ନମସ୍କାର।

ଚଳିତ ମାସରେ ନିଯୁକ୍ତି ମେଳାର ଏହି ଯାତ୍ରା ଏକ ଗୁରୁତ୍ୱପୂର୍ଣ୍ଣ ପର୍ଯ୍ୟାୟରେ ପହଞ୍ଚିଛି। ଗତ ବର୍ଷ ଅକ୍ଟୋବରମାସରେ ଏହି ନିଯୁକ୍ତି ମେଳା ଆରମ୍ଭ ହୋଇଥିଲା। ସେବେଠାରୁ କେନ୍ଦ୍ର ଓ ଏନଡିଏ ଶାସିତ, ବିଜେପି ଶାସିତ ରାଜ୍ୟରେ କ୍ରମାଗତ ଭାବେ ନିଯୁକ୍ତି ମେଳା ଆୟୋଜନ କରାଯାଉଛି। ବର୍ତ୍ତମାନ ସୁଦ୍ଧା ଲକ୍ଷ ଲକ୍ଷ ଯୁବକଯୁବତୀଙ୍କୁ ସରକାରୀ ଚାକିରି ପାଇଁ ନିଯୁକ୍ତି ପତ୍ର ପ୍ରଦାନ କରାଯାଇଛି। ଆଜି ମଧ୍ୟ ୫୦ ହଜାରରୁ ଅଧିକ ଯୁବକଙ୍କୁ ସରକାରୀ ଚାକିରି ଦିଆଯାଇଛି। ଦୀପାବଳି କୁ ଆଉ ମାତ୍ର କିଛି ଦିନ ବାକି ଅଛି, କିନ୍ତୁ ନିଯୁକ୍ତି ପତ୍ର ପାଇଥିବା ୫୦ ହଜାର ଯୁବକଙ୍କ ପରିବାର ପାଇଁ ଏହି ସୁଯୋଗ ଦୀପାବଳିଠାରୁ କମ୍ ନୁହେଁ। ଆପଣମାନେ ସମସ୍ତେ କଠିନ ପରିଶ୍ରମ ଦ୍ୱାରା ଏହି ସ୍ଥାନ ହାସଲ କରିଛନ୍ତି । ଏଥିପାଇଁ ଆପଣସମସ୍ତେ, ମୋର ଯୁବ ବନ୍ଧୁମାନେ, ବିଶେଷ କରି ଆମ ଝିଅମାନେ ବହୁତ ଅଭିନନ୍ଦନ ପାଇବାକୁ ଯୋଗ୍ୟ। ବିଶେଷ କରି ଆପଣଙ୍କ ପରିବାରକୁ ମୋ ତରଫରୁ ବହୁତ ବହୁତ ଧନ୍ୟବାଦ।

