દરેક સંસ્કૃતિ અને યુગમાં, એનિમેશનમાં સરળ ચિત્રોને એવી વાર્તાઓમાં રૂપાંતરિત કરવાની અદ્ભુત ક્ષમતા છે જે આપણા હૃદયને ઊંડાણપૂર્વક સ્પર્શે છે. તેના સિનેમેટિક ક્ષિતિજોને વિસ્તૃત કરતા, 57મા ભારતીય આંતરરાષ્ટ્રીય ફિલ્મ મહોત્સવ 2026 (IFFI 2026) એ એનિમેશનને સમર્પિત એક ખાસ નવો સેગમેન્ટ ઉમેર્યો છે. તેનો હેતુ એનિમેશન દ્વારા કહેવામાં આવેલી વાર્તાઓની કલાત્મકતા અને ભાવનાત્મક ઊંડાણની ઉજવણી કરવાનો છે. જાપાન, ફ્રાન્સ, ચીન, સિંગાપોર અને યુનાઇટેડ સ્ટેટ્સની પાંચ ઉત્કૃષ્ટ આંતરરાષ્ટ્રીય એનિમેટેડ ફિલ્મો દર્શાવતી, આ સેગમેન્ટ એવી ફિલ્મોને હાઇલાઇટ કરે છે જે ફક્ત દૃષ્ટિની રીતે અદભુત જ નહીં પણ ઊંડાણપૂર્વક સ્પર્શી જાય છે.
મસાનાઓ કાવાજીરી દ્વારા દિગ્દર્શિત જાપાની એનિમેટેડ ફિલ્મ ચેરી એન્ડ વર્જિન આધુનિક રોમાંસ અને સામાજિક ચિંતામાં એક કોમળ બારી ખોલે છે. 2026 ની એનિમેટેડ ફિલ્મ રિયો (Ryo), એક 32 વર્ષીય શૃંગારિક મંગા કલાકાર જે સ્ત્રીઓ સાથે વાત કરવામાં સંઘર્ષ કરે છે, અને 28 વર્ષીય અમી, જેને વાસ્તવિક જીવનમાં પુરુષો સાથે વાતચીત કરવામાં પણ એટલી જ મુશ્કેલી પડે છે, તેમની વાર્તાને અનુસરે છે. તેમના ડર અને રોમેન્ટિક અનુભવના અભાવ હોવા છતાં, બંને મળે છે અને ધીમે ધીમે એકબીજાને સમજવાનું શરૂ કરે છે, તેમની અસલામતીને દૂર કરીને વાસ્તવિક જોડાણના શાંત સુખને શોધે છે.
લાઇવ-એક્શન ફૂટેજને મંગા એનિમેશન સાથે મિશ્રિત કરીને, આ ફિલ્મ નિખાલસ હૂંફ અને રમૂજ સાથે કહેવામાં આવી છે. ઓસાકા યુનિવર્સિટી ઓફ આર્ટ્સના સ્નાતક, કાવાજીરીએ અગાઉ તેમની 2018ની એનિમેટેડ ટૂંકી ફિલ્મ 'અ જાપાનીઝ બોય હુ ડ્રોઝ' (A Japanese Boy Who Draws) માટે વ્યાપક ફેસ્ટિવલ માન્યતા મેળવી હતી, જેણે એક હાઇબ્રિડ સૌંદર્ય શાસ્ત્ર સ્થાપિત કર્યું હતું જે જાપાન અને વિદેશમાં પ્રશંસા મેળવતું રહે છે.

સમકાલીન વ્યંગ્યમાં તીક્ષ્ણ બુદ્ધિ અને સંવેદના લાવતી ફિલ્મ નિકોલસ અથાને અને માર્કો ન્ગ્યુએન દ્વારા સહ-દિગ્દર્શિત ફ્રેન્ચ એનિમેટેડ ફિલ્મ 'જિમ ક્વીન' (Jim Queen) છે. પેરિસમાં સેટ કરાયેલી, 2026ની આ એનિમેટેડ ફીચર ફિલ્મ જિમ (Jim) પર કેન્દ્રિત છે, જે શહેરના ગે સમુદાયમાં પ્રશંસનીય એક લોકપ્રિય ફિટનેસ ઇન્ફ્લુએન્સર છે, જેની દુનિયા રાતોરાત તૂટી પડે છે જ્યારે હેટેરોસિસ (Heterosis) નામનો એક રહસ્યમય વાયરસ ગે પુરુષોને સીધા બનાવવાનું શરૂ કરે છે, જેના કારણે તે તેના ફોલોઅર્સ, મિત્રો અને સામાજિક દરજ્જો ગુમાવે છે. માત્ર લ્યુસિયન (Lucien), એક વફાદાર છતાં ઓછા લોકપ્રિય યુવાન તેની પડખે ઊભો રહે છે, ત્યારે જિમ એક ડૉક્ટરને શોધવા માટે મારાઈસ (Marais)ની જીવંત શેરીઓમાંથી નીકળી પડે છે જેની પાસે તેનો ઈલાજ હોવાની અફવા છે. બંને દિગ્દર્શકોએ એનિમેશનની પ્રખ્યાત ગોબેલિન્સ (Gobelins) સ્કૂલમાં તાલીમ લીધી છે. અથાનેએ અગાઉ 'મિસ્ટર ફ્લેપ' (Mr Flap), 'સ્ટાર્ટઅપ હીરોઝ' (Startup Heroes), અને 'પીપૂડો' (Peepoodo) જેવી એનિમેટેડ શ્રેણીઓનું સહ-દિગ્દર્શન કરવાની સાથે 'રેમેન' (Rayman) ગેમ્સ, 'ધ રબ્બીઝ કેટ' (The Rabbi’s Cat), અને 'ધ રેડ ટર્ટલ' (The Red Turtle) પર કામ કર્યું છે, જ્યારે ન્ગ્યુએન 'ધ રબ્બીઝ કેટ' (The Rabbi’s Cat), 'અર્નેસ્ટ એન્ડ સેલેસ્ટાઇન' (Ernest & Celestine), અને 'ધ સમિટ ઓફ ધ ગોડ્સ' (The Summit of the Gods)માં તેમના યોગદાનથી સમૃદ્ધ દ્રશ્ય વારસો લાવે છે.

