57th International Film Festival of India 2026
20 – 28 Nov 2026

ಅನಿಮೇಟೆಡ್ ಕಥೆಗಳ ಸೌಂದರ್ಯ ಮತ್ತು ಸೃಜನಶೀಲತೆಯ ಗೌರವಕ್ಕಾಗಿ ಹೊಸ 'ಅನಿಮೇಷನ್' ವಿಭಾಗವನ್ನು ಅನಾವರಣಗೊಳಿಸಿದ 57 ನೇ ಐಎಫ್‌ಎಫ್‌ಐ (IFFI) 2026


ಮಾನವ ಬದುಕಿನ ವೈವಿಧ್ಯಮಯ ಅನುಭವಗಳನ್ನು ತೋರಿಸಲಿರುವ ಜಪಾನ್, ಫ್ರಾನ್ಸ್, ಚೀನಾ, ಸಿಂಗಾಪುರ ಮತ್ತು ಅಮೆರಿಕದ ಐದು ಪ್ರಶಂಸಿತ ಅಂತಾರಾಷ್ಟ್ರೀಯ ಅನಿಮೇಟೆಡ್ ಚಲನಚಿತ್ರಗಳು

ಪ್ರಕಟಣಾ ದಿನಾಂಕ: 18 NOV 2026 1:09PMby PIB Bengaluruಪ್ರಕಟಣೆ ಐ.ಡಿ.: 2337858Views: 9

ಪ್ರತಿಯೊಂದು ಸಂಸ್ಕೃತಿ ಮತ್ತು ಯುಗದಲ್ಲೂ, ಸರಳ ರೇಖಾಚಿತ್ರಗಳನ್ನು, ನಾವು ಬಹಳ ಆಸಕ್ತಿಯಿಂದ ನೋಡುವ, ಚಲಿಸುವ ಕಥೆಗಳಾಗಿ ಪರಿವರ್ತಿಸುವ ಅಪರೂಪದ ಕೌಶಲ್ಯವನ್ನು ಅನಿಮೇಷನ್ ಹೊಂದಿದೆ. ತನ್ನ ಸಿನಿಮೀಯ ವ್ಯಾಪ್ತಿಯನ್ನು ವಿಸ್ತರಿಸುತ್ತಾ, 57 ನೇ ಭಾರತೀಯ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ 2026, ಅನಿಮೇಟೆಡ್ ಕಥೆಗಳ ಸೌಂದರ್ಯ ಮತ್ತು ಸೃಜನಶೀಲತೆಯ ಗೌರವಕ್ಕಾಗಿ, ಹೊಸ 'ಅನಿಮೇಷನ್' ವಿಭಾಗವನ್ನು ಅನಾವರಣಗೊಳಿಸಿದೆ. ಜಪಾನ್, ಫ್ರಾನ್ಸ್, ಚೀನಾ, ಸಿಂಗಾಪುರ ಮತ್ತು ಯುಎಸ್‌ಎಯ ಐದು ಅತ್ಯುತ್ತಮ ಅಂತಾರಾಷ್ಟ್ರೀಯ ಅನಿಮೇಟೆಡ್ ಚಲನಚಿತ್ರಗಳೊಂದಿಗೆ ಸಂಯೋಜಿಸಲಾದ ಈ ವಿಭಾಗವು, ಕಣ್ಣಿಗೆ ಹಬ್ಬವನ್ನುಂಟುಮಾಡುವಷ್ಟೇ ಹೃದಯವನ್ನೂ ತಟ್ಟುವ ಚಲನಚಿತ್ರಗಳ ಮೇಲೆ ಬೆಳಕು ಚೆಲ್ಲುತ್ತದೆ.

