પ્રધાનમંત્રીનું કાર્યાલય
પ્રધાનમંત્રી શ્રી નરેન્દ્ર મોદીએ બંધારણ દિવસ પર નાગરિકોને પત્ર લખ્યો
પ્રધાનમંત્રીએ નાગરિકોને ભારત વિકસિત ભારતના વિઝન તરફ આગળ વધી રહ્યું છે ત્યારે તેમની ફરજોને પ્રાથમિકતા આપવા અપીલ કરી
પ્રધાનમંત્રીએ નાગરિકોને મતદાનના અધિકારનો ઉપયોગ કરીને લોકશાહીને મજબૂત બનાવવા વિનંતી કરી
Posted On:
26 NOV 2025 9:00AM by PIB Ahmedabad
પ્રધાનમંત્રી શ્રી નરેન્દ્ર મોદીએ આજે, 26 નવેમ્બર, બંધારણ દિવસ નિમિત્તે ભારતના નાગરિકોને લખેલા પત્રમાં 1949માં બંધારણના ઐતિહાસિક સ્વીકાર અને રાષ્ટ્રની પ્રગતિમાં તેની કાયમી ભૂમિકાને યાદ કરી. તેમણે નોંધ્યું કે 2015માં, સરકારે આ પવિત્ર દસ્તાવેજના સન્માનમાં 26 નવેમ્બરના દિવસને ‘બંધારણ દિવસ’ તરીકે જાહેર કર્યો હતો.
શ્રી મોદીએ નોંધ્યું કે બંધારણે કેવી રીતે સામાન્ય પૃષ્ઠભૂમિના વ્યક્તિઓને ઉચ્ચ સ્તરે રાષ્ટ્રની સેવા કરવા માટે સશક્ત બનાવ્યા છે અને સંસદ અને બંધારણ પ્રત્યેના તેમના અનુભવો શેર કર્યા હતા. તેમણે 2014માં સંસદના પગથિયાં પર નમન કરવાની અને 2019માં આદરના પ્રતીક તરીકે પોતાના મસ્તક પર બંધારણ મુકવાના પ્રસંગને તે યાદ કર્યો હતો. તેમણે ભાર મૂક્યો કે બંધારણે અસંખ્ય નાગરિકોને સ્વપ્ન જોવા અને તે સપનાઓને સાકાર કરવા માટે સશક્ત બનાવ્યા છે.
બંધારણ સભાના સભ્યોને શ્રદ્ધાંજલિ આપતા, પ્રધાનમંત્રીએ ડૉ. રાજેન્દ્ર પ્રસાદ, ડૉ. બાબાસાહેબ ભીમરાવ આંબેડકર અને ઘણી પ્રતિષ્ઠિત મહિલા સભ્યોને યાદ કરી, જેમના દ્રષ્ટિકોણથી બંધારણ સમૃદ્ધ બન્યું છે. તેમણે બંધારણની 60મી વર્ષગાંઠ દરમિયાન ગુજરાતમાં યોજાયેલી સંવિધાન ગૌરવ યાત્રા, તેની 75મી વર્ષગાંઠની ઉજવણી માટે યોજાયેલી સંસદનું ખાસ સત્ર અને રાષ્ટ્રવ્યાપી કાર્યક્રમો જેવા મહત્વપૂર્ણ કાર્યક્રમોનો ઉલ્લેખ કર્યો, જેમાં રેકોર્ડ જનભાગીદારી જોવા મળી હતી.
