ଛତିଶଗଡ଼ର ରାଜ୍ୟପାଳ ରମଣ ଡେକା ଜୀ, ଲୋକସଭା ବାଚସ୍ପତି ଓମ ବିର୍ଲା ଜୀ, ଛତିଶଗଡ଼ ବିଧାନସଭାର ଅଧ୍ୟକ୍ଷ ମୋର ବନ୍ଧୁ ରମଣ ସିଂହ ଜୀ, ରାଜ୍ୟର ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଇ ଜୀ, କେନ୍ଦ୍ର ସରକାରରେ ଥିବା ମୋର ସହଯୋଗୀ ମନ୍ତ୍ରୀ ତୋଖନ ସାହୁ ଜୀ, ଉପମୁଖ୍ୟମନ୍ତ୍ରୀ ବିଜୟ ଶର୍ମା ଜୀ, ଅରୁଣ ସାୱ ଜୀ, ରାଜ୍ୟ ବିଧାନସଭାରେ ବିରୋଧୀ ଦଳ ନେତା ଚରଣ ଦାସ ମହନ୍ତ ଜୀ, ଉପସ୍ଥିତ ଅନ୍ୟ ମନ୍ତ୍ରୀଗଣ, ଜନ ପ୍ରତିନିଧିଗଣ ଏବଂ ଏଠାରେ ଥିବା ମହିଳା ଏବଂ ଭଦ୍ରବ୍ୟକ୍ତିଗଣ !
ଛତିଶଗଡ଼ର ବିକାଶ ଯାତ୍ରା ପାଇଁ, ଆଜିର ଦିନଟି ଏକ ସୁବର୍ଣ୍ଣ ଆରମ୍ଭର ଦିନ । ଏବଂ ବ୍ୟକ୍ତିଗତ ଭାବେ ମୋ ପାଇଁ ଏହା  ଅତ୍ୟନ୍ତ ଖୁସିର ଦିନ,  ଗୁରୁତ୍ୱପୂର୍ଣ୍ଣ ଦିନ। ଗତ କେତେ ଦଶନ୍ଧି ଧରି ଏହି ଭୂମି ସହିତ ମୋର ଘନିଷ୍ଠ ସମ୍ପର୍କ ରହିଛି। ଜଣେ କର୍ମୀ ଭାବେ ମୁଁ ଛତିଶଗଡ଼ରେ ବହୁତ ସମୟ ବିତାଇଥିଲି, ଯେଉଁଠାରୁ ମୋତେ ବହୁତ କିଛି ଶିଖିବାକୁ ମିଳିଥିଲା। ମୋ ଜୀବନକୁ ଗଢିବାରେ ଏଠାକାର ଲୋକମାନଙ୍କର ଅବଦାନ, ଏଠିକାର ମାଟି ଏକ ବଡ଼ ଆଶୀର୍ବାଦ ହୋଇ ରହିଛି। ଛତିଶଗଡ଼ର ଦୂରଦୃଷ୍ଟି, ଏହାକୁ ନିର୍ମାଣ କରିବାର ସଂକଳ୍ପ ଏବଂ ତା’ପରେ ସେହି ସଂକଳ୍ପର ସିଦ୍ଧି, ପ୍ରତି ମୁହୂର୍ତ୍ତରେ ମୁଁ ଛତିଶଗଡ଼ର ପରିବର୍ତ୍ତନର ସାକ୍ଷୀ ରହିଆସିଛି। ଏବଂ ଆଜି ଯେତେବେଳେ ଛତିଶଗଡ଼ ନିଜର 25 ବର୍ଷର ଯାତ୍ରାରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ହାସଲ କରିଛି, ମୋତେ ମଧ୍ୟ ଏହି ମୁହୂର୍ତ୍ତର ଅଂଶ ହେବାର ସୁଯୋଗ ମିଳିଛି। ଆଜି ଏହି ରୌପ୍ୟ ଜୟନ୍ତୀ ସମାରୋହରେ, ଏହି ନୂତନ ବିଧାନସଭାକୁ ରାଜ୍ୟବାସୀଙ୍କୁ ଉତ୍ସର୍ଗ କରିବାର ସୌଭାଗ୍ୟ ମୋତେ ମିଳିଛି। ଏହି ଅବସରରେ ମୁଁ ଛତିଶଗଡ଼ର ଜନସାଧାରଣ ଏବଂ ରାଜ୍ୟ ସରକାରଙ୍କୁ ଶୁଭକାମନା ଜଣାଉଛି, ଶୁଭେଚ୍ଛା ଜଣାଉଛି।
ବନ୍ଧୁଗଣ,