ઝડપથી બદલાતી દુનિયામાં એકાંત, ઝંખના અને લગાવની શોધ કરતી ફિલ્મ લેખક, દિગ્દર્શક અને પ્રોડક્શન ડિઝાઇનર ઝુ ઝાઓ (Xu Zao)ની 2026ની એનિમેટેડ ફીચર ડેબ્યૂ ચીની એનિમેટેડ ફિલ્મ 'લાઇટ પિલર' (Light Pillar) છે. એવા ભવિષ્યમાં સેટ કરાયેલી જ્યાં અવકાશ યાત્રા સામાન્ય છે, આ ફિલ્મ ઝા (Zha)ને અનુસરે છે, જે નાદાર થયેલા ફિલ્મ સ્ટુડિયોના મેદાનની સંભાળ રાખતો એક એકલવાયો સફાઈ કામદાર છે, જે એક લીલીછમ વર્ચ્યુઅલ દુનિયાની અંદર એક મહિલાના પ્રેમમાં પડે છે. ચંદ્ર પર તેની સાથે જોડાવા માટેની ટિકિટ ખરીદવા વધારાના કલાકો કામ કર્યા પછી, ઝાને ખબર પડે છે કે તેની ટિકિટ અમાન્ય છે. જ્યારે ફિલ્મના ક્લાઇમેક્સ માટે જૂના સ્ટુડિયોને તોડી પાડવા એક ફિલ્મ ક્રૂ આવે છે, ત્યારે ઝા પાછળ રહી જવાનો અને તેણે અત્યાર સુધી જાણેલી એકમાત્ર દુનિયાની સાથે જ વિલીન થઈ જવાનો હૃદયસ્પર્શી નિર્ણય લે છે. 1991માં ચીનના અંશાનમાં જન્મેલા, ઝુ ઝાઓ બેઇજિંગ ફિલ્મ એકેડેમીમાંથી માસ્ટર ડિગ્રી ધરાવે છે અને અગાઉ તેમની એનિમેટેડ ટૂંકી ફિલ્મ 'નો ચેન્જીસ હેવ ટેકન ઇન અવર લાઇફ' (No Changes Have Taken in Our Life) માટે પ્રશંસા મેળવી હતી, જેનું પ્રીમિયર IFFR ખાતે થયું હતું.

સિંગાપોરમાંથી આવે છે ચીની-ભાષાની એનિમેટેડ ફિલ્મ 'મેજિક એટલાસ' (Magic Atlas), જે સન ઝુન (Sun Xun) દ્વારા દિગ્દર્શિત સ્મૃતિ અને પ્રતિકાર પરની એક અવિસ્મરણીય 2026ની રૂપક કથા છે. જ્યારે એક રહસ્યમય જાદુગર લુઓચા (Luocha)ના અલગ-થલગ કોલસાના રાજ્યમાં આવે છે, ત્યારે તેની હાજરી પહેલેથી જ તંગ સમાજમાં ભય અને અશાંતિ ફેલાવે છે. ઝિયાઓ ઝી (Xiao Zhi) નામના એક અનાથ છોકરાની સાથે ધરપકડ કરીને જેલમાં પૂરવામાં આવ્યા બાદ, મિમેંગ (Mimeng) ઉત્સવ દરમિયાન થાંભલા પર જીવતા સળગાવી દેવામાં આવે તે પહેલાં જાદુગર ગુપ્ત રીતે તે બાળકને એક જાદુઈ એટલાસ સોંપે છે; મિમેંગ ઉત્સવ એક એવો રાજ્યકીય રિવાજ છે જેમાં નાગરિકોને તેમનો ભૂતકાળ ભુલાવી દેવામાં આવે છે. 1980માં ચીનના ફુક્સિનમાં જન્મેલા, સન ઝુન બેઇજિંગ સ્થિત કલાકાર અને ચાઇના એકેડેમી ઓફ ફાઇન આર્ટ્સના સ્નાતક છે જેમણે 2005માં π એનિમેશન સ્ટુડિયો (π Animation Studio)ની સ્થાપના કરી હતી. વેનિસ અને બર્લિનમાં પ્રદર્શિત થયેલી કૃતિઓ સાથે, 'મેજિક એટલાસ' લોકાર્નો અને ટોક્યો ફિલ્મ ફેસ્ટિવલ્સમાં સ્પર્ધાના રાઉન્ડ બાદ IFFI ખાતે આવી રહી છે.