પ્રધાનમંત્રીએ ભાર મૂક્યો કે આ વર્ષનો બંધારણ દિવસ ખાસ કરીને મહત્વપૂર્ણ છે કારણ કે તે સરદાર વલ્લભભાઈ પટેલ અને ભગવાન બિરસા મુંડાની 150મી જન્મજયંતિ, વંદે માતરમની 150મી વર્ષગાંઠ અને શ્રી ગુરુ તેગ બહાદુરજીની 350મી શહીદી જયંતિ સાથે સુસંગત છે. શ્રી મોદીએ કહ્યું કે આ વ્યક્તિત્વો અને સીમાચિહ્નો આપણને બંધારણની કલમ 51A માં સમાવિષ્ટ આપણી ફરજોની પ્રાધાન્યતાની યાદ અપાવે છે. તેમણે મહાત્મા ગાંધીના વિશ્વાસને યાદ કર્યો કે અધિકારો ફરજોની પરિપૂર્ણતામાંથી વહે છે. શ્રી મોદીએ ભાર મૂક્યો કે ફરજોની પરિપૂર્ણતા એ સામાજિક અને આર્થિક પ્રગતિનો પાયો છે.
ભવિષ્ય તરફ નજર કરતાં, શ્રી મોદીએ નોંધ્યું કે આ સદીની શરૂઆતથી 25 વર્ષ વીતી ગયા છે, અને માત્ર બે દાયકામાં, ભારત સંસ્થાનવાદી શાસનથી સ્વતંત્રતાના 100 વર્ષની ઉજવણી કરશે. 2049માં, બંધારણ અપનાવ્યાને એક સદી થશે. તેમણે ભાર મૂક્યો કે આજે લેવામાં આવેલા નિર્ણયો અને નીતિઓ આવનારી પેઢીઓના જીવનને આકાર આપશે. પ્રધાનમંત્રીએ નાગરિકોને વિનંતી કરી કે તેઓ વિકસિત ભારતના વિઝન તરફ આગળ વધે ત્યારે તેમની ફરજોને પ્રાથમિકતા આપે.
પ્રધાનમંત્રીએ મતદાનના અધિકારનો ઉપયોગ કરીને લોકશાહીને મજબૂત બનાવવાની જવાબદારી પર પણ ભાર મૂક્યો અને સૂચવ્યું કે શાળાઓ અને કોલેજો 18 વર્ષની ઉંમરે પહોંચેલા પ્રથમ વખત મતદાતાઓનું સન્માન કરીને બંધારણ દિવસની ઉજવણી કરે. તેમણે વિશ્વાસ વ્યક્ત કર્યો કે યુવાનોમાં જવાબદારી અને ગૌરવની ભાવના જગાડવાથી લોકશાહી મૂલ્યો અને દેશના ભવિષ્યને મજબૂત બનાવવામાં આવશે.
પોતાના પત્રના સમાપન કરતાં, પ્રધાનમંત્રીએ નાગરિકોને આ મહાન રાષ્ટ્રના નાગરિક તરીકે તેમની ફરજો પૂર્ણ કરવાની પ્રતિજ્ઞાને પુનઃપુષ્ટી કરવા અપીલ કરી, જેનાથી વિકસિત અને સશક્ત ભારતનું નિર્માણ કરવામાં અર્થપૂર્ણ યોગદાન આપવામાં આવશે.
X પર અલગ અલગ પોસ્ટ્સમાં, શ્રી મોદીએ કહ્યું:
"બંધારણ દિવસ પર, મારા સાથી નાગરિકોને એક પત્ર લખ્યો જેમાં મેં આપણા બંધારણની મહાનતા, આપણા જીવનમાં મૂળભૂત ફરજોનું મહત્વ, આપણે પહેલી વાર મતદાતા બનવાની ઉજવણી શા માટે કરવી જોઈએ અને ઘણાં બધા વિશે વાત કરી..."
“संविधान दिवस पर मैंने देशभर के अपने परिवारजनों के नाम एक पत्र लिखा है। इसमें हमारे संविधान की महानता, जीवन में मौलिक कर्तव्यों का महत्त्व और हमें पहली बार मतदाता बनने का उत्सव क्यों मनाना चाहिए, ऐसे कई विषयों पर अपने विचार साझा किए हैं… “
SM/IJ/GP
સોશિયલ મીડિયા પર અમને ફોલો કરો : 
@PIBAhmedabad 
/pibahmedabad1964 
/pibahmedabad 
pibahmedabad1964[at]gmail[dot]com
(Release ID: 2194490)
Visitor Counter : 11