 2025ର ଏହି ବର୍ଷ ଭାରତୀୟ ଗଣତନ୍ତ୍ରର ଅମୃତ ବର୍ଷ ମଧ୍ୟ ଅଟେ। 75 ବର୍ଷ ପୂର୍ବେ ଭାରତ ନିଜର ସମ୍ବିଧାନକୁ ଦେଶବାସୀଙ୍କୁ ସମର୍ପିତ କରିଥିଲା। ଏଭଳି ସ୍ଥିତିରେ, ଆଜି ଏହି ଐତିହାସିକ ଅବସରରେ ମୁଁ ଏହି  ଅଞ୍ଚଳରୁ ସମ୍ବିଧାନ ସଭାର ସଦସ୍ୟ ଥିବା ରବିଶଙ୍କର ଶୁକ୍ଳା ଜୀ, ବାରିଷ୍ଟର ଠାକୁର ଛେଦିଲାଲ ଜୀ, ଘନଶ୍ୟାମ ସିଂହ ଗୁପ୍ତା ଜୀ, କିଶୋରୀ ମୋହନ ତ୍ରିପାଠୀ ଜୀ, ରାମପ୍ରସାଦ ପୋଟାଇ ଜୀ ଏବଂ ରଘୁରାଜ ସିଂହ ଜୀଙ୍କ ଭଳି ମହାତ୍ମାଙ୍କୁ ସ୍ମରଣ କରି ଶ୍ରଦ୍ଧାଞ୍ଜଳି ଅର୍ପଣ କରୁଛି । ଏହି ଅତ୍ୟନ୍ତ ପଛୁଆ ଅଞ୍ଚଳରୁ ଦିଲ୍ଲୀରେ ପହଞ୍ଚିଥିବା ଏହି ବ୍ୟକ୍ତିତ୍ୱମାନେ ବାବାସାହେବଙ୍କ ନେତୃତ୍ୱରେ ସମ୍ବିଧାନ ଗଠନରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।
ବନ୍ଧୁଗଣ,
 ଆଜିର ଦିନ ଛତିଶଗଡ଼ର ଇତିହାସରେ ଏକ ସୁବର୍ଣ୍ଣ ଅଧ୍ୟାୟ ଭାବେ ଉଜ୍ଜ୍ୱଳ ହେଉଛି। ଆଜି ଯେତେବେଳେ ଆମେ ଏହି ଭବ୍ୟ ଏବଂ ଆଧୁନିକ ବିଧାନସଭା ଭବନକୁ ଲୋକାର୍ପଣ କରୁଛୁ, ଏହା କେବଳ ଏକ ଅଟ୍ଟାଳିକାର ଉତ୍ସବ ନୁହେଁ, ବରଂ 25 ବର୍ଷର ଜନ ଆକାଂକ୍ଷା, ଜନ ସଂଘର୍ଷ ଏବଂ ଜନ ଗୌରବର ଉତ୍ସବରେ  ଆଜି ପରିଣତ ହୋଇଛି । ଆଜି ଛତିଶଗଡ଼ ନିଜ ସ୍ୱପ୍ନର ନୂତନ ଶିଖରରେ ଛିଡ଼ା ହୋଇଛି। ଏବଂ ଏହି ଗୌରବମୟ ମୁହୂର୍ତ୍ତରେ, ମୁଁ ସେହି ମହାନ ବ୍ୟକ୍ତିମାନଙ୍କୁ ପ୍ରଣାମ କରୁଛି, ଯାହାଙ୍କ ଦୂରଦୃଷ୍ଟି ଏବଂ କରୁଣା ଏହି ରାଜ୍ୟର ମୂଳଦୁଆ ପକାଇଥିଲା। ସେ ଜଣେ ମହାନ ବ୍ୟକ୍ତି-ଭାରତରତ୍ନ ଶ୍ରଦ୍ଧେୟ ଅଟଳ ବିହାରୀ ବାଜପେୟୀ ଜୀ।
ବନ୍ଧୁଗଣ, 
2000 ମସିହାରେ ଯେତେବେଳେ ଅଟଳ ଜୀ ଛତିଶଗଡ଼ ରାଜ୍ୟ ଗଠନ କରିଥିଲେ, ସେହି ନିଷ୍ପତ୍ତି କେବଳ ପ୍ରଶାସନିକ ନ ଥିଲା। ସେହି ନିଷ୍ପତ୍ତି ଥିଲା ବିକାଶର ଏକ ନୂତନ ପଥ ଖୋଲିବା, ଏବଂ ସେହି ନିଷ୍ପତ୍ତି ଥିଲା ଛତିଶଗଡ଼ର ଆତ୍ମାକୁ ପରିଚୟ ଦେବା। ତେଣୁ, ଆଜି ଯେତେବେଳେ ଏହି ବିଶାଳ ବିଧାଳସଭାରେ ଅଟଳଜୀଙ୍କ ପ୍ରତିମୂର୍ତ୍ତି ଉନ୍ମୋଚନ ହୋଇଛି, ସେତେବେଳେ ମନ କହୁଛି, ମୋର ଭାବନା ପ୍ରକାଶ ପାଉଛି, ଅଟଳଜୀ ଯେଉଁଠି ଥାଆନ୍ତୁ ନା କାହିଁକି-ଅଟଳଜୀ, ଦେଖନ୍ତୁ, ଆପଣଙ୍କ ସ୍ୱପ୍ନ ସାକାର ହେଉଛି। ଆପଣ ଗଢିଥିବା ଛତିଶଗଡ଼, ତାହା ଆଜି ଆତ୍ମବିଶ୍ୱାସରେ ପରିପୂର୍ଣ୍ଣ ହୋଇଛି,  ବିକାଶର ନୂତନ ଶିଖରକୁ ଛୁଇଁପାରିଛି ।
ବନ୍ଧୁଗଣ, 
