57th International Film Festival of India 2026
20 – 28 Nov 2026

Ka IFFI kaba 57, ka wanrah ïa ka bynta ba thymmai jong ki phlim Animation ban rakhe ïa ka jingsngewtynnad bad ka jingieit ïa ka rukom ïathuhkhana lyngba ki Animation.

San tylli ki phlim Animation ba pawnam na kylleng ka pyrthei, kiba wan na Japan, France, China, Singapore bad USA, kin pyni ïa ki khana kiba pynpaw ïa ki bynta kiba bapher bapher jong ka jingim briew.

Ha ka: 18 NOV 2026 1:09PMby PIB ShillongRelease ID: 2338424Views: 11

Ha ki kolshor bad ki rta bapher bapher, ki phlim Animation ki don ïa ka sap kaba kyrpang ban pynkylla ïa ki dur ba la dro sha ki khana kiba ktah ïa ka dohnud bad ki jingsngew jong ngi. Da kaba nang pyniar ïa ki bynta bapher bapher jong ka pyrthei pynmih phlim, ka International Film Festival of India 2026 kaba 57 ka wanrah thymmai ïa ka bynta ba kyrpang jong ki phlim Animation, ban rakhe ïa ka sap bad ka jingjylliew jong ki rukom iathuhkhana lyngba ki phlim Animation. Da kaba pyni ïa san tylli ki phlim Animation ba kyrpang na Japan, France, China, Singapore bad USA, kane ka bynta ka pynleit jingmut ha ki phlim kiba ym tang ba ki pynitynnad ïa ki khmat lyngba ki dur bad ka jingdro, hynrei kiba ktah ruh ïa ka dohnud bad ki jingsngew jong ki nongpeit.

Ka phlim Animation na Japan, kaba kyrteng Cherry and Virgin, kaba la thaw bad pynwandur da u Masanao Kawajiri, ka kdew ïa ka jingieit bad ki jingeh ha ka jingïadei briew ha ka juk mynta. Kane ka phlim Animation jong u snem 2026 ka ïathuh ïa ka khana jong u Ryo, uba 32 snem ka rta bad uba trei kum u nongdro ïa ki manga bad u ba shem jingeh ban ïakren bad ki kynthei. Ha kajuh ka por, ka Ami ruh, kaba 28 snem ka rta, ka shem jingeh ban ïakren bad ki shynrang ha ka jingim jongka. Watla baroh arngut ki don ïa ka jingsheptieng bad kim pat ju mad ïa ka jingïaieid samla, hynrei kine arngut ki la ïakynduh bad suki pa suki ki sdang ban sngewthuh ïa iwei ïa iwei pat. Lyngba kane ka jingïadei, ki lah ban jop ïa ki jingsheptieng bad jingartatien, bad ki shem ïa ka jingkmen kaba jai jai kaba mih na ka jingïadei kaba shisha bad kaba don jingmut.

Da kaba pynïasoh lang ïa ki dur ba la ring da ki briew bad ki dur Animation ha ka rukom manga, kane ka phlim ka ïathuh ïa ka khana ha ka rukom kaba dap da ka jingsngewtynnad bad ka jingpynrkhie. U Kawajiri, uba la pyndep ïa ka jingpule na Osaka University of Arts, u la ïoh jingithuh ha ki tamasa phlim bapher bapher lyngba ka phlim Animation lyngkot jong u kaba kyrteng A Japanese Boy Who Draws (2018). Kane ka phlim ka la pynpaw ïa ka rukom thaw phlim kaba kyrpang jong u, kaba pynïasoh lang ïa ki dur ba la ring bad ki dur Animation, kaba la ïoh jingïaroh ym tang ha Japan hynrei wat sha kiwei kiwei ki ri ruh.

