ভারত মাতা কী জয়।

ভারত মাতা কী জয়।

ভারত মাতা কী জয়।

উত্তরখন্দগী রাজ্যপাল গুরমিত সিংহ, চীফ মিনিষ্টর পুস্কার সিংহ ধামি, কেন্দ্রগী মন্ত্রীমন্দলগী ঐগী মরুপশিং নিতিন গাদকরি, অজয় তামতা, তেক্নোলোজিগী খুৎথাংদা শরুক য়ারিবা উত্তর প্রদেসকী চীফ মিনিষ্টর য়োগী অদিত্যনাথ, রাজ্যপাল অনন্দি বেন, দিল্লিগী চীফ মিনিষ্টর রেখা গুপ্ত, রাজ্যগী বি.জে.পি প্রসিদেন্ত মহেন্দ্র ভাত, হান্নগী রাজ্যপাল ভাগত সিংহ কোসয়ারি, হান্নগী চীফ মিনিষ্টর ভাই রামেস পোখ্রিয়াল, বিজয় ভাহুগুনা, তির্থ সিংহ রাৱাত, ত্রিবেন্দ্র সিংহ রাৱাত, মিনিষ্টরশিং, এম.পিশিং অমসুং উত্তরখন্দগী এম.এল.এশিং অমসুং থৌরম অসিদা শরুক য়ারিবা মশিং য়াম্লবা ঐগী ইনাওশিং অমসুং ইচলশিং।

দেবভুমি উত্তরখন্দগী শেংলবা লমদমদা ঐনা খুরুমজরি। মশিং য়াম্লবা সাধুশিংদসু ঐনা খুরুমজরি। উত্তরখন্দগী নুংশিরবা ভুলোন-ভাইবান্দোন, বৌদি-ভুলিয়ন, স্যনা-বুজুরগাউন, ঐনা খুরুমজরি। ঐগী নুংশিরবা ইচলশিং, ইনাওশিং অমসুং অহল-লমনশিং।

দিল্লি অমসুং উত্তর প্রদেসকী মীওই কয়া তেক্নোলোজিগী খুৎথাংদা থৌরম অসি শরুক য়ারি। মীওই খুদিংমক ঐনা তরাম্না ওকচরি। ঐনা মফম অসিদা য়ৌরকপদা পুং ১ হেন্না থেংবগীদমক, উত্তর প্রদেস অমসুং দিল্লিদা থৌরম শরুক য়ারিবা মীয়ামদা ঙাকপীনবা ঐনা হায়জরি। য়াংনা থৌরকপদা ঐঙোন্দা অৱাবা অমা ওইখি। মীয়াম খুরুম্বদা, মীয়ামদগী বর নিবদা ঐ পুং ১ খর হেন্না থেংখিবনি, মসিগীদমক ঙাকপীনবা ঐনা হায়জরি অমসুং উত্তরখন্দগী ইমাশিং অমসুং ইচলশিংগী থৌজাল ঐনা লৌশিঞ্জরে অমসুং মসিগীদমক ঐনা মখোয় পুম্নমক থাগৎপা ফোঙদোকচরি।

মরুপশিং,

ঙসি, লৈবাক অসিদা কুহ্মৈ কয়া পাংথোক্লি। মফম কয়াদা অনৌবা চহি হৌরে। নুংঙাইরবা বৈশাখী, বোহাগ বিহু অমসুং পুথান্দুগীদমক লৈবাক অসিগী মীয়ামদা ঐনা য়াইফ পাউজেল পীজরি।