ଛତିଶଗଡ଼ ବିଧାନସଭାର ଇତିହାସ ନିଜ ଭିତରେ ଏକ ପ୍ରେରଣା। 2000 ମସିହାରେ ଯେତେବେଳେ ଏହି ସୁନ୍ଦର ରାଜ୍ୟ ପ୍ରତିଷ୍ଠା ହୋଇଥିଲା, ରାୟପୁରର ରାଜକୁମାର କଲେଜର ଜଶପୁର ହଲରେ ପ୍ରଥମ ବିଧାନସଭା ବୈଠକ ହୋଇଥିଲା।  ଏହା ସୀମିତ ସମ୍ବଳ କିନ୍ତୁ ଅସୀମ ସ୍ୱପ୍ନ ଥିଲା। ସେତେବେଳେ କେବଳ ଏକ ଭାବନା ଥିଲା ଯେ ଆମେ ଆମର ଭାଗ୍ୟକୁ ଆହୁରି ଶୀଘ୍ର ଉଜ୍ଜ୍ୱଳ କରିବୁ। ପରେ ଯେଉଁ ବିଧାନସଭା ଭବନ ନିର୍ମାଣ ହୋଇଥିଲା, ତାହା ମଧ୍ୟ ପୂର୍ବରୁ ଅନ୍ୟ ଏକ ବିଭାଗର ପରିସର ଥିଲା। ସେଠାରୁ ଛତିଶଗଡ଼ରେ ଗଣତନ୍ତ୍ରର ଯାତ୍ରା ନୂତନ ଶକ୍ତି ସହିତ ଆରମ୍ଭ ହୋଇଥିଲା। ଏବଂ ଆଜି, 25 ବର୍ଷ ପରେ, ସେହି ଗଣତନ୍ତ୍ର, ସେହି ଲୋକମାନେ, ଏକ ଆଧୁନିକ, ଡିଜିଟାଲ ଏବଂ ଆତ୍ମନିର୍ଭର ବିଧାନସଭା ଭବନ ନିର୍ମାଣର ଉଦଘାଟନ କରାଯାଉଛି।
ବନ୍ଧୁଗଣ, 
ଏହି ଭବନ ଗଣତନ୍ତ୍ରର ତୀର୍ଥସ୍ଥଳ। ଏହାର ପ୍ରତ୍ୟେକ ସ୍ତମ୍ଭ ସ୍ୱଚ୍ଛତାର ପ୍ରତୀକ। ଏହାର ପ୍ରତ୍ୟେକ କରିଡର ଉତ୍ତରଦାୟିତ୍ୱର ଏକ ସ୍ମାରକୀ ଅଟେ । ଏବଂ ଏହାର ପ୍ରତ୍ୟେକ କୋଠରୀ ହେଉଛି ଲୋକଙ୍କ ସ୍ୱରର ପ୍ରତିଫଳନ। ଏଠାରେ ନିଆଯାଇଥିବା ନିଷ୍ପତ୍ତି ଆଗାମୀ ଦଶନ୍ଧି ପାଇଁ ଛତିଶଗଡ଼ର ଭାଗ୍ୟ ନିର୍ଦ୍ଧାରଣ କରିବ। ଏବଂ ଏଠାରେ କୁହାଯାଇଥିବା ପ୍ରତ୍ୟେକ ଶବ୍ଦ ଛତିଶଗଡ଼ର ଅତୀତ, ଏହାର ବର୍ତ୍ତମାନ ଏବଂ ଏହାର ଭବିଷ୍ୟତର ଏକ ଗୁରୁତ୍ୱପୂର୍ଣ୍ଣ ଅଂଶ ହେବ। ମୋର ବିଶ୍ୱାସ ଯେ ଏହି ଭବନ ଆଗାମୀ ଦଶନ୍ଧି ପର୍ଯ୍ୟନ୍ତ ଛତିଶଗଡ଼ର ନୀତି, ଭାଗ୍ୟ ଏବଂ ନୀତି ନିର୍ଦ୍ଧାରକଙ୍କ କେନ୍ଦ୍ର ହେବ।
ବନ୍ଧୁଗଣ,
ଆଜି ସମଗ୍ର ଦେଶ ଐତିହ୍ୟ ଏବଂ ବିକାଶ ସହିତ ଆଗକୁ ବଢ଼ୁଛି। ଆଉ ଏହି ଭାବନା, ସରକାରଙ୍କ ପ୍ରତ୍ୟେକ ନୀତିରେ, ପ୍ରତ୍ୟେକ ନିଷ୍ପତ୍ତିରେ ମଧ୍ୟ ଦେଖିବାକୁ ମିଳିଥାଏ। ଆଜି ଆମର ପବିତ୍ର ସଂସଦକୁ , ଆମର ପବିତ୍ର ସେଙ୍ଗୋଲ ପ୍ରେରଣା ଦେଉଛି। ନୂତନ ସଂସଦର ନୂତନ ଗ୍ୟାଲେରୀ ସମଗ୍ର ବିଶ୍ୱକୁ ଭାରତର ଗଣତନ୍ତ୍ରର ପ୍ରାଚୀନତା ସହିତ ଯୋଡ଼ିଥାଏ। ସଂସଦ ପରିସରରେ ଥିବା ପ୍ରତିମାଗୁଡ଼ିକ ସମଗ୍ର ବିଶ୍ୱକୁ ଜଣାଉଛି ଯେ ଭାରତରେ ଗଣତନ୍ତ୍ରର ମୂଳ କେତେ ଗଭୀର।
ବନ୍ଧୁଗଣ, 