ସାଥୀମାନେ

ଦେଶର ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଆୟୋଜିତ ହେଉଥିବା ନିଯୁକ୍ତି ମେଳା ଯୁବବର୍ଗଙ୍କ ପ୍ରତି ଆମର ପ୍ରତିବଦ୍ଧତାର ପ୍ରମାଣ ଅଟେ। ଯୁବବର୍ଗଙ୍କ ଭବିଷ୍ୟତକୁ ଦୃଷ୍ଟିରେ ରଖି ଆମ ସରକାର ମିଶନ ମୋଡରେ କାମ କରୁଛନ୍ତି । ଆମେ କେବଳ ରୋଜଗାର ପ୍ରଦାନ କରୁନାହୁଁ ବରଂ ସମଗ୍ର ବ୍ୟବସ୍ଥାକୁ ପାରଦର୍ଶୀ ମଧ୍ୟ କରୁଛୁ, ଯାହାଦ୍ବାରା ନିଯୁକ୍ତି ପ୍ରକ୍ରିୟାରେ ଯୁବବର୍ଗଙ୍କ ବିଶ୍ୱାସ ବଜାୟ ରଖିଛି । ଆମେ କେବଳ ନିଯୁକ୍ତି ପ୍ରକ୍ରିୟାକୁ ଶୃଙ୍ଖଳିତ କରିନାହୁଁ, ବରଂ କିଛି ପରୀକ୍ଷାର ପୁନର୍ଗଠନ ମଧ୍ୟ କରିଛୁ । ଷ୍ଟାଫ୍ ସିଲେକ୍ସନ କମିଶନ (ଏସଏସସି)ର ନିଯୁକ୍ତି କରିବା ପ୍ରକ୍ରିୟାରେ ଲାଗିଥିବା ସମୟ ଏବେ ପ୍ରାୟ ଅଧା ହୋଇଯାଇଛି । ଅର୍ଥାତ୍ ସର୍କୁଲାର ଲେଟର ଜାରି ହେବାଠାରୁ ଆରମ୍ଭ କରି ନିଯୁକ୍ତି ପତ୍ର ପର୍ଯ୍ୟନ୍ତ ସମୟ ଯଥେଷ୍ଟ ହ୍ରାସ କରାଯାଇଛି। ଏହା ଦ୍ୱାରା ଯୁବକମାନଙ୍କର ସମୟରେ ବିପୁଳ ସମୟ ସଞ୍ଚୟ ହୋଇପାରିଛି। ଯୁବବର୍ଗଙ୍କ ସ୍ୱାର୍ଥ ଦୃଷ୍ଟିରୁ ସରକାର ଆଉ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରିଛନ୍ତି । ଏସଏସସିରେ କିଛି ପରୀକ୍ଷାକୁ ହିନ୍ଦୀ, ଇଂରାଜୀ ଏବଂ ୧୩ଟି ଆଞ୍ଚଳିକ ଭାଷାରେ ଦେବା ଆରମ୍ଭ କରିଛି । ଏହା ଦ୍ବାରା ବହୁ ସଂଖ୍ୟକ ଯୁବକ ଯୁବତୀ ଚାକିରି ପାଇଁ ଆବେଦନ କରିବାର ସୁଯୋଗ ପାଉଛନ୍ତି, ଯେଉଁମାନଙ୍କ ମାର୍ଗରେ ଭାଷା ଏକ ପ୍ରତିବନ୍ଧକ ହୋଇ ଛିଡ଼ା ହୋଇଥିଲା।

