ମହାମହିମ ପ୍ରଧାନମନ୍ତ୍ରୀ ଇଶିବା ଜୀ,

ଭାରତ ଏବଂ ଜାପାନର ବ୍ୟବସାୟ ମୁଖ୍ୟଗଣ,

ମହିଳା ଏବଂ ସଜ୍ଜନବୃନ୍ଦ,

ନମସ୍କାର।

କୋନିଚିୱା!

ମୁଁ ଆଜି ସକାଳେ ଟୋକିଓରେ ପହଞ୍ଚିଛି। ମୁଁ ବହୁତ ଖୁସି ଯେ ମୋର ଏହି ଯାତ୍ରା, ବ୍ୟବସାୟ ଜଗତର ମହାନ ବ୍ୟକ୍ତିମାନଙ୍କ ସହିତ ଆରମ୍ଭ ହେଉଛି।

ଅନେକ ଲୋକ ଅଛନ୍ତି ଯାହାଙ୍କ ସହିତ ମୁଁ ବ୍ୟକ୍ତିଗତ ଭାବେ ପରିଚିତ। ଯେତେବେଳେ ମୁଁ ଗୁଜରାଟରେ ଥିଲି, ଏବଂ ଯେତେବେଳେ ମୁଁ ଗୁଜରାଟରୁ ଦିଲ୍ଲୀ ଆସିଥିଲି, ସେତେବେଳେ ମଧ୍ୟ। ଆପଣମାନଙ୍କ ମଧ୍ୟରୁ ଅନେକଙ୍କ ସହିତ ମୋର ଘନିଷ୍ଠ ପରିଚୟ ଥିଲା। ମୁଁ ଖୁସି ଯେ ଆଜି ଆପଣମାନଙ୍କୁ ସମସ୍ତଙ୍କୁ ଭେଟିବାର ସୁଯୋଗ ପାଇଛି।

ମୁଁ ବିଶେଷ ଭାବରେ ପ୍ରଧାନମନ୍ତ୍ରୀ ଇଶିବାଙ୍କୁ ଏହି ଫୋରମରେ ଯୋଗଦାନ କରିଥିବାରୁ ଧନ୍ୟବାଦ ଜଣାଉଛି। ତାଙ୍କର ମୂଲ୍ୟବାନ ଭାଷଣ ପାଇଁ ମୁଁ ତାଙ୍କୁ ଅଭିନନ୍ଦନ ଜଣାଉଛି।

ବନ୍ଧୁଗଣ,

ଭାରତର ବିକାଶ ଯାତ୍ରାରେ ଜାପାନ ସର୍ବଦା ଏକ ଗୁରୁତ୍ୱପୂର୍ଣ୍ଣ ଅଂଶୀଦାର ହୋଇଆସିଛି। ମେଟ୍ରୋରୁ ଉତ୍ପାଦନ, ସେମିକଣ୍ଡକ୍ଟରରୁ ଷ୍ଟାର୍ଟ-ଅପ୍ ପର୍ଯ୍ୟନ୍ତ, ପ୍ରତ୍ୟେକ କ୍ଷେତ୍ରରେ ଆମର ସହଭାଗୀତା ପାରସ୍ପରିକ ବିଶ୍ୱାସର ପ୍ରତୀକ ପାଲଟିଛି।

ଜାପାନୀ କମ୍ପାନୀଗୁଡ଼ିକ ଭାରତରେ ୪୦ ବିଲିୟନ ଡଲାରରୁ ଅଧିକ ନିବେଶ କରିଛନ୍ତି। ଗତ ଦୁଇ ବର୍ଷ ମଧ୍ୟରେ, ଘରୋଇ ନିବେଶ ୧୩ ବିଲିୟନ ଡଲାର ହୋଇଛି। ଜେବିଆଇସି କହିଛି ଯେ, ଭାରତ ସବୁଠାରୁ ପ୍ରତିଶ୍ରୁତିବଦ୍ଧ ଗନ୍ତବ୍ୟସ୍ଥଳ। ଜେଟ୍ରୋ କହିଛି ଯେ ୮୦ ପ୍ରତିଶତ କମ୍ପାନୀ ଭାରତରେ ବିସ୍ତାର କରିବାକୁ ଚାହାଁନ୍ତି, ଏବଂ ୭୫ ପ୍ରତିଶତ ପୂର୍ବରୁ ଲାଭବାନ ହୋଇଛନ୍ତି।

ଅର୍ଥାତ୍, ଭାରତରେ, ପୁଞ୍ଜି କେବଳ ବୃଦ୍ଧି ପାଏ ନାହିଁ, ଏହା ବହୁଗୁଣିତ ମଧ୍ୟ ହୁଏ!