ମୋତେ ଖୁସି ଲାଗୁଛି ଯେ, ଭାରତର ଏହି ଚିନ୍ତାଧାରା ଏବଂ ଭାବନା ଛତିଶଗଡ଼ର ଏହି ନୂତନ ବିଧାନସଭାରେ ମଧ୍ୟ ପ୍ରତିଫଳିତ ହେଉଛି। 
ବନ୍ଧୁଗଣ,
ଛତିଶଗଡ଼ର ନୂତନ ବିଧାନସଭା ପରିସର ରାଜ୍ୟର ସମୃଦ୍ଧ ସଂସ୍କୃତିର ପ୍ରତିଫଳନ। ଏହି ବିଧାନସଭାର ପ୍ରତ୍ୟେକ କୋଣ-ଅନୁକୋଣରେ ଛତିଶଗଡ଼ ମାଟିରେ ଜନ୍ମିତ ଆମର ମହାନ ବ୍ୟକ୍ତିମାନଙ୍କର ପ୍ରେରଣା ରହିଛି। ବଞ୍ଚିତମାନଙ୍କୁ ପ୍ରାଥମିକତା, 'ସବକା ସାଥ, ସବକା ବିକାଶ’, ଏହା ହେଉଛି ବିଜେପି ସରକାରଙ୍କ ସୁଶାସନର ପରିଚୟ, ଏହା ହେଉଛି ଦେଶର ସମ୍ବିଧାନର ଭାବନା, ଏହା ହେଉଛି ଆମର ମହାପୁରୁଷମାନଙ୍କୁ, ଆମର ମହର୍ଷିଙ୍କୁ,  ଆମର ବିଦ୍ଵାନମାନଙ୍କ ଦ୍ୱାରା ଦିଆଯାଇଥିବା ସଂସ୍କାର।
ବନ୍ଧୁଗଣ, 
ଯେତେବେଳେ ମୁଁ ଏହି ଭବନକୁ ଦେଖୁଥିଲି, ସେତେବେଳେ ମୋତେ ବସ୍ତର କଳାର ସୁନ୍ଦର ଝଲକ ଦେଖିବାକୁ ମିଳିଲା । ମୋର ମନେ ଅଛି, ମୁଁ କିଛି ମାସ ପୂର୍ବରୁ ଥାଇଲାଣ୍ଡର ପ୍ରଧାନମନ୍ତ୍ରୀଙ୍କୁ ଏହି ବସ୍ତର କଳା ପ୍ରଦାନ କରିଥିଲି, ବସ୍ତରର ଏହି କଳା ଆମର ସୃଜନଶୀଳତା ଏବଂ ସାଂସ୍କୃତିକ ଶକ୍ତିର ପ୍ରତୀକ। 
ବନ୍ଧୁଗଣ,
ଏହି ଭବନର କାନ୍ଥରେ ବାବା ଗୁରୁ ଘାସୀଦାସ ଜୀଙ୍କ ମନକୁ ଛ ଛୁଇଁବା ଭଳି ସମ୍ମାନର ବାର୍ତ୍ତା ରହିଛି, ଯାହା ଆମକୁ 'ସବକା ସାଥ, ସବକା ବିକାଶ, ସବକା ସମ୍ମାନ’ ଶିକ୍ଷା ଦେଇଥାଏ। ଏଠାକାର ପ୍ରତ୍ୟେକ ଫାଟକରେ ମାତା ଶବରୀଙ୍କ ଦ୍ୱାରା ଶିଖାଯାଇଥିବା ଆତ୍ମୀୟତା ରହିଛି, ଯାହା ଆମକୁ ପ୍ରତ୍ୟେକ ଅତିଥି, ପ୍ରତ୍ୟେକ ନାଗରିକଙ୍କୁ ଭବ୍ୟ ସ୍ୱାଗତ କରିବାକୁ କହିଥାଏ। ଏହି ଗୃହର ପ୍ରତ୍ୟେକ ଚୌକିରେ ସନ୍ଥ କବୀରଙ୍କ ଦ୍ୱାରା ଶିକ୍ଷା ଦିଆଯାଇଥିବା ସତ୍ୟ ଏବଂ ନିର୍ଭୀକତାର ଭାବନା ରହିଛି। ଏବଂ ଏଠାକାର ଭିତ୍ତିପ୍ରସ୍ତରରେ, ମହାପ୍ରଭୁ ବଲ୍ଲଭଚାର୍ଯ୍ୟ ଜୀ କହିଥିଲେ-'ମାନବ ସେବା’ ହେଉଛି ନାରାୟଣ ସେବାର ସଂକଳ୍ପ। 
ବନ୍ଧୁଗଣ, 
ଭାରତ ହେଉଛି ଗଣତନ୍ତ୍ରର ଜନନୀ, ଆମର ଆଦିବାସୀ ସମାଜ ପିଢ଼ି ପିଢ଼ି ଧରି ଗଣତାନ୍ତ୍ରିକ ପରମ୍ପରାକୁ ପାଳନ କରିଆସୁଛି। ମୁରିଆ ଦରବାର-ବସ୍ତରର 'ଆଦିମ ସଂସଦ' ଏହାର ଏକ ଜୀବନ୍ତ ଉଦାହରଣ। ତାହା ଥିଲା ଆଦିମ ସଂସଦ, ବର୍ଷ ବର୍ଷ ଧରି, ଆମେ ସମାଜ ଏବଂ ଶାସନକୁ ଏକାଠି କରି ରଖିଛୁ, ସମସ୍ୟାର ସମାଧାନ କରିଛୁ। ଏବଂ ମୁଁ ଖୁସି ଯେ ମୁରିଆ ଦରବାରର ପରମ୍ପରାକୁ ଏହି ବିଧାନସଭାରେ ମଧ୍ୟ ସ୍ଥାନ ମିଳିଛି। 
