నమస్కారం!
ఈ నెలలో 'రోజ్‌గర్ మేళా' ప్రయాణం కీలక దశకు చేరుకుంది. గత సంవత్సరం 'రోజ్‌గర్ మేళా' అక్టోబరు నెలలోనే ప్రారంభమైంది. అప్పటి నుంచీ కేంద్రంతో పాటు... ఎన్‌డీఏ, భాజపాలు అధికారంలో ఉన్న రాష్ట్రాల్లో రోజ్‌గార్ మేళాలు క్రమం తప్పకుండా నిర్వహిస్తున్నారు. ఇప్పటి వరకు లక్షలాది మంది యువకులకు ప్రభుత్వ ఉద్యోగాల నియామక పత్రాలు అందజేశారు. ఈ రోజూ 50,000 మందికి పైగా యువకులకు ప్రభుత్వ ఉద్యోగాలు ఇచ్చారు. దీపావళికి ఇంకా కొన్ని రోజులే మిగిలి ఉన్నాయి. అయితే నియామక లేఖలు పొందిన 50,000 మంది యువకుల కుటుంబాల్లో ఈ సందర్భం దీపావళి కంటే తక్కువేమీ కాదు. మీరంతా మీ కృషితో ఈ స్థానాన్ని సాధించారు. దీని కోసం మీరందరూ.. నా యువ మిత్రులు... ముఖ్యంగా మన కుమార్తెలు హృదయపూర్వక ప్రశంసలకు అర్హులు. మీ కుటుంబాలకూ నా శుభాకాంక్షలు!

మిత్రులారా,
దేశంలోని వివిధ రాష్ట్రాలు, కేంద్రపాలిత ప్రాంతాల్లో నిర్వహిస్తున్న రోజ్‌గార్ మేళాలు యువత పట్ల మన నిబద్ధతకు నిదర్శనం. యువత భవిష్యత్తును దృష్టిలో ఉంచుకుని మా ప్రభుత్వం మిషన్ మోడ్‌లో పని చేస్తోంది. మేం ఉపాధిని కల్పించడమే కాకుండా మొత్తం వ్యవస్థ పారదర్శకంగా ఉండేలా చూస్తున్నాం. దీని కారణంగా యువత నియామక ప్రక్రియపై విశ్వాసం కలిగి ఉన్నారు. మేం నియామక ప్రక్రియను క్రమబద్ధీకరించడమే కాకుండా కొన్ని పరీక్షల విధానంలోనూ మార్పులు ప్రవేశపెట్టాం. స్టాఫ్ సెలక్షన్ కమిషన్ నియామక చక్రం కోసం పట్టే సమయం ఇప్పుడు దాదాపు సగానికి తగ్గింది. అంటే, సర్క్యులర్ లేఖ జారీ చేసినప్పటి నుంచి నియామక పత్రాలు అందించే వరకు గల సమయం గణనీయంగా తగ్గింది. ఇది యువతకు చాలా సమయాన్ని ఆదా చేసింది. యువత ప్రయోజనాల దృష్ట్యా ప్రభుత్వం మరో ముఖ్యమైన సంస్కరణను చేపట్టింది. ఎస్ఎస్‌సీ కొన్ని పరీక్షలను హిందీ, ఇంగ్లీష్‌లతో పాటు మరో 13 ప్రాంతీయ భాషల్లో నిర్వహించడం ప్రారంభించింది. ఇది భాషా అవరోధం ఉన్న పెద్ద సంఖ్యలో యువతకు ఉద్యోగాలకు దరఖాస్తు చేసుకునే అవకాశాన్ని కల్పిస్తోంది.