মরুপশিং,

নুমিৎ খরগী মতুংদা, যমুনোত্রি, গঙ্গোত্রি, বাবা কেদরনাথ, বাদ্রিনাথ ধাম লাইফম কোইবা হৌরগনি। শেংলবা মতম অসি, লৈবাক অসিগী ভক্ত করোর কয়ানা ঙাইরি। পঞ্চ বাদ্রি, পঞ্চ কেদর, পঞ্চ প্রয়াগ অমসুং মফম অসিদা লাৎলিবা ঈশ্বরশিংদা ঐনা কোক নোঞ্জরি। ঐনা সন্তালাতা মাতাসু খুরুমজরি। মফম অসিদা লাক্ত্রিঙৈদা, ঐনা মা দাত কালি খুরুমরুলে। দেহরাদুন সহরদা মা তাদ কালি ঙাইন্থোইরি। দিল্লি-দেহরাদুন ইকোনোমি কোরিদোরগুম্বা অচৌবা প্রোজেক অমা লোইশিনবদা, মাতা দাত কালিগী অচৌবা থৌজাল ফংখি।

মরুপশিং,

উত্তরখন্দ রাজ্য শেমখিবা চহি ২৫ মপুংফারকপগা লোয়ননা রাজ্য অসি চহি ২৬ চঙলক্লে। ঙসি, দিল্লি-দেহরাদুন এক্সপ্রেসৱে শঙ্গাবগা লোয়ননা, খুমাঙচাউশিনবা অসিদা অতোপ্পা অচৌবা মাইপাকপা অমা হাপচিল্লে। বাবা কেদরনাথ উরবা মতুংদা, ঐগী চিম্বালদগী মসি মশা মথন্থ থোকচরকখি, মদুদি চৎলিবা চহিচা অসিগী অহুমশুবা দিকেদ অসি উত্তরখন্দগী দিকেদ ওইগনি। দবল ইঞ্জিন সরকারগী থৌশিলশিং অমসুং উত্তরখন্দগী মীয়াম্না হোৎনবা কনবদগী চাউখৎপগী অনৌবা শক্লোনশিং উবদা ঐ য়াম্না হরাওই। প্রোজেকশিং অসিনা উত্তরখন্দগী চাউখৎপদা অনৌবা ইনোৎ পীগনি। এক্সপ্রেসৱে অসিগী শাংলবা শরুক অমা উত্তর প্রদেস ফাউদুনা চৎলি। মসিনা ঘজিয়াবাদ, বাঘবাতা, বারৌত, সামলি অমসুং সাহারানপুরগুম্বা সহর কয়াদা কান্নবা য়াম্না পীগনি। তুরিজমগী ওইনা য়েংবদা প্রোজেকশিং অসি য়াম্না মরুওই। প্রোজেক অসিগীদমক লৈবাক শীনবা থুংনা ঐনা হরাওবা ফোঙদোকচরি।

মরুপশিং,

ঙসি অসি দোক্তর বাবাসাহেব অম্বেদকারগী মপোক নুমিৎসু থোক্লে। ইরৈচা করোর কয়াগী মহুৎশীন্দুনা বাবাসাহেব অম্বেদকারগী মফমদা ঐনা ইকায়খুম্নবা উৎচরি। হৌখিবা চহি ১০ দা ঐখোয়গী সরকারগী থৌশিলশিং অমসুং ৱারেপশিংনা সংবিধানগী ইকায়খুম্নবা অমুক হঞ্জিল্লে। আর্তিকল ৩৭০ লৌথোকখিবদগী, লৈবাক শীনবা থুংনা ভারতকী সংবিধান চৎনরে। মাওইজম অমসুং নেক্সালিজম মুৎথৎলবা জিলা কয়াদা ফাওবা হৌজিক সংবিধানগী ৱাখল্লোনগা লোয়ননা থবক পায়খৎলে। লৈবাক অসিদা সিবিল য়ুনিফোর্ম কোদ চৎন্নবা ঐখোয়গী সংবিধান্না থাজবা থম্লি। সংবিধানগী থবক অসি চৎনদুনা উত্তরখন্দনা লৈবাক শীনবা থুংনা লম্বী তাক্লে অমসুং মসিগী থৌনা মাঙলোমদা পুখৎলে।