ବନ୍ଧୁଗଣ, 
ଗୋଟିଏ ପଟେ ଏହି ଗୃହର କୋଣ ଅନୁକୋଣରେ ଆମ ମହାପୁରୁଷମାନଙ୍କ ଆଦର୍ଶ ରହିଛି, ଏବଂ ସେହି ଚୌକିରେ ରମଣ ସିଂହ ଜୀଙ୍କ ଭଳି ଅଭିଜ୍ଞ ନେତୃତ୍ୱ ମଧ୍ୟ ଅଛନ୍ତି। ଜଣେ କର୍ମୀ କିପରି ନିଜର କଠିନ ପରିଶ୍ରମ ଏବଂ ସମର୍ପଣ ଦ୍ୱାରା ଗଣତାନ୍ତ୍ରିକ ବ୍ୟବସ୍ଥାକୁ ସୁଦୃଢ଼ କରିପାରିବେ, ଏହାର ଏକ ଉତ୍ତମ ଉଦାହରଣ ହେଉଛନ୍ତି ରମଣ ଜୀ। 
ବନ୍ଧୁଗଣ, 
କ୍ରିକେଟରେ ଆମେ ଦେଖୁଛୁ ଯେ ଯିଏ ଅଧିନାୟକ ହୁଅନ୍ତୁ, ସେ ବେଳେବେଳେ ଦଳରେ ଜଣେ ଖେଳାଳି ଭାବେ ଖେଳନ୍ତି, କିନ୍ତୁ ରାଜନୀତିରେ ଏହା ଦେଖିବାକୁ ମିଳୁନାହିଁ, ଏହି ଉଦାହରଣ ରମଣ ସିଂହ ଜୀ ଦେଇପାରିବେ, ଯେ, ଯେଉଁମାନେ ଏକଦା ଅଧିନାୟକ ଥିଲେ, ସେମାନେ ଆଜି ପ୍ରକୃତ ଭାବନାରେ ଛତିଶଗଡ଼ର ସେବା ପ୍ରତି ସମର୍ପିତ, ପ୍ରତ୍ୟେକ କର୍ମୀଙ୍କ ପାଇଁ ପ୍ରେରଣା ଭାବେ କାର୍ଯ୍ୟ କରୁଛନ୍ତି। 
ବନ୍ଧୁଗଣ, 
ରାଷ୍ଟ୍ରକବି ନିରାଲା ଜୀ ତାଙ୍କ କବିତାରେ ମା’ ସରସ୍ୱତୀଙ୍କୁ ପ୍ରାର୍ଥନା କରିଥିଲେ-ପ୍ରିୟ ସ୍ୱତନ୍ତ୍ର-ରାୱ, ଅମୃତ-ମନ୍ତ୍ର ନୂତନ ଭାରତରେ ଭରି ଦେଉ, ଏହା କେବଳ କବିତା ନୁହେଁ, ଏହା ସ୍ୱାଧୀନ ଭାରତର ପୁନର୍ଜନ୍ମର ମନ୍ତ୍ର ଥିଲା। ସେ ନବ ଗତି, ନବ ଲୟ, ନବ ସ୍ୱର, ଅର୍ଥାତ୍ ଏକ ଏମିତି ଭାରତର କଥା କହିଥିଲେ, ଯାହା ପରମ୍ପରା ଦ୍ୱାରା ଆବଦ୍ଧ, କିନ୍ତୁ ଆତ୍ମବିଶ୍ୱାସର ସହ ଭବିଷ୍ୟତ ଆଡ଼କୁ ଅଗ୍ରସର ହେଉଛି। ଆଜି ଯେତେବେଳେ ଆମେ ଛତିଶଗଡ଼ର ନୂତନ ବିଧାନସଭାରେ ଛିଡ଼ା ହୋଇଛୁ, ଏହି ଭାବନା ଏଠାରେ ମଧ୍ୟ ସେତିକି ଅର୍ଥପୂର୍ଣ୍ଣ। ଏହି ଭବନ ମଧ୍ୟ ସେହି 'ନୂଆ ସ୍ୱର’ର ପ୍ରତୀକ, ଯେଉଁଠି ପୁରୁଣା ଅନୁଭୂତିର ସ୍ୱର, ନୂଆ ସ୍ୱପ୍ନର ଶକ୍ତି ମଧ୍ୟ ରହିଛି। ଏବଂ ଏହି ଶକ୍ତି ଦ୍ୱାରା ଆମକୁ ଏକ ଏପରି ଭାରତ ନିର୍ମାଣ କରିବାକୁ ହେବ, ଯାହା ଛତିଶଗଡ଼ର ମୂଳଦୁଆ, ଯାହା ଐତିହ୍ୟ ସହିତ ଯୋଡ଼ି ହୋଇ ବିକାଶ ପଥରେ ଆଗକୁ ବଢ଼ିପାରିବ।
ବନ୍ଧୁଗଣ,
