খুরুমজরি!

হিন্দুস্তান তাইমস সম্মিত্ত ভারত অমসুং মপান লৈবাকশিংগী শক্নাইরবা মীওই কয়া শরুক য়ারে। থৌরম শীল্লিবশিং অমসুং মখোয়গী ৱাখল্লোন ফোঙদোকখিবা মরুপশিং ঐনা থাগৎপা ফোঙদোকচরি। সোভনা জিনা ৱাফম অনি ফোঙদোকখিবা অদু ঐ খঙলে। অহানবদা, মহাক্না হায়খি মদুদি হৌখিবা সম্মিত্ত মোদী জি লাকপদা, মহাক্না ৱাফম অসি ফোঙদোকখি। মেদিয়া হাওসশিংনা করি তৌগনি হায়বা তাক্নবা লৈবাক অসিদা কনাগুম্বা অমতগী থৌনা লৈতে। অদুবু ঐনা হায়খি, অমসুং সোভনা জি অমসুং মহাক্কী কাংবুনা য়াম্না থৱায় য়াওনা মসি থবক ওইনা পাংথোকপদা ঐ অপেনবা ফাওই। ঐ একজিবিসন য়েংলুরে, মসি য়েংনবা ঐনা লৈবাক অসিগী মীয়ামদা হায়জরি। মতম চুপ্পা নিংশিংদুনা লৈহৌনবা ম ওংদা ফোতোগ্রাফরশিংনা থৌদোক অসি নমখিবনি। অনিসুবদা মহাক্না হায়খি মদুদি হিন্দুস্তান তাইমসনা মখা তানা লৈবাক্কী থবক তৌগনি, মতৌ অসিগুম্না মখা তানা থবক তৌবদা ঐনা তৌবীমল খঙবা উৎচরি।

মরুপশিং,

চহি অসিগী মীফম অসিগী থিমদি- ‘হয়েংগীদমক অওনবা পুরকপা’ হায়বনি। চহি ১০১ গী পুৱারি লৈরিবা হিন্দুস্তান পাউ-চে মহাত্মা গান্ধীজি, মদন মোহন মালবিয়া জি, ঘনশ্যাম দাস বিরলা জি অমসুং অতোপ্পা মশিং থিঙমদ্রবা শক্নাইরবা মীওই কয়াগী থৌজাল ফংখি হায়না ঐনা থাজৈ, হয়েংগীদমক অওনবা পুরক্নবা ৱারি শানবা মতমদা, ভারত্ত অহোংবা পুরকপা অসি ওইথোকপশিং খক্তগী থবক খক নত্তে, মসি অহোংবা পুন্সি, ৱাখল্লোন হোংবা অমসুং মাইকৈ হোংবগী অশেংবা মতম অমনি হায়বা লৈবাক অসিনা থাজৈ।

মরুপশিং,

ঙসি অসিসু ঐখোয়গী সংবিধান শেম্বদা লুচিংখিবা দোক্তর বাবা সাহেব অম্বেদকার জিগী মহাপরিনির্ভন নুমিৎনি। ভারতমচা খুদিংমক্কী মহুৎশীন্দুনা ঐনা মহাক্কী মফমদা ইকায়খুম্নবা উৎচরি।

মরুপশিং,

ঙসি, ঐখোয় ২১ শুবা চহিচাগী চহি ২৫ হৌখ্রবগী মতম অমদা লৈরি। হৌখিবা চহি ২৫ দা, মালেমগী অৱাবশিং অমসুং নুংঙাইবশিং উখ্রে। ঐখোয়না শেন-থুমগী অৱাবশিং, মালেমগী লাইচৎশিং, তেক্নোলোজিগী খুদোংচাদবশিং, তোখায় তারবা মালেম অমা উখ্রে অমসুং ঐখোয়না লালশিং উরে। অসিগুম্বা ফিবমশিং অসিনা মওং অমদা নত্ত্রগা মওং অমদা মালেম অসিনা খুদোংচাদবা মায়োক্নরি। ঙসিদি মালেম অসি তম্বা ঙমদবা ফিবমশিংনা পীক থল্লে। তম্বা ঙমদবা ফিবমশিংনা পীক থল্লবা যুগ অসিদা, ঐখোয় ভারত তোঙানবা কাংলুপ অমদা উরে, ভারত থাজবনা পীক থল্লে। মালেমদা ফিবম শোকচিল্লকপগী ৱারি শানবা মতমদা, ভারতনা চাউখৎপগী ৱারি ইরি। মালেমদা থাজবা মাঙবগী অৱাবা অমা লৈবা মতমদা, ভারতনা থাজবগী য়ুম্বী অমা ওইরক্লি। মালেম্না মচেৎ-মকাইগী মাইকৈদা চঙশিল্লকপা মতমদা, ভারতনা থোঙ শাবা লৈবাক অমা ওইরক্লি।