ବନ୍ଧୁଗଣ,

ଆପଣମାନେ ସମସ୍ତେ ବିଗତ ଏଗାର ବର୍ଷ ମଧ୍ୟରେ ଭାରତର ଅଭୂତପୂର୍ବ ପରିବର୍ତ୍ତନ ବିଷୟରେ ଭଲ ଭାବରେ ଜାଣନ୍ତି। ବର୍ତ୍ତମାନ ଭାରତରେ ରାଜନୈତିକ ସ୍ଥିରତା ରହିଛି। ଆର୍ଥିକ ସ୍ଥିରତା ରହିଛି। ନୀତି ଏବଂ ପୂର୍ବାନୁମାନରେ ସ୍ୱଚ୍ଛତା ରହିଛି। ଭାରତ ବିଶ୍ୱର ସବୁଠାରୁ ଦ୍ରୁତ ଅଭିବୃଦ୍ଧିଶୀଳ ପ୍ରମୁଖ ଅର୍ଥନୀତି। ଏବଂ, ବହୁତ ଶୀଘ୍ର, ଏହା ବିଶ୍ୱର ତୃତୀୟ ବୃହତ ଅର୍ଥନୀତି ହେବାକୁ ଯାଉଛି।

ଭାରତ ବିଶ୍ୱ ଅଭିବୃଦ୍ଧିରେ ୧୮% ଯୋଗଦାନ ଦେଉଛି। ଭାରତର ପୁଞ୍ଜି ବଜାର ଭଲ ରିଟର୍ଣ୍ଣ ଦେଉଛି। ଏକ ଦୃଢ଼ ବ୍ୟାଙ୍କିଙ୍ଗ କ୍ଷେତ୍ର ମଧ୍ୟ ରହିଛି। କମ ମୁଦ୍ରାସ୍ଫୀତି ଏବଂ କମ ସୁଧ ହାର ରହିଛି। ପ୍ରାୟ ୭୦୦ ବିଲିୟନ ଡଲାରର ବିଦେଶୀ ମୁଦ୍ରା ଭଣ୍ଡାର ରହିଅଛି।

ବନ୍ଧୁଗଣ,

ଏହି ପରିବର୍ତ୍ତନ ପଛରେ ଆମର "ସଂସ୍କାର, ପ୍ରଦର୍ଶନ ଏବଂ ରୂପାନ୍ତର" ଆଭିମୁଖ୍ୟ ରହିଛି। ୨୦୧୭ରେ, ଆମେ ଗୋଟିଏ ରାଷ୍ଟ୍ର-ଏକ ଟିକସ ଆରମ୍ଭ କରିଥିଲୁ। ଏବେ ଏଥିରେ ନୂତନ ଏବଂ ବଡ଼ ସଂସ୍କାର ଆଣିବା ପାଇଁ କାମ ଚାଲିଛି।

କିଛି ସପ୍ତାହ ପୂର୍ବରୁ, ଆମର ସଂସଦ ମଧ୍ୟ ନୂତନ ଏବଂ ସରଳୀକୃତ ଆୟକର ସଂହିତାକୁ ମଞ୍ଜୁରୀ ଦେଇଛି।

ଆମର ସଂସ୍କାର କେବଳ ଟିକସ ବ୍ୟବସ୍ଥା ପର୍ଯ୍ୟନ୍ତ ସୀମିତ ନୁହେଁ। ଆମେ ବ୍ୟବସାୟ କରିବାର ସହଜତା ଉପରେ ଗୁରୁତ୍ୱ ଦେଇଛୁ। ଆମେ ବ୍ୟବସାୟ ପାଇଁ ଏକ ଡିଜିଟାଲ ୱିଣ୍ଡୋ ଅନୁମୋଦନ ବ୍ୟବସ୍ଥା କରିଛୁ। ଆମେ ୪୫୦୦୦ ଅନୁପାଳନକୁ ଯୁକ୍ତିଯୁକ୍ତ କରିଛୁ। ଏହି ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ଏକ ଉଚ୍ଚସ୍ତରୀୟ ନିୟନ୍ତ୍ରଣ ବିମୁକ୍ତି କମିଟି ଗଠନ କରାଯାଇଛି।