ಆಧುನಿಕ ಪ್ರಣಯ ಮತ್ತು ಸಾಮಾಜಿಕ ಆತಂಕದತ್ತ ಒಂದು ಕೋಮಲ ಕಿಟಕಿಯನ್ನು ತೆರೆಯುವ ಚಿತ್ರ ಮಸಾನಾವೊ ಕವಾಜಿರಿ ನಿರ್ದೇಶನದ ಜಪಾನೀಸ್ ಅನಿಮೇಟೆಡ್ ಚಲನಚಿತ್ರ 'ಚೆರ್ರಿ ಅಂಡ್ ವರ್ಜಿನ್'. 2026ರ ಈ ಅನಿಮೇಟೆಡ್ ಚಲನಚಿತ್ರವು ಮಹಿಳೆಯರೊಂದಿಗೆ ಮಾತನಾಡಲು ಹೆಣಗಾಡುವ 32 ವರ್ಷದ ಎರೋಟಿಕ್ ಮಂಗಾ ಕಲಾವಿದ ರಿಯೊ (Ryo) ಮತ್ತು ನಿಜ ಜೀವನದಲ್ಲಿ ಪುರುಷರೊಂದಿಗೆ ಬೆರೆಯಲು ಅಷ್ಟೇ ಕಷ್ಟಪಡುವ 28 ವರ್ಷದ ಅಮಿ ಅವರ ಕಥೆಯನ್ನು ಅನುಸರಿಸುತ್ತದೆ. ತಮ್ಮ ಭಯಗಳು ಮತ್ತು ಪ್ರಣಯ ಅನುಭವದ ಕೊರತೆಯ ಹೊರತಾಗಿಯೂ, ಅವರಿಬ್ಬರೂ ಭೇಟಿಯಾಗುತ್ತಾರೆ ಮತ್ತು ನಿಧಾನವಾಗಿ ಪರಸ್ಪರರನ್ನು ಅರ್ಥಮಾಡಿಕೊಳ್ಳಲು ಪ್ರಾರಂಭಿಸುತ್ತಾರೆ, ತಮ್ಮ ಅಭದ್ರತೆಗಳನ್ನು ಮೆಟ್ಟಿನಿಂತು ನಿಜವಾದ ಬಾಂಧವ್ಯದ ಶಾಂತ ಸಂತೋಷವನ್ನು ಕಂಡುಕೊಳ್ಳುತ್ತಾರೆ.

ಲೈವ್-ಆಕ್ಷನ್ ದೃಶ್ಯಗಳನ್ನು ಮಂಗಾ ಅನಿಮೇಷನ್‌ನೊಂದಿಗೆ ಬೆರೆಸಿರುವ ಈ ಚಿತ್ರವನ್ನು ಆತ್ಮೀಯತೆ ಮತ್ತು ಹಾಸ್ಯದೊಂದಿಗೆ ನಿರೂಪಿಸಲಾಗಿದೆ. ಒಸಾಕಾ ಕಲಾ ವಿಶ್ವವಿದ್ಯಾನಿಲಯದ ಪದವೀಧರರಾದ ಕವಾಜಿರಿ ಅವರು ಈ ಹಿಂದೆ ತಮ್ಮ 2018 ರ ಅನಿಮೇಟೆಡ್ ಕಿರುಚಿತ್ರ 'ಎ ಜಪಾನೀಸ್ ಬಾಯ್ ಹೂ ಡ್ರಾಸ್' ಗಾಗಿ ವ್ಯಾಪಕ ಚಲನಚಿತ್ರೋತ್ಸವ ಮನ್ನಣೆ ಪಡೆದಿದ್ದರು, ಆ ಮೂಲಕ ಜಪಾನ್ ಮತ್ತು ವಿದೇಶಗಳಲ್ಲಿ ಪ್ರಶಂಸೆ ಗಳಿಸುತ್ತಿರುವ ಹೈಬ್ರಿಡ್ ಸೌಂದರ್ಯಶಾಸ್ತ್ರವನ್ನು ಸ್ಥಾಪಿಸಿದ್ದಾರೆ.