মরুপশিং,

নুমিৎ খরগী মমাঙদা, ক্বাতর ২ গী ভারতকী জি.দি.পিগী মশিং লাকখ্রে। চাদা ৮ গী গ্রোথ রেত অসিনা ঐখোয়গী চাউখৎপগী অনৌবা খোঙজেল অমা মমি তারে।

মরুপশিং,

মশিং মশিং খক নত্তে, মসি মপাঙ্গল কনবা মেক্রো-ইকোনোমিক অমগী ইঙ্গিৎনি। মসি মালেমগী শেন্মিৎলোন্দা ভারতনা চাউখৎপগী দ্রাইভর ওইরকপগী পাউজেল অমনি। মালেমগী গ্রোথ চাদা ৩ রোম ওইবা মতমদা হায়রিবা মশিংশিং অসিনা ঐখোয়গী ওইরি। জি-৭ ইকোনোমিশিং চাংচত্ত চাদা ১.৫ গী চাংদা চাউখৎলি। হায়রিবা ফিবমশিং অসিদা, ভারতনা য়াম্না চাউখৎপা অমসুং পোৎ-চৈগী মমল হন্থবগী নমুনা অমা ওইরে। ইকোনোমিষ্টশিং, মরুওইনা ঐখোয়গী লৈবাক্ত, পোৎ-চৈগী মমল হেনগৎলকপগী নুঙনাংবা মতম অমা লৈখি। ঙসিদি, হায়রিবা মীওইশিং অদুনা মমল হন্থরকপগী মতাংদা ৱারি শানরে।

মরুপশিং,

ভারতকী মাইপাকপশিং অসি ইচম চম্বা নত্তে। মসি মশিং খক্তগী ৱাফম অমা নত্তে; মসি হৌখিবা চহি ১০ দা ভারতনা পুরকখিবা অচৌবা অহোংবা অমনি। মসিগী অচৌবা অহোংবা অসি অৱাবা মায়োক্নবা ঙম্বনি, মসিগী অহোংবা অসিদা খুদোংচাদবশিং কোকহনবা ঙম্বগী পাঙ্গলনি, মসিগী অহোংবা অসিনা চিংনবগী লৈচিলশিং লৌথোক্লে অমসুং অনিংবশিং হেনগৎহল্লে অমসুং মসিনা মরম ওইদুনা, ঙসিগী ভারত মশামক অওনবা পুরক্লে অমসুং তুংগীসু অওনবা পুরক্লে।

মরুপশিং,

ঙসি, ঐখোয়না হয়েংগীদমক অওনবা পুরক্নবা খন্নবা মতমদা, হৌজিক পাংথোক্লিবা থবক, ঙসি পাংথোক্লিবা থবক্ত অকনবা য়ুম্ফম ওইদুনা অওনবা পুরক্নবা থাজবা পুরকপনি হায়বা ঐখোয় খঙগদবনি। ঙসিগী অওনবশিং অমসুং ঙসিগী থবকিসিংনা ঐখোয়গী হয়েংগী অওনবগী লম্বী শেম্লি। ঐখোয়না থবক তৌরিবা ৱাখল্লোন অমগী খুদম অমা অদোমদা পীগনি।

মরুপশিং,

মতম শাংনা ভারতকী খুদোংচাবা কয়া শীজিন্নদনা লৈরকপা অদু অদোমসু খঙলমগনি। শীজিন্নদনা লৈরিবা খুদোংচাবশিংদা অহেনবা খুদোংচাবশিং পীবা মতমদা, মসিনা অপনবা অমতা লৈতনা মপুংফাবা থৌনাগা লোয়ননা লৈবাক অসিগী চাউখৎপদা শরুক য়াবা মতমদা, লৈবাক অসি শোইদনা অওনবা পুরক্কনি। ঐখোয়গী নোংপোক ভারত, ঐখোয়গী অৱাং-নোংপোক, ঐখোয়গী খুঙ্গংশিং, ঐখোয়গী তয়র-২ অমসুং তয়ার-৩ সহরশিং, ঐখোয়গী নুপীশিংগী থৌনা, ভরতকী নহারোলশিংগী শক্তি, ভারতকী সমুদ্রগী শক্তি, ব্লু ইকোনোমি, ভারতকী স্পেস সেক্তরগী মরমদা খল্লু, হৌখিবা চহিশিংদা খুদোংচাবশিং মপুংফানা শীজিন্নখিদে। মসিগী শীজিন্নদনা লৈরিবা খুদোংচাবশিং লৌনবা পান্দমগা লোয়ননা ঙসি ভারত মাঙলোমদা চঙশিল্লি। ঙসি, মমাঙদা অমুক্ত ওইখিদ্রিবা মওংদা নোংপোক ভারত্ত অনৌবা ইনফ্রাষ্ট্রকচর, লম্বী-থোঙ অমসুং উদ্যোগ শেমগৎনবা শেন থাদরে। ঙসি ঐখোয়গী খুঙ্গংশিং, ঐখোয়গী অপীকপা সহরশিংদা অনৌবা খুদোংচাবশিং ফংহল্লে। ঐখোয়গী অপীকপা সহরশিং ষ্টার্দঅপশিং অমসুং  এম.এস.এম.ইশিংগী অনৌবা মফমশিং ওইরক্লে। ঐখোয়গী খুঙ্গংশিংগী লৌমীশিং এফ.পি.ওশিং শেম্লি অমসুং কৈথেলগা হকথেংননা শম্নরে অমসুং এফ.পি.ও খরদি মালেমগী কৈথেল ফাওবা য়ৌরে।

