Ki lad pathai khubor kidei ka khmat bad ki shkor na ka bynta ki nongshong shnong jong ka ri synshar paidbah. Katba ngi dang rakhe ia ka National Press Day, hapdeng ka jingkiew jong ki jingtip ba ialam bakla ha ka juk jong ka AI, ka jingiada ia ka jingshaniah ha ki lad pathai khubor ka long kaba kongsan bha na ka bynta ban pynkupbor ia ki nongshong shnong. Kane ka jingsngew ka la mih na ki nongiashim bynta kum ka jingsngewkhia ha ka jingialang kaba la pynlong ha National Media Centre ha New Delhi mynta ka sngi. Ha kaba iadei bad ka phang pdeng mynta u snem- “Ka jingïada ïa ka jingshaniah ha ki kot khubor hapdeng ka jingkiew ki jingtip ba ialam bakla”, ka Chairperson jong ka PCI ka Justice (Rt.) Ranjana Prakash Desai ka la ong, “Ka AI kam lah satia ban wan bujli ïa ka jingmut jingpyrkhat jong u briew”. Ka jingbishar, ka jingsngewthuh bad ka jingsngew kitkhlieh kaba ialam ia uwei pa uwei u nongthoh khubor ka dei ban khanglad ia ka jingsaphriang jong ki jingtip kiba ialam bakla.

Ha ka jingai jingkren jong u, u CEO ka PTI u Vijay Joshi u ai jingmut kumno ban pynbeit ia ka ‘infodemic’, kaba baroh ngi ïakynduh mynta kum ka imlang sahlang. U la ong, “Ai ba ka jinglong thikna kan kham kongsan ban ïa ka jingsted ha ki lad pathai khubor bad ki digital media kiba pyniaid da ki AI algorithm”. Ha kane ka jingïalang la wan iashim bynta da u Myntri ka Tnad Information & Broadcasting, ka Tnad rel, bad ka Tnad Electronics & Information Technology, u Ashwini Vaishnaw. U Myntri Khynnah ka sorkar pdeng ba dei peit ia ka Tnad Information & broadcasting bad ka Parliamentary Affairs u Dr. L. Murugan, Secretary ka Tnad Information & Broadcasting, Sanjay Jaju bad ka Secretary ka PCI, Shubha Gupta ki la iadon lang ha kane ka sngi.

Kyntu ka PCI ban don ka jingbahkhlieh ha ka kam pathai khubor

Ka Justice Ranjana Prakash Desai ka la kren shaphang ki ar tylli ki jingkitkhlieh jong ka PCI ban iada ia ka jinglaitluid jong ki nongthoh khubor bad ban pynneh ia ki kyrdan ba ha khlieh duh jong ka jingbeit ka kam thoh khubor. Ka la ong ba ka kam thoh khubor ka donkam ia ka jinglong hok, ka jinglong kaba thikna, bad ka jingaiti ban iasam ia ki jingtip kiba dei, khamtam mynta haba ki jingtip kiba ialam bakla bad ka jingpyndonkam bakla ia ka teknoloji ki nang kiew.

Ka la ong ba ka PCI ka la thaw ia ki komiti bad ki kynhun wad bniah ia ki jingshisha bad ka la pynkynmaw ia ki nongthoh khubor ban trei da ka jingkitkhlieh bad ban pynshisha ia kawei pa kawei ka jingjia. Ka la ban jur ruh ïa ka jingdonkam jong ka jingïada ha kaba iadei bad ka pisa na ka bynta ki nongthoh khubor lyngba ki skhim jingïarap bad ka insurance, bad ka la ong ba ki prokram ai jinghikai jong ka PCI ki ïarap ïa ki nongthoh khubor samla ban nang ïa ki rukom treikam kiba don jingbahkhlieh.

Ka la bynrap ba watla ka AI ka lah ban long kaba myntoi, hynrei ka PCI ka dang peitngor ban iada na ka jingpyndonkam bakla ia ka. Ka la ban jur ba wat la kine ki tiar ki lah ban long kiba la nang la stad katno katno ruh, kim lah satia ban wan bujli ha ka jaka jong ka jingmut jingpyrkhat jong u briew– ka jingbishar bad ka jingdon jingbahkhlieh.

Ka jingbat ia ka jingshaniah ha ka juk AI

U Vijay Joshi, CEO ka PTI u la ong ba ki kot khubor ki dei ban bat ia ka jingbahkhlieh kaba khlain kum ki nongpynthikna ia ka jingbahkhlieh ha ka synshar paidbah. U la maham ba ki khubor ba ai jingsiew, ki jingpynbna bad ki khubor pynshongshit ki la ktah ia ka jingshaniah jong ki paidbah. Ka jingpynthut ki kam digital mynta ka kheinkor eh ia ka jingiadei ban ia ka jinglong thikna, kaba pynmih ia ki jingtip kiba noh shiliang bad kiba set ia ka jingshisha. Ka khlam ka la pyni haduh katno ka jingshisha bad ki jingtip kiba ialam bakla ki lah ban ïakhleh lang, ka jingma kaba la pynsniew shuh shuh da ka AI mynta.

U la pynpaw ruh ba ki nongthoh khubor ki dei ban shim ïa ka jingkitkhlieh lang ban pynthikna ïa ka jingshisha kaba lah ban pynshisha. U la pynpaw ia kakam jong ka PTI na ka bynta ka jingshisha, ka jinglong thikna, ka jinglong hok bad ka jinglaitluid naduh ba la seng ia ka da ki 99 tylli ki kot khubor. U la ban jur ba ka jinglong thikna ka dei ban long beit kaba kham kongsan ban ia ka jingsted bad ba ki khubor ki dei ban long kiba lait na kano kano ka jingthmu.

Ki sienjam kum ka Fact Check ki iarap ban ialeh pyrshah ia ka jingsaphriang jong ki jingtip kiba ialam bakla da ki lad pynshisha kiba bun. U la ong ba khnang ban iada ia ka jingshaniah ka long kaba donkam ban hikai ia ki nongthoh khubor shaphang ka jingbahkhlieh bad ka jingpyrkhat kaba jylliew. U Joshi u la pynkynmaw ba ka jinglaitluid jong ki nongthoh khubor kam dei ka hok ban pynsniew ia ki lad ai jingtip bad ba ka kam thoh khubor ka dei ka jingshakri paidbah kaba la tei halor ka jingshaniah.

Shaphang ka Press Council of India

Ia ka Press Council of India la seng da ka Act of Parliament kum ka bor quasi-judicial ha u 1966 (ba la pynskhem biang ha u 1979), da ka jingthmu ban don ia ka rukom pyniaid dalade hapoh jong ka kot khubor ban pynthikna ia ka jingai khubor kaba laitluid bad kaba don jingkitkhlieh. Naduh kata ka por, ka Press Council ka ialeh beit ban iada bad pynneh ia ka jinglaitluid jong ki kot khubor bad ban kyntiew ia ka kyrdan jong ki kot khubor bad ki tnat pathai khubor ha ka ri, bad ka la don ruh ia ka bynta kaba khraw kum ka kynhun ai jingmut ia ki iing dorbar thawain bad kiwei kiwei ki bor synshar.

**********