ಸಮಕಾಲೀನ ವಿಡಂಬನೆಗೆ ತೀಕ್ಷ್ಣ ಬುದ್ಧಿವಂತಿಕೆ ಮತ್ತು ಹೃದಯಸ್ಪರ್ಶಿ ಭಾವವನ್ನು ತರುವ ಚಿತ್ರ, ನಿಕೋಲಸ್ ಅಥಾನೆ ಮತ್ತು ಮಾರ್ಕೊ ನ್ಗುಯೆನ್ ಜಂಟಿಯಾಗಿ ನಿರ್ದೇಶಿಸಿರುವ ಫ್ರೆಂಚ್ ಅನಿಮೇಟೆಡ್ ಚಲನಚಿತ್ರ 'ಜಿಮ್ ಕ್ವೀನ್'. ಪ್ಯಾರಿಸ್ ಹಿನ್ನೆಲೆಯಲ್ಲಿ ರೂಪುಗೊಂಡಿರುವ 2026ರ ಈ ಅನಿಮೇಟೆಡ್ ಚಲನಚಿತ್ರವು, ನಗರದ ಸಲಿಂಗಕಾಮಿ ಸಮುದಾಯದಾದ್ಯಂತ ಮೆಚ್ಚುಗೆ ಪಡೆದ ಜನಪ್ರಿಯ ಫಿಟ್‌ನೆಸ್ ಇನ್‌ಫ್ಲುಯೆನ್ಸರ್ ಜಿಮ್ ಸುತ್ತ ಕೇಂದ್ರೀಕೃತವಾಗಿದೆ. 'ಹೆಟೆರೋಸಿಸ್' ಎಂಬ ನಿಗೂಢ ವೈರಸ್ ಸಲಿಂಗಕಾಮಿ ಪುರುಷರನ್ನು ಭಿನ್ನಲಿಂಗೀಯರನ್ನಾಗಿ ಪರಿವರ್ತಿಸಲು ಪ್ರಾರಂಭಿಸಿದಾಗ ಜಿಮ್‌ನ ಪ್ರಪಂಚವು ರಾತ್ರೋರಾತ್ರಿ ಕುಸಿಯುತ್ತದೆ, ಇದರಿಂದ ಅವನು ತನ್ನ ಅನುಯಾಯಿಗಳು, ಸ್ನೇಹಿತರು ಮತ್ತು ಸಾಮಾಜಿಕ ಸ್ಥಾನಮಾನವನ್ನು ಕಳೆದುಕೊಳ್ಳುತ್ತಾನೆ. ನಿಷ್ಠಾವಂತ ಆದರೆ ಕಡಿಮೆ ಜನಪ್ರಿಯನಾದ ಲೂಸಿಯೆನ್ ಎಂಬ ಯುವಕ ಮಾತ್ರ ತನ್ನ ಬೆಂಬಲಕ್ಕಿರುವಾಗ, ಜಿಮ್ ಚಿಕಿತ್ಸೆ ನೀಡಬಲ್ಲರೆಂದು ವದಂತಿಯಿರುವ ವೈದ್ಯರನ್ನು ಹುಡುಕಿಕೊಂಡು ಮರೈಸ್‌ನ ಲವಲವಿಕೆಯ ಬೀದಿಗಳಲ್ಲಿ ಹೊರಡುತ್ತಾನೆ. ಇಬ್ಬರೂ ನಿರ್ದೇಶಕರು ಹೆಸರಾಂತ ಗೋಬೆಲಿನ್ಸ್ ಅನಿಮೇಷನ್ ಶಾಲೆಯಲ್ಲಿ ತರಬೇತಿ ಪಡೆದಿದ್ದಾರೆ. ಅಥಾನೆ ಅವರು ಈ ಹಿಂದೆ 'ರೇಮನ್' ಗೇಮ್ಸ್, 'ದಿ ರಾಬ್ಬಿಸ್ ಕ್ಯಾಟ್', ಮತ್ತು 'ದಿ ರೆಡ್ ಟರ್ಟಲ್' ನಲ್ಲಿ ಕೆಲಸ ಮಾಡಿರುವುದರ ಜೊತೆಗೆ 'ಮಿಸ್ಟರ್ ಫ್ಲಾಪ್', 'ಸ್ಟಾರ್ಟ್‌ಅಪ್ ಹೀರೋಸ್', ಮತ್ತು 'ಪೀಪೂಡೋ' ನಂತಹ ಅನಿಮೇಟೆಡ್ ಸರಣಿಗಳನ್ನು ಸಹ-ನಿರ್ದೇಶಿಸಿದ್ದಾರೆ, ಆದರೆ ನ್ಗುಯೆನ್ ಅವರು 'ದಿ ರಾಬ್ಬಿಸ್ ಕ್ಯಾಟ್', 'ಅರ್ನೆಸ್ಟ್ & ಸೆಲೆಸ್ಟೈನ್', ಮತ್ತು 'ದಿ ಸಮ್ಮಿಟ್ ಆಫ್ ದಿ ಗಾಡ್ಸ್' ಚಿತ್ರಗಳಿಗೆ ನೀಡಿದ ಕೊಡುಗೆಗಳ ಮೂಲಕ ಶ್ರೀಮಂತ ದೃಶ್ಯ ಪರಂಪರೆಯನ್ನು ತಂದಿದ್ದಾರೆ.

