন্দগী ত্রাইবেল তাবা লমশিং, বিহার অমসুং মধ্য প্রদেশনচিংবগী মনুং হঞ্জিনবা মফমশিংদা য়াম্না চাউনা য়ুমথোং খুদিংদা পেন্সন পেমেন্তশিং পীখ্রে। লুখ্রাবী, শোইনাইরবা অমসুং অহল ওইরবশিংগী পেন্সনশিংসু মসিগী পেমেন্ত অসিনা মখোয়গী য়ুম-য়ুমশিংদা ফংহনখ্রে।