U Myntri Kam Pohiing jong ka Sorkar Pdeng uba dei ruh u Myntri ka Tnad treilang u Amit Shah u la pyniaid ia ka jingialang kaba heh ha New Delhi ban bishar bniah ia ka jingpynkhreh ban iada na ka jingshlei um ha ka ri. U Myntri Kam Pohiing ka Sorkar Pdeng u la bishar bniah ruh ia ki lad ki lynti kiba jrong samoi ba la shim ban pynduna ia ka jingma jong ka jingshlei um ha ka ri bad ki sienjam ba la shim halor ki rai ba la shim ha ka jingialang kaba la long ha u snem ba la dep.

U Myntri Kam Pohiing jong ka Sorkar Pdeng bad Myntri ka Tnad treilang u la iamir jingmut ruh ia ki teknoloji bathymmai ba la sdang da baroh ki tnad na ka bynta ban tehlakam ia ka jingshlei um bad ban pyniar ia ka kam jong ki ha ka jingialang. U la ban jur halor ka jingpyndonkam pura ia ka teknoloji ba iadei bad ka haw haw da ki tnad sorkar pdeng bapher bapher na ka bynta ban tehlakam ia ka jingshlei um bad ka rukom pyndonkam ia ka um.

U Amit Shah u la ong ba hapoh ka jingialam jong u Myntri Rangbahduh ka ri u Narendra Modi, ka jingiada na ki jingjia lynshop ka mariang ha India ka iaid shakhmat da ka ‘Rukom Treikam Byn Ym Don Ka Jingduh Mynsiem Briew’. U la bthah ïa ka National Disaster Management Authority (NDMA) ban ïatreilang bad ki State Disaster Management Authority (SDMA) bad ki District Disaster Management Authority (DDMA) na ka bynta ban pynthikna ka jingpynphriang ïa ki jingpynbna ai jingtip lypa sha ki jaka nongkyndong bad u la kyrpad shuh shuh ïa baroh ki Jylla bad ki Union Territory ban pyntreikam ha ka por ia ki jingai jingmut ba la pyllait da ka NDMA na ka bynta ka jingiada na ka jingshlei um. U la bthah ia ka NDMA bad NDRF ban trei na ka bynta ka jingpeit ia ka jingshlei um ha ka jingiatreilang kaba pura bad ki jylla.

U Myntri Kam Pohiing ka Sorkar Pdeng, haba ai khublei ia ka Central Water Commission (CWC) bad ka India Meteorological Department (IMD) kiba la pynduna ia ka por ba donkam ban pynmih ia ka jingbatai lypa/jingai jingmut halor ka jingshlei um, u la ban jur ban pynkiew ia ka jinglong thikna jong ki jingbatai lypa. U Shah u la ong ba ki jaka peitngor ia ka jingshlei um jong ka CWC ki dei ban long katkum ki jingdonkam jong ngi bad katkum ki jinglong jingman ha kylleng ka pyrthei. U Shah u la ai jingmut ïa ka Tnad Jal Shakti, ka NDMA bad ka National Remote Sensing Centre (NRSC) ba kin peitngor ïa ki jaka shong um kiba mih na u thah bad ban shim ïa ki sienjam ha ka por kaba biang lada jia kano kano ka jait jingshlei.

U Myntri Kam Pohiing u la ban jur ba ka Tnad Road Transport and Highways (MoRTH)/National Highways Authority of India (NHAI) ki dei ban iatreilang bad ki jylla ban pynthikna ia ki jingkylla ha ka rukom shna ia ki surok bah jong ki jylla bad ki surok bah jong ki distrik ruh, khnang ba ka rukom pyntuid um ha ki surok bah kan long ka bynta kaba kongsan jong ki jingsaindur ia ka jingshna ia ki surok ban lait na ka jingshah tap um ki surok, lada jia ba jur slap.  Shuh shuh, ka NDMA ka dei ruh ban iatreilang bad ki bor synshar jylla na ka bynta ka jingiatreilang hapdeng ki tnad sorkar pdeng bad ki jylla na ka bynta ka jingpynkhreh bad pynduna ia ka jingshlei um.

U Myntri Kam Pohiing u la ban jur ban pynheh ia ka jaka khlaw ha ki thain wah Narmada bad u la ong ba lada kane ka jingpyrshang ka long kaba jop, yn sa shim ruh kum kine ki sienjam ha ki jaka jong kiwei pat ki wah. U la ong ba kane kan iarap ban pynim biang ia ka wah, ban pynduna ia ka jingtwa khyndew bad ruh ban ialeh pyrshah ia ka jingeh kaba mih na ka jingduna slap ha ka thain. U Amit Shah u la ong ba dei ban wad ia ki lad ki lynti kiba thymmai da kaba pyndonkam ia ka teknoloji na ka bynta ki lad jingiada kiba khlain na ka jingshlei um ha Bihar bad Uttar Pradesh.