মরুপশিং,

ঙসি ভারতকী নুপীশিংগী থৌনানা অঙকপা কয়া পাংথোক্লে। ঙসি ঐখোয়গী ইচানুপীশিং হিরম খুদিংমক্ত মাঙজিল থারে। মসিগী অওনবা অসি নুপীশিংদা থৌনা পীবা খক্তদা নত্তে; মসিগী অওনবা অসি খুন্নাইগী ৱাখল্লোন অমসুং তৌবা ঙম্বশিং অনিমক্তনি।

মরুপশিং,

অনৌবা খুদোংচাবশিং লাকপা মতমদা, খুরৌ থাংবশিং লৌথোকপা মতমদা, অতিয়াদা পাইনবা অনৌবা মশাশিংসু ফন্দোরকখি। ভারতকী স্পেস সেক্তর অসি মসিগী খুদম অমনি। মমাঙদা স্পেস সেক্তর সরকারগী মখাদা লৈখি। অদুবু ঐখোয়না স্পেস সেক্তর অওনবা পুরক্লে, মসিদা লনাই কাংবু শরুক য়াহল্লে অমসুং ঙসিদি লৈবাক অসিনা মসিগী ফল উবা ফংলে। নুমিৎ ১০-১১ গী মমাঙদা, ঐনা হায়দ্রবাদতা স্কাইরুতকী ইনফিনিতি কেম্পস শঙ্গাখ্রে। স্কাইরুত ভারতকী লনাই স্পেস কম্পেনি অমনি। কম্পেনি অসি থা অমদা রোক্কেত অমা শানবা থবক তৌরি। কম্পেনি অসিনা বিক্রম-১ পাইবা য়ানা থৌরাং তৌদুনা থম্লে। সরকারনা মখোয়দা মফম পীরে অমসুং ভারতকী নহারোলশিংনা মসিদা মখোয়গী তুংলমচৎ শেমগৎলে অমসুং মসিনি অশেংবা অওনবা হায়বদু।

মরুপশিং,

ভারতকী অতোপ্পা অহোংবা অমা মফম অসিদা খন্নবা য়াম্না মরুওই হায়না ঐনা খল্লি। ভারত্ত অওনবশিং পুরকপদা লৈবাক অসিগী মায়োক্ত লৈবনি হায়বা মতম অমা লৈরমখি। মসিনা তাক্লিবদি অচৌবা ৱারেপশিং রাজনিতিগী খুদোংচানবা নত্ত্রগা খুদোংচাদবা খর কোক্নবা লৌখি হায়বনি। অদুবু ঙসিদি, চপ চাবা পান্দমশিংগা লোয়ননা, লৈবাক্কী পান্দমশিং ৱাখলদা থমদুনা অওনবশিং পুরক্লে। লৈবাক অসিদা হিরম খুদিংমক্ত হেন্না ফগৎলকপা অদোম উরে, ঐখোয়গী খোঙথাং অসি লেপ্তনা থাংলি, ঐখোয়গী মাইকৈ হোংদে অমসুং ঐখোয়গী পান্দমদি লৈবাক্কী থবক্না হান্না পাংথোকপা অসিনি। চহি ২০২৫ চুপ্পা অসি অসিগুম্বা অওনবশিংগী চহি অমনি। খ্বাইদগী চাউবা অওনবদি জি.এস.তিগী অওনবনি। হায়রিবা অওনবশিং অসিগী কান্নবা লৈবাক শীনবা থুংনা উরে। চহি অসিদা, দাইরেক্ত তেক্স লৌবদা অচৌবা অওনবা অমা পুরক্লে। লুপা লাখ ১২ ফাওবগী ইনকমদা তেক্স লৌদবা অসি চহি ১০ গী মমাঙদা পাংথোকপা ঙমখিদবা থবক অমনি।

মরুপশিং,

নুমিৎ হুমনিগী মমাংদা, অপীকপা কম্পেনিগী ৱাহন্থোক হোঙদোক্লে। মসিগা লোয়ননা, কম্পেনি লিশিং কয়া হৌজিক অরাইবা নিয়মশিংনা কোনশিল্লে, য়াংনা থবক তৌরে অমসুং খুদোংচাবশিং হেন্না পীরে। পোৎথোক ২০০ রোম তঙাইফদবা ক্বালিতি কন্ত্রোল ওর্দরশিংদগী ঐখোয়না লৌথোক্লে।