మిత్రులారా,
భారత్ పురోగమిస్తున్న దిశ, వేగం ప్రతి రంగంలోనూ కొత్త ఉపాధి అవకాశాలను సృష్టించడంలో సహాయపడ్డాయి. గుజరాత్‌లోని ధోర్డో గ్రామం గురించి మీరు వినే ఉంటారు. పాకిస్తాన్ సరిహద్దులో ఉన్న కచ్ జిల్లాలోని ధోర్డో గ్రామం మీకు తెలిసి ఉండవచ్చు. ఈ ధోర్డో గ్రామానికి ఐక్యరాజ్యసమితి ఉత్తమ పర్యాటక గ్రామంగా గౌరవం ఇచ్చింది. గతంలోనూ కర్ణాటకలోని హొయసల దేవాలయాలు, పశ్చిమ బెంగాల్‌లోని శాంతినికేతన్‌లకు ప్రపంచ వారసత్వ ప్రదేశంగా గుర్తింపు లభించింది. ఇది పర్యాటకానికి, ఆర్థిక వ్యవస్థ విస్తరణకు ఎంతగా ఊతమిస్తుందో మీరు ఊహించవచ్చు. పర్యాటక విస్తరణ అంటే కొత్త ఉపాధి అవకాశాలు వేగంగా పెరుగుతాయని అర్థం. పర్యాటకం ఫలితంగా ఆ ప్రదేశాల సమీపంలోని హోటళ్ళు, చిన్న దుకాణదారులు, బస్సు డ్రైవర్లు, టాక్సీ డ్రైవర్లు, ఆటో రిక్షా డ్రైవర్లకు ప్రయోజనాలు లభిస్తాయి. డ్రైవర్లు, టూరిస్ట్ గైడ్‌లతో సహా ప్రతి ఒక్కరూ ప్రయోజనం పొందుతారు. అదేవిధంగా క్రీడా రంగం కూడా కొత్త ఉపాధి అవకాశాలను సృష్టిస్తున్న రంగంగా ఉంది. జాతీయ, అంతర్జాతీయ క్రీడల్లో మన ఆటగాళ్ళు అపూర్వమైన ప్రదర్శన చేస్తున్నారు. ఈ విజయాలు మన దేశ క్రీడా రంగంలో వచ్చిన ప్రధాన మార్పులు, అభివృద్ధికి సంకేతం. క్రీడా రంగం అభివృద్ధి చెందినప్పుడు అది మెరుగైన ఆటగాళ్లను అందించడమే కాకుండా శిక్షకులు, ఫిజియోలు, రిఫరీలు, క్రీడా పోషకాహార నిపుణులకు అనేక కొత్త అవకాశాలను సృష్టిస్తుంది.

మిత్రులారా,
ఉపాధి కల్పించే సాంప్రదాయిక రంగాలను మేం బలోపేతం చేస్తున్నాం. దీంతో పాటు పునరుత్పాదక ఇంధనం, అంతరిక్షం, ఆటోమేషన్, రక్షణ ఎగుమతుల వంటి కొత్త రంగాలనూ మేం ప్రోత్సహిస్తున్నాం. డ్రోన్ టెక్నాలజీలో కొత్త అవకాశాల తలుపులు తెరుచుకున్నాయి. పంట అంచనా, పోషకాల పిచికారి కోసం రైతులు డ్రోన్‌లను వాడడం క్రమంగా పెరుగుతోంది. స్వామిత్వ పథకం కింద ల్యాండ్ మ్యాపింగ్‌ కోసం డ్రోన్‌లను ఉపయోగిస్తున్నారు. మీరు కొన్ని రోజుల కిందట ఒక వీడియోను చూసి ఉండవచ్చు. హిమాచల్ ప్రదేశ్‌లోని లాహౌల్-స్పితిలో డ్రోన్‌ల సహాయంతో ఐసీఎమ్ఆర్ మందులను ఒక ప్రదేశం నుంచి మరొక ప్రదేశానికి రవాణా చేసింది. గతంలో ఈ పనికి రెండు గంటలు పట్టేది. డ్రోన్‌ల సహాయంతో దీన్ని 20, 25, 30 నిమిషాలు... అంతకంటే తక్కువ సమయంలోనూ చేయవచ్చు. డ్రోన్‌లు పెద్ద సంఖ్యలో అంకురసంస్థల ఏర్పాటుకూ దారితీశాయి. ఈ రంగంలో పెట్టుబడులు యువతకు కొత్త రకాల డ్రోన్‌ల రూపకల్పనలో సహాయపడుతాయి.

నా కుటుంబ సభ్యులారా,

ఈ నెలలో మనం పూజ్య బాపూజీ జయంతిని కూడా జరుపుకున్నాం. గాంధీజీ చరఖాను స్వదేశీ, కర్మయోగానికి శక్తిమంతమైన చిహ్నంగా ఉపయోగించారు. గతంలో కోల్పోయిన ఖాదీ వైభవాన్ని ఇప్పుడు తిరిగి తీసుకువచ్చాం. 10 సంవత్సరాల కిందట ఖాదీ అమ్మకాలు దాదాపు రూ. 30 వేల కోట్లు. ఇప్పుడు అది రూ. 1.25 లక్షల కోట్లు దాటింది. ఇది ఖాదీ, గ్రామ పరిశ్రమల రంగంలో అనేక కొత్త ఉపాధి అవకాశాలను సృష్టించింది. ముఖ్యంగా మహిళలు దీని నుంచి చాలా ప్రయోజనం పొందారు.

