নমস্কাৰ!

আন্দামান আৰু নিকোবৰ দ্বীপপুঞ্জৰ উপ-ৰাজ্যপাল শ্ৰী ডি কে যোশী জী, মোৰ কেবিনেট সহযোগী জ্যোতিৰাদিত্য সিন্ধিয়া জী, ভি কে সিং জী, মোৰ সংসদীয় সহকৰ্মীসকল, আন সকলো গণ্যমান্য ব্যক্তি, আৰু আন্দামান আৰু নিকোবৰ দ্বীপপুঞ্জৰ মোৰ ভাই-ভনীসকল!

যদিও আজিৰ অনুষ্ঠানটো প’ৰ্ট ব্লেয়াৰত অনুষ্ঠিত হৈছে, তথাপি সমগ্ৰ দেশৰ চকু এই অনুষ্ঠানৰ ওপৰত নিবদ্ধ হৈ আছে। দীৰ্ঘদিন ধৰি আন্দামান আৰু নিকোবৰৰ জনসাধাৰণৰ পৰা বীৰ ছাভাৰকাৰ বিমানবন্দৰৰ ক্ষমতা বৃদ্ধিৰ দাবী উত্থাপন হৈছিল। আৰু আমাৰ পূৰ্বৰ সাংসদগৰাকীয়ে এই বিষয়ত কাম কৰিবলৈ প্ৰতি সপ্তাহত মোৰ চেম্বাৰলৈ আহিছিল। সেয়েহে আজি তেওঁ অত্যন্ত আনন্দিত যেন লাগিছে আৰু মই মোৰ সকলো পুৰণি বন্ধু-বান্ধৱীক পৰ্দাত দেখিবলৈ পাইছো। মই আজি আপোনালোকৰ সৈতে শাৰীৰিকভাৱে যোগদান কৰি এই উদযাপনত অংশগ্ৰহণ কৰিব পাৰিলে ভাল হ’লহেঁতেন। কিন্তু সময়ৰ অভাৱত মই আহিব নোৱাৰিলো, কিন্তু মই আপোনালোক সকলোৰে মুখত আনন্দ দেখিছোঁ। মই আনন্দময় পৰিৱেশটো অনুভৱ কৰিব পাৰিছো।

বন্ধুসকল,

আৰু সমগ্ৰ দেশৰ পৰা এই ঠাইখন ভ্ৰমণ কৰিব বিচৰা লোকসকলৰো একেই ইচ্ছা আছিল। এতিয়ালৈকে বৰ্তমানৰ টাৰ্মিনেলৰ ক্ষমতাই প্ৰতিদিনে ৪০০০ পৰ্যটকক নিয়ন্ত্ৰণ কৰিব পাৰিছে। নতুন টাৰ্মিনেল নিৰ্মাণৰ পিছত, এই বিমানবন্দৰৰ প্ৰতিদিনে প্ৰায় ১১,০০০ পৰ্যটকক পৰিচালনা কৰাৰ ক্ষমতা আছে। নতুন ব্যৱস্থাৰ অধীনত, এতিয়া বিমানবন্দৰত একেলগে ১০খন বিমান ৰাখিব পৰা যাব। ইয়াৰ অৰ্থ হৈছে ইয়াত নতুন বিমানৰ বাবে পথ মুকলি কৰা হৈছে। অধিক বিমান আৰু অধিক পৰ্যটক ইয়ালৈ পোনপটীয়াকৈ অহাৰ অৰ্থ হৈছে অধিক আৰু অধিক নিযুক্তিৰ সুযোগ। প’ৰ্ট ব্লেয়াৰৰ এই নতুন টাৰ্মিনেল ভৱনত ভ্ৰমণৰ সুচলতা বৃদ্ধি হ’ব, ব্যৱসায় কৰাৰ সহজতা বৃদ্ধি হ’ব আৰু যোগাযোগ ব্যৱস্থাও উন্নত হ’ব। এই সুবিধাৰ বাবে মই দেশৰ জনসাধাৰণক আৰু প’ৰ্ট ব্লেয়াৰৰ সকলো বন্ধুক অভিনন্দন জনাইছো।