ସାଥୀମାନେ

ଆଜି ଭାରତ ଯେଉଁ ଦିଗରେ ଗତି କରୁଛି, ଯେଉଁ ବେଗରେ ଗତି କରୁଛି, ପ୍ରତ୍ୟେକ କ୍ଷେତ୍ରରେ ନୂତନ ନିଯୁକ୍ତିର ସୁଯୋଗ ସୃଷ୍ଟି ହେଉଛି। ଆପଣ ଦେଖିଥିବେ କିଛି ଦିନ ତଳେ ଗୁଜରାଟର ଧୋରଡ଼ୋ ଗାଁକୁ ଆପଣକୁ ଜଣାଥିବ ଧୋରଡ଼ୋ କଚ୍ଛ ଜିଲ୍ଲାର ପାକିସ୍ତାନ ସୀମାରେ ଅବସ୍ଥିତ ଏକ ଗାଁ ଅଟେ। ଧୋର୍ଦୋର ଏହି ଗାଁକୁ ମିଳିତ ଜାତିସଂଘ ପକ୍ଷରୁ ଶ୍ରେଷ୍ଠ ପର୍ଯ୍ୟଟନ ଗ୍ରାମ ଭାବରେ ସମ୍ମାନିତ କରାଯାଇଛି। ଏହା ପୂର୍ବରୁ କର୍ଣ୍ଣାଟକର ହୋୟସଲା ମନ୍ଦିର ଏବଂ ପଶ୍ଚିମବଙ୍ଗର ଶାନ୍ତିନିକେତନକୁ ବିଶ୍ୱ ଐତିହ୍ୟସ୍ଥଳୀର ମାନ୍ୟତା ମିଳିଛି । ଆପଣ କଳ୍ପନା କରିପାରିବେ ଯେ ଏହା ଦ୍ବାରା ଏଠିକାର ପର୍ଯ୍ୟଟନର ସମ୍ଭାବନାକୁ କେତେ ବୃଦ୍ଧି କରିଛି ଏବଂ ଅର୍ଥନୀତିକୁ ବିସ୍ତାର କରିବାର ସମ୍ଭାବନା କେତେ ବଢ଼ିଯାଇଛି। ପ୍ରଥମତଃ, ପର୍ଯ୍ୟଟନ ବୃଦ୍ଧିର ସିଧାସଳଖ ଅର୍ଥ ହେଉଛି ସେଠାରେ ନୂତନ ନିଯୁକ୍ତି ସୁଯୋଗ ଦ୍ରୁତ ଗତିରେ ବୃଦ୍ଧି ପାଇବ, ଯାହାର ଲାଭ, ଏହି ପର୍ଯ୍ୟଟନର ପରିଣାମ ଅଟେ, ଯାହା ଲାଭ ନିକଟସ୍ଥ ହୋଟେଲ, ଛୋଟ ଛୋଟ ଦୋକାନୀମାନଙ୍କୁ, ବସ୍ ଚଳାଉଥିବା ଡ୍ରାଇଭର, ଟ୍ୟାକ୍ସି ଡ୍ରାଇଭର, ଅଟୋ ରିକ୍ସା ଚାଳକ, ଏପରିକି ଟୁରିଷ୍ଟ ଗାଇଡ, ଏପରିକି ସମସ୍ତଙ୍କୁ ଉପକୃତ କରିବ । ସେହିଭଳି କ୍ରୀଡ଼ା କ୍ଷେତ୍ର ମଧ୍ୟ ଏଭଳି କ୍ଷେତ୍ର ଯାହା ନୂଆ ନିଯୁକ୍ତି ସୁଯୋଗ ସୃଷ୍ଟି କରୁଛି। ଜାତୀୟ-ଅନ୍ତର୍ଜାତୀୟ କ୍ରୀଡ଼ାରେ ଆମ ଆଥଲେଟମାନେ ଐତିହାସିକ ପ୍ରଦର୍ଶନ କରୁଛନ୍ତି। ଏହି ସଫଳତା ଆମ ଦେଶର କ୍ରୀଡ଼ା କ୍ଷେତ୍ରରେ ବଡ଼ ପରିବର୍ତ୍ତନ ଏବଂ ବିକାଶର ସଙ୍କେତ ମଧ୍ୟ ଅଟେ । ଏବଂ ଯେତେବେଳେ କ୍ରୀଡ଼ା କ୍ଷେତ୍ରର ବିକାଶ ହୋଇଥାଏ, ସେତେବେଳେ କେବଳ ଉତ୍ତମ ଖେଳାଳି ସୃଷ୍ଟି ହୋଇଥାଏ ସେମିତି ନୁହେଁ, ବରଂ ପ୍ରଶିକ୍ଷକ, ଫିଜିଓ, ରେଫରି ଓ କ୍ରୀଡ଼ା ବିଶେଷଜ୍ଞଙ୍କ ଭଳି ଅନେକ ନୂଆ ସୁଯୋଗ ସୃଷ୍ଟି ହୋଇଥାଏ।