ପ୍ରତିରକ୍ଷା ଏବଂ ମହାକାଶ ଭଳି ସମ୍ବେଦନଶୀଳ କ୍ଷେତ୍ରଗୁଡ଼ିକୁ ଘରୋଇ କ୍ଷେତ୍ର ପାଇଁ ଖୋଲାଯାଇଛି। ଏବେ ଆମେ ପରମାଣୁ ଶକ୍ତି କ୍ଷେତ୍ରକୁ ମଧ୍ୟ ଖୋଲି ଦେଉଛୁ।

ବନ୍ଧୁଗଣ,

ଏହି ସଂସ୍କାର ପଛରେ ଏକ ବିକଶିତ ଭାରତ ନିର୍ମାଣ କରିବାର ଆମର ସଂକଳ୍ପ ରହିଛି। ଆମର ପ୍ରତିବଦ୍ଧତା, ଦୃଢ଼ ବିଶ୍ୱାସ ଏବଂ ରଣନୀତି ଅଛି। ବିଶ୍ୱ ଏହାକୁ କେବଳ ସ୍ୱୀକୃତି ଦେଇନାହିଁ ବରଂ ପ୍ରଶଂସା ମଧ୍ୟ କରିଛି।

ଏସଏଣ୍ଡପି ଗ୍ଲୋବାଲ୍ ଦୁଇ ଦଶନ୍ଧି ପରେ ଭାରତର କ୍ରେଡିଟ୍ ରେଟିଂକୁ ଉନ୍ନତ କରିଛି।

ବିଶ୍ୱ କେବଳ ଭାରତକୁ ଦେଖୁନାହିଁ, ଏହା ଭାରତ ଉପରେ ନିର୍ଭର କରୁଛି।

ବନ୍ଧୁଗଣ,

ଭାରତ-ଜାପାନ ବ୍ୟବସାୟ ଫୋରମର ରିପୋର୍ଟ ବର୍ତ୍ତମାନ ଉପସ୍ଥାପିତ ହୋଇଛି। କମ୍ପାନୀଗୁଡ଼ିକ ମଧ୍ୟରେ ବ୍ୟବସାୟିକ ଚୁକ୍ତିଗୁଡ଼ିକୁ ବିସ୍ତୃତ ଭାବରେ ବର୍ଣ୍ଣନା କରାଯାଇଥିଲା। ଏହି ପ୍ରଗତି ପାଇଁ ମୁଁ ଆପଣମାନଙ୍କୁ ସମସ୍ତଙ୍କୁ ଅଭିନନ୍ଦନ ଜଣାଉଛି।

ମୁଁ ଆମର ସହଭାଗୀତା ପାଇଁ କିଛି ପରାମର୍ଶ ମଧ୍ୟ ବିନମ୍ରତାର ସହିତ ରଖିବାକୁ ଚାହେଁ।

ପ୍ରଥମ ହେଉଛି ଉତ୍ପାଦନ। ଅଟୋ କ୍ଷେତ୍ରରେ ଆମର ସହଭାଗୀତା ଅତ୍ୟନ୍ତ ସଫଳ ହୋଇଛି। ଏବଂ ପ୍ରଧାନମନ୍ତ୍ରୀ ଏହାକୁ ବିସ୍ତୃତ ଭାବରେ ବର୍ଣ୍ଣନା କରିଛନ୍ତି। ଏକାଠି, ଆମେ ବ୍ୟାଟେରୀ, ରୋବୋଟିକ୍ସ, ସେମି-କଣ୍ଡକ୍ଟର, ଜାହାଜ ନିର୍ମାଣ ଏବଂ ପରମାଣୁ ଶକ୍ତିରେ ସମାନ ଚମତ୍କାରକୁ ପ୍ରତିକୃତି କରିପାରିବା। ସମ୍ମିଳିତ ଭାବେ, ଆମେ ଗ୍ଲୋବାଲ ସାଉଥ୍, ବିଶେଷକରି ଆଫ୍ରିକାର ବିକାଶରେ ଏକ ମହତ୍ତ୍ୱପୂର୍ଣ୍ଣ ଅବଦାନ ଦେଇପାରିବା।