মরুপশিং,

লায়রবা, তোল্লবা অমসুং নৈহৎপীরবশিংদা অচুম্বা ফংহন্নবা বাবাসাহেব অম্বেদকারগী পুন্সি কৎথোকখি। মসিগা থৌনা অসিগা লোয়ননা, ঙসি ঐখোয়গী সরকারনা লায়রবা, তোল্লবা মীওই খুদিংমক্ত অশেংবা খুন্নাইগী অচুম্বা ফংহল্লে। খুন্নাইগী অচুম্বা ফংহন্নবা খ্বাইদগী চাউবা পাম্বৈ অমদি লৈবাক শীনবা থুংনা থোং মান্ননা চাউখৎহনবনি, মীওই খুদিংমক্ত খুদোংচাবশিং ফংহনবনি, মীওই খুদিংমক নুংঙাইহনবনি। মরম অদদুনা বাবাসাহেব অম্বেদকারনা অনৌবা ইনফ্রাষ্ট্রকচর অমসুং উদ্যোগ চাউখৎনবা লাউরম্লিবনি।

মরুপশিং,

তুংগী ফিবম অমসুং মাইকৈ করি ওইগনি, মীয়াম্না তোইনা য়েংলি অমসুং মসিগীদমক খুবাক ময়িশিং উৎলি। খুবাক ময়ি য়েংবা মীওইশিংনা, মখোয়গী খুবাম ময়িশিং য়েংলি অমসুং মীওই খুদিংমক্কী তুংগী ফিবম তাক্লি। ঐ মসিগী সাইন্স অসি খঙদে, অদুবু মখোয়না হায়রিবা অসি অরিবা খুৎই লাইরিক অমদসু হায়রি। হৌজিক, লনাই মীওই অমগী মরাইবক মহাক্কী খুবাক ময়িশিংদা লৈরে, অদুবু লৈবাক অসিগী পুন্সিগী মতাংদা য়েংবদা, লৈবাক অমগী খুবাক ময়িশিং করি ওইগনি? লৈবাক অমগী ময়িশিংদি ঐখোয়গী লম্বীশিং, ঐখোয়গী হায়ৱেশিং, ঐখোয়গী এক্সপ্রেসৱেশিং, এয়রৱেশিং, রেলৱেশিং, ঈশিং লম্বীশিংনি-মখোয় ঐখোয়গী লৈবাক্কী খুবাক ময়িশিংনি। হৌখিবা চহি ১০ দা, চাউখৎলবা লৈবাক অমা ওইহন্নবগীদমক চাউখৎপগী খুবাক ময়িশিং শেমগৎনবা ঐখোয়গী লৈবাক্না থবক পায়খৎলে। হায়রিবা চাউখৎপগী ময়িশিং অসি ঙসিগী খুদোংচাবশিং ওইবা খক নত্তনা, মখোয় তুংগী মীরোলশিং নুঙাই য়াইফনবা গরেন্তিনি অমসুং মসিগী মোদীগী গরেন্তিনি। হৌখিবা চহি ১০ দা, লৈবাক্কী চাউখৎপগী ময়িশিং শেমগৎনবা ঐখোয়গী সরকারনা মমাঙদা অমুক্ত ওইখিদ্রিবা মওংদা শেনফমশিং থাদখ্রে। ঐনা অদোমদা মশিং অমা পীগনি। হৌজিক নিতিন জিনা অদোমদা উত্তরখন্দ খক্তগী ওইবা মশিং কয়া পীখ্রে। ২০১৪ ফাওবদা, অসিগুম্বা ইনফ্রাষ্ট্রকচরশিংগীদমক, চহি অমদা, লৈবাক শীনবা থুংনা লুপা করোর লাখ ২ ফাওবা চাদিং তৌখিদে। ঐনা হায়রিবা অসি ভারত শীনবা থুংবগী অচুম্বা অদুনি- মসিদা লুপা করোর লাখ ২ ফাওবা শীজিন্নখিদে; ঙসিদি শরুক তরুক হেল্লে, লুপা করোর লাখ ১২ হেল্লে। উত্তরখন্দদা লুপা করোর লাখ ২ হেনবগী প্রোজেকশিং পায়খৎলি। মতম অমদা উত্তরখন্দগী খুঙ্গংশিংদা, লম্বী অমগীদমক অহোংবা পুরক্নবা মীরোল কয়া ঙাইবা তাখি। ঙসিদি, দবল ইঞ্জিন সরকারগী থবকশিংনা মরম ওইদুনা, হৌজিক খুঙ্গংশিংদা লম্বীশিং য়ৌরে; মতম অমদা মী ইতাক তাক্লম্বা খুঙ্গংশিং অমুক হন্না নুংঙাই য়াইফরে। মসি চারধাম মহামার্গ প্রোজেক, রেল প্রোজেকশিং পাকথোকপা, কেদরনাথ অমসুং হেমকুন্দ সাহিব রোপৱে ওইবা য়াই- হায়রিবা চাউখৎপগী খুবাক ময়িশিং অসি লমদম অসিগী মফম খুদিংমক্ত পুন্সিগী খুবাক ময়িশিং ওইরে।

