Ka Indian Railways ka la pyntreikam ïa ka rukom ïada ïa ki rel kaba la shna hi hapoh ka ri kaba la tip kum ka Kavach 4.0 ha ka bynta jong ka Mathura-Kota jong ka lynti Delhi-Mumbai kaba bun ki nongleit nongwan. Ka dei ka sienjam kaba kongsan ban pynthymmai ia ka jingshngain jong ki lynti rel ha ka ri.

U Myntri ka tnad kam rel jong ka sorkar pdeng u Ashwini Vaishnaw u la ong, “Ka Railways ka la shna hapoh ka ri, pynwandur ïa ka Kavach Automatic Train Protection System, da kaba ioh mynsiem na ka jingthmu jong u Myntri Rangbah Duh kaba iadei bad ka ‘Atmanirbhar Bharat’. Ka Kavach 4.0 ka dei kaba donkam bha ia ka teknoloji. La mynjur ia ka da ka Research Designs & Standards Organisation (RDSO) ha u bnai Naitung 2024. Bun ki ri kiba la kiew bha ki la shim por 20-30 snem ban shna bad buh ia ki kor iada ia ki rel. Ka jingpyntreikam ia ka Kavach 4.0 ha ka bynta jong ka Kota-Mathura la lah ban urlong ha ka por kaba lyngkot bha. Kane ka dei ka jingjop kaba khraw bha.”

Ki rukom iada ia ki Rel kiba kham tbit kiba iahap bad ki jinglong jingman ha kiwei kiwei ki ri, kim shym la don ha ka ri ha kine ki 60 snem ba la dep hadien ba la ioh ia ka jinglaitluid. Ban pynthikna ia ka jingshngain jong ki rel bad ki nongleit nongwan, dang shen la pyntreikam ia ka Kavach.

Ka Indian Railways ka dang pynkhreh ban pyntreikam ia ka Kavach 4.0 ha ki lynti bapher bapher ha kylleng ka ri hapoh ka por kaba lyngkot kaba 6 snem. Palat 30 hajar ngut ki briew ki la dep ban shah hikai shaphang ki kor Kavach. Ka IRISET (Indian Railway Institute of Signal Engineering and Telecommunications) ka la iasoi ia ka MOU bad ki 17 tylli ki Engineering kolej, ki jaka pule, ki skulbah kiba la mynjur da ka AICTE na ka bynta ban pynrung ia ka Kavach kum shi bynta jong ka jinghikai BTech jong ki.

Ka Kavach kan iarap ia ki nongniah rel ha kaba kyntiew ia ka jingstet jong ka rel da kaba pyndonkam ia ki brake kiba biang. Wat ha ki jaka ba duna ka jingiohi kum u lyoh, ki nongñiah rel kin ym donkam ban peit shabar na ka jaka niah ban ïoh ïa ka jingbatai. Ki nongniah ki lah ban iohi ia ki jingtip ha ka Dashboard ba la buh hapoh ka jaka niah.

Kaei ka Kavach?

● Ka Kavach ka dei ka rynsan kaba kyntiew ia ka jingshngain jong ki rel ba la shna hi hapoh ri. La shna ia ka ban iada na ki jingjia aksiden da kaba peit bad tehlakam ia ka jingstet jong ki rel.

● La shna ia ka ha ka Safety Integrity Level 4 (SIL 4). Kane ka dei ka kyrdan kaba halor tam jong ka jingpynwandur ia ka jingshngain.

● Ka jingpynkhreh ia ka Kavach ka la sdang ha u snem 2015. Ia kane la test bha haduh palat 3 snem.

● Hadien ba la pynbha la pyntreikam ia ia kane ha South Central Railway (SCR). Ia ka syrnot kaba nyngkong la ai ha u snem 2018.

● Da kaba pynshong nongrim ha ki jingshem ba la ioh ha ka SCR, la pynmih ia ka bynta kaba kham bha ‘Kavach 4.0’. La mynjur ia ka ha u bnai Jymmang 2025 na ka bynta ka jingstet kaba haduh 160 kmph.

● Ia ki bynta jong ka Kavach la shna hi hapoh ri.

Ka jingbun bynta ka Kavach

Ka Kavach ka dei kaba bun bha ki bynta. Ka jingpyntreikam ia ka Kavach ka long kumjuh kum ka jingseng ia ka kompeni telecom. Ka kynthup ia kine ki sub-system harum:

1. Ki RFID tag: La buh ha man la ka 1 km jong ka lynti rel. La buh ruh ia ki tag ha man la ki signal. Kine ki RFID tag ki ai jingtip shaphang ka jaka ba ka rel ka don.

(Ka jingbuh ia ki RFID Tag ha ki lynti rel)

2. Ki Tower Telecom: Ki tower telecom kiba pura kynthup ia ka jingpyniasoh bad ka optical fiber bad ka jingpynbiang bording la buh ha baroh kawei ka lynti ha man ka katto katne kilomitar. Ia ki kor Kavach ba la buh ha ki rel bad ki nongpyniaid ia ka Kavach ha ki steshon ki ioh ban iakren da kaba pyndonkam ia kine ki tower. Ka long kumba buh ia ka rynsan kaba pura kumba long kum jong ki nongpyniaid telecom.

(Ki tower Telecom ba la buh)

3. Ka Loco Kavach: Ka iatreilang bad ki RFID tag ba la buh ha ki lynti bad ka pynpoi ia ki jingtip sha ki telecom tower bad ka ioh ia ki jingtip na ka radio na ka Station Kavach. Ka Loco Kavach ka dei ruh kaba la pyniasoh bad ka rukom pynsangeh jong ki rel. Kane ka pynthikna ba la pyndonkam ia ki brake lada don ka jingjia ba kyrkieh.

(Ka jingpynbiang ia ka Loco Kavach)

4. Ka Steshon Kavach: La buh ha man la ki steshon bad ki bynta jong ki block. Ka ioh jingtip na ka Loco Kavach bad ki lad signalling bad ka ai jingtip ia ka Loco Kavach na ka bynta ka jingshngain ha kaba iadei bad ka jingstet jong ki rel.

(Ka jingbuh ia ka Station Kavach)

(Station Kavach)

5. Optical Fibre Cable (OFC): La buh ia ka fiber optical ha ki lynti iaid kaba pyniasoh ia kine ki system baroh na ka bynta ka jingpynpoi ia ki jingtip kiba stet bha.
6. Ka rukom ai signal: Ka rukom ai signal la pyniasoh lang bad ki Loco Kavach, Station Kavach, ki tower telecom, bad kiwei kiwei.

(Ka Operation Panel jong u Station Manager)

Kine ki system ki dei kiba donkam ban buh, ban peit bniah, bad ban pynshisha khlem da pynthut ia ka jingtreikam jong ka kam rel kynthup ia ka jingleit jingwan kaba jur jong ki rel kit briew bad ki rel kit mar.

Ka jingiaid shaphrang ka Kavach

Ka Indian Railways ka pynlut palat ia ka T 1 lak klur ha ka shisnem ha ki kam kiba iadei bad ka jingshngain. Ka Kavach ka dei kawei na ki sienjam ba la shim ban kyntiew ia ka jingshngain jong ki nongleit nongwan bad ki rel. Ka jingiaid shaphrang jong ki kam bad ka jingstet jong ka jingpyndonkam ia ka Kavach ka pyni ia ka jingkut jingmut jong ka Indian Railways ban pynthikna ia ka jingshngain ha ki lynti rel.

*****