Ka phlim Animation na France, ka Jim Queen, kaba la thaw lang da u Nicolas Athané bad u Marco Nguyen, ka long ka phlim kaba pynrkhie bad kaba don ïa ka jingmut kaba jylliew ban pyni ïa ki jingjia ha ka imlang sahlang jong ka juk mynta. Kane ka phlim jong u snem 2026, kaba jia ha Paris, ka ïathuh ïa ka khana jong u Jim, uba pawnam kum u nongpynmih video halor ka koit ka khiah bad ka jingtei met, bad uba ïoh jingburom na kiba bun ki briew ha ka kynhun LGBTQ+ jong ka nongbah. Hynrei ka jingim jong u ka kylla kynsan kynsan haba mih ka khlam kaba phylla kaba la tip kyrteng Heterosis, kaba pynkylla ïa ki shynrang kiba dei ki gay sha jingitynnad noh ïa ki kynthei. Kane ka pynlong ïa u Jim ban duh noh ïa ki nongbud, ki paralok bad ka kyrdan burom jong u ha ka imlang sahlang. Tang u samla Lucien, watla um da dei uba pawnam, u iai don ryngkat bad u Jim. Kumta, u Jim u mih ban ïaid lyngba ki surok jong ka Marais ban wad ïa u doktor uba la bna ba u don ïa ka dawai ban pynkoit ïa kane ka jingpang. Baroh ar ngut ki director ki dei kiba la shah hikai ha ka skul thaw phlim Animation kaba pawnam, ka Gobelins. U Athané u la don bynta ha ka jingpynwandur ïa ki game Rayman, The Rabbi’s Cat bad The Red Turtle, nalor ka jingïatreilang ha ki series Animation kum Mr Flap, Startup Heroes bad Peepoodo. Katba u Nguyen pat u la noh synñiang ha ki phlim The Rabbi’s Cat, Ernest & Celestine bad The Summit of the Gods.

 

 

Ka phlim Animation na China,ka Light Pillar, ka pyni ïa ka jingim marwei, ka jingangnud bad ka jingïadei jong ki briew ha ka pyrthei kaba kylla stet. Kane ka dei ka phlim Animation kaba nyngkong jong u Xu Zao ha ka kam thaw ïa ki phlim ba jrong, ha kaba u la shim ïa ka bynta kum u nongthoh khana, nongpynïaid bad nongpynwandur ïa ka phlim. La pynwandur ïa ka phlim ha ka juk lawei, ha kaba ka leit ka wan ha haw-haw ka la long ka bynta jong ka jingim ba man ka sngi jong ki briew. Ka ïathuh ïa ka khana jong u Zha, uba im marwei bad uba trei kum u nongpynkhuid ha ka jaka jong ka studio phlim kaba la duh pisa. U Zha u la ngop ha ka jingieit ïa kawei ka kynthei kaba u ïakynduh hapoh ka pyrthei virtual kaba itynnad. Khnang ban ïoh pisa ban thied tiket bad leit sha u Bnai ban ïakynduh ïa ka, u Zha u hap ban trei kham bun kynta. Hynrei, u lap ba ka tiket jong u kam long kaba treikam. Ha kajuh ka por, ka kynhun shna phlim ka wan ban pynpra ïa ka studio kaba rim, khnang ban pyndonkam ïa ka jaka na ka bynta ban ring ïa ka bynta kaba khatduh jong kawei ka phlim. Ha kane ka khep, u Zha u shim ïa ka rai ban sah bad jah noh ryngkat bad ka pyrthei kaba u la tip bad im baroh shi jingim. La kha ïa u Xu Zao ha Anshan, China, ha u snem 1991. U la ïoh ïa ka kyrdan Master na Beijing Film Academy bad mynshwa u la ïoh jingithuh bad jingïaroh lyngba ka phlim Animation lyngkot jong u, ka No Changes Have Taken in Our Life, kaba la pyni nyngkong ha ka tamasa phlim IFFR.

Ka khana ka jia ha kawei ka hima dewïong kaba la tip kum ka Luocha. Haba uwei u nongleh magic u ba phylla u wan poi sha kane ka hima, ka jingwan jong u ka pynmih ïa ka jingtieng bad ka jingbym shongsuk hapdeng ki briew, kiba la don lypa ha ka jinglong kaba dap da ka jingsngewkhia. Hadien ba la kem bad set patok lang ïa u bad uwei u khynnah khunswet uba kyrteng Xiao Zhi, u nong leh magic u la ai buhrieh ïa u khynnah ïa kawei ka kot dur kaba don bor ba phylla. Kane ka jia shwa ban thang im ïa u ha ka sngi rakhe ïa ka tamasa Mimeng, ka tamasa, kaba dei ka jinglehniam ba la pynlong da ka sorkar, ban pynlong ïa ki nongshong shnong ban klet noh ïa ka mynnor jong ki. La kha U Sun Xun ha Fuxin, China, ha u snem 1980. U dei u nongthaw dur uba sah bad trei ha Beijing, bad uba la pyndep ïa ka jingpule na China Academy of Fine Arts. U la seng ïa ka π Animation Studio ha u snem 2005. Ki kam thaw dur jong u ki la shah pyni ha ki tamasa phlim kiba pawnam ha ka pyrthei, kynthup ïa ka Venice bad Berlin. Ka Magic Atlas ka wan sha ka IFFI hadien ba ka la ïashim bynta ha ki jingïakop jong ki tamasa phlim Locarno bad Tokyo.

