Ka Tnad Information and Broadcasting ka la shim artylli ki rai kiba kongsan mynta ka sngi. Kine ki sienjam kin iarap ia ka kam shna phlim ha India ban kiew. Kin iarap ruh ban pynbun ia ki jaka pyni phlim ha kylleng ka ri.

Ia kine ki rai la shim ha ka jingialang peit bniah ba la pyniaid da u Myntri ka Tnad Information and Broadcasting ka Sorkar Pdeng u Ashwini Vaishnaw ha New Delhi mynta ka sngi. Ha ka jingialang bad ki heh ophisar jong ka tnad, u Myntri u la bthah ban shim mardor ia ki sienjam ban pynkhlain ia ka kam pynmih phlim, ka jingsam, bad ka jingpyniasoh ia ka teknoloji.

La thung ia ka Kynhun wad bniah

Ka Tnad ka la thaw ia ka kynhun wad bniah kaba ha khlieh duh. U Prasoon Joshi un pyniaid ia kane ka Kynhun. Kan kynthup ia ki riew shemphang ha ka kam bad kumjuh ruh ki nongiatreilang ha ka liang ka teknoloji.

Ka Kynhun kan wad bniah ia ki lad bad ki jingeh kiba don ha ka kam shna phlim ha India. Kan ai jingmut ia ki lad ki lynti ban pynkhlain ia kane ka kam. Kan ai jingmut ruh ia ki sienjam ban pynlong ia ki phlim jong ka India kiba kham lah ban iakhun ha ka pyrthei.

Ka kynhun wad bniah kan peit ia kine ki mat harum, nalor kiwei pat:

• Ki sienjam ban pynlong ia ki phlim jong ka India kiba kham lah ban iakhun ha ki iew jong ka pyrthei.
• Ka jingktah jong ki teknoloji kiba thymmai ia ka kam shna phlim. Kine ki kynthup ïa ka Artificial Intelligence bad ka virtual production. Ka Kynhun kan ai jingmut kumno ki nongshna phlim na India ki lah ban pyndonkam ia kine ki atiar.
• Kumno ki nongshna phlim ki lah ban ioh ia ka jngbei tyngka na ki jaka treikam na ka iew bad ki lad bei tyngka ba thymmai na ka bynta ban pynmih phlim.
• Ki jingeh kiba ki nongshna phlim ki iakynduh ha kaba pynbiang pisa ban pynmih bad pyniaid iew ia ki phlim.
• Ka jingtreilang bad ki Sorkar Jylla bad kiwei kiwei ki nongshim bynta. Ka Kynhun kan ithuh ia ki rukom treikam kiba bha tam. Kan ai jingmut ruh ia ka polisi kaba pura na ka bynta ka jingkiew kaba jrong samoi jong ka kam shna phlim ha India.

Ka kynhun wad bniah kan sa iamir jingmut bad baroh kiba iadon bynta kiba ka donkam ban iakren ha kylleng ka ri. Kan sa aiti ia ka kaiphod jong ka sha ka Tnad hapoh lai bnai.

Ki kyndon ha kaba iadei bad ki phlim kiba ki jylla ki lah ban pyntreikam

Ka jingpynbeit ia ki kam pyni phlim ki don hapoh ka thup jong ki Jylla. Ki jylla bapher bapher ki bud ia ki kyndon bapher bapher na ka bynta ki jingioh jingbit bapher bapher kiba donkam na ka bynta ka kam shna phlim bad ki jaka pyni phlim. Kane ka la long ka jingkhanglad kaba khraw ia ka jingkiew jong ki jingdon jingem ba iadei bad ka kam shna phlim khamtam ha ki shnong rit bad ki jaka nongkyndong.

Ban pynsted ia ki jingdon jingem ba iadei bad ka kam shna phlim, ka tnad ka la pynkhreh ia ka thup jong ki kyndon. Ia kine ki kyndon la shna hadien ba la iakren bad baroh ki nongshim bynta. Mynta ka Tnad ka la phah ïa kine ki Model State Cinema Regulations sha baroh ki Sorkar Jylla. La kyrpad ia ki jylla ban pdiang ia ki. Ka Tnad kan iarap ruh ia ki Jylla ban pyntreikam ia kine ki kyndon.

Kine ki rai kin tei ia ka kam shna phlim jong ka India kaba khlain, kaba katkum ka juk mynta bad kaba lah ban iakhun ha ka pyrthei. Ka kam shna phlim jong ka India kan dang iai bteng ban long ka lad kaba khlain na ka bynta ka jingsaindur, ka kolshor bad ka jingsaindur thymmai.

****