বন্ধুসকল,

দীৰ্ঘদিন ধৰি ভাৰতত উন্নয়নৰ পৰিসৰ কেইখনমান মুখ্য চহৰ বা কেইটামান অঞ্চলতে সীমাবদ্ধ আছিল। কিছুমান দলৰ স্বাৰ্থপৰ ৰাজনীতিৰ বাবে উন্নয়নৰ লাভালাভ দেশৰ দূৰৱৰ্তী অঞ্চলসমূহত উপনীত হ’ব পৰা নাছিল। এই দলবোৰে কেৱল সেই প্ৰকল্পবোৰক অগ্ৰাধিকাৰ দিছিল যিবোৰে তেওঁলোকক ব্যক্তিগতভাৱে আৰু তেওঁলোকৰ পৰিয়ালক উপকৃত কৰিছিল। ফলস্বৰূপে, আমাৰ জনজাতীয় অঞ্চল আৰু দ্বীপসমূহ উন্নয়নৰ পৰা বঞ্চিত হৈ আছিল আৰু উন্নয়নৰ বাবে আকুল হৈ আছিল।

যোৱা ৯ বছৰত আমি পূৰ্বৰ চৰকাৰসমূহৰ সেই ভুলবোৰ সম্পূৰ্ণ সংবেদনশীলতাৰে সংশোধন কৰিছো। তদুপৰি, আমি নতুন ব্যৱস্থাও বিকশিত কৰিছো। এতিয়া ভাৰতত উন্নয়নৰ এক নতুন আৰ্হি বিকশিত হৈছে। এই আৰ্হিটো অন্তৰ্ভুক্তিৰ, সকলোকে লগত লৈ যোৱা। এই আৰ্হিটোক 'সবকা সাথ, সবকা বিকাশ’ বুলি কোৱা হয়। আৰু যেতিয়া মই 'সবকা বিকাশ’ বা সকলোৰে বিকাশ বুলি কওঁ-ইয়াৰ অৰ্থ অতি বিস্তৃত। 'সবকা বিকাশ’ৰ অৰ্থ হৈছে প্ৰতিজন ব্যক্তি, প্ৰতিটো শ্ৰেণী, প্ৰতিটো ক্ষেত্ৰৰ উন্নয়ন। সবকা বিকাশৰ অৰ্থ হৈছে-জীৱনৰ প্ৰতিটো দিশৰ বিকাশ, শিক্ষা, স্বাস্থ্য, সংযোগ, যাতে সকলো দিশতে সকলোৰে বিকাশ হয়।

বন্ধুসকল,

এই চিন্তাধাৰাৰে বিগত ৯ বছৰত আন্দামান আৰু নিকোবৰত উন্নয়নৰ এক নতুন কাহিনী ৰচনা কৰা হৈছে। পূৰ্বৰ চৰকাৰৰ ৯ বছৰত, অৰ্থাৎ আমাৰ আগত থকা চৰকাৰখনে আন্দামান-নিকোবৰলৈ প্ৰায় ২৩ হাজাৰ কোটি টকাৰ বাজেট আবণ্টন কৰিছিল। আনহাতে আমাৰ চৰকাৰৰ শাসনকালত ৯ বছৰত আন্দামান-নিকোবৰৰ উন্নয়নৰ বাবে প্ৰায় ৪৮ হাজাৰ কোটি টকাৰ বাজেট আবণ্টন কৰা হৈছে। অৰ্থাৎ আমাৰ চৰকাৰে আন্দামান-নিকোবৰৰ উন্নয়নৰ বাবে পূৰ্বতকৈ দুগুণ ধন ব্যয় কৰিছে।

পূৰ্বৰ চৰকাৰৰ ৯ বছৰত আন্দামান-নিকোবৰৰ ২৮ হাজাৰ ঘৰ পানী যোগানৰ সৈতে সংযুক্ত কৰা হৈছিল। আমাৰ চৰকাৰৰ ৯ বছৰৰ শাসনকালত ইয়াত প্ৰায় ৫০ হাজাৰ ঘৰলৈ পানীৰ সংযোগ প্ৰদান কৰা হৈছে। অৰ্থাৎ, প্ৰতিটো ঘৰলৈ পানীৰ সংযোগ প্ৰদান কৰিবলৈ, আমাৰ চৰকাৰে পূৰ্বতকৈ দুগুণ দ্ৰুতগতিত কাম কৰিছে।