આ સેગમેન્ટને પૂર્ણ કરતી ફિલ્મ 2026માં એકેડેમી એવોર્ડ વિજેતા ફિલ્મ નિર્માતા બ્રેડ બર્ડ દ્વારા દિગ્દર્શિત અંગ્રેજી-ભાષાની અમેરિકન એનિમેટેડ ફિલ્મ 'રે ગન' (Ray Gunn) છે. મેટ્રોપિયા (Metropia)ના ભવિષ્યવાદી મહાનગરમાં સેટ કરાયેલી, જ્યાં મનુષ્યો અને એલિયન્સ ઉડતી કારોથી ભરેલા આકાશ નીચે સહ-અસ્તિત્વ ધરાવે છે અને દરેક વસ્તુની કિંમત ચૂકવવી પડે છે, ત્યાં ચમકતા બાહ્ય દેખાવ પાછળ વ્યાપક ભ્રષ્ટાચાર છુપાયેલો છે. આ પરિદ્રશ્ય વચ્ચે, રે ગન (Ray Gunn), એક જૂની ઢબનો ખાનગી જાસૂસ જે એવી દુનિયામાં પોતાના મૂલ્યોને વળગી રહેવા માટે સંઘર્ષ કરી રહ્યો છે જે તેના વ્યવસાયને અપ્રચલિત માને છે, તે પોતાની કારકિર્દીના સૌથી મોટા કેસમાં ખેંચાયેલો જોવા મળે છે. લેખક, દિગ્દર્શક, નિર્માતા અને વોઇસ એક્ટર તરીકે વૈશ્વિક સ્તરે પ્રખ્યાત, જેઓ લાગણી, રમૂજ અને એક્શનને એકીકૃત રીતે વણે છે, બર્ડ આ રેટ્રો-ફ્યુચરિસ્ટિક એનિમેટેડ નોયરમાં 'ધ ઇન્ક્રેડિબલ્સ' (The Incredibles), 'રાટાટૌઇલ' (Ratatouille), અને 'મિશન: ઇમ્પોસિબલ – ઘોસ્ટ પ્રોટોકોલ' (Mission: Impossible – Ghost Protocol) જેવી ક્લાસિક ફિલ્મોની તેમની આગવી વાર્તાકથન નિપુણતા લાવે છે.

આ નવા સેગમેન્ટ દ્વારા, 57મો IFFI 2026 ફેસ્ટિવલમાં આવનારા લોકોને માધ્યમથી આગળ વધીને જોવાની અને એનિમેશનને આપણી આશાઓ, નબળાઈઓ અને સહિયારી માનવતાના આત્મીય દર્પણ તરીકે અનુભવવા માટે આમંત્રણ આપે છે.
IFFI વિશે
1952માં સ્થપાયેલ, ઇન્ટરનેશનલ ફિલ્મ ફેસ્ટિવલ ઓફ ઇન્ડિયા એ એશિયાના સૌથી જૂના અને અગ્રણી આંતરરાષ્ટ્રીય ફિલ્મ ફેસ્ટિવલ્સમાંનો એક છે. ભારત સરકારના માહિતી અને પ્રસારણ મંત્રાલય દ્વારા ગોવા સરકાર અને એન્ટરટેઇનમેન્ટ સોસાયટી ઓફ ગોવાના સહયોગથી આયોજિત, IFFI વૈશ્વિક મંચ પર ભારતીય ફિલ્મો અને પ્રતિભાને પ્રોત્સાહન આપવાની સાથે વિશ્વ સિનેમાની શ્રેષ્ઠ કૃતિઓની ઉજવણી કરે છે. ગોવામાં વાર્ષિક ધોરણે યોજાતો આ ફેસ્ટિવલ સર્જનાત્મક આદાનપ્રદાન, નવા અવાજોની શોધ અને સિનેમા દ્વારા સાંસ્કૃતિક સમજણને પ્રોત્સાહન આપવા માટે એક મંચ તરીકે કાર્ય કરે છે.
SM/IJ/GP/JT
સોશિયલ મીડિયા પર અમને ફોલો કરો :
@PIBAhmedabad
/pibahmedabad1964
/pibahmedabad
pibahmedabad1964[at]gmail[dot]com