U Myntri Rangbahduh Narendra Modi u la thoh shithi sha ki nongshong shnong jong ka ri India ha ka sngi rakhe ïa ka Constitution Day, ka 26 tarik u Naiwieng, da kaba pynkynmaw ïa ka jingpdiang ïa ka Riti Synshar ha u snem 1949 bad ban jur ïa ka bynta ba neh jong ka ha kaba ïalam ïa ka jingkiew shaphrang jong ka ri. U la ong ba ha u snem 2015 ka Sorkar ka la pynbna ïa ka 26 tarik u Naiwieng kum ka Constitution Day ban pyndon burom ïa kane ka kot ba kyntang.

U Modi u la ban jur kumno ka Riti Synshar ka la pynkupbor ïa ki briew na ki longïing ki bym da bit da biang ban shakri ïa ka ri ha ki kyrdan kiba ha khlieh duh, da kaba ïasam ïa la ki jong ki jingshem jong ka jingburom ïa ka Parliament bad ïa ka Riti Synshar. U la pynkynmaw ia ka jingdem khrup ha ki mawkyndon jong ka Parliament ha u snem 2014 bad buh ia ka Riti Synshar ha ka shyllangmat jong u ha u snem 2019 kum ka dak jong ka jingburom. U la ban jur ba ka Riti Synshar ka la ai ha ki nongshong shnong ba bun ïa ka lad ban thrang bad ka bor ban pynurlong ïa kita ki jingangnud.

Haba ai burom ïa ki dkhot ka Constituent Assembly, u Myntri Rangbahduh u la kynmaw burom ïa u Dr. Rajendra Prasad, u Dr. Babasaheb Ambedkar, bad katto katne ngut ki longkmie ba pawkhmat kiba ka jingiohi jngai jong ki ka la pynriewspah shuh shuh ïa ka Riti Synshar. U la kren shaphang ki mawjam kum ka Samvidhan Gaurav Yatra ha Gujarat ha ka jingdap 60 snem jong ka Riti Synshar, bad ka dorbar ba kyrpang jong ka Parliament bad ki prokram ha ka ri baroh kawei ba la pynlong ban kynmaw burom ïa ka jingdap 75 snem jong ka, kaba la sakhi ïa ka jingïashim bynta paidbah kaba heh bha.

Da kaba ban jur ba ka Constitution Day mynta u snem ka long kaba kongsan bha namar ba ka ïahap bad ka lyngkhuh sngi kha ba 150 jong u Sardar Vallabhbhai Patel bad u Bhagwan Birsa Munda, ka jingdap 150 snem jong ka Vande Mataram, bad ka jingdap 350 snem jong ka jingïap jong u Shri Guru Tegh Bahadur Ji, u Modi u la ong ba kine ki riewkhraw bad ki mawjam ki pynkynmaw ia ngi ia ka jinglong ba kongsan jong ki kamram jong ngi, kumba la buh ha ka Article 51A jong ka Riti Synshar. U la pynkynmaw ia ka jingngeit jong u Mahatma Gandhi ba ki hok ki mih na ka jingpyndep ia ki kamram, da kaba ban jur ba ka jingpyndep ia ki kamram ka dei ka nongrim jong ka jingkiew ha ka imlang sahlang bad ka ioh ka kot.

Haba peit shakhmat, u Modi u la ïohi ba 25 snem ki la iaid naduh ba sdang kane ka spah snem, bad tang hadien palat arphew snem ka India kan sa dap 100 snem ka jinglaitluid na ka jingsynshar phareng. Ha u snem 2049, kan dap shispah snem naduh ba la pdiang ia ka Riti Synshar. U la ban jur ba ki polisi bad ki rai ba la shim mynta ka sngi kin saindur ia ka jingim jong ki pateng ban wan, bad kyntu ia ki nongshong shnong ban buh ia la ka kamram ha khmat eh ha ka jingmut jingpyrkhat jong ki katba ka India ka iaid sha ka jingthmu jong ka Viksit Bharat.