মরুপশিং,

২১ শুবা চহিচাগী ভারতনা ঙসি শুরিবা থবক অসিগী খোঙজেল অমসুং পাক-চাউবা, মালেম শীনবা থুংবনা মসিগী মতাংদা খন্নরি। ঐনা অদোমদা উত্তরখন্দ, নোংচুপ থংবা উত্তর প্রদেস অমসুং দিল্লিগী খুদম পীরি। চয়োল খরগী মমাংদা, দিল্লি মেত্রো পাকথোক-চাউথোক্লে, মেরুত্ত মেত্রো সর্বিস লৈরে, লৈবাক মীয়ামদা দিল্লি-মেরুত নমো ভারত রেল কৎথোক্লে, নোইদা ইন্তরনেসনেল এয়রপোর্ত থবক হৌরে, এয়রপ্লেনশিংগী এম.আর.ও থবক হৌরে অমসুং ঙসিদগী দেহরাদুন-দিল্লি এক্সপ্রেসৱে থবক হৌরে।

মরুপশিং,

অসিগুম্বা অপীকপা লমদম অমদা, অতেনবা মতম অমদা পুম্নমক অসি পাংথোক্লে। লৈবাক অসিদা অচৌবা ইনফ্রাষ্ট্রকচর অমা শেমগৎলিবা অসি খন্দুনা য়েংউ। মরম অদুনা ২১ শুবা চহিচাগী ভারত হায়না ঐনা হায়রিবনি, মমাঙদা অমুক্ত ওইখিদ্রিবা মওংদা অনৌবা যুগকী অনৌবা ইনফ্রাষ্ট্রকচর লৈবা হৌরে।

মরুপশিং,

ঙসিদি, ভারতকী তোঙান তোঙানবা মফমশিং শম্নবা ইকোনোমি কোরিদোর কয়া থবক পায়খৎলি। দিল্লি-মুম্বাই ইন্দষ্ট্রিয়েল কোরিদোর, বেঙ্গালুরু-মুম্বাই ইন্দষ্ট্রিয়েল কোরিদোর, ইষ্ট কোষ্ট ইকোনোমিক কোরিদোর, অমৃতশর-কোলকাতা ইন্দষ্ট্রিয়েল কোরিদোর-অসিগুম্বা কোরিদোর কয়া লৈবাক অসিদা শেমগৎলি। ইকোনোমি কোরিদোরশিং অসি চাউখৎপগী অনৌবা থোঙশিংনি। কোরিদোরশিং অসিদা থাজবগী লংলাশিং শম্নরে। লম্বীগী মথক্ত, ইকোনোমিক কোরিদোরশিং অসি অনৌবা ললোন-ইতিক্কী লম্বীশিং শেম্লে। মখোয়না ফেক্তরশিং অমসুং ৱেয়ারহাওসশিংগী অপুনবা নেতৱার্ক অমগী য়ুম্ফমগী শেম-শারি।