ସାଥୀମାନେ,

ଆମେ ପାରମ୍ପରିକ ନିଯୁକ୍ତି କ୍ଷେତ୍ରକୁ ସୁଦୃଢ଼ କରୁଛୁ। ଏହା ସହିତ ଆମେ ଅକ୍ଷୟ ଶକ୍ତି, ମହାକାଶ, ଅଟୋମେସନ୍ ଏବଂ ପ୍ରତିରକ୍ଷା ରପ୍ତାନି ଭଳି ନୂତନ କ୍ଷେତ୍ରକୁ ପ୍ରୋତ୍ସାହିତ କରୁଛୁ । ଡ୍ରୋନ୍ ଟେକ୍ନୋଲୋଜିରେ ସମ୍ଭାବନାର ନୂଆ ଦ୍ୱାର ଖୋଲିଛି। ଆଜି ଫସଲ ଆକଳନ ଓ ପୋଷକ ତତ୍ତ୍ୱ ସିଞ୍ଚନରେ କୃଷକମାନଙ୍କର ଡ୍ରୋନର ବ୍ୟବହାର ଧୀରେ ଧୀରେ ବୃଦ୍ଧି ପାଇବାରେ ଲାଗିଛି। ମାଲିକାନା ଯୋଜନାରେ ଜମି ମ୍ୟାପିଂରେ ଡ୍ରୋନ୍ ବ୍ୟବହାର କରାଯାଉଛି। କିଛି ଦିନ ତଳେ ଆପଣ ଏକ ଭିଡିଓ ଦେଖିଥିବେ । ହିମାଚଳ ପ୍ରଦେଶର ଲାହୋଲ ସ୍ପିତିରେ ଆଇସିଏମଆର ଡ୍ରୋନ ସାହାଯ୍ୟରେ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ଔଷଧ ପରିବହନ କରିଛି । ପୂର୍ବରୁ ଏହି କାମ ପାଇଁ ଦୁଇ ଘଣ୍ଟା ସମୟ ଲାଗୁଥିଲା, କିନ୍ତୁ ଡ୍ରୋନ୍ ସାହାଯ୍ୟରେ ଏହା ୨୦, ୨୫, ୩୦ ମିନିଟ ମଧ୍ୟରେ କମ୍ ସମୟରେ କରାଯାଇଥିଲା। ଡ୍ରୋନ୍ ମଧ୍ୟ ବହୁ ସଂଖ୍ୟକ ଷ୍ଟାର୍ଟଅପ୍ କୁ ପ୍ରୋତ୍ସାହନ ଦେଇଛି। ଏହି କ୍ଷେତ୍ରରେ କରାଯାଉଥିବା ପୁଞ୍ଜିନିବେଶ ଯୁବପିଢ଼ିଙ୍କୁ ନୂଆ ନୂଆ ପ୍ରକାରର ଡ୍ରୋନ୍ ଡିଜାଇନ୍ କରିବାରେ ସହାୟକ ହେଉଛି।

ମୋ ପରିବାର ସଦସ୍ୟମାନେ,

ଏହି ମାସରେ, ଆମେ ପୂଜ୍ୟ ବାପୁଙ୍କ ଜୟନ୍ତୀ ମଧ୍ୟ ପାଳନ କରିଛୁ । ଗାନ୍ଧିଜୀ ଚରଖାକୁ ସ୍ୱଦେଶୀ ଏବଂ କର୍ମ ଯୋଗର ଏକ ଶକ୍ତିଶାଳୀ ପ୍ରତୀକ ଭାବରେ ବ୍ୟବହାର କରିଥିଲେ । ନିଜର ଚମକ ହରାଇଥିବା ଖଦୀ ମଧ୍ୟ ନିଜ ଚମକକୁ ଫେରିଆସିଛି । ୧୦ ବର୍ଷ ତଳେ ଖଦି ବିକ୍ରି ପ୍ରାୟ ୩୦ ହଜାର କୋଟି ଟଙ୍କା ଥିଲା। ଏବେ ଏହା ୧.୨୫ ଲକ୍ଷ କୋଟି ଟଙ୍କା ଅତିକ୍ରମ କରିଛି। ଏହା ଦ୍ୱାରା ଖଦି ଓ ଗ୍ରାମୋଦ୍ୟୋଗ କ୍ଷେତ୍ରରେ ଅନେକ ନୂଆ ନିଯୁକ୍ତି ସୁଯୋଗ ସୃଷ୍ଟି ହୋଇଛି। ବିଶେଷ କରି ମହିଳାମାନଙ୍କ ପାଇଁ ଏହା ବହୁତ ସହାୟକ ହୋଇଛି।