মরুপশিং,

ঙসিগী ভারতকী খোঙচৎ অসি চাউখৎপা খক্তগী নত্তে। মসি ৱাখল খনবদা অহোংবা পুরকপগী খোঙচৎ অমসুনি, মসি নৌনা মিকপ থোকপগী খোঙচৎ অমসুনি। মশানা মশাবু থাজবা লৈতনা লৈবাক অমতা চাউখৎপা ঙম্লোই হায়বা অদোমসু খঙলে। লাইবক থিবদি, ভারতনা মতম শাংনা মীনাই ওইদুনা লাকপদগী মশানা মশাবু থাজবা অসি মাঙহল্লে। মসিগী মরমদি মীনাইগী ওইবগী ৱাখল্লোন চেনবদগীনি। মসিগী মীনাই ওইবগী ৱাখল্লোন চেনবা অসি বিকসিত ভারত অমগী পান্দম ফংনবা হোৎনবদা অচৌবা খুরৌ থাংবা অমনি। মরম অদুনা, ঙসি ভারতনা মীনাই ওইবগী ৱাখল্লোন চেনবদগী মনিংতম্নবা থবক পায়খৎলি।

মরুপশিং,

করিগুম্বা মখোয়না মতম শাংনা ভারত্ত পানবা পাম্লবদি, মখোয়না ভারতমচাশিংদগী মশানা মশাবু থাজবা লৌথোক্কদবনি অমসুং মখোয়দা তোন্থনা হিংবগী ৱাখল্লোন অমা ফাওহনগদবনি হায়বা বৃতিসশিংনা নিংথিনা খঙখি। মসিনা মতম অদুদা বৃতিসনা পাংথোকখিবা। মরম অদুনা, ভারতকী ইমুং-মনুংগী ফিবম অসি মতমগা চুনদ্রে হায়খি, ভারতকী ফিরোলশিং শীনফমগা চুনদে হায়না লাউথোকখি, ভারতকী কুহ্মৈশিং অমসুং নাৎ মরম চাদে হায়খি, য়োগ অমসুং অয়ুর্বেদা সাইন্তিফিক ওইদে হায়খি, ভারতনা পুথোকপা পোৎলমশিং নোক্নখি অমসুং হায়রিবা থবকশিং অসি মখা তানা চহি কয়া চৎথখি, মসি মীরোল অমদগী মীরোল কয়া ফাওবা মখা তানা লৈখি, চপ মান্নবা পোৎশিং পাখি, চপ মান্নবা পোৎশিং তমখি। মতৌ অসুম্না ভারতমচাশিংগী মশানা মশাবু থাজবা মাঙহনখি।

মরুপশিং,

মীনাইগী ওইবগী ৱাখল্লোন চেনবা অসিনা কমদৌনা পাক-শন্না চৈথেং পীবগে হায়বগী খুদম খর ঐনা অদোমদা পীগনি। ঙসি, ভারত মালেমদা খ্বাইদগী য়াংনা চাউখৎপা অচৌবা ইকোনোমি ওইরে। খরনা ভারত মালেমগী চাউখৎপগী ইঞ্জিন অমনি হায়রি, খরনা মালেমগী পৱারহাওস অমনি হায়রি। ঙসি শিংথানিঙাই ওইরবা থবক কয়া পাংথোক্লে।

মরুপশিং,

ঙসি ভারতনা য়াংনা চাউখৎলক্লিবা অসিগী মতাংদা অদোম পাখ্রবরা? মসিগী মতাংদা অদোম তারবরা? কনাগুম্বনা মসি হিন্দু রেত ওফ গ্রোথ হায়না কৌবরা? মালেমদা খ্বাইদগী য়াংবা ইকোনোমি, খ্বাইদগী য়াংনা চাউখৎপা, অমা হেক্ত হায়বা য়াই? করম্বা মতমদা মসি হিন্দু রেত ওফ গ্রোথ হায়না খঙনবগে? ভারতনা গ্রোথ রেত চাদা ২ দগী ৩ ফাওবা লৈবা মতমদা। অদোম করি খনবগে, লৈবাক অমগী শেন-থুমগী ফিবম ফগৎলকপা লৈবাক অদুদা লৈরিবা মীওইশিংগী লাইনিং, শক্তমগা শম্নহনবা, মসি শোইবদগী থোকপরা? নত্তে, মসি মীনাইগী ওইবগী ৱাখল্লোন চেনবগী মমি অমনি। অপুনবা খুন্নাই, অপুনবা চৎনবী, কান্নদবা অমসুং লায়রবগা মান্ননা লৌখি। ভারতকী চাউখৎপগী রেত তপ্পা অসি ঐখোয়গী হিন্দু সভেত্য অমসুং হিন্দু কলচরনা ওইহনবনি হায়না খুদম পীনবা হোৎনবা অমনি। থবক খুদিংমক্ত কাংলুপকী মীৎয়েংদা য়েংবা মশানা মশাবু অখঙ-হৈশিংনা হায়জবশিং, হিন্দু গ্রোথ রেত্ত কাংলুপ নাইনবা উদে। মসিগী তার্ম অসি মখোয়গী মতমগী লাইরিকশিং অমসুং রিছার্স পেপরশিংদা য়াওখি।