আজি ইয়াত প্ৰায় প্ৰতিজন ব্যক্তিৰ নিজৰ বেংক একাউণ্ট আছে। আজি ইয়াৰ প্ৰতিজন দৰিদ্ৰ লোকে 'এক ৰাষ্ট্ৰ, এক ৰেচন কাৰ্ড’ৰ সুবিধা লাভ কৰিছে। পূৰ্বৰ চৰকাৰৰ শাসনকালত আন্দামান-নিকোবৰত এখনো চিকিৎসা মহাবিদ্যালয় নাছিল। আমাৰ চৰকাৰে প’ৰ্ট ব্লেয়াৰত এখন চিকিৎসা মহাবিদ্যালয় স্থাপন কৰিছে।

পূৰ্বৰ চৰকাৰৰ শাসনকালত আন্দামান-নিকোবৰত ইণ্টাৰনেট কেৱল উপগ্ৰহৰ ওপৰত নিৰ্ভৰশীল আছিল। আমাৰ চৰকাৰে সাগৰৰ তলত বহু কিলোমিটাৰ ছাবমেৰিন অপ্টিকেল ফাইবাৰ কেবল স্থাপন কৰি এই সমস্যা সমাধান কৰিছে।

বন্ধুসকল,

আন্দামান আৰু নিকোবৰত সুবিধাসমূহৰ এই বিকাশে ইয়াৰ পৰ্যটন খণ্ডক এক গতি প্ৰদান কৰিছে। যেতিয়া মোবাইল সংযোগ বৃদ্ধি কৰা হয়, তেতিয়া পৰ্যটকৰ সংখ্যাও বৃদ্ধি পায়। যেতিয়া স্বাস্থ্য আন্তঃগাঁথনি উন্নত হয়, পৰ্যটকৰ আগমন আৰু অধিক বৃদ্ধি পায়। যেতিয়া বিমানবন্দৰৰ সুবিধাসমূহ উন্নত কৰা হয়, পৰ্যটকসকলে এই ঠাইখন ভ্ৰমণ কৰিবলৈ ভাল পায়। যেতিয়া পথবোৰ ভাল মানৰ হয়, পৰ্যটকসকলে অঞ্চলটোত অধিক সময় কটায়। সেয়েহে ২০১৪ চনৰ তুলনাত আন্দামান আৰু নিকোবৰলৈ অহা পৰ্যটকৰ সংখ্যা এতিয়া দুগুণ হৈছে।

স্নৰ্কেলিং, স্কুবা ডাইভিং আৰু চি-ক্ৰুজৰ দৰে দুঃসাহসিক অভিযানৰ বাবে ইয়ালৈ অহা পৰ্যটকৰ সংখ্যাও বৃদ্ধি পাইছে। আৰু আন্দামান-নিকোবৰৰ মোৰ ভাই-ভনীসকল, এয়া মাত্ৰ আৰম্ভণিহে। আগন্তুক বছৰবোৰত এই সংখ্যা বহুগুণে বৃদ্ধি পাব। ইয়াৰ ফলত আন্দামান আৰু নিকোবৰত নিযুক্তি আৰু আত্ম-নিযুক্তিৰ নতুন সম্ভাৱনা সৃষ্টি হ'ব।

বন্ধুসকল,

আজি আন্দামান আৰু নিকোবৰ এই মহান মন্ত্ৰ-’বিৰাসত ভি ঔৰ বিকাশ ভি' অৰ্থাৎ ঐতিহ্যৰ লগতে উন্নয়নৰ এক জীৱন্ত উদাহৰণ হৈ পৰিছে। আপোনালোকে জানে যে লালকিল্লাত উত্তোলন কৰাৰ বহু আগতেই আন্দামান আৰু নিকোবৰত ত্ৰিৰংগা পতাকা উত্তোলন কৰা হৈছিল। কিন্তু তথাপি ইয়াত দাসত্বৰ চিহ্ন এতিয়াও দৃশ্যমান আছিল।

২০১৮ চনত মই আন্দামানৰ সেই একে ঠাইতে ত্ৰিৰংগা পতাকা উত্তোলন কৰাৰ সৌভাগ্য লাভ কৰিছিলো য’ত নেতাজী সুভাষে পতাকা উত্তোলন কৰিছিল। আমাৰ চৰকাৰে নেতাজী সুভাষৰ নামেৰে ৰছ দ্বীপৰ নামকৰণ কৰিছিল। আমাৰ চৰকাৰে হেভলক আৰু নীল দ্বীপপুঞ্জক স্বৰাজ আৰু শ্বহীদ দ্বীপপুঞ্জ হিচাপে নামকৰণ কৰিছে। আমি দেশৰ বাবে বীৰত্ব প্ৰদৰ্শন কৰা সাহসী পুত্ৰসকল, অৰ্থাৎ পৰমবীৰ চক্ৰ বিজয়ীসকলৰ নামেৰে ২১টা দ্বীপৰ নাম ৰাখিছো। আজি আন্দামান আৰু নিকোবৰৰ এই দ্বীপসমূহে সমগ্ৰ দেশৰ যুৱক-যুৱতীসকলক দেশৰ উন্নয়নৰ বাবে নতুন অনুপ্ৰেৰণা প্ৰদান কৰিছে।