ସାଥୀମାନେ

ପ୍ରତ୍ୟେକ ଦେଶର ଏକ ଭିନ୍ନ ପ୍ରକାରର ଶକ୍ତି ଥାଏ । କାହା ପାଖରେ ପ୍ରାକୃତିକ ସମ୍ପଦ ଅଛି ତ କିଏ ଖଣିଜ ପଦାର୍ଥରେ ସମୃଦ୍ଧ, କାହାର ଦୀର୍ଘ ସମୁଦ୍ର କୂଳର ଶକ୍ତି ଅଛି । କିନ୍ତୁ ଏହି ସାମର୍ଥ୍ୟକୁ ଉପଯୋଗ କରିବା ପାଇଁ ସବୁଠାରୁ ବଡ଼ ଶକ୍ତି ଦରକାର, ତାହା ହେଉଛି ଆମର ଯୁବଶକ୍ତି । ଯୁବଶକ୍ତି ଯେତେ ଶକ୍ତିଶାଳୀ ହେବ, ଦେଶର ବିକାଶ ସେତେ ଅଧିକ ହେବ। ଆଜି ଭାରତ ତା'ର ଯୁବପିଢ଼ିଙ୍କୁ ଦକ୍ଷତା ଓ ଶିକ୍ଷା ମାଧ୍ୟମରେ ନୂତନ ସୁଯୋଗର ଲାଭ ଉଠାଇବା ପାଇଁ ପ୍ରସ୍ତୁତ କରୁଛି। ଭବିଷ୍ୟତର ଆଧୁନିକ ଆବଶ୍ୟକତାକୁ ଦୃଷ୍ଟିରେ ରଖି ଦେଶରେ ଆଧୁନିକ ଜାତୀୟ ଶିକ୍ଷାନୀତି କାର୍ଯ୍ୟକାରୀ କରାଯାଉଛି। ଦେଶରେ ବହୁ ସଂଖ୍ୟକ ନୂତନ ମେଡିକାଲ କଲେଜ, ଆଇଆଇଟି, ଆଇଆଇଏମ୍ କିମ୍ବା ଟ୍ରିପଲ୍ ଆଇଟି ଭଳି ଦକ୍ଷତା ବିକାଶ ପ୍ରତିଷ୍ଠାନ ଖୋଲାଯାଇଛି। ପ୍ରଧାନମନ୍ତ୍ରୀ ଦକ୍ଷତା ବିକାଶ ଯୋଜନାରେ କୋଟି କୋଟି ଯୁବକଙ୍କୁ ତାଲିମ ଦିଆଯାଇଛି। ଆମ ଦେଶର କୋଟି କୋଟି କାରିଗର ସେମାନଙ୍କର ପାରମ୍ପରିକ ବୃତ୍ତି ମାଧ୍ୟମରେ ଜୀବିକା ନିର୍ବାହ କରୁଛନ୍ତି । ଏଭଳି ବିଶ୍ୱକର୍ମା କାରିଗରଙ୍କ ପାଇଁ ପିଏମ୍ ବିଶ୍ୱକର୍ମା ଯୋଜନା ମଧ୍ୟ ଆରମ୍ଭ କରାଯାଇଛି। ଆଜିର ଟେକ୍ନୋଲୋଜି ଯୁଗରେ ସବୁକିଛି ଦ୍ରୁତ ଗତିରେ ବଦଳୁଛି, ତେଣୁ ସମସ୍ତଙ୍କୁ ନିଜ ଦକ୍ଷତା ଓ ଜ୍ଞାନକୁ ଅପଡେଟ୍ କରିବାକୁ ପଡ଼ିବ। କୌଣସି ନୂଆ କୌଶଳ ଶିଖିବା ପରେ ଏହା କ୍ରମାଗତ ଭାବେ ଉନ୍ନତ ଓ ପୁନଃକୁଶଳୀ ହେବା ଅତ୍ୟନ୍ତ ଜରୁରୀ। ପିଏମ ବିଶ୍ୱକର୍ମା ଯୋଜନା ଅଧୀନରେ କାରିଗରଙ୍କ ପାରମ୍ପରିକ ଦକ୍ଷତାକୁ ଆଧୁନିକ ଜ୍ଞାନକୌଶଳ ଏବଂ ଉପକରଣ ସହିତ ଯୋଡାଯାଉଛି ।