ନାଗରିକ ଦେବୋ ଭବଃ, ଏହା ହେଉଛି ଆମର ସୁଶାସନର ମନ୍ତ୍ର। ଆଉ ସେଥିପାଇଁ, ବିଧାନସଭାର ପ୍ରତ୍ୟେକ ନିଷ୍ପତ୍ତିରେ ଜନସାଧାରଣଙ୍କ ସ୍ୱାର୍ଥକୁ ଧ୍ୟାନରେ ରଖି ଆମକୁ କାମ କରିବାକୁ ପଡ଼ିବ। ଏଠାରେ ଏପରି ଆଇନ ରହିବା ଉଚିତ ଯାହା ସଂସ୍କାରକୁ ତ୍ୱରାନ୍ୱିତ କରିବ, ଲୋକଙ୍କ ଜୀବନକୁ ସହଜ କରିବ ଓ ଲୋକଙ୍କ ଜୀବନରେ ସରକାରଙ୍କ ଅନାବଶ୍ୟକ ହସ୍ତକ୍ଷେପକୁ ବାଦ ଦେବ। ସରକାରଙ୍କ ଅନୁପସ୍ଥିତି କିମ୍ବା ଅଯଥା ପ୍ରଭାବ ଦ୍ରୁତ ପ୍ରଗତିର ଏକମାତ୍ର ମନ୍ତ୍ର ନୁହେଁ। 
ବନ୍ଧୁଗଣ, 
ଏହା ହେଉଛି ଆମର ଛତିଶଗଡ଼, ଭଗବାନ ଶ୍ରୀ ରାମଙ୍କ ଆଈଙ୍କ ଘର । ଭଗବାନ ଶ୍ରୀରାମ ଏହି ଭୂମିର ଭଣଜା ଅଟନ୍ତି । ଆଜି ଏହି ନୂତନ ପରିସରରେ ଶ୍ରୀ ରାମଙ୍କ ଆଦର୍ଶକୁ ସ୍ମରଣ କରିବା ପାଇଁ ଆଜିଠାରୁ  ଭଲ ଦିନ  କ’ଣ ହୋଇପାରେ। ଭଗବାନ ରାମଙ୍କ ଆଦର୍ଶ ଆମକୁ ସୁଶାସନର ଶିକ୍ଷା ଦେଇଥାଏ। 
ବନ୍ଧୁଗଣ, 
ଅଯୋଧ୍ୟାରେ ରାମ ମନ୍ଦିରର ଅଭିଷେକ ସମୟରେ, ଆମେ ସମସ୍ତେ 'ଦେବରୁ ଦେଶ’ ଏବଂ' ରାମରୁ “ରାଷ୍ଟ୍ର" ର ଶପଥ ନେଇଥିଲୁ। ଆମକୁ ମନେ ରଖିବାକୁ ହେବ, ରାମଙ୍କ ଠାରୁ ରାଷ୍ଟ୍ରର ଅର୍ଥ ହେଉଛି-ରାମରାଜ୍ୟ ବସିଥିବା ତ୍ରିଲୋକ। ସମସ୍ତେ ଭୋକିଲା ଥିଲେ। ଏହାର ଅର୍ଥ ହେଉଛି ସୁଶାସନ ଏବଂ ଜନକଲ୍ୟାଣର ଶାସନ! ଏହାର ଅର୍ଥ ହେଉଛି, 'ସବକା ସାଥ୍, ସବକା ବିକାଶ’ ର ଭାବନା ସହିତ ଶାସନ! ରାମଙ୍କ ଠାରୁ ରାଷ୍ଟ୍ରର ଅର୍ଥ ହେଉଛି, ନା କେହି ଦରିଦ୍ର, ନା ଦିନ ଦୁଃଖି। ଯେଉଁଠି କେହି ଗରିବ ନୁହନ୍ତି, କେହି ଦୁଃଖି ନୁହନ୍ତି, ଯେଉଁଠି ଭାରତ ଦାରିଦ୍ର୍ୟରୁ ମୁକ୍ତ ହୋଇ ଆଗକୁ ବଢ଼ୁଛି, ରାମଙ୍କ ଠାରୁ ରାଷ୍ଟ୍ରର ଅର୍ଥ ହେଉଛି- ରୋଗରେ ଅକାଳ  ମୃତ୍ୟୁ ବରଣ କରନ୍ତୁ ନାହିଁ, ଅର୍ଥାତ୍ ଏକ ସୁସ୍ଥ ଏବଂ ସୁଖୀ ଭାରତ ଗଠନ କରନ୍ତୁ। ଅର୍ଥାତ୍, ଆମ ସମାଜ ଉଚ୍ଚ ଏବଂ ନିମ୍ନ ଭାବନାରୁ ମୁକ୍ତ ହେବା ଉଚିତ ଏବଂ ପ୍ରତ୍ୟେକ ସମାଜରେ ସାମାଜିକ ନ୍ୟାୟ ପ୍ରତିଷ୍ଠା ହେବା ଉଚିତ।
ବନ୍ଧୁଗଣ, 