বন্ধুসকল,

স্বাধীনতাৰ পিছৰ ৭৫ বছৰত, আমাৰ দেশ ভাৰতে মহান শিখৰত উপনীত হ’ব পাৰিলেহেঁতেন আৰু মই এই কথা অপৰিসীম দায়িত্বৰে কৈছো। ই বহু উচ্চতাত উপনীত হ’ব পাৰিছিল। আমাৰ ভাৰতীয়সকলৰ মাজত কেতিয়াও সম্ভাৱনাৰ অভাৱ হোৱা নাই। কিন্তু দুৰ্নীতিগ্ৰস্ত আৰু পৰিয়ালমুখী দলসমূহে সদায়ে ভাৰতীয় সাধাৰণ মানুহৰ এই সামৰ্থ্যৰ প্ৰতি অন্যায় কৰি আহিছে। আজি দেশৰ জনসাধাৰণে ২০২৪ চনৰ নিৰ্বাচনত আমাৰ চৰকাৰক পুনৰ ঘূৰাই আনিবলৈ পুনৰ এবাৰ মনস্থ কৰিছে। তেওঁলোকে ইতিমধ্যে এই সিদ্ধান্ত গ্ৰহণ কৰিছে। এনে পৰিস্থিতিত ভাৰতৰ দুৰ্দশাৰ বাবে দায়ী কিছুমান লোকে তেওঁলোকৰ লেতেৰা ব্যৱসায় আৰম্ভ কৰিছে। সেইবোৰ চাই মোৰ এটা কবিতাৰ কেইটামান শাৰীৰ কথা মনত পৰিছে। এজন কবিয়ে অৱধী ভাষাত লিখিছিল। এইটো অৱধী ভাষাত লিখা এটা কবিতা-

''गायित कुछ है, हाल कुछ है, लेबिल कुछ है, माल कुछ है''

২০২৪ চনৰ নিৰ্বাচনৰ বাবে একত্ৰিত হোৱা ২৬টা ৰাজনৈতিক দলৰ বাবে ই অতি উপযুক্ত।

''गायित कुछ है, हाल कुछ है, लेबिल कुछ है, और माल कुछ है''

অৰ্থাৎ, কোনোবাই গানটো গাই আছে, কিন্তু সত্যটো বেলেগ। লেবেলটো আন কাৰোবাৰ, আনহাতে সামগ্ৰীটো আন কিবা। এয়া তেওঁলোকৰ ব্যৱসায়ৰ বাস্তৱিকতা। তেওঁলোকৰ দোকানত দুটা বস্তুৰ নিশ্চয়তা থাকে। প্ৰথমতে, তেওঁলোকে নিজৰ দোকানত জাতিবাদৰ বিষ বিক্ৰী কৰে। আৰু দ্বিতীয়তে, এই লোকসকলে সীমাহীন দুৰ্নীতিৰ সৈতে জড়িত হৈ থাকে। আজিকালি এই লোকসকল বেংগালুৰুত একত্ৰিত হৈছে।

এসময়ত এটা অতি বিখ্যাত গীত আছিল, মোৰ এইটো সম্পূৰ্ণৰূপে মনত নাই, খণ্ড খণ্ডকৈ আছে - মানুহে এখন মুখত বেলেগ বেলেগ মুখা পিন্ধে। এই লোকসকলৰ বেলেগ বেলেগ মুখ আছে। যেতিয়া এই লোকসকল কেমেৰাৰ সন্মুখত একেটা ফ্ৰেমত একত্ৰিত হয়, তেতিয়া দেশৰ জনসাধাৰণৰ মনত প্ৰথমে যি চিন্তা আহে সেয়া হ'ল- লাখ লাখ কোটি টকাৰ দুৰ্নীতি। সেয়েহে দেশৰ জনসাধাৰণে কৈছে যে এইখন এটা 'নিখুঁত দুৰ্নীতি সন্মিলন’। এই লোকসকলে আন কিবা গাই আছে কিন্তু পৰিস্থিতি কিছু বেলেগ। তেওঁলোকে লেবেলবোৰ আন কিবা এটাত ৰাখিছে যদিও তেওঁলোকৰ সামগ্ৰীবোৰ কিছু বেলেগ। তেওঁলোকৰ সামগ্ৰী হৈছে ২০ লাখ কোটি টকাৰ কেলেংকাৰিৰ গেৰাণ্টি।