ମୋ ପରିବାର ସଦସ୍ୟମାନେ,

ଯୁବକମାନଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିବା ରାଷ୍ଟ୍ର ନିର୍ମାଣ ପ୍ରକ୍ରିୟାର ଏକ ଗୁରୁତ୍ୱପୂର୍ଣ୍ଣ ଅଂଶ । ବିକଶିତ ଭାରତର ଲକ୍ଷ୍ୟ ହାସଲ କରିବା ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ଜଣେ ସରକାରୀ କର୍ମଚାରୀ ହିସାବରେ ଆପଣଙ୍କୁ ଏଭଳି ସମସ୍ତ ଯୋଜନାକୁ ଆଗେଇ ନେବାକୁ ପଡ଼ିବ, ତାହାକୁ କାର୍ଯ୍ୟକାରୀ କରିବାକୁ ପଡ଼ିବ। ଆଜି ଆପଣମାନେ ସମସ୍ତେ ଦେଶ ନିର୍ମାଣରେ ଆମର ଯାତ୍ରାରେ ଗୁରୁତ୍ୱପୂର୍ଣ୍ଣ ଅଂଶୀଦାର ଭାବରେ ଆମ ସହିତ ଯୋଗ ଦେଉଛନ୍ତି । ମୁଁ ଆପଣମାନଙ୍କୁ ଅନୁରୋଧ କରୁଛି ଯେ ଆପଣଆଜି ଆପଣଙ୍କ ସ୍ୱପ୍ନ ପୂରଣ କରୁଛନ୍ତି, କିନ୍ତୁ ଆପଣ ଦେଶବାସୀଙ୍କ ସ୍ୱପ୍ନର ମାଲିକାନା ନେଉଛନ୍ତି । ମୁଁ ଆପଣମାନଙ୍କୁ ଅନୁରୋଧ କରୁଛି ଯେ ଏହି ଯାତ୍ରାକୁ ଲକ୍ଷ୍ୟରେ ପହଞ୍ଚାଇବାରେ ଆପଣଙ୍କସକ୍ରିୟ, ସକ୍ରିୟ ଅବଦାନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଆପଣ ଆଇ-ଗଟ୍ ପୋର୍ଟାଲରେ ମଧ୍ୟ ନିଜର ଜ୍ଞାନ ବୃଦ୍ଧି କରିବା ଉଚିତ୍ । ଆପଣଙ୍କ ପ୍ରତ୍ୟେକ ପଦକ୍ଷେପ ଦେଶକୁ ଦ୍ରୁତ ଗତିରେ ବିକାଶ ପଥରେ ଆଗେଇ ନେବାରେ ସହାୟକ ହେବ । ପୁଣି ଥରେ ଆପଣ ସମସ୍ତଙ୍କୁ ମୋର ଶୁଭେଚ୍ଛା । ଆପଣଙ୍କ ପରିବାର ସଦସ୍ୟଙ୍କୁ ବହୁତ ବହୁତ ଅଭିନନ୍ଦନ ଏବଂ ଆଗାମୀ ପୂରା ସମୟ, ଆଜି ଶରଦ ପୂର୍ଣ୍ଣିମା । ଆଗାମୀ ସମୟ ହେଉଛି ପର୍ବପର୍ବାଣୀର ସମୟ, ଆପଣ ଯେଉଁଠି ବି ଥାଆନ୍ତୁ, ସରକାରୀ କାର୍ଯ୍ୟରେ ନିୟୋଜିତ ହୋଇପାରନ୍ତି, କିନ୍ତୁ ଭୋକାଲ୍ ଫର୍ ଲୋକାଲର ଏହି ମନ୍ତ୍ରକୁ ସବୁଠି ପ୍ରସାର କରନ୍ତୁ, ଆପଣ ଆପଣଙ୍କ ପରିବାର ସଦସ୍ୟଙ୍କୁ ମଧ୍ୟ କହିବା ଉଚିତ ଯେ ଆମେ ଭୋକାଲ୍ ଫର୍ ଲୋକାଲ ପାଇଁ ପ୍ରତିଶ୍ରୁତିବଦ୍ଧ ରହିବୁ ଏବଂ ଏହା ମଧ୍ୟ ନୂତନ ନିଯୁକ୍ତି ସୁଯୋଗ ପ୍ରଦାନ କରିବାର ଏକ ମାଧ୍ୟମ । ପୁଣି ଥରେ ଆପଣ ସମସ୍ତଙ୍କୁ ମୋର ଶୁଭେଚ୍ଛା । ଆପଣଙ୍କୁ ବହୁତ ବହୁତ ଧନ୍ୟବାଦ।

****

NS/MB