মরুপশিং,

মীনাইগী ওইবগী ৱাখল্লোন চেনবা অসিনা কমদৌনা ভারত্ত মেনুফেকচরিংগী থবকশিং মাঙহনবগে অমসুং কমদৌনা ঐখোয়না মসি অমুক হিঙ্গৎহনবগে হায়বগী মতাংদা ঐনা খুদম খর পীগনি। মীনাই ওইরিঙৈ মনুংদা ফাওবা ভারত খুৎলায়শিং শাবা লৈবাক অমা ওইরমখি। ভারত্তগী খুৎলায়শিং মপান্দা থাদোকখি। মালেমগী অনিশুবা লাঞ্জাউ মনুংদা ফাওবা, ভারত্ত শাবা খুৎলায়শিং মমিং চৎখি। অদুবু নিংতম্বা ফংলবা মতুংদা, ঐখোয়গী ঙাক-শেনগী খুৎলায়শিং শাবগী থবক মাঙহনখি। মীনাইগী ওইবগী ৱাখল্লোন অসি অসুক্কী মতিক কনখি হায়বদি সরকারগী মীওইশিং ফাওবনা ভারতনা শাবা খুৎলায়শিং হন্থনা লৌখি অমসুং মসিগী ৱাখল্লোন অসিনা মালেমদা ভারত মপান লৈবাকশিংদগী খুৎলায়শিং খ্বাইদগী য়াম্না লৈবা লৈবাক ওইহনখি।

মরুপশিং,

মসিগী মীনাইগী ওইবগী ৱাখল্লোন চেনবা অসি জহাজ শাবগী উদ্যোগতা চপ মান্ননা থোকখি। চহি চা কয়া ভারত অচৌবা জহাজ শাবগী অচৌবা মফম অমা ওইরমখি। চহি ৫০-৬০ গী মমাংদা, ভারতকী ললোন-ইতিক্কী চাদা ৪০ ভারতকী জহাজশিংদা পাংথোকখি। অদুবু মীনাইগী ওইবগী ৱাখল্লোন চেনবদগী মপান লৈবাক্কী জহাজশিং মরুওইনা লৌবা হৌরকখি। মসিগী ফল মীওই খুদিংমক্না উরে, মতম অমদা সমুদ্রগী শক্তি অমা ওইরম্বা লৈবাক অমনা মসিগী ললোন-ইতিক্কী চাদা ৯৫ মপান লৈবাকশিংগী জহাজশিংগী মখা পোল্লে। মসিনা মরম ওইদুনা, ঙসি ভারতনা চহি অমদা মপান লৈবাক্কী সিপ্পিং কম্পেনিশিংদা লুপা করোর লাখ ৬ রোম পীরি।  

মরুপশিং,

মসি জহাজ শাবা নত্ত্রগা দিফেন্স মেনুফেকচরিং ওইবা য়াই, ঙসিদি হিরম খুদিংমক্ত, মীনাইগী ওইবগী ৱাখল্লোন থাদোক্নবা অমসুং অনৌবা মাইপাকপা পুরক্নবা থবকশিং পায়খৎলে।

মরুপশিং,

মীনাইগী ওইবগী ৱাখল্লোন চেনবা অসিসু ভারতকী লৈবাক ঙাকপগী থবকশিংদা চাউনা অকায়বা পীখি। মতম শাংনা সরকারগী থবকশিংদা লৈবাক অসিগী মীয়াম্না থাজবা ঙমখিদে। মমাংঙৈদা কনাগুম্বা অমগী মশাগী চে-চাংশিং সরকারগী ওফিসিএল অমনা এতেষ্ট তৌবা অদু অদোম নিংশিংলমগনি। করিগুম্বা মখোয়না স্তাম্প নমদ্রবদি, খুদিংমক নমথাক্নি হায়না খন্নরমখি। অদোম থবক শুবা নোম্বা কনবগী শক্তাকচে অমনি। মসিগী থাজনদবা অসি ঐখোয়না কোকহল্লে অমসুং মশানা মশাগী এতেষ্ট তৌবা অসি মতিক চারে হায়না খন্নরে। ঐগী লৈবাক্কী মীয়াম্না হায়খি, মসিনি ঐনা হায়রিবা, ঐনা মহাক থাজবা থম্লে।

মরুপশিং,

খজিক্তিং শোইবদা অচৌবা ক্রাইমশিংগুম্না লৌবা প্রোবিজন কয়া ঐখোয়গী লৈবাক্ত লৈরি। ঐখোয়না জন বিশ্বাস এক পুথোক্লে অমসুং অসিগুম্বা প্রোবিজন চা কয়া লৌথোক্লে।