বন্ধুসকল,

এই বৈঠকৰ আৰু এটা বিশেষত্ব আছে। যদি কোনো ব্যক্তি বহু কোটি টকাৰ দুৰ্নীতিৰ গোচৰত জামিনত ওলাই আহে, তেন্তে তেওঁক অতি সন্মানেৰে চোৱা হয়। যদি সমগ্ৰ পৰিয়ালটো জামিনত ওলাই আহে, তেন্তে তেওঁলোকক আৰু অধিক সন্মান কৰা হয়। যদি কোনো দলৰ বৰ্তমানৰ মন্ত্ৰীগৰাকী দুৰ্নীতিৰ গোচৰৰ বাবে কাৰাগাৰলৈ যায়, তেওঁক অতিৰিক্ত নম্বৰ দিয়া হয় আৰু 'বিশেষ আমন্ত্ৰিত' হিচাপে আমন্ত্ৰণ জনোৱা হয়। যদি কোনোবাই এটা সম্প্ৰদায়ক অপমান কৰে, আৰু আদালতৰ দ্বাৰা শাস্তি পায়, তেন্তে তেওঁ যথেষ্ট আতিথ্য লাভ কৰে। যদি কোনো লোকক আদালতৰ দ্বাৰা বহু কোটি টকাৰ কেলেংকাৰিত দোষী সাব্যস্ত কৰা হয়, তেন্তে তেওঁ এই সভাত উপস্থিত থাকিবলৈ আৰু অধিক যোগ্য হৈ পৰে। ইয়াৰ পৰিৱৰ্তে, এই লোকসকলে তেওঁৰ পৰা নিৰ্দেশনা বিচাৰে। তেওঁলোকৰ মাজত দুৰ্নীতিৰ প্ৰতি গভীৰ সম্পৰ্ক আৰু প্ৰেম আছে। সেয়েহে ২০ লাখ কোটি টকাৰ দুৰ্নীতিৰ নিশ্চয়তা দিয়া এই লোকসকলে অতি মৰমেৰে ইজনে সিজনক সাক্ষাৎ কৰিছে।

বন্ধুসকল,

দুৰ্নীতিৰ সৈতে জড়িত সকলোৱেই বংশগত ব্যৱস্থাৰ দৃঢ় সমৰ্থক-পৰিয়ালটোৱে যি কয় সেয়া সঠিক। গণতন্ত্ৰৰ বাবে ইয়াক বিশ্বাস কৰা হয়-জনসাধাৰণৰ, জনসাধাৰণৰ দ্বাৰা, জনসাধাৰণৰ বাবে। কিন্তু বংশগত ৰাজনীতিক সমৰ্থন কৰা এই লোকসকলৰ মন্ত্ৰ-'পৰিয়ালৰ, পৰিয়ালৰ দ্বাৰা, পৰিয়ালৰ বাবে'। 'পৰিয়াল প্ৰথম, ৰাষ্ট্ৰ একো নহয়’ এই লোকসকলৰ মূলমন্ত্র। এয়া তেওঁলোকৰ প্ৰেৰণা।

এই লোকসকলে দেশৰ গণতন্ত্ৰ আৰু সংবিধানক নিজৰ পণবন্দী কৰি ৰাখিব বিচাৰে। মই তেওঁলোকক ক'ব বিচাৰো... ঘৃণা আছে, প্ৰতাৰণা আছে। তুষ্টিকৰণ আৰু কুটিলতা আছে। দেশখনে কেইবা দশক ধৰি এক বংশবাদ ব্যৱস্থাৰ আঁৰত আছে।