మిత్రులారా,

ప్రతి దేశానికి వివిధ రకాల సామర్థ్యాలు ఉన్నాయి. కొన్నింటికి సహజ వనరులు ఉన్నాయి. కొన్నింటికి ఖనిజాలు ఉన్నాయి. మరికొన్నింటికి పొడవైన తీరప్రాంతం బలం ఉంది. కానీ ఈ సామర్థ్యాన్ని ఉపయోగించుకోవడానికి అవసరమైన గొప్ప బలం మన యువశక్తి. యువశక్తి ఎంత బలంగా ఉంటే... దేశం అంతగా అభివృద్ధి చెందుతుంది. ఈ రోజు భారత్ తన యువతను నైపుణ్యం, విద్య ద్వారా కొత్త అవకాశాలను సద్వినియోగం చేసుకోవడానికి సిద్ధం చేస్తోంది. భవిష్యత్ ఆధునిక అవసరాలను దృష్టిలో ఉంచుకుని, దేశంలో ఆధునిక జాతీయ విద్యా విధానాన్ని అమలు చేస్తున్నాం. దేశంలో పెద్ద సంఖ్యలో కొత్త వైద్య కళాశాలలు, ఐఐటీలు, ఐఐఎంలు, ఐఐఐటీల వంటి నైపుణ్యాభివృద్ధి సంస్థలు ప్రారంభమయ్యాయి. ప్రధానమంత్రి కౌశల్ వికాస్ యోజన కింద కోట్లాది మంది యువతకు శిక్షణ అందించాం. మన దేశంలో కోట్లాది మంది చేతివృత్తులవారు తమ సాంప్రదాయిక వృత్తుల ద్వారా జీవనోపాధి పొందుతున్నారు. అటువంటి విశ్వకర్మ కళాకారుల కోసం ప్రధానమంత్రి విశ్వకర్మ యోజననూ ప్రారంభించాం. నేటి సాంకేతిక యుగంలో ప్రతిదీ వేగంగా మారుతోంది. అందుకు తగ్గట్టుగా ప్రతి ఒక్కరూ తమ నైపుణ్యాలను, జ్ఞానాన్ని నవీకరిస్తూ ఉండాలి. ఏదైనా కొత్త నైపుణ్యాన్ని నేర్చుకున్న తర్వాత దానిని నిరంతరం మెరుగుపరుచుకోవడం చాలా ముఖ్యం. ప్రధానమంత్రి విశ్వకర్మ యోజన కింద, చేతివృత్తులవారి సాంప్రదాయిక నైపుణ్యాలను ఆధునిక సాంకేతికత, సాధనాలతో అనుసంధానిస్తున్నాం.

నా కుటుంబ సభ్యులారా,

యువతకు ఉపాధి అవకాశాలను సృష్టించడం దేశ నిర్మాణ ప్రక్రియలో ఒక ముఖ్యమైన భాగం. అభివృద్ధి చెందిన భారత్ లక్ష్యాన్ని సాధించడంలో ఇది కీలక ముందడుగు. ప్రభుత్వ ఉద్యోగిగా మీరు అటువంటి పథకాలన్నింటినీ ముందుకు తీసుకెళ్లి వాటిని క్షేత్రస్థాయిలో అమలు చేయాలి. ఈ రోజు మీరందరూ మన దేశ నిర్మాణ ప్రయాణంలో ముఖ్యమైన భాగస్వాములుగా మాతో చేరుతున్నారు. మీరు ఈ రోజు మీ కలలను నెరవేర్చుకుంటున్నారు, అదే సమయంలో మీ దేశవాసుల కలల బాధ్యతనూ తీసుకుంటున్నారు. ఈ ప్రయాణాన్ని విజయవంతం చేయడంలో మీ క్రియాశీల సహకారం చాలా ముఖ్యం. ఐ-జీవోటీ పోర్టల్‌ ద్వారా మీ జ్ఞాన పరిధిని విస్తరించుకుంటూ ఉండాలని నేను మిమ్మల్ని కోరుతున్నాను. మీ ప్రతి అడుగు దేశాన్ని అభివృద్ధి పథంలో వేగంగా ముందుకు తీసుకెళ్లడంలో సహాయపడుతుంది.

మరోసారి మీ అందరికీ నా శుభాకాంక్షలు. మీ కుటుంబ సభ్యులకు శుభాకాంక్షలు! ఈ రోజు శరద్ పూర్ణిమ. రాబోయే రోజులు పండగల కాలాన్ని సూచిస్తాయి. మీరు ఎక్కడ ఉన్నా మీరు ప్రభుత్వ పనిలో నిమగ్నమై ఉండవచ్చు, కానీ 'స్థానికత స్వరం' అనే ఈ మంత్రాన్ని ప్రతిచోటా ప్రచారం చేయండి. 'స్థానికత స్వరం' కు మనం కట్టుబడి ఉండాలని మీ కుటుంబ సభ్యులకూ చెప్పండి. అది ఉపాధి అవకాశాలను పెంచడానికి కీలకమైన మార్గం. ఇది కొత్త అవకాశాలను అందించడానికీ ఒక ముఖ్యమైన మార్గం. మరోసారి మీ అందరికీ నా శుభాకాంక్షలు! చాలా ధన్యవాదాలు.
గమనిక: ఇది ప్రధానమంత్రి హిందీలో చేసిన ప్రసంగానికి అనువాదం.

***