মরুপশিং,

মমাংদা, বেঙ্ক অমদগী লুপা লিশিং অমগী লোন লৌবা দরকার ওইরকপদা, বেঙ্কনা গরেন্তি অমা পীনবা হায়রক্কনি, মসি থাজনদবগী চাং য়াম্না ৱাংবদগীনি। মুদ্র য়োজননা মসিগী থাজবা লৈনদবগী থবক অসি ঐখোয়না লৌথোক্লে। স্কিম অসিগী মখাদা, ঐখোয়না ঐখোয়গী মীয়ামদা লুপা করোর লাখ ৩৭ গী গেরেন্তি য়াওদবা লোনশিং ফংহনখ্রে। শেনফম অসিনা হায়রিবা ইমুংশিংগী নহারোলশিংদা ওন্ত্রেপ্রেন্যুরয়র অমা ওইরক্নবা থাজবা পীরে। ঙসি, লম্বী মতাইদা পোৎ-চৈ য়োল্লিবশিং অমসুং থেলা গারি চিংবা মীওইশিং ফাওবা গরেন্তি য়াওদনা বেঙ্কশিংনা লোনশিং পীরে।

মরুপশিং,

করিগুম্বা খর সরকারদা পীরুরবদি, মদু কৈদৌঙৈদা অমুক হল্লক্তে হায়বগী থাজবা অমা মতম পুম্নমক্ত ঐখোয়গী লৈবাক্ত লৈরি। অদুবু সরকার অমসুং মীয়ামগী মরক্ত অকনবা থাজনবা অমা লৈরকপা মতমদা, কমদৌনা থবক পাংথোকপগে? করিগুম্বা অদোম্না হয়েং অফবা থবক খর পাংথোকপা পাম্লবদি, ঙসি অফবা খর পাংথোক্নবা অদোমগী ৱাখল শেম শাগদবনি। করিগুম্বা ৱাখল অদু ফরবদি, হয়েংশু অফবা ওইগনি। মরম অদুনা ঐখোয়না অতোপ্পা কেম্পেন অমা হৌদোক্লিবনি, মসিগী মরমদা তাবদা অদোম অঙকপা পোক্কনি অমসুং হৌজিক ফাওবা পাউ-চেশিং অমসুং পাউমীশিংনা মসি খঙদ্রি, মখোয় খঙলবরা নত্ত্রগা খঙদ্রিবরা হায়বা ঐ খঙদে, মসি মতম খরগী মতুংদা পাংথোক্লগনি। লৈবাক অসিগী বেঙ্কশিংদা ঐখোয়গী মীয়ামগী লুপা করোর লিশিং ৭৬ লৌথোক্তনা লৈরিবা অসি খঙবদা অদোম অঙকপা পোক্কনি। মসি কনাগীনো হায়বা কনাগুম্বা অমতনা খঙদে। কনাগুম্বা অমতনা শেনফম অদুগী মরমদা হংলদে। ইন্সুরেন্স কম্পেনিশিংদা লুপা করোর লিশিং ১৪ তাদুনা লৈরি। ম্যুচুয়েল ফন্দ কম্পেনিশিংদা লুপা করোর লিশিং ৩ রোম তাদুনা লৈরি। মখোয়দা লুপা করোর লিশিং ৯ গী দিবিদেন্দ তাদুনা লৈরি। পুম্নমক অসি মপুনা লৌদনা তাদুনা লৈরি। শেনফম অসি লায়রবা অমসুং মিদল ক্লাস ইমুংশিংগীনি অমসুং মরম অদুনা, শেন মপুশিংনা কাউথোকখিবনি। ঐখোয়গী সরকারনা শেনফমশিং অদু লৈবাক শীনবা থুংনা থিগৎলে, ইনাও, ঐঙোন্দা হায়য়ু, শেনফম অদু অদোমগী নত্তে, মসি অদোমগী ইমা-ইপাশিংগী নত্তে, মসি কনাগুম্বা অমনা কাউরম্বা নত্তে। শেনফমশিং অসিগী অশেংবা মপুশিং ফংনবা ঐখোয়গী সরকার থবক চিল্লি। মসিগীদমক সরকারনা অখন্নবা কেম্পেনশিং পাংথোক্লি। হৌজিক ফাওবদা, জিলা ৫০০ রোমদা অসিগুম্বা কেম্পশিং পাংথোকখ্রে, অশেংবা মপুশিংদা ঐখোয়না লুপা করোর লিশিং কয়া ফংহনখ্রে। শেনফম অদু তাদুনা লৈখি, কনা অমতনা হংখিদে, অদুবু মোদী লৈরি, মহাক্না থিরি, মরুপশিং, মসি অদোমগীনি, মসি লৌশিনবীয়ু।