বন্ধুসকল,

দেশৰ দৰিদ্ৰ লোকসকলৰ সন্তানৰ উন্নয়ন তেওঁলোকৰ বাবে গুৰুত্বপূৰ্ণ নহয়, কিন্তু তেওঁলোকৰ নিজৰ সন্তান, তেওঁলোকৰ ভাতৃ-ভতিজাৰ বিকাশ সদায় তেওঁলোকৰ অগ্ৰাধিকাৰ আছিল। আজিকালি আপোনালোকে দেখিছে যে দেশত ষ্টাৰ্ট-আপৰ সংখ্যা বৃদ্ধি পাইছে। আমাৰ যুৱক-যুৱতীসকলে পেটেণ্ট লাভ কৰিছে; বৃহৎ সংখ্যাত ট্ৰেডমাৰ্ক পঞ্জীয়ন কৰা হৈছে; মোৰ দেশৰ যুৱক-যুৱতীসকলে ক্ৰীড়া জগতত আধিপত্য বিস্তাৰ কৰিছে আৰু কন্যাসকলে বিস্ময়ৰ সৃষ্টি কৰিছে!

এই যুৱ শক্তি আমাৰ দেশত আগতেও আছিল, কিন্তু এই বংশবাদী দলসমূহে কেতিয়াও দেশৰ যুৱ শক্তিৰ সৈতে ন্যায় কৰা নাছিল। তেওঁলোকৰ কেৱল এটা আদৰ্শ আছে, কেৱল এটা এজেণ্ডা আছে-পৰিয়ালক ৰক্ষা কৰক, আৰু পৰিয়ালৰ বাবে দুৰ্নীতি জীয়াই ৰাখক! তেওঁলোকৰ সাধাৰণ নূন্যতম কাৰ্যসূচী হৈছে দেশৰ উন্নয়ন বন্ধ কৰা, তেওঁলোকৰ অব্যৱস্থাপনা ঢাকিবলৈ আৰু দুৰ্নীতিগ্ৰস্তসকলৰ বিৰুদ্ধে ব্যৱস্থা গ্ৰহণ বন্ধ কৰা।

এতিয়া চাওক, একত্ৰিত হোৱা এই গোটটোৱে যেতিয়া তেওঁলোকৰ দ্বাৰা কৰা আটাইতকৈ ডাঙৰ কেলেংকাৰি আৰু অপৰাধৰ কথা আহে তেতিয়া নিঃশব্দ হৈ পৰে। যেতিয়া যিকোনো এখন ৰাজ্যত তেওঁলোকৰ অপশাসন উন্মোচিত হয়, তেতিয়া আন ৰাজ্যৰ পৰা অহা তেওঁলোকৰ গোটৰ এই লোকসকলে লগে লগে তেওঁলোকৰ প্ৰতিৰক্ষাত যুক্তি প্ৰদান কৰিবলৈ আৰম্ভ কৰে। কিন্তু যদি ক’ৰবাত বানপানীৰ কেলেংকাৰি হয় বা কাৰোবাক অপহৰণ কৰা হয়, তেন্তে এই গোষ্ঠীৰ সকলো লোক নীৰৱ হৈ পৰে।

আপোনালোকে দেখিছে যে মাত্ৰ কেইদিনমান পূৰ্বে পশ্চিম বংগত পঞ্চায়ত নিৰ্বাচন অনুষ্ঠিত হৈছিল। মুকলি হিংসা আৰু বেপৰোৱা ৰক্তপাত হৈছিল। তেওঁলোক সকলোৱে আনকি এই বিষয়টোৰ ওপৰতো কথা কোৱা বন্ধ কৰিছে। কংগ্ৰেছ আৰু বাওঁপন্থী দলসমূহৰ কৰ্মীসকলে নিজকে ৰক্ষা কৰিবলৈ চেষ্টা চলাই আছে। কিন্তু কংগ্ৰেছ আৰু বাওঁপন্থী নেতাসকলে তেওঁলোকৰ স্বাৰ্থত তেওঁলোকৰ কৰ্মীসকলক নিজৰ প্ৰতিৰক্ষাৰ বাবে অকলে এৰি দিছে।

ৰাজস্থানত কন্যাকেইগৰাকীক অত্যাচাৰ কৰাৰ কথা হওক বা পৰীক্ষাৰ প্ৰশ্নপত্ৰ ফাদিল হোৱাৰ কথা হওক, তেওঁলোকে সকলোতে চকু মুদি থাকে। পৰিৱৰ্তনৰ কথা কৈ জনসাধাৰণক বিশ্বাসঘাতকতা কৰা লোকসকলে যেতিয়া কোটি কোটি টকাৰ সুৰা কাণ্ডত জড়িত হয়, তেতিয়া এই পৰিয়ালটোৱে তেওঁলোকক পুনৰ আৱৰণ দিবলৈ আৰম্ভ কৰে। তেওঁলোকে সেই স্পষ্ট দুৰ্নীতিৰ প্ৰতি চকু মুদি থাকে।