ಕ್ಷಿಪ್ರವಾಗಿ ಬದಲಾಗುತ್ತಿರುವ ಜಗತ್ತಿನಲ್ಲಿ ಏಕಾಂತತೆ, ಹಂಬಲ ಮತ್ತು ಬಾಂಧವ್ಯವನ್ನು ಅನ್ವೇಷಿಸುವ ಚಿತ್ರ ಬರಹಗಾರ, ನಿರ್ದೇಶಕ ಮತ್ತು ನಿರ್ಮಾಣ ವಿನ್ಯಾಸಕ ಕ್ಸು ಜಾವೊ ಅವರ 2026ರ ಚೊಚ್ಚಲ ಅನಿಮೇಟೆಡ್ ಚಲನಚಿತ್ರ, ಚೀನಾದ ಅನಿಮೇಟೆಡ್ ಚಿತ್ರ 'ಲೈಟ್ ಪಿಲ್ಲರ್'. ಬಾಹ್ಯಾಕಾಶ ಪ್ರಯಾಣವು ದಿನನಿತ್ಯದ ಸಂಗತಿಯಾಗಿರುವ ಭವಿಷ್ಯದ ಹಿನ್ನೆಲೆಯಲ್ಲಿ ಸಾಗುವ ಈ ಚಿತ್ರವು, ದಿವಾಳಿಯಾದ ಫಿಲ್ಮ್ ಸ್ಟುಡಿಯೋದ ಆವರಣವನ್ನು ನೋಡಿಕೊಳ್ಳುವ ಏಕಾಂಗಿ ಸ್ವಚ್ಛತಾ ಕಾರ್ಮಿಕ ಝಾ ಕಥೆಯನ್ನು ಅನುಸರಿಸುತ್ತದೆ. ಅವನು ಸಮೃದ್ಧ ವರ್ಚುವಲ್ ಪ್ರಪಂಚದೊಳಗಿನ ಮಹಿಳೆಯೊಬ್ಬಳನ್ನು ಪ್ರೀತಿಸುತ್ತಾನೆ. ಚಂದ್ರನ ಮೇಲೆ ಅವಳನ್ನು ಸೇರಲು ಟಿಕೆಟ್ ಖರೀದಿಸಲು ಹೆಚ್ಚುವರಿ ಗಂಟೆಗಳ ಕಾಲ ಕೆಲಸ ಮಾಡಿದ ನಂತರ, ತನ್ನ ಟಿಕೆಟ್ ಅಮಾನ್ಯವಾಗಿದೆ ಎಂದು ಝಾ ಕಂಡುಕೊಳ್ಳುತ್ತಾನೆ. ಸಿನಿಮಾದ ಕ್ಲೈಮ್ಯಾಕ್ಸ್‌ಗಾಗಿ ಹಳೆಯ ಸ್ಟುಡಿಯೋವನ್ನು ಕೆಡವಲು ಚಿತ್ರತಂಡವು ಆಗಮಿಸಿದಾಗ, ಝಾ ತನಗೆ ತಿಳಿದಿರುವ ಏಕೈಕ ಪ್ರಪಂಚದೊಂದಿಗೆ ಅಲ್ಲೇ ಉಳಿದು ಕರಗಿಹೋಗುವ ಹೃದಯಸ್ಪರ್ಶಿ ನಿರ್ಧಾರವನ್ನು ತೆಗೆದುಕೊಳ್ಳುತ್ತಾನೆ. 1991ರಲ್ಲಿ ಚೀನಾದ ಅನ್ಶಾನ್‌ನಲ್ಲಿ ಜನಿಸಿದ ಕ್ಸು ಜಾವೊ ಅವರು ಬೀಜಿಂಗ್ ಫಿಲ್ಮ್ ಅಕಾಡೆಮಿಯಿಂದ ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ ಮತ್ತು ಈ ಹಿಂದೆ ಐಎಫ್‌ಎಫ್‌ಆರ್‌ನಲ್ಲಿ ಪ್ರದರ್ಶನಗೊಂಡ ತಮ್ಮ ಅನಿಮೇಟೆಡ್ ಕಿರುಚಿತ್ರ 'ನೋ ಚೇಂಜಸ್ ಹ್ಯಾವ್ ಟೇಕನ್ ಇನ್ ಅವರ್ ಲೈಫ್' ಗಾಗಿ ಪ್ರಶಂಸೆ ಗಳಿಸಿದ್ದರು.