মরুপশিং,

মসি শেন-থুমশিং অমুক ফংহনবগী ৱাফম অমা নত্তে, মসি থাজবগী মচাক অমনি। মসি মীয়ামগী থাজবা মখা তানা হেনগৎলকপগী থবক অমনি অমসুং মীয়ামগী থাজবা লৈবা হায়বসি ঐখোয়গী অচৌবা লন্নি। মতম অদুদা করিগুম্বা মীনাইগী ওইবগী ৱাখল্লোন চেল্লম্লবদি সরকারনা মান্সি সাহেবী উবা ফংগনি অমসুং অসিগুম্বা কেম্পেনশিং পাংথোক্লোই।

মরুপশিং,

ঐখোয়না হিরম খুদিংমক্ত ঐখোয়গী লৈবাক মীনাইগী ওইবগী ৱাখল্লোন চেনবদগী মপুংফানা মনিংতমহল্লে। নুমিৎ খরগী মমাংদা, ঐনা মীয়ামদা অপীল অমা তৌখ্রে। মথং চহি ১০ দা, করিগুম্বা খর পাংথোক্নবা, ঐগী ৱাহৈশিং তানবা খুৎ লোন্নদুনা ঐনা ঐগী মীয়ামদা হায়জখ্রে। লৈবাক অসিগী মীওই করোর ১৪০ য়াওদনা ঐনা মসি পাংথোকপা ঙম্লোই অমসুং মরম অসিনা ঐনা খুৎ লোন্নদুনা লৈবাক মীয়ামদা হঞ্জিন হঞ্জিন হায়জরিবনি অমসুং করিগীদমক ঐনা মসি চহি ১০ গী মতম অমা থারিবনো? মেকাউলিগী থৌশিলনা, ভারত্ত মীনাইগী ওইবগী ৱাখল্লোন চেনবগী মরু হুনখিবা ২০৩৫ দা চহি ১০০ মপুংফারগনি। মসিনা তাক্লিবদি চহি ১০ লৈরি হায়বনি। মরম অদুনা, চহি ১০ অসিদা, ঐখোয়গী লৈবাক অসি মীনাইগী ওইবগী ৱাখল্লোন চেনবদগী কোক্নবা ঐখোয় পুন্না থবক তৌমিন্নগদবনি।

মরুপশিং,

ঐনা তোইনা হায়খি, ঐখোয় অচিকপা লম্বী মতুংইনবা মীওই নত্তে। অফবা হয়েং অমগীদমক, ঐখোয়না ঐখোয়গী পান্দমশিং পাকথোকহনগদবনি। লৈবাক্কী তুংগী দরকার ওইবশিং ঐখোয় খঙগদবনি অমসুং হৌজিক পাম্বৈশিং ফংগদবনি। ঐনা লেপ্তনা মেদ ইন ইন্দিয়া অমসুং অত্মনির্ভর ভারত অভিয়ানগী মরমদা খন্নবা অদোম উরমগনি। সোভানা জিনা মসি মহাক্কী ৱারোলদা পনখ্রে। করিগুম্বা অসিগুম্বা কেম্পেনশিং চহি ৪০-৫০ গী মমাঙদা হৌদোক্লম্লবদি, ঙসি ওইরিবা ভারতকী ফিবম তোঙাল্লমগনি। অদুবু মতম অদুদা পানখিবা সরকারশিংনা অতোপ্পা থবকশিংদা মরুওইনা লৌখি। অদোম সেমিকন্দক্তরগী ৱারি তারে। চহি ৫০-৬০ গী মমাংদা, ভারত্ত সেমিকন্দক্তর প্লান্ত অমা লিংখৎনবা কম্পেনি অমা লাকখি, অদুবু মদু মীরাইখি অমসুং সেমিকন্দক্তর শাবদা লৈবাক অসি মনিংদা লৈহৌরে।

মরুপশিং,

মসিগা মান্নবা থৌদোক ইনর্জি সেক্তরদা থোকখি। ঙসি ভারতনা চহি অমদা লুপা করোর লাখ ১২৫ রোমগী পেত্রোল, দিজল অমসুং গ্যাস মপান লৈবাকশিংদগী লৈরি। ঐখোয় লৈবাক নুমিৎ কৌবা ঈশ্বরগী থৌজাল ফংলে, অদুবু ২০১৪ ফাওবদা লৈবাক অসিগী সোলার ইনর্জি পুথোকপা ঙম্বা শুপ্নগী গিগাৱাত ৩ খক ওইখি। অদুবু হৌখিবা চহি ১০ দা, মসি গিগাৱাত ১৩০ দা হেনগৎলে। রুপতোপ সোলার খক্তদগী ভারতনা গিগৱাত ২২ হাপচিল্লে।