ରାମଙ୍କ ଦ୍ୱାରା ରାଷ୍ଟ୍ରର ଏକ ଅର୍ଥ ଏହା ରହିଛି, "ନିସିଚର ହିନ୍ କରଉଁ ମାହି ଭୁଜ୍ ଉଠାଇ ପନ୍ କିହ୍ନ"। ଅର୍ଥାତ, ମାନବତା ବିରୋଧୀ ଶକ୍ତିଗୁଡ଼ିକର, ଆତଙ୍କବାଦ ବିନାଶର ପ୍ରତିଜ୍ଞା ! ଏବଂ ତାହା ହିଁ ଆମେ ଅପରେସନ ସିନ୍ଦୁରରେ ଦେଖିଛୁ। ଆତଙ୍କବାଦକୁ ଧ୍ୱଂସ କରିବାର ଶପଥ ନେଇ ଭାରତ ଆତଙ୍କବାଦୀଙ୍କ ମେରୁଦଣ୍ଡ ଭାଙ୍ଗିଛି। ଆଜି ଭାରତ ମଧ୍ୟ ନକ୍ସଲ, ମାଓବାଦୀ ଆତଙ୍କବାଦର ଅନ୍ତ କରିବା ଦିଗରେ ଅଗ୍ରସର ହେଉଛି। ଭାରତ ଆଜି ଏକ ଅଭୂତପୂର୍ବ ବିଜୟର ଗୌରବରେ ପରିପୂର୍ଣ୍ଣ। ଏବଂ ଏହି ଗର୍ବର ଭାବନା ଆଜି ଛତିଶଗଡ଼ ବିଧାନସଭାର ଏହି ନୂତନ ପରିସରରେ ଆମ ଚାରିପାଖରେ ଅଛି। 
ବନ୍ଧୁଗଣ,
ଗତ ପଚିଶ ବର୍ଷ ମଧ୍ୟରେ ଛତିଶଗଡ଼ ଯେଉଁ ପରିବର୍ତ୍ତନ ଦେଖିଛି, ତାହା ଆଶ୍ଚର୍ଯ୍ୟଜନକ ଏବଂ ପ୍ରେରଣାଦାୟୀ। ଏହି ରାଜ୍ୟ ଏକଦା ନକ୍ସାଲବାଦ ଏବଂ ପଛୁଆ ବୋଲି ଚିହ୍ନଟ ହୋଇଥିଲା। ଆଜି ସେହି ରାଜ୍ୟ ସମୃଦ୍ଧି, ସୁରକ୍ଷା ଏବଂ ସ୍ଥିରତାର ପ୍ରତୀକ ପାଲଟିବାରେ ଲାଗିଛି। ଆଜି ଦେଶର କୋଣ ଅନୁକୋଣରେ ବସ୍ତର ଅଲିମ୍ପିକ୍ସର ଆଲୋଚନା ହେଉଛି। ଆଜି, ବିକାଶର ତରଙ୍ଗ ଏବଂ ଶାନ୍ତିର ହସ ନକ୍ସଲ ପ୍ରଭାବିତ ଅଞ୍ଚଳକୁ ଫେରିଛି। ଏବଂ ଏହି ପରିବର୍ତ୍ତନ ପଛରେ ଛତିଶଗଡ଼ର ଜନସାଧାରଣଙ୍କ କଠିନ ପରିଶ୍ରମ ଏବଂ ବିଜେପି ସରକାରଙ୍କର  ଦୂରଦୃଷ୍ଟି ସମ୍ପନ୍ନ ନେତୃତ୍ୱ ରହିଛି।
ବନ୍ଧୁଗଣ, 
ଛତିଶଗଡ଼ର ରୌପ୍ୟ ଜୟନ୍ତୀ ପାଳନ, ଏବେ ଏକ ବୃହତ୍ତର ଲକ୍ଷ୍ୟର ପ୍ରାରମ୍ଭିକ ବିନ୍ଦୁ ହେବାକୁ ଯାଉଛି। 2047 ମସିହା ସୁଦ୍ଧା, ଯେତେବେଳେ ଭାରତ ଏହାର ସ୍ୱାଧୀନତାର 100 ବର୍ଷ ପାଳନ କରିବ, ଏକ ବିକଶିତ ଭାରତ ପାଇଁ ଆମେ ଯେଉଁ ଲକ୍ଷ୍ୟ ସ୍ଥିର କରିଛୁ, ସେଥିରେ ଛତିଶଗଡ଼ର ଭୂମିକା ବହୁତ ବଡ଼ ହେବାକୁ ଯାଉଛି। ଆଉ ସେଥିପାଇଁ, ମୁଁ ଏଠାରେ ଉପସ୍ଥିତ ସମସ୍ତ ସହକର୍ମୀମାନଙ୍କୁ, ସମସ୍ତ ଜନ ପ୍ରତିନିଧିମାନଙ୍କୁ ମଧ୍ୟ ଅନୁରୋଧ କରିବି ଯେ ଆପଣମାନେ ଏପରି ଏକ ବ୍ୟବସ୍ଥା ସୃଷ୍ଟି କରନ୍ତୁ, ଏପରି ଏକ ସଭାର ଉଦାହରଣ ପ୍ରସ୍ତୁତ କରନ୍ତୁ, ଯାହା ବିକଶିତ ଭାରତର ପ୍ରତ୍ୟେକ ରାଜ୍ୟକୁ କିଛି ନୂଆ କରିବା ପାଇଁ ପ୍ରେରଣା ଯୋଗାଇବ।  ଏଠାରେ ପଚରାଯାଉଥିବା ପ୍ରଶ୍ନଗୁଡ଼ିକ ସଦନରେ ହେବାକୁ ଥିବା କାର୍ଯ୍ୟାନୁଷ୍ଠାନରେ, ସମସ୍ତଙ୍କ ମଧ୍ୟରେ ଉତ୍କର୍ଷତା ଆଣିବା ପାଇଁ ପ୍ରୟାସ ହେବା ଉଚିତ, ଏବଂ ଆମେ ଯାହା କିଛି କରିବା, ଯେକୌଣସି ରୂପରେ, ସମସ୍ତେ ଏକ ବିକଶିତ ଛତିଶଗଡ଼, ଏକ ବିକଶିତ ଭାରତ ଗଠନ କରିବା ପାଇଁ ଲକ୍ଷ୍ୟ ରଖିବା ଉଚିତ।