মরুপশিং,

দেহরাদুন-দিল্লি ইকোনোমিক কোরিদোরগী খুৎথাংদা লমদম অসি শীনবা থুংনা অওনবা পুরক্লগনি। অহানবা কান্নবদা মসিনা মতম চঙহল্লোই, চৎথোক-চৎশিনগী চাদিং হন্থহল্লগনি অমসুং য়াংলগনি, মীয়াম্না পেত্রোল অমসুং দিজলদা শেন হন্থনা চাদিং তৌরগনি, ভারা হন্থরগনি অমসুং অনিশুবা খ্বাইদগী চাউবা কানবনা থবক ফংবনা ওইগনি। মসি শেমগৎনবা হৌজিক ফাওবদা লুপা করোর লিশিং ১২ চাদিং তৌখ্রে, মসিদা শিন্মী লিশিং কয়া থবক তৌরি। মসিগা লোয়ননা, মশিং য়াম্লবা ইঞ্জিনিয়ারশিং, অতোপ্পা হৈথোই-শিংথোইরবা শিন্মীশিং অমসুং ত্রান্সপোর্তকী মীওইশিং থবক ফংখি। লৌমীশিং অমসুং শা-ষন লোইবা লৌমীশিংগী পোৎথোকশিং হৌজিক য়াংনা অচৌবা মন্দিশিং অমসুং কৈথেলশিংদা য়ৌরগনি।

মরুপশিং,

চিংলেম্বা এক্সপ্রেসৱে অসিদগী উত্তরখন্দগী তুরিজম্না অচৌবা কান্নবা অমা ফংলগনি। মসি দেহরাদুন, হরিদ্বার, রিসিকেস, মুসুরি অমসুং চারধাম যাত্রাগী মরুওইবা লম্বী অমা ওইরগনি। ঐখোয়না খঙলে, তুরিজম চাউখৎপা মতমদা, মীওই খুদিংমক করিগুম্বা খর তানগনি নত্ত্রগা ফংগনি। মসি হোতেলশিং, ধাবা মপুশিং, তেক্সি, ওতোশিং, হোমষ্টেশিং ওইবা য়াই- মসিনা মীওই খুদিংমক কান্নবা পীগনি।

মরুপশিং,

ঙসি উত্তরখন্দনা নিংথমথাগী লমকোয়বা, নিংথমথাগী শান্নবা অমসুং  লুহোংনবগীদমক ‘ৱেদ ইন ইন্দিয়া’ অফবা মফম অমা ওইরকপদা ঐ হরাওই।

মরুপশিং,

উত্তরখন্দগী শেন্মিৎলোনগীদমক চহি চুপ্পা তুরিজম লৈহনবা য়াম্না দরকার ওই। মরম অদুনা নিংথমথাগী মতমদা লাইনিং-লাইশোনগা মরী লৈনবা খোঙচৎসিংগী মতাংদা ঐনা পনখিবা অদু। চহি খুদিংগী হায়রিবা খোঙচৎশিং অদুদা মীওই মশিং য়াম্না শরুক য়াবা হেনগৎলকপদা ঐ হরাওই। অদোম নিংশিংলমগনি, ২০২৩ দা ঐ অদি কাইলাস অমসুং ওম পর্বাত্ত চৎখ্রে। ঐ য়াম্না ঙন্না চৎকদবনি, অদুবু ঐ চৎপা ঙমখিদে, ঐ চহি কয়াগী মতুংদা চৎখি অমসুং চীফ মিনিষ্টরনা ঐঙোন্দা হায়খি অমসুং ঐখোয়গী মরক্ত রাজ্যপাল জি লাকখি, ২০২৩ দা ঐনা মফম অদুদা চৎখি অমসুং মদুগী তুংদা, মফম অদুদা মশিং য়াম্লবা ভক্তশিং লাক্লে হায়না মহাক্না ফোঙদোকখি। মমাংদা নিংথমথাগী খোঙচৎকীদমক মফম অদুদা মীওই লিশিং খর খক চৎখি। ২০২৫ দা, শেংলবা মফমশিং অদুদা মীওই লিশিং ৪০ হেন্না লাকখি। মতম অমদা মসি লিশিং অমা খক ওইরমখি; করিগুম্বা লিশিং ৪০ য়ৌরবদি, মফম অদুগী মীয়ামগী হিংনবগী লম্বী কয়া য়াম্না ফগৎলমগনি। মসিগা চপ মান্না, ২০২৪ গী নিংথমথাগী চারধাম যাত্রাদা ভক্ত লিশিং ৮০ রোম লাকখি। ২০২৫ দা, মসিগী মশিং লাখ ১.৫ হেনখি।