ಸಿಂಗಾಪುರದಿಂದ ಬರುತ್ತಿರುವ ಚಿತ್ರ ಸುನ್ ಕ್ಸುನ್ ನಿರ್ದೇಶನದ, ಸ್ಮರಣೆ ಮತ್ತು ಪ್ರತಿರೋಧದ ಕುರಿತಾದ ಮನಕಲಕುವ 2026 ರ ರೂಪಕ ಕಥೆಯಾದ ಚೀನೀ ಭಾಷೆಯ ಅನಿಮೇಟೆಡ್ ಚಲನಚಿತ್ರ 'ಮ್ಯಾಜಿಕ್ ಅಟ್ಲಾಸ್'. ಪ್ರತ್ಯೇಕಗೊಂಡ ಕಲ್ಲಿದ್ದಲು ಸಾಮ್ರಾಜ್ಯವಾದ ಲುವೋಚಾಗೆ ನಿಗೂಢ ಜಾದೂಗಾರನೊಬ್ಬ ಆಗಮಿಸಿದಾಗ, ಅವನ ಉಪಸ್ಥಿತಿಯು ಈಗಾಗಲೇ ಉದ್ವಿಗ್ನಗೊಂಡಿರುವ ಸಮಾಜದಲ್ಲಿ ಭಯ ಮತ್ತು ಅಶಾಂತಿಯನ್ನು ಹುಟ್ಟುಹಾಕುತ್ತದೆ. ಕ್ಸಿಯಾವೊ ಝಿ ಎಂಬ ಅನಾಥ ಬಾಲಕನೊಂದಿಗೆ ಬಂಧಿಸಲ್ಪಟ್ಟು ಸೆರೆಮನೆಗೆ ತಳ್ಳಲ್ಪಟ್ಟ ಜಾದೂಗಾರನು, ನಾಗರಿಕರು ತಮ್ಮ ಭೂತಕಾಲವನ್ನು ಮರೆಯುವಂತೆ ಮಾಡುವ ಸರ್ಕಾರಿ ಆಚರಣೆಯಾದ 'ಮಿಮೆಂಗ್' ಉತ್ಸವದಲ್ಲಿ ತನ್ನನ್ನು ಸುಟ್ಟುಹಾಕುವ ಸ್ವಲ್ಪ ಮುಂಚೆ ರಹಸ್ಯವಾಗಿ ಆ ಮಗುವಿಗೆ ಮಾಂತ್ರಿಕ ಅಟ್ಲಾಸ್ ಒಂದನ್ನು ಒಪ್ಪಿಸುತ್ತಾನೆ. 1980ರಲ್ಲಿ ಚೀನಾದ ಫುಕ್ಸಿನ್‌ನಲ್ಲಿ ಜನಿಸಿದ ಸುನ್ ಕ್ಸುನ್ ಅವರು ಬೀಜಿಂಗ್ ಮೂಲದ ಕಲಾವಿದರು ಮತ್ತು ಚೀನಾ ಅಕಾಡೆಮಿ ಆಫ್ ಫೈನ್ ಆರ್ಟ್ಸ್‌ನ ಪದವೀಧರರಾಗಿದ್ದು, 2005ರಲ್ಲಿ ಪೈ (π) ಅನಿಮೇಷನ್ ಸ್ಟುಡಿಯೋವನ್ನು ಸ್ಥಾಪಿಸಿದರು. ವೆನಿಸ್ ಮತ್ತು ಬರ್ಲಿನ್‌ನಲ್ಲಿ ಕೃತಿಗಳು ಪ್ರದರ್ಶನಗೊಂಡಿರುವ 'ಮ್ಯಾಜಿಕ್ ಅಟ್ಲಾಸ್', ಲೊಕಾರ್ನೊ ಮತ್ತು ಟೋಕಿಯೊ ಚಲನಚಿತ್ರೋತ್ಸವಗಳ ಸ್ಪರ್ಧಾ ವಿಭಾಗಗಳಲ್ಲಿ ಪಾಲ್ಗೊಂಡ ನಂತರ ಐಎಫ್‌ಎಫ್‌ಐಗೆ ಆಗಮಿಸುತ್ತಿದೆ.