U Myntri Rangbahduh u la ban jur ïa ka jingkitkhlieh ban pynkhlain ïa ka synshar paidbah da kaba pyndonkam ïa ka hok thep vote, bad u la ai jingmut ba ki skul bad ki kolej kin rakhe ïa ka Constitution Day da kaba pyndon burom ïa ki nongthep vote ba nyngkong kiba dap 18 snem. U la pynpaw ka jingsngew skhem ba ka jingpynshlur ïa ki samla da ka jingkitkhlieh bad ka jingsngew sarong kan pynkhlain ïa ki jinglong jong ka synshar paidbah bad ïa ka lawei jong ka ri.

Haba pynkut ia ka shithi jong u, u Myntri Rangbahduh u la kyntu ia ki nongshong shnong ban pynskhem biang ia ka jingbam smai ban pyndep ia la ka jong ka kamram kum ki nongshong shnong jong kane ka ri kaba khraw, da kaba noh synniang kaba don jingmut ban tei ia ka ri India kaba la roi bad kaba la pynkupbor.

Ha ki post ba kyrpang ha ka X, u Modi u la ong:

 “Ha ka Constitution Day, la thoh ïa ka shithi sha ki para nongshong shnong jong nga ha kaba nga la pynpaw ia ka jingkhraw jong ka Riti Synshar jong ngi, ka jingdonkam jong ki Fundamental Duties ha ka jingim jong ngi, balei ngi dei ban rakhe ïa ka jinglong nongthep vote ba nyngkong eh bad kiwei kiwei... “

Ka Riti Synshar jong ka Ri India ka dei ka kot kaba kyntang kaba la bteng ban ïalam ïa ka jingkiew shaphrang jong ka ri da ka jingshai bad jingsngewskhem: PM @narendramodi”

“Dei ka bor jong ka Riti Synshar jong ngi kaba la iarap ïa u briew kum ma nga, uba wan na ka longïing kaba rit bad kaba duk ha ka liang ka ioh ka kot, ban shakri kum u Khlieh jong ka Sorkar khlem sangeh haduh palat 24 snem: PM @narendramodi”

“Katba ngi nang iaid shakhmat ban pynurlong ia ka jingangnud jong ka Viksit Bharat, ngi dei ban buh beit ia ki kamram na ka bynta ka ri jong ngi hakhmat eh ha ka jingmut jingpyrkhat jong ngi.”

“Ki polisi kiba ngi shna, ki rai kiba ngi shim mynta bad ki kam ba ngi leh lang kin pynwan dur ïa ka jingim jong ki pateng ban wan.”

“Kawei pa kawei ka sienjam jong ngi ka dei ban pynkhlain ia ka Riti Synshar bad ban pynkhlain shuh shuh ia ki thong bad ki jingmyntoi jong ka ri.”

"Ka dei ka jingkitkhlieh jong ngi ban pynurlong ïa ki jingangnud ba la thmu da ki nongthaw ïa ka Riti Synshar jong ngi. Haba ngi trei da kane ka jingsngew ia ka kamram, ka jingkiew shaphrang jong ka ri jong ngi ha ka imlang sahlang bad ka ioh ka kot kan nang kiew bun shah.”

“Ka Riti Synshar jong ngi ka la ai ha ngi ïa ka hok ban thep vote. Kum ki nongshong shnong, ka dei ka kamram jong ngi ban ym pynlehnohei satia ïa ka lad ban thep vote ha ki elekshon jong ka ri, ka Jylla bad ka thain ha kaba ngi la pynrung kyrteng.”

“Haba ngi ai mynsiem ia ki samla jong ngi da ka jingsngew kitkhlieh bad jingsngew sarong, kin iai neh ha ki nongrim jong ka synshar paidbah ha baroh shi jingim jong ki. Kane ka jingsngew jong ka jingaiti kadei ka nongrim jong ka ri kaba khlain.”

“Ha kane ka Constitution Day, to ngin pynskhem biang ia ka jingbam smai jong ngi ban pyndep ia la ki kamram kum ki nongshong shnong jong kane ka ri kaba khraw.”

****