মরুপশিং,

চাউখৎপা, মহৌশাগী অকোয়বা ফিবম অমসুং নাৎ লৈবা বিকসিত ভারত অমা শেমগৎনবা ঐখোয় থবক পায়খৎলি। মরম অদুনা, ঙসি শেমগৎ শাগৎলিবা খুদিংমক চাউখৎপা, মহৌশাগী অকোয়বা ফিবম অমসুং নাৎকী ‘ত্রিবেনি’গী গুনশিংদা য়ুম্ফম ওইবনি। ইনফ্রাষ্ট্রকচরদা মীওইবগী খুদোংচাবশিং লৈগদবনি অমসুং মফম অদুদা লৈরিবা লম্লক্কী শা-উচেকশিংদা খুদোংচাদবা থোকহল্লোইদবনি, মসি ঐখোয়গী থবক্নি। মরম অদুনা এক্সপ্রেসৱে অসিদা কিমি ১২ রোম শাংবা ইলাবেতেদ ৱাইল্দলাইফ কোরিদোর অমা শেমগৎলে। শামুশিং খুদোংচাদবা থোক্তনবা চেকশিন-থৌরাং পায়খৎলে।

মরুপশিং,

ঙসি লৈবাক শীনবা থুংবগী লমকোয়বা মীওইশিং অমসুং ভক্তশিংদা ঐনা করিগুম্বা খর হায়জরি। দেবভুমিগী ঐখোয়গী চীঙজাউশিং, উমংগী শরুকশিং অমসুং লমদম অসিগী চৎনবী- মখোয় য়াম্না শেংলবা মফমশিংনি। অসিগুম্বা মফমশিং লু-নান্না থম্বা হায়বসি ঐখোয় পুম্নমক্কী থৌদাংনি। মফম অসিদা লৈরিবা মীওইশিং অমসুং লমকোয়বা লাক্লিবা মীওইশিংগী ওইনসু। মফমশিং লৈরিবা প্লাষ্টিক বোত্তলশিং, অমোৎপা মপৈশিং অসিনা দেবভুমিগী অশেংবা শক্তম মাঙহল্লে। মরম অদুনা, দেবভুমিগী হায়রিবা মফমশিং অসি, লাইফমশিং ঐখোয়না লু-নান্না অমসুং ফজনা থমগদবনি।

মরুপশিং,

মথং চহিদা হরিদ্বারদা কুম্ভসু পাংথোক্কনি। লাইনিংগী থাজবা, অচৌবা অমসুং লু-নানবগী ইতিনফম অসি শেমগৎনবা ঐখোয়না পায়খৎপা য়াবা থবক খুদিংমক পায়খৎকদবনি।