ಈ ವಿಭಾಗವನ್ನು ಪೂರ್ಣಗೊಳಿಸುವ ಚಿತ್ರ ಅಕಾಡೆಮಿ ಪ್ರಶಸ್ತಿ ವಿಜೇತ ಚಲನಚಿತ್ರ ನಿರ್ಮಾಪಕ ಬ್ರಾಡ್ ಬರ್ಡ್ ಅವರು 2026 ರಲ್ಲಿ ನಿರ್ದೇಶಿಸಿರುವ ಇಂಗ್ಲಿಷ್ ಭಾಷೆಯ ಅಮೆರಿಕನ್ ಅನಿಮೇಟೆಡ್ ಚಲನಚಿತ್ರ 'ರೇ ಗನ್'. ಹಾರುವ ಕಾರುಗಳಿಂದ ತುಂಬಿರುವ ಆಕಾಶದ ಕೆಳಗೆ ಮಾನವರು ಮತ್ತು ಅನ್ಯಗ್ರಹ ಜೀವಿಗಳು ಸಹಬಾಳ್ವೆ ನಡೆಸುವ ಹಾಗೂ ಪ್ರತಿಯೊಂದಕ್ಕೂ ಬೆಲೆ ಇರುವ ಭವಿಷ್ಯದ ಮಹಾನಗರ ಮೆಟ್ರೋಪಿಯಾದಲ್ಲಿ ನಡೆಯುವ ಈ ಕಥೆಯಲ್ಲಿ, ಹೊಳೆಯುವ ಮುಖವಾಡದ ಹಿಂದೆ ವ್ಯಾಪಕ ಭ್ರಷ್ಟಾಚಾರ ಅಡಗಿರುತ್ತದೆ. ಈ ಭೂದೃಶ್ಯದ ನಡುವೆ, ತನ್ನ ವೃತ್ತಿಯನ್ನು ಹಳತಾಗಿದೆ ಎಂದು ನೋಡುವ ಜಗತ್ತಿನಲ್ಲಿ ತನ್ನ ಮೌಲ್ಯಗಳನ್ನು ಉಳಿಸಿಕೊಳ್ಳಲು ಹೆಣಗಾಡುತ್ತಿರುವ ಹಳೆಯ ಶೈಲಿಯ ಖಾಸಗಿ ಪತ್ತೇದಾರಿ ರೇ ಗನ್, ತನ್ನ ವೃತ್ತಿಜೀವನದ ಅತಿದೊಡ್ಡ ಪ್ರಕರಣದಲ್ಲಿ ಸಿಲುಕಿಕೊಳ್ಳುತ್ತಾನೆ. ಭಾವನೆ, ಹಾಸ್ಯ ಮತ್ತು ಸಾಹಸವನ್ನು ತಡೆರಹಿತವಾಗಿ ಹೆಣೆಯುವ ಬರಹಗಾರ, ನಿರ್ದೇಶಕ, ನಿರ್ಮಾಪಕ ಮತ್ತು ಧ್ವನಿ ಕಲಾವಿದರಾಗಿ ಜಾಗತಿಕವಾಗಿ ಪ್ರಶಂಸಿಸಲ್ಪಟ್ಟ ಬ್ರಾಡ್ ಬರ್ಡ್ ಅವರು, 'ದಿ ಇನ್‌ಕ್ರೆಡಿಬಲ್ಸ್', 'ರಾಟಾಟೌಲಿ', ಮತ್ತು 'ಮಿಷನ್: ಇಂಪಾಸಿಬಲ್ – ಘೋಸ್ಟ್ ಪ್ರೋಟೋಕಾಲ್' ನಂತಹ ಕ್ಲಾಸಿಕ್ ಚಿತ್ರಗಳ ತಮ್ಮ ವಿಶಿಷ್ಟ ಕಥೆ ಹೇಳುವ ಕೌಶಲ್ಯವನ್ನು ಈ ರೆಟ್ರೋ-ಫ್ಯೂಚರಿಸ್ಟಿಕ್ ಅನಿಮೇಟೆಡ್ ನಾಯ್ರ್ ಚಿತ್ರಕ್ಕೆ ತಂದಿದ್ದಾರೆ.

