માહિતી અને પ્રસારણ મંત્રાલયે આજે બે મહત્વપૂર્ણ નિર્ણયો લીધા છે. આ પગલાં ભારતીય ફિલ્મ ઉદ્યોગને વિકસાવવામાં મદદ કરશે. તે દેશભરમાં સિનેમા સ્ક્રીનની સંખ્યા વધારવામાં પણ મદદ કરશે.

આ નિર્ણયો આજે નવી દિલ્હી ખાતે કેન્દ્રીય માહિતી અને પ્રસારણ મંત્રી શ્રી અશ્વિની વૈષ્ણવની અધ્યક્ષતામાં મળેલી એક ઉચ્ચ સ્તરીય સમીક્ષા બેઠકમાં લેવામાં આવ્યા છે. મંત્રાલયના વરિષ્ઠ અધિકારીઓ સાથેની આ બેઠકમાં, મંત્રીશ્રીએ ફિલ્મ નિર્માણ, વિતરણ અને ટેકનોલોજીકલ એકીકરણને મજબૂત કરવા માટે તાત્કાલિક માળખાકીય પગલાં લેવા નિર્દેશ આપ્યો હતો.

એક સ્ટડી ગ્રુપની રચના કરવામાં આવી છે

મંત્રાલયે એક ઉચ્ચ સ્તરીય સ્ટડી ગ્રુપ (અભ્યાસ જૂથ) ની રચના કરી છે. શ્રી પ્રસૂન જોશી આ ગ્રુપના અધ્યક્ષ રહેશે. તેમાં ઉદ્યોગના નિષ્ણાતો અને ટેકનોલોજી ભાગીદારોનો પણ સમાવેશ કરવામાં આવશે.

આ ગ્રુપ ભારતીય સિનેમા સમક્ષ રહેલી તકો અને પડકારોનો અભ્યાસ કરશે. તે આ ક્ષેત્રને મજબૂત કરવાના ઉપાયો સૂચવશે. તે ભારતીય ફિલ્મોને વૈશ્વિક સ્તરે વધુ સ્પર્ધાત્મક બનાવવા માટેના પગલાંની ભલામણ પણ કરશે.

સ્ટડી ગ્રુપ અન્ય બાબતોની સાથે નીચેના મુદ્દાઓ પર ધ્યાન કેન્દ્રિત કરશે:

• વૈશ્વિક બજારોમાં ભારતીય ફિલ્મોને વધુ સ્પર્ધાત્મક બનાવવાના પગલાં.
• સિનેમા પર આર્ટિફિશિયલ ઇન્ટેલિજન્સ (AI) અને વર્ચ્યુઅલ પ્રોડક્શન જેવી નવી ટેકનોલોજીની અસરો. આ સાધનોનો ઉપયોગ ભારતીય ફિલ્મ નિર્માતાઓ કેવી રીતે કરી શકે તે અંગે ગ્રુપ સૂચનો આપશે.
• ફિલ્મ નિર્માતાઓ બજારમાંથી સંસ્થાકીય નાણાકીય સહાય (ઇન્સ્ટિટ્યુશનલ ફાઇનાન્સ) અને ફિલ્મ નિર્માણ માટે ભંડોળના નવા વિકલ્પો કેવી રીતે મેળવી શકે.
• ફિલ્મ નિર્માણ અને વિતરણ માટે નાણાં એકત્ર કરવામાં ફિલ્મ નિર્માતાઓને પડતી મુશ્કેલીઓ.
• રાજ્ય સરકારો અને અન્ય હિસ્સેદારો (સ્ટેકહોલ્ડર્સ) સાથે મળીને કામ કરવું. આ ગ્રુપ શ્રેષ્ઠ પદ્ધતિઓની ઓળખ કરશે. તે ભારતીય સિનેમાના લાંબા ગાળાના વિકાસ માટે એક સંપૂર્ણ નીતિગત માળખાની (પોલિસી ફ્રેમવર્ક) ભલામણ પણ કરશે.

આ સ્ટડી ગ્રુપ દેશભરના તમામ સંબંધિત હિસ્સેદારો સાથે પરામર્શ કરશે. તે ત્રણ મહિનાની અંદર મંત્રાલયને પોતાનો અહેવાલ સુપરત કરશે.

રાજ્યો દ્વારા અપનાવવા માટે મોડેલ સ્ટેટ સિનેમા રેગ્યુલેશન્સ

સિનેમા અને થિયેટરોનું નિયમન (રેગ્યુલેશન) રાજ્યની યાદી (સ્ટેટ લિસ્ટ) હેઠળ આવે છે. સિનેમા અને થિયેટરો માટે જરૂરી વિવિધ પરવાનગીઓ માટે અલગ-અલગ રાજ્યો અલગ-અલગ નિયમોનું પાલન કરે છે. સિનેમા ઇન્ફ્રાસ્ટ્રક્ચરના વિકાસમાં, ખાસ કરીને નાના નગરો અને ગ્રામીણ વિસ્તારોમાં આ એક મોટો અવરોધ રહ્યો છે.

સિનેમા ઇન્ફ્રાસ્ટ્રક્ચરને ગતિ આપવા માટે, મંત્રાલયે મોડેલ નિયમોનો એક સેટ તૈયાર કર્યો છે. આ નિયમો તમામ હિસ્સેદારો સાથે ચર્ચા કર્યા પછી તૈયાર કરવામાં આવ્યા હતા. મંત્રાલયે હવે આ મોડેલ સ્ટેટ સિનેમા રેગ્યુલેશન્સ (Model State Cinema Regulations) તમામ રાજ્ય સરકારોને મોકલી આપ્યા છે. રાજ્યોને તેને અપનાવવા વિનંતી કરવામાં આવી છે. મંત્રાલય આ નિયમોને અમલમાં મૂકવામાં રાજ્યોને મદદ પણ કરશે.

આ નિર્ણયો સાથે મળીને એક મજબૂત, આધુનિક અને વૈશ્વિક સ્તરે સ્પર્ધાત્મક ભારતીય ફિલ્મ ઉદ્યોગનું નિર્માણ કરશે. ભારતીય સિનેમા સર્જનાત્મકતા, સંસ્કૃતિ અને ઇનોવેશન માટેનું એક શક્તિશાળી માધ્યમ બની રહેશે.

SM/JD