যেতিয়া দেশৰ যিকোনো সংস্থাই তেওঁলোকৰ বিৰুদ্ধে ব্যৱস্থা গ্ৰহণ কৰে, তেতিয়া তেওঁলোকে প্ৰতিবাৰেই একেই কথা কয়-"একো হোৱা নাই। সকলো এক ষড়যন্ত্ৰ, আমাক ফঁচাই দিয়া হৈছে"। যদি আপুনি তামিলনাডুলৈ লক্ষ্য কৰে, দুৰ্নীতি আৰু কেলেংকাৰিৰ কেইবাটাও গোচৰ সন্মুখলৈ আহিছে। কিন্তু এই গোষ্ঠীৰ সকলো দলে ইতিমধ্যে সকলোকে ক্লিন চিট দিছে। সেয়েহে বন্ধুসকলে এই লোকসকলক চিনাক্ত কৰি থাকে আৰু তেওঁলোকক চিনি পায়। এই লোকসকলৰ পৰা সাৱধান হওক, ভাই-ভনীসকল!

বন্ধুসকল,

এই লোকসকলৰ ষড়যন্ত্ৰৰ মাজতে আমি দেশৰ উন্নয়নৰ বাবে নিজকে উৎসৰ্গিত কৰিব লাগিব। আজি বিশ্বত এনে বহুতো উদাহৰণ আছে, য’ত দ্বীপ আৰু সৰু সৰু স্থলবেষ্টিত দেশসমূহে অভূতপূৰ্ব অগ্ৰগতি লাভ কৰিছে। যেতিয়া এই ৰাষ্ট্ৰসমূহে প্ৰগতিৰ পথ বাছি লৈছিল, তেতিয়া তেওঁলোকেও বিভিন্ন প্ৰত্যাহ্বানৰ সন্মুখীন হৈছিল।

সকলোবোৰ সহজ নাছিল, কিন্তু সেই দেশসমূহে দেখুৱাইছে যে যেতিয়া উন্নয়ন হয়, ই সকলো ধৰণৰ সমাধান কঢ়িয়াই আনে। মই নিশ্চিত যে আন্দামান-নিকোবৰ দ্বীপপুঞ্জত কৰা উন্নয়নমূলক কামসমূহে এই সমগ্ৰ অঞ্চলটো অধিক শক্তিশালী কৰি তুলিব। মই আশা কৰোঁ যে সংযোগৰ সৈতে জড়িত এই নতুন সুবিধা, অৰ্থাৎ বীৰ ছাভাৰকাৰ আন্তঃৰাষ্ট্ৰীয় বিমানবন্দৰৰ নতুন টাৰ্মিনেল সকলোৰে বাবে লাভজনক হ'ব।

এই ইচ্ছাৰে, এই ভিডিঅ' কনফাৰেন্স অনুষ্ঠানত ইমান বৃহৎ সংখ্যাত অহাৰ বাবে মই আপোনালোকক ধন্যবাদ জনাইছো। মই ইয়াৰ পৰাও আপোনাৰ আনন্দ আৰু উৎসাহ অনুভৱ কৰিব পাৰিছো।

এনে এক উপলক্ষত দেশখনে এক নতুন বিশ্বাস আৰু এক নতুন সংকল্পৰে আগবাঢ়ি যোৱা উচিত। আৰু মই আশা কৰোঁ যে আন্দামান-নিকোবৰ ইয়াৰ সৈতে আগবাঢ়ি যাব। এই কামনাৰে আপোনালোক সকলোকে মোৰ শুভেচ্ছা জনালোঁ, আন্তৰিক ধন্যবাদ!

DISCLAIMER: This is the approximate translation of PM’s speech. Original speech was delivered in Hindi.

ঘোষণাঃ এয়া হৈছে প্ৰধানমন্ত্ৰীৰ ভাষণৰ আনুমানিক অনুবাদ। মূল ভাষণ হিন্দী ভাষাত দিয়া হৈছিল।

***

DS/LP/IG/AK/HS