Kaba pynkut ia kane ka bynta kadei ka phlim Animation na America kaba kren da ka ktien Phareng, ka Ray Gunn. La thaw ia kane ka phlim ha u snem 2026 da u Brad Bird, uba la khur ïa ka khusnam Oscar. La pynwandur ia ka phlim ha ka juk lawei jong ka Metropia ha kaba ki briew bad ki alien ïa ki im lang, Ka suiñbneng ka dap da ki kali kiba her, bad ha kane ka nongbah, ym don ei ei kaba lah ban ïoh khlem da siew dor. ka jing bamsap kaba la pur sha baroh ki bynta jong ka imlang sahlang. Hapdeng kane ka jinglong jingman, u Ray Gunn, u nongwad bniah shimet uba la rim bha uba ïaleh ban bat ïa ki jinglong ba kordor jong u ha ka pyrthei kaba peit ïa ka kam jong u kum kaba la rim, u shem ba la khring ïa u sha ka mukotduma kaba khraw tam jong ka kam jong u. U Brad Bird u dei u nongthoh khana, nongpynïaid, nongpynmih phlim bad nongai sur uba la ïoh jingithuh bad jingïaroh ha ka pyrthei. U paw na ka bynta ka sap jong u ban pynïasoh lang ïa ki jingsngew, ka jingrkhie bad ki jinglong kiba pynkhihwin ha ki khana jong u. U wanrah ïa ka sap ïathuhkhana kaba paw ha ki phlim ba pawnam jong u, kum The Incredibles, Ratatouille bad Mission: Impossible – Ghost Protocol, sha kane ka phlim Animation kaba pynïasoh ïa ka juk mynshwa bad ka juk lawei.

 

 

Lyngba kane ka bynta kaba thymmai, ka IFFI kaba 57 2026 ka khot sngewbha ïa ki nongwan sha ka tamasa ban peit shabar jong ka rukom pyni dur Animation, bad ban sngewthuh ïa ka kum kaba pynpaw ïa ki jingangnud, ki jingtlot bad ki jingsngew kiba ngi ïasam lang kum ki briew

Shaphang ka IFFI

La sdang ïa ka International Film Festival of India (IFFI) ha u snem 1952, ka dei kawei na ki tamasa phlim kiba rim tam bad kiba pawnam ha ka pyrthei, khamtam ha Asia. La pynlong ïa kane ka tamasa da ka tnad treikam jong ka Information & Broadcasting, ka Sorkar India, ha ka jingïatreilang bad ka Sorkar Goa bad ka Entertainment Society of Goa. Ka IFFI ka rakhe ïa ki phlim kiba tbit bad paw na kylleng ka pyrthei, ha kajuh ka por kaba kyntiew bad pyni ïa ki phlim bad ki sap thaw phlim jong ka India ha ka rynsan jong ka pyrthei. La pynlong ïa kane ka tamasa man la u snem ha Goa, bad ka long ka rynsan ban pynïasoh bad ïasam ïa ki jingmut thymmai, ban ithuh ïa ki nongthaw phlim kiba thymmai bad ban pynjanai ïa ka jingïasngewthuh hapdeng ki kolshor bapher bapher lyngba ka phlim.

 

**************

 

 

 


Great films resonate through passionate voices. Share your love for cinema with #IFFI2026 and #StoriesWithoutBorders. Tag us @pibindia on Instagram and @PIB_India on X, and we will help amplify your festival moments!

For accredited journalists, critics, bloggers, and vloggers seeking 1-on-1 interviews with filmmakers and festival juries, write to us at:
iffi.mediadesk@pib.gov.in with the subject line: Take One with PIB.


Official Release ID: 2338424
•
Media Centre: Goa
•
Festival Dates: Nov 20 – 28, 2026