ମୁଁ ଆପଣମାନଙ୍କୁ ସମସ୍ତଙ୍କୁ ଅନୁରୋଧ କରୁଛି - ଆସ, ଭାରତରେ ତିଆରି କର, ବିଶ୍ୱ ପାଇଁ ତିଆରି କର। ସୁଜୁକି ଏବଂ ଡାଇକିନର ସଫଳତା କାହାଣୀଗୁଡ଼ିକ ମଧ୍ୟ ଆପଣଙ୍କର ସଫଳତା କାହାଣୀ ହୋଇପାରେ।

ଦ୍ୱିତୀୟ ହେଉଛି ପ୍ରଯୁକ୍ତିବିଦ୍ୟା ଏବଂ ନବସୃଜନ। ଜାପାନ ଏକ "ଟେକ୍ ପାୱାରହାଉସ୍"। ଏବଂ ଭାରତ ଏକ "ପ୍ରତିଭା ପାୱାରହାଉସ୍"। ଭାରତ ଏଆଇ, ସେମିକଣ୍ଡକ୍ଟର, କ୍ୱାଣ୍ଟମ୍ କମ୍ପ୍ୟୁଟିଂ, ବାୟୋଟେକ୍ ଏବଂ ମହାକାଶରେ ସାହସିକ ଏବଂ ମହତ୍ୱାକାଂକ୍ଷୀ ପଦକ୍ଷେପ ନେଇଛି। ଜାପାନର ପ୍ରଯୁକ୍ତିବିଦ୍ୟା ଏବଂ ଭାରତର ପ୍ରତିଭା ମିଳିତ ଭାବରେ ଏହି ଶତାବ୍ଦୀର ପ୍ରଯୁକ୍ତିବିଦ୍ୟା ବିପ୍ଳବର ନେତୃତ୍ୱ ନେଇପାରିବେ।

ତୃତୀୟ କ୍ଷେତ୍ର ହେଉଛି ସବୁଜ ଶକ୍ତି ପରିବର୍ତ୍ତନ। ଭାରତ ୨୦୩୦ ସୁଦ୍ଧା ୫୦୦ ଗିଗାଓ୍ବାଟ ନବୀକରଣୀୟ ଶକ୍ତି ଲକ୍ଷ୍ୟ ଆଡ଼କୁ ଦ୍ରୁତ ଗତିରେ ଆଗକୁ ବଢ଼ୁଛି। ଆମେ ୨୦୪୭ ସୁଦ୍ଧା 100 ଗିଗାଓ୍ବାଟ ପରମାଣୁ ଶକ୍ତିର ଲକ୍ଷ୍ୟ ମଧ୍ୟ ରଖିଛୁ। ଏହା ସୌର କୋଷ ହେଉ କିମ୍ବା ସବୁଜ ହାଇଡ୍ରୋଜେନ୍, ସହଭାଗୀତାର ଅପାର ସମ୍ଭାବନା ଅଛି।

ଭାରତ ଏବଂ ଜାପାନ ମଧ୍ୟରେ ମିଳିତ କ୍ରେଡିଟ୍ ମେକାନିଜିମ୍ ଉପରେ ଏକ ଚୁକ୍ତି ସ୍ୱାକ୍ଷରିତ ହୋଇଛି। ଏହାର ଲାଭକୁ ଏକ ସ୍ୱଚ୍ଛ ଏବଂ ସବୁଜ ଭବିଷ୍ୟତ ଗଠନରେ ସହଯୋଗ କରିବା ପାଇଁ ବ୍ୟବହାର କରାଯାଇପାରିବ।