মরুপশিং,

উত্তরখন্দদা নন্দা দেবী রাজ যাত্রাসু পাংথোক্লি। মসি লাইনিংগী কুহ্মৈ অমনি অমসুং মসি ঐখোয়গী নাৎকী মরমদা ৱাখল তাবগী অহিংবা খুদম অমনি। ইমা নন্দা অসি মচানুপী অমা ওইনা লৌখি অমসুং মপুংফানা ইকায়খুম্নবা উত্তুনা বিদায় পীখি। খোঙচৎ অসিদা ইচলশিং অমসুং ইচানুপীশিং শরুক য়াবা অসিনা মসি অমুক্ক হেন্না অখন্নবা ওইহল্লে। মা নন্দদা খুরুমজবগা লোয়ননা, ঐনা লৈবাক শীনবা থুংবগী ইচলশিং অমসুং ইচানুপীশিংদা অখন্নবা পাউজেল অমা পীনিংই। বিকসিত ভারত অমা শেমগৎপা অদোমগী চাউরবা থৌদাং লৈরি। লৈবাক অসিগী ইচানুপীশিং, ইচলশিং অমসুং ইমাশিংগী অচৌবা থৌদাং অমা ঐনা উরে। ইচলশিং অমসুং ইচানুপীশিং অশোই-অঙাম লৈহন্দবা অমসুং গনতন্ত্রদা শরুক য়াবা অসি দবল ইঞ্জিন সরকারগী খ্বাইদগী মরুওইবনি। মালেমদা অচৌবা খুদোংচাদবা অমা থোকপা অদোম হৌজিক উরে। মসিদগী, মালেমগী চাউখৎলবা লৈবাকশিং ফাওবা অৱাবা য়াম্না মায়োক্নরে। অসিগুম্বা খুদোংথিবা ফিবমশিং ফাওবদা, ঐখোয়গী ইচলশিং অৱাবা মায়োক্নহন্দবা হায়বসি ঐখোয়গী সরকারগী থবক্নি।

মরুপশিং,

ইচলশিং অমসুং ইচানুপীশিং শরুক য়াবগী অতোপ্পা অচৌবা মাইপাকপা অমা লৈবাক মমাংদা লৈরে। চহি ৪০ গী মতুংদা, সংসদনা নারী শক্তি বন্দন অধিনিয়ম পাস তৌখ্রে। মসিগী খুৎথাংদা, লেজিসলেতিপ এশেমব্লিশিং অমসুং লোক সভাদা নুপীশিংগী সিত চাদা ৩৩ খাক্লে। মরুওইবা আইন অসি দল খুদিংমক্না শৌগৎলে। হৌজিক নুপীশিং মসিগী হক অসি ফংলে, হক অসি চৎনহনবদা থেংথবা অমতা লৈররোই। হৌজিক মসি চৎনহনগদবনি। ২০২৯ দা লোক সভা মীখল পাংথোক্কনি, মতম অদুদা  লেজিসলেতিপ এশেমব্লি মীখলশিংসু পাংথোক্কনি- মসি ২০২৯ দা চৎনগনি। মসি লৈবাক অসিগী অপাম্বনি; মসি লৈবাক অসিগী ইচল অমসুং ইচানুপী খুদিংমক্কী অনিংবনি। মাত্রুশক্তিগী অনিংবা থুংনবা, এপ্রিল ১৬ দা সংসদতা অখন্নবা খন্ন-নৈনবা অমা পাংথোক্লগনি। রাজনিতি দল খুদিংমক পুনগনি, অমতা ওইনা য়ানদুনা, লৈবাক অসিগী ইচলশিং অমসুং ইচানুপীশিংগী হকশিংগা মরী লৈনবা থবক অসি খুমাঙচাউশিনহনগনি অমসুং মসি থবক ওইনা পাংথোক্কনি। ঙসি ঐনা লৈবাক অসিগী ইচলশিংদা অফোঙবা চিথি অমা ইখ্রে; ঐগী চিথি অসি সোসিএল মেদিয়াদা অদোম উরম্বা য়াই; চিথি অসিগী মতাংদা তি.ভি অমসুং পাউচেগী পাউমীশিংনসু পল্লম্বা য়াই। থবক অসিদা শরুক য়ানবা লৈবাক অসিগী ইমাশিং অমসুং ইচলশিংদা ঐনা হায়জরি। ঐগী লৈবাক্কী ইমাশিং অমসুং ইচলশিং চিথি অসি শোইদনা পাগনি হায়না ঐনা চেৎনা থাজৈ। মখোয়না ৱাহৈ খুদিংমক ফজনা নৈনগনি অমসুং অসিগুম্বা অচৌবা থবক অমগীদমক, এপ্রিল ১৬, ১৭ অমসুং ১৮ দা সংসদতা এম.পিশিং পুনগনি। নারী শক্তি বন্দন অধিনিয়মদা এমেন্দমেন্ত শৌগৎনবা লৈবাক অসিগী দল খুদিংমক্ত ঙসি দেবভুমিদগী ঐনা হায়জরি। ২০২৯ দা, ঐখোয়গী লৈবাক্কী অপুনবা মীশিংগী তঙ্খায় অমা-ঐখোয়গী ইমাশিং, ইচলশিং অমসুং ঐখোয়গী ইচানুপীশিংদা ঐখোয়না মখোয়গী হকশিং পীরসি।