মরুপশিং,

ইনর্জি সেকুরিতিগী কেম্পেন অসিদা লৈবাক অসিগী মীয়াম হকথেংননা শরুক য়ানবগী খুদোংচাবা পি.এম সুর্য়া ঘর মুফ বিজলি য়োজননা পীরে। ঐ কাসিগী এম.পিনি। ঐ প্রধান মন্ত্রী ওইবগী থবক লৈরি, অদুবু ঐনা এম.পি অমা ওইবগী থবকশু পাংথোক্লি। কাসিগী এম.পি অমা ওইনা অদোমগী মফমদা ঐনা করিগুম্বা খর হায়নিংই। অদোমগী হিন্দী পাউচে অসি অঙকপনি, মসি য়াম্না কান্নগনি। কাসিদা য়ুম লিশিং ২৬ হেন্না পি.এম সুর্য়া ঘর মুফ বিজলি য়োজনাগী মখাদা সোলার প্লান্তশিং থম্লে। মসিনা মরম ওইদুনা, নুমিৎ খুদিংগী ইলেক্ত্রিসিতি য়ুনিত লাখ ৩ হেন্না পুথোক্লি অমসুং মীয়াম থা অমদা লুপা করোর ৫ কনবা ঙম্লে। মসিনা তাক্লিবদি চহি অমদা লুপা করোর ৬০ হায়বনি।

মরুপশিং,

য়াম্লবা সোলার পৱার পুথোকপদগী, চহি খুদিংগী মেত্রিক তন লিশিং ৯০ গী কার্বোন থাদোকপা হন্থরে। অসুক য়াম্বা কার্বোন অসি চুপশিন্নবা ঐখোয়না উ পাম্বী লাখ ৪০ হেন্না থাবা দরকার ওইগনি। মসিগী মশিং অসি কাসি, বারানাস খক্তগীনি। ঐনা হায়রিবা অসি লৈবাক শীনবা থুংবগী নত্তে। পি.এম সুর্য়া ঘর মুফ বিজলি য়োজননা লৈবাক অসিদা পীরিবা য়াম্লবা কান্নবা অদোম খন্দুনা য়েংউ। ঙসিগী স্কিম অমনা তুংগী অওনবা পুরক্নবা শক্তি কয়া য়াম্না লৈবগে হায়বা মসি খুদম অমনি।

মরুপশিং,

মোবাইল শাবগী মশিংশিং অদোম খঙলমগনি। ২০১৪ গী মমাংদা, ঐখোয়গী মোবাইল ফোনশিংগী চাদা ৭৫ মপান লৈবাকশিংদগী পুশিল্লকখি। হৌজিক ভারতনা মপান লৈবাকশিংদগী মোবাইল ফোনশিং পুশিল্লক্ত্রে। হৌজিক ঐখোয় মপান লৈবাকশিংদা মোবাইল ফোন থাদোকপা অচৌবা লৈবাক অমা ওইরে। ২০১৪ গী মতুংদা, ঐখোয়না অওনবা অমা পুরক্লে, লৈবাক অসিনা থবক ওইনা পাংথোক্লে অমসুং মসিগী অওনবশিংগী ফলশিং ঙসি মালেম্না উরি।

মরুপশিং,

হয়েংগী অওনবা পুরক্নবা খোঙচৎ অসি স্কিমশিং, থৌশিলশিং, ৱারেপ কয়া, মীয়ামগী অনিংবশিং অমসুং মীয়াম শরুক য়াবগী খোঙচৎ অমনি। মসি মখা তানা চৎপগী খোঙচৎ অমনি। মসি মীফম অমা খক্তদা খন্নবা নত্তে; ভারতকী ওইনা, মসি লৈবাক্কী ৱারেপ অমনি। মসিগী ৱারেপ অসিদা মীওই খুদিংমক শৌগৎপা দরকার ওই, মীওই খুদিংমক্কী থবক দরকার ওই। অপুনবা থবকশিংনা অহোংবা পুরক্নবা থাক অসি য়ৌনবা ঐখোয়দা খুদোংচাবা পীগনি।

মরুপশিং,

অদোমগা লোয়ননা থৌরম শরুক য়ানবা অমসুং অদোম্না পাউতাক পীখিবা থবকশিং পাংথোক্নবগীদমক ঐঙোন্দা খুদোংচাবা পীবগীদমক ঐনা সোভানা জি অমসুং হিন্দুস্তান তাইমস অমুক হন্না থাগৎপা ফোঙদোকচরি। মসি লৈবাক অসিগী ফোতোগ্রাফরশিংগী অনৌবা শাফু অমা ওইরকপা য়াই হায়না ঐনা থাজৈ। করিগুম্বা অদোম্না ঐগী মতেং দরকার ওইরবদি ঐঙোন্দা হায়বীরকউ, অনৌবা ৱাখল্লোন পীবগীদমক ঐনা শেনফম অমতা লৌজরোই। মসি শেন তিংদবা ললোন-ইতিক অমনি অমসুং মসি মরৱারি ইমুং অমনি, মরম অদুনা খুদোংচাবা অসি মাঙহল্লোইদবনি। ময়াম পুম্নমক থাগৎপা ফোঙদোকচরি। খুরুমজরি।

***