ಈ ಹೊಸ ವಿಭಾಗದ ಮೂಲಕ, 57 ನೇ ಐಎಫ್‌ಎಫ್‌ಐ 2026 ಚಲನಚಿತ್ರೋತ್ಸವಕ್ಕೆ ಬರುವವರನ್ನು, ಮಾಧ್ಯಮದ ಚೌಕಟ್ಟನ್ನು ಮೀರಿ ನೋಡಲು ಮತ್ತು ಅನಿಮೇಷನ್ ಅನ್ನು ನಮ್ಮ ಭರವಸೆಗಳು, ದುರ್ಬಲತೆಗಳು ಹಾಗೂ ಹಂಚಿಕೆಯ ಮಾನವೀಯತೆಯ ಆತ್ಮೀಯ ಕನ್ನಡಿಯಾಗಿ ಅನುಭವಿಸಲು ಆಹ್ವಾನಿಸುತ್ತದೆ.

ಐಎಫ್‌ಎಫ್‌ಐ ಕುರಿತು

1952ರಲ್ಲಿ ಸ್ಥಾಪಿತವಾದ ಭಾರತೀಯ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವವು ಏಷ್ಯಾದ ಅತ್ಯಂತ ಹಳೆಯ ಮತ್ತು ಪ್ರಮುಖ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಗಳಲ್ಲಿ ಒಂದಾಗಿದೆ. ಗೋವಾ ಸರ್ಕಾರ ಮತ್ತು ಗೋವಾ ಮನರಂಜನಾ ಸೊಸೈಟಿಯ ಸಹಯೋಗದೊಂದಿಗೆ ಭಾರತ ಸರ್ಕಾರದ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯವು ಆಯೋಜಿಸುವ ಐಎಫ್‌ಎಫ್‌ಐ, ಜಾಗತಿಕ ವೇದಿಕೆಯಲ್ಲಿ ಭಾರತೀಯ ಚಲನಚಿತ್ರಗಳು ಮತ್ತು ಪ್ರತಿಭೆಗಳನ್ನು ಉತ್ತೇಜಿಸುವ ಜೊತೆಗೆ ವಿಶ್ವ ಸಿನಿಮಾದ ಅತ್ಯುತ್ತಮ ಚಿತ್ರಗಳನ್ನು ಸಂಭ್ರಮಿಸುತ್ತದೆ. ಗೋವಾದಲ್ಲಿ ವಾರ್ಷಿಕವಾಗಿ ನಡೆಯುವ ಈ ಉತ್ಸವವು ಸೃಜನಶೀಲ ವಿನಿಮಯ, ಹೊಸ ಧ್ವನಿಗಳ ಅನ್ವೇಷಣೆ ಮತ್ತು ಸಿನಿಮಾದ ಮೂಲಕ ಸಾಂಸ್ಕೃತಿಕ ತಿಳುವಳಿಕೆಯನ್ನು ಬೆಳೆಸುವ ವೇದಿಕೆಯಾಗಿ ಕಾರ್ಯನಿರ್ವಹಿಸುತ್ತದೆ.

 

*****


Great films resonate through passionate voices. Share your love for cinema with #IFFI2026 and #StoriesWithoutBorders. Tag us @pibindia on Instagram and @PIB_India on X, and we will help amplify your festival moments!

For accredited journalists, critics, bloggers, and vloggers seeking 1-on-1 interviews with filmmakers and festival juries, write to us at:
iffi.mediadesk@pib.gov.in with the subject line: Take One with PIB.


Official Release ID: 2337858
•
Media Centre: Goa
•
Festival Dates: Nov 20 – 28, 2026