মরুপশিং,

করিগুম্বা ঐনা উত্তরখন্দা লাকপদা অমসুং লান্মীগী মরমদা ৱা অমতা ঙাংদ্রবদি, ৱারি অদু মপুংফাদে। মীফম পাংথোক্লিবা গরহি কেন্ত অসি উত্তরখন্দগী অচৌবা লান্মীগী চৎনবী খুদম অমনি। অনকপদা লৈবাক অসিগী দিফেন্স অমসুং সেকুরিতিগা মরী লৈনবা ইন্সতিতুৎ কয়া লৈরি; ১৯৬২ গী লালদা থৱায় কৎখিবা সহিদ জসৱান্ত সিংহ রাৱাত লৈবাক অসিনা কৈদৌঙৈদা কাউবা ঙম্লোই।

মরুপশিং,

লান্মী নত্ত্রগা খুদোংচাবশিং মপাঙ্গল কনখৎহন্নবা অমসুং ঐখোয়গী লান্মীশিংগী ইমুংশিংগী ইকায়খুম্নবা হেনগৎহন্নবা, ঐখোয়গী সরকারনা লেপ্তনা হোৎনরি। ৱান রেঙ্ক ৱান পেন্সনগী মখাদা, হান্নগী লান্মীশিংগী একাউন্তশিংদা ঐখোয়গী সরকারনা হৌজিক ফাওবদা লুপা করোর লাখ ১.২৫ হেন্না হাপচিনখ্রে। উত্তরখন্দগী ইমুং লিশিং কয়াসু মসিগী কান্নবা ফংলে। মসিগী মথক্ত, হান্নগী লান্মীশিংগী হকশেলগী স্কিমগীদমক চহি অসিগী বজেত্ত শেনফম চাদা ৩৬ হেনগৎলে। চহি ৭০ অমসুং মসিগী মথক্ত লৈবা এক্স-সর্বিসমেনগীদমক, হিদাক-লাংথকশিং য়ুমদা ফংহনবা হৌরে। হান্না লান্মী ওইরম্বশিংগী মচাশিং লাইরিক তম্বদা পীবা গ্রান্ত শরুক অনি হেনগৎলে। মচানুপীশিং লুহোংবদা পীবা শেন্থংসু লুপা লিশিং ৫০ দগী লুপা লাখ ১ দা হেনগৎলে।

মরুপশিং,

মরৈবাক নুংশিবা, ঈশ্বরদা চঙজবা অমসুং চাউখৎপগুম্বা হিরম খুদিংমক শম্নহন্দুনা, ঐখোয়না লৈবাক অসি চাউখৎহনগদবনি। অমুক হন্না দিল্লি অমসুং উত্তর প্রদেসকী মীয়াম অমসুং লৈবাক অসিগী মীয়ামদা, ঐনা চিংলেম্লবা এক্সপ্রেস অসিগীদমক য়াইফ পাউজেল পীজরি।

ঐনা লোয়ননা হায়মিন্নসি-

ভারত মাতা কী জয়!

ভারত মাতা কী জয়!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

বন্দে মাতরম!

অদোম থাগৎচরি!

দিসক্লেমর: মসি প্রধান মন্ত্রীগী ৱারোলগী চাউরাকপা হন্দোকপনি। অশেংবা ৱারোল হিন্দীদা ফোঙদোকখি।

***