Haba ïadei bad ka jingkiew jong ka jingshlei um ha ki jaka sor, u Amit Shah u la bthah ïa baroh ki tnad sorkar pdeng ban shim ïa ki sienjam kiba donkam, kiba biang por na ka bynta ban tehlakam ïa ka jingshlei um ha kine ki nongbah bad ban pynkhreh ïa ka plan kaba bniah na ka bynta ban tehlakam ïa ka jingshlei um ha ki nongbah kiba heh. U Shah u la pynpaw ia ka jingdonkam ban pynim biang ia ki jaka shong um bad ki lad pynroi ia ki jaka khlaw ban ialeh pyrshah ia ka jinglong kaba mih na ka jingjur slap ha ki por ba lyngkot ha ka por slap. U la ai jingmut ia ka Tnad Jal Shakti ba kan trei ban pynbha ia ka jinglong jingman jong ki jaka shong um ha ka thain Brahmaputra, ka ban long kaba kongsan na ka bynta ban iada na ka jingshlei um bad kumjuh ruh ia ki kam kamai kajih bad ki kam jngohkai pyrthei.

U Amit Shah u la ai jingmut ba ka National Dam Safety Authority (NDSA), ka IMD bad kiwei kiwei ki tnad kynthup ka NRSC ki dei ban iatreilang ban pynlong ia kum kane ka jingialang ha kaba lah ban khot ia ki riewshemphang ban iakren halor ka jingshlei um, ka kam ba iadei bad ka haw haw bad kiwei kiwei ki bynta. U Shah u la ong ba ha u snem 2014, ka India ka la sahdien bha ha ka liang ka meteorology, hynrei mynta hapoh ka jingialam jong u Modi ji ngi ia ryngkat kyrdan bad ki ri kiba la kiew shaphrang, mynta ngi hap ban long Ba Nyngkong.

Ha ka jingialang ki tnad kynthup ia ka IMD, ka CWC ki la batai bniah. Ki Tnad ba dei peit ki la pyntip ruh shaphang ka sienjam ba la shim halor ki jingbthah ba la ai da u Myntri Kam Pohïing ka Sorkar Pdeng ha ka jingïalang bishar bniah ïa ka jingshlei um kaba la long ha u snem ba la dep. Ki la pyntip ruh ia u Myntri Kam Pohiing jong ka Sorkar Pdeng shaphang ka jingpynkhreh jong ki na ka bynta ka aiom slap kaba mynta bad ka sienjam ha ki por ban wan. U Myntri Kam Pohiing u la pynpaw ia ka jingsngewhun halor ka jingpynkhreh da baroh ki tnad. U la kyrpad ban iatreilang bad baroh ki tnad na ka bynta ka jingshna ia ka software kaba lah ban ialeh pyrshah ia ka jinglong ka suinbneng da ka jingnoh synniang jong baroh ki tnad.

Hapoh ka jingialam jong u Myntri Rangbahduh ka ri, u Narendra Modi, u Amit Shah u buh hakhmat eh ia ka jingpynkhreh ban pynduna ia ka jingktah jong ka jingshlei um bad kiwei kiwei ki jingjia lynshop ki bor ka mariang. Man la u snem, u Myntri Kam Pohiing jong ka Sorkar Pdeng u ju bishar bniah ia ki lad pynkhreh na ka bynta ka jingshlei um bad katkum ka jingbthah jong u, la shim ia ki katto katne ki sienjam, kynthup ia ka jingpynkiew ia ka jingpeit lypa ia ka jinghap slap bad jingshlei um da ka IMD bad CWC na ka 3 sha ka 7 sngi bad ka jingpynbha ia ki rukom antad ia ka jingshit.

U Myntri Sorkar Pdeng ba dei peit ia ka Tnad Jal Shakti, u CR Patil, u Myntri Khynnah ka Tnad Kam Pohiing jong ka sorkar pdeng, Nityanand Rai, u Union Home Secretary, ki secretary jong ki tnad bad ki Tnad River Developmentand Ganga Rejuvenation, Earth Sciences, Environment, Forest and Climate Change, Road Transport and Highways, Chairperson Railway Board, Ki dkhot bad ki khlieh duh jong ki Tnad jong ka NDMA, ki Director Generals jong ka NDRF bad IMD, Chairman NHAI bad CWC, ki ophisar na ka NRSC bad kiwei kiwei ki tnad ba dei khmih ki la iadonlang ha kane ka jingialang.

***