ବନ୍ଧୁଗଣ,
 ଛତିଶଗଡ଼ର ଏହି ନୂତନ ବିଧାନସଭାର ଶ୍ରେଷ୍ଠତା ଏହାର ଭବନର ଭବ୍ୟତା ଅପେକ୍ଷା ଏଠାରେ ନିଆଯାଇଥିବା ଜନକଲ୍ୟାଣର ନିଷ୍ପତ୍ତି ଦ୍ୱାରା ଅଧିକ ନିର୍ଦ୍ଧାରିତ ହେବ। ଛତିଶଗଡ଼ର ସ୍ୱପ୍ନ, ଏହାର ଚିନ୍ତାଧାରାକୁ ଏହି ଗୃହ କେତେ ଗଭୀର ଭାବେ ବୁଝିଛି ଏବଂ ସେଗୁଡ଼ିକୁ ବାସ୍ତବ ରୂପ ଦେବା ପାଇଁ କେତେ ଦୂର ପର୍ଯ୍ୟନ୍ତ ଯିବାକୁ ପଡିଥାଏ, ଏହା ଏହା ଉପରେ ନିର୍ଭର କରିବ। ଆମର ପ୍ରତ୍ୟେକ ନିଷ୍ପତ୍ତି ଏପରି ହେବା ଉଚିତ ଯାହା କୃଷକଙ୍କ କଠିନ ପରିଶ୍ରମକୁ ସମ୍ମାନ ଦେବ, ଯୁବକମାନଙ୍କ ସ୍ୱପ୍ନକୁ ଦିଗ ଦେବ, ନାରୀ ଶକ୍ତିର ଜୀବନରେ ଆଶାର ଏକ ନୂତନ କିରଣ ଆଣିବ, ଏବଂ ସମାଜରେ ଅନ୍ତ୍ୟୋଦୟର ଏକ ମାଧ୍ୟମ ହେବ। ଆମ ସମସ୍ତଙ୍କୁ ମନେ ରଖିବାକୁ ହେବ ଯେ ଏହି ବିଧାନସଭା କେବଳ ଆଇନ ତିଆରି କରିବାର ସ୍ଥାନ ନୁହେଁ, ବରଂ ଏହା ଛତିଶଗଡ଼ର ଭାଗ୍ୟର ଜୀବନ୍ତ କେନ୍ଦ୍ର। ସେଥିପାଇଁ ଆମ ସମସ୍ତଙ୍କୁ ଏହା ସୁନିଶ୍ଚିତ କରିବାକୁ ହେବ ଯେ ଏଠାରୁ ବାହାରିଥିବା ପ୍ରତ୍ୟେକ ବିଚାରରେ ଜନସେବାର ଭାବନା, ବିକାଶର ସଂକଳ୍ପ ଏବଂ ଭାରତକୁ ନୂତନ ଶିଖରକୁ ନେଇଯିବାର ଆତ୍ମବିଶ୍ୱାସ ରହିଛି। ଏହା ଆମର କାମନା। 
ବନ୍ଧୁଗଣ,
ଗଣତନ୍ତ୍ରରେ କର୍ତ୍ତବ୍ୟକୁ ସର୍ବାଗ୍ରେ ରଖିବା, ସାର୍ବଜନୀନ ଜୀବନରେ ଆମେ ସମସ୍ତେ ନିଜର ଭୂମିକା ନିର୍ବାହ କରିବା ଉଚିତ ବୋଲି ଶପଥ ନେବା, ଏହି ନୂତନ ବିଧାନସଭା ଭବନର ଉଦଘାଟନର ସବୁଠାରୁ ବଡ଼ ମହତ୍ୱ ହେବ। ଏହି ପରିସରରୁ, ଭାରତୀୟ ଗଣରାଜ୍ୟର ଏହି ଅମୃତ ବର୍ଷରେ, ଆମେ ସମସ୍ତେ ଜନସାଧାରଣଙ୍କ ସେବାକୁ ଆମ ଜୀବନର ଲକ୍ଷ୍ୟ କରିବା ପାଇଁ ସଂକଳ୍ପ ନେବା। ଗଣତନ୍ତ୍ରର ଏହି ସୁନ୍ଦର ନୂତନ ମନ୍ଦିରର ଉଦଘାଟନ ଅବସରରେ ମୁଁ ପୁଣିଥରେ ଆପଣ ସମସ୍ତଙ୍କୁ ଶୁଭେଚ୍ଛା ଓ ଅଭିନନ୍ଦନ ଜଣାଉଛି। ଏହି ସ୍ୱପ୍ନକୁ ସାକାର କରିଥିବାରୁ ମୁଁ ମୁଖ୍ୟମନ୍ତ୍ରୀଙ୍କୁ ଏବଂ ବିଶେଷ କରି ମୋର ବନ୍ଧୁ ରମଣ ସିଂହଙ୍କୁ ହୃଦୟରୁ ଅଭିନନ୍ଦନ ଜଣାଉଛି। ଜୟ ଭାରତ-ଜୟ ଛତିଶଗଡ଼। ବହୁତ-ବହୁତ ଧନ୍ୟବାଦ।
******
NS/SLP