ଚତୁର୍ଥ ହେଉଛି ପରବର୍ତ୍ତୀ ପିଢିର ଭିତ୍ତିଭୂମି। ଗତ ଦଶନ୍ଧିରେ, ଭାରତ ପରବର୍ତ୍ତୀ ପିଢ଼ିର ଗତିଶୀଳତା ଏବଂ ଲଜିଷ୍ଟିକ୍ସ ଭିତ୍ତିଭୂମିରେ ଅଭୂତପୂର୍ବ ପ୍ରଗତି କରିଛି। ଆମର ବନ୍ଦରଗୁଡ଼ିକର କ୍ଷମତା ଦ୍ୱିଗୁଣିତ ହୋଇଛି। ୧୬୦ ରୁ ଅଧିକ ବିମାନବନ୍ଦର ଅଛି। ୧୦୦୦ କିଲୋମିଟର ଲମ୍ବା ମେଟ୍ରୋ ଲାଇନ ନିର୍ମାଣ କରାଯାଇଛି। ଜାପାନର ସହଯୋଗରେ ମୁମ୍ବାଇ ଏବଂ ଅହମ୍ମଦାବାଦ ହାଇ ସ୍ପିଡ୍ ରେଳ ଉପରେ କାମ ଚାଲିଛି।

କିନ୍ତୁ ଆମର ଯାତ୍ରା ଏଠାରେ ଅଟକି ନାହିଁ। ଜାପାନର ଉତ୍କର୍ଷତା ଏବଂ ଭାରତର ସ୍କେଲ୍ ଏକ ଉତ୍ତମ ସହଭାଗୀତା ସୃଷ୍ଟି କରିପାରିବ।

ପଞ୍ଚମ ହେଉଛି ଦକ୍ଷତା ବିକାଶ ଏବଂ ଲୋକ ମାନଙ୍କ ମଧ୍ୟରେ ସମ୍ପର୍କ। ଭାରତର ଦକ୍ଷ ଯୁବ ପ୍ରତିଭା ବିଶ୍ୱ ଆବଶ୍ୟକତା ପୂରଣ କରିବାର କ୍ଷମତା ରଖେ। ଜାପାନ ମଧ୍ୟ ଏଥିରୁ ଲାଭ ପାଇପାରିବ। ଆପଣ ଭାରତୀୟ ପ୍ରତିଭାକୁ ଜାପାନୀ ଭାଷା ଏବଂ ସଫ୍ଟସ୍କିଲରେ ତାଲିମ ଦିଅନ୍ତୁ, ଏବଂ ଏକାଠି ଏକ "ଜାପାନ-ନିମିତ୍ତ" କର୍ମଶକ୍ତି ସୃଷ୍ଟି କରନ୍ତୁ। ଏକ ଅଂଶୀଦାର କର୍ମଶକ୍ତି ଅଂଶୀଦାର ସମୃଦ୍ଧି ଆଡ଼କୁ ନେଇଯିବ।

ବନ୍ଧୁଗଣ,

ଶେଷରେ, ମୁଁ ଏହା କହିବାକୁ ଚାହେଁ - ଭାରତ ଏବଂ ଜାପାନର ସହଭାଗୀତା ରଣନୈତିକ ଏବଂ ସ୍ମାର୍ଟ। ଅର୍ଥନୈତିକ ତର୍କ ଦ୍ୱାରା ଚାଳିତ, ଆମେ ସମାନ ସ୍ୱାର୍ଥକୁ ସମାନ ସମୃଦ୍ଧିରେ ପରିଣତ କରିଛୁ।

ଭାରତ ହେଉଛି ଦକ୍ଷିଣ ବିଶ୍ୱରେ ଜାପାନୀ ବ୍ୟବସାୟ ପାଇଁ ସ୍ପ୍ରିଙ୍ଗବୋର୍ଡ। ଏକାଠି, ଆମେ ସ୍ଥିରତା, ଅଭିବୃଦ୍ଧି ଏବଂ ସମୃଦ୍ଧି ପାଇଁ ଏସୀୟ ଶତାବ୍ଦୀକୁ ଆକାର ଦେବୁ।

ଏତିକି କହିବା ସହିତ, ମୁଁ ପ୍ରଧାନମନ୍ତ୍ରୀ ଇଶିବା ଜୀ ଏବଂ ଆପଣ ସମସ୍ତଙ୍କ ପ୍ରତି ମୋର କୃତଜ୍ଞତା ପ୍ରକାଶ କରୁଛି।

ଆରିଗାଟୋ ଗୋଜାଇମାସୁ!

ଆପଣଙ୍କୁ ବହୁତ ବହୁତ ଧନ